محتاجه نصيحتكم .....

[طرفشانه]

السلام عليكم


يا جماعه الخير محتاجه نصيحتكم

انا طالبه السنه خلصت الثانويه العامه
وان شاء الله بعرس عقب كمن شهر
وعندي مجال اني ادرس كورس في الجامعه وبصراحه ما ودي يطوفني

والحين محتاره شو التخصص اللي اختاره
في البدايه كان في بالي الطب وعقب غيرت رايي لانه اهلي قالولي انتي بتعرسين وادخلي تخصص مريح يعني ما يكون صعب
وعقب قلت بدخل هندسه معماريه سمعت ان هالتخصص حلو ولو انه في شوي صعوبه بس ما عندي مشكله من هالناحيه

المشكله في اني كل ما اقول تخصص معين يقولولي شوفي غيره لان هليه يعرفون الريال وهو واحد من الاهل ويعرفون طبايعه فلهذا السبب ما اعرف شو ادخل
(التخصصات اللي كانت في بالي (طب (جراحه) - هندسه (معماريه) - الفنون الجميله - سياسه دوليه)
الله يخليكم انصحوني
للعلم ناويه ادخل جامعه الشارجه

وان شاء الله استفيد منكم وتساعدوني

[شهوووودة الأمورة]

اول شي ألف مبرووك .. وان شاء الله تتهنين ..

ثاني شي .. دامج انتي بتعرسين بعد كمن شهر.. والزواج مسؤولية .. فأنا انصحج انج تدخلين الفنون الجميلة .. مادري احسبة حلو وممتع وسهل ( مب يعني سهل سهل انا اقصد اسهل عن التخصصات الباقية) ..
والله يوفقج اختي .. والسموحة يمكن غيري يفيدج اكثر ..

[طرفشانه]

مشكوره عزيزتي شهوووووووده الامووووووره على ردج
بس المشكله سمعت ان كليه الفنون الجمليه اللي في جامعه الشارجه مختلطه
اذا في حد يعرف اي معلومات عن هالكليه يفيدني

[طرفشانه]

وينكم
ليش ما حد يرد علي
i neeeeeeeeeeeeeeed ur help

[انامل]

ماشاءالله
تبارك الرحمن
مبروك التخرج
مبروك القبول والاقبال على الزواج
الله يهنيج يا قمـــــــــر
ويبعد عنج شر الناس
بخصوص الدراسة والتخصص فهذي ليست مساله مؤقته
لانه حياتج بتعمد بشكل كبير على التخصص اللي بتختارينه
في البدايه فكري وحددي
استشيري رفيق دربج
اسالي عن مستقبل اي تخصص بتحددينه
هل هناك شواغر للعمل
هل الدوله محتاجه ها النوع من المجال
هل انتي بترتاحين لهذا التخصص حابتنه او لا
لا تجاملين غيرج
ولا تضغطين على نفسج بخصوص التخصص
وحطي في بالج انج مقبله على حياة بتكونين مسئوله عن اسره باذن الله
استشيري القريب منج
ان احترتي استخيري يا قمر
وتاكدي
عسى ان تكرهوا شيئا وهو خير لكم
وعسى ان تحبوا شيئا وهو شر لكم
ما خاب من استشار
ولكل شي حكمة حبيبتي
اطمني
خذي وقتج
وطمنينا عنج باسرع وقت
كل المنى بالهنا يا الغلا
اتمنى لج السعاده
اختج
أنامــــــــــــــــــل:kcl :

[قرموشة]

وأنــا بـعد .. أنـصحــج بالفـنـون الجمـيلـه .. وتخـصص ( تصميم داخـلي )
وايـد حـلو هـ التـخـصص ومـريــح لأبـعـد الحـدود دامـج بتعـرســين
لكـن في النـهايـه القرار قرارج .. :)

وحـياج الله في جامــعتنــا

[طرفشانه]

تسلمين حبيبتي انامل على الردج الحلو
والله يبارك في حياتج
عزيزتي انا طرحت هالموضوع عشان استفيد من اللي عندهم معلومات عن التخصصات
وشومنهن صعب وشو السهل
والمشكله ما اقدر اشاور رفيق العمر لانه بعدنا
وهو بالفعل في النهايه الراي رايي بس حبيت اشوف كمن راي قبل لاتخذ قراري
مع اني شاورت وايد من اهليه اللي موجودين في الجامعه وكل وحدة تقوللي شي فعشان جيه ما اعرف شو اتخصص
وان شاء الله ابلغج بكل يديد

.................................................. .................................................. ..............................


عزيزتي قرموشه

تسلمين على ردج وان شاء الله بشوف
وبسأل اكثر عن كليه الفنون

والله يحييج

[نجمة دبي]

هلا اختي
الف الف مبروووووك وان شاء الله تستانسين

بخصوص الكورس .. اذا انتي من محبي التصوير .. سيري جامعة زايد

انا حاطه هالتخصص في بالي .. بس باقي لي اخر سنه ثانويه خخخخخخخخ

شوفي كل جامعه وكليه شو التخصصات اللي عندهم .. وعاد انتي اختاري اللي بيعيبج ..

