سؤال للشباب والبنات

[بوزايد]

بسم الله الرحمن الرحيم



السلام عليكم ورحمة الله وبركاته


سؤال للشباب والبنات


للشباب : هل لو عرست بتعيش ويا اهلك بالبيت نفسه او بتسكن في شقه او بيت ثاني ؟ وليش ؟


للبنات: هل تفضلين تعيشين ويا اهل ريلج في بيتهم او في بيت لوحدكم ؟ وليش؟


اممم اول شي انا ببدأ عن نفسي

صح انه اهلي ربوني وكبروني بس لازم ايي يوم واستقر بروحي

وانا عن نفسي بعيش بروحي في بيت لاسباب منها


1- اول شي ابا اخذ راحتي وياها

يعني

اباها تلبسلي كل شي ( اكيد بيقولون هذا ما يستحي كيف يرمس جي ... عادي حرمتي ) يعني لو كنت في بيت اهلي صعبه تكون


ابا اطلع وقت ما ابا وياها يعني ما ابا حد يسالني وين رايح ووين ياي

ابا اعيش وياها رواحنا احسه روعه


اباها ادلعني وادلعها ( صدق ويهي لوح ) يعني لو كنا في بيت هلي ما بتقدر ادلعني جدامهم

2- ابتعد عن مشاكل الاهل


الا فلانه سوت والا والا فلانه طلعت ومن هالسوالف

[بوزايد]

وبس لو يا في بالي شي ثاني بخبركم

يالله خبروني عنكم

[شوق القلوب]

السلام عليكم..

طبعاً الاستقلاليه لا تقارن بأي شي..

:)

[طير الحب]

أمس بس أفكر اطرح هالموضوع...

طبعا انا من البداية كنت حاطه ببالي الاستقلال عقب الزواج لأنه شخصيتي استقلالية وايد واحب اكون حرة نفسي بمنزلي ...والحمدلله علاقتي 100% جيدة بأهل زوجي وما يمنع سكنا بروحنا من التواصل...بس نتيجة تجربة وتجارب الآخرين كل الي سكنوا مع اهل ازواجهم يعانون عدم الخصوصية بشكل كبير...وكلهم ندموا وهذا كلامهم...يعني ابسط الشغلات ما بيأخذ الواحد راحته فيها في منزل اهله لو كان بملحق مستقل ما أشجع أبدا سكن الزوجين مع الأهل.


زين تفكير جي لأنه اكثر الرياييل ما يحبون يتحملون المسوؤلية من البداية.

[ذنـيـنـي]

نحن عندنا في البيت جناح العرسان لوول
و هو قسم في نفس الفله, لكنه منفصل عنا بشكل كااااااامل
فيه صاله و غرفه و دريسينق روم و حمام و مطبخ صغير فيه ثلاجه و غساله و ميكروويف و فرن صغيروني ( يعني اقدر استقل فيه بنسبه 100%)

طبعا حاليا اخويه يالس فيه لأنه يبني بيت في الوقت الحالي, و حرام يأجر بيت بـ 50 الف دام انه يالس يبني, هذه الـ 50 الف بتنفعه في البناء

بالنسبة لي,, بصراحه ناوي اسكن في هالجناح الين ما اخلص بيتي, يعني بالكثير 3 سنوات, من عقب الزواج طبعا

و ثانيا, نحن بيتنا خالي و ما فيه حد

اخويه الكبير بيطلع من يكتمل بيته
اخويه الي اصغر مني يدرس في الخارج
و اخواني الصغار بعدهم كتاكيت

و الوالده بروحها و ما عندها بنات, فـ افضل انه حرمتي اتم عندها

هييه صح, و ثالثا, البيت الي ببنيه بيكون في نفس ارض بيتنا, يعني بعد ما بطلع من البيت

[ا ل غ ل ا]

هممممممممم // موضوع كنت أتناقش فيه من مده ..

أنا من رايي ،، أنه هالشي وكبداية للحياة الزوجية ،، أفضل أعيش في بيت أهله ،، وأنا عندي أسبابي
1- بناء علاقة جيده وقوية من البداية ويا أهله

2- يوم تكونين جدامهم تحسين أنهم بدوا يفكرون فيج كفرد من العايلة ،، بس لو ما كانوا يشوفونج إلا في الويك أنك ،، همممممممممم بتكونين غريبة والتعاملات معضمها بتكون رسمية ..

