مــجـــلـــس الـــســـيــارات

[ذنـيـنـي]

تسلم على توضيحك

بالنسبة للفلتر, ما عرفت اي فلتر تقصد

فلتر الزيت فلتر البترول فلتر الهواء

بس اظن انك تقصد فلتر الهواء
طال عمرك فلتر الهواء يساعد على ادخال هواء اككثر و ابرد للمحرك و هالشي يساعد على اخراج قوة اكبر من المحرك,, بس اذا ركبته ما بينفعك بشكل كبير لأنه يحتاج الى اقزوز سيستم لأنه ادخال الهواء بكمية كبيرة يحتاج الى اخراج الهواء بكمية كبيرة

لهذا السبب يوجد الكثير من الاشخاص يقولون انه الفلتر ما ينفع و كلام من هذا
الغلط مش من الفلتر, الغلط من طريقة استعمالهم

بالنسبة للأنواع
يوجد الكثير منها و الاشهر هو K&n

و السعر يعتمد على نوع السيارة
اتمنى اني اكون وضحت لك الي كنت تبغيه

[تنينه]

الـسلام عـليكم شبااااب أشحالكم شخبااركـم :harhar1:

احـم ,, عـادي يعني نـدخل ميلسـكم وأنشاارك يعني عـادي ,,


أنـا الصـراحه وفي الحقيـقه والـواقـع ,, مـا عـندي مـوتر >> وااايد عـليّ ليش داشه عيل لول ,,

بـس عـندي جوااب للسؤال الثاني ,,

أول شي وقبل ما أستهل بكلامي ونقاشي :leia: رحبووا فيني شي ماي بارد :harhar1: مشكوور نااصر مـا أبى ريد بول أبى اورنامين سي :kcl: ,,

2- شو هي السيارة الي تتمنا انك تمتلكها في المستقبل

يقولون أووني مخـططه ومقرره وعـاقده العـزم ,, ان شـاء الله اذا خـذت ليسن بـعد عـمرن طووييل وخخخ آخــذ لـي نيسان بتروول ان شااء الله وخااطري في الفـتك بس يمكن يستوي جدييم ألين مـا آخـذ الليسن لول ,,

الموووهيييييم وشوو اسـمه:kkk: تبوني اذكـر مميزاتـه بـعد وليش بـاخذه الصراحه أول شي عـسب شكله عجيييب وغير انه سريع وومميزاته كلـها أوكييك المهم انا حبيته مـن اول نظره وان شااء الله بـبيكون أول مـوتر أسووقه ,,


بـعد 3 سنوات بـرد للموضوع ان شاء الله وبكتب كـم وصلت بالنيسان أعلى سرعه وخخخ وعن خدمة الوكيل وتوفر قطـع الغيار ,,


يالله في أمـان الله ويمكن أنـرد لميلسكم الطيب اذا عـزمونا :ice:

[إسهر معي ليله]

السلام عليكم،، موضوع حلو واتمنى ان الكل يستفيدون منه

::
::

جربت وايد سيايير،، وجربت وايد وكالات،، تقدر تقول "مندوب وكالات" في العايله brgll:

الرنج

سيارة مريحة،، واحلى مافيها ارتفاعها.. لكن عيبها السكان يثقل اذا دخلت لفّـه
وانته مسرع!.. الوكيل خدمته وايد زينه.. خصوصاً مع عقد الصيانه،، عيبها في
الـ Fuel Pump .. اخترب 3 مرات.. وبدون سبب! وما ادري اذا هالشي في
كل رنج،، ولا بس عندنا

::
::

بيجو 307

سيارة كملت معايه سنتين و 8 شهور،، الحمد لله عمرها ما وقفت او ماشتغلــت
عكس الرنج اللي وقفت 3 مرات brgll: ،،، الوكيل زين ومب زين فـي نفـــــس
الوقت،، فيها مواصفات اكثر من باقي السيايير اللي بنفس سعرها وحجمها،،، و
قطع غيارها غاليه نسبياً،، بس يعتمد عالقطعه.. مرات تنصدم من سعرها الغالي
ومرات من رخصها بزياده!.. ضربت فيها خطوط لين قلت بس وبعدها تكد

عيبها الوحيد في القير،، تبترونك وتحس فيه لما تغيّر من قير لين قير.. بالتالي
السواقه ما تكون مريحه وتحس السياره تهتز مع كل تبديل.. ثباتها وايد ممتاز
وانظمة السلامة حلوه فيها.. بس في نفس الوقت ماتحس فيه جوده فـ التصنيع

