نظـــرة حــــب

[الشوق]

الجزء [47] من قصة نظرة حب
وصـدرت اولى نسـخ الكتيب اللي حضرته مريم بعنـاية.. كانت صفحة الغلاف رسمـة وردة حمرا متمايلة وكانها آيلة للسقوط.. لكن الظل اللي يتخللها اهو اللي يحميها من السقوط.. وكانه مساعد اهو الوردة والظل اهو عاليـة اللي تحميه وتمسـك طوله عشان لا يتهافت.. اما عنوان الكتيـب من بعد البحث الجاد والطويـل وصل الى.

((ما بعد الحـب..))


مريم وهي تكلمها مناير بتأثر:.. حلـو مريوم
مريم وهي ساكتة تتمنظر في الغلاف.. وكأنها تحس بنقصانه..
الريال اللي مريم متعاقدة معاه: هذي مثل ما قلت لج يا اختي نسخة اولية ونقدر نعدلها لج.. احنا سويناها جذي عشان نبينها لج..
مريم وهي تناظره بفراغ.. ما تدري اهي بالضبط شتحتاج: مادري والله.. اهو حلو.. وبليغ لكن بعد احسه فاظي..
الريال وهو يطلع لها الواح عشان يراويها: شوفي عندج اكثر من قطعة .. قرري بينهم.. ومثل ما خبرتج قبل.. تقدرين انتي بنفسج تييبين الصورة اللي تبينها.. مهما كانت بسيطة احنا راح نغيرها لج ببرامج الكمبيوتر..

تمت مريم تتصفح في الصور وهي محتاجة صورة بليغة.. صورة يقدر اي احد اول ما يلاقي الغلاف يشوف اي نوع من المعاناة مجسدة في الصفحات..

فلقت من بين الصـور صورة واحد واقف وراسه موطـى.. وكانه واقف على حافة شي ويناظر بللي تحت.. وحطت صبعها كفاصل بين لصفحات.. وتمت تدور بين الصـور ولقت صورة قديمة لقلم من الريش.. والحبر متناثر يمين ويـسار.. على الورق وعلى الصبع اللي ماسك القلـم.. فما قـدرت الا انها تتنـهد بحبـور.. وحتى مناير بعد تمت تناظر الصور وياها

مناير باندهاش: مريوووووووم الصور روعة..
مريم وهي تناظرها بفرحة والتفتت الى الريال:.. ابيك تخلط بين هذي الصورة (تقلب الصفحات)وهذي الصـورة.. ابي الريال يكون ورى كالخلفية وهالقلم والريــشه في المقدمة
ابتسم لها الريال: فهمت عليـــج.. انتي مري علينا باجر ان شاء الله وبتكون النسـخة بيدج.. وتقدرين تحطين عليها لمســـاتج او افكارج..
مريم وهي فرحانة: مشكور ياخوي وما تقصر..
الريال: حياج الله الشيخة اي وقت..

طلعت مريم ويا مناير وهم فرحانات.. بالاخص مريم .. لان حلمها اخيـرا بيتحقق.. واخيرا فاتن والعالم كله بيعرف اي نوع من العشاق اهو مسـاعد.. واي نوع من الحب بعده موجود في هالزمن..

مناير وهي فرحانة: ماصدق مريوووم.. اخيــرا بيطلع الكتاب.. اخيــرا بقدر اقرااااه واعرف السبب اللي خلاج تسوين كل هذا
مريم وهي تلف بالسيارة من البارك: تصدقين منور.. عمري ما حسيت اني انجزت شي مثل هذا.. صدقيني.. الكتاب بيكون شي فظيــع.. شي كبيـر بيرد القلوب لبعضها..
مناير: بس انا اللي مو عارفته انتي ليش قررتي انج تنشرينه.. جان عطيتي فاتن الاوراق وبلا لف ولا دوران..
مريم وهي تضحك: حلوة ذي لف ودوران... يا مناير.. الشي جاهز جذي على بطنه مو حلو.. لازم يكون فيه شويه تعب عشان الناس تقدره.. انا ادري ان من بعد ما ينزل الكتاب مسـاعد بيكفخنـي.. لكن بكون شجاعة وبستمر الى النهاية..
مناير : اي عرفت لكن ليـــــــــش؟؟
مريم: يا مناير.. احنا في زمن الحب صار شي مرتبط باللاخلاقيات.. وكل الناس تقول وينهم عشاق قبل اللي حبهم ما يموت.. شوفي مساعد في حبه لعالية كان يحيا.. وبحب فاتن يضحي بحب كان سبب حياته.. اخوي مساعد على الرغم من كونه تمثال القوة في حياتي الا انه طلع انسان يعيش على مطلب من احد ثاني.
مناير : وهالشي يبينه ضعيف؟
مريم: لا يا مناير.. هالشي يبينه انسان مثلنا مثل الكل... انسان يمكن اكثر محتاج لوجود اشياء معينه في حياته.. اشياء تبين للمجتمع ان الحياة لابد وانها تكون مليانة بألوان.. وان كان الحزن والهم منها.. فهي الوان ولازم يتحلى بهالانسان في حياته..

سكتت منــاير وهي تحس بكلام مريم البليغ.. صج كلامها.. كل انسان محتاج للألوان بحياته.. الوان الحب والوان الصداقة والمعاناة والفرحة والدموع.. والا ما كانت حياته فيها اي نوع من انواع التجارب.. لكن شحيله اللي ما يكبت حزنه او معاناته..

قطت مريم مناير عند البـاب.. وقبل لا تروح عنها نادتها

مريم: منوور.. حسج .. لاحد يعرف باي شي من اللي نسويه.. لا تخترب كل المخططات.. بعدين من لنا ذيج الساعة؟؟
مناير وهي تبتسم: افاعليج.. انا قدها وقدووود.. مع ان السالفة مافيها اجرام ولا اسرار الا اانها بعد لسبب نبيـل..
مريم: وييييييييييييه ماقدر عليج.. نبيل ولا عبدالله
مناير: يالله ذلفي.. سلمي على نورة..
مريم بابتسامة: وانتي بعد سلمي على الكل!!!

---------------------------

لؤي متحقرص.. يحس ان التوتر شـل حركــته.. من يوميـن راحو بيت بو زياد وكلموهم عن اللي يبونه منهم.. الا وهي غزلان.. وبو زياد ما رد عليهم بالحال وطلب منهم مهلة عشان البنت تفكر.. مع ان لؤي ظن ان السالفة ما فيها تفكير لان غزلان عطته الموافقة او الاجازة انه يروح ويطلبها لكن المهلة خلته يتراجع عن هالافكـار.. لو ان غزلان غيرت رايها.. او ابوها فهمها ان الفقير عمره ما يستوي ويا الغني.. وانه وانه وانه.... لكن لااا.. اهي قالت ايه.. قالت ايــه..

جراح وهو يناديه داخل البنك بهمس: لؤي... لؤي
انتبه له لؤي:.. هااا؟؟
جراح: وينك ... انا احاجي من مساع؟؟
لؤي وهو يرف بعيونه: لا ولا شي.. شكنت تبي؟؟
جراح: وقع هني عشان القرض..
لؤي وهو مستغرب: ليش؟؟ قبلو كفالتك..
جراح وهو مبتسم: ايه قبلوها.. ويالله وقع هني..
لؤي وهو فرحان لكن بنفس الوقت خايف: جراح ما ابي اورطك.. لو مثلا ما رضت
جراح: وقع انت الحين لا اغز القلم بعينك.. ما رضت.؟ على كيفها ؟؟ ان ما رضت انا اعرف شلون اخليها ترضي
لؤي وهو يتحمس للمزاح: شلون؟؟ بتكسر سيارتها ولا تقط راس حصان في سريرها؟؟؟
جراح: لا اكسر سيارتها ولا شي.. بس انشر اشاعة انك بتاخذ منور اختي واخليها توصل لها.. وبعدين خلاص..
لؤي وهو يفكر: منور؟؟ اي والله انا شلون ما فكرت باختك.. شوف ان ما رضت غزلان انا باخذ اختك اوكي..
جراح اللي انصدم من كلام لؤي: جب يالله جب.. تاخذ اختي؟؟ اصغر عيالك وتبيها.. يالله وقع
لؤي: هيهيهيهيهيهيههيهييو... خاف المســـكين.. انا اخذ منور؟؟ ليش ناقص ينون؟؟ (يتنهد بقوة) مادري ليش.. في قلبي احساس ان اللي اتمناه ما بصير..
جراح وهو يتنهد: تفائل بالخيـر يا حظي.. قول انشاء الله يصير خير.. لا تصير لي بعد جذي فاقد الأمل.. رب العالمين موجود وانت تيأس
لؤي وهو يقوم: استغفر الله رب العالمين... زين انا برد البيـت ما حس ان فيني قدرات ابداعية اليوم

طلع لؤي من المكان وهو متنرفز.. ما يقدر الا انه يتشائم بالموضوع.. لانه شاف ويه بو غزلان يوم خبره مسـاعد بذيج الليلة..وذكر شكثر كانت قصرهم في ابهى حلاته بذيج الليلة.. وشكثر بانت حياة لؤي اقل بهرجة من المكان البسيط.. وقدر يعرف –من غير ما يخبرونه- عن اسلوب حياة غزلان.. وعرف غلااها في قلوبهم..

مسح جبينه بقوووة وعنف وكانه يبي يبعد الافكار من باله.. تخصـر وهو منزل راسه.. يطالع ذرات الغبار الي حتى اهي ما كانت متماثلة.. بعضها غامج والبعض فاتح.. بعضها يتحلى بصفة خاصة والبعض ما ينذكر...

لؤي وهو يلبس النظارة:.. يا ترى يا غزلان انا وانتي راح نكون ذرة غبار؟ \

راح البيت لؤي وفي الدرب تلاقى مع مريـم اللي كانت توها داخلة البيت.. ابتسمت في ويهه وما رد عليها لابتسامة.. فاستغربت مريم هالشي وما وقفت اكثر عشان تفكر.. دخلت البيت وما لقت احد بالصالة قاعد.. راحت المطبخ من بعد ما قطت عباتها وراحت عند الماي تشرب.. الا ولؤي يدخل.. ويرمي روحه على الكراسي وهو شبه المنســدح..

طلعت مريم من المطبخ وهي تبتسم ولكن بعد مستغربة من حال لؤي..

مريم وهي ترفع معنوياته:.. واساب مان.. واي يو ساااد؟
لؤي وهو ماد البرطم: ناثن.... من وين ياية
مريم: مشوار ويا منور!!
لؤي وهو يعدل عيونه تحت النظارة: ما جنها كثرت طلعاتج ويا منور؟
مريم وهي رافعة حاجب بخفة: حتى لو .. علامها منور عشان ماطلع وياها
لؤي: وييييييييييييع.. عاد طلعي ويا بنات من عمرج.. مو وحدة كبر بنتج لو انتي من بنات اول وتزوجتي وانتي صغيرة
مريم: ههههههههههههههههههههههههه هههههه.. مالت عليك عاد..
لؤي وهو يتقرب من مريم : مريوم.. قوليلي.؟؟
مريم: شاقول؟؟؟
لؤي: انا قبيح؟
مريم وهي تنفجر من اضحك: ههههههههههههههههههههههههه ههههههههههههههههههههههاي. .
لؤي وهو زعلان: مالت عليج عاد...
مريم وعينها تدمع: اذا انت قبيح انا شطلع ام سودة للي عيوني ملحة مثل الصابون؟؟
لؤي وهو ينفخ ويهه: انتي ليش جذي لازم تدخلين في السوالف..
مريم وهي تنحني له: انت مو قبيـــح.. انت جميـــل واجمل انسان شفته بحياتي..
لؤي وهو يبتسم بطفولة رائعة: يعني ما بترفضني غزلان..

سكتت مريم وهي تفكر بالموضوع.. من حق انصدمت يوم عرفت من امها انهم رايحين بيت بو زياد يخطبون غزلان للؤي.. حست ان بالفعل جدار صدمها.. مع انها اعتذرت وما راحت لانها كانت مشغولة في اشياء ثانية بالبيت.. لكن بالفعل انصدمت.. لؤي يعني ما غيره معجب في غزلان.. وشلون اهي ما قدرت تعرف هالشي؟؟ يمكن لانها كانت مشغولة زيادة عن اللزوم.. لكن اللي تمنته من كل قلبها مريم ان غزلان تكون من نصيب لؤي.. لانه من صج معجب فيها.. وما قدرت مريم تعرف حقيقة هالشي الا يوم بدت تدقق في ملامحه وهو مستعيل ويعيل الكل وياهم.. وشلون كان على وشك انه يبوس يد مساعد اللي عصب في اخر اللحظة..

مريم: تكون غبية... وام حمار لو رفضت.. وحتى لو ارفضت..اهي الخســرانة!!.. يوم انها ما تناسب دخيلي مثلك يا نظر عيني..
لؤي وهو يسند راسه على الجدار: مادري يا مريم.. فيني احسااااس الله لا اييبه لاحد.. انها بترفضني..
مريم: قول لي سبب واحد يخليها ترفضك..
لؤي: غناها...
مريم: الفلوس وصخ دنيا
لؤي وهو يفكر: حياتها الراهية..
مريم: فقراء يغنيهم الله..
لؤي وهو يناظر مريم بابتسامة: الجمال..
مريم وهي تشمر يدينها: عاد لهني وخلاص..

جان تحط يدها على رقبة لؤي الي كان يضحك من قلبه على مريم وعلى حبها الكبير والجنوني واعتدادها بنفسها.. وشلون ان حالتهم الاجتماعية ما تفرق عندها ولا تهمها.. صج ان جراح محظوظ بمريم.. ولمعت الفكـرة في راس لؤي..

مسك يدين مريم: بسج عاد خنقتيني من قلب..الا اقول لج وينه مسـاعد..
مريم: مادري عنه.. خلنا نروح له غرفته..
لؤي: يالله.. مرة وحدة اتسلف منه ما عندي فلوس..
مريم وهي تضرب بيدها على ويه لؤي: مالت عليك وتبي تعرس..
يدفعها لؤي: جبي مالت عليج..

راحت مريم ويا اخوها عند دار امها من بعد بحثهم اللي ما لقوا فيه اخوهم... كانت ام مسـاعد قاعدة عند سيادة الصلاة وهي تقرى قرآن..

احتارت مريم: ندخل ولا شنو؟
لؤي بهمس: اذا تصلي بنعرف واذا القرآن دقيقة وحدة ما بتعطلها...

اتفقت مريم ويا اخوها ودخلو.. ولحسن حظهم ان امهم انتبهت لهم..رمت مريم بنظرات الاستنكار وابتسمت في ويه لؤي..

ام مساعد: هلا يمة..
لؤي وهو يقعد عند امه على الأرض: هلا بالغالية الطيبة,, تقبل الله يمة
ام مساعد بابتسامة: منا ومنكم يمة..
لؤي وهو يطالع مريم ويطالع امه: يمة وينه مساعد؟؟ دورناه وما لقيناه؟؟
ابتسمت ام مساعد: اخوك اليوم داوم بالشغل بس متـاخر.. تملل من قعدة البيت وأنت تعرفه زين موته ولا الفراغ..
استغرب كل من لؤي ومريم لكن في نفس الوقت مدحوا شجاعة مساعد انه يرجع الشغل من يديد باللي فيه:.. والله انا طول عمري اقول ان مساعد سوبر مان لكن اليوم طلع خوش سوبرمان..
ام مساعد: اخوك على اللي صابه من اللي ما يستحون ولا يرحمون..(تنهدت مريم واستدارت عشان تطلع) الا انه طلع من كل شي قوي.. اخيرا اهو تربيتي مو تربية احد ثاني..
لؤي وهو ينشد مريم: تعالي هني.. وين رايحة؟
مريم وهي تناظره بحزن: بروح أكل..
ام مساعد بنغزة: اكيد بتاكلين.. طالعة من حزة الغدى والله العالم وين رايحة..
مريم وهي واقفة بألم: يمة انا خبرتج انا وين بروح ومع من بروح.. وانتي لو ما عجبج هالشي جان قلتيلي لا تطلعين
ام مساعد وهي حاوسة ثمها: والله قلما همني وين بتروحين ولا وين بتيين البنت اللي تمشي كيفها على الكل مو بنتي.. (بهمس علبالها محد يسمع)ياليتني يبت بنت وحدة وعشرة صبيان..

تجرعت مريم كلام امها بكل قبول.. وانسحبت من الغرفة تحت انظار لؤي اللي كان مشفق عليها.. لكن على غير العوايد هالمرة اهو كان مستعد انه يكلم امه عن هالسالفة.. لان مريم لا تستاهل ولا سوت الشي اللي يمكن يخلي امه تقول لها مثل هالكلام..

لؤي: يمة .. ساعات الانسان يظلم بهالدنيا بداعي ظلمه... والمظلوم لا ظلم احد ما يتم مظلوم.. لا تظلمين مريم يمة.. مريم طيبة وما تبي الا الخير اللي انتي يمكن ساعات بداعي غيرتج علينا ما تشوفينه..
ام مساعد: انا ما شوف الخير لكم؟؟؟ ليش ان شاء الله يعني هالكثر انا انانية وما اهتم لكم؟
لؤي وهو يمسك امه: يمة جوفي انتي شلون تقولينا الكلام من غير حتى ما احنا نفكر فيه.؟؟ يمة اسلوبج ويانا في الفترة الاخيرة... من طيحة مساعد ما كان يساعد احد فينا على انه يعيش في جو مرتاح في البيت.. (يبتسم لها بحنان) ويمة انتي اللي كنتي دوم تدوسين على اليمر عشان نعيمنا احنا.. شوفي مريم شكثر محتاجة لج.. وانتي ما تكلمينها الا باسلوب يسم الخاطر.. هذي مريم يمة ولا نسيتي
اغرورقت عيون ام مساعد: ومريم نستني يا لؤي.. ونست اخوك وطيحته وعناه وتعبه ووقفت ويا هذيج البنت اللي من دشت حياتنا اهي وعايلتها احنا ما لاقينا خيــر .. لا تلومني يا لؤي.. انا شفت ولدي ينذبح بدل المرة مرتين ومو قلب هذا اللي يستحمل.. وخصوصا في الضنى .

سكت لؤي لان ما كان على كلام امه أي تعقيب.. فقامت ام مساعد وهي تحمل القرآن وتسحب السيادة من على الأرض

ام مساعد وهي تذرف دمع: بعدكم ما صرتوا أهل ولا والدين.. فشلون بتقدرون تحسون او انكم تقكرون باللي انا افكر فيه واللي انا صرت اعيش فيه من حملي بمساعد لحتى هاللحظة ومريم تسوي اللي تسويه بس عشان تغضبني..
لؤي بنظرة حنونة: ما يا على خاطرج ان هالشي يمكن يساعد مســاعد بدل لا يظره؟
جذبت ام مساعد لانها تعرف ان روح ولدها في ذيج البنت: لا... ما خطر لان اخوك ما يبي البنت وخبرني بهالشي.. اهو يبي يطلقها باسرع وقت.. بس يخاف عليها ويخاف على اهلها...

ماصدق لؤي ولا كلمة وقام من مكانه...

وقفته ام مساعد قبل لا يطلع من الدار: اسمعني يا لؤي.. لا تظن انك في يوم من الايام اذا سويت شي بخلاف رغبة اهلك انت بتفرح بهالشي.. حتى لو انا ما كنت راضية فما بقدر اسوي شي.. لكن رب العالمين يقدر يسوي اشياء.. رضا الله من رضا الوالدين...
ابتسم لؤي في ويه امه: غريبة مووو يمة؟؟ ان الله وصانا عليكم وعلى رضاكم.. يمكن ساعات انتو تنفذون اللي يضرنا من غير ما تدرون... وما تقدرون تلاقون شي من وصايا الله اللي تخليكم تحطون بالكم علينا... المال والبنون زينة الدنيا يمة... والزينة ما لها الا الفرحة.. لكن شوفينا كلنا الحين ... ولا واحد فينا مرتاح بحياته.. ليش انج مو راضية عن واحد فينا... فشرايج الحين يمة؟؟؟


سكت لؤي وتم يناظر امه اللي كان الحمق واصل لخشمها منه.. لكن اهو بويهه الملائكي والطيب انسحب من الغرفة ومن البيت كله مرة وحدة... يكفيه اللي فيه.. وتمنى لو ان مساعد موجود عشان يقدر يخفف اللي فيه..لكن هذا امتحان لك يا لؤي ولازم تجتازه بروحك في هالوقت.. لان اهلك وناسك وربعك واصدقائك ما راح يكونون موجودين لك طول الوقت.. انت لازم تتخذ اصعب القرارات في حياتك ولا زم تتحمل عواقب كل شي وتتحمل ضغوطات كل الاشياء اللي تتمناها تصيــر...

-------------------------


بحـــيرة وقفت غزلان جدام المنظرة وهي تناظر شكلها.. يومين من طلب ابوها منها انها تفكر في موضوع لؤي.. مع ان تنبيهات ابوها كانت لا تعد ولا تحصى الا انها ما شكلت أي فرق بالنسبة لها.. وهالحيرة اللي داهمتها من زيارة بيت الدخيلي بيتهم.. للحظة وما اطول هاللحظة فكرت بحياتها ككل.. شلون كانت وشلون اهي وشلون بتصير لو مثلا اهي قبلت بلؤي.. لازم تفكر -وان بينت طريقة تفكيرها سطحية – بمستواها الاجتماعي والعاطفي والعائلي اللي بتكون اقل منه في كل النواحي.. لان لؤي مو مثل فهد زوج غصون اللي يمتلك تجارة واسهم وثروة طائلة وحسابات في البنوك..


دخلت غصـون الغرفة وهي تطل براسـها: مشغولة؟؟
غزلان وهي تناظرها من المنظرة: لا ابد... (تلتفت لها) حياج


دخلت غصون ببطنها الكبير وهي تزفر.. واستراحت على الكرسي الوثير اللي عند الزاوية يم الدريشة


غصــون: ااااه.. متى بس يطلع هللي في بطني.. عمري ما توقعت الحمال بهالصعوبة
غزلان بابتسامة وهي تقعد على السرير وتمسك العمود المتوسـط: صعب لكن حلو مو؟
غصون بابتسامة ماكرة: اذا عندج واحد يدلعج ويحبج ويبوس الارض الي تمشين عليها
غزلان وهي ترفع حاجبينها بخبث: شقصدج؟؟ تحريني
غصـون: معاااذ الله.. ههههههههههههههههههههههههه ه ..


سكتت غزلان وهي تناظر غصـون وكأن الكلام على لفظـها لكن شي ما يمنعها من الكلام


غصـون وهي تفكر بللي يمر في بال غزلان: محتـارة؟؟؟
غزلان وهي تناظر غصون بعيون ذاهلة:... شدراج؟
غصون بابتسامة عريضة: اعرف لهالنظرة زين ما زين ابيه.. ما ابيه... زين لي.. مو زين لي.. شي طبيعي وعادي..
غزلان وهي مستغربة برود اختها واستخفافها: تظنين الشي هين ولا بسيط؟
غصـون: اكيد موسهل ولا هين ولا بسيط... هذي حياة كاملة انتي لازم تفكرين عنها
غزلان: حياة كاملة... وشخص غريب يدخل هالحياة الكاملة..
غصون بابتسامة: هذا شي ما توقعته فيج
غزلان: شهالشي؟؟
غصون : حيرتج في لؤي.. توقعتج بتوافقين على الحال..
غزلان بحزن: مادري غصـون.. قبل كنت افكر غير.. ويوم صار الصج.. تغيرت افكاري كلها...
غصـون: مثلا؟؟
غزلان وهي تقوم من مكانها وتمشي وسط غرفتها:... ان الاحلام الوردية مالها اي حقيقة في عالمنا هذا.. ان البيت الصغير اللي في ديرة صغيرة صار ما يكفي.. ان لؤي.. (تلتفت الى غصون) ما راح يلبي لي نص اللي انا القاه هي من غير ما طلبه..
غصـون وقفت وتوجهت الى الباب.. ولكن غزلان انصدمت من حركتها.. وقبل لا تطلع غصـون وقفت مكانها والتفتت الى غزلان:.. غزلان.. انا في هالحظة.. وانا حاملة هالولد اللي في بطني.. وبعهدة زوج مينون فيني.. اتمنى لو ان في يوم من الايام مساعد سوى هذا كله لي.. او انه التفت لي بلحظة.. لان كل هالفلوس وكل هالسعادة الزائفة مالها اي معنى لو كنتي في بيت صغير ولكن مليان حب.. طالعيني.. وتعلمي مني.. ان احنا نحيا مرة وحدة.. ونموت مرة وحدة.. نحب مرة وحدة.. ونتزوج مرة وحدة..


بعد كلامها اللي اجاب على الأسألة اللي مرت في خاطر غزلان في أيام.. وبينت حقائق اهي كانت غايبة عنها.. طلعت غصون من المكان وهي مخلفة اشبه بالشفقة واحساس بالنجاة في قلب غزلان .. ووكان كلام غصون اهو كل ما احتاجت له غزلان...


