السلام عليكم ورحمة الله وبركاته

نجمة الخليج .. هممم .. رايي في هالمسلسل؟؟

يرمس عن الواقع .. لكن .. واقع مبالغ فيه..!

فعلا نحن عندنا بنات مواطنات مايلبسون شيل .. لكن نسبتهم صغيره مقارنة بالبنات الى يلبسون شيل وعبي .. والى لاحظته انه في المسلسل بينوو عكس هالشي ..
من قبل كنا نتحرى الكويت دوله متحرره .. مايلبسون عبي وشيل .. بس تدرون انه هالشي غلط؟ .. هم مثلنا .. حتى البحرين مثلنا .. كلهم يلبسون عبي وشيل .. بس شي فئه صغيره ماتلبس..

انا ادرس ويا بنات على قولة وحده westernized مايلبسون لا شيله ولا عباه .. بس مهما كان هالبنات مستــــحيل .. يطلعون ويا شلة بنات وأولاد .. حالهم حالنا .. يرابعون بنااااااااات وبس

والشي العجيب.. يوم الأم ودتهم منتجع .. القروب بنات وأولاد .. ويترقصون ويغنون وكل شي O_o مهما كان .. ولا عايله اماراتيه ترضى بهالشي!!! .. تخلف بصراحه


الغلط في هالمسلسل انه ماكان شي رقابه .. شمعنى يوم يصورون مسلسل سعودي ولا قطري يتأكدون انه يوم الحرمه تطلع من البيت تلبس عباتها وشيلتها؟؟ .. لانهم يراقبون المسلسلات قبل ليعرضونهم


والياه .. صح انج صديقتي واعزج بس أخالفج الراي يوم قلتي انه وداد الكواري تعالج مشكلات المجتمع بهالمسلسلات ..
الشي الوحيد الى وداد الكواري تسويه هو انها اطلع الفضايح والى يستوي في الدول الخليجيه .. لانه نحن دايما نستر ونستر .. بس في الأخير .. محد يعالج المشكله .. بس فاااالحيين فالفضايح بصراحه
الدول الأجنبيه هم الى يعالجون هالمشكلات .. مثلا ..امريكا .. صح انها متخلفه .. بس على قل عندهم support groups وrehab.. مثلا .. اذا وحده مدمنه عالمخدرات .. تسير الرييهااب عقب يوم تخلص من هالمده .. تسير السوبورت قروبس كل اسبوع .. تتيمع ويا ناس كانو مثلها .. مدمنين .. وهايل يساعدون بعض يتخطون هالفتره الصعبه ..
اما نحن .. ماعنا شي من هالقبيل للناس .. بس نستر ولا نفضح .. مانساعد
عنا وايد مواطنين يشربون ويتعاطون المخدرات .. ولا اشيا بسيطه .. مواطنين حياتهم صعبه وعايشين في كآبه يوميا يشوفون ابوهم يظرب امهم .. هالشي يأثر في نفسييتهم .. يحتاجون مساعده ..
لو الدوله تسوي هالsupport groups والشعب يشجع هالشي بتحصلون وايدين يتعدلون شوي شوي .. بس نحن لا .. نعتبر كل شي فضيحه ولا فشيله .. ف انتم ساكتين ونستر الشي

مرات وايد يساعد ترمسون الغريب عن مشكلتكم بدل ماترمسون حد قريب .. لنه هالغريب مابيقدر يحكم عليك ولاشي.. لانه مجرد غريب!