أبو البنــــــــــات

[الشوق]

ام عبادي .. حبيبة قلبي ..
البنت احن على ابوها من الولد وهذا شيء معروف..هذا ما في جعبتي للآن..
هالشي انا اشهد فيه ودايما اردده في عايلتي ..
البنت اتفكر في اهلها اكثر عن الولد .. اتحاتيهم .. اتخاف عليهم ...
.
.
وجان ع قصة البوي او لبس البوي وتصرفات البوي .. فهذا سبب من الاسباب اللي يخلي البنت اتكون بوي اكثر من انها انثى ..
.
.
طير الحب :) في انتظار عودتج يالغاليه
لا اتطولين وايد
خويتج/ الشوق

[الجنيه]

السلام عليكم ورحمة الله وبركاته ...

كنت اتوقع ان هالزمن ولى وانطوى مع صفحات السنين بس للأسف الواقع يطبع بصماته بكل قسوه علينا ...

يا ما شفت بنات يعانون من معاملة الأب القاسيه والسيئه والسبه انه محروم من الأولاد الي يشيلون اسمه من بعده ... جارنا الله يرحمه كان عنده 9 بنات وكان يكرههم بمعنى الكلمه ويبي الولد الي يشل اسمه بعد هالبنات كلهن ياه ولد عقب اكثر من 12 سنه وطبعا تجاهل البنات ولا اهتم فيهن ومن كثر غيضه منهم كان ايوز بناته وهن صغار يعني 15 او 16 ما يخليهن يتم عنده وحتى الدراسه حرمهم منها لانهم بنات وما يحتايونها ,, مر الزمن وكبر الولد المدلع الي كانن خواته الخمس الباقيات ( للحين ما عرسن ) مثل خداماته وحده تكوي له ووحده تطبخ له والثانيه اتشوف طلباته وجذي والابو يشدد عليهم يسون له الي يباه ويوم كمل الولد 16 سنه تزوج وحده عمرها 24 وهو وحرمته بهدلوا خواته والاب الي تعرض لحادث واصبح مقعد وكان يصيح مثل الياهل ع حالته وحالة بناته وبنفسه تمنى لو ما ياب هالولد ..

الله لا يقول وحد غيره يتعرض لنفس الي صار له بس الواحد يحمد الله ع النعمه كان ولد والا بنت كله من الله واييب رزقه وياه ...

أخوي عكس الناس ما يبا أولاد لأنه يعرف ببلاويهم دوم يقول ابي بنت عشان اتكون حنونه علي

الله يهدي الجميع ان شاءالله

الشوق ... مميزه من يوم عرفتج ,,, موفقه

[حلم الطفوله]

السلام عليكم

أبو البنات ... لقب قد يثير استياء الرجال وقد يروق لهم في أحيانٍ كثيرة

مشكلتنا في المجتمع تكمن في المسميات نفسها وبكلام الناس وبمن سيخلف اسمي من بعدي

حتى إنني لأعتقد بإن الرجل يتزوج فقط لكي يؤسس امبراطورية ذكور تخلف اسمه من بعده ويتفاخر بذريته من الذكور

في حين أنني أرى نماذج متناقضه في واقعي ... زميلتي لديها أربع بنات ... تشكر الله عليهن
وتخبرنا بحديث زوجها ... : هالبنات عندي بالدنيا ...على الأقل لو كبرت بحصل قلب يحبني وحضن يضمني وكلمة بو فاطمه كم تسوى عندي ....كافي إني ضمنت دخول الجنة بوجودهن رؤية وكلام منطقي ...لكن ...ما زالت زميلتي تطلب منا الدعاء لها بالولد حتى تضمن أمومتها الحقيقة بوجود الولد

نموذج آخر ... زميلة أخرى ... لديها ثلاث بنات ...

وفي حملها الرابع تمكن منها الخوف وتملكتها العصبية لدرجة أنها خافت أن تتعرف على نوع المولود ...
خوفا من تهديد زوجها بالزواج عليها إذا أنجبت البنت الرابعه ...

(يعني إذا عرف عقب الولاده إنه ولد بيخليها ؟ وإذا كانت بنت بيزوج عليها ؟ صدق شد أعصاب

بالنسبه لواقعي .... أشعر بمدى تعلق إخوتي ببناتهم تحديدا ... ولا أنسى كلام أخي ... ( هذه الغاليه إلي بترحمني يوم بكبر)

بس تدرون ..البنات والأولاد تربيتهم اتأثر عليهم بالمستقبل ... يعني قربهم أو بعدهم عن العايله يكون على أساس تربيتهم والتماسك الأسري إلي تربوا عليه ...

الشوق ...موضوعج رائع تسلمين