غزلان وهي تتكلم:.. مسكينة انتي يا غصون...تمنيتي ريال حب بعمق.. وحب مرة ثانية بصورة اعمق.. ولكن ما قادر يتنهى في هالشي.. يمكن لو انتو الاثنين تلاقيتو كنتو بتسعدون؟؟

------------------------------------


مسـاعد على التلفون:... لا يـمة.. هدي بالج.. يمة ما قصدها شي... ولا لؤي قصده شي.... (تهفف) يمة وللي يسلمج عاد.. اكسري الشر.. زين لا تبجين... هه. ولا عشان خاطري؟؟؟ افا يام مساعد.... انتي تبجين انا يتزلزل كوني... يالله عاد عشان خاطري..
ام مساعد وهي تبجي في التلفون: ولله .. والله اني متحسفة.. ليت بطني انشق ولا يبت هالاثنين.. ولا اختك بعد قالبته علي... انا لؤي يقول لي هالكلام.. انا يا مساعد؟؟؟؟ انا شذنبت بدنياي عشان يصير كل هذا معاي.. عيال انتو؟؟ عيال ولا عوووق؟؟
مسـاعد وهو مو طايق حال امه: يمة انتي بس هدي بالج واله ما يسوى عليج.. واوعدج اول مارد البيت (يطالع الساعة) ما باقي شي ترى.. كلها ساعة وانا عندج وبكلم هالثنين.. انتي بس لا تعصبين اكثر..صحتج يا يمة..
ام مساعد: انت بس لو تسوي لي اللي انا ابيه.. صدقني.. مو صحتي.. الا ساااس الصحة كله بيرد لي.. سو اللي يرضيني يا يمة .. اسمع كلامي وانا امك..
غير الموضوع مساعد 180 درجة عشان لا تزيد امه من آلامه: يالله يمة انا بخليج الحين وابيج تهدين اعصابج.. فمان الله الغالية
ام مساعد: فمان الكريم يا وليدي..


سكر مساعد التلفون وهو مشدود الاعصاب وكانه بيخنق احد.. يا الشغل عشان يشرد من قرقة البيت والفراغ القاتل... ولكن كل شي قاعد يلحقه مثل الشي اليوعان اللي ما يخليه يهنى ولا يرتاح ويعيش في حالة دائمة من الصراع والتوتر القاتل..


حط كوعينه على الطاولة وسند راسه وهو ماسك جبينه... كان شعره مرتب بالجل ومصفوف بطريقة حلوة لكن الي مشوه ملامحه اهي اللحية الغير مرتبة والهالات السودة والضعف الغريب اللي انتاب جسمه من التوقف عن الرياضة.. حتى انه يوم دخل المكتب ما تعرفت عليه موظفة لااستقبال الا من بعد ما ابتسم لها برسميته الجميلة.. وتم الكل يناظره ويرافقه بعيونه وهو يمشي الى المكتب.. عمره ما مر بهالموقف المحرج في حياته كلها.. لكن لكل شي بداية.. وهذي بداية حياته العملية بالعاهة المستديمة اللي فيه.. العرج كان واضح وصلابة مشيه على الأرض كانت ملاحظة وبقوة في المكان.. لكن اهو ما اهتم.. مشى وهو رافع راسه.. وخشمه يقطع الهوا مثل السيف في النفحة الساخنة.. لمن وصل الى المكتب وعطى نفسه الفرصة انه ينهار على الكرسي بتعب نفسي اكثر منه جسدي... وتم يشتغل ويستفسر عن الحسابات اللي هو مسؤول عنه فعرف ان بو زياد شخصيا كان يهتم فيها من غير تدخل احد... وكل شي رجع له في اللحظة اللي اهو وصل فيها.. وبوزياد ما كان يقدر يكون فرحان اكثر.. على الرغم من انه متوجس من خطبه لؤي لغزلان الا ان اللي في البيت يظل في البيت والشغل له حرمته ومكانه الخاص..


تم يدور على رزمة اوراق من بعد ما سكر التلفون عن امه واتصل في الموظفة البديلة عن نجاة اللي عندها اجازة الأمومة...


الموظفة: هلا استاذ مسعد
استغرب مساعد من تغير اسمه: اسمي مساعد... ابي اسألج عن اوراق حساب المالكي... وينها ؟؟
الموظفة باحراج : اهي عندي انا قاعدة ادخل بيانتها في الجهاز واول ما خلص بييبها لك
مساعد: وييبي معاج البريد الخاص...
الموظفة: بس انت قلت انك ما تبيهم ايوم
مسـاعد: عندي ساعة فاظي بقعد افرزهم الحين.. ولا عندج مانع؟
استغربت الموظفة وقاحة مساعد الخفيفة لكن وقاحتها اهي اكبر يوم انها تسأل وتترادد مع مديرها:.. دقايق وهم عندك..

سكر مساعد عنها وهو يتحلطم..


يات موظفة ووقفت عند الموظفة البديلة:... ههلووو
الموظفة البديلة بمزاج متعكر: ما عندي وقت..
الموظفة الثانية: ويييي علامج؟؟ جن قارصج فار ههههههههههههه
الموظفة البديلة: مو فار.. قولي الا صابين علي ماي بارد..
الموظفة الثانية: اوووووووووووه.. قصدج الجليد.. المعروف باسم مساعد الدخيلي؟؟؟ ياخيج تعودي ترااااج بعدج باول يوم وياه
الموظفة البديلة: ليش اهو شفيـه؟؟؟
الموظفة وهي تقعد عند الطاولة: بس صاده حادث وقطعو ريله وتم في غيبوبة فترة طويلة.. ولا فوق كل هذا الظاهر ان خطيبته راحت برع وجن ماتت..
الموظفة البديلة وهي مستغربة وفاجة عيونها: حلفي؟؟؟ وا عليه ما يستاهل..
الموظفة الثانية: عادشقول لج.. الدنيا جذي يا وخيتي غدااارة..
الموظفة البديلة: عيل خليني اكمل الي عندي لا تغدر فيني الدنيا.. كلش مالي خلق الزف والهواش.. كفاية بو زياد باول الأيام..


بعد فترة من الدقايق دخلت الموظفة الى مكتب مسـاعد اللي كان يتصفح في ملزمة عقد لحساب يديد عند مكتبه يحتاجون الى نصيحته فيها.. كل هالامور اللي يتوكل بها مساعد من شأنها انها تخليه يحس بالثقة بالنفس.. ويحس لغروره واعتداده يرجع فيه .. ويوم التفت الى الموظفة البديلة لقاها حاملة بوكس بني كرتوووني فيه البريد الخاص بمسـاعد .. لاحظها لقاها بنت هزيلة الغباء يبين على ملامحها الا ان السذاجة غالبة شكلها فتخليها جميلة ومشفوق عليها..


حطت البوكس على الطاولة وسحبت الملف اللي كان على غطاه: هذا هو الملف اللي طلبه.. وهذا البريد... وترى معظم الرسايل فتحها بو زياد .. الرسايل اللي تتعلق بالحسابات طبعا..
سحب مساعد البوكس لعنده: واهي فيها اشياء غير الحساب..
فكرت الموظفة وهي مسكرة عيونه وحاوسة ثمها ومساعد يراقبها باستغراب.. وفجاة لمع شي بعيون البنت: اي لحظة نسيت شي..
طلعت من المكتب تحت استغراب مساعد واستنكاره لهالبنت.. : الله يردج على خير يا نجاة..
دخلت الموظفة وهي حاملة مغلف بني مسـكر : وهذا الشي بعد وصلك من فترة.. فترة طويلة شوي.. وكان عند نجاة..


شهالشي اللي ياه من فترة ولا احد فتحه.. هذا الشي اللي طرى على بال مسـاعد.. واخذ الظرف من عندها واهي اخذت دربها وطلعت من المكتب..


حط مساعد المغلف بعد ما دقق فيه لفتـرة.. وسحب البوكس لعنده للرسايل الموجودة في البريد.. لكن شي حاس في نفسه خلاه يمد يده الى الظرف ويفتـحه.. طلع بداخله لقاه رزمة من الصور وبينهم ورقة.. طلع الورقة لقى فيـها اللي انكــتب


<< ما كان عندي شي فرحت اظهر الصـور.. وطلعت.. وقلت ارسلها لك.. يمكن تعجبك.. فاتن>>

مؤرخة قبل الحادث وقبل سفرها وحتى قبل رجعتها.. فشي ارتعش في من الصميم.. وسحب الصور من الظرف بسرعة... وانسابت الصور ما بين يدينه على الطاولة وبعضها على الأرض لانها زلقة..

اول صورة طاحت بيده اهي صورته ويا مريـم بابتسامة اخوية حلوة.. والصورة الثانية كانت صـورة مريم بس وهي تضحك بعمق قلبها وحامله شعر البنات اللي تموت فيه.. فابتسم مساعد.. ولف على الصورة الثالثة لقاها صـورة لفاتن وكانها مو منتبهه في الصـورة .. كانت ملامحها جميلة مثل ما عهدها.. منحوتة واشبه بقطعة من الجمال.. ونظرتها اهي نظرة الغرابة والغموض اللي حملتها بعيونها من اول ما عرفها.. لاخر مصادمة له وياها..

والتفت الى الصورة اللي طايحة على الأرض.. سحبها وهو يكابد اللي فيه من اشجان متجمعة.. لقاها صورة له اهو وفاتن واقفين يم بعض.. وكانهم ملتفتين الى الصورة.. شي في الصورة خلاه يحس باهتزاز قوي فيه.. كانت فاتن لاصقة فيه على جنب.. والدبلة واضحة للعيان بلمعانها.. وكانهم لبعض.. وكانهم مخلوقين من بعض... فاستغرب وجوده في الصورة.. استغرب كونه هالشخص واستغرب كون فاتن هالانسانة اللي شافها قبل جم يوم... واللي حملها بتعبها واحزانها الى البلد وغادر عن عيونها مرة وللأبد.. ماقدر يناظر الصورة اكثر.. فقلبها على الطاولة وسكر عيونه وسند راسه على الكرسي.. نفس الألام تمر فيه من يديد.. ونفس التوجعات.. لكن ماكو اي دوى مناسب. ولا شي يخليه يحس بخفة الشي او خفته..

يوم حس ان حالته خفت.. رفع الصورة مرة ثانية.. وتم يدقق فيها.. يحاول يلقى شي من الحقيقة في الصورة غير ضوء الشمس الساطع.. وحقيقة كونهم لبعض.. والتفت الى الصور الباقية.. ولقى الصور ممزقة للقلب.. ابتسامة فاتن الناصعة.. وضحكها الطفولي ويا مريم.. وصور ثانية لها ويا جراح باول ايامهم في اميـركا.. وين ما كان حزنها تاج جمال تحمله مثل البجعة بعنفوان الكبرياء.. ولها صـورة لحالها في الشقة ماخوذة.. واقفة عند الدريشة اللي تطل على الشارع واللي دايما كان يلقاها هناك مثل الطير المحبوس.. كانت تناظر للي برع.. والصورة اللي بعدها كانت تناظر اللي يصورها بنظرة الغموض..

ترك مساعد الصـور وهو يحس انه يتلاشى من الوجود.. ابتلع غصة عميقة وبغضب جامد تسللت اصابعه الى الصور عشان يشقها.. لكن وهو في نص عمليته حس ان في شي يمنعه من اتلاف الصـور.. لان الحقيقة الصارخة كانت موجودة.. فاتن له واهو لها.. لكن عند من؟؟؟ من من الناس اللي بيقبلون رجوعهم.. غروره وكبرياءه يمنعه وبشدة.. يطالبه بالذبح .. بتعقير هالحب اللي يعمر مثل الجمر واللافا بخاطره ونسيان اللي صار..


وطاحت عيونه على صورة فاتن اللي واقفة فيها وتناظر اللي يصورها.. وحس انها موجودة. مو في الصورة بل في المكان معاه..

خاطبها بصوته الكسـير:.. اصعب الأوقات.. اهي بالرفض والقبول.. وانا رافضج..لكن كل اوداجي تقبلج برحابة... اهديني بدل الغموض.. نظرة الحب يا فاتن...نظرة حب خالية من الدمع.. وخالية من الألم.. وخالية من اللوم... ولانج ما بتقدرين... فما راح يكون لنا اي مصــير..

---------------------------------

كان الجو ساكن في ذيج المغربية والكل في حالة من السكون.. مشعل في البيت قاعد وهو يتسمع الى الاسطوانات وهوسه فيهم.. وسماء في بيت خالتها كالعادة وهي حاسة بالدنيا اللي مو سايعتها.. خالد ما كان يتواجد في البيت بسبب هالشي.. عشان يخليها على راحته وعشان ما يخلي اللي ما يرضى الله عنه يصير.. بعده وعدم تواجده في البيت ما يأثر عليه لان فرحة وجودها بينهم وفي نفس المكان اللي هم فيه تغطي على كل شي..

حس مشـعل لفوظى صايرة تحت.. فتوقع انها يمكن سمـاء ويا احد من من بيت بو جراح.. وتمنى في خاطره لو انها تكون مناير.. لانه من رد مع سماء ما لقاها ولا شافها.. وتمنى لو انه يلاقي ويهها السمح مرة ثانية.. فنزل من غرفته الا ان وقف عند استراحة الدري اللي في المنتصف.. وشاف الغير متوقع...

كانت امه وهي لابسة نظارتها الانيقة وبدلتها الدولتجي قبانا العاجية وهي تكلم الخادمة عشان تدخل اغراضها الى غرفتها.. واهي تناظر المكان التفت الى ولدها الواقف بصدمة وابتسمت بقوة وسيطره..

سلوى: ولدي الغالي.. تعال سلـم على امك..

نزل مشـعل بتردد وهو يحاول انه يبتسم بزيف لكن ما قدر الا انه يمد شفاته شوي.. عشان يرد ويوقف مكانه بصدمه اكبر من الأولى.. هالمرة اللي دخل البيت كان ابوه.. وبنفس مظهر امه كان ابوه.. في منتهى الرقي ومنتهى الأناقة...

مشـعل : يبا؟؟؟
سلوى وهي تتقرب من ولدها: مفاجاة صح.. ما لقينا روحنا الا في نفس الفندق ونحظر نفس المؤتمر.. فكان هالشي كفيل انه يشعل شراره الحب من يديد .(تضحك بتصابي غبي) شخبارك انت؟؟ ومتى رديت من السعودية؟
بو مشعل: مشعل شلونك؟
راح مشعل عند ابوه يحيه:.. هلا فيك يبا.. حياك الله..
سلوى: زين حبيبي ما قلت لي.. متى رديت من السـعودية..

مشعل اللي مو عارف شيخبرهم.. ان سماء وياه هني في البيت.. وانه غير كل اللي اهم سووه في يوم.. وانه تغير عن الي اهم تمنوه منه في يوم.. ما عرف شيقول لهم..

مشعل: قبل جم اسبوع..
ام مشعل وهي مستغربة: جم اسبوع؟؟ انا متصلة في جنا.. وما قالت لي انك موجود...
مشـعل وهو يبرر: لا بس كنت مشـغول شوي وما صا..

الا وبفوضى سماء اللي تدخل بضحكــتها العالية واللي صارت مألوفة من ردت للحين.. لكن الضحكة اختنقت في الحنجرة يوم لقت ابوها واقف ويم مشعل واقفة امه.. وكأنها بريلها ترجف من قوة الصدمة والخوف انها ترجع للي كانت فيه في يوم..

بو مشعل بصدمة :سمــاء؟؟؟ شتسوين هني؟؟؟؟

وقفت سماء وعيونها شبه السايحة وهي تناظر اخوها اللي انقذها في يوم وتتمنى لو انه ينقذها مرة ثانية.. لكن المشكلة هالمرة اهو اللي يتمنى النجاة قبل اخته..

سلوى بغضب كبير: انتي ما تقوليلي شلون رجعتـي.. وشلون خلوج تطلعين من هناك واحنا مشددين على كونج في محيط المدرسة طول الوقت.. يا نتفة الشر انتي..

وتوها كانت بتروح عند سمـاء اللي متقدة من الخوف والتوتر الا مشـعل يمسـكها..

سلوى وهي مستغربة من ولدها: مشعل؟؟ اختك شلون هني..
مشعل من غير ما يناظر امه بعيونه: يمة.. سماء انا رديتها...

سكت عنها مشـعل وراح لعند سمـاء.. ووقف مجابل امه وابوه ومخبي سماء وراه.. ورفع عيونه وهو يناضل للشجاعة..

مشـعل: سماء خلاص.. ما بترد اميـركا مرة ثانية.. مكانها هني في بيتها وبين أهلـها..
بو مشـعل وهو مندهش: لا والله؟؟؟؟ وبأمر من هالكلام
مشـعل وهو يتوسل ابوه بعيونه: لا بأمر احد ولا برغبـة احد.. كافي انانية يبا.. سماء انسانة من حقها تعيش مثل ما كلنا نعيش..
سـلوى: انت ناسي شلون نزلت خشمنا للقاع بعمايلـها؟؟
مشـعل وهو يتوسل امه بعيونه: يمة.. سماء ما سوت شي غلط.. كل اللي تمنته في هالدنيا اهي نظرة الحب منج او من ابوي.. او حتى مني انا... (يلتف لعندها ويناظر عيونها اللي معانقة الأرض من الخوف) سماء يمة اكبر مظلومة بيناتنا.. وانا ما هنا لي بال وانا عارف اننا ظالميـنها..
سـلوى وهي تصرخ وتهز اركان البيت وياها: هذي نطفة شر.. ولازم نســحقها ونسـحق غرورها علينا.. اليوم ان سكتنا عنها باجر شبتسوي ويا سخافتها ويا ولد اليران؟؟
بو مشـعل: سلوى كافي صراخ
سلوى وهي ترتد على زوجها مثل الحيا: وانت اللي ما لك حق تتكلم... انت اللي يبتها وحطيتها على قلبي وهدمت حياتي وحياة ولدي بسببـها.. انت السبب في كل شي.. فلا تتوقع مني اني اسكت اكثر.. (تناظر مشـعل بكره وبشاعة) عمري ما توقعت ان ولدي ينجلب ضدي.. لكن شاقول.. جبان من ظهر جبان... وان جان انت ما تقدر تردها من محل ما يات.. انا بردها..

تجدمت سلوى خطوات ومشـعل يتراجع ويا سمـاء عنها وبدت انات الاخيرة تصدر بوضوح تعلن خوفها وارتباكها.. ولكن اللي وقف سلوى هالمرة كان مشـعل بيده وهو يمنعها

مشـعل: يمة.. يمة وانتي امي الغالية واحلفج باللي اغلى ما عندج. خليها يمة.. خليها بيناتنا يمة كافي فرقى وكافي قطيـعة
سلوى: مستحيل.. انا مستحيل اخلي سبب تعاستي على الأرض تعيش وياي.. كافي 18 سنة وانا اناظرها شلون تكبر وشلون تنهي كل شي انا ابديه.. كافي .. وجودها في حياتي غلط بغلط.. (وبدت حقيقة مشاعر سلوى المجروحة كمرة تظهر) اهي اللي حرمتني من كل فرحتي بهالدنيا.. اهي اللي خلتني اصير اللي اصيره.. اهي ووجودها الغلط في حيـــاتي.. انا كان لازم اذبحج يوم كنتي صغيرة عشان ما خليـــج..

واختــفى صوت سلوى بصفعة زوجها العميــقة اللي خرست كل الألسن.. سماء من شدة صوت لصفعة تشبثت بظهر مشـعل وكانها ما تبي تفارقه.. عيون مشـعل كانت متوسعة على منظر امه المنكــسر واكثر شي على ابوه اللي يبين ضخم وكبيـر في ذيج اللحظة.. اولى ردات الفعل العنيفة من ابوه تجاه سلوى وكلامها الجارح على مدى السنين..

سلوى وهي منصعقة:..... حسيــــن؟؟؟؟
بو مشـعل وويهه مشتعل يمــر:.. كافي يا سلوى... كافي..... كفاني ما ياني منج على طول هالسنين..... كفاني .. وكفااااها بنتي منج... غصبــن عليج.. رضيتي ولا ما رضيـــتي.. سمـاء بنتي.. البنت اللي يبتها عن حب.. مثل مشـعل.. اللي يبته عن حب.. .حبي لج.. أللي عمرج ما حسيتي فيه ولا بتحسين فيه دام هاي افكارج...
سلوى وهي تتوعد فيه: انت جنيت على نفسكـ.
بو مشـعل وهو يناظرها بشزر: انا جنيت على نفسي قبل 23 سنة.. اول ما تزوجتج.. تزوجتج بقلبي لكن انتي عمري ما شفتي قلب.. شفتي فلوس ومنصب ومركز وكل هالأمور.. ظنيت انج بتتغيرين.. لكن لا.. وتلوميني لو رحت ودورت على حب انسانة ثانية.... ؟؟؟ مالج حق..
ســلوى وهي معصــبه: مالي حق؟؟؟ مالي حق؟؟ من اللي هجر الثاني يا حسين.. من اللي ياب التعاسة لبيتنا؟؟ من ؟؟ انا ولا انت؟؟؟ كنت تقدر تصبر .. لكن لاأ.. ما ياز لك الصبــر..
بومشعل: اصبر؟؟ واشكثر اصبر عليج.. اربع سنين وانا انتظرج واصبر عليج لكن انتي ما كنتي ولا في يوم تهديـــن.. لكن هذا مو وقت الكلام.... (يلتفت لسمـاء) سما يبا.. تعالي يمي..
سلوى: خذ بنتك واطلع من بيتي.. وانا بتم ويا ولدي..

ابت سماء الروحة وظلت متشبثة ولكن بقوى اكبر بأخوها اللي منصعق مكانه من اللي يصير...

بو مشـعل وهو يراشيها:.. سما يبا.. تعالي عندي.. ما بسوي فيج شي... تعالي...
سلوى: روحي ويا ابوج وهاتي ولدي..
بومشعل: تعالي حبيبتي.. تعالي ويا ابوج..
هزت راسها سماء برفض ودمعتها تحرق خدها.. : مابيك.....
تألم بو مشعل من كلام بنته وبانت آلامه على ويهه ومشـعل اللي تكلم: .. احنا بنطلع من هني..
بو مشعل وهو يحس بان احزان الدنيا طاحت على ظهره:.. وين بتروحون
سلوى تعيد السؤال: وين بتروح مشعل؟؟؟
مشعل وهو ماسك يد سماء : بنروح بيت الشالية.. او اي مكان يظمنا.. لكن خلاص.. احنا ما نبيكم... (يكلم امه) خلي البيت والمركز الاجتماعي لج يمة.. احنا ما نبيه خلاص... وانت يبا... خلك هني ويا اللي تصبر عليها وتصبر عليـك...عيشو حياتكم.. لانكم مشغولين من العقاب.. احنا نزل فينا عقابكم... ولتهتونا بحياتنا لحد هذي اللحظة وين ما تبون تقسمونا بيناتكم.. انا لامي وسماء لك.. اعرفوا اننا ما نبيكم.. ما نبيكم.. انا بتم لاختي واختي بتم لي.. وهذا شي لا انت ولا امي بتلاقونه يوم لا فيكم .. ولا فينا....

ترك مشـعل امه وابوه وسحب سما معاه لفوق عشان يلمون اغراضهم ينسحبون من المكان نهائيا... وقفت سلوى مكانها وهي تحس ان المكان فظى مرة وحدة من الكل.. لان حتى بو مشعل انسحب من البيت وطلع.. ولا تدري وين راح.. لكن قلما يهمها هالشي يروح وين ما يروح لكن ولدي ما ياخذه وياه.. ولا تاخذه بنته العقربة... فلحقت ورى مشعل لداره.. ولقت الباب مفتوح وهو يسكـر جنطته اللي مافجها.. كانه يحس انهم لو ردوا بيخلفون هالنوع من التعاسة عليهم..

سلوى وهي تلم مشـعل بعصبية: مشعل.. انت عمرك ما مشيت خلاف كلامي.. عمرك ما سمعت شور غير شوري.. غيرت سماء بالك.. قدرت انها تسم قلبك علي يا يمة .. هالحيا الرقطى
مشـعل وهو ينفض نفسه من امه بعصبية: يمة بس خلاص.. كافي يمة كافي... حرام عليج.. حرام عليج ذنب هالبنية حاملته في رقبتج وما يهون عليج حالها ولا لدقيقة....؟؟ تلومينها على اللي انتي سويتيه
سـلوى بصدمة: يمة... هذي انا امك.. مو وحدة غير... تفضل الدخيلة علي انا؟؟
مشـعل ودمعته جارية بغير تصديق: يمة اي غريبة واي دخيلة؟؟؟ يمة هذي من لحمنا ودمنا.. هذي اختي يا يمة.. اختي اللي تحملت فيها وحبيتها على كرهج لها.. حبيتها وحملتها في قلبي مثل الوردة اللي انتي ما تعرفين لقدرها.. يمة انتي لو تدرين غلاج في قلب سمـاء ما قتي هالكلام..
ام مشعل وبتصرف جنوني تلم مشعل لقلبها بتشبث وكانه بطير: ما بخليها تاخذك مني.. ما بخليها تاخذك مثل ما اخذت امها ابوك... ما بخليها
مشعل يحاول ينفض نفسه بلطف من امه: يمة خلاص ما عاد لج اي سلطة علي... ما تقدرين تمنعيني
سلوى وهي تصرخ وتنفض مشعل من بين ايدينها: لااااااااا... انت ولدي.. انت ولدي محد ياخذك مني... محد.... ان كانت اهي بتاخذك.. فبذبحها.. ابذبحها قبل لا تحرمني منك...

