مــجـــلـــس الـــســـيــارات

[الهيثــم]

ممممممم حلوو ..

إنزين كم بيكلفني كل هاا ؟؟

وشو نوع الفلتر إلي تنصحني فيه ! والكات باك .. !! .. وعن البرمجة أفضل الوكالة ..

[الرايد]

مرحبا خطاب ..

انا بقولك شو تسوي .. عندك فلتر احسن عن الـ K&N .. و الي هو الـ vararam

http://www.vararam.com/tri-power/tri-power.html

هذا لنك الموقع و فيه صورة الفلتر و كل المعلومات عن بيرفورمانس الفلتر و ينباع عندنا فالبلاد بعد ..

و عليك ب كت باك كورسا السبورت .. و Throttle Body spacer هي القطعه نفسها الي قالك عنها شرجاوي .. بس بتعق الضمان .. لانه انا عندي سييرا و معدل فمكينته بطريقه انه الضمان ما يطير ..

و عن البرمجه لا تبرمج عن التركي مراد .. ربيعنا برمج Zo6 اخترب البالانس مال الكرنك و دقت المكينه و واحد برمج التاهو مال البيت راح القير لانه يعطي الموتر اقوا شي يقدر عليه ..

برمجه الوكاله بتعق الضمان عن الموتر .. لانه قبل ما تبرمج بيعطونك ورقه توقع عليها انه يشلون عنك الضمان .. مثل ما استوا بـ ربيعنا عنده سييرا بعد و يوم يا بيبرمج عندهم وقع على الورقه بدون ما يقراها و توهق عقب ..

ف لو تبرمج برع يكون احسن .. عني انا برمجت عند سعود بن عجيل .. برمجه ما عليها رمسه و سعره واايد حلو و كل تعديل برمجه مثلا اذا زدت شي فالموتر يبرمج ببلاش عكس القراجات الثانيه .. يوم ركبت وياه يبرمج موتري .. قالي لشو تباها البرمجه حق استعمال و لا سباق و لا شو .. قتله ابا شي عادي بس على السيفتي .. والله من عقب البرمجه مشي الموتر وااايد تغير على كت باك و فلتر .. مع اني كنت امبرمج عند بدر اهلي صاحب قراج فورملا .. كان مخبص بالموتر و مألف برمجه من عنده .. بس عقب هالبرمجه اليديده الصراحه مشي واااايد حلو و بيعيبك و عن الوكاله ما تسال اذا الموتر امبرمج برع ولا شي .. اللهم اذا استوت مشكله فالموتر ترد عند الي برمجلك الموتر و يردلك برمجة الوكاله و اتدخله الوكاله ولا يدرون عن شي ..

و اذا في شي تراني حاضر ^_^ ..

والسموحه منكم دخلت عرض فالموضوع .. لاني من عشااق الامريكي .. و هالموضوع اتابعه من بعيد لبعيد Pp= ..

[الهيثــم]

مرحبا اخوي الرايد

ما شاء الله هالفلتر أدائه عالي .. تنصحني فيه يعني .. !

وعن الكت باك عزيزي ، الطلقات كيف اتكون !! بالشكل إلي انا أختاره ولا أشكالهم ثابتة ، ومن خبرتكم شو الاحلى على التاهو ؟؟

ممم ،، بخصوص البرمجة ، أنا موضوعي غير شوي ، وهو إني ببرمج الموتر فـ ليبرتي بحكم إني ماخذنه من عندهم
والريال خبرني إنه إذا الموتر من عندهم ما في مشكلة الضمان ما بيطيح ، وربيعي ظهرره قو هنااك ، لأنه من طرف الشيخ .. ودوم يضبطون موضوعه ..

بس يا خي خرشتني ع التضبيط ، وأنا أبا الموتر حق استعمال ، بحكم إنه متعدد الاستخدامات
موتر البيت + استعمالي .. وفـ نفس الوقت أبا مشيييه يتغيير ، لأنه خوييك خرييش شوي ..

بس الغالي ، بما إنك سويت هالأمور في الموتر ، ممكن تعطيني فكرة عن السعر ،، يعني كم كلفك كل ها !!

فلتر + كت باك + برمجة ؟؟ وكم زاد في الأحصنة عندك ؟؟

[الرايد]

هالفلتر عجيب تبا الصدق .. لاني ناوي على واحد مع اني مركب الـ K&N احين ..

