يوم نحس في حياتي

[ذنـيـنـي]

دائما نشوف مواضيع مثل
اجمل يوم في حياتك,
اطرف موقف صارلك,
موقف ما تنساه و اشياء من هالنوع


في هالموضوع كل واحد يقولنا عن ظرف صعب مر فيه,
أو يوم نحس مر عليه
و حتى مواقف مضحكه و فكاهيه لكنها صعبه

قولولنا شو صار له بالضبط بالتفصيل الممل...

[مايهزك ريح]

يوم نحس .. اليوم اللي وصلت فيه لسنغافورة في العيد .. كانوا ملخبطين لنا في الغرف ..

بيني وبين الصغاريه اكثر من عشر غرف .. بلعت السالفة ..ودخلتهم حجرتهم واطمنت عليهم .. وسرت غرفتي ..أول ما دخلتها .. جان ألقى واحد فيها .. طبعا انا تميت جيه

سكرت الحجره .. والحمدلله انه مالاحظ اني دخلت

سرت للمسؤول اللي في الفندق .. وقلت له عن اللي استوى .. عطوني غرفه ابعد من القبليه

وبعد ربع ساعة اتصل لي المدير يتعذر عن اللي استوى .. وقال لي بعطيك ليموزين ايكشتك في البلاد أو اسوي لك late check out ..بس انا طلبت انه يعطيني غرفة connecting عشان عيال اختي ما يكونون بعيدين عني ..

بس كان يوم نحس من اوله .. لأنه الطياره اتأخرت عن موعدها .. ويينا الفندق ولقينا اللخبطة ..
وما لحقنا على أول Tour ..واضطريت اني ازيد يوم .. عشان الحق اشوف الأشياء ..

وبعد اول يوم الوالدة انخفض عندها السكري وايد .. وتمت تعبانه طول الليل .. واعتفسنا ..
بس كانت رحلة حلوه .. صح اني شفت الويل .. لكن يله .. تغيير

[طير الحب]

يحليلك ما يهزك ريح...بس أكيد استمتعتوا بباجي السفرة..

[صدى جوفي]

الـسـلام عليكم،،

كـان يوم نـحس بالقو ..

كـان عندنـا عرس ربيعتي وهي أساسـاً وحدة من الأهل والعرس كـان فراس الخيمـة..

مرت عمي نست موبيل عمي الآيميت فالبيت فدقت لي أييبـه معاي.. والآيميت قد القفعـة فمـا وسعتـه الشنطـة .. فكنت شالتنـه وفالسيارة عطيتـه أختي تحطـه فشنطتهـا..

@ ظهــرنا سيـارتين من عيمان - ومـا كنت مرتاحة من الروحـة - .. وأول ما خلصنـا من شارع الامــارات الا السيـارة وقفت عــلينــا - نحـاسـة ..!- مــا عليـه السيارة الثانيـة موجودة وركبنـاهـا للقاعـة ..

@ فـالقـاعـة يت مكـالمـة لموبيل عمي .. ظهرته من الشنطـة - شاشـة الموبيل منكسرة ..!!!- >>>>> تميت متلومـة طول الوقت

@ عقب العرس ركبنـا مع عمي وأختي بحظنهـا عمور .. وعمي يسوق انتبهت أن عباتـه ظـاهرة برع .. بطلت الباب والسيارة تتحــركـ وسحب التـاير عباتهــا وعمور بحضنـهـا .. بس الحمدلله الله ستر

مـا تسوى علينـا الروحـة والله

[ألم ترى]

بسم الله الرحمن الرحيم
هلا ناصر


اليوم الحزين
مداوم ع الاسعاف فوصل لنا خبر عن حادث وحالة وفاه
ونحن سايرين واول ماوصلنا شفت واحد ملحف بشرشف ابيض
والله كان قلبي يدق بسرعه وانا من النوع اللي ما اخف من هاي السوالف كونها مني وفيني كـ خدمه 9 سنوات
المهم سميت بالرحمن وشلت الشرشف عن ويهه ف طلع رفيجي الروح بالروح !