3- الريال أول ما يعرس صعب عليه يجلب حياته 180 درجة عشان توافق متطلبات الزواج ومسؤولياته ،، فبتكون طلعاته المعتاده نفس ماهيه ،، يعني لين ما يتعود أن فيه انسانه تترياه في البيت ،،

4- لما يكون الزوج في الدوام فلنفرض دوامه مسائي ،، لأنه الصبح ما بيكون مشكله كوني أبا أشتغل ،، الواحد يمل في البيت روحه ،، خاصة وقت العصر ،، ووايد حلو أني أيلس ويا أم ريلي العصر ،، سوالف وشاي وفوالة ،، وااااااايد حلوة هالأجواء ،، حتى الزوج نفسه يوم بيرد البيت وبيشوف حرمته يالسه ويا أمه ،، والابتسامه مرتسمه على ويوههم هو نفسه بيبدى يحس براحة نفسية ,,

5- همممممممممم الريال أول ما يتزوج ،، غالبا يكون بادي من الصفر ،، فالامكانات المادية وايد مهمه ،، وعلى الحرمة أنها ما تضغط عليه من أولها لأنه بيطفر ،،


آخر شي ،، ما أمانع أني أعيش ويا أهله مدة لو 5 أو 10 سنين ،، بس يكون لي قسم لو صغير ،، يعني مطبخ وحجرة وصالة ..

والسموحة

ويسلموا :)

ا ل غ ل ا

[طير الحب]

الغلا...

بالعكس أنا انصح من البداية تكونين مستقله وانا من النوع اجتماعيه وعلاقتي جدا متينه فيهم وايد ياخذون رايي في كل شيء تقريبا ومثل بنتهم ما يدسون عني شيء وادخل المطبخ في الويك اند اذا خاطرهم بشيء انا اسويه ..وكووول معاهم حتى ما ايلس بغرفتي مول يادوب وقت النوم...يعني هذا مش مقياس اذا من البداية سكنتي بروحج.

وبالنسبة للملل نحن الي نخلق الملل...انا ريلي بحكم دراسته ياردوب يوصل عقب المغرب وانا طول الوقت مشغوله تعرفين شو عندي اشياء اخلصها يعني لا مجال للملل...يا اطبخ او على النت او العب ويا عبادي او اقرا او اسوي سبرايز له مثلا اي شيء اشغل وقتي.

[الملهم]

بالنسبة لي اممممم ..

يعتمد .. اذا انا خلاص مسيطر على الوضع يعني خلاص اشتغلت وراتبي يكفيني للعيش الهنيء ..
اكيد بنتقل الى بيت ثاني اريح لي .. والاسباب مثل ما ذكرته " اسباب حلوة وصحيحة ^_^ "

بس اذا بعدني ما كونت نفسي وعرست امبكر .. اكيد بعيشها عند اهلي وبصبر عليهم وبخليها تصبر على اهلي .. وبالمره طبعا اوفر على نفسي شراء مستلزمات البيت .. لين ما ايمع واكون نفسي ^_^ ..

الف شكر لك على الموضوع الغاوي ..

[الملهم]

هيه صح نسيت اقول .. مرات الاهل هم السبب في الاختلافات الزوجية ..
بعض الاهل يدخلون في الحياة الزوجية على كيفهم بدون اي مشاورات ..
سواء كان اهل الريال او اهل الزوجة ..

[ا ل غ ل ا]

الغلا...

بالعكس أنا انصح من البداية تكونين مستقله وانا من النوع اجتماعيه وعلاقتي جدا متينه فيهم وايد ياخذون رايي في كل شيء تقريبا ومثل بنتهم ما يدسون عني شيء وادخل المطبخ في الويك اند اذا خاطرهم بشيء انا اسويه ..وكووول معاهم حتى ما ايلس بغرفتي مول يادوب وقت النوم...يعني هذا مش مقياس اذا من البداية سكنتي بروحج.