وطلعت من الغرفة وهي تمشي وتتخبط في مشيها ومتوجهة لغرفة سمــاء الي كان بابها مغلق .. وفجته بقوة كبيـرة لدرجة ان سماء اللي كانت واقفة تناثرت الثياب من يدها على الأرض.. وانقضت عليها سلوى مثل الوحش الضاري ماسكة رقبة سماء..

سلوى: انتي السبب.. انتي السبب في تشتت بيتي.. موتي وريحيني منج.. موتي..
سمــاء وهي تتضرع بصوتها المخنوق من يدين سلوى: ... مش... عل..

دخل مشعل الغرفة وشاف امه على هذيج الحالة وهي متحكمة في سماء اللي استغرب من عدم تحركها من شي... وفج امه بسهولة عن سماء وهو يضمها ويكبح جماحها المينون..

مشـعل وهو يحس بان قلبه متقطع: يمة كافي... كافي عليــج
سلوى وهي بين يدين ولدها: كله منج.. كله منج يا قطـعة الشر.. ما دخلتي حياتي الا وانتي معفستـها.. يعلني افقدج وافقد حسج من حيـاتي.. ياليتج تموتـين.. ياليـتج تموتيــن..

سماء ما تحملت الكلام اكثر.. ليش تتم في هالمكان وهي عارفة ان لها مأوى وان لها ملجـأ يسوى عن هالمكان الف مرة.. لو ما اخوها جان اهي ما تحملت ولا دقيقة قعده وياهم.. فطلعت من الغرفة وهي تسابق دمعها في الهمول.. وطلعت من البيت متوجهة بيت ام جراح اللي كانو ينتظرونها ترجع عشان يبدون غدى. وهي كانت رادة البيت من البداية عشان تعزم مشـعل مثل ما خبرتها ام جراح.

دخلت البيت ودموعها تخر وجسمها منهلك ومنهارة اعصابها واول من تلقفها كانت مناير..

مناير بخوف: علامج سموي.. ابطيتي.. (لاحظت ويهها المفجوع) سما شفيج... يمة لحقي على سمـاء..
طلعت ام جراح ويا فاتن من المطبخ وراحوا لعند سماء اللي كانت على وشك انها تنهار على الأرض وهي تردد: مالي اهل بهالدنيا.. ياليتني اموت...
قعدت ام جراح عند البنت المسكينة وهي تهدي فيها: يمة سما علامج.. علامج يمة توج طالعة من هني وانتي تضحكين..
سماء وهي حاطة راسها على ركبتها: محد يبيني خالتي.. ابيهم وما يبوني.. ابيهم وما يبوني خالتي... ابي مشعل.. هاتو اخوي .. وينه اخوي..

الا وعند الباب الجرس يضرب وام جراح اللي كانت ويا سما ما قدرت تطلع.. فطلت مناير على الباب.. ولقته مشـعل ومظهره يثير الشفقة في قلب الواحد..

راحت مناير عنده ووقفت بعيد شوي: مشعل علامها سما.
مشـعل وهو يلهث من التعب: ما فيها شي.. بس الله يخليج مناير تحملو فيها لمن ارد..بروح افتح الشاليه وارد لكم.. وباخذها من هني.. لا تخلينها تروح البيت.. خليها قاعدة عندكم..
مناير: انشاء الله.. بس تحمل في روحك..

ناظرها مشعل وكان يشوفها للمرة الاولى.. كاهي تحققت امنيته انه يشوفها.. لكن من بعد شنو؟؟ من بعد ما انهكه احساسه بالموت.. خلاص.. يحس ان ما بقى بالعمر قد اللي مضى وان اكو شي بصير لا محالة.. شي لازم يصير عشان يجمع سماء بالعايلة.. وهو لازم يقبل باي شي عشان سماء.. لانها بنت.. والبنت من تطيح ما تقوم مرة ثانية..

راح مشـعل بدخلة مناير البيت اللي تلقفتها سمــاء بلهفة: مشعل اللي عند الباب
مناير وهي تقعد عندها: ايه.. يقول لج تمي هني لمن يرد من بيت الشاليه وياخذج..
سماء وهي مرتعبة مكانها: راح عني وخلاني.. لا... مشــعل

طلعت سماء من البيت وهي تترنح ورى اخوها.. ولكن ماقدرت تلحق الا على غبرة سيارته .. تمت واقفة في نص الشارع وهي ملوعة وتبي اخوها... ما تبي تفارجه.. لاول مرة من عهدت اخوها تحس بمرارة فراقه.. وكان روحة مشعل مالها رجعة...

دخلت سماء بيت ام جراح وهي تبجي وتندب اخوها وكانه مات ...

ام جراح وهي تلمها: يمة حرام عليج اللي تسوينه في عمرج .. اخوج ما صار فيه شي.. راح يرتب لج البيت الي بتسكنين فيه..
سماء وهي غرقانة في حظن ام جراح: ييبو اخوي.. ابي اخوي.. أبييه خالتي.. ييبو اخوي...
ام جراح وهي تكلم فاتن: يمة روحي فتحي دارج خليني اخذها هناك ترتاح
فاتن وهي تقوم وقلبها منصاب: ان شاء الله يمة..

راحت فاتن وفجت الباب وتبعتها ام جراح اللي قومت سماء وخذتها الدار.. قعدت كل من مناير وام جراح معاها وفاتن ظلت واقفة على باب الغرفة وتراقب سماء اللي مو راضية تكفي بجي.. ولكن في قلب فاتن اللي في يوم حمل حب مشـعل بعناية شبه الخوف عليه..

فاتن بصوت منخفض: الله يحفظك يا مشعل. .وين ما حطت خطاك..

-----------------------------------------

تم الليل متوتر.. على كل عائلات قصتنا.. في بيت مسـاعد كان كل من لؤي ومسـاعد ومريم وامها متكهرب الجو عندهم.. مسـاعد كان صمته غريب وأثير.. وكانه متظايق بس هالمرة لظيق يحسه فيه فاتن.. ولكن آثر السكوت على الكلام والسكون على الحركة..
اما لؤي فالتوتر اللي مكتسحه مخليه يحس بالشلل والغثيان ومانعه من الكلام او راحة البال.. ومريم ويا امها ما يتبادلون الكلام.. وام مساعد حتى ما ترمي مريم بأي نظرة.. لكن مريم ما اهتمت لهالشي.. دامنها ما سوت شي غلط.. فهي بعيد عن الشك او القلق.. لكنها لاحظت حاجبين مساعد المعقودين .. وتنهداته اللي كل شوي تصدر منه..


الا بصوت لؤي يطـلع بهدوء..: مساعد.؟؟
مساعد بهمهمة من غير ما يلتفت له: هممم
لؤي وهو يناظر مريم اللي انتبهت له:... ما تظن ان طال الوقت وما وصلنا رد منهم..
التفت له مسـاعد: يوصلنا رد من من؟
لؤي وهو مستغرب: من الدكان؟؟ من بيت بو زياد بعد.. عيل من بيت من؟؟
مسـاعد وهو مستغرب: وليش هم اللي يتصلون فينا؟؟ اهم اللي خاطبينك والا انت اللي خاطب بنتهم
انصعق لؤي: يعني انا اللي لازم اتصل؟؟؟
مسـاعد وهو يحس بالقهر من غباء لؤي.. : اكيد يعني ليش انت ما تدري؟؟؟
لؤي وهو يضرب على جبينه: وانا صابر ثلاثة ايام على شنو يا حظي؟؟؟ يا حظي يالعثر... انزين يصير انا اتصل فيهم؟
مسـاعد وهو متظايق وماله خلق لاي شي: سو اللي تبي تسويه يا لؤي.. (وقام مسـاعد من مكان) بطلع شوي اشم هوا.
ام مساعد: وين تطلع بهالحر يا ولدي؟؟ الرطوبة تكسر العظام..
مسـاعد: ادري بس محتاج للهوا.. كتمة البيت موقفة قلبي... خليني بطلـع..


ومن غير ما يسمع كلام احد.. سحب مساعد عكازه او رفيج دربه الحالي والدائم.. وطلع من البيت وهو يرفع شعره عن جبينه.. الظاهر انه بقصه خلاص. الحر ما يسوى..


اما لؤي مسك مسـكة على امه يا تتصل يا ما يصير خير الليله ..: يالله يمة .. اتصلي..
ام مساعد: يمة وين اتصل فيهم بهالليل.. خلها لباجر
لؤي: لباجر؟ ناوية علي اموت ... انا من رحت لهم اي قبل ثلاثة ايام وانا نفسي ذايبة.. يلله اتصلي فيهم وعرفي شرايـهم..
ام مسـاعد: يمة والله عيب ناس يبون يرتاحون احنا نسألهم عن بنتهم..
لؤي: يمة وللي يسلمج اللي عافيج يالغالية.. اتصلي فيهم .. عاد يمة والله اترجااااااااج لا تذليني زود..


بعد هالترجي الي يشيب القلب حملت ام مساعد التلفون.. يمكن لانها اهي تحمل اللي يحمله ولدها من توتر.. ودقت الرقم واتصلت.. ومريم لاصقة في لؤي وهي تنتظر وياه احد يشيل التلفون..


كانت الخدامة اللي شالته: yes who's speaking?
ام مسـاعد: يه هذي من اللي تسولف بالعنقريزي.. شوفها يمة حاجها..
لؤي: شوي الا تطلع امها مافيني..
ام مساعد: وامها ليش تهذر بالانجليزي.. يمة خذ وحاجها..
سحب لؤي السماعة وقطه على مريم اللي انصدمت: شنوو؟
لؤي: كلميها..
مريم اللي مسكت السماعة وهي منصدمة ما عرفت الا انها ترد:.. هلووو any body on the line?
الخادمة: yes who's speaking??
مريم: is om zeyad home?
الخادمة: yes one minute


تم الهدء فترة وهي تنتظر احد يرد.. الا والصوت اييها برخيم الحنجرة..

ام زياد: ألو؟؟؟
رمت مريم السماعة على لؤي اللي رماها على امه وكأنها جمرة وتكلمت ام مساعد بعد ما رمت الاثنين بنظرة حارقة: الو.. السلام عليكم
ام زياد الي عرفت الصوت: وعليكم السلام يا هلا والله..
ام مسـاعد: يا هلا فيج يالغالـية علومج خويتي.. عساج طيبة
ام زياد :: بسماع صوتكم والله.. شخبارج شخبار العيال وبو العيال
ام مساعد: نحمد الله على نعمه الوافرة...
ام زياد: حيا الله ام مساعد.. والله استغربت تأخركم علينا.. قلنا مادري يمكن غيرو رايهم.. ههههههههه
ام مساعد: لا وين.. حد يلاقي القمر ويرفضه.. قلنا نعطي البنت وقت تفكر.. بعد هذا قرار الحياة كلها
ام زياد: بارك الله فيج خير ما قلتي يالشيخة.. عالعموم... احنا ننتظركم وننتظر زيارتكم وتشريفكم لنا..
ام مساعد وهي مبتسمة وتناظر لؤي اللي يقرم اظافره: بشرينا يام زياد..
ام زياد وهي تبتسم:... الله يجعله نسب الخير والعافية يا خويتي.. ويهني العيال في بعض.. مبروك عليج يا خويتي..
ام مساعد عرفت ان هذي هي الموافقة: الله يبارج في عمرج ان شاء الله.. انا اخبر مسـاعد بالموعد وان شاء الله نكون عندكم في الجريب..
ام زياد: ان شاء الله على خير وسلامة
ام مساعد: مبروك عليج يام زياد..
ام زياد : الله يبارج في حياتج
ام مساعد: بخليج الحين.. وتصبحون على خير..
ام زياد: وانتو من اهل الخيـر والعافية..


سكرت ام مساعد عن التلفون ولؤي كان متحقرص مكانه يبي يفرح بس يخاف منالفرحة لان اكيد قلبه ببيوقف..


لؤي وهو ماسك امه من الطرفين: شقالو لج .. شقالو لج؟؟؟
ام مساعد: وي شوي علي عاد انا مافيني حيل تهزني جذي..
لؤي وهو يخف على امه: يمة واللي يسلم والدييييييييييييييينج الا تخبريني.. شقالولج..
ام مساعد وهي تبتسم بغرور: اصلا شبيقولولي غير نسب الخير والعافية... هههههههههههههههههه
لؤي: يعني وافقت؟؟؟
ام مساعد: لا والله بعدها تفكر..اكيد وافقت مالت عليك من صبي..


وقف لؤي مكانه ومريم تصفق مكانها وهي تشجعه.. تم واقف وهو مسكر عيونه بقوووووة وكانه مو مصدق.. وفجأة راح التوتر ويه مكانه حلاااوة المستقبل اللي يشوفه جدام عيـنه.. غزلان فيه والحب والحنان كله فيه. وما قدر الا انه يصرخ ويقول..

لؤي: واخيـــــــــــــــــــــ ـــــــــــــــــــــــــ ــــــــــــــــــرا

---------------------------------------------

تم يمـشي وهو عارف خطاه وين بتحمله.. لكن ما حب انه يتكلم او انه يفصح لنفسـه.. وترك لنفسه العنان انها تقوده لوين ما يبي... لمن وصـل الى تقاطـع بيت فاتن.. ولقى الراحة تسري في صدره بخطى انيقة وهادية ومتسللة.. وتم واقف مكانه وهو مسـتعد انه يرجع من محل ما يا.. لكن شي فيه سحبه لجدام.. وظل يمـشي لمن وصـل الى جريب البيت ولقى انوار البيت كلها والعة لكن شي من الهجران في البيت.. وصل لعند الباب والتفت الى بيت النهيدي المجابلهم وحس بشي ثاني قاعد يصير.. التفت لبيت بو جراح لقى الباب مفتوح للباب الرئيسي.. فكر يدخل او مايدخل وفجأة سمع النحيب القاتل يطلع من البيت.. ودق قلبه بعنـف.. وبهـدوء دخل البيـت وهو يسحب نفسه على درجات الممر.. لمن دخل البيت وهو متوجس من اللي يصـير.. لكن ما طاعت نفسـه يدخل اكثر..يمكن احد مو متغطي ولا شي.. فصوت بصوته


مساعد: يالله..


وتم ساكت فترة وهو ينتظر احد يرد عليـه.. وكان عاطي ظهره لمدخل البيت من داخل وهو مجابل الدرب اللي يا منه.. والتفت يوم حس ان احد موجود... فلقاها فاتن وهي مصدومة من شوفته في المكان.. لكن صدمتها ما كانت اللي تهم مسـاعد.. كان ثوب العزا اللي لابسته اهو اللي شعب قلبه عليها.. فتم يناظرها وانفاسه تتلاحق بحرارة..

مسـاعد: شصاير؟؟؟

ما تكلمت فاتن وهي تناظر مسـاعد وكأن دعواتها قبلها الله وكاهو مساعد هني عشان يغمرها بعطفه وعزاااه في هاللحظة الكريهة..

تقرب منها مساعد وهو متوتر: فاتن تكلمي لا توتريني.. شصاير..

تلاحقت انفاس فاتن بسرعة ورى بعضها.. وشهقاتها بانت بقوة.. فما كان فيها الا انها ترمي بروحها في حظن مسـاعد وهي مو عابئة بشي من الماضي او اللي صار بيناتهم.. اهي ماقدرت تشوف بهاللحظة الا زوجها وحاميها والحظن الدافي اللي يضم احزانها..

حال مسـاعد كان ما ينوصف.. منه حزن فاتن الشديد وكونها في حظنه وهي ترتعش من الصياح.. حاول انه يتمسك بغروره ويفجها عنه لكن حس بان الغرور ماله مكان بهاللحظة.. لان الله الوحيد العالم باللي قاعد يصير الحين.. فاسترخت يده على راسها وهي يهديها..

مسـاعد: اوش فاتن.. سكتي.. سكتي وخبريني شفيج.. شصاير؟؟
فاتن بانفاس متقطعة في حظن مسـاعد: مشــعل... مشــعل مات... ماااات مسـاعد مات..
ما سمع مساعد الا كلمه مات..: من مات؟؟؟؟
فاتن وهي ترفع راسـها بعيونها المعذبة في ويهه: مات مشعل.. مشعل خو سماء.. مات اليوم... مات مات يا مسـاعد.. اخو ولقيته.. ومات.. ماااات .. مات مثل ما مت يا يبا... اااه عليك يا يبا... اااه عليك..

ورمت فاتن براسها على صدر مسـاعد وهو منصدم من اللي قالته... وعلى طول تذكر مشـعل.. مشعل الصبي اللي لقاه واقف ويا فاتن بذيج الليلة.. ومـشعل اللي تناجر وياه على اخته بهذيج الليلة ودافع عن خالد ضده.. وهدده وما كانت علاقتهم مصقولة مثل ما كان يمكن تكون.. لكن كل هذا في طرف وموت شعلة الشباب في طرف ثاني.. فما كان فيه الا انه يغمر فاتن بقوته كلها ويلمها وهي واقفة معاه عند مدخـل الباب...

مشـعل يموت؟؟ يصير هالشي؟؟ ومتى مات؟؟ وكيف مات؟؟ وشلون مات؟؟

يموت الاخو .. ويموت الحامي والمدافع.. ويموت الحب القديم؟؟ واخيرا تساوت فاتن مع مساعد.. كلن يبكي حب ميت..

اللي يحبونهم ماتو.. لكن اهم يحبون بعض. هل راح يكون هذا حدث سعيد لهم؟؟ انهم يعرفون بحياتهم ويقدرونها ويتمسكون بها لاخر رمق؟؟؟

وجراح وومريم .. من بعد توفيج لؤي.. شراح يصير فيهم؟؟ هل راح تتكون الاحلام وتتحقق؟؟ هل راح يمتلك كل واحد منهم الثاني؟؟

وسماء.. على موت اخوها.. هل راح تعرف نظرة الحب من امه؟؟؟

تابعو الجزء الأخير....

والفصل الاخير.. من قصتي.. التي حملتها بقلبي.. نظرة حب..
.
.
.
الجزء [48] من قصة نظرة حب
الفصل الثالث والأخير
---------------------
كان العزا من اشد العزاءات حزنا.. ما جفت عين وحدة عن الدمـع.. كل نسوان الفريج تلايموا في الصـالة اللي حجزها جراح واللي تكفلووا بالعزا من صوبهم.. لان بيت النهيدي محد يعرف عنهم شي.. وخصوصا امه اللي طلعت من المستشفى ولا احد يدري وين راحت.. وقامت بالواجب ام جراح وام زياد وام مسـاعد..

ظلت جثة مشـعل يوم كامل في المستشفى من بعدها بالليل- ككل ليل اهو ظل يسهر فيه يشكي لنجوم الليل باللي في قلبه- اندفن في بقعة ارض.. ومن اللي تناقلوا الصبيان.. ان ما عمرهم لقوا دفن سهل مثل هالدفن..وكان مثواه الاخير كان ينتظره فلاقاه بالمحبة والراحة واليسر.. واخيـرا يا مشـعل لقيت الوطن اللي بيضمك ولا بتفارقه ولا بتحس انك غريب عليه او انك منبوذ..


سمـاء وعت بعد يوم من دفن اخوها من صدمتها العميـقة.. بدت بعزا نحيــب اهلكت كل اللي حواليها وخصوصا ام جراح.. لكن بعد ما واساها الجميـع وخبروها بالعذاب اللي يمكن تحمله لاخوها ببجيها.. كفاها الدمع اللطيف اللي يعبر عن عاطفتها وفقدانها.. وترجع لرب العالمين في قظاااه.. وفاتن اللي اعتنت بها اشد عناية تحملت كل اللي يصير في سماء وكانه حلو وبادر على قلبها.. لان مناير كانت غير متواجدة لحزنها المنفرد وحالتها النفسية الصعبـة واللي احتفظت بها بهدوء وانعزال وصمـت..


عزا الرياييل تحمله كل من مسـاعد وجراح وبوزياد اللي كان عليهم الاثـر العميـق من الصدمة.. لان مشـعل كان في شعلة بشبابه الجميل.. الكل تذكر ويهه الحزين والجميل وحياته اللي شقى فيها.. حتى ان ام زياد بوسط بجيـها تحمدت الله على راحته.. لانه ما لاقى في حياته اللي يخليه يفرح او يتهنى او يرتاح.. كان قاعدة تحقيق احلام كل من ابوه وامه متجاهلين احلامه او رغباته الخاصـة..


كل من الشباب عاش الوضع بصعوبة.. واكثرهم جراح.. اللي كل ما يذكر مشـعل ويذكر اللي صار ينهار ويبجي.. وخالد هو اللي يواسيه او مسـاعد.. يذكرونه ان الموت وواجب على انسان والواحد ما يبجي الميـت الواحد لازم يفهم من موت احد ان الموووت ماله اي تاريخ ا موعد.. والانسان اذا ما تجدم بعمل الخير بيروح لربه من غير اعمال او انجاز او اجد .. وتيمعوا شبيبة الحارة كلهم وهم يعزوون بعض بوفاة واحد كانو ينتظرونه مثل نجم سهيل بربيع الليل.. لسبب او ثاني.. كان مشعل يمثل الحلم الجميل اللي تمنوه في حياتهم لكن فقرهم منعهم.. لكنهم ما درو انهم كانو يمثـلون لمشـعل الحلم اللي بيخليه يعيش هاني القلب..


بو مشـعل ما بان الا بعد يوم كامل من العزا.. وطلب شوفة بنته سماء.. الا انها رفضت هالشي بحجة انها ما عندها اهل.. وكانت حالته تبجي العيون وهو منكسر ظهره لخـسارة ولده الشاب..


شباب يا عيوني يا مشـعل.. ما لقت عينك من حلو الدنيا الا بسيطها.. ومرارها حملك يا وليدي وسط ترب .. الله يعين قلوب ذاكرينك يا نظر عيني.. ويقوي قلوبنا على فرقاك..


كانت هذي هي الجملة اللي مرت في قلب ام جراح اللي ما تعرف الصبي زين.. الا انها تذكر حماس جراح يوم كانو صغار وقت لا ذكر مشـعل وشلون بيكون الوضع اذا رد من اميـركا..


اما فاتن فهـي في حالة من الصمت كحالها في هالامور.. تهتم بالصغيرة والكبيرة.. تشيل الكل.. يمكن هالمرة اخف من وفاة ابوها.. لان مسـاعد شالها في اللحظة الصعبة وقت ما تمنت احد يكون موجود عشـانها .. ومو اي احد.. حبيب عمرها اللي ما تتمنى غيـره..


ظلت تذكر مشـعل بابتسامة تحرق قلبها وتخليها تذرف دمعة ساخنة فتيي لها مريـم وتسكنها..


غريبة حال الدنيا اللي ترد الناس لمحبتها في الموت.. حد لاحظ منكم.. ان الموت على كونه مفرق الا انه يجمع بالناس..؟؟؟ يفرق احباب عن احبابها ولكن يجلب العزا من الشرق والغرب ويرجع الدم لعلاقاته... سبحان الله. ماكو شي وجده الله في الكون الا وله سبب ومنفعة.. رحمك الله يا مشـعل..


في اليوم الثالث للعزا والاخير كان من المقرر ان يكون هناك عشى للمعزين بالليل.. لكن محد ياب للحريم اي خبر او طاري عن هالموضوع.. ومريم كانت حاذفة تلفونها في جنب اللي كان كل من لؤي ومسـاعد يخبرونها ان الغدى بيوصل لهم على الساعة 12 لكن من يرد؟؟؟


وكانت فاتن في مطبـخ القاعة اللي حجزوها وهي تضبط الجاي للحريم.. يوم شافت تلفون مريم يـرن.. فحاولت انها تضربه على السايلنت ويرن بروحه لكنها بالغلط ضغطت عليه مرتين فتسكر الخط في ويه المتصـل.. وكان بالصدفة لؤي ..


ولؤي وهو واقف يم مسـاعد عند باب ديوانية الرياييل: علامها هالغبية تسكره في ويهي..
مسـاعد وهو ياخذ تلفون لؤي: خلني انا بتصل فيـها..


ويرن التلفون مرة ثانيـة وفاتن توها بتطلع من المطبـخ وهي تشوف ان المتصل لؤي. وقبل شي شافت حوالي 5 مسد كولز بس من عنده اهو.. الظاهر ان السالفة خطيـرة.. بس اهي ما تقدر توصل لمريم لانها ما تدري اهي ويـن.. فجاوبت اهي على الخـط..


فاتن بصوتها المجهد . ان كان شي يفضح فاتن في الحزن اهو صوتها.: ألوو
مسـاعد اللي ما ميز الصوت: الو.. مريم وينج انتي ما تردين على التلفون
عرفته على طول فاتن لان قلبها رجف يوم تسمع الصوت:.... انا مو مريم... انا فاتن...
سكت مسـاعد وهو يناظر التلفـون وحس بهذاك الاحساس يوم ضمها اول ما خبـرته عن مشـعل.. الرفض والرغبة.. لكن شي فيه خلاه ينعم باحساس الراحة:.. فاتن شلونج؟؟؟
فاتن وهي تكابد ابتسامة على شفاتها: الحمد لله ابخيـر.. وانتو؟
مسـاعد: الحمد لله.. وينها مريـم؟
فاتن وهي تتلفت: مادري وينها.. كانت هني من شوي.. بروح اناديها
مسـاعد وهو يوقفها: لا لا لا... ما يحتـاج.. بخبرج انتي...
فاتن: شصاير؟
مسـاعد وهو يناظر لؤي اللي يبتسم بخبث في ويهه بشزر: سلامتج بس خبري الوالدة ان غدى الحريم الساعة 12 بيوصـل..
فاتن: الساعة 12؟؟
مسـاعد: أي الساعة 12 (تظايق من ابتسامة لؤي والتف عنه) لا تنسين تخبرينهم
فاتن: ان شاء الله ما بنسى..
مسـاعد وهو يكابد رغبته انه يظل يتكلم وياها: يالله.. مع السلامة
فاتن وهي تحس بالحزن لرحيـله: الله يسـلمك..