اللهم يرحمه وتجاوز عنه

اليوم النحس
كنت اكلم لماح يوم كان اسمه المنحوس وهذا اول يوم اكلمه تقريبآ وهو كان يكلمني عن النحاسه هههه
جان ادعم باب البيت وخبرته عن السالفه فقالي ها شو قلتلك !
وانا بعدني اكلمه وصلت لـ الملعب جان ادوس هوز مال ماي وانطر واتعصب عليه الشغاله ههههه
عاد ف هالسالفه امنت بأن المنحوس منحوس فديتك يا احلى منحوس


اليوم المضحك
كنت اعايب رفيجي وانا يالس امثل واضحك الشباب عليه جان ينطر ادريس ههههه
عاد تعال اسمع الضحك وين واصل ياريال صدق لوااامه !
مرت الايام وجان يصير له نفس الموقف اللي صار ليه
وامسات كان مارلي البيت ويالس يضحك ع عمره ويذكرني بالموقف


اليوم الاجمل
بشكل خاص انا احب اتوفق ف شغلي وخاصه ف الحوادث
لما اشوف شغلي صح والمصاب مرتاح من شغلي ف والله اني ارتاح كل الارتياح
عاد لما اوصل الدوام والله ربعي يلوموني وكل شوي واحد يقولي الاسعاف مايسوى من دونك !
وانا مول ما احمر واخضر من هالرمسه واخاف اخيب ظنهم فيه مع ان سمعتي واصله لـ مراكز ثانيه
وكم مره حاولوا ينقلوني لـ الافضل بس المسوؤل عني مايرضى ابد حد ينتقل من عنده !


شكرآ ع الطرح

[مــهــابه]

اممم يـوم نحـس ، واحس انه فـعلاً نحس..
يــوم عرس اختـيه ، يـقول لكـم رحـت الصـالون ورجعـت وكشخـت
وخـلاص بسيـر الصـاله يادوب البس الفـستان واتوكـل..
تـخيلوا ، مـاعرفـت البس الفسـتان عدل ، لأني كـنت مســتعيلـه
وفـ الاخيـر انقص الفســــتان ، اتوهقـت شو اسوي الحين..

مـاباجي ع العرس إلا سـاعتين ،اممم وفسـتاني فيـه حركات وربشه هب حيالله خيـاط يعدلـه
ألف وألف ادور خيـاط عدل ، والكل يقول ماعرف

وخلاص الكل سـار الصاله ، وانا دمعـتيه فـ عيني شو الحل.؟؟


الفسـتان مب منه فـايده، اممم شو اسوي

قـلت خلاص مابسير العرس، اشـوي وجان ايي اخـويه ويقـول لي طوفي بنسير نشتري لج فسـتان

مارضيـت ، كيف اطلع فـ السناتر بالمكياج والتسريحـه

المهم راح اخويـه واشـترى الفسـتان يحليلـه ع ذوقــه ، ولبسـته رغم انه كـان طويل علي بس ماكـان امبيـن لأنه منفووش شوي..

ووصلـت الصاله مـتأخرة ، الكـل يضحكـ علي ، بس ذاكـ اليوم

صـدق حسيـت هب انه يومي نحـس لا بل انـا نحسـه


ذنيني:
ثـانكس ع الموضوع

[طير الحب]

بو عبدالرحمن موقف وايد صعب...أكبر من انه الكلمات توصفه

[مايهزك ريح]

ألم ترى.... قلبي عورني يوم قريت اليوم الحزين ..

طير الحب .. استمتعنا .. بس لازم اتكون اشوية تنغيصات ..

مهابة ..يحليلج .. كله ولا الفستان .. مصيبة .. انتوا يالله يالله اتحصلون حد يخيط لين يوم العرس ..وين لو نفس اليوم ..يخترب فيه شي وادورين حد ايصلحة ..

[الثعلب الرمادي]

في احدى الروايات المشكوك في صحتها يروى ان الثعلب الرمادي و قبل الامتحان الكبير في الجامعة ذهب ليشتري بعض زجات الماء و نسى مفتاح شقته في السوبر ماركت و لم يعرف ذلك الا عندما وصل الى شقته التي تبعد نصف كيلو متر عن السوبر ماركت فضغط على ازرار بعض الشقق في العمارة التي يسكن فيها عل احدهم يجيبه و ياخذ زجاجات الماء منه فاجابته احدى الفتيات و الثعلب الرمادي يعرفها جيدا (يتبع) ...

[عنود الريف]

عاد ما بغيت الا انا اتذكر .. انا ام سلوم .. ما اذكر
وااايد مواقف انساها ومعرووفة بالنساية ...
بس بستمتع بمواقف الاعضاء الباجين ..

