اكتشفوا جنوب افريقيا

[لبن مثلج]

السلام عليكم ورحمة الله وبركاته

مثل ماوعدتكم اني عقب مارد من سفرتي اعرض لكم صور من جنوب افريقيا (اللي مسويه رعب حق البعض :puppyeyes: ) لكن يوم بتزورونها بتغيرون رايكم فيها نهائيا مثل ما انا غيرت راي فيها بعد ماكنت مترددة وايد ،، واتمنى لو ارد لها مره ثانيه ..

المهم .. اول الرحلة كانت الى العاصمة الاقتصادية johannesburg اما العاصمه الحقيقيه والاداريه فهي pretoria،، واول ماظهرت من المطار انصدمت لان الجو كان :ice:

وبعدها سرنا منطقة (الفندق) منطقة اسمها نيلسون مانديلا اسكوير ،، الي في الصوره





وثاني يوم سرنا سفاري ،، والسفاري حديقة عووووووده كلها حشيش وممكرات حق السايير ،، يعني انت تدخل بسيارتك وادور عالحيوانات في السفاري ،، وعاد لبووونه صورتلكم ملك الغابه وشلته








وبعد هالحلوين




وعيبتني حركه في الحديقة واللي هي



طبعا حديقتهم او السفاري مالهم فيه حيوانات غريبه عجيبه لكن الابرز عندهم النعامه ومستغلين النعامه اسوا استغلال من الريش -الجلد-جلد الريل-اللحم ،، وعندهم جلود الحيوانات على افا من يشيل مثل الحمار الوحشي -الغزال-النعام-التمساح ،، بس الاغلى هو الحمار الوحشي يوصل سعره 5000 الى 6000 درهم

عندهم مطعم معروف عندهم وايد وهالمطعم تخصصه لحوم الحيوانات بانواعها ،، طبعا كلها مشويه

وعندكم هاي الصوره






اقول الصور وايد كبييييييييره ،، بس تعبت باجر بكمل لكم باقي الرحلة لانها طويله شويه

[بحر الموده]

وعليكم السلام ورحمة الله وبركاته

اختى لبن مثلج الحمدلله على السلامه

والموضوع وايد حلووو سفارى الله خاطرى اتجول لووول فنان وروعه صراحه

يعطيج العافيه ونتظر الصور البقيه وماقصرتى

[راعي الزعـامه]

حلوة الرحلة و جنوب افريقيا امبين عليها حلوه بعد ،،
بس لو اتصغرين الصور يكون احسن :)
ونتريا الصور اليايه ،،

[لبن مثلج]

هلا والله ،، الرحلة حلوة والسفاري احلى ،، بس ماعرف اصغر الصور علموني

[غرشوب]

الحمدلله ع السلامه..

بلاد في افريقيا لكن على الطريقة الاوروبية الراقية .. غاويه جوهانسبرغ

[راعي الزعـامه]

دقي رايت كليك عالصورة
بعدين open with
بعدين Microsoft office picture manager
وبتحصلين فوق Edit pictures
وبيفتحلج شي عاليمين
بتحصلين Resize دقي عليه
وغيري الحجم على كيفج

اتمنى انج فهمتي ،، :)

[مجموعة إنسان]

ما شاااء الله عليييج
تشوفين أسد وما تخافييين
أنا اشوووف قطو واشرد !!
يا شجاااعه

[قرموشة]

عـيل انا كنت أتحـراهـا سفاري وبـس مـن دون بنايــات لوول بس هـ البيووت الجـديــمــه ..
حـلوة والله !
تسلمين عـ الصـور لبـــن مـثللللللللج المنعـــــــشة .. ما قصـررررتي

[وحي القلم]

السلام عليكم و رحمة الله و بركاته

ماشا الله ياللبن شكله المكان وايد حلو

بس شقايل الشعب؟

شفت كتيب رحلات طيران الامارات عن جنوب أفريقيا

حاطين صورة مجموعه كلهم من هاذيل الى امشخطين على ويوههم brgll:

ايزيغون

..

[قلوب دبي]

:)

السلام عليكم

ما شاء الله عليج صور وايد حلوه ..
و شكلها بلادهم حلوه بعد ..
تسلمين و ما عليج زود ..

[منــاوي]

ما شاااء الله واااايد حلوه بلادهم
وشكلكم استانسوا فيها
تسلميـن اختي عـ الصور
ويعطيج العافيه

:)

[أنشودة المطر]

لبن مثلج

الحمد لله على السلامة :bow:

مشكورة على الصور الفنانة

أنا بعد كنت أفكر في شعبهم شقايل

و سمعت أنه اللي يسير لازم ياخذ احتياطات عن الملاريا و اللدغ و ما يلبس أشيا تلفت الحيوانات :puppyeyes:

و بعد أبغي أعرف في رايج

هل تصلح للصغارية؟؟

و أنا في انتظار البقية

[لبن مثلج]

مرحبا

كل الشكر حق اختي شوق القلوب انقذتني من الموقف الصعب :nono: اقصد الصور العملاقة :daleel:

على العموم انا ماكلمتكم عن الشعب ،، والله انا قبل ماسافر سمعت العجب عن هالبلاد ،، اشيا اتزيغ :nono: وبالذات عن الاجرام وانه مكان مافيه امان وسرقات ووووو،،، وقمت واستخرت فوق الاسبوع من زود ما كنت خايفة بس الموضوع اتغير تمااااااااااما يوم وصلت اهناك ... اول شي في المطار يت وحدة افريقيه وخذت عنا الشنط ورحبت بنا وقامت بالواجب وبعدين قالت يوم بتظهرون قولولهم ان عندكم 3000 راند ،، لان اذا قلتولهم اكثر عن هالمبلغ مابيظهرونكم ،، والله وسمعنا كلامها وعااااااااااادي الاجراءات كانت مثل الماي..

وبعدين يوم بدينا نظهر للرحلات والله قمت اشوف الشعب من انظف الشعوب ،، اتصدقون ان ريحتهم عطر ،، مثل العرب كيف يتسبحون بالعطور نفس الشي ،، ريحتهم فايحة من الصغير لي الكبير ومن الابيض لي الاسود.

الشعب مايخصه فيك ولا حتى يطالعونك،، في حالهم ،، خدومين وطيبين بالذات السود منهم لانهم شعب مضطهد ،، وطبعا اليهود والبيض من الهولنديين والايطاليين والامريكان والبريطانيين محتلين المناجم (الذهب والالماس) والمعادن الثانيه لانها دولة جدااااا غنية بالمعادن الثمينه ،، وماكلين حق الشعب الاصلي وامعيشينهم في حاله فقر ،، ولهالسبب مايدانون البيض من الاجانب لكن مب العرب او المسلمين ،، وعند السود لغات عديدة ومنها لغة المجرمين الي اتعلمتها brgll: وهاي اللغة شفره بين السود عشان البيض مايفهمون عليهم..

عندهم فرجان وااااااايد راقيه وحلوه ونظيييييييفه وبيوتهم مثل بيوتنا واحلى ، بس طبعا عاي فرجان الراهيين من الي ذكرتهم قبل ،، ومبينهم نيلسون مانديلا الرئيس السابق لبلادهم ...

ونسيت اخبركم ان المسلمين عندهم بكثره وعندهم وايد مسايد في المراكز والحدايق والمطار... بسبب الجاليه الباكستانيه المسلمه هناك.

بلادهم حلوه وهاااااااااااااادية وايد ،، باردة وفيها من الفواكه والمعادن مالذ وطاب..

[لبن مثلج]

يالله انكمل الرحلة..

بندويكم الحين الى منجم الذهب اللي حولوه الى متحف جميل وراقي

هذا هو المدخل


والي طوله اقل عن هذا يدش ابلاش



وعقب مادشون اشوفون ريال من ذهب



والثاني من فضة او بلاتين



وبعدين يودونكم المنجم الي هو عباره عن 57 طابق تحت الارض :shock:



بس نزلونا الطابق الخامس تحت الارض ،، ولبسونا خوذه وعطونا بجلي واكسجين لان المكان مظلم و ،، الصراحة المكان وايد مرعب واللفت الي ينزل تحت عباره هن لفت مال العمال ومسواي على قد الحفرة الي هي اشبه بالطوي ، اتخيلوا عاد :nono: كل ماينزل اللفت كل ما تختفي الرؤيه :negab:
خذنا لفه في المكان الي هو عباره عن نفق وحفر في اليدار وفيضانات ماي من فوق لي تحت .. اشيا غريبه ومتعبه ،، وشفنا الذهب قبل مايصفونه على اليدار او في الصخور ،، لونه رمادي على لمعة خفيفة ،، ماقدرت اصور لان المكان ظلاااااااام

وبعد ماطلعنا فوق ،، دشينا المحل الي يبيع رذاذ الذهب






وبعدها خذنا لفة في المنجم وشفنا هالحلو



وهاي العربه التقليديه




عاشق القلم لوسمحت بدون تعليق لاني تعبت ويا هالصورتين

[لبن مثلج]

عندهم مناجم الماس كبيره والاكبر في العالم اسمه كيمبرلي الي يتعامل مع اكبر شركات اومحلات الماس في العالم مثل دي بيرز وغراف ،، ماقدرت اوصل للمنجم الثاني الي هو اصغر لاني كل ماكنت اسير كان مبند ، المهم عندكم صور الماس ،، شوفوا يابنوتات :puppyeyes:





الصراحة احلى مافي الرحلة هالاكله العجيبة الرخيصة الي ماتتعدى 30 درهم ،، وهو من مطعم اسمه اوشيان باسكت

يم يمي







وفي نهايه يومنا بوديكم السوق الافريقي الشعبي مالهم












وعلى طاري الي كانوا يسالون عن البنايات والبيوت عندكم هاي الصوره لمجع فلل سكني في حي من الاحياء