سكر مسـاعد عن فاتن وهو يناظر التلفون بشوق.. اكبر غبي اهو انا اللي اسكر عنها الخط وانا مشتاق لها بالحيـل.. وعطى لؤي تلفونه.. وقبل لا يروح ناداه لؤي..


مسـاعد وهو يرف بعيونه: لؤي الله يخليـك..
لؤي وهو يمسك يد مسـاعد: اذا انت تبيها لا تضيـعها مسـاعد..
مسـاعد وهو يلتف عنه: مو وقته هالكلام؟
لؤي وهو يوقف في ويه مسـاعد: مساعد.. يا اخوي ويا حبيب قلبي.. حط عينك بعيني... متى بيكون وقت هالأمور؟؟؟ ما تخبرني متى؟؟؟ شوف مشـعل لوين وصـل؟؟؟ مات وارتاح من هالدنيا وبلاويها.. لكن انت يا مساعد حي.. وفاتن بعد .. ليش تضيعون هالفرصة على نفسـكم.. ليش ما تتعلمون من الناس ومن اللي يصير بهالدنيا؟؟ كل هذي دروس يا مسـاعد فليش ما قاعدين تفهمونها؟؟


سكت مسـاعد وهو يناظر لؤي بحيـرة.. كل اللي قدر عليه اهي الابتسامة والابتعاد عن لؤي وعن كلامه..لان الدروس هذي ما تقدر تتخطى حواجز وحوايط الكبرياء والغرور او مرحلة التيقن ان الصفحة الاخيـرة مالها اي وجود.. النهاية المفـتوحة اهي المتوقعـة.. ولمن طاعة القلب بهالوقت الحرج؟؟ لمن؟؟


راح لؤي لداخل يشوف ان جان احد محتاجه فالتفت الى جراح اللي كان قاعد تحت خالد ويمهم بو زياد وبومشـعل وهم بحالة من الصمـت العميـق... دخل لؤي بكل احترام وشموخ وراح وقعد عن جراح على جهة اليمـين..


اللي التفت له خالد.. فهمس له: متى بييبون الغدى؟؟
لؤي: احنا ما عندنا غدى.. شي عشا بالليل؟؟
خالد وهو يمسـك بطنه:يوعان حدي..
جراح وهويناظر خالد: يوعان رد البيت؟
خالد وهو منزل عيونه: لا لا .. بتم...
جراح وهو يبعد عيونه الحزينة والمتعبة: لا رد البيت خالد.. اكل لك شي وتعال مرة ثانية..
خالد: انت ما تبي شي؟
جراح وهو حاط ذقنه على ذراعه اللي لامه ريليه: لا .. ما بي شي...
خالد وهو يستعد: نص ساعة وراد لكم..
لؤي: اوكي تحمل في روحك..


طلع خالد من المسـجد وهو متوجه للبيت.. اما جراح فظل على صمته ولؤي معاه وهو يراقب صمته وسكوته.. يمكن سكوت جراح نابع لكونه الوحيد اللي جابل جثة مشـعل بأول ما صار الحادث.. حتى ان ظروف الحادث كانت لدرجة من الغموض ان الواحد ما عبل على نفسه يسأل شلون صار او شالسالفة؟؟


لؤي: جراح.. انا ادري فيك ان قلبك شاقي بهاللحظة.. والله يعينك على فرقى مشـعل.. لكن انت ما يصير تحط كل هالاشياء في قلبك وتسـكت.. تكلم يا جراح.. قول اي شي.. ما يصير تكبت.. ترى بصير فيك شي والله ما يرضى بأذية النفس!!!
جراح وهو يذرف دمعة ساخنة من عينه بهدوء ملائكي: شقول لك يا لؤي.. خلاص.. انا ما عاد فيني كلام.. انا مو واحد ولا اثنين اللي تحملت اللي يصير فيهم.. انا تحملت ثلاثة.. والحمد لله ان مسـاعد قام بسلامة.. لكن اللي صار فيهم الضررر ناس عزاااز على قلبي .. اولهم ابوي.. وبعدين مسـاعد.. والحين مشـعل... (يناظر لؤي بنظرة حزينة) تذكر شنو كان مشـعل يا لؤي..؟؟
حط لؤي يده على جتف جراح ويواسيه: قول انا لله وانا اليه راجعون... كان يومه يا جراح ولا انت ولا انا كنا نقدر نسوي اي شي.. تصبر وصبر قلبك.. تراه قضاء الله.. بس اللي انا مو فاهمة.. انت شلون كنت هناك في موقع الحادث؟؟؟ ورحت وياه بالاسعاف للمسـتشفى.؟؟

قعد جراح يتذكر.. ويذكر كل اللي صار معاه للؤي.. بروح محروقة وقلب ملتهب.. قبل ثلاثة ايام.. وبالضبط على المغرب انتبهت دورية شرطة تمر على الشوارع الى سيـارة مقلوبة عن ثكنه رمـل.. جريبة من منطقة الشاليهات ولان المنطقة شبه الخالية فمحد انتبه لها.. وخبرت الدوريات وعممت على طول المحطات هالشي.. وبعدين طلعت مروحية تكشف عن الموقع وبالصدفة كان جراح توه راد البيت ودرى بللي صار بالضبط وخبرته فاتن ان مشـعل يا عند البيت وخبرهم انه بروح يضبط الامور في الشاليـه ولحد ما ينتهي يتحملون في سمـاء.. لكن شي في نبرة فاتن من بعد ما راحت عنهم امهم حذر او خوف خلى من جراح يتحرك صوب هناك.. مع انه ما يدل لكن اللي يسـأل ما يضيـع.. وسأل سمـاء عن بيت الشالية وهي عطته المواصفات الدرب.. مع انها الحت انها تروح وياه الا انه رفض وما خلاها.. لان قلبه كان حاس مثل ما كان قلبها اهي حاس بالخوف والوجس على أخوها..


جراح وهو يكمـل السرد للؤي:... سفطت عند الشارع.. كان هناك فوظى.. مطافي وهيلكوبتر.. وزحمة وصفارات الاسعاف داوية المكان.. توجس قلبي.. وطلعت من هناك.. وسألت احد عن اللي صاير.. قال لي ان سيارة كاديلاك منقلبة.. (ساحت دمعة جراح وتهجد صوته) عاينو اللي فيها وطـلع صبي متوفـى..


سكت جراح وهو يبكـي بحر قلبه. ما يدري ليش يبجي جذي.. معروف ان قلب الريال يجلده الله بالصبـر.. لكن في موت مشـعل اللي لقاه جراح في موت نفسه.. يمكن الشباب؟؟ ويمكن الاحلام؟؟ او يمكن شي اهو اكتشـفه عن مشـعل وخلاه يعرف بمدى ظلـمه..


لؤي وهو يمسـح على جتف جراح: بسك يا جراح.. ترحم على الريال.. ترحم ولا تبكـي.. قول انا لله وانا اليه راجعون.. ارتاح يا جراح من هالدنيا ومن بلاويها..
جراح وهو يكمل وحالته مزدرية من الحزن الملوع:.. قعدت خمس دقايق وانا اطالع في ويهه بالمستشفى.. لاني تعرفت على السيارة فخذوني عشان اتعرف على الجثة.. خمس دقايق وانا اطالع ويهه يا لؤي... كان يبين عليه الألم.. كان يبين عليه انه في عنا.. وما له احد.. ماله احد في ذيج اللحظـة..


سكت لؤي عن جراح اللي كان في حالة مزدرية.. ما يدري ليش .. ولكن باول يوم عزا ما كانت حالته جذي.. ولكن من امس لليوم واهو معتفس.. يمكن صحى من الصدمة.. او يمكن وعى على شي دايما الانسان يلاقيه في نفسه.. الصحوى.. او يمكن الاعتراف بحق النفس على النفس... او يمكن اكتشف شي خلاه يحس بالضعف النفسي وينسى الجلد والصبر؟؟


جراح وهو يسحب نفس ويطلعه بتنهيدة:... وكل هذا في صـوب.. واللي عرفته عنه في صوب ثاني... في صوب ثاني يا لؤي... مشـعل مو بس مظلوم.. مشعل ذنبه في رقابنا كلنا.. كلنا يا لؤي.
لؤي وهو مستغرب: شلي عرفته يا جراح؟؟؟ شكان فيه مشـعل..
جراح وهو يناظر لؤي بحسـرة:.. مشـعل كان...


ويققطعه مسـاعد اللي يا عندهم وهو يعـرج وبشكل متوتر يتقرب من بو مشـعل فسكت جراح وتم يراقب الوضع..


بو مشـعل كان ساكن فترة ويوم خبـره مساعد باللي كان ياي له قام على طوله وطلع من المسيد بسـرعه ووراه بو زياد ومسـاعد.. جراح مسح دموعه وقام ويا لؤي على طـوله.. واللي بقو في المسيد بعد وياهم.. محد كان داري بشي من اللي يصيـر.. ولكن وحده مساعد يعرف..


مشى بو مشـعل بسرعة في الشارع لان المسيد كان قريب من البيت.. وكان مشيه يبين حاله من الطوارئ.. خانت حيله ريال توه متوفي ولده الشباب ويمشي بسرعة يكابد مصيبة ثانية صايرة في بيـته..


اول ما دخل البيت لقى الخادمة وهي واقفة برعب تحت بالصالة


بو مشـعل: وينها ماما
الخادمة وهي تبجي: She is in meshal's room
بو مشـعل وهو يهـز راسه:.. لا حول ولا قوة الا بالله..


وكان الصراخ عالي والكل يسـمعه .. ويوم راح فوق لقى سلوى تكسر في اغراض غرفة مشـعل وكانها في حالة جنونية.. وقف دقايق وهو يراقب حالها المينون وشكلها المخيف وكانها كانت ضايعة في ظلمات ظلمها .. ورجعت اخيرا للدنيا عشان تلاقي خبر وفاة نور عيونها مشـعل..


سلوى اللي التفتت الى زوجها:.. كله منك يا حسييييييييييييييين. كله منك.. ضيعت ولدي ياحسين.. ضيعتني وخليتني اضيع ولدي.. وين القى ولدي يا ناس وين القاه؟؟ قبره ما دله يا حسين. مادل قبر ولدي يا حسييييييين.. وين ولدي.. يمة يمة وليــدي .. وليدي يمة..


راح لها بو مشعل ولمها ودمعة عينه ساكـبة ويهديها..


بو مشعل: بسج يا سلوى.. استغفري ربج.. ولدج ارتاح من هم الدنيا وعناها..
سلوى وهي تتنافض في حظن زوجها: مابي.. مااااااااااااابي راحة وماااااابي دنيا بلياك يا مشـعل.. يمة مشـعل. .رد لامك يا مشـعل.. رد لي يا يمة رد لي.. ياربي لا تعاقبني في ولدي.. لا تعاقبني في ولدي يا ربي.. ربي استغفرك .. ربي استغفرك وخذ روحي ورد ولدي للدنيا..


والتفتت الى صورة مشـعل الي كانت على الطاولة.. والمفجع في الصورة انها كانت كبيرة وترسم ابتسامته الناصعة الجميلة.


طاحت على الأرض سلـوى وكبر السن بان عليـها بهول مصيبة ولدها:.. يمـة ما بغيت هالدنيا الا لك... الا لك يا يمة... يمة ليش تروح عني؟؟ ما بغيت هالدنيا يا يمة الا لك.. لك يا وليـدي.. تروح وانت بعز شبابـك.. ااااااه.. من لي من بعدك.. من لي من بعدك يا الحنووون.. حنيت علي بزماااني القاسي... اااااااااه يا ولدي... اااااااااااااااه عليك.. راح ولدي يا حسين.. يا حسين ولدنا راح.. رااااااااااااااح رااااااااااااااااااح..


جالت حسرات ام وابو على ولد يمكن ما عرفو منه الا كل الطيبة.. وما لقو منه الا كل البر وكل الايمان وكل العفة والطيبة والطهارة في قلب شاب امنياته ما تعدت رضا الوالدين.. وانه يلقى حبيبه حلم فيها من نعومة اظافره.. عشان يصحى من هالحلم بعايلة متقطعة.. وحبيبة يقدر عليها الرب انها تكون من نصيب ريال ثاني.. ويعيش اكثر فترة فوظوية بحياته ويلاقي مصيـره في حادث سيارة وينهي حياته..


جراح اللي كان واقف ويا مسـاعدعند باب بيت بو مشـعل: شصاير مسـاعد؟
مسـاعد : مريم في بيـتكم وخبرتني انها شافت ام مشـعل تدخل البيت وهي بحالة مو طبيعية وقلت لبو مشـعل وهو ياها.. لانه كان يدورها وين طول هالفـترة..
لؤي وهو متظايق: الله يعينهم... فقد ولد بهالعمر؟؟ ولا ولد مثل مشـعل؟؟ عزيز وغالي... الله يعينهم
مسـاعد وهو يناظر لؤي وجراح بنظرة غريبة.. يعني الصبي كان صغير.. لكن شالساحر في مشـعل الي يخليهم يحسون جذي:.. الله يعين الجميـع على فرقا الاحباب... زين انا رايح البيت والعصـر برجع المسيد..
لؤي: يالله انا ويـاك..
مـساعد: لا انت خلك وخذ مريم وياك..
لؤي : شلون مريم ترد؟؟ وغدى الحريم؟؟ وامي ونورة؟؟
مسـاعد الي تظايق: اووووووه بس عاد.. نسيت.. كله تسأل.. ياهل انت تسأل هالكثر؟؟؟


وبحيـرة كل من جراح ولؤي راح عنهم مساعد وهو يمشي .. رافقته عيونهم المستغربة والمتحيرة من تصرفه وعصبيته؟؟


لؤي بهمس: اي اي صرخ علي.. ياهل انا تصرخ علي جذي؟
جراح وكأنه تفهم ليش صرخ مسـاعد .. يمكن لانه فكر باللي يفكر فيه مسـاعد:.. كلن متعذب بهالدنيا.. لا تصعب الامور على الناس يا لؤي.. خل الناس تكابر باحزانها..
لؤي وهو مسـتغرب:.. شفيك انت بعد تتكلم بالسنسكريتية؟؟
جراح وهو يناظر بيتهم المجابل بيت النهيـدي:..واحد ثاني غيري يحس بالألم والقهر ليش ان كل شي صار من وراه.. لكن مادري ليش احس انه لو صار ما كنت بتظايق بالعكس.. كنت بفرح وبيفرح الجميع وياي!!
لؤي للي ضاع: انا ضايع.. شقاعد تتكلم عنه..
جراح وهويناظر لؤي:... تصدق ان مشـعل كان يحـب فاتن!!!؟


لؤي اللي عارف بهالحقيقة تظاهر بالتفاجئ.. لكن يمكن ما تظاهر لانه بالفعل تفاجئ من معرفة جراح بهالشي


لؤي: وانت شدراك؟
جراح وهو يناظر البيت:.. سمعت فاتن تكلم سمـاء ومريم بهذيج الليلة.. وتخبرها بانها تعاني مثل ما اهي تعاني.. لانها في يوم حبت مشـعل وهو عانى بعد يوم انها تزوجت واحد ثاني.. وان الدنيا مقسومة على الانسان بافراح واحزان بالتساوي.. عشان يذكر بني ادم ربه في كل الظروف..
لؤي وهو متحير من جراح: وانت شرايك في هالموضوع؟؟؟
جراح وهو يناظر لؤي: شتتوقع؟؟؟ اني اعصب؟؟ اني اتنرفز؟؟ اني اكره الدنيا اللي حوالي.. بالعكس.. انا احس اني ظلمت ناس وايد وانا اظن ان اللي اسويه صح...
لؤي وهو يمسك جراح من يده: جراح.. حسك تتكلم جذي مرة ثانية.. وحسك تفهم احد ثاني من هلك او من الناس بهالشي اللي انت عرفته.. مشـعل مات يا جراح.. والله يرحمه.. واذا بتذكره تذكره بالخيـر.. لكن لا تعود وتذكر هالشي جدامي مرة ثانية
جراح وهو مستغرب ردة فعل لؤي: لؤي علامك؟؟ شوي شوي عاد.
لؤي وهو يتمالك نفسـه: ما علامي شي.. بس... خله يرتاح .. ولا تحس بالذنب عليه يا جراح.. هذا اخوي اللي متزوج اختـك. ويحز فيني مثل ما يحز في خاطر فاتن او مسـاعد.. ولازم نكون عيال هاليوم.. لان اللي صار بالأمس يظل في الأمس..
جراح يبتسم في ويه لؤي بحلاوة الروح: صح كلامك.. اللي بالأمس يظل بالامس.. انزين.. دامنا يم البيت..خلنا ناكل شي..
مشى جراح وكانه بيروح البيت الا ويقطع عليه الدرب لؤي: شنو شنو بيتكم.. خلني انا بوقف على الباب وبطلب لك اكل..
جراح وهو مستغرب: الحين البيت بيتي وانت اللي تطلب لي الأكل؟؟
لؤي وهو يتخصر: لا عيل اخليك تدخل البيت واختي هناك مدخنة..
جراح وهو يفج عينه ويبي يقهر لؤي:.. اللاي.. مريم داخل.. يالله عيل انت اخوها وخلنا نروووح الشيخ ونعقد..
لؤي وهو يمسك جراح: لو فيني جان انا اللي اسوي هالشي لكن ... (يتنهد بحرقة وهو يتصنع الجلد) كل تأخيرة فيها خيـــــــــرة
جراح: هههههههههههه الله يعينك على ما ياك.. تخلينا نروح ناكل الحين ولا شنو؟
لؤي وهو يمشي ويا جراح: خلنا ناكل لنا لقمة شي..والله ان اللي قاعديصير يجثي المعدة عن شي.. بس يالله ربك كريم كل الامور لازم تنحل في يوم من الأيام..


دخل جراح ويا لؤي من الديوانية المفتوحة بداعي أيـام العزا.. واول ما دخل جراح البيت من المطبـخ سمع حس بنات متيمعات هناك.. فتحنن ويات له فاتن من الباب الوراني للحديقة الي فيه ممر يؤدي الى باب المجلس..


فاتن: لبيـة جراح
جراح وهو يبتسم لها: لبى قلبج.. بس ييبوا لنا شي ناكله بطني لزق بظهري.
فاتن بابتسامة تعب: ان شاء الله ياخوي.. دقايق واييك..
جراح وهو يرد من محل ما يا ويلتفت لفاتن مرة ثانية:.. مريم ويـن؟
فاتن وهي تفج عينها بويهه: عيب عليك
جراح وهو مثل الياهل مستحي: زين عاد امزح وياج.. مب زقرت انتي
فاتن وهي تدفعه: هههههههههههه اي مو زقرت.. يالله روح..


راح جراح وفاتن تلتفت عنه الا مريم في ويهها من الباب.. فضحكت لها فاتن


مريم وهي مستغربة: شفيج تضحكيـن
فاتن وهي ماعطة مريم ظهرها: ولا شي..
وبهالحركة عرفت مريم ان فاتن فيها شي.. فراحت لها ووخلتها تلتفت لها وهي تمسك بيدها: فتون حياتي علامج؟؟؟
فاتن وهي مستندة على الطاولة بظهرها وهي تبتسم بحالمية.. وكانها ردت لزمان أول:.. مادري بس.. جن الزمن عاد فينا يا مريم.. وين ما جراح يسألني عنج وهو يبوق شوفاتج وانتي في البيت.. ووين ما لؤي قاعد في الديوانية لنص الليل.. وابوي قاعد في الصـالة .. او قاعد عند زراعته... بس الفرق.. ان مشـعل راح.. ويا مكانه مسـاعد.. (تهجد صوت فاتن لحظة وعيونها ترف بقوة) ياااااااه.. مقواها... مقواااه رحيل مشـعل من الدنيا..
مريم وهي تتقرب من فاتن بابتسامة مواساة:.. عظم الله اجرج يالغاليـة..
فاتن وهي تمسـح دمعها بخجل وكان مالها حق انها تبجي: اجرنا واجرج ...


مسكت مريم يد فاتن المرتجفة اللي على ويهها ونزلتها.. والابتسامة ما فارجت ويهها لمن انهارت فاتن على جتف مريم وهي تبـجي بقوة على الخسـارة الكبيـرة.. ومريم بعد الثانية.. بجت هالمرة ويمكن تعزوا الثنتين بعزا بعضهم..


كل وحدة منهم ذكرت ايام الضنا والسهر والتعب .. ذكرت ايام الدموع ما كانت مالحة وجريانها يخط صفحة الخد ولكن يكبر ويسقي شي بداخلهم.. صج ان الدمع ما يجدم ولا يأخر.. لكن ذكراه على القلب تبين ان الانسان ظاق من الدنيا اللي ظاقه.. الحزن ما يجيس المظلوم او المحتاج.. الحزن يجيس اللي شاقي ومبتلي بهالدنيا..والمثل يقول من حبه ربه بلاااه.. فما احلاها دموع اللي تسقي من دمع العين وتبين حب رب العالمين في الأنسان..

----------------

على الليل تيمعت عائلتي كل من الكندي والنهيـدي. او ما تبقي من النهيـدي في بيت مشـعل الله يرحمه من غير سمـاء لانها ما تبي تطلع من بيت ام جراح ومحد غصبها او اجبرها.. يمكن لانهم يعرفون ان مالها مكان بين سلوى وحسين او يمكن انها لو تواجدت بهاللحظة وياهم راح تكون العاقبـة وخيـمة..


سلوى من ياها الطبيب وعطاها المهدئـات ما طلعت من دارها وحسين الا هو بو مشـعل تم قاعد في الصالة ويا زياد وحرمته وغصون وغزلان وام زياد اللي قلبها ذايب من الحسرة على شباب مشعل المهدور ولكن بصمت وبو زياد بعد ساكت من الحزن وحسين كان في حالة من الصدمـة واللا وعي.. كان الجو ممتلئ لكن القلوب خاوية ومافيها اي نوع من انواع الكلام اللي يمكن يصلح او يسد او حتى يعيد شي من اللي انفقد.. يا ترى ليش الناس تفكر بهالاشياء من بعد ما ينفقد شي عزيز او غالي.. ليش القيمة ما تطلع الا بعد ما يموت احد.. وليش الناس ما تجتمع الا من بعد الضيـاع..؟؟؟


بو زياد يكلم حسين:.. يا بو مشـعل.. البنت ما يصير تظل في بيت ناس غربا.. صج انهم يحبونها ولامينها لهم.. لكن انت متى بتتعلم من الدنيا؟؟ على كل اللي صار فيكم.. بعد مفرطين في واحد من عيالكم..
حسين: ماقدر اردها.. سلوى بتين.. وكفاية الي سويته فيها لحد هاللحظة.. كفاية اللي ياها من الله .. ما ابي اشيج قلبها زود بوجود سمـاء..
ام زياد بصدمة: والبنت؟؟ من لها يا خوي؟
حسين وهو موطي راسه: محل ما اهي صدقيني اريح لها من هني.. على الأقل اهناك لها احد تقول له يا يمة..
ام زياد: تتم بنتك وغريبة عنهم.. علبالك لمتى الناس بتتحمل الاغراب على قلبـهم..مهما كانت طيبتهم.. الظفر ما يطلع من اللحم
حسيـن اللي قلبه منصاب على سماء ولكن يعاني بصمت عشان سلوى:.. لا يام زياد.. الظفر طلع.. سماء غلـطة.. ولازم ما نرد لها.. خليها محل مااهي.. ربج اللي بيقدره اهو المكتوب..


عم الصمت او يمكن الذهول في عيال بو زياد.. وحمدوا الله وغصوصا غزلان على نعمة الوالدين.. صج ان الواحد لمن يناظر احوال الناس يتعجب.. وينتبه الى نعم الله وافضاله عليه بللي موجود.. عمرها ما اعتازت بيت غير بيت ابوها او حظن غير حظن امها.. لكن سماء المسيجينة عبرة وعظة للناس عشان تفهم.. ان ورى المتع والملذات تقبع المسؤوليات..


في سيارة زياد كان الصمت لاف الموجودين.. من هيام وغصون وغزلان وحتى زياد نفسه. ويمكن زياد اكثـرهم لانه كان على علاقة شبه الوثيقة بمشـعل وكان يحسـ بانه مظلوم.. لكن الحين تبين احساسه وتحول الى حق ويقين .. وعيون هيام اللي عاشقته تراقب صمـته وذهوله المقارب لها.. ولكن حبت انها تخلي كل شي اذا رجعوا البيـت..


وصـلو البيت وغزلان وغصـون نزلو.. وكان فهد زوج غصون موجود في البيت وواقف عند الباب يوم حس للصـوت.. فيوم لقاه زياد في البيت حس انه لازم يقط هيـام الحين بيتها.. او يمكن يختلي وياها ويفش له بمكنون صدره.. على الله تخف ظيقة الصدر اللي فيه بوجود هيام اللي راح تواسيه..


