الجلب ما يخوف لين هذيك الدرجة ... و القطاوة طيبين جدا جدا جدا ... أذكر يوم كنت في المرحلة الثانوية أول ماكنت أطلع الصبح للمدرسة كان عند باب البيت قطو طبعا كنت أقوله مياااااااااااااو ... طبعا القطو الصبح يوعان و يريد أكل فيرد علي مياااااو و إذا مارد أعطيه على راسه و يوم أرجع الظهر أقوله مياااو هنيه بس غصبا عنه يرد علي و يقولي مياااو (الله يكفينا شرك بس) ...

أما الصرصور و الخنفساء فيسببون لي رعب قاتل ... أذكر في الثانوية واحد فاضي من الشباب ياب معاه خنفساء مادري لها أسم بس ما اذكر و كانت كبيرة و خلاها تمشي في الصف هنيه بس قلبي كان شوي و بيطلع و أنا أقول انشالله ما تيي عندي ... طبعا تمت الحنفساء تتمشى لين وصلت عند مدرس الكيمياء ... إيه ده إنتوا بتسموه إيه ... و يفتح باب الصف و يعطي الخنفساء شوتة وحدة إلى اللانهائية و ما بعدها ... بعدين قلبي ارتاح و حسيت براحة غريبة.

مشكلة الصرصور إنه يطلع فجأة جدام الواحد و يكون كبيرة أونه القائد و يسوي للواحد أزمه قلبية و يودع الحياة و حتى لو ضربته يطلع سوائل قذرة ... الصرصور دماغه صغير لكن يحسبها صح إذا حس إنك بتضربه يشرد و تكون سرعته خيالية و سرعته هذي بالتحديد تسبب رعب حقيقي ... لكن الصرصور بعد ما يشرد توقع إنه بيرجع ... الصرصور يشتغل في الليل بشكل أساسي و النهار ما يهمه ... الصرصور ما يموت من ضربه وحدة و حتى لو كان يقدر يشرد بعد الضربة الأولى توقع إنه ما بيفوت هذي الفرصة أبدا ... الصرصور هو مثال للعزم و التصميم و الشجاعة حتى الموت