[ولد الحكومة]

وحليلج عنود الريف انتي بعد تنسييين !!! أكيد ناسيه انا منووووه ؟؟؟

امممم انا الصراحه ما كد حصل موقف .. .

عالعموم استمتعت بمواقف الاعضاء.


والسموووحه




اخوكم / قايد الريم

[ذنـيـنـي]

صارلي موقف لا أحسد عليه يوم سافرت السنه الي طافت, كانت نحاسة على مدى يومين و اسميني اضحك على عمري يوم اتذكر الي صار في هاليومين
=========
القصه كانت على يومين, الجمعه و السبت قبل ما اسافر ألمانيا

الجمعه, الساعه 8 و نص الصبح نشيت و تريقت كالعاده و و يلست ويا الوالده الله يطول عمرها
على الساعه 9 سرت اجيك على شنطتي و اشوف شو ناقصني و اكتشفت, اني مضيع جيس ثياب فيه 4 تيشيرتات و هذه هي بدايه القصه

قلت بطلع و بسير السيتي و باخذ ثياب بدال الي ضاعت, يوم وصلت هناك طلعت ناسي فلوسي في البيت, الي انقذ الموقف انه بطاقه البنك كانت في السيارة,, سرت سحبت و دفعت لهم. و عقب ما خلصت من محل الثياب مريت باريس جالاري و اشتريت عطر دنهل اليديد و طلعت من السيتي

رديت البيت و تغديت و عقب الغداء سرت وديت اخواني الحلاق عسب يترتبون قبل السفر, يوم طلعت من الحلاق ييت بدق السيارة سلف,, افففف ابطاريه اختربت, ياهي نحاسه جايستني , اتصلت باخويه و ياب سيارته و جرجنا البطارية و تحركت

رديت اخواني البيت و سرت اسلم على الشباب و تميت وياهم الين المغرب, عقب المغرب سرت اسلم على قوم يدي لأنه طيارتنا بتكون الساعه 7 الصبح,, تميت عندهم الين الساعه 10 و عقب طلعت و ركبت البيك أب " اعتقد انه اغلبكم يتذكر قصتي وياه " و حطيت فيه كل الاغراض و عقب سرت بيت عمي و حملنا اغراضهم في البيك اب و سرنا انا و ولد عمي المطار عسب اندخل السامان, خلصنا من المطار و دخلنا اغراضنا و ردينا عيمان.

الساعه 4 ولد عمي مر علي و سرنا انا و هو و اخواني الـ 3 المطار لأنه الحريم بيتأخرن عسب اليهال و جي, فـ ما بغينا نتاخر وياهم, يوم دخلنا المطار و عند اول نقطه تفتيش اخويه حط الهاند باغ في جهاز التفتيش و على حظنا الجهاز الي اخترناه ما فيه حاجز ورا يقبض الشنطه و و و و و طااااخ طاحت الشنطه و انكسر الدنهل الي اشتريته الصبح ووووووو انجب على الكاميرا عاد انا تعقدت و مزاجي تم متعكر

يوم وصلوا اهلي الوالده قالت نفاد ينفدها من غرشه, سر خذلك عطر من داخل على حسابي عاد منو قالها تقولي اخذ على حسابها لوول


المهم

استوت الساعه 7 و ركبنا الطيارة و اقلعت و حطيت راسي ورقدت,, يمكن كملت أقل عشر دقايق, ولنه الاخ ولد عمي يقولي ناصر قوم قوم, كيف يشغلون الآي بود ( اخيييييج من وين طلعلي هذا )

بغيت ارقد مره ثانية, لكن ما رمت ( لاحظو تراني من الساعه 8 اليوم الي قبله ناش و ما رقدت غير هذه الـ10 دقايق يعني 24 ساعه + 7 ساعات في الطياره, يعني 31 ساعه)
وصلنا مطار ميونيخ و خلصنا جوازاتنا و كلنا مستانسين و سرنا عسب نشل الاغراض,, كل الشنط موجوده الا وحده,, وييينها شنطة ناصر ,, عاد قوم يا ناصر و سر و سو بلاغ بفقدان الشنطه و تم في المطار ساعه و نص عقب ما خلصت من مشكله الشنطه, سرنا نستلم سياراتنا و حملنا فيها الاغراض ( صارت 33 ساعه متواصلة بدون نوم )

