حكمه: Failing to Plan is Planning to Fail

[ذنـيـنـي]

السلام عليكم و رحمة الله و بركاته
.
.
.
.


Failing to Plan is Planning to Fail

الفشل في التخطيط هو تخطيط للفشل


لنتمعن في معنى هذه الجملة البسيطة في كلماتها
و الكبيرة "جدا" في معانيها

هل صادف ان فشلنا في احد الأيام في شيء ما بسبب فشلنا في التخطيط له ؟
هل عدم التخطيط لشيء ما سيفسد علاقاتنا بالأشخاص الذين حولنا؟
هل عدم التخطيط في حياتنا سيؤدي الى خسارة مادية, بالاضافة الى الخسارة المعنوية؟

أسئلة تحتاج الى اجابة و سوف اضع لكم بعض الامثلة من خلال بعض القصص ولكم ان تستنتجوا مدى اهمية التخطيط في حياتنا من خلال بعض المواقف اليومية البسيطة جدا!!


القصة الاولى

عدنان و لينا و عيالهم خماسي و جونكر ساروا الديزني لاند في بغداد,
يوم وصلوا الحديقة
عدنان قال حق لينا خلينا نحجز حق العشاء من الحين
لينا قالت لااااااا, نبغي نلعب و بنتأخر و الصغارية فديتهم وايد متحمسين و ما نبغيهم يضايقون من اول الرحلة

و طبعا راي لينا هو الي مشى في النهاية

الجماعة دخلوا الحديقة
و لعبوا
و تعبوا
و ريحوا
و ردوا لعبوا
و حل عليهم الليل

لينا : عدنان خلنا نسير نعشي العيال
عدنان: خلينا بنسير هاك المطعم

دخلوا المطعم, و قالولهم انه الطاولات كلها محجوزه!!

قالوا, بنسير المطعم الي في المنطقة الثانية
شلوا عيالهم و مشوا لمدة ربع ساعة الين ما وصلوا المنطقة الثانية
و يوم وصلوا تفاجؤوا بأنه المطعم فيه 50 شخص على كل كاونتر ينتظرون دورهم

جونكر قام يصيح
و خماسي قام يتحرطم

الأم: بس حبايبي لا تصيحون, الحين بابا بيحصللكم مطعم تاكلون فيه
و الاب دور و دور و دور و ما حصل مطعم ما فيه زحمة

و اضطروا انهم يطلعون من ديزني لاند و يرجعون الى مدينة بغداد عسب ياخذون عشاء حق عيالهم
.
.
.
.

الخمس دقايق الي ما رضت لينا انها تضيعها في الحجز, خربت رحلتهم و حولتها الى رحلة مأساوية

هل تعتقدون انه هالشي كان بيصير لو عدنان و لينا خططوا للرحلة بشكل جيد
و عملوا حساب العشاء من اول ما دخلوا !!؟




لي عودة بقصص اخرى,,

و الى ذلك الحين اتمنى ان أعرف رأيكم في اهمية التخطيط لتفاصيل حياتنا اليومية

جميع الحقوق محفوظة لأخوكم
:smartass: ذنــيــنــي :smartass:

[الحاضر الغايب]

اكيد اخوي رايي من رايك

والتخطيط شي ضروري لتجنب العقبات قدر الإمكان

تسلم على الموضوع اخوي ذنيني .. وبإنتظار باقي القصص

من المتابعين

[ألم ترى]

بسم الله الرحمن الرحيم ..

هي والله اهم شيء التخطيط لـ كل صغيره و كبيره ..

شكرآ ع الطرح عزيزي بو نصره ..

بكون متابع لك إن شاء الله فلا تبطي ..

[ا ل غ ل ا]

عنوان جذبني من أول ما قريته ،، لأنه بصراحة أحاول قد ما أقدر أخلي هالحكمه هي اللي تمشيلي حياتي ..

