.. إذا حاب اتسولف معانا اتفضــل ..

[المقاتل]

.. الســــلام عليكم ورحمـــة الله وبركاته ..

شحالكم ؟؟ عساكم إلا بخير ؟؟

في الواقع ، أنا هنا يالس أقرا المواضيع الموجوده وماشاء الله في أعضاء طرحوا مواضيع جميـله يستحق الواحد انه يقراها .. ويفرفش فيها . وبعد لحظه .. وبعد شويه .. وبعد ثواني .. قلت في خاطري ليش ما اكتب موضوع فرصه للي حاب يسولف ويبدي رايه ويشــارك ويتكلم عن عدّة قضايا منوعه .. ولو يكتب نبذه بسيطه عن السالفه إلي في راسه .

خلوني اشرح لكم اكثر .. عضو = يكتب إي سالفه في راسه قابله للنقاش = الأعضاء الثانيين يتناقشون معاه = عضو آخر يكتب سالفه أخرى .. وهكذا .. الموضوع هذا ماله شروط غير إن كل واحد يكتب بطريقه مرتبه ويحاول يلوّن الخطوط ويخلي الموضوع يستوي حلو بمعلوماته وبشكله و يحاول يتجنب أسلوب الشات .

وتفضـــلّوا وترا الــــباب مفتوح للجميــــــــع وما عليكم إلا انكم تفكروّن في سالفه في راسكم وتكتبونها .

وإن شاء الله فكرة الموضوع تعجبكم

اخوكم

المقاتل

[المزوحي]

مرحبا بك المقاتل ...
ومادري تكون السالفة منعاده 6000 مره
لكن قبل كنت اسرع عسب أوصل .. ولاحظت ماشي فايده من السرعةوإذا تبغي مثال بعطيك اليوم أجرب مثال ..

طلعت بسيارتي بعد ماقريت على عمري وتوكلت وسرت الدوام ...
أشوف الناس مسرعة في شارع حده 80 والناس تسوق 100-120
قلت الله يهديم وبكيفهم

واحد ياي مستن يعني قوم عني وسو لي درب
قمت عنه وخذت اليمين
مع إنه نحن في النفق

هو سار قبلي وانا ما اشوفه وقفتني الإشارة .. وكنت على اليمين 3 سيارة ولقيته على اليسار 3 سيارة
أظن تساوينا !
لبقت الإشارة خضراء نستعد للانطلاق وشكلها مش انطلاق سباق
واللي ورايه متغصص مني وده ينول يضربني .. لأني شفته تاك حياته في المنظره .. ترى اللي جدامي
شال طن من جهاز ومايمشي .. قلت بجاوزة وبسير ... ما استوى .. اللي ورايه كلهم جاوزوني
وعقب حاولوا إيوون جدامي لكن ماقدروا ..

وانا كنت قبلهم .. ترى اللي يسرع وكل شويه يضرب بريك ينقهر اكثر من اللي يمشي بالراحات ..

ويوم رديت من الدوام خذت شارع الإمارات ... توني أمشي 100 أشوف واحد لاصق عنده نيسان بترول قلت في خاطري والله ماقمت .. لأنه يوم احترمهم واقوم .. يسرع ويمر جدامي وياخذ اقصى اليمين .. عيل شو الفايدة .. سير على اليمين من قبل الدرب فاضي وانا على اليسار لأني بسير سيده أساسا ..

تميت في خطي على اليمين واسوق 100 وعقب خذت طريج الشاحنات .. تصدق ..
كل ما ابغي انتقل اشوف هذاك اللي يسوق 1000 يقوم اللي جدامه وإيي واحد غيره ويخوزه هو .. وكل واحد يسوي نفس الحركة ...

عقب في زحمة خفيفة .. التج السيد ... انا روحت وهم بعدهم .. قلت صدق ماشي فايده من السرعه ..
كلنا وصلنا نفس المكان ...

بس حبيت يعني اقولكم عن السواقة .. والناس كيف مستعيله وخاصة قبل الفطور .. اخ عليهم هااي اخلاقيات صايم ..

اونه قوم انا صايم .. ليش عيوني يعني انا اللي ضارب الصينية بخمس !

[الاسطوري]

وعليكم السلام ..

الفكره حلوه يالمقاتل
وبالتوفيق

"المزوحي"

ياخـوي هدي اعصابـك ماتسوى عليك وصـدق انا بعد انقهـر من الحركـه
هاي ان عقب مايديم لك وتخوز عنه يتجاوز يعني يستهبل
عليك ولا شو بس القهر يوم تكون
مستعيل شويه
وتلاقي شارع زايد مثلا 5 سيارات يمشون صوب بعض بنفس السرعه 90
واللي وراهم يمشون اقل منهم من زياغ 80 وكل شويه
بريكات ونحن اللي متلعوزين وبصراحه
صرت أحب آخذ حقي
وانا في الشارع اللي يسوي لي حركـه اردها فيه يعني مره كنت راد من
صوب القرهـود لجميـرا وجدامي واحد اجنبـي ومره وحـده
يلس ينظف الجامه وخيس موتـري مع
ان موتري ماكان مغسول
فنظفت الجامه ورد سواها مره ثانيه فقهرتني الحركه لأنه سواها مرتين
فرحت جدامـه اوني نظفـت الجامـه مره وشفتـه يلس
ينظف جدامته وعقب ماخلص رديت
انظف جامتي ورد
نظف جامته ورديت انظف جامتـي اشوفه ماسوا شي بس خف وابتعد
عني خفيت وسكت وقبل ماخوز عنه بعد نظفتها تعرف
لازم تكون الرؤية 5000000% ولا
ماشوف جدامي
وعقب ما تجازوت وركبت على جسـر المركز التجاري اشوفه يلس ينظف
الجامـه وشكلـه سبنـي شويه وحصلـت اجـر بـس
يعني كنت مرتاح غلط فحقـي
وخذيت بثاري

الاســـطـــوري
أخوكم

[المزوحي]

الاسطوري .. تدري ظهرت الساعه 5 اشوف الناس مسرعه قلت خير باجي ساعه على الفطور وإلا نسوا الجدر على الغز .. ويوم رديت كل سيارتين يتسابقون .. بس اللي يقهر زيادة يوم هندي يلف عليك والله اسير جدامه وأدح بريك .. يتم يضرب هرن ويتحرطم ...