الخرابات اللي مرّت عليّه سببها سواقتي،، يعني سياره ما تتحمل سواقة الشباب
هاي مسوايه حق السواقه الناعمه بس

::
::

نيسان التيما

عندنا في البيت 4 و 6 سلندر... الـ 4 صرفيتها وايد حلوه ومشيها زين
اما الـ 6 تصرف.. لكن مشييها يخبل :kcl: .. مشاكل السياره بسيطة
وتعتمد عالسواقه

الوكاله شغلهم بطيء والسبب انه عندهم وايد سيايير.. ولازم تاخذ موعد
وأحياناً الموعد يكون عقب اسبوع او 10 أيام.. بس قبل كم يوم دخلناهـا
قبل الموعد.. لأنه دينمت السلف اختربت.. فـ دخلوا السياره صلحوها،، و
جيكوها في يوم واحد!.. رغم انه الموعد كان المفروض يكون باجر brgll:

::
::

نيسان ارمادا

سواقتها روووعه،، وعلى حجمها العوود بس اشووف سواقتها مريحــه
وفيها قوه.. الخرابات ما عندي علم فيها.. بس ما سمعت حد يتشكى منها

::
::

مرسدس E-Class

جربت 240.. مشيها تعبان.. اما الـ 320 حلوه سواقتها ومشايه بعــد
عيبها الوحيد في الوكاله.. اول شي خدمه تعبانه وثاني شي اسعارهــم
نار.. والسيارة تشكّل احياناً.. والسبب من الكمبيوتر الغبي طبعاً brgll:

::
::

لومينا SS

سواقتها كشخه.. وخرررشه في نفس الوقت،، بس سيارة مريحه وسعرها منافس
الوكيل شوي تعبان.. يعني اذكر اول ما مطلعينها في 2003 يوم عدلوا شكلهـــا،،
سوينا فيها حادث.. طاحت السياره في الوكاله اكثر عن شهر والسبب قطع الغيــار
ما وصلت للشكل اليديد.. ويمكن السيارة فيها خرابات لكن بسيطة

::
::

هوندا أكورد

سيارة تجاوبها حلو،، يعني وقت الريس ريس والبريك بريك،، خفيفه ومريحه بعـد
تحس فيه جوده بتصنيعها،، خصوصاً من داخل،، سيارة تكد وصرفية البترول حلوه
الوكالة وايد زينــه،، يعني يلتزمون بالمواعيد والخدمه سريعه

::
::

هالسيايير اللي سقتهم وجربت وكالاتهم .. وان شالله لو عندي اكثر
بكتب عشان نفيد بعض

بس عندي ملاحظه// وهيه ان ما في سيارة في هالدنيا ما تخترب،، ويمكن
عندك تخترب وعند غيرك لاء.. وهذا كله يعتمد عالسواقه وطريقة استخدام
السياره

::
::

السياره اللي خاطري فيها احين.. Ford GT 40



يااااااااااااا الله :kcl:

::
::

اسمحوولي طولت عليكم.. وان شالله اكون متواجد معاكم دوم فـ هالموضوع

مشكور ذنيني عالموضوع

[الاسطوري]

السلام عليكم ..

شحالكم شباب ؟

عن أفضل موتر شوف ماقدر أقول الموتر الفلاني أحسن لأن كل موتر
له شي يميزه عن المواتر الثانيه ،، في الفورويل من ناحية
الثبات والقوة عيبني X5 4.8 ومشيه حلو
وصوته بعد ومن ناحية الراحه
الرنج سلس
ومريح في السواقه ومن ناحية قوة التحمل والمهمات الصعبه عندك
الهمر H2 مايقول لأ في أصعب الأمور اما الصالون عندك
بي ام 745 هاديه ومواصفاته حلوه
وقوتها لا بأس بها

والسيارة اللي خاطري فيها مابقول فانتوم شارت ناس الله يستر
عليهم بس يعني طموحي محدود M5 اليديد وطبعا
ماننسى الولاء لـ LS600hL
وقوتها تكفيني