حست هيام لصمـته وسكونه لانه بعده في السيـارة فحطت يدها الدافية على يده وصعقته فالتفت لها بجفل


هيام بهدوء: علامك؟
زيـاد وهو يناظر ويهها لسمح.. ويحس ان الدنيا بعدها بخير بجمالها:.. ولا شي.. اقطج البيت؟
هيـام وهي تبتسم: اذا ما تبي امي تطردني يعني؟؟
زياد وهو يحس بالظيق: حرمتي بعد شنو تطردج


آثرت هيام الصمـت لان زياد مو في مزاج المرادد.. وتركت له العنان انه يتحرك بسيـارته ويمشي في الطرجات.. واما هي فظلت يدها على يده وهي تمسح عليها بحنان عشان تبين له انه له احد في هالدنيا وان همه ملموس في قلبها بشغف وعناية.. لمن مال زياد وابتسم لها من غير ما يلتفت لها.. ويوم وصل للبيت.. ظلت هيـام قاعدة بالسيارة يم النافورة اللي صايرة جدام باب البيت الرئيسي من داخل الحوش..


هيـام:. أروح الحين ولا شنو؟
زيـاد وهو يلتفت لها: على راحتج.. تروحين ولا تظلين
هيـام وهي مستغربة: is that so?? اوكي عيل.. تصبح على خير


توها بتطلع الا يمسكها من ذراعها


زياد: بال عليـــج.. ما بغيتيها من الله.. هالكثر مليتي مني
هيام وهي ترجع على الكرسي ومتصنعة الزعل: بعد.. عشان تعرف ان كلمة على راحتج اتييب لي الاسهال..
زياد بابتسامة مقاربة لضحك: بال عليج اسهال مرة وحدة.. طلعي قبل لا تخيسين الدنيا..


رمت هيام نظراتها القاتلة الى زياد فلاحظت انه محتاج لهالضحك.. ولكن مسـرع ما انمسـحت ضحكته وحل مكانها الحزن والهـم.. فسكرت هيام الباب وظلت قاعدة بالسيارة وهي تراقب انهيـار زياد اللي كان في هدوء وسكون عميـق.. لمن سالت الدمعة من عينه وهو يحط يدينه على ويهه ويشد على جسـمه بقوة.. فتقربت منه هيام وهي تمسح على جتفه..


زياد وهو يبجي: كل شي يهـون.. الا ويهه .. ويهه يا هيـام ما كان مرتـاح.. شي من المعاناة فيه.. تعب وارهاااق.. وعنى وضنا...
هيـام وهي تذرف الدمع من التأثر: الله يرحمه.. ترحم له يا حبيبي.. ترحم له واحمد لله..
زياد وهو يمسح دمعه على طول ويهه: الله يرحمه.. الله يرحمه... (تنهد بحرارة).... الله يرحمك يا مشـعل.. ويغمد روحك الينة... وتلاقي هناك اللي ما لاقيته بحياتك كلها يا خوي..
هيـام بعد فترة صمـت تكلمت لزياد:.. كل هالاشياء يا زياد تصير عشان عبرة او عظة الانسان يتمسك بهـا.. ويعرف ان الدنيا ما ترحم اللي ما يرحم دنياه.. كل انسان وياكل من اللي يسويه.. خل هالشي فبالك..
التفت لها زياد وهو يحس بعمق كلماتها :.. ما شاء الله عليج... (رفع حاجب) مسوية روحج فاهمة الحين.. يالله برع..
هيـام وهي فاجة عينها::.برع؟؟؟؟ اوكي.. (عصبت على خفيف) باي..
توها بتطلع الا ويمسك يدها زياد بضحكه خفيفة:.. خلج خلج امزح وياج
هيـام وهي تسحب يدها من يده: مزحك ثقيل مثل ويهـك..
زيـاد وهو يقوي من سحبه: خلج اقووووووووووول..


-----------------------


مريم اللي بعدها في بيت ام جراح قاعدة وياهم في دار فاتن اللي سكنتها سماء من اول ما ياتهم بذاك العصـر وهي منهارة الى حتى هذي اللحظة وهي بعدها بانهيـارها.. قلب خالد ملتاع عليها بس بعد عاذرها.. وام جراح تراشيها على اللقمة اللي ما ترضى تحطها بحلجها.. وفاتن ما خلتها من حظنها او صدرها الحنون.. ومنـاير متفرغة بحالها ويا سمـاهر بدارها اللي ما طلعت منها ولا راحت حتى خلف مشـعل من شدة وطى الحزن على قلبها الصغيـر..


كانت مريم قاعدة ويا ام جراح وفاتن بدار سمـاء اللي عزيز بعد كان قاعد فيـها وهو منكس الراس ويسمع حنيييين سمـاء اللي يقطع القلب. كان واطي.. لكن بكل شهـقة تنسـمع حناااياها الفاقدة.. وام جراح مالها الا شيلتها تمسح فيها دمع ساخن على حال البنت..


تقربت منها ام جراح وهي تمسـح على ركبـتها:.. يمة سمـاء.. بسج يا روحي.. بسج .. كافي ونين .. صبيتي هالقلب يا بنتي.. سكتي خلاص .. سكتي وفوضي امرج لرب العالميـن..
سمـاء وهي ترفع راسها بابتسامة حنان:... مادري ليش.. احس انه في اي لحظة بدق الباب ويناديني... اروح وياه البيت مثل كل ليلة...
ام جراح وهي تبتسم وتكابر الدمع:.. ترحمي عليه يا بنيتي...
سمـاء وهي تحس بالموت من كلام ام جراح: اترحم على اخوي وهو بعده على الدنيـا؟؟؟
مريم انهارت من كلام سماء وفاتن غطت عيونها بويهها وتكلمت ام جراح وهي تون: .. يا يمة حرام عليج هالكلام.. رحمي قلووووبنا يا يمة.. رحمي قلوبـنا..
سمـاء وهي ترمي براسها على المخدة وتنادي باسم مشـعل:.. مشـعل.. شعـول.. مشـعلي.. حبيبي ياخوي... حبيـبي.. ارحمني يا خوي وعود لي..
طاحت فاتن على راس سمـاء وهي تبوس جبينها:.. حبيبتي سمـاء.. عمري خليج اقوى من جذي.. انتي ان جان خسـرتي اخو بهالدنيا.. احنا خسـرنا ابو.. والابو ما يتعوض..
سمـاء وهي مسكرة عيونها وهي حاسة ان حشاها يتقطع:.. ولا الأخو... ااااه على اخوي.. كنت عارفة ان محد بيردني من غربتي غيره.. ردني من غربتي وغربني بالدنيا.. غربني يا فاتن.. غربني
فاتن وهي تبتسم لها.. هالبنت اللي قلبها الله العالم شكثر بيتحمل بعد:... قولي الحمد لله يا سماء ان اخوج مات وراح لربه.. ناس غيرج يموتون بهالدنيا وما لهم احد يعزي عليهم.. قولي الحمد لله يا سمـاء.. وقومي صلي لج ركعتين يسلي الله فيهم قلبج.. قومي صلي وانا ويـاج..
مريم وهي تقعد عند سمـاء بابتسامة: وحتى أنا..
لكن سمـاء نادت باحد ثاني هاللحظة:.. وينها منووور؟؟؟ وينها مناير.. اهي الي بتعرف للي في قلبي... منووور وينها..


وطار عزيز في ذيج اللحظة الى غرفة مناير.. عشان يلبي طلب سمـاء اللي نادت لرفيجتها الحبيبة.. ويوم وصل عزيز للغرفة لقاها مسـكرة فدق الباب بقوة..


عزيز وهو يمسـح دمعه المسيجين: منووور.. منووور فجي الباب ..سماء تبيج تحت..
مناير وهي قاعدة على السرير وقلبها ملتاع والدمع سجاب على خدها: عزيز ماقدر انزل... ماقدر..
سمـاهر وهي تناظر مناير بحنية: منور حبيبيتي نزلي لهم.. سماء تبيج.. واهي محتاجتج
مناير: ماقدر .. ماقدر سماهر.. ماقدر اجابل ويهها.. ان جابلته بشوووف... (سكتت مناير وهي تعض على شفتها..) مادري ليش احس اني كبرت بعمري يا سماهر.. مادري ليش...؟؟؟؟
سماهر وهي تلم مناير:.. معذورة.. اذا حبيتيه انتي معذورة..
مناير وهي تحط راسها على جتف سماهر:.. ما حبيته يا سماهر.. ماسمي اللي حسيته له حب... ما كان حب.. الحب اهو حب فاتن لمسـاعد.. وحب جراح لمريم.. اللي حسيته لمشـعل كان بدايات شي حلوو... خسارة ما تم عشان اشوف لوين يوصل فيني الدرب
سماهر وهي تمسح على خد ارفيجتها:.. نصيب ربج يا حبيبتي.. امج تقول نترحم عليه عشان الله يرحمه في يوم الحساب
مناير وهي تشيل راسها من على جتف سماهر وهي تمسـح دمعـها اللي صبت منه الغالي وهي بصغر سنها .. طول هالايام وهي قاعدة في دارها كانت تتكلم وياسمـاهر وتناجيها وتشكي لها الحال وسماهر اعلم بهالحال.. فلذا كانت تعاونها وتهديـها..


سمـاهر: خلينا نقرى له الفاتحة..


سكتن الثنتين وهم يقرووون له الفاتـحة على روحه.. ومافارجت الدمعة عيون او اهداب مناير الجميـلة.. في قلبها حست ان مشعل لو ظل زود بهالدنيا كان بيكسبها ويكسب قلبها بحب.. لكن القلب اللي يحب مرة ما يحب مرة ثانية.. وان حب ما راح يكون حبه بنفس الجنون..


عزاي بهالدنيا يا مشـعل بفراقك.. لو اني اعرف ان اللي مر في قلبي مر في قلبك بيوم.. او لحظة.. او حتى ثانية..


مناير وهي تمسح دمعها وترتب شعـرها وتناظر سماهر:.. ننزل؟
سمـاهر توقف بابتسامة: اوكي..


طلعت مناير من فوق ويا سمـاهر.. وخبت الجلابية السودا اللي عليـها تحت قدمها.. ولكن حتى بحزنها كانت مناير آية في الجمال. .يمكن حتى انها تغلب فاتن بحلاوة ملامحها البيضا وعيونها الواسـعة.. وصلت لعند دار فاتن ووقفت على الباب.. لقت سمـاء توها بتقوم من على السرير.. فتهاتفت الدمووع على خد الثنتين يوم تلاقوا.. وسمـاء بدى عزاها مرة ثانية وهي تعرف ان مناير حملت في قلبها يوم مودة غير الناس لمشـعل.. وحتى مشعـل نفسـه.. فعادت بذاكرتها الى ليلة قبل وفاة مشـعل.. يوم كان وياها..


كانت سمـاء قاعدة في الحديقة ويا مشـعل عند النافورة اللي قعدوا يمها في يوم من الايام وهو يشكي لسماء حبه لفاتن.. ولكن الحال كان غير.. كانت سماء حاطه ريلها في الماي ويا مشـعل الي رافع بانطلونه ويلعب بالماي وياها.. ويوم سكـن لاحظت انه مهموم.. او يمكن محتار بشي..


سمـاء وهي تضربه على جتفه بدعالة:.. شقاعد تفكر فيـــــــــــه؟
مشـعل وهو مو مصدق حركتها: شوي شوي عاد يالدعلة.. جتفي طاح
سماء: هاهاهاههاهااااااااااااااا ي.. عيل لا تسرح مرة ثانية وتخليني..
مشـعل وهو يبتسم: ما سرحت بشي..
سمـاء وهي منصدمة من ابتسامة مشـعل الناعمة: ياويل قلبي.. علامك تتبسم جذي؟؟؟ مشـعل (بخوف) لا يكون
مشـعل وهو محتار: لا يكون شنو؟
سماء وهي محتارة: لا يكون حبيت فاتن مرة ثانية؟؟؟
مشـعل وهو منصدم من نفسه لانه انصدم من كلمة سماء: صلي على النبي.. شنو احبها مرة ثانية .. (سكت شوي ورد كمل) اصلا انا ما قل حبي لها فيوم عشان احبها من يديد.. لكن حبي لها الحين تغير.. صار حب اخوة.. اخو لاخته..
سماء وهي تتنهد: اشـــــــــــــوى.. وانا اللي خفت بعد.. ترد لي السايكو اللي كنت عليه قبل فترة
مشـعل وهو يرمي الماي على ويــهها: سايكو بعينج.. يازعم تعرفين تتكلمين انجليزي..
سمـاء: كيفي.. بتكلم عنقريزي قد مابا.. Go' that
مشـعل وهو ينفجر من الضحك: مالت عليج اقوووووول..


بعد شوي ملاعب وتسالي بين الاثنين سكت مشـعل مرة ثانية.. وانتبهت له هالمرة سماء من قلب وطاحت فيه طق على جتفه


مشـعل: بس بس عاد طيحتي جتفي..
سمـاء: من هي .. تكلم بسـرعة...


مشـعل ناظر عيون سماء بحيا وكانه يناظر عيون مناير بويهها.. اشياء كثيرة بسماء تذكره بمناير.. يمكن لانهم بنفس العمر تقريبا.. وفيهم من الشقاوة نفسها نفسها.. لكن شي في مناير يخليه يحتار ويبتسم خجل غصبن عليه..يمكن لانها صغيـرة؟؟؟


سماء: بتتكلم و لا شنو انت الحين؟؟
مشـعل وهو يناظر سمـاء: سموي.. تظنين الانسان يقدر يحب مرة ثانية؟
سمـاء وهي تبتسم بعمق وتجابل مشـعل: منور صح؟
انصدم مشعل واستوى بقعدته: شدراج؟؟؟
سماء وهي تضحك: ههههههههههههههههههههههههه ههههههاي ياخذ بليسك.. مو الاخت الكبيرة الصغيـرة..
مشـعل هو يشربكها: تدرين لو تخبرينها شبصير فيـج؟؟؟؟
سماء وهي تتألم من مسكة يده القوية: ههههههههه اااه ما بقول لها والله ما بقووول.. آآي بس خلاص والله ما بقوووول..
مشـعل : حلفي...
سماء وهي فاجة عيونها الزرقا الفاتحة: ااااااه.. والله العظيـم..والله العظيـم (خلاها مشـعل هالمرة وهي تمـسح على يدها من الألم) قول الله لا يبااااارج في عدوينك.. جذي تسوي فيني؟؟؟
مشـعل: عشان لا تقعدين تناحسين..
سماء وهي تتناسى ألم يدها:. بس تعال قول لي.. شلون بدى كل شي؟
مشـعل بحيا: اصلا ما بدى شي عشان تسألين
سماء: بالعربي مافهم هندي..
مشـعل: هههههه.. (سكت وهو يتنهد بسحب النفس من دااخله).. مادري.. ببس فيها شي. يخليني اضحك في عز حزني.. فيها شي من حلاة الرووح.. اللي يخليني احس .... بمادري شلون..
سمـاء:... بس اهي تعرف عنك ويافتون!!
مشـعل وهو يتذكر ايام قبل: لا تذكرينـي..
سماء:ما اابي احبطك.. ان جان بصير شي في المستقبل.. بس مناير نفسها عزيزة.. وفيها غيرة وغرور.. يمكن غير عن بيت خالتي ام جراح كلهم..
مشـعل: لاحظت هالشي... بس انا ما اتمنى شي ولااا في بالي اي شي من هالكلام..
سماء: بس اي...بقول لك.. ما انكر اني لاحظت فيها شي غريب من يوم رديت ...
مشـعل وهو يناظر سماء بشك:... جذابة؟
سمـاء بنبرة صادقة:.. صدقني.. فيها شي غريب.. منور قامت مرة وحدة.. وجمالها زايد ومزهوة.. وكان اللي مجملها اهو شي في قلبها..
مشـعل وهو يتمصخر على سماء: صج والله؟؟ قصي عليي عاد اصغر عيـالج هني؟
سمـاء: والله .. وربي شاهد على كلامي.. شفيك انت.. انا حرمة واعرف للي في قلب الحرمة.. الحب يجمل الروح ويجمل الشكـل.. لان على عنا الحب هناك راحة..
مشـعل وهو يتمصخـر على سماء اكثر: ولله؟؟ وبعد ليلى احمد؟؟؟ شعندج؟
سمأء وهي تضربه على جتفه بنفس القوة القبلية..: لا تتمصخر انا من صجي اتكلم
مشـعل وهو يرميها بالماي: جبي يالله جبي.. ويا هالراس..
سمأء: اااه.. لا تبللني..
مشـعل وهو يرميها بالماي: بيييييييييي القطوة... مياو ميااااااااااااو هاج الماااااااااااي..
سماء: لااااااااااااااا..


ورجعت سماء للواقع وهي لامة مناير بقوتها.. وتبجي على جتفها وتبث لها شوي من المشـاعر اللي في قلبها..


مناير وهي تخبي حزنها الكبير بويهه سماء بهمس ما يوصل لاحد: عظم الله اجرج يالغالية.. سامحيني.. بس انتي ادرى بالي في القلب..
سماء: ادري فيج.. لا تعلميـــني.. (رفعت سماء ويهها وجابلت مناير) ولهت عليـج لكن..
مناير: حتى انا بعد...
فاتن وهي تتقرب من الثنتين : يالله .. خلونا كلنا نتيدد ونصـلي الركعتـين.. يالله يهدى قلبنا..
مناير: ان شاء الله..


تيددن البنات وتوجهوا للقبلة وصلت كل وحدة منهم ركعتـين لله يسكن فيها قلوبهم من الحزن اللي غاشي محيـاهم.. ويم فرغن قعدوا في الصـالة وهم يحسون بالتعب القوي ينخر جسمهم.. الا انهم ما قدروا على النوم بسبب الارهاق..


ام جراح وهي تسولف للبنات: سمعوني.. انا قالت لي خالتكم قبل جم يوم شي.. وانا ما شلته من بالي.. وباللي قاعد يصير حسيت انه لازم يصير.. شرايكم لو نروح كلنا العمـرة؟
فاتن ابتسمت من قلبها على هالشي.. لان ما كو شي احلى من قرب الله لقلوبهم: ياليت والله..
مريم: للاااااااااااي.. لو نروح كلنا بعد يكون احلى..
فاتن وهي تناظر مريم ومتوجسة من كلمة كلنا.. يعني حتى مسـاعد: بس لو نروح احنا الحريم بروحنا وايد احلى.. شرايج امي
ام جراح: والله انا هاي قصدي.. انا وخالتكم عزيزة.. والبنات. ومريم بعد خبري امج اذا تبي اتيي.. ونروح كلنا
مريم: بس خالتي يبيلنا محرم.. في ذيج اللحـظة.. يعني ما يصير نروح الا وياه
ام جراح: مادري عنكم يا يمة.. خاطري تسافرون وياي.. وتتصافى القلوب على بعضها.. اللي قاعد يصير لا يرضى عنه الله ولا رسوله.. (وخت فاتن راسها ولمت ام جراح سماء لها) ومرة وحدة يهدي قلبج يا بنيتي
سماء وهي تتكلم بسذاجة: يمة انا عمري ما رحت بيت الله..
ام جراح بابتسامة: خلاص عيل.. الحين بتروحينه.. شرايج؟
سماء وهي تريح جبينها على صدر ام جراح: يا ليت يا يمة.. يا ليـت..


مريم وتلفونها يرن يمـها.. وكان برنامج صورة المتصل شغال عندها فنزلت صورة مسـاعد ومن بعدها بين رقم المتـصل.. وعيون فاتن اللي يالسة يمها على التلفون بحسـرة وهي تناظره ولكن كابرت وبعدت عيونها وردت مريم على التلفون..


مريم: هلا مـساعد..
مسـاعد: هلا فيج.. مريم خانم متى بتردين لبيت؟
مريم وهي تضحك بخفة: والله ما عندي سيـارة.. شرايك اتيي لي..


فاتن التفت الى مريم اللي نست ف لحظة ان مسـاعد معاق وما يقدر يمشي سيارة او يسيطر على مركبة..


مريم وهي تنتبه لغلطها: سوري مسـاع..
قطعها مسـاعد: ما عليج.. شرايج تمشـين؟؟ بييلج لعند باب بيتهم..
مريم هي فرحانه بخفة: اوكي.. ماكو شي احلى من ضوء القمر المنعكس من عينيك الشفافتين
مسـاعد وهو يشيل السماعة من اذنه بحيرة.. علامها مريم: مريم شاربة شي؟؟
مريم: لا والله بس يالله تعال.. شكلي تسودنت من التعب..
مسـاعد: ربع ساعة وانا عندج..


سكرت مريم عن مسـاعد وهي تتنهد.. اشوى ان مزاجه اوكي بروحه حسس بزيااااااداه هالايام.. لكن تعال.. اهو ليش وافق انه اييني .. ومشي بعد.. صارت هواية عنده المشي من البيت الى بيت فاتن؟؟؟


ام جراح تكلمها: يمة تمي للعشـا؟؟
مريم: لا ما فيني.. المارد بييني بعد ربع ساعة..
ام جراح :بيمشي؟؟ يمة مب تعب عليه.. خلي جراح يوصـلج ولا دقي على لؤي؟
مريم: بيني وبينج مسـاعد يبيله هالنشاطات.. لانه حاكر روحه في البيت.. توه الا من جم يوم راح المكتب.. الحمد لله قاعد يطلع من عزلته شوي شوي..


وخت فاتن عيونها للارض وعيون كل من مريم وام جراح وحتى سماء عليـها.. يراقبـون معاناتها.. لان مساعد قاعد يطلع من حكرته وعزلته اما اهي فحالها ما زال نفسه..


قعدت تتذكر باليوم اللي ياها .. وخبرته باللي صار لمشعل.. هداها بهدوء وحنان وطلب منها انها تتماسك لانه لازم يروح الحيـن ويسـتعلم عن الشي ويـتاكد.. وقبل لا يطلع من البيت التفت لها وهو يناظرها بشـوق وشي من الغرابة او يمكن حتى الفرحة بوقت صعيب مثل ذاك.. لكن اكيد اهو قدم لها اللي قدمه لانه حسها محتاج له.. او انه استحى يبعدها عنه.. لكن اهي شحالها من بعد ما لمته. تاججت كل شعلة حب في قلبها لزوجها.. وحست بمدى احقيته في قلبها..لكن شعن قلبه اهو؟؟؟


وهي سرحانه صحت وهي تسمـع حس مريم وهي تتكلم بالتلفـون وتسـكره..: خالتي.. معليه يدخل مسـاعد..
التفت فاتن الى مريم وهي منصدمـة وام جراح تكلمت: مادري والله يمة..
مريم: لا بس يبي يخلف على سمـاء ويمـشي..
فاتن قامت على طولها:.. عن اذنكم
مسكتها مريم: وين رايحة
فاتن وهي تحاول تتعذر: لا بس.. بروح مريم.. مشغولة شوي..
مريم وهي تعوي ثمها: مشغولة بشنو
فاتن: بروح اسبـح.. احس روحي تعبانة وابي اريح شوي..
مريم وهي تهمس لفاتن: ان ماقعدتي والله لا فشـلج اليوم!!
قعدت فاتن بعد ما دفعتها مريم وحس الجرس انسمـع.. : بروح اشـوفه..


بس تحركت مريم قامت فاتن من مكانها عشان تشرد. وام جراح تستلمها هالمرة


ام جراح: يمة فاتن روحي المطبـخ سوي عصيـر لريـلج..
التفت فاتن لامها بشكل اللي صابين على ماي بارد: لمن؟؟
ام جراح: ريلج؟؟ بعد لج ريل غير مسـاعد؟



مررت فاتن عيونها على سمـاء ومناير لقت شبه الابتسامة حقت الطماشة على ويوههم لارتباكها..وما قدرت الا انها ..


فاتن: ان شاء الله يـمة..


وراحت فاتن المطبـخ وتخبـت بزاوية في المطبـخ ومناير عدلت شيلتها عدل وانسمـع حس مساعد في البيت وهويتحنن..