والتخطيط شي مهم في الحياة لكن مرات الواحد خاصة يوم يكون خفيف يعني روحه أو هو وشخص واحد يكون على البركة ،، بس مب دوم يعني مرة في السنة هههههههههه

وسالفة عدنان ولينا وايد حلوة والمثال وايد داعم الموضوع "عسى محد تعور" هههههههههههههههههههههههههه


تسلم ولد العم على الموضوع الحلو والعرض الرائع

إلى الأمام ،، وفي انتظار الجديد

[وحي القلم]

Failing to Plan is Planning to Fail

:smartass:

التخطيط من أهم الأساسيات الى تساعد الواحد

على أنه ايخلص شغله فالوقت المناسب و يكون مثل ما هو يباه

بس بعد يمكن أوقات نخطط لأشيا و آخر شي .. ما تظبط ويانا

و فهالحاله المفروض أنـّـا نراجع أسلوبنا فالتخطيط

و نحاول مره ثانيه و ثالثه لين ما نوصل للى نبغيه

..

ذنيني

أسجل حضوري و اسمي بين المتابعين للموضوع

(( نتريا التكمله ))

[ريم العين]

ذكرتني بالتخطيط اللي بسويه.. يارب ينجح

......

الواحد قبل لايسوي شي لازم يخطط ويحط الافتراضيات اللي ممكن تستوي

الافتراضيات اللي تنجح والافتراضيات اللي تخّسر
المثال الاكبر الواحات
المشرفين لازم يخططون لواحتهم وكيف انها تنجح وكيف انها بتفشل مب بس يكونو مشرفين

لازم يخططون لكل شي قبل لايسوون اي شي

هذا مجرد رد خفيف

نتريا القصه الياي اخويه

[ذنـيـنـي]

عمبر و قمبر اصدقاء و يحبون يشوفون افلام مع بعض في السينما و اتفقوا انهم يسيرون السينما فليل

عمبر قرر انه يطلع قبل المغرب لأنه جسر القرهود يكون وايد مزدحم في المفترة المسائية و في نفس الوقت يبغي يصلي المغرب في مكان قريب من السينما عسب ما يتاخر على رفيجه

قمبر طلع على اذان المغرب,, و وقف يصلي في الدرب و عند جسر القرهود تأخر 20 دقيقة لأنه ما عمل حساب للزحمة و نسى يحسب وقت الصلاة قبل ما يظهر

يوم وصل قمبر الى سينما جراند لقى عمبر واقف ينتظر و هو معصصصصصب و يقوله انته مواعيدك مب مواعيد رياييل و انته ما تستحي و انته ما فيك مذهب و و و و و

هل كان هالشي بيصير لو كان قمبر شوي منظم وقته و مخطط للطلعه بحيث انه يوصل خلال الوقت المناسب ! ! ؟ ؟


نتيجة عدم التخطيط لهذه الطلعه, تأخرهم على الفلم نص ساعه كامله, عمبر زعل من ربيعه لأنه ما يحترم المواعيد و في النهاية عمبر حلف ما يطلع و يا قمبر مرة ثانيه لأنه يعتبر قمبر شخص مستهتر و " مب ويه حشيمه"

[دانة حتا]

انا اقول بعد التخطيط مهم في حياتنا بس بعد احس انه التخطيط الزايد عن حده
يخبل بالواحد ويدور براسه ... فلو انخطط بس باعتدال
حلو انه يكون في حياتنا شي اسمه صدفه
=======
القصه وااايد حلوه والشخصيات احلى

[ريم العين]

القصص حلوه بس قصيره

طولها وكمل القصص احب اقرا قصص عالنت بس خخخخخخ

[راعي الزعـامه]

الاسماء فنتك الصراحه
وشحاله قمبر بعد ؟؟

التخطيط في الاساس هو اساس العمل الناجح
كل مشروع بدون قاعده وبدون دراسه مسبقة يعتبر مشروع فاشل ونسبة نجاحه تحت 1%
وحتى في أبسط الامور نحتاي تخطيط مثل الطالب اللي عنده واجب مثلا ،، والا موضوع يكتبه ،، لازم يخطط لهالموضوع والواجب اللي عليه ،،

موضوع رائع وقصص ممتعه وجميله باسلوب حلو ،،
تســـــــــلم ،،

[طير الحب]

السلام عليكم...