حاليا أستخدم لكزس LS400 موديل 98 وارد امريكا مريحه نوعا ما
ومافيها مشاكل ومن ناحية الوكاله معاملتهم زينه بس
عيبهم الزحمه اللي عندهم مع اني
ماتعاملت وياهم وايد
وقطع الغيار متوفرة في كل مكان سواء أصلية ولا تجاريه والأسعار
متوسطه تقريبا ومعقوله ومن ناحية الصرف أقل من
النياسين وتقريبا قريبه من الاستيشن
او يمكن شويه اقل على
حسب السواقه يعني وتفويلتها أكثر شي 109 سبشال هذا من تحت
الإمتي وقوتها زينه وأهم شي قد ماتقدم قوتها ماتتغير
من تسرع فيها تصك القيج كامل ماعندها
ون تو بس مقفوله على
250 واممم من عيوبها إن جامبيناتها لينه شويه يعني هي مريحه على
المطبات وفي الاستخدام بس للسرعه هاي نقطه سلبيه
عكس اللكزس الالماني يابس وقوته
أكثر ومعطاي 280
ومب مقفول وقبل فترة كنت لاعب فيها شويه منزلها بإسبرنقات يابسه
ومركب لها رنجــات 18 ودبات وحاله بس طبعا تعرف شغل
اي كلام مايدوم صارت سالفـــه واضطريت
اردها وكاله بس قد ماتكرفها
ماتقـــول لأ
:bow:

بخصوص السرعة تراني مدمن عليها واحلى شي سوالف البتوين على
سرعات والحمدلله ماعندي سوابق بس ماسقت سيارة قوية
ذاك الزود عشان أذكر نوعها وأقصى سرعة وصلت
لها هي 268 في اللكزس الالماني
اللي كان عندي قبل
هذا وبس

الحين أنتظر LS460 يوصل وبشوف كم سعره
وكيف بيكون مستواه في
السوق

السموحه

الاســـطـــوري
أخوكم

[الهيثــم]

ما شاء الله عليـكم مب مقصـرين
الأسطــوري .. صح .. سواالف البتوين مدمنين عليـها
وحلــوة .. بس يبــالها خبـرة .. مب كل من هب ودب ..

وذنيني .. بخصوص السرعه في الهوندا ..
ما جربت فيـها للحيـن .. وان شاء الله يوم بجـرب بخبـرك وبواافيـك بـ اليديد

وبـعـد نسيت أقـولك اني جربت اللومينا .. ومع انها S بس ما شاء الله مشيها حلوو في الخط
وكنت في الزحمة .. وشفت الكيج 180 .. لو الشارع مفتووح الله يستر كم بتوصل .. !!

ولنا عودة ان شاء الله ..

[شمعة أمل]

1- شو هي افضل سيارة سقتها
بصراااحه .. البك أب أفضل سياره سقتها .. من ناحية السواقه مب الشكل.. سواقتها رهييبه p=
بعدين الجييب .. لانها exact تلف عدل والبريك عدل
بعدين سيارة أبويه المرسدس البوكس *ماعرف الاكواد وهالسوالف*
بعدين همممم هيه رنج اختي
بعدين الدورانغووو اظني جي اسمه
بعدين الكورولا *سواقتها مأرفه سنه لين ماتتحرك*
بعدين النيسان واللكزس اخر شي .. سواقتهم تلوع بالجبد >_< الكزسس وايد يابسه والنيسان وايد وايد لينه جنه بطير وبريكها وايد قوي

هايل كل السياير الى جربتهم في حياتي


2- شو هي السيارة الي تتمنا انك تمتلكها في المستقبل
طبعا .. اللامبرغيني ولازم تكون صفرا ويا مخفي اسود غامج
بعدين سياره نفس سيارة أبويه بس سووده *صح هي رجاليه لكن شفت حرمه تسوقها وشكلها وااااو*
بي أم 7 سيريس
ميباااخ< الدريول لازم يسوق مب انا .. بس يعني في الاحلام بحصل هالسياره خخخ
بيييييتل

3- شو نوع السيارة الي تستخدمها حاليا, و شو رايك فيها و بخدمة الوكيل و مدى توفر قطع الغيار؟
أستخدم كل السياير في البيت لانه ببساطه ماعندي ليسن *يعني مب انا الى اسوق بس أيلس* وسوالف الوكيل وقطع الغياره ماعرف .. لكن مانصح بالمرسيدسااات الصالووون .. مادري ليش بس وايد يختربون؟
وهيه .. وكالة لكزس so far من احسسسن الشركات الى تعاملنا وياهم
عكس قرقاش مال مرسدس .. اغبيا مايصلحون السياره يوم يردونها
ومال الرنج اوكييييي اظني الطاير
والباقي ماعرف بس الى اعرف انه مال مرسدس مب شيييييي
اوه هيه
وتذكرت
ويا الرنج سوالف قطع الغيار مب اوكي عندهم لانه احيد مره التاير شي استوابه وماكان عندهم اكستراا شي جيي

-4 اذا كنت من محبين السرعة, شو هي اقوى سيارة ركبتها, و كم اقصى سرعه وصلت لها؟
ماعرف مادققت لاني ما جد سقت فوق ال 60