مساعد: يا الله..
ام جراح: حياك الله وليـدي.. حيا الله مسـاعد.
مسـاعد وهو يدخل البيت ويظهر .. كان لابس دشداشه بخلج صيني فصايرة جنان عليـه مع شكله النحفان .. : السلام عليـكم
الكل: وعليكم السلام..
عدلت سماء قعدتها وام جراح اشرت لمسـاعد على الكرسي.: حياك يمة حياك فبيتك..
مسـاعد وهو مغمور من ام مسـاعد وعيونه على البنت الصغيـرة اللي قاعدة يمها:.. الله يحيج ويبجيج.. شلونكم..عساكم طيبين؟؟
ام جراح: بخير يمة بعناية الله.. وانت شخبارك؟
مسـاعد: ما نشكي باس.. (يلتفت لسماء بابتسامة تسلب اللب) سماء شلونج؟
سماء وهي ترفع عيونها الحزينة وانفاسها تتصاعد منالبجي: ابخيـر..
مسـاعد وهو يراقب البجي اللي بدى يستحل ملامحها: علامج؟؟ بتبجين؟؟ لا عيب عاد.. لمتى بتبجين؟؟؟ ما تدرين ان الصياح يعذب المتوفي؟؟؟
ولا اراديا نزلت دمعه سماء وهي تنزل عيونها: بلى أدري..
مسـاعد وهو يبتـسم لها ويسليها بكلامه: تحملي يا سمـاء.. وصبري.. وصبري روحج بذكر الله.. بدل لا تضيعين وقتج في الصياح والذكريات.. اقري القرآن وختميه لروح اخوج.. بهالمرحلة انتي ما بينفعج شي ولا بينفع خووج غير ذكر الله.. خذيها مني انا وانا اخوووج..
التفتت سماء له وهي تناظر ويهه الحنون:... ان شاء الله..
مسـاعد وهو يبتسم في ويهها: بنت بحلاتج لازم ما تصيـح.. مو كل الناس تتحمل دموع البنات الصغار..
سماء ابتسمت على خفيف وهي تمسـح دمعتها: ان شاء الله...
مسـاعد: عفية عليج... (يلتفت لمناير بحلاوة الروح) شلونج مناير شخبارج؟
مناير وهي هادئة: الحمدلله ابخير.. مع اني شرهانه على ناس لكن الله كريـم..
مساعد وهو يناظرها بمرح: افا عاد. .كل شي ولا شرهج.. ما عندنا عذر ترى
مناير وهي تبتسم: لا عادي شدعوة.. الشرهه مو عليك يا خوي.. (وتصوت على فاتن) علامج فاتن رحتي تسوين عصير صرتي عصيـر..


بطن فاتن بذيج اللحظة تشنج بسبب كلام مناير اللي ضحكت عليه ام جراح وسماء ومريم بعد.. وكلها ثواني بعد نفس طويـل طلعت فاتن وهي لافة الشال الابيض على راسها والجلابية السودا مظهرها لونها الجميـل الوردي.. وعيونها كانت على الأرض وهي تحمل الصينية.. اما مساعد اللي كان ما عطها ظهره في الصالة يتجنب شوفه ويهها لانه بعده ما نساها وهي في يده بذيج الليلة يواسيـها.. لكن اهي اكيد ندمت على اللي سوته.. او يمكن اهي كانت محتاجة وما لقتني الا انا...


تجدمت فاتن بالعصير الى مسـاعد: بسم الله..
رفع مسـأعد عيونه لفاتن بسرعة وسحب القلاص بتوتر: مشكـورة..
فاتن بصوت خفض: بالعافيـة


حطت الصينية على الطاولة وتوها بتمشـي.. الا مريم تمسـكها


مريم وهي تكلم ام جراح: خالتي قولي لمسـاعد اللي قلتيه مساع
مسـاعد وهو يخفي توتره بالكلام: شصاير؟
ام جراح المنحرجة: والله يا وليدي.. انا فكرت اني اشيل البنات وياي واروح العمرة.. اسبوع ولا اسبوعين ونرد.. عاد نبي مريم اتيي ويانا.. ومريم يبيلها محرم ويـانا.. وعاد هي قالت من اولى غيـرك؟؟
انصدم مسـاعد من كلام ام جراح.. يسافر؟؟ ويا فاتن؟؟ والعمـرة .. this is too much : لا خالتي. وين اسافر.. مع ان الله بيت الله ما يتفوت.. بس انا هالايـام صحتي ما تسمح لي السفـر
مريم بصوت منخفض: صحتك ولااااا؟؟؟
مسـاعد وهو يرميها بنظرة وفاتن تراقبه من غير ما يدري:.. اذا تبون خلو لؤي.. ومرة وحدة تروح امي ويـاكم..
مريم: ماظن امي تروح.. لان نورة في شهورها الاخيرة.. (بحزن) يمكن حتى انا بعد ما ترضى..
ام جراح: لا عاد انا بحاجيها.. لازم يمة تخاوينا.. ما عرفنا العمرة بلياج يا مريم
مريم وهي تتدلع على مسـاعد: شرايك مسـاعد؟؟ يالله عاد تكفى خلني اروح
مسـاعد: ما قلت لج لا تروحين بس بخلي لؤي يروح وياكم..
مريم وهي متظايقة: بس انا ماعرف اسافر الا وياك..
يناظرها مساعد وهو يتحسس خبثها .. ما تعرف تسافر وياي ولا ناوية افلام هندية.. وهني غمزت مريم لمسـاعد ويبست راسه زيادة: لا ماقدر مريم.. ولؤي ما فيه شي..انتو قرروا الحين.. واول ما يصير هالشي انا بحجز لكم كل شي على حسـابي..
ام جراح: لا يمة ما نبي نعبل عليك
مسـاعد وهو يناظر ام جراح بعتب: افا عليج عاد يا خالتي.. لا عبالة ولا شي.. بعدين انا من الأهل.. (وكانه يكلم فاتن هالمرة) صح ولا لاء؟
ام جراح: من الأهل يمة وعلى عينا وعلى راسنا.. بس الحال ميسور يايمة.. وما له داعي كل هالكلافة
مسـاعد وهو يحط العصير على الطاولة: لاعاد انا جذي ازعل..
ام جراح وهي محتارة: ياهي الخيبة ..


ضحك مسـاعد على ام جراح وبدخلة خالد البيـت ويا جراح.. اللي انصدموا من شوفة مساعد قاعد ويا الأهل


وعيون خالد على سماء تكلم جراح: مساعد عندنا.. ؟؟ ماصدق... حيا الله من زارنا..جيف حالك؟
مسـاعد وهو يوقف بجهد: بخير الله يحيك ويبقيك..
خالد يسلم على مساعد: العلوم بو خلف..
مساعد: علوم الخـير.. ومن صوبك؟
خالد: الحمد لله طيب..
جراح: علامكم متيمعين


وفاتن تنسحب بهدوء من المكان وتتخبى في المطبخ تحت نظر مسـاعد: لا والله ولا شي بس.. مقررين يسافرون العمـرة..
مريم اللي لحقت فاتن ما غابت عن بال جراح لكن ما بين هالشي: والله؟؟ خوش شي.. وانا وياكم.؟؟؟
ام جراح: اي يمة عيل من وين لنا المحرم.. ؟؟
خالد:افا عليج خالتي؟؟ وانا وين رحت..
ام جراح: فيك الخير والبركة يا يمة بس انت منت بمحرم على مناير..
خالد: شلون يعني ما رووح؟؟؟
جراح: لا شوف.. نروح كلنا بالطيارة.. احسن حل..
مساعد : والله خوش حل.. عاد انتو نطروا خير ربكم.. اسأل البيت قبل جان يروحون؟
جراح: ليش انت ما بتيي؟؟؟
مسـاعد : لا والله اسمح لي.. صحتي شوي ما تساعد..
فاتن وهي تضم يدينها بقوة في المطبخ ومريم وياها: فتون علامج
فاتن وهي متظايقة: ما علامي شي...
جراح: لا صج.. خلك عاد ما تحلى السفرة بلياك..
مساعدوهو يحط يده على جتف جراح: حلت دنياااك بس اسمح لي هالمرة.. المرة الياية انشاء الله.. (يصوت على مريم) الريم يالله مشينا..
ردت عليه مرمي: ان شاء اللـــه ياية (خلت مريم يد فاتن ومشـت عنها وقبل لا تطلع التفتت لها ) فتون حبيبتي..


ما تكلمت فاتن وعطت مريم ظهرها عشان لا توريها دمعة القهر اللي فيها.. اما مريم فطلعت وهي خايبة الأمل.. تمنت لو ان روحة بيت الله تهدي القلوب على بعضها.. لكن كل شي يبين عقيم من الصوبين.. فاتن ومسـاعد.. وطلعت من المطبخ وامارات الحزن على محيـاها..


ومسـاعد انسحب من الحريم وجراح وخالد بالسلام والتحايا.. وتجدم مريم اللي ظلت عيونها منجسة على الأرض التفت لها مسـاعد وبإلتفافته لقى فاتن واقفة عند باب المطبـخ وهي تناظره وكانها ما كانت متوقعة انه يلتفت.. لكنه خيب أملها وعطاها ظهره وطلع من البيت ومريم وراه.. أللي التفتت لفاتن ومرة وحدة تناظر جراح ونظرة الأنكسار بعيـونها.. وغابوا عن الانظار..


تواصلت السوالف في الصالة عن السفر وتناسى العالم فاتن المسكينة وهي واقفة عند باب المطبـخ.. تناظر خطى رحل عنها مساعد وترك اثره العميـق عليها.. وعرفت فاتن ان الأمل مقتول من رجعة مساعد.. بتجاهله القوي لها ونظراته الباردة تجاهها.. حست ان حتى الدمع ما عاد له طعـم.. لانه بيكون دمع حسـرة وندم.. ما هو دمع محبـة متبـادلة..


انسـحبت من المكان وهي ما تدري بالعيـون اللي تراقبـها.. عيون سماء ومناير اللي حاسين بوضعها الحساس.. لكنهم عرفوا انا ما باليد شي.. ان جان بصير شي فهو بارادة كل من فاتن ومسـاعد..

تابعوا الحلقات الاخيره من نظرة حب

[الشوق]

الجزء [49] من قصة نظرة حب
مرت الأيام بحزن وسحب الفصـول.. كاهو الشـتاء يشـرف عليـهم.. واقبـل شهـر الله محمل بالنسائم الباردة الخفيـفة.. تجدم رمضـان هالسنة الى بداية شهـر 11.. وكانت التحضيـرات في البيوت على اوج في انتـظار واستقبال هالشـهر الكريـم.. وفاتن اللي فكرت تراسـل الجامـعة تخبرهم بانسـحابها من البرنامج البعثي.. لانها ما راح تتحمل السـكن في ذيج المنطقة مرة ثانية وين ما تكون حزينة.. الحين مساعد ماله سلطة عليها واهي تقدر تعيش ويا أهلها مثل ما تتمنى... لان أهل هيام بيردون اميـركا عن الجريب العاجل.. وياهم زياد اللي راح يتزوج هيـام مع مطـلع السنة اليديدة..


سمـاء اصبـحت مقيـمة رسميـة في بيت ام جـراح.. وخالد طـلع من البيـت وراح سكن ويا خالته عزيزة.. مع ان بيتها تقريبا بعيـد عن بيت ام جراح الا انه ما تذمر.. ففكرة تواجد سماء في عهدة خالته تريـحه اكثر من اي شي في هالدنيا.. وتمنى بس لو انها كانت اكبر شوي عشان يتقدم لها.. لكن اهي اخوها اللي توفى مو ابوها.. وفي قلبه الخوف جايس لو انه مثلا ايي ويطالب بسماء محد يقدر يرده ويقدر ياخذها معاه اي مكـان ويظل خالد مكانه من غير اي حركة.. ويا كـثر ما كانت تخرعـه هالفكـرة..
سمـاء كانت حالتها النفسية مستقرة وسط الاجواء العائلية مع ام جراح.. صج انها ما كفت صياح على اخوها .. الا ان اللحظات الللي تبجيها الحين اقل من قبل.. وما تبجي الا اذا لقت شي يذكرها فيه.. فجراح صار لها اكثر من الأخ اللي يمـكن تعتمـد عليه بحياتها.. ومناير وام جراح وفاتن ولا ننسى خالـد اشبه بالعواميد العريضة المتينة بحياتها..


اما جراح فهو يحاول انه يكظم نفسـه عن مريم ويحـاول يتناسى الضنا اللي فيه عليها.. او انه يحاول يموت اللي فيه.. لان اشياء كثيرة قاعدة تصير تمنع الاثنين من بعضهم.. وفجأة صار الشي متعب اكثر من اللازم.. اذا هالكثر عراقيل ومصاعب ملازمة الشي فمعناته ان الله مو راضي عليـه..


مسـاعد حالته تتأزم يوم عن يـوم.. مع انه يطـلع وايي ويروح ويرد.. حتى السيارة بدى يتعلـم عليـها.. عشان ياخذ مواصلـاته بنفسه.. الا ان طيف فاتن ما فارج عيـونه.. ولا عيـونها الحزيـنة اللي كانت تنشده عند باب المطبخ في بيتهم ذيج الليلة.. لكن فات الآوان على اي شي اهو يمكن يسويه. .ألا اذا معجزة من رب العالميـن بتنزل وتعدل الأوضاع..


وكـاهي المعجزة في تحقق.. الكتيـب كمل ونسخ كبيـرة منه جهزت.. وصار الكتاب في اوج الاستعداد للانطلاق الى عالم الحقيـقة وين ما يلمـس شغاف قلوب الناس.. وصارت جلسة تجربة للي مكتوب من قبل كتاب (من غير ذكر اسماء) وادباء في البحرين.. وكلهم عطوا الموافقة او المباركة لنشـر الكتاب للاشعار الجميلة اللي يحـتويه..


عنوان الكتاب كان (ما بعد الحبـ .. رسائل عشـق) والغلاف يحمل غلاف فني التصمـيم.. وماتقدر مريم تكون اكثر من راضية وممتنه.. مع ان الشغلة كلفتها الكثـير.. الا انها بتلاقي الرادي اللي يخليها تعوض ويصير فائض عندها .. لكن المادة ما تهم اهم شي الاثر العميـق اللي بينشره هالكتاب ان شاء الله في نفس الاثنين..


اتفقت على يوم النشـر الا وهو بعد يومين من اليوم الحالي.. وشكثر كانت مريـم متوترة على هالشي وخايفة بعض الشي من ردة فعل مساعد لو عرف.. لكن اهي راح تضمـن سلامتها في الوقت الحالي لان الكتاب كتب عليه بتجميـع: فاعل خيـر..


مناير وهي متحمسة بالسيارة: واااااااااو السالفة حدها كشخة.. تعرفيـن.. احس ان مسـاعد وفاتن راح يردون لبعض
مريم وهي فرحانه بفرح مناير: الله يسمع منج منور.. الله يسمع منج.. لان ان ما صار شي من اللي انا متوقعته واتمناه من هلشي بصير فيني شي لا محال..
مناير: اذا انتي بصير فيـج شي.. انا بمووووت..
مريم: هههههههههههههههههههه وانتي شلج بالموت؟؟؟ صلي على النبي بلا سوالف تقرف البدن.. خلينا الحين بس نفكر باللي يمكن نقوله.. النشر بعد يومين.. حاولي ويا خالتي انها تخليـج تطلعـين.. من الساعة ثلاث الى الساعة خمس..
مناير: اوكيــــك. لا تحاتين.. محسوبتج مو مدمغة.. باتدبر عمري.. انتي بس عطيني نسـخة
مريم بخوف: لااااا شنو اعطيـج نسـخة.. خلي الكتاب ينزل قبل.. جذي بتكشفينا
مناير: لا ما بكشفنا ولا شي.. ابي اقراه انا بعد .. ابي اعرف شاقول يوم المؤتمر ..
مريم وهي تحس ان مناير متفرغة: فراغة صراحة.. يالله روحي ما بعطيج..
مناير: عطيني لا فظحج..
مريم: هههههههههههههه..بعطيج بس ها.. محد يشـوفه..
مناير: اوكيـك.. فظحتينا عاد.. (خذت مناير النسخة من جنطة مريم).. والله ان هالكتاب بيهز عالم العشق.. شكسبيــر احذر من مساعد..
ممريم وهي توقف عند باب بيت ام جراح بضحكها: مالت عليـــــــج يا منور تتطنزين على اخوي..
مناير: من صجج انتي.. صلي على النبي.. والله مو قصدي ترى بس الاشعار اكيد حلوة (اتفج صفحة وتقرى اللي فيها ).. احيانا قريب واحيانا بعيـد يلقطك نظري .. قوليلي يا حبيبتي اين اركن كي اجد دربي لك.. (سكتت مناير شوي) ااااااااه من خوج.. خوفي لا حبه..
مريم: هههههههههههههههههههههههه ولي عاد انتي.. يالله سلمي
مناير: اوجي..


طلعت مناير من السيارة وهي تخبي المجلد بجنطتها الكبيـرة.. وتدخل البيت وهي تحاول انها ما تلفت انتباه احد .. لكن فاتن كانت طالعة من دارها وهي رافعة شعـرها ومشمرة السواعد وكأنها ترتب شي.. وشافت مناير الداخلة البيت..


فاتن وهي تخبي غيرتها:.. هلا منور؟؟ وينها مريم
مناير وهي تتحاشى فاتن : ها.. مريوم؟؟ شدراني فيها .. قطتني وراحت على ماظن بيتهم.. (تتصنع التثااااوب) يااااااااااااااه والله ياهو تعـب.. تصبحين على خير فتون
فاتن وهي مستغربة من مناير: ترقدين بهالحزة؟؟
مناير: ما فيها شي.. الا المغرب
فاتن: الاذان ما باقي عليه شي
مناير وهي تلتفت لفاتن عند الدري: لا عادي مافيها شي.. بحاول اني اصحى قبل الاذان.. او بعده بجم دقيقة.. تصبحين عخير... باااااااااااااي..


راحت مناير فوق وهي تاركة فاتن في دوامة الشك.. مريم ومناير وراهم شي.. هالطلعات والروحات والييات لها سبب ولها معنى ولها مغزى .. مايصير يترابعون الحين ويصيرون كلووز من غير سبب.. لكن انا مابسأل ولا وحدة فيـهم.. لاني احس ان اللي بيي من وراهم شي عود وكبيـر..


فاتن وهي تدخل الغرفة: هم اذا يبون يقولون بيقولون.. انا عن نفسي ما بسـال احد عن شي..


---------------------


ويا وقت الليل والناس كلها في مضاجعها.. وسالفة السفر قايمة على قدم وساق بين الكل.. تقرر السفر انه في الشهر الياي.. بداية الشتا والكل من غير استثناء كان متحمس.. وفي خطط جراح كانت اعظم الافكار منها المواصلة في جدة ولا أبها عشان يتحلوون بالجو هناك.. لكن ما عمم هالشي إلا حق امه .. ما يبي يوعدهم بشي وهو مو قـده ولا يبي يبتعد عشان لا يبتعد عن اللي اهو مخطط له. صح ان وفاة مشعل توها صايرة واهو بنتظر احتراما لسماء ولصداقته بمشعل الوقت عشان يمر ويروح ويخطب مريم ولازم هالمرة ما يطلع من عندهم الا واهو ماخذ موافقتهم لانه مو مستحمل فكرة انه يمكن تبتعد او تكون لاحد غيره بهالدنيا.. مريم ما عادت بنت صغيرة.؟. ومن اللي شافه انها حلوت اكثر وامها من النوع اللي ما يعطل بناته.. ويمكن بعد بغضا فيني راح تعطيها لواحد غيري.. لكن انا ما راح اسمح لهالشي.. خل تمر هالشهور على خير وتبرد الأجواء على مشـعل.. وانا اللي بـتصرف..


مهما بلغ نفسه جراح انه راح يصبر ويكون متفهم على الوضع الا انه صعب عليه والامر منعكس على نفسيته.. لاب موت مشعل والتفكير اللي ماخذ كل طاقته .. شوي في المشغل وشوي في الحياة وشوي في مريم.. لمن انتبهت له فاتن بعشية من بعد الصلاة.. كان قاعد في الصالة والتلفزيون شغال اما هو فكانت عيونه طايحة على ركبته وهو يمرر اصابعه وحواجبه معقوده.. وكأنه يمر في تفكير لا نهاية له .. والأمر اللي ظايقها اكثر معرفتها انها يمكن توقف مستقبل اخوها او امنيته بسبب روح العداء اللي اكيدا تملكت ام مساعد على اللي صار بيناتهم..


قعدت يمـه وهو فز من تفكيره وحاول يبتسم لها لكن احساسه بالغثيان من التوتر ما خلاه...


فاتن وهي تطل على ويهه بنظراتها السمحه: .. علامك جراح؟
جراح وهو يبتسم بنظراته الموخية: سلامتج.. ما علامي شي.. انتي علامج (وهو يضرب خشمها بنعومه بصبعه)
فاتن وهي تتنفس بعمق وتناظر البيت كانها تتحسس شي موجود ما تلاقيه عيونها:..ما علامي شي.. بس.. غربة..
جراح وهو سمتغرب: شغربته؟؟ انتي وسط اهلج يا فاتن؟؟
فاتن وهي تبتم: ما تصدق يا جراح.. صج ان البحرين ديرتي.. وعزي ودلالي وراحة بالي لكن... شي من اللي كان عندي ببوسطن فقدته هني.. مع اني كنت في البداية.. وما صار لي اكثر من ثمانية شهور... بس حسيت ان عالمي مختلف هناك.. وبفرقاااه احس اني مختلفة.. او يمكن احتاج له .. لسبب او ثاني
جراح وهو يهز راسه: شي طبيعي.. انتي اكيد كونتي لج الشخصية المتخلفة عن هني .. وصرتي انسانة يمكن اكثر التزام ومسؤولية خصوصا ويا الجو اللي كنتي عيشته.. لانج بروحج وكان لازم تكونين اقوى من الوضع الحالي.. لكن من يعيف الراحة يا فتووون؟؟ انتي هني حالج حال الأميرات.. (يبسم) فوين الغربة؟
ابتسـمت بحزن جميل اسس النور اللي اجتاح لون عيونها:... (تأشر على قلب جراح) هنـي..
فج عيونه جراح بغير تصديق: هني؟؟؟؟؟؟ ليش يعني؟؟؟
فاتن وهي تقوم من مكانها وتوقف:.. علبالك ما عرف شلي انت تمر فيه؟؟؟ (تلتفت له) اناساكته يا مسـاعد.. مومعناته اني فقدت الصت.. اشيح بعيوني.. مو معناته اني عميـت.. اسرح من الدنيا مو معناته افقد الصوت... انا ادري اي نوع من المشاكل اللي سببتها لك انت ومريم باللي صار بيني وبين مسـاعد
قطعها جراح ووقف لها: فاتن.. حسج لو تحبيني انج تييبين هالطاري مرة ثانية.. كلش ماحبه
فاتن وهي تناظره حزن: بس يا جراح هذا هو الحق اللي انت يمكن لمحبتك لي مو راضي تبينه .. انا يا جراح المـتك.. وآآلم مريم.. لكن من طيبة قلبكم.. من سحركم ومن روعتكم ما تخلوني احس بهالشي.. لكن شوفتي لكم متفارقين تخليني احس بالموت
جراح وهو يلم فاتن لانها بدت تتهجد في صوتها:.. بس يا فاتن.. واللي يسلمج.. لا تزيدين عذابي بعذااابج...
فاتن وهي مستغربة: ازيد عذابك؟؟؟ جراح والله انا مو متعذبة.. انا اذا بتعذب لعذاب واحد من هلي
جراح وملامحه لاينة بسبب اللي تمر فيه فاتن: يافاتن.. انا لو جاسني الهم.. اظل ريال واتحمله.. وربي بدل الجلد يزرقني بالف .. لكن انتي.. انتي اختي وبنت لج من العاطفة خلايا وحشى.. شتتوقعين يصير فيني لو ادري انج انتي.. المخلوقة الضعيفة على قوتج الظاهرة.. تمرين بهالشي كل يوم وانتي على ذمة مـساعد.. يا فاتن لا تجدمين هموم الناس على اللي فيج..
فاتن وهي مستغربة: جراح ما فهمت عليك؟
جراح وهو يلتفت عنه: انتي تقولين ان بسببج انا ومريم ما نتلاقى.. لكن بسببي انا يا فاتن.....


سكت جراح.. لانه ما يبي يتكلم.. تذكر كلام لؤي.. ان اللي صار صار.. هذا قضاء الله وما كتبه عليهم في دنياهم..


لكن فاتن ما فكته: جراح واللي يسـلمك.. فهمني.. شلي تقصده بكلامك؟
جراح وهو يلتفت عنها وهو مغير نبرته: خليني يا فاتن بروح داري
وقفته فاتن وهي ماسكة ذراعه وصوته متقوي ولكن حنجرتها كانت ترتجف من التوتر: تعرف شي يا جراح انا ما عرفه؟؟؟
جراح وبعيونه الرجا لعيونها: فاتن.. وحقي اخوتي فيج.. خليني.. لاتسأليني اكثر.. طلبتج..


تركت فاتن ذراع جراح اللي راح داره.. وظلت اهي مكانها.. تقلبها المواجع من كلام جراح يمنة ويسرة.. شلي قصده جراح بكلامه.. لا تجدم هموم الناس على همومها.. وليش جراح يحس بان هم فاتن اهم من كل شي؟؟؟ لا يكون بس يحس بالذنب لانه اهو اللي ياب مساعد لحيـاتها.. ؟؟


ما عرفت فاتن شالحل من اللي اهي تمر فيه.. لا عذابها يهنيها ولا عذاب الغير يهنيـها... راحت دارها وظلت تدور بالغرفة دقايق.. ولكن فيها شي يخنقها مثل الياثوم.. ما لقت روحها الا لابسة عباتها الكتفية ولافة الشيلة اللي انهدلت من راسها ووصل طرفها الى تحت خصر فاتن.. طلعت من البيت وهي مو عارفة وين تتوجه.. الا انها اخيرا تأكدت من المكان اللي تبي تروحه... وظلت تمشي وتمشي الى ان وصـلت لتقاطع الشارع.. وين ما لقاها خالد اللي راد من المسيـد..


استغرب خالد يوم شاف فاتن تمشي.. ومن ويهها ان حالتها مو هيـنة او بخير..