ركبت السيارة و صديت ورا, ولنه الجماعه ناقع بينهم البكس و قاموا يتضاربون على الاماكنعسب يرقدون,, طبعا كل واحد منهم ماخذ زاويه و راقد, عاد نحن كلنا خمسه في السيارة و السيارة ام 9 و محد واعي غيري انا و اخويه الصغير -مايد-
انطلاقنا كان من مدينة ميونيخ في ألمانيا, الي بلدة زيل آم سي في النمسا و الطريق في الظروف العاديه ياخذ 3 ساعات من القياده كـ حد ادنى و في اوقات الزحمه تستوي 4-5 ساعات ( انا مب راقد)


قبضت الدرب و الجماعه الي وياي رقود مع انهم راقدين فليل, و راقدين في الطياره, قبضت الدرب بروحي و اسمع اغاني المانيه على الـ FM مالهم و مايد كان يالس جدام و يسولف وياي مرات ( اصغرهم لكن اريلهم )

سقت لمدة ساعة بدون مشاكل, و على الساعه الثانية بديت اسطل و اشوف الشارع شارعين قمت ارش على ويهي ماي عسب ما ارقد ( والله انه من كثر ما كانت عيني تغمض كنت ابطل حلجي عسب اير ويهي و اتم عيوني مفتوحه, بالضبط شكلي كان جي لوول ) عاد يوم شفت عمري مول مب رايم اسوق, اتصلت بالوالده في السيارة الثانيه, اللووو امييه اقفوا في اول استراحه, قالت لييش, قلتلها اوقفوا, مالكم خص ليش

نزلت من السيارة و تميت اركض شرات الخبله عسب اتنشط, و سويت حركات هبله و غبيه بس اهم شي عندي اني اصحصح, خلصت من الركض و الحركه و خذتلي ريدبل عسب يعطيني جوانج و اصحصح و اوصل بالسلامه

كملت دربي الحمدلله بدون مشاكل و وصلت زيل ام سي و لقينا الفندق الي حاجزين فيه
طلعت ويانا العيوز مال الفندق و راوتنا غرفنا, عاد اخويه اول ما وصل دخل الحمام -و انتوا بكرامه- و انا كنت انتظره على السرير على اساس اني ادخل عقبه و غفلت من كثر التعب و ما وعيت بعمري الا و انا ناش ثاني يوم الصبح و ثياب السفر علي, تخيلوا حتى الجوتي و انتوا بكرامه ما فصخته

الوالده قالتلي اني رقدت 15 ساعه تقريبا خخخخخخخخ

اول ما نشيت سرت ادور شنطتي و تذكرت انها ضاعت,
عاد الحمدلله,أنا و أخويه نلبس نفس القياس, سرت تسبحت و بدلت ثيابي و نزلت السوق على اساس اني باخذلي ثياب, افففففففف
اليوم الاحد و كل شي مبند, في نفس اليوم اتصلت بولد عمي في البلاد و قلتله ياخذلي 3 جنزات و 5-6 تيشيرتات, لأنه كان بيلحقنا عقب يومين

قزرت عمري بثياب اخويه الين ما يابلي ولد عمي ثياب يديده



و الحمدلله عدت المشكله على خير
من اتذكر هالسالفه اقول يا عساها ما تستوي لا لعدو ولا لصديج

[طير الحب]

نا صر ذكرتني بزيلامسي وايامها متولهه اروحها بس تعال زيلامسي مافيها محلات لبس (المحلات الي فيها غاليه اكثرهم يروحون ميونيخ للشوبينج) منطقه جبليه مشيء الي السوبرماركت كنا ساكنين مجابل مكادونالد...الله يكتب لنا نزورها مرة ثانية هالمرة مع عبادي ان شاء الله

[شوق القلوب]

السلام عليكم..

نـــاصر..

أنبني ضميري..

حرام كنت مضايج و انا يالسه اضحك...

..

آآسفه و الله ..
^_^

عسى ربي يرزقك بأيام.. حلووووووووه... تذكرها كل وقت و كل وقت و كل ساعه .. ^_^

[ذنـيـنـي]

شي محل عقب الكنيسه الي صوب الساحه
خذت منه 2 برمودا و polo-shirt لأني ما بغيت البس وايد ثياب من عند اخويه,

كلهم طلعوا بـ 20 يورو لوول