وبالنسبة للملل نحن الي نخلق الملل...انا ريلي بحكم دراسته ياردوب يوصل عقب المغرب وانا طول الوقت مشغوله تعرفين شو عندي اشياء اخلصها يعني لا مجال للملل...يا اطبخ او على النت او العب ويا عبادي او اقرا او اسوي سبرايز له مثلا اي شيء اشغل وقتي.

كلامج صحيح :)

وأسأل مجرب ،،

ربي يسعدج يا أم عبادي ،، ولا يغير عليكم

هممممممممم بحط كلامج في عين الاعتبار ،،

لكن أنا من خلال صديقاتي لي معراسات جريب وماشالله هالسنة أكثر سنة ،، الرياييل شلوهم عني تقريبا سبع من صديقاتي عرسوا لصيف لي طاف ،، ربي يسعدهم ويهنيهم ،، اللي عايشات مع أهل الزوج ،، مرتاحات ويمدحون الأجواء
ولي عايشات بروحهم ،، يمدحون بعد لكن يذمون سالفة ــ أنها بروحها فيالبيت بدون ونيس

يعني أنتي عندج عبادي ،، ربي يخليه لج ،، لكن كعروس في أول سنة من الزواج .. هممممممم صعبة شوي أنها تكون بروحها ،،

وبعدين لا تنسين ،، الوحدة وتوفر الامكانات ،،ممكن تخلي الشيطان يلعب ملاعيبه ،، طبعا أنا ما أقصد البنات الأشراف ،، أقصد اللي ممكن عندها قابلية لأنها ترتكب شي غلط ،، سواء على النت أو على التيلفون ،، وياما سمعنا عن هالسوالف ،، وعذرها الوحيد ،، ما عندي شي انتشغل فيه وأمل بروحي وهو فالدوام ..
وفي وايد رياييل يفكرون جيه على فكرة ،، أنه تكون تحت أنظار أهله في غيابه

بعني البيت المنفصل عن بيت أهل الزوج أفضل بوايد بعد أول طفل ،، لأنه بجذيه ،، إذا الزوج مب موجود ،، تلتهي بالولد ..



واختلاف الآراء لا يفسد للود قضية

[طير الحب]

الملهم ..المشكله متى ما طلعت كبرت...يعني اهل الزوج بيقولون رأيهم واهل الزوجه رأيهم وبتكبر المكشلة من جي لازم المشكله تكون في نطاق ضيف بين الزوجين فقط...وهذا يعتمد على ذكائهم.

الغلا...توى الناس وانا ما اعمم بس الغالبية العظمى...يعني اقرب مثال ربيعتي الي كانت رافضه تسكن بروحها واصلا عندها قسم خاص ببيت اهلي ريلها قامت تعاني من التدخلات سواء لطلعاتهم او يلستها في غرفتها بروحها...انا عادي كنت بروحي وبعد في امارة غير الي ساكنين اهلي واهله فيها كنت الوقت الفاضي اعود لهواياتي الي ادور وقت الحين اسويها...شوفي اهم شيء الوازع الديني يوم الحرمه بتخاف ربها ما بتغلط ان شاء الله حتى الفراغ ما يقدر يخليها تغلط وهاي الي تغلط عندها فراغ عاطفي كبير...وهذا الريال الي يبا مرته تكون تحت انظار اهله شكاك...


الرجل لازم من البداية يكون حاط بباله فكرة الاستقلال هي الشيء بيبين اذا هو قادر يتحمل مسؤولية زوجه وبيت وعيال لأنه ممكن بعضهم يحسون انه منزل مستقل مثل القيد مع انه الزواج ابدا مش تقيد لحرية الرجل او المرأة....وايد استانست بالنقاش معاج

[مــهــابه]

للبنات: هل تفضلين تعيشين ويا اهل ريلج في بيتهم او في بيت لوحدكم ؟ وليش

أولاً لازم اشـوف ظروف الريـال، لـو كان مقتدر ، ويقـدر يفـتح لي بيـت اكيـد راح ارتـاح بأستقلاليـتي
وعشـي ، اللي ماراح ارضـا بأحد يبنيـه غيري انا وزوجـي..