خالد: وين رايحة فاتن؟
فاتن بعيون ظايعة.. وقلب اشبه بالمينون بالدقات:... ها.. ما بروح مكان.. بس قلت اتمشي..
وقف خالد في ويهها: .. فاتن.. اذن العشا.. الناس تظل في بيوتها بهاللحظة..
فاتن وهي تحس بالاختناق..وتحشرج صوتها وبح شوي:... ماقدر اظل في البيت.. حاسة روحي بختنق... بختنق..
تساندت على جدار البيت اللي واقفة يمه وخالد مرتعب عليها: فاتن.. صلي على النبي.. علامج يا فاتن ؟شي فيج؟؟؟
فاتن وهي تترجاه بالدمعة الي طفرت من جفنها:.. خالد.. خلني اروح.. واللي يسلمك... خلني اروح له..
خالد وهو متوهق بها:.. وين تروحين ومن له؟؟
فاتن: بروح لمسـاعد.. بروح له...
خالد وهو حاس ان فاتن مو في وعيها:... فاتن صليتي العشا؟؟


هزت راسها فاتن بالنفي وهي تتحسس العبرة اللي خانقتها والمرورة اللي في حلجها


خالد: شرايج لو نرد البيت.. (بصوت حنون) وتصلين على النبي.. وبعدها انا اخذج لمسـاعد بنفسي..


فاتن حاولت انها تتملص من خالد لكن.. تذكرت صلاة ربها اللي ما صلـتها.. مع انها في وعيها.. الا ان اليأس اللي جال بخاطرها خلاها مثل المليانة حفوز.. ناظرت خالد شوي.. وبابتسامته الحنونة ردت الى عقلها وثباته.. ومشت وهي مولية الطريج ظهرها ومتوجهة البيت.. وخالد يمشي وراها.. مسكت نفسها بقوة خوفا لا انها تتلاشى.. وظلت تمشي في هذاك الشارع برفقة خالد اللي ما فارجها.. .لمن وصلت البيت.. وقبل لا تدخل التفتت الى خالد والندى مقطر الرطوبة على خديهها المتوهجين..


فاتن: خالد.. بكتب لك شي.. وصله الى مـساعد...
خالد وهو مستغرب منها: شنو اهو؟
فاتن وهي تتنفس بقوة:. خلني بكتبه... وانت وصله لي.. ما ابي اشوفه خلاص... تسوي لي هالشي؟؟؟
خالد:.. افا عليج.. لج عيوني لو تبينها..


ظلت ملامح فاتن بلا غاية.. ولكن في عيونها شي من الاصرار والعزيمة .. اللي خلاها تدخل البيت وترمي بعباتها على الكرسي.. تتيدد بقوة وهي ترشح ويهها بماي.. كانها تبي تصحي نفسها من شي اهي غايبة عن الوعي فيه..


يوم خلصت راحت دارها وظلت تحوس فيها وهي تدور.. سحبت الدفتر اللي طاحت يدها عليـه وفتحته وهي قاعدة على السرير.. كتبت رسـاله سريعة جذي بخط يدها..


طوتها بعنايه ولفتـها في اشبه بالجيس الحريري عندها.. وطلعت منالغرفة وهي تدور على خالد.. لمن لقته في المطبـخ واقف عند الثلاجة


صوتت عليه وطلع لها:.. لبيه!!
فاتن وهي تسلمه الورقة:.. لو سمحت يا خالد.. اابيك تنطره لمن يقرى الرسالة.. ويعطيك الرد.. وتعال خبرني بسرعة..
خالد وهو مستغرب: فاتن ليش كل هالاشياء ليش ما ترفعين السماعة وتتصلين فيـه
فاتن وهي تهز راسها بتوتر: خالد مو وقت اسألتك هذي.. انت وعدتني انك تسوي لي اللي ابيـه.. صح ولا لاء؟؟


سكت خالد وهو يناظر فاتن اللي بعيونها كانت تحثه على ذكر الوعد.. فما كان فيه الا انه يهز راسه بالايجاب وبطريقة انهزامية.. ابتسمت فاتن بتوتر لانها اخيـرا راح تقدر تسوي الامور مثل ما تركتها مبعثرة.. مو مثل ذيج المرة.. هالمرة اذا راحت بتخلي كل شي يستتب ويهدى.. راح تختفي من حياتهم بسلااام ومحبة.. وتترك مكانها الاثر اللي تبي تتركه..


طلع خالد من البيت وعيونها تتبعه لمن وصل الى الشارع واختفى صوت وطاه من سمعها.. سكرت عيونها وهي متأكدة من موافقة مسـاعد.. لكن ..اهي شلي طلبته من مساعد بهالصـورة؟؟ وليش مثل ما قال لها خالد ما اتصلت وفكت عمرها؟؟ ليش هالغموض يلفها من كل صـوب؟؟


طلعت امها من دارها وهي تلف محراب الصلاة بين ايدينها والتفتت الى فاتن اللي كانت ساندة راسها على فريم الباب.. تقربت منها امها وهي متوجسة على البنت


مسكت جتفها بنعومة: يمة فاتن


لكن نعومة ام جراح كانت بمثابة الكهربا اللي سرت في جسم فاتن..فجفلت والتفتت الى امها بخوف


ام جراح وهي مستغربة فزع بنتها: بسم الله عليج يمة.. علامج جفلتي ؟
فاتن وهي تمسك جبينها تحاول انها تتماسك: لا ولا شي يـمة بس كنت سرحانة شوي..يمة شصار عن سالفة العمـرة؟
ام جراح: والله يا يمة كل شي جاهز.. وكل شي تحت الانتظار.. رايكم يا بنيتي وبس من عقبه نتحرك
فاتن: كلنا يعني يمة؟
ام جراح وهي تلم بنتها: اكيد يمة كلنا.. عشان مرة وحدة يغسل الله هموم واحزان كل واحد فينا.. كل واحد يقدر يتوجه لربه و يبتدي من يديد.. شرايج؟
لمت فاتن امها بكل قوتها وهي حاطة راسها عن رقبتها الحنونة:.. لا خلى ولا عدم منج يالغالية..


في قلب فاتن كان انتظار خالد عشان يرجع.. وهي تفكر باللي يمكن يجول في بال مساعد وهو يقرى الرسالة. او اللي اهي تطلبه منه فيها.. لكن الحين شي ثاني بدت تفكر فيه فاتن بجدية.. اهي موافقة مساعد انه يسوي لها هالشي..


-------------


كان مساعد قاعد في داره وهو يقرى بعض الأوراق المهمة اللي يابه من الشغل وياه.. وما كان على باله اي فكرة او نوع من الأحساس بان شي يمكن يصير الليلة.. ولكن اول ما سمع الجرس جفل شوي لانه كان سرحان في الأوراق اللي اهو غامس نفسه فيها.. مد رقبته وبصرة الى الدريشة اللي تطل على الباب لكن ما قدر يشوف شي.. انتظر ثواني وضرب الجرس من بعدها.. استغرب مساعد من عدم الاجابة.. وين راحوا؟؟

طلع من الدار وهو يمشي بصعوبة من غير العكاز. لكن يحاول انه يدرب نفسـه على المشي بروحه.. وقف يطل على ممر الصالة وحاول انه يسمع اي صوت لكن المكان كان شبه بالخالي.. طلع من الممر وفتح الباب الرئيسي.. جان يلقى واحد ماعطه ظهره واول ما انفتح الباب التفت له وطلع خالد
مسـاعد وهو شبه المنصدم:.. خالد.. حيا الله من يانا.. حياك ادخل
خالد وهو يمانع براسه: لا ما له داعي الله يحيييك.. بس انا عندي شي اوصله لك.. (وكان التوتر او الغرابة على محيااا خالد او يمكن حتى السخف) هذا من عند فاتن..
مساعد اول ما مسك الورقة كان بيقراها لكن يوم عرف انه من عند فاتن استرخت يده شوي وطالع خالد بغرابه: فاتن قلت لي؟؟؟
خالد وهو حاس روحه سخيف ولكن شي من الموضوع يشوووق:.. اي فاتن.. وتبي ردك اول ما تقراه..
مسـاعد وهو حاس بالغرابة من راسه لقدمه:.. شالسالفة يا خالد؟؟ ما عندك فكرة؟
خالد: مافجيت الرسالة ان جان يا على بالك هالشي
سكت مساعد لان هالشي مر على باله.. ناظر المغلف الغريب من نوعه ولكن ما اهتم له وسحب الورقة من داخله.. فتح الورقة بكل سـهولة وحاول يقرى لكن في عيونه كان شي اشبه بالضباب اللي يمنعه من القراءة زين.. يمكن بسبب الحماس الي فيه او التوتر او يمكن حتى الاضطراب.. لكن حكم عقله بالأخير وقرى اللي مكـتوب..

تمنيت قلبن لو يحس بي ثواني .. ويعطف على قلبن متيم ومفتون
تمنيت لكن ما هي بيدي الاماني.. ما كل من طلب حبيبن له يكـون
كل اللي اطلبه اهي الليـلة من حيـاتك.. واعرف اني اللي طالبتها يعني لو تتكرم علي وتهديني هالوقت .. عشان نصلح اللي تركناه مكسـور ويظايج الكل..
ما عاد فيني يا مساعد الا بقايا صبـر. فاتمنى عليك هالوقت..
فاتن..

حس مساعد بتصاعد التوتر في معدته ورفع عيونه اللي عاقدة النونة في ويه خالد المرتقب.. : قول لها .. لا اصبـر..


دخل مساعد البيت وهو مسرع.. وضغط على ريله وآلمته شوي لكن ما حط بال على الألم.. دخل الغرفة وهو مسـرع.. سحب القلم الفضي اللي كان يكتـب فيه وكتب على ظاهر الورقة الرد على رسـاله فاتن..


من غير ما احد يعرف يا فاتن.. بوسـط الليل. وين ما تنزل رحمة الله بثلثه.. بلاقيـج.. خلينا نملك اللحظة.. ونبري الجروح اللي سببناها..


صدقتي.. ما كل من طلب حبيبن له يـكون..


مسـاعد..


ترك القلم من بعد ماك تب .. وحس براسه يدور.. لا هو شوق لفاتن وهي تطلب مقابلته.. ولا البيتين اللي حطتهم فاتن باول رسالتها..
تمنيت قلبن يحس فيني ثواني.. ويعطف على قلبن متيم ومفتون
تمينت لكن ما هي بيدي الأماني.. ما كل من طلب حبيبن له يكون


مساعد وهو يمشي للباب ماسك صدره من الدقات العنيفة اللي تهز ضلوعه .. واول ما فج الباب لقى خالد واقف ..


مساعد: مسامحة على التأخير (مد له الظرف اللي فيه الورقة) وصـله لها واهي بتعرف..


هز راسه خالد بالايجاب وراح من المكان.. اما مساعد ظل مكانه واقف.. وحاس ان الليلة بيبت القرار.. الليلة اللي اهو وفاتن عاجززين عن القيام فيه بصير الليلـة.. ولسبب غريب سرت الراحة في نفسه..


يا ترى؟؟ مساعد يدري باللي تطلبه فاتن منه؟؟ عنده فكرة؟؟ مساعد بعد له الضمير الواعي للي يأنبه مثل ما يأنب فاتن...


هل راح يرتكبون التضحية الكبرى.. في سبيل الباجيين يحبون ويتلاقون؟؟؟


--------------------


على العشا في بيت الياسي سالفة السفر على كل لسان.. وخصوصا سماء اللي ما كان مصدقة انها بتروح بيت الله.. شعور جميل يغمر الانسان. .وكانه راح يرجع الى محط الرحال ومسقط راسه من بعد فرقا طويلة.. صج ان بيت الله عالم ختلف الا انه البيت الوحيد اللي ما يرفض احد مسـلم.. الكل يقدر يلتجي الى استاره ويتحمي باسواره العالية مثل ما احتمت السيدة هاجر والنبي اسماعيل عليهم السلام وبيت الله كان مجرد وادي سحيـق..


مناير وهي تكتب في الورقة الاماكن اللي بيروحونها: يمة جوفي اهم شي نروح الاسواق.. انا بعد السنة الياية اخر سنة وسمور بعد يبيلها جم غريضة لازم نتشراها..
ام جراح وهي مستغربة: ليش انتي رايحة تشترين لزمة المدرسة ولا ادري؟
مناير: يمة الواحد لااازم يتأكد من نفسه ..خووو احنا مو كل يوم نسافر..
فاتن كانت سكتة وسرحانه وام جراح كل شوي تلتفت لها وتكلم مناير بعد: يمة منووور هدي بالج.. وان شاء الله المدارس جريب بتفتح بنروح الدمام والخبر.. شرايج؟
مناير وهي متمللة: يمة كل سنة نروح الدمام هالمرة نرووح بانكوك؟
ام جراح وهي مو مصدقة كلام بنتها: الله عليج يا مناير تونا رادين من بيت الله ونروح بانكوك

ضحكت فاتن هني على مناير لكن في قلبها الحفوووز متزايد.. ولكن في عيونها شي من الفرحة والراحة.. مهما كانت الظروف اللي بتخليها تجابل مساعد الا انه بتشوفه.. بتقعد معاه.. وتحس لوجوده معاها.. صج انه بعيد الاف البحور.. لكن يرده لي موج الشوق العاتي.. وان ما كان الحبيب اللي الاقيه في هالدنيا.. يتم الحبيب اللي على طول بتمناه في حياتي..

في بيت الدخيلي مساعد امتنع عن الأكل.. وهو يذرع غرفته يمين ويسار.. كانه عارف باللي بصير مع فاتن و اي نوع من الكلام بينقال.. التردد ماله مكان بيناتهم في الوقت الحالي.. ولازم يصير للي رب العالمين بيسهل الوضع عشان ينقال..

مسـاعد وهو حاس بالضيـاع وحاس ان النفس يغيب عن رئتيه لكن لسبب او ثاني اللي قاعد يصير هذا هو وقته .. كل هالألام والاحزان راح تتبدل وتحل مكانها مشاعر الايثار والفرحة لافراح الغير.. حتى وان كانت تعني موت مشاعر او انتهاء اهمية .. لان محل ما يموت لشي يحل مكانه شي ثاني.. بقدرة الله العظيمة ورغبته وارادته..

مر الوقت بسـرعة يجرب الموعد بين الاثنين. الموعد كان في اخر ثلث بالليل.. يعني قبل اذان الفجر بثلاث ساعات.. وكانت الناس توها تنام في بيت فاتن الا اهي . ظلت سهرانة بدااارها الحالية الا وهي دار خالد اللي بدى يرقد في دار جراح.. وهي صاحية ولكن قاعدة مكانها باسترخاء.. حتى الدمع ما عاد يحك جفنها عشان ينزل.. كل شي يمر بهدوء.. شعور التضحية يضج بشرايينها .. لا ماهي تضحية.. تصليح اغلاط لا غيـر..

حتى هذيج اللحظة السكون كان يعم فاتن.. الا من طرقات على الباب خلتها ترفع راسها بجفل بسيط. انفتح الباب يكشـف عن امها الواقفة وشعرها الناعم الأحمر مرتخي على جتفها .. ابتسمت فاتن يوم لقت امها واقفة.. لكن الأم كانت مو مبتسمة ودخلت الغرفة وقعدت على السـرير وهي تناظر ويه فاتن بحنان غريب..

فاتن وهي مستغربة من امها:.. يمة علامج.. الساعة 12 الحين وبعدج صاحية؟
ام جراح: يمر الليل يا فاتن والعيون تنااام فيها.. لكن وانا ادري ان جفنج صاحي شلون انام... يمة فاتن .. انتي شناوية تسوين في روحج؟
فاتن وهي عارفة باحساس امها الصائب في مثل هالأمور: يمة.. اي شي بصير لا بإرادتي ولا ارادة احد.. هذا شي ربي وربج مقدره.. فلازم احنا نصبر ونمشي مثل ما تملي علينا اللحظة..
ام جراح: مو لازم يمة... الانسان مثل ما انولد حر.. انولد وهو مخير بين الشر والخيـر.. واهو اللي يصنع نفسه .. بقضاء ربج..
فاتن وهي تناظر شي ابعد من عيون امها: انتي ما توثقين فيني يمة؟؟؟
ام جراح: يمة انا روحي كلها فداج ولو للموت.. بس مابيج تموتين روحج يا فاتن عشان خاطر احد..
فاتن وهي تضحك بخفة:... الللي ابي اعرفه.. انتي شلون عرفتي؟؟؟ شلون خطر على بالج وانا ما تحرك لساني وخبرج
ام جراح: العيال يا فاتن يظنون ان الأم ولا الأبو راقدين على وذانهم وما يدرون باللييصير في خواطرهم.. لكن غلطانين يا يمة.. في منهم اللي يفضل الرقاد ولكنه يتم صاحي ويتجاهل.. في بعضهم اللي يآثر الموت على دمعة حزن باللي يصير في عيـالهم.. (سكتت ام جراح وحنجرة فاتن متآكلة بالحزن العميـق ) يا فاتن انا شفتج وانتي عاشقة بعمر الصغار اللي ما يعرفون خير وشر الدنيا.. ترقبين مشـعل بدريشـتج.. وتكتبين الاشعار في دفاترج.. (تراخت ملامح فاتن من شدة الصدمـة).. ولاحظت عيونج اللي تلمع كل ما دخلتي البيت بدموع الشوق والفراق.. وانتي قلبج ما كان اكبر من اللولوة.. (تمسك ام جراح يد بنتها وتضمها لصدرها) كنت عارفة انج بتنجرحين من هالحب.. لان يا فاتن البنت ما لازم تضمن قلبها بهالدنيا.. ولاننا عرفنا المكتوب لج من .. مساعد يا يمة ما كان اختيارنا بس لانه حب عمتج واحنا نبيج العوض له.. مساعد يا يمة كان خوش ونعم الرياييل .. واحنا ما بغينا نخسره.. وابوج كان مآمن عليج عنده.. كان دايما يقول (تهجد صوت ام جراح بالبكاء).. فاتن لا كبرت .. بتطير رووس الرياييل.. لكن انا ما بي لها الا راس واحد.. مسـاعد.. ولا تلومينه يا بنتي.. كل ابو يتمنى نعم الرياييل لولده..
فاتن وهي مو مصدقة اللي يصير في هاللحظة: ماصدق اني كنت مفظوحة عندج
ام جراح وهي تمسك جتوف فاتن: لا تقولين جذي.. انتي يا فاتن شعلة الشرف وتاج راسي وراح اخووج.. عمرج ما غلطتي ولا طيحتينا في اغلاط.. يا فاتن الواحد يحب في هالدنيا.. الحب مو حرام اذا صاب الواحد.. الحرام ان الواحد يطوف بهالحب الحدود وهو مو عارف مصيـره..

ما تقبلت فاتن ولا كلمة من كلام امها.. لان مجرد استماعها لهالشي يضعف اللي اهي قاعدة تفكر فيه.. وجراح ومريم يملكون فرصة اكبر في انهم يعيشون بسعادة مع بعض ليش ان الحب متبادل بيناتهم.. لكن اللي يصير بينها وبين مساعد اهو الفوضى لا غير..

فاتن: يمة.. لاتحاتين.. انا ما بصير فيني شي...واللي بسويه
تقطعها ام جراح: بيفشل يا يمة.. اول ما تحس فيه مريم ولا اخوووج بيفشل..
فاتن: بس يمة انا لازم اخلص نفسي.. يمة انا مو قادرة اتحمل اكثر.. يمة واللي يسلمج.. خليني اعيش.. خليني اسوي اللي ابيه.. ثقي اني ما بسوي شي الا اللي يريحني.. واللي يسلم قلبج يا يمة..

سكتت ام جراح وهي تناظر فاتن بحيرة وحسافة غريبة.. بنت في العشرين من عمرها وهموم الكبار فيـها.. ليش يافاتن؟؟؟ هالكثر كبرناااج واحنا ما ندري.. بهمومنا ومشاكلنا وومصائبنا..

تحركت ام جراح من مكانها وراحت لعند الباب ولكن قبل لا تطلع من غير ما تلتفت لفاتن: عرفي يا فاتن.. ان ماكو في هالدنيا قلب بيحبج مثل ما يحبج قلب مساعد...

طلعت ام جراح تاركة فاتن في سريرها قاعدة ولكن اشبه بالصخر. تبتسم وسط الدموع

فاتن: ولا في قلب بهالدنيا بيحب مساعد كثر عالية.. وقلبيـي..

------------------

وصل لؤي البيت متأخر وشاف مسـاعد طالع من داره وهو لابس وكانه بيطلع.. لاحظ الساعة كانت وحدة الفيـر.. فاستغرب لؤي...

لؤي لمسـاعد اللي ما عطاه ويه: على وين مساعد؟
مساعد: عطني مفاتيح سيارتك
لؤي وهو مستغرب بفكاهه: ياه مساعد.. الساعة وحدة الحين.. وين بتطلع
مساعد بصوت حاد: عطني المفاتيح ولا تسأل.. اصغر عيالك انا؟

سكت لؤي بعد هالزفة المحترمة وعطاه المفاتيح بهدوء... سحبها مساعد طلع من البيت وهو يمشي بالعكاز.. ولؤي مستغرب من ردة فعله بس ما حط في باله.. وراح داره يرقد الباجي من الليل..

اما مساعد فهو دخل السيارة .. هذي يمكن ثاني مرة يسوق فيها من بعد الحادثة والاعضاء.. ريله اليمين القدم الي فيها سهل التحكم فيـها.. صج انها صلبة وما تتحرك بسهولة الا ان فيها اللي يخليه يتحكم بها وهي كاحل صناعي يتحرك جدام وورى.. شغل السيارة وبهدوء طلع بها متوجة الى بيت فاتن.. الشارع بهالوقت فاضي وما منه خوف.. ولكن اللي مر على باله الحين اهو شلون بينادي فاتن عشان تطلع له.. تلفونه عنده لكن ما يدري عن رقمها للحين معاها ولا لاء..

اول ما وصل عند بيتها دق على الرقم.. وانتظر عشان يمسـك الخط.. وبالفعل.. رن التلفون.. باسم فاتن المجرد.. وتسكر الخط في ويهه.. معناته فاتن بتنزل الحين.. وهو وقف على مقربة منالبيت عشان ما يوقظ احد من بيتهم..

تم في السيارة وهو يكبح ارتجافه يدينه. ومنكس راسـه واول ما رفع عيونه لقاها طالعة من البيت مغطية بالأسود فوق لتحت.. مشت بهداوة لمن وصـلت الى باب السيارة.. فتحته ودخلت ودقات قلب مساعد تخونه وتطلع اصواتها من كل معبر تنفس فيه..

ريحتها وعبقها كان مختلف عن عبق السيارة.. كان فيه من اللذة ومن العذاب.. من الحسرة ومن الامتلاك.. وكأنها عادت ولكنها ما عادت.. تحرك بالسيارة مساعد من غير حتى يلتفت لها.. وهي بعد بالمثل.. ما التفتت له ولا عبرته ولا جالت عيونها صوبه.. الا بسرقات ليده االلي التفت اصابعها على السكان وترجعها مرة ثانية لجدامها..

وهم على هالصـمت محمولين في كف القدر والنصيب .. اللي الله العالم باللي يصير فيـه..

تم مساعد يسوق وهو حاس انه ملك العالم بيدينه. بهالسيارة وبوجود فاتن وصمت الملائكة اللي يحوم في الاجواء.. لكن بعد يمكن كانت هذي بداية النهاية.. او هدوء ماقبل العواصف.. ما حلل الوضع مساعد اكثر لانه متشوق للي فاتن تبي تقوله ..

لقى بقعة عند البحر.. ينزل فيه الواحد من على جرف وينتهي على الشاطئ. ما كان مزار عالية.. كان بحر ثاني يقدر مساعد انه يتشارك فيه مع فاتن... اذا كانت راضية او قابلة.. وضوء القمر لعب لعبته الحساسة في هذيج اللحظة وارسل اشعاعات الحزن وبوادر الألم في قلوب المحبين.. واولهم قلب فاتن.. اللي رفعت الغشوى اللي كانت مغطية فيها ويهها.. ولاح بياضها الحزين من وسط السواد.. وظلت اهي ومساعد قاعدين في السيارة بهدوء وصمت عميـق.. جالتفي مساعد الرغبة انه يمسك يدها ويتحسس اصابعها بيده.. صج انها من بعد هاللحظة يمكن ما تكون له.. او يمكن انها تبتعد عنه للابد.. لكن ما يقدر يمتلك اللحظة الاخيرة؟؟؟؟

فاتن وهي تفرج شفتينها بالكلام:.. فيني احساس.. .يخبرني انك. تعرف اللي انا ابي اقوله لك اليوم..

وناظرت مساعد اللي كان ضام يدينه في حجره ويطالع اللي جدامه بصمت.. فما قدرت الا انها تعرف بموافقته..

اسهبت بالكلام:... ما ابي اعيد ولا ازيد في المواجع كثر ماانعادت.. لكن انا اليوم يايتك عشان اطلب منك شي.. وانت يمكن تطلبـه بعد رحمة لقلوب ناس ما عاشت بهالزمان او بهاللحظات الا لراحتنا..
مسـاعد وهو يحس بالظيـقة: خلينا نطلع من هني..

ومن غير ما ينتظرها طلع اهو من السيارة .. وسحب معاه العكاز اللي حسه الصديق له في مثل هالحظة لانه ما راح يتحمل قوته كلها بروحه.. الشي متعب ومجهد اكثر من اللازم..

