الحمدلله...شبعت...!!!

[طير الحب]

السلام عليكم ورحمه الله وبركاته...

الموضوع بالتاكيد ليس وصفة لأحد الأطباق...ولكن الموضوع يتحدث عن الأسباب التي تجعل البعض منا ينفر من طبق ما في وقت معين...بالعامية (يجز) من الطعام.

البعض يجز لو شاف حشرة...والبعض الآخر يجز من نوع الطعام...وآخرون ممكن يجزون من أي شخص يعطس....ألخ

مثلا بالنسبة لي أجز من العظام بالأكل يعني ممكن لو كلت عظم بالغلط خلاص ما أقدر اكمل ولهالسبب قاطعت السمك سنوات طويلة ورضيت من سنتين وصار السمك هو الأكلة المفضلة بالطبع بدون عظم.

وفي سبب آخر ممكن يمنعني من الأكل الأخبار المأساوية يعني ما اتحمل آكل وحد حاط الخبار وبها أخبار مأساوية...

والآن المايك لجمهورنا المتابع...ما هو السبب الذي يمنعك من التلذذ بطعامك..؟

[المزوحي]

إذا واحد يسوي أصوات وهو ياااكل أو إذا شفت شعره في الاكل ... او حشرة

[مجموعة إنسان]

والله أذا نقعد اندور شي في الأكل ما بناااكل ..
يعني كل وأنت سااااكت ..

أنا عادي عندي آآآآآكل المهم أشبع ( عشان جذي زدت في 3 شهور من 65 ليييييين 75 )

[هزاايم]

وعليكم السلام ورحمة الله وبركااته
أول حااجه فكره حلوه

عني,,اجز آكل لوشفت حد ياكل ويرمس يعني :no0: ,,وإذ شفت شعره أو حشره,,أو صابنيه تسمم من أكله اكرههاا,,وأجز لو كلت من نفس الطبق إلي ياكل فيه أخوي الصغير أو ولد إختيه فرووس حفله يسوون مش أكله

وبس أحيانا نتجااهل الشعره والنفراات إلي ذكرتهم وآكل إذ كنت يووعانه اليووع كافر يابوج

[أوتار القلب]

انا ما اجز من شي .. أهم شي عندي اني آكل :ice:

بس يعني لو كان الاكل وصخ أفضل ان محد يخبرني عشان ما تلوع جبدي brgll:

[حلم الطفوله]

السلام عليكم

لما أأكل حد من اليهال أعيف الأكل وطارييييييه

خصوصا إنهم ما ياكلون شرات الناس لازم أربع وراهم بالصحن .... عدهم اللعب أهم من الأكل

وطبعا هالسوالف إلي اتجزز وتشوفونها بالأكل .... تعيفني الأكله إلي شفتها فيها حتى مع مرور الزمن

[شوق القلوب]

الســـلام عليـــكم...

والله أشــــيا وايد اتخلي الواحد يقوم عن الاكـــل..

بس مرات وااااااااايد أيود عمري و أسكت عن اللي أشـــوفه.. حشان ما أضايج غيري من اللي شهيتهم بعدها مفتوحه..

..

طبعا الشعر وايد يلوعبي..

بصراحه كنت كاتبتلكم السالفه.. بس حسيت انه من اللباقه ما اكتبها.. مراعاة لشهيتكم !!

..

و من جريب.. اتلوع من اللــوز ( بيـــذام بلغات أخرى ) .. حد من الصغاريه كان يبا يتأكد انه مافيه دوود.. فتحها شوي الا فيها دود.. فـفرها في الصحن.. شوي الا تطلع الدوده و اتم اتناقز ع الطاوله.. كان شي.. استغفر الله ..!!

من يومها تقريباً ما أجرب صوبه ..!

[ذنـيـنـي]

بصراحه ما في شي يخليني اقوم عن الاكل

بس في شي واحد مرات يخليني اجز و الي هو الاكل الغير مطبوخ بشكل جيد
خاصة يوم نسير رحلة و نشوي دياي و أكتشف انه داخله دم

مرات اجز منه و اترك الاكل و مرات اشل الجزء الغير مستوي و اعقه و اكمل باقي القطعه لول brgll:

[ولد الحكومة]

وعليكم السلام ورحمة الله وبركااته

انا عني اجز لو واحد راح يتغسل ويظهر صوووت من حلجة ... brgll:

[بنت الدلع]

مرحبااا ..

-اجز اذا شفت شعره .. حشره عابره
- اذا حد كان يرمس عن الحشرات وانا اكل .. مستحيل اكمل
خاصه اذا واحد يذكر لنا بطولته مع الحيوانات (( جتل طيطار .. عالج القطوه .. الحمامه ماتت .. الخ ))
- حد من الصغاريه رجع
- الي يرمس وبعده مب هاضم الاكل >_< really it's so bad
- الاكل الغير مكتمل طبخه

وايد اشيا .. بس مابا الوع بجبدكم ^_^

==

انا عني اجز لو واحد راح يتغسل ويظهر صوووت من حلجة ... brgll:

brgll:

[وحي القلم]

إذا شكيت فنظافة الطباخ :cop:

[مجموعة إنسان]

ذنيني ..
سالفتك ذكرتني بشي ..
مره سايريين عزبة ربع خالي عالعشا .. يايبيين ذبيحه كاملة ومو مستويه عدل ..
عاااد نحن قعدنا وربع خالي قعدوا ونسفوا الذبيحه كاملة ..
نحن المساكيين 3 أياااام أمراااض باطنية بس خالي وربعه ولا جنه ..
متعوديييين على الحركاااات ..

[حركات]

:mar7aba:

انا اجزز من صالونة الدياي مادري ليش

و مستحيل آكل من الكفتريات مادري اتلوع جبدي من السوالف اللي اسمعها عن الكفتريات استغفرالله

واذا شفت شعره و حشره الله يعلم شو بيستولي .. وايد اتحسس من الاكل اذا شفت فيه شي عادي يوم كامل مااتقرب الاكل اذا شفت شي :waa:

[الشحية]

ويع ويع ..
وأنا أقرا الردود لاعت جبدي هههههههه ..
شعره .. حشره .. الأكل المب مطبوخ عدل ..
يوم ياكل حد من اليهااااااال بدفاشة ويعفس >> تلوع جبدي ..
ووو ..
وما أذكر ..

[طير الحب]

انزين انا بخبركم سالفه تذكرته وقعدت اضحك...

مرة يوم كنت حامل يالسه اتريق ببيت اهلي وآكل السندويج وأضحك من الخاطر فأختي استغربت ويت تبا تعرف شو يضحكني....فقلت لها ما شيء ما ادري شو يا ببالي خلاني أتخيل اني قاعده آكل أصابع البشكاره في السندويج...والغريب اني يالسه آكل بدون ما أجز...عاد لين اليوم هم يذكروني بهالسالفه يوم آكل شيء قالوا لي شو أحلى عن أصابع قمر(البشكاره)