مغفيه وأبا انام...بس موضوعك جذبني أحجز مكان لصباح اليوم التالي ..ان شاء الله

[هزاايم]

مرحبا بالفااشله هزاايم إلي معرووفه بالفشل في تخطيط لوقتها

===========

التخطيط شي ضروري بحيااة الفرد,,وخااصه بالموااعيد المهمه,,ولي تربطك بأشخااص إما يدد أو مهمين أو غيرهم,,انا اشهد إن عندنا وحده حياتها كل على ريماايندر حتى تعرف تقضي اشغاالهم بوقت إلي نقضي حناا لين مانلقط قشاارنا

===========

ذنيني

تخطيطك صاائب للموضوع
والشخصياات ترتوووبيه
ومن لم يعرف أهميه التخطيط...فهي المصيبه

متابعين للموضوع
وسلمت يمنااك لاهنت ي الشيخ

[كـلـكـلـووش]

زيت و زعتر

زيت يخطط لأساس الموضوع اللي هو ماسكنه اما زعتر فـ يتفرع للفروع و يترك الاساس .. زيت قدر انه ينظم 3 فعاليات بفضل هذا التفكير و هذا التخطيط السليم من اصل 4 و زعتر ما قدر ينظم و لا فعاليه من اصل 4 فعاليات لإن موعد الفعاليه عده و هو بعده يفكر في الافرع و تارك الاساس ..

======

من افضل عناصر القائد الناجح التخطيط السليم و البعيد المدى ..
من اكثر الاشيا اللي تعلمتها من تجارب غيري و تجاربي و تخطيطي و تخطيط غيري للأشيا اللي اسويها هي ان اهم عناصر التخطيط هي التخطيط درجه درجه .. اولا الاساس ثم الافرع ..
المشكله في ناس لما اتي تخطط لـ امسية شعريه مثلا .. ما تهتم بالقاعه و بالشاعر و بالدعايه ( الاساس ) لا .. تهتم بالكروت و القهوه و الاكل ( الافرع ) و هالشي يسبب الفشل و اللي ممكن ما يخلي هالامسيه انها اتم ..

الموضوع جدا جميل و ذكرني بواحد من الشباب ( اظن انك تعرفه ) و لو برمس فيه من اليوم لين باجر ما بخلص ..

بس من اجمل المواضيع اللي شفتها في الواحه المفتوحه من فتره ..

متابعين و يمكن لي عـوده ..

ســلام
كـلـكـلـووش

[طير الحب]

عدنــــــــــا...


بالنسبة لي أحب جدا التخطيط وأحب أني أكون مرتبة كافة الأمور ولو قبل الموضوع بفترة طويله يعني ببالي فكرة لشهر 11 اذا الله أحيانا...من اليوم أفكر وأخطط وأشوف كم محتاجة مزانية عشان أوفر...وهذا الشيء يريح الأعصاب عشان ما نتعرض لأي مفاجآت...

وأنا دايما أقول أي شخص عامل لازم ما يصرف راتبه كامل خلال أول أسبوع من الشهر لازم يكون هناك تخطيط للراتب عشان يضمن انه ما يتوهق إذا تفاجأ بحدث ما...وما اكثر المفاجآت.


وبالنسبة لتساؤلاتك...

هل صادف ان فشلنا في احد الأيام في شيء ما بسبب فشلنا في التخطيط له ؟
نعم ...وتعلمت درس

هل عدم التخطيط لشيء ما سيفسد علاقاتنا بالأشخاص الذين حولنا؟
لا أعتقد هذا شأن خاص

هل عدم التخطيط في حياتنا سيؤدي الى خسارة مادية, بالاضافة الى الخسارة المعنوية؟
نعم في بعض الأحيان


تسلم على الموضوع ناصر

[الغاليه]