اما عن الكت باك في انواع و اشكال .. بس انا انصحك بالكورسا السبورت الي يكون شكله جي



والله يخويه هالشي راجعلك .. بس انا قتلك عن شي نحن مجربينه .. و عن برمجة الوكاله تراهم يفتحولك الكتمه بس و زادولك شوية بترول و شويه كهربه و كان الله غفورا رحيما .. يعني برمجه تمشي حالك فيها ..

شوف الغالي .. انا موتري كت باك فلتر و برمجه و مفضي دبات البيئه لانه تحس بفرق وايد بعد .. مشي الموتر وااااااااايد حلو تبا الصدق .. مب انه عشان موتري بمدحه ههههه لا بس انا حسيت بالفرق .. لاني جربت ويا كذا موتر و حسيت بفرق المشي .. الانفنتي G35 ادوس وياها من الـ 100 وياها لين ال 160 خلاف تروح اكيد الانفنتي .. يعني فرق فرق فالمشي ..

و الاستعمال عاادي اعتبر الموتر وكاله .. بيني وبينك انا طار الموتر طر و الحمدلله ما اشتكي منه مع انه موتري سييرا رنقاته 17 و بدلتهن ركبت رنقات الدنالي 20 و ثجال .. مع هذا ماشالله عليه عايش ماشي مشاكل لا فالقير ولا فالمكينه ..

ممم .. عن السعر بقولك عن الي اعرفه .. الكت باك على حسب طبعاً انته شو تبا .. يعني الكورسا ب 6000 و الفلتر اضني ب 2500 بس مب متاكد منه و اذا تباه بسال عن سعره اذا موجود فالمحل ولا لا و بعطيك خبر و البرمجه ب 1800 ..

اما عن الاحصنه ماعندي فكره .. لانه ما دخلت موتري على الداينو .. ف ما اقدر اعطيك كم وصل الموتر بالظبط .. بس عن الفرق فالمشي روحك بتحسبه و بيعيبك المشي صدقني .. اسال مجرب ^_*

[الهيثــم]

كلامك مقنـع عزيزي ..

اتصدق شكلي ببرمجه عند بن عجيل .. إذا ما في تأثيرات سلبية
سعر الفلتر والبرمجة حلوو ، لكن الكوورسااا شكله وااايد ..

يزاك الله خير شيخي وما قصرت ، وعيبتني هالطلقات .. وربك ييسر إن شاء الله
تسلم يالغالي واسمحلناااا ..

[شرجاوي]

اسمحلي يالرايد .. دبات البيئه ما بتزيده شي .. بس صوت عالفاضي

جربت ويا يوكون و عطيتها شبتين .. ب اكاديا .. شلوا عنها دبات التلوث .. و عطيتها نفس المسافه و يمكن اكثر ..

[الهيثــم]

دخلت اليوتيوب وسمعت حس التاهو عليه كت باك كورسا .. الصوت وااايد حاااد ..
حسيت البورلا أحلى ..

[الرايد]

شرجاوي ، ،

انا فضيت الدبات و حسيت بفرق تبا الصدق بس طبعا عقب البرمجه اما اذا الموتر وكاله و تفضيهن ماشي فرق لاني فضيتهن قبل البرمجه و ما حسيت بشي الا عقب البرمجه

خطاب ، ،

الناس اذواق الغالي .. البورلا حلو تراه مب سيء بس عني انا افضل الكورسا ..

بس اذا انته تحاتي السعر .. عندنا شباب مركبين دبه نصفانيه .. مدحولي دبتين اميريكان اوف رود و ماقنا فلو .. و هي دبه بس تركب بدال الدبه الوسطانيه مالت الوكاله في فرق بسيط و صوت حلو و خفيف مش عالي ..

[الهيثــم]

وهالدبات الغالي وين أحصلهن وعلى كم .. !

والشغل يكون قص ولحاام صح !!،، لأني أحيد الفتك برااغي ..

[شرجاوي]

اذا بتبدل الدباات الوسطانيه .. اعتقد شغل لحام ..

اذا موترك ضمانه 3 سنوات او 60 الف .. اتريا لين ما يخلص الضمان .. و زوده ع راحتك

[الرايد]

هالدبات رخيصه .. الاميريكان اوف رود ب 350 درهم على ما اعتقد مادري جان زاد سعرهن بس بهالحدود يعني بتحصلها عند التيمت الي فالممزر او عند رامي بس ما انصحك تسير عنده .. مم عندك pure speed فالخوانيج اضني .. و عن المقانا فلو بتحصلها عند باور كيرف الي فالممزر عند يوسف رضى على 600 مادري 700 ..