ومبروووووووووك مره ثانيه :)



نجــــــــ دبي ــــــــمة

[المزوحي]

لا لا

تبين نصيحتنا .. استخيري ربج ... وخلي سوالف هلج .. كل مره يقولون يمكن الزوج مايرضى
اسأليه يمكن وجهة نظره تختلف .. اتفاهمي وياااه .. وبعدين لازم لج راي ... لاتقولين ماعرف
عقب شوفي وجهة نظر البقيه
مبرووك .. عادي آي عزيمة الرياييل

[شوق القلوب]

السلام عليــكم...

أول شي مبـــروك ^_^

و عسى ربي يهنيـــج و يسعدج في حيــاتج..

..

الحين يينا للتخصصــات...

أول شي.. فكري في طبيعه الدراسه و كيف تأثيرها على حيــاتج..

يعني.. مثلا لو خذتني هندسه.. في أيــام بتطــرين اتميــن في الجامعه من 8 الصبح ليـــن خمس العصـــر.. ولابات جامعه الشارجه غالبيتها يكون وقتها من 2- 5.. يعني لا مفر من هالتأخيـــر..

الطب... امسحيه من اللستـــه !

لو كنت مكانج.. بدخل MIS نظم معلومات.. وهو تابع لـكليه الاداره..
تخصص حــلو.. و مجال الشغل مفتـــوح..
وفي نفس الوقت.. الكلاسات عمليه للطالب..
و بعد.. ساعاته الدراسيه أقـــل.. يعني بتخلصين في 4 سنين او اقل ان شاء الله لو شديتي حيلج .. :)

طبعا ً هالكلام كله يعتمد اذا انت حابه هالمجال ولا لا..

..

مجــال السياســـه.. كـدراسه.. اتوقع انه بيكون حلو لو كنت من محبينها..
و طبيعه الدراسه.. بتكون اخف بوايد من الهندسه و الطب..

..

فكري بتخصص يريحج.. و اتذكري انه جدامج 4-5 سنوات دراسه و انت مقبله ع زواج..

يعني احتماليه اتكونين حامل و مسؤوله عن ياهل خلال هالسنين 80 %.. و اكثر..

و احنا ايام الجامعه.. شفنا ربعنا المعرسات و كيف كانوا يتعبون وخصوصاً يوم يتأخر الوقت.. ولا من زود الارهاق و التعب..

وفوق هذا كله.. انت بتكونين مسؤوليه عن ريــال.. يعني بتكونين محتاجه لوقت فاضي في البيت.. والهندسه و هالسوالف تاخذ الوقت كله..

..


فكري عدل.. و ربي يوفقج و يسعدج..

:)

و السموحه.. طولنا

[طرفشانه]

عزيزتي نجمه دبي
مشكوره على ردج
والله يبارك في حياتج
وعلى طاري جامعه زايد انا كنت مقدمه عندهم بس عقب رديت في رايي لانه دوامهم لين خمس
وكل هليه قالولي ريلج ما بيطيع وهو زين منه راضي انج تدرسين وشوفي لج تخصص ما يكون وقته متاخر

--------------------------------------------------------------------------------------------------------

مرحبا اخوي المزوحي
وتسلم على المشاركه
والله يبارك في حياتك
المشكله الله يطول بعمرك ان بعدني ما اروم ارمس وياه لانه ما ملج والملجه بعدها بتكون قبل العرس بشهر بالكثير
فعشان جيه ما اروم اناقشه في هالموضوع
وانا ما ابغي اطوف عليه كورس

وحياك الله في عزيمه الرياييل

--------------------------------------------------------------------------------------------------------

مرحبا حبيبتي شوق القلوب
وتسلمين على ردج
وان شاء الله بشوف تخصص ال MIS وبسال عنه
وان شاء الله يصير اللي فيه خير
ومشكوره عزيزتي على المعلومات اللي عطيتيني اياها

--------------------------------------------------------------------------------------------------------

انتظر ردودكم

[نويّر]

الســــــلام عليــكم

عـــزيــزتــي طرفشـــــانه

ربـــي يوفقــج ويهنيــــــج في حيــاتج ودراستــج ان شالله

في البـــداية مـاشالله اخوانــي الاعضــاء عطــوا اراءهــم بالنســبة لــي إذا كــان عزيــزتي
ريلــج موافــق على انــج تكملــين دراســتج الجامعيــه لاتدرســين أي تخصــص ادرســي تخــصص
ينــاسبج وعــقب ايفيــــدج في المستقــبل لانه مب بــس شهــادة جامعــية محد يــدري شو المستقــبل يخبـــي وراه

فاختــاري اي تخصـــص مهما كان دامج واثـقــه كل الثقــــه انــج قادرة على استكمال دراستج والتوفيق بين الجامعــة والبيت

ألــــــــــف مبــروك
الله يكتبلــج كل مافيــه خيـــر ان شالله
موفقــه

نويّــــر

[طرفشانه]

تسلمين عزيزتي نوير على الرد
وهوفعلا لازم اشوفلي تخصص
بحيث اني اقدلر اوفق بين الدراسه والبيت

والله يبارك في حياتج

[اصايل]

دام انج بتعرسيييين احسلج فنون جميلة بس انا اقول احسن شي تصلين صلاة الاستخارة و الله بيقدملج اللي في الخير
و مبروك العرس و الله يوفقج
بس ما عزمتتيناااااااا عالعرس:kkk:

[طرفشانه]

تسلمين عزيزتي اصايل على الرد
والله يبارك في حياتج
وان شاء الله بستخير
واللي فيه خير بيصير

وعلى طاري العرس من يتحدد ان شاء الله
كل اعضاء الواحه معزومين له