مــجـــلـــس الـــســـيــارات

[الهيثــم]

ما شاء الله عليـكم مب مقصـرين
الأسطــوري .. صح .. سواالف البتوين مدمنين عليـها
وحلــوة .. بس يبــالها خبـرة .. مب كل من هب ودب ..

وذنيني .. بخصوص السرعه في الهوندا ..
ما جربت فيـها للحيـن .. وان شاء الله يوم بجـرب بخبـرك وبواافيـك بـ اليديد

وبـعـد نسيت أقـولك اني جربت اللومينا .. ومع انها S بس ما شاء الله مشيها حلوو في الخط
وكنت في الزحمة .. وشفت الكيج 180 .. لو الشارع مفتووح الله يستر كم بتوصل .. !!

ولنا عودة ان شاء الله ..

[المزوحي]

موضوعك فنان ذنيني :kcl: وأبغي أشارك فيه .. لكن لو ماعندي اجوبه لأسئلتك شو أسوي !!
ماسقت سيارات .. اقصد كتجربة .. لأني ما أحب أخذ سيارات حد بالمره ...


1- شو هي افضل سيارة سقتها
بي أم الفئة الخامسة

2- شو هي السيارة الي تتمنا انك تمتلكها في المستقبل
بورش كايين أو أكس فايف

3- شو نوع السيارة الي تستخدمها حاليا, و شو رايك فيها و بخدمة الوكيل و مدى توفر قطع الغيار؟
حاليا عندي باجيرو باب واحد (3.0 ) موديل 2006 وخدمة الوكيل وسط ..


-4 اذا كنت من محبين السرعة, شو هي اقوى سيارة ركبتها, و كم اقصى سرعه وصلت لها؟
أقصى سرعة في سيارتي 160

سقت الماكسيما ماعيبتني لخفتها .. وجربت البرادو باب واحد 6 سلندر .. طلعتها حلوة ..
المورانو ماعيبتني .. سواقتها ..

[مجموعة إنسان]

كتبت وااايد وبالغلط مسحت ..

بتكلم عن سيارتي ..
فورد مونديو اس تي ..
سبوورت جير عاادي .. ماخذها مستعمله من ربيعي لأن بياخذ موتر يديد وما زكانت ماشيه اللا 20 الف ..
سياااره حلوه اخر شي وصلت فيها 240 وثابته ما شاء الله .. بس ما جربت اكثر ..

الكورولا حلوه وااايد وسامان رخيييص وحق مكده ..
اكس اي للمديينه تنفع ..
لكزس ار اكس حلوه واايد للخطوط وثابته وو تكد
بعد شوو

هيه اخر سرعه وصلت لها 320 ب كاين توربو اس مال نسيبي ..
لو يعرف بيذبحني .
بس ليين الحيين احلى سياره سقتها لكزس ال اس 430 ..
حلوه وقويه وو مال كشخه .. بس اخووي العود كنسلها

واللكزس فوروييل
عجيييبه وحلوه وو تكد .. بس الثاني تهور شوي وخلها غواصه "( عقها بحر )


السياره اللي بخاطري اخذها
انفينيتي كوبي او زد اليدييده
ماعرف لييش بخاطري هال سيارتيين ..

وو
مجرب بعد ال ار ون ( دراجه ) ويبت فيها 300 بس خفت والله .. وبعد الام شرااع اخاف اسووق دراجه ..
عااد ار ون اسوقها وما انقلبت فيها
على ام شرااع انقلب واتكسر !!

[ذنـيـنـي]

شرجاوي

والله يا خويه, الين الحين ما غيرت فيها غير قطعه وحده

احترق الكمبيوتر يوم كانت السيارة عند ابويه
و تغييره كلفنا 4500 على ما اذكر

[شرجاوي]

هواجيس انت متأكد انك كنت تمشي 320 ؟؟ لان الكاييين جمبالا جي تي 700 اتنزل 300 و قوتها 700 حصان

[ذنـيـنـي]

يمكن قصده 230 !!

لأنه البورش 911 توربو ما اتيب 320


انا اقصى سرعه وصلتها كانت 280 بالكورفت

و اقصى سرعة وصلتها و انا راكب ويا حد كانت 330 في سوبرا
التجربة كانت من القومه الى 330, بصراحه تيبست مكاني من الزيغه خاصة انه السوبرا ما كانت طبيعيه 1000 حصان قوتها !!

[الاسطوري]

التوربو اس مب هينه بس ماأظن
تييب هالسرعه


ذنيني أكيد عقب ما شفت 330 صارت الـ 200 سرعه عاديه تمشيها
في الفريج وانت تقرا الجريده وتشرب شاي
وتسولف في التلفون
:ice:

[مجموعة إنسان]

السموووحه مغلط بالأرقااام ..
230 .. مب 320 ..

[ذنـيـنـي]

الأسطوري

خل عنك هالسوالف

والله انها كانت لحظات مرعبة

خاصة يوم وصلنا فوق الـ 300,, حسيت انه السيارة بدت تتنافض بطريقة تخوف

[ألم ترى]

خييييبه انتوا سوالفكم تزيغ وشكلي ما برد لـ الموضوع !

شرده شرده ثرى ما عندي غير هالفقيره اللي تحاتيني ع كل ضهره

[راعي الزعـامه]

المشكله الواحد مايروم يسرع
يمشي فليييل والشارع فااااضي و اذا بس خط فوق 80 يلاقي فلاش لبق فعينه ،، وبعدين تعال وادفع ،،
ليش ما يخترعون رادار لونه فسفوري ،، الأسود مول ما يبين ،،

[الاسطوري]

أنا أقول لو نتعاون ونغطي كل رادار بخيشة عيش (مثل جابر نغموش)
ونستر على أعراض الناس من هالتصوير منها نكسب أجر
ومنها نوفر فلوسنا وصدقوني نسبة الشباب
اللي يبون يتخلصون من
الرادارت أكثر من عدد أفراد شرطـة الدولـة كلها يعني بنغطي
العدد المطلوب وأكثر يعني كل واحد بين الشفت
والثاني يمكن شهر أو شهر
ونص لين ايي
دوره إنه يساعد في التغطيه بس عاد لاتخبرون حد وتقولون
هاي فكرة الاسطوري كل واحد يستر على
الثانـــي وقولوا مانــــدري
أسألوا فلان


هل من مؤيد ؟
:harhar1:

[مجموعة إنسان]

انا معااك الأسطوووري ..
بس مراات خاطري ينكسر على رادارات الشارجه ما عرف لييش حاطين رادار على شار الامارات وانته اولردي طايح بزحمه !!

[راعي الزعـامه]

خلاص بننظم لجمعية الاسطوري
بس لازم اتوفر الخيشات لان ورانا تغطية اكثر من 500 رادار على مساحه 10000 كيلومتر مربع

[مجموعة إنسان]

جمعية الاسطوري لحماية الشعب من التصوير ..
خخخخخخخخخخ
خووش اسم الاسطوري