اؤمن باهمية التخطيط في الحياة اليومية .. لكن انا تقريبا شرات لينا .. ابدن ماحب اني اقيد عمري بشي معين او اني اخطط للي بسويه في جدولي اليومي او الايام المقبلة .. وكنت دوم اتحرطم واتذمر من وحده هي بمثابة معلمة لي من كثر دقتها وتخطيطها اللي احيانا احسه زايد عن اللزوم واستغرب اكثر من بنات اهلنا اللي يستجيبون لها .. لا ويتفاعلون مع الترتيب اليومي واللي احيانا يقسم بالساعات والدقايق !! .. بالنسبه لي كنت وايد انزعج من هالشي واحسهم يصعبون الامور ويدققون فيها وهي ماتستاهل .. وعلى هالحاله ننقسم قسمين حد يأيد هالشي ومستانس عليه وحد متمرد ومتذمر ومايعيبه لدرجة انه احيانا يصير سوء فهم لانه ماا قدر اسير لها واقولها والله طريقتج في الحياة ماتعيبني .. مهما كان لها هيبتها واحترامها وفي الاول والاخير هي اعلم واكثر درايه وخبرة مني!!.. مع انه كل ال planning اللي نسويه في صالحنا اولا واخيرا ويضمن لنا سير الشي اللي نسويه على اكمل واتم وجه ..


طبعا اتكلم عن التخطيط اليومي وللايام الخاصة .. مب عن التخطيط المالي او الاداري


الين مافهمت نقطه كنت ماعرفها ... انه الانماط التفكيريه للشخصيات تختلف باختلاف تكوينها ... تصنف على نحو 6 انماط واللي يفهمها ويعرفها يقدر يفهم كل اللي حوالينه ويعرف طريقة تفكيرهم ويتفادى اي نوع من انواع سوء الفهم او التعارض اللي يمكن ايصير.. وهالموضوع ذكرني بنوعين هم ال judging type هالفئة من الناس اتحب الامور اتكون محكمة جدا ويفضلون العالم من حواليهم يكن منظم وعلى ترتيب معين .. وحياتهم دايما تمشي بالبرامج الزمنيه الدقيقة لكل شي بيسوونه ومابيسوونه .. وتنرفزهم ظهور الاشياء والمواعيد والاحداث اللي مش حاطينها في حسابهم ..

والنوع الثاني واللي اصنف عمري من ضمنهم يسمونه ال perceiving type وهالناس يحبون ياخذون الامور بمرونه وعفويه ويتجنبون التقييد.. ويمشون امورهم بالسهاله .. وماتشكل لهم الاحداث المفاجئة اي مصاعب او متاعب.. ويحاولون يكيفون اعمارهم معاها بسهوله ..

ومن عقبها استويت افهم تصرفهم وافهم التعارض في التفكير اللي يصير بيني وبينهم .. واستويت اعرف اأقلم عمري مع الوضع وأتعلم بعد منهم ..

والتخطيط اليومي على كل الاحوال اللي يقوم به يحس بالراحه والرضا عن اسلوب حياته لانه يعرف شو اللي له وشو اللي ماعليه .. وانا احينه استويت احب اعود عمري عليه واتعلمه ولانه اصلا وجود التخطيط افضل من عدم وجوده..

اما عن التخيطيط المالي والاداري .. فمحد منا يقدر ينكر اهميته .. لانه بدونه يقدر الواحد يضمن فشله المحتم ..

والنجاح يرتبط ارتباط وثيق بحسن التخطيط .. لانه بالتخطيط السليم الشامل والمتكامل يقدر الشخص يقود نجاحاته لأعلى المراتب اللي يرسمها ويخطط لها ..

والتخطيط هالايام عليه تركيز واهتمام كبير من قبل الاداريين واصحاب الاعمال ولانه بعد يعد عنصر هام من عناصر التنمية الادارية .. وصارت له دورات خاصه تدرس اصوله وفروعه مثل اساسيات التخطيط .. تقنيات التخطيط ... فنون التخطيط ... وغيرها


الموضوع حلو وعيبني .. وذكرني بنظرتي الاولى عن ال planning بشكل عام وكيف تغيرت نظرتي تجاهه مع الاياام واستويت احبه..

شكرا عالموضوع ذنيني ...