امـا لوكـان يعـاني من ظروف ماليـه صعبـه، او شي راح احـاول اقبل اني ايلس عند هلـه لمده بسيطـه طبـعاً

ولو أن الأفضـل ان استغـل فـ بيت الروحـي ،


بوزايد:
شكراً ع الطرح

[أمواج]

.
.
ذنيــني

أحــس نظــام بيــتكم نــفس نظــام بيــتنا

نحن فــ بيتنــا الطــابق اللي فــوق بس للـ متزوجيـــن
مسويــن اجنحــه وكل واحد ماخذ نصيـــبه
طبعــا واحد منهــم سكن عدنـا لين ماخــلص بيتـه وعقب انتقـل بس بعده جنــاحه محفووظ
لانه ايــي عدنا كل ويـكـ إنك أمــا الثــاني فبعده ساكــن لين مايخلص بيتـه وعقب بينتقل
وإخــواني الباقين جيه مفكرين يسوون
يعني بيورثوون الاجنحــه
، ،
انا بصـراحه مابغي اخوااني المتزوجين يظهروون من بيتنــا
احــسه أي شي والبيت فاضــي
عشان جيه اذا ظهروا مكــان ولا باتوا في مكــان ثاني امووت قهــر
أحــس الطابق اللي فووق مهجووور واخاف اسير له احــس إنه مسكــون


وبالنسبــه لســؤالك يـا بو زايد

للبنات: هل تفضلين تعيشين ويا اهل ريلج في بيتهم او في بيت لوحدكم ؟ وليش؟

اممم فالبدايه ابغــي اسكــن ويا اهــل زووووجي
بشــرط اكوون ساكــنه فجناااااااااح خااص جدا ولا حد يدشــه موليه إلا بإستـأذان
إليــن مانبنــي بيــت ويكون جاهز من مجاميعه
مافيــني من البدايه اخليــه يخســر على شقـه ولا على بيـت مستأجر وهو برووحه ورااه بنيــان
فالاحــسن نوفــر هالبيزات ونبنيــبهن بيــت لنــا
.
.

[ا ل غ ل ا]

الغلا...توى الناس وانا ما اعمم بس الغالبية العظمى...يعني اقرب مثال ربيعتي الي كانت رافضه تسكن بروحها واصلا عندها قسم خاص ببيت اهلي ريلها قامت تعاني من التدخلات سواء لطلعاتهم او يلستها في غرفتها بروحها...انا عادي كنت بروحي وبعد في امارة غير الي ساكنين اهلي واهله فيها كنت الوقت الفاضي اعود لهواياتي الي ادور وقت الحين اسويها...شوفي اهم شيء الوازع الديني يوم الحرمه بتخاف ربها ما بتغلط ان شاء الله حتى الفراغ ما يقدر يخليها تغلط وهاي الي تغلط عندها فراغ عاطفي كبير...وهذا الريال الي يبا مرته تكون تحت انظار اهله شكاك...


الرجل لازم من البداية يكون حاط بباله فكرة الاستقلال هي الشيء بيبين اذا هو قادر يتحمل مسؤولية زوجه وبيت وعيال لأنه ممكن بعضهم يحسون انه منزل مستقل مثل القيد مع انه الزواج ابدا مش تقيد لحرية الرجل او المرأة....وايد استانست بالنقاش معاج

طير الحب
========
كلامج صحيح الشيخة :) وبصراحة ،، بديت أفكر في الناحيتين ،،

وأنا استانست أكثر بالنقاش معاج


أمواج
========
تفكيرج وربي يفوقج ويوفقنا معاج ههههههههه

[الثعلب الرمادي]

انا ما اريد اتزوج لكن يوم بشتغل كمهندس بتكون عندي الامكانيات اني اعيش بروحي يكون عندي خدم يهتمون بالبيت مثل حياتي هنيه في المانيا بطبيعتي انا ريال احب الهدوء و الحرمة صداع و الاطفال مصيبة والمصيبة بتكون اكبر لو حط الريل حرمته مع اهله هنيه المشاكل و الصداع بيكون عنيف و لو سالتني راي فبقولك هذي حياة كريهة و قذرة و الريال اللي تحده الظروف انه يعيشها لازم يكون قلبه كبير و يتحمل كل يوم مشكلة