تقدر تسويها براغي ماشي مشكله .. يبطلون البيبات الي تحت و يفصلولك شراتهن على الدبه الي بتاخذها و تركب دايركت لا لحام ولا هم يحزنون و يستوي مثل ما قلت براغي شرات الفتك .. و يدخل الموتر السيرفس عادي بس اذا صادقتك مشكله تعقها الدبه وتركب دبة الوكاله بدون قص و بدون لحام فالقراجات ما بتاخذ ربع ساعه ..

[الهيثــم]

شرجاوي // الموتر ضمانه لين الـ 150 ألف .. والحين ماشي 68 ألف ..


الرايد // حلوو .. بس أحيد تفصيله صعب .. لأن على كلام واحد قالي إنه القاعدة معقدة وما يقدرون يفصلون ولازم قص ..

تعرف مكان مضبوط حق هالسوالف ؟؟
ولو تعطيني عناوينهم بالضبط بتسوي فيني خير ، لأني مب لذاك الزود في هالسوالف ..

[الرايد]

لا مب صعب ولا شي .. واحد من الربع مخترع حركه ، خذله قزوز لموتره من سكراب و ركب الدبه على القزوز و ما دق القزوز الي على موتره .. اللهم نزل لقزوز الي على موتره و ركب هذاك الي ماخذنه من السكراب و عليه الدبه ..

عندك قزوز الخليج شغلهم نضيف .. و في كذا مكان بس مب متاكد منهم بس اذا معزم بسال لك عن اماكن شغلهم عدل .. لا تحاتي ..

و عندك فوكس لا تنسا .. بس بيضربون عليك ..

انته شوف شو الي يناسبك و خبرني عشان اكون على علم بالي انته تباه .. استقر على شي و فالك طيب ..

[شرجاوي]

الخليج هو نفسه فوكس اعتقد !!!! و عن تجارب الربع على مواترهم .. شغلهم غاااااااااالي عالفاضي .. لا قوه ولا عزم

الرايد ... الشغل المحلي ما يودي ولا اييب .. بعد فتره الدبات بتنصخ .. و كل مره يبالك اتبدل جازكيتات .. كاتباك بورلا احسن و اهدى عن الكورسا و الاثنين احسن عن الشغل المحلي

خطاب اسمع صوت التاهو ب كاتباك بورلا .. http://www.youtube.com/watch?v=AcIc9SWVK5c .. ف كراج فووم ف دبي

[الرايد]

شرجاوي ، ،

لا قزوز الخليج فالرمول و فوكس فالقوز .. ما يخصهم ف بعض .. و عن الاسعار يعني مب هاااك السعر الغالي الي محد يقدر عليه .. بالعكس سعرهم معقول يعني على 4000 تقريبا الكت باك كامل .. و بالعكس فيه قوه و عزم .. مجربين على موتر ربيعنا و انا الي وديتله موتره و ركبنا الكت باك عندهم مع كاتلايزرات سبورت .. والله فرق مشيه ..

انته تقول انه الدبات تنصخ و لازم بين فتره و فتره تبدل جازكيتات .. كلامك مب صحيح .. ربيعنا ركب عند فوكس هدرز كاامل و كت باك و كمل على موتره سنتين و نص تقريبا .. على تاهو 2007 .. و يسافر فالموتر و استعامل عادي و يدوس و كل شي .. موووول ما يشتكي منه .. مره بس اتذكر نصخ عنده كان ضارب خط و القزوز حار و دخل ف ماي و نصخ من تحت و بس ، من هاك اليوم ماشالله عليه ما ياه شي القزوز .. و عندنا شباب مركبين على جماسي بعد .. يمدحونه فكوس ..

البورلا حلو صوته بعد معروف هالشي .. بس شرجاوي فووم شغلهم اي شي تبا الصدق .. انا خذت سوبر جارجTRD من عندهم حق الFJ و قالي 3 اسابيع .. خيسني 3 شهور و شي .. و انا دفعت له المبلغ كامل ويا التركيب .. و يوم وصل قتله ما بركبه و ما ردلي مبلغ التركيب طلعلي اعذار وايد .. و من غير المشاكل الي صارت ويا شباب غير ..

اذا تبا تطلب شي من برع .. سير عند حد انته تعرفه او حد يعرفه ..