هي قبل ما يأذن الحين ..بقول شي .. مره وانا ساير الدوام ... واحد كان يخسس في موتر ثاني والله تميت اضحك .. قلت أكيد هو سوى حركه من جيه هذا مقهور ! يستاهل ..

[الدلووووعة]

الصراحة السرعة ابد مانها فايده بس فيها مظره

انا مرات ماحب اركب ويا اخويه لنه مرات يسرع ويلس يديم حق اللي جدامة عسب يفتحله الطريج
يوم اقوله ليش جي تسوي يقولون ها السيد حق اللي يمشون اكثر عن 80 وهيل
دياي يوم يمشون خل يسرون السد الثاني بس احب اسير ويا ابويه لنه حده ان ساق 80 ^_^

[ألم ترى]

بسم الله الرحمن الرحيم ..

هلا والله بـ مقاتل الواحات ..

نورت بيتك ومحلك ياخوي ..

ع العموم شو رايك كل شهر تنزل لنا موضوع فيه قضية معينه ! ..

يعني كل شهر تعرض لنا قضية والاعضاء يناقشونك فيها ..

منها تفيد او بمعنى اخرى نخلي الاعضاء يدخلون ف جو فيه نقاش لجل نعرف اللي ما نعرفه ..

ومحد يدري وين بنوصل بأفكارنا وإن شاء الله القضايا العقيمة تلقى لها حل ف ضيافة البل ! ..

والله يوفقك لما تحبه وترضاه حبوب ..

[تحفه]

هي صح في شارع الامارات .. كل الخطوط 180 .. ماشي يمين يسار لول كل الناس تسابق ..

حتى مره كنت انا اسوق للجامعه امشي على 100 .. وحليلي اول مره آي هالشارع متفلسفه ماخذه الخط اليمين .. ما اشوفلكم غير شاحنه من هالكبار والعراض لازقه وراي واتهرن .. اونه ياشرلي اسرع .. ونا هههخخ اكبر طاف ..

[سبيجة]

السلام عليكم


أكيد حابين نسولف ..أخويه المقاتل ... ومشكور على هالعزيمه



سوالف السرعه هاي ,,,كانت مقتصرة على الشباب بس حالياً ما شاء الله البنات قاموا ينافسون الشباب وكلنا استوينا متساوين ... ويا ويلها البنيه ...لو فكرت تديم حق واحد من الشباب ...... ولاحظ انه ابنيه تسوق


شخصياً استوالي هالموقف ...وانا ما كنت مسرعه وايد .... بس كنت مثبته السرعه وما ابا اجيس البريك عسب ما يخوز التثبيت وارد اثبت مره ثانيه ..... وبو الشباب مب راضي يخوز عن السيد اليسار ولا بعد يوايج من الجامه اللي في النص ...وفي خاطره يقول ...ما تم بعد غير انتي تبيني اخوز عنج

طبعا تم بحركه بطيئه جداً يخوز .... وانا خفيت عنه مول ..... قلت اخليه على راحته..وخذت السيد اليمين .....



ولو سلوموني المرور يوم واحد .... أول شيء بسويه بظهر قانون أي هندي أو راعي تكسي يندعم من وراء .....الغلط يكون عليه .... شو رايكم في اقتراحي ؟؟؟ مب غاوي ....



السموحه

[المزوحي]

الدلووووعة الراقين هم اللي يسوقون 80 شرات ابوج الله يحفظه
لكن 80 عة 80 يفرق
اللي اقصده مب واحد ياخذ 80 على شارع 5 سيدات وياخذ اقصى اليسار ويستهبل
وفي نفس الوقت صح أخوج يوم يديم لكن في من الناس تديم يوم تقومين ياخذون يمين !

[المزوحي]

بوظبي على طاري الشاحنة .. يديم لانه هو يعتبر هذا سيده ومايبغي حد يخرب عليه و100 الشاحنة غير عن اميتنا نحن !
استوت لي هالحركة ! أما اليوم كل دقيقه اشوف سيارتين يتسابقون بالرغم إنهم مايعرفون بعض ..

[المزوحي]

سبيجه .. القانون قانون حرمه وإلا ريال
وهاذيل عاد مافيهم مذهب يوم يشوفونج يايه ويتم مكانه

[ذنـيـنـي]

السواقه فن و ذوق و اخلاق

و تقريبا ولا كلمة من الكلمات المذكورة تنطبق على السواقة في الامارات


لي عودة

[دانة حتا]

انا ما في بالي فكرة بس انا مقهورة

واايد محترة ليش انه ناس دقوها خيانه فيني
ما اعرف اذا يناقشونها المشكله والا لا بس انا
زعلانه ..الخيانه شي مب حلو



اممممم بدور سالفه عقب وبخبركم

[المزوحي]

الوافدين يقولون " اون انتوا أصلا ماعندكم قانون .. من جيه قمنا نحن نخالف ..
يعني برايهم يكسرون موترنا عسب القانون اللي مايتروعون منه !

[المزوحي]

دانة حتا الخيانة روحها لها عالم ..

وعاد بخبركم منو منكم انخان ؟