ما التفت لفاتن ان جان طلعت ولا لاء.. خلاها تنزل براحتها من السيارة.. لحتى ما لقت لها بقعة مكان وقعدت عليها وهي تناظر البحر بحلاوة الروح وحزن القلب.. وكان شي من هوا البحر اللي ينقي الهوا الي بداخلها..

فاتن كملت: شي حلو ان الانسان يرتبط بقرينه بهالدنيا.. الانسان اللي يحسسه بالراحة والهدوء والفرحة والسعادة.. يمكن هالاشياء انا وانت يامساعد لقيناها في ايام من علاقتنا الغريبة.. لكن بعد.. كانت مساحتها قليلة لدرجة انها ما تقدر تدافع عن نفسها.. او يمكن نسيناها احنا بسهولة.. بينما.. جدامنا وعندنا اثنين.. يمكن يلاقون هالسعادة والراحة والهدوء مع بعضهم طول العمـر..

ناظرها مسـاعد وهو فرحان للشعور انها ما تراقبه.. ابتسم لخيالها اللي يلوح في عيـونه.. وتحقق اللي في باله.. مريم وجراح..

فاتن بهدوء والدمعة تسري بجفنها:.. شرايك لو نضحي بهالحزن عشان نخلق الفرحة في قلب اثنين عزيزين علينا وعلى عمرنا.. اثنين لو تضحيات العالم كلها تروح لهم ما توفي له قدرهم الحق..

ظل مساعد على صمته ينتظر فاتن تخلص. وهي تترجاااه بقلبه عشان ينطق بكلمة من هاللي يسري في قلبها..

فاتن وهي تلتفت له:.... وهالشي ما بصير الا اذا.... الا اذا.. امك رضت عليـك وعلينـا..
مساعد وهو يلتفت عنها مبعد الحزن عن ويهه :.. اذا امي رضت.. مريم ما راح ترضى بهالشي.. انتي ما تدري مريم شكثر قاعدة تحاول انها ترجعنا لبعض..
فاتن وهي توقف: وجراح المثـل.. لكن.. ما لازم يعرفون..
استغرب مساعد والتفت لها:.. شلون؟؟؟
فاتن وهي تتقرب منه ويلوح سما ويهها الصافي:.. ننفصـل.. وما يعرف عن انفصالنا الا اثنين غيرنا.. امي.. وامك..
مسـاعد من بعد كلمه انفصال انفرجت شفتيه على خفييف من اثر الصدمة العميـقة..: ننفصل.. يعني نطلق؟؟
احتبس النفس في صدر فاتن من الكلمة.. لكن ما اخرها هالشي عن اللي اهي بتسويه:.. ايه..

ظلت مجابلة مساعد وهي تناظر ويهه السمح وهو بالمثـل.. وكان اجراس الموت تقرع على راس الاثنين من شدة الصدمة.. لكن في نفس الوقت.. تبادرت مريم في ذهن مساعد بفستانها الابيض وقلبها الفرحان بزواااجها وقرانتها بحبيب تمسكت فيه من الصغر.. وفي بال فاتن تخيلت جراح ومريم في البيت وهم عايشين بينهم في اجواء الحب.. وجذي اخيـرا بيدخل عضو يديد في بيتهم يحمل الابتسامة لهم والفرحة والسعادة..

مسـاعد وهو يناظر فاتن بحنان: تمنيــتج انتي اللي بالفستان الابيض.. لكن.. مريم ما تقل اهمية عنج..
فاتن وهي تبتسم بمكابر الدمع بعيونها:. مو كل من تمنى حبيب له يكون بهالدنيا.. ولا كل الاماني باليد..
مساعد وهو يتقرب منها: بنفذ اللي تبينه مني وكلي طاعة.. اذا عطيـتني شي واحد بس..
فاتن وهي تناظر ويهه البعيد عن نظرها.. لطوله الفارع:.. شنووو؟؟؟
مسـاعد وهو يناظر ويهها بنظرة ابـتسامة:.. عزا الشعور.. وكلمة.. تجبرين فيها خاطري زمن كامل بدونج يا فاتن..
نزلت الدمعة من حجر عيون فاتن وهي تحس بالذبح في هذيج اللحظة:.. ماابي ارتكب غلطة يا مساعد ولا جنون..
مساعد وهو يمسـك يدينها بقوة:.. فاتن... غلطتج هذي وجنونج بيخليني اقبل الهوا اللي يعمر خفوقي كل لحظة من لحظات حياتي..

سكتت فاتن وهي تناظر عيون مساعد وتعجبت من الحب اللي تجمع في الكون.. فاارقت حبيب مرة.. وكاهي تفارق الحبيب للمرة الثانية. والصدفة ان الألم نفسه نفسه.. واللوعة نفسها نفسها.. ولكن في هذي اللحظة احد ينادي حبها ويطالبها بالاعتراف.. بشي يجبر خاطر احد.. فما كان منها الا انها تنهار..

حطت يدها على صدر مساعد وبالضبط عند قلبه:... عمري ما حبيت احد.. ولا عمر خفوقي ولا خاطري حب احد.. كثر حبك يا مسـاعد.. ولا عمري حسيت بالحياة والموت في نفس اللحظة الا معاك.. بفراقك ولقاك.. لحظتين من حياتي يا مساعد ادين بها لله سبحانه وتعالى.. وبتخليني اعيش حياتي معاك.. لحظتين مالي منال فيهم الا بللقا.. يتليه فراق..
مساعد وحاجبينه منكسرين من شدة الوطية:.. احبج فاتن..
فاتن وهي تنفجر بالكلمة: احبك مساعد..

طافت الريااااح بين الاثنين واخترقت الفجوة اللي بينهم.. فما كان من مساعد الا انه يضم زوجته الى صدره للمرة الاخيـره..يلتمس منها النفس اللي بيخليه يعيش الحياة كلها من دونها شرط انه يشوف الفرحة مرسومة على ويه احد ..اخته اقرب الناس له..

مساعد وهو رافع راسه وراس فاتن لازق برقبته: لكن وين لي العوض بعدج يا فاتن..
فاتن وهي تقبض قميص مساعد بلوعة:.. العوض.. في فرحة الناس..الناس القريبة لنا يا مسـاعد.

اي منحنى جالت بها قصة حبكم ايها العاشـقين.احقا هذا ما يجري بالعالم.. ان وسط دنيا الافراح يقبع الحزن.. تقوم افراح الناس على حزن شخصيـن؟؟

رفعت فاتن راسها عن صدر مسـاعد.. وتحركت عنه.. واختفى ذاك النبض المريح عن سمعها.. وجالت العبرة في خاطرها وخطت على مجرى دمع خديها.. اما مساعد فالتفت عنها وراح السيارة.. فتح الباب ولكن ظل واقف مكانه ينتظرها تدخل مرة ثانية.. التفت لها فحصلها مجابلها البحر وكانها تودع شي عزيز على قلبـها..

----------------

اتفق كل من مساعد فاتن بالدرب انهم يروحون المحكمة عشان اجراءات الطلاق.. ومسـاعدانتظر اليوم الثاني عشان يخبر امه باللي اهو يبيه منها.. وما قبل بلاء كجواب منها.. وحط في باله انها راح تذله او راح تطالبه باشياءلكن هالمرة اهو بينفذ اللي اهي تبيه منه..

فاتن لغرابة الوضع ارتسمت الحيوية في محياها.. وكان باللي يمكن يصير بين جراح ومريم يقدر يفرحها العمـر كله.. حتى ام جراح ظنت العكس .. ظنت ان فرح فاتن سببه يمكن صلح بينها وبين مسـاعد.. ولكن توجس خاطرها شر من الموضوع.. اذا تصالحوا فيما بينهم.. فليِش فاتن ما قاعدة تقول شي..؟؟

ويات اللحظة اللي ارتقبها كل من مساعدوفاتن.. انهم يجمتعون بامهم... ويخبرونهم باللي يصير بيناتهم.. وتنموا رضا الله عليهم في ذيج اللحظة..

كان مساعد قاعد في دار امه الي تصلي بخشوعها وسبحانيتها.. وهو منشغل في ألبوم صور لهم يوم كانو صغار.. شاف نفسه في الصور ولؤي ومريم بجمالها المرح ونورة بحلاااتها .. وابتسم وسط الوجع اللي يدق به قلبه كل لحظة..

لمن فرغت امه من الصلاة والتفتت له بابتسامة: حيا لله من ياني..
مساعد وهو يروح ويقعد عندها على الارض وهو ماد ريل وجافس الثانية.. : لله يحيج دنيا واخرة.. شلونها حلوة البيت؟
ام مساعد وهي تلمس خده: حلوة البيت مشتاقة لحلو البيت.. شخباره؟؟
مساعد وهو يجذب بالعلن:.. حلو البيت خايف يخبر حلوة البيت شي.. وتزعل عليه.. لكن اهو يبيها تفهمه زين.. وتفج له قلبها الكبـــير.. وتصير امه المتفهمة مرة ثانية..
ام مساعد وهي تغضن ملامحها:.. شلي صاير؟؟؟
مسـاعد:.. يمـة.. تذكرين سالفة جراح .. خطب مريم من فترة واحنا ردينا عليه الموافقـة.. لكن من بعد الحادث ما صار شي يطمن الصبي. وهو في حالة صعبة يا يمة ويبيي كمل نص دينه ويا مريم...
ام مساعد بعصبية: مستحيــل ياخذ بنت
مساعد وهو متوقع ردة فعل أمه لذا: يمة انا مو طالب منج الهداوة؟؟
ام مساعد وهي تقوم من مكانها: لا تحاول وياي حتى يامسـاعد انا مستحيل اقرب واحد من الياسية من بعد اللي سوته فيـك
قاطعها مساعد: يمة انا محد سوى فيني شي
ام مسـاعد وهي تذرع الغرفة: لا تحطني في هالموقف يا مساعد.. والبنت هذي شيلها اهي واهلها من راسك .. وخبر اخوها ان راينا تغير والبنت مخطوبة ولا اي شي ثاني..
مساعد وهو مو مصدق ردة فعل امه: يمة واللي يعافيج
ام مساعد وهي تطوي الأحرام: يمة انت اللي يعافيك لا تفتح لي هالجروح.. مو كفاية علي جرحك.. اروح اجرح بنتي الثانية بعماااي.. كل اللي يصيبح لانك ما سمعت كلامي يوم..
مسـاعد: يمة انا خلاص بطلق فاتن..

وسكتت االأم وحلجها مفتـوح.. وكأنها مو مصدقة اللي قاله ولدها في لحـظات..

ام مساعد: بطلقها؟؟؟؟؟؟
مسـاعد وهو مختنق بالكلمة:.. اي.. بطلـقها.. بريحج من اللي يصيبج.. وبطلـقها.. وانا ما بطلقها الا عشان سبب واحد.. انج ترضين عليها.. وتقبلين في خوها اللي ماله ذنب في كل اللي يصير..
ام مسـاعد وويه فاتن يتراود في عيونها الي تحاول انه تبعده لكن كل ما تحاول يظل اكثر اهو وبصفاءه: .. تطلق انت؟؟ عشان اخوها ياخذ اختك... وين صارت هذي..
مسـاعد وهو يتقرب من أمه بهدوء.. ومستـغل شلل لسانها عن الكلام عشان اهو يفـج لها الموضوع بأسهاب: .. يمة.. انتي مثل ما قلتي.. لانج ما رضتي علي ولا على قراري.. انا صابني بزوواجي من فاتن اللي توقعتيه.. وانا تعلمت درس من كلامج.. لكن مريم يا يمة.. مملوكة في قلب هالصبي.. وبيني وبينج.. مريم بعد ما تحتاج بهالدنيا لريال غير جراح (توها بتقطعه امه) وانتي ادرى بهالشي.. وعشان تفهمين اكثر.. الاثنين يودون بعض.. على عكسي يوم اخذ فاتن.. البنت كانت طالعة من عزا ابوها والجو ولا الحالة كانت تسمح بالزواج.. (وعشان يلينها) ومثل ما قلتي يالغالية.. انتي ما رضيتي عنها..

سكتت االام وهي تراقب الأرض باستغراب.. اول مرة تصير في حياتها.. زواج ما يتحقق الا بطلاق..واللي غربها زود.. انها بدت تمشي مع الفكرة..

مسـاعد: انا وفاتن يا يمة ما نقدر نعيش مع بعض واحنا تأكدنا من هالشي لانج مو راضيه علينا ولا اظنج راح ترضين بسبب اشياء صارت ما بنذكرها.. لكن جراح ومريم يا يمة مالهم ذنب.. الاثنين وادين بعض وقلوبهم متبادلة.. فمن احنا يا يمة اللي نفرق بينهم وربج اللي يريد وصـلهم.. ؟؟؟
ام مساعد:.. بس... اختك ما بترضى.. ما تدري اهي شكثر مينونة في مرتك..
على كثر ما حرقت قلبه كلمه مرتك.. الا انه خفف من حدتها على سمعه:... بس اهي ما راح تدري.. الا بعد الزواج ان شاء الله.. بعد موافقتج يعني..
الام وهي عاقدة حاجبينها: شلون ما راح تدري..
مسـاعد وهو يبعد ويهه عن امه ويذكر دفا فاتن قبل ليلة.. يوم كانت ملكه في ذيج اللحظة : اهي راح تكلم امها بهالموضوع.. وانا راح اكلمج.. ودام الطرفين راضيين.. باجر ان شاء الله ولا اي يوم ثاني نروح نكمل الأوراق ونطلق.. لكن هالشي بيظل سر بيني وبينج وبينها وبين امها.. ما لازم لا مريم ولاجراح يدرون بهالموضوع.. لمن تبرد وفاة الصبي ولد النهيدي.. بعدين يصير خير..

سكتت الأم وهي شبه الزايغة على الموضوع.. شلون تطلق ولدها من صوب وتزوج بنتها من صوب ثاني.. لكن مجرد طروة بال فاتن واللي صاب مشعل والذكريات المرة تخليها تواافق بدل المرة الف مرة..

ام مساعد:.. بس شوف.. اذا اختك بتتزوج ولدهم.. فهو على شروطي..
مساعد وهو يلتفت لها: من حقج يا يمة تشرطين لبنتج.. بس انا ما توقعج تشرطين الا بسعادة وهنا بنتج..

سكتت الام وهي تراقب عيون ولدها اللي لسبب غريب حست ان الحياة انسلبت منها..

طالعت اتجاه ثاني:.. حدد اليوم اللي بتروح فيه المحكمة.. وانا بروح ويـاك..
مساعد وهو مستغرب من قلب امه اللي يفضل جرحه على انها تلم الكل في اطار واحد.. لكن اذا اهو صدق بشي فهو انه وفاتن حياتهم مستحيلة مع بعض لفرووق الله يعلم بها: ان شاء الله.. اخليج انا الحيـن
نادته امه قبل لا تطلع.. ووقف لها عند الباب وتقربت منه:. ادري.. ان الاحزان جايشة بقلبك.. وادري انك عتبان على زمانك من اللي يصير.. لكن يا وليدي..
مساعد وهو يسكت امه: ادري يا يمة ادري.. اللي يصيبني لمصلحتي.. لكن ..(وهو يسحب نفسه) مادري ليش احس اني خسرت الحياة هالمرة.. قبل يوم ماتت عايشة.. خسرت النفس.. الحين خسرت الحياة.. شيعني هالكلام يمة؟؟؟

طول النظرة بعيون امه .. اللي تغرقت جفونها بالدمع من شدة صدمه كلامه.. لكنه انسحب من عندها واهي ظلت تصيح شوي لكنها مسحت دمعها بكبر..

ام مساعد:... مهما كان كلامك.. وجود هالبنت في حياتك اكبر غلط.. اكبر غلـط.. عساني بس ما اطيح اختك في نفس الغلـط..

-------------------------

على العصر طلعت مناير بمشوارها المعتاد ويا مريم.. لكن اللي ما كانو يعرفونه انا ليوم اهووو موعد تنزيل الكتاب اللي نشرته مريم بكل محبة وامل انه راح يكون الشرارة اللي بتولع المحبة بين مساعد وفاتن مرة ثانية .. لكن اللي خافي عنها واهي منشغلة في غيره متخبي لها تحت البساط يرفض كشف نفسه لها ..

فوسط التحضـيرات والتوصيلات للحمولات في المكاتب كانت تتناقز ويا مناير فرحة على انجازهم.. وحملت جم نسخة معاها البيت ونسـخة خاصة لفاتن عشان تقراها براحته.. واهي النسخة اللي طبعوا اوراقها بخط يد مسـاعد.. مع ان كل القصايد مطبوعة بحركة ان الخط اهو خط مسـاعد لكن لفاتن كانت اهي الصفحات الأصليـة اللي سرقتها من دفتر مساعد في وقت ثاني غير اللي جكها فيه.. هدية بسيطة منهها الى صديـقة المسـتقبل..

الله اعلم اي نوع من الصدمات راح تتلقيـنها يا فاتن في هذا الكتاب.. وانتي اللي تحضرين لطلاقج من حبيب قلبج الأوحد.؟؟؟

في بيت ام جراح كانت فاتن قاعدة فيا لحديقة وهي تراقب سماء اللي تزرق الزرع بمحبة وحنان.. صج ان وفاة مشعل اللي طاف عليها الأسبوع هدأت منها وايد.. وخلتها اشبه بالراكدة لكن بعد فاتن عندها امل ان علاج سماء راح يكون في سفرتهم للعمـرة.. ويمكن العلاج لها اهي بعد..

فاتن وهي تكلم سماء بمرح: سموي شنو اول شي بتسوينه اذا رحنا العمـرة؟
سماء وهي تلتفت لفاتن بابتسامة واسعة :بلم بيت الله..
فاتن وهي منصدمة: ههههههههههههههه.. ما بتقدرين..
سماء باستغراب: ليش زين؟
فاتن: بعد.. بيت الله مكان مو هين.. كل المسلمين من اطراف العالم تزوره.. لكن اكيد بتصير لج الفرصة انج تتقربين منه لمن تلاقين الجحر الأسود؟
سماء: اي حجر اسود؟؟؟
فاتن بابتسامة: الحجر الاسود اهو اللي حطاه النبي صلى الله عليه واله وصحبه في الكعبة..
سماء وهي منصدمة: يعني رسول الله لمسه؟
فاتن بابتسامة غير مصدقة:اي لمسة
سماء : يعني نا بعدبلمسه؟؟ اللي لمسه الرسول؟؟

هزت راسها فاتن بحماس وسماء ينت مكانها وهي مو مصدقة وصرخت على اللي في البيت وخصوصا جراح

سماء: جرااااااااااااااااااح عيل في السفر ابي المس الحجر الاسووود

وراحت عن فاتن اللي ظلت قاعدة عند النافورة وهي تضحك بخفة على صدمة سمـاء.. مشاء الله.. جو بيـتهم يغيـر الناس الى الأفضل..

فاتن: الحمد لله على هالبيت..
ام جراح وهي تقعد يم بنتها الي ما حست بقدومها:... شفيه هالبيت؟؟
التفتت فاتن الى امها بهدوء وكانها كانت متوقعتها:.. بيت الخير والرحمة.. وين ما يلقى الانسان لمسة الله الشافية فيه وفي أهله.
ام جراح: مادري عن هالشي.. خصوصا فيـج؟
فاتن وهي تصحح لامه: خصوصا اناااا.. (وتذكرت اللي تبي تقوله لامها). يمة.. انا ابي اخبرج بشي.. بس ابيج تطلعين رباطة جأشج.. لاني محتاجة الى اكبر تشجيـع واكبر قدر من الهدوء عشان اكمل..
ام جراح وهي شبه العارفة اللي يمكن تقوله بنتها.. لان هدوئها اليوم كان مقارب لهدوء ما قبل العاصفة: يا يمـة.. انا ما بسوي فيج شي.. وان حزنت عليج بخفي احزاني في قلبي محل ما دفنت معظمها.. قوليلي يا يمة وريحي قلبج..
فاتن وهي تلم يد امها في حجرها... وبدت دموعها تدغدغ جفونها بنعومة:.. يمة انا ... بسوي اللي بين جراح ومريم.. وبربطهم مع بعض.. شرط ان... اني انفصـل عن مساعد..

ام جراح وهي تذرف دمعة ساخنة وتبعد عيونها عن بنتها

فاتن وهي تكمل وتمسح دمعة سرت من عيونها:... يمة لا تحزنين.. بالعكس.. ابيج تفرحين .. لاني اخيرا برتاح وبريح مساعد معاي.. احنا يا يمة مانصلح لبعض.. من اول شي.. لاني يوم اخذه كنت في ظن ان قلبي مملوك لاحد ثاني.. والحين ..
ام جراح: يا يمة الريال ما يحبج الا انتي
فاتن وهي تهدي امها: يمة ادري.. ادري اهو ما يحبنيالا انا.. بس... بعض الكسور يا يمة... والجروح.. على التئامها الا انها تبقي اثر.. واثر قبيـح.. وبعض الكسور تنجبر وبعضها تترك ألم .. وانا اللي بيني وبين مساعد يا يمة اثر وكسر قبيـحين.. يقيحون القلب آلام.. وما لها اي علاج الا انها.. تنتهي...
ام جراح وهي تمسح دمعها: يا يمة وين صارت هذي.. اللي بطلاقج انتي اخوج يقدر يلاقي البنت؟؟؟؟ لا انا برضاها ولا اخوج ولا حتى مريم..
فاتن: يا يمة ما لازم احد يدريبهالموضوع وانا يايه مخبرتج انتي بدل لا انتي تعرفينه وانا اكتم الآه في قلبي.. يا يمة.. انا يايتج.. اطلب عزاااج فيني... لاني يا يمة بموت وانا على هالدنيا.. بموت وياليت بس يرتاح العالم اللي انا فيه.. وتهدى الونات والآلام..
مسكت ام جراح ويه بنتها بيدينها: شذنبج انتي بهالدنيا؟؟ وانا اللي تمنيتج عروس من اول ما طلعتي مني.... شفتج اجمل حلم لحد لحظة موت ابوج؟؟ ليش يا فاتن؟؟ ليش كان لازم افقد ابوج وافقدج انتي بعد..
فاتن وهي تحط راسها على صدر امها تطلب الشفقة فيها: يمة .. لميني لج يا يمة.. لميـني لج وخليني قربج.. سليني بحنانج يا يمة.. انتي تسليتي فينا يوم توفى ابوي.. انا فقدت ابوي.. وفقدت زوجي.. سليني يا يمة.. سليـني..

ظلت فاتن في حظن امها واهي تبجي.. واللي ما كانت تعرفه فاتن ان سماء كانت واقفة عند باب الحديقة وهي تناظر فاتن وسمعت ثلاثة ارباع الكلام.. لكن الي فهمته ان الموضوع سري ولا زم محد يتكلم فيه.. ولا حتى اهي لازم تبين معرفتها بالموضوع لفاتن بعد.. لان هاي هي رغبة فاتن بالأساس..


ودخلت مناير البيت بفوظتها ويا مريم وهم يعمووون الصريخ في المكان .. اخيرا يقدرون يبوحون بالسر اللي خلجهم طول هالفترة.. وفاتن اللي هدت شوي من الصياح ويا امها طلعوا من الحديقة وهو مستغربين الفوضى.. فاتن اول ما شافت مريم التفتت على عقبها تمسـح الدمع زين من ويهها.. وراحت عند لنافورة تغسـل ويهها .. واول ما طلعت من الحديقة لقت سماء على شمـال الباب مستندة على لطوف.. وشي علا محياها يبين حزن عميـق فيها.. ستغربت فاتن وشكت.. هل يمكن سمعت شي سماء؟؟؟

فاتن وهي تغير الموضوع: علامها مناير تصارخ
سماء : هااا.. مادري شفيها.. اكيد خبال من خبالها... عن اذنج..

وراحت سماء عن ناظر فاتن الى غرفتها.. ويوم طلعت بالصالة لقت الجمع هادئ وساكن.. وكأنهم ما يبون يخبرونها باللي يصير

فاتن وهي تتكلم: شصاير كل هالزعيج
مناير وهي تناظر مريم :لا ولاشي.. س المنتخب فاز في المباراة ما دريتوا؟؟
فاتن وهي تكلم امها: منتخب؟؟ شمنتخبه؟؟؟ على من زين؟
مريم: على منتخب الامارات.. خوش خبر صح؟؟
فاتن: والله مالي سالفة بالكورة انا.. عن اذنكم بروح ارتاح لي شوي
مريم : اصعد ويـاج؟؟
فاتن بابتسامة: حياااااااااج قلبي..
مريم: اسفة بضطر اني اخليج.. بروح البيت لا تقصبني امي..
فاتن وهي تتكلم من غيرتها:.. اكيد.. الحين بعد معظم وقتج ويا مناير.. وين لج في فاتن.. الله يرحم ايامج يا فاتن..
مريم وهي تضحك بقوة من كلام فاتن: آآآآآآآآآآآآخ ياقلبي من هالكلاااام.. لا ماقدر ماقدر.. اانا جذي اسيح.. يا فاتن الانسان يتزوج مرة وحدة ويحب مرة وحدة ويموت ويعيش مرة وحدة يكون له صديق عزيز وااااحد بهالدنيا.. مناير الا تقزيرة..
مناير وهي توقف بالصالة ومتخصرة: لا واللللللللللله؟ اشوف طالت وتشمـخت
مريم وفاتن : ههههههههههههههههههههههههه هههههههههههههه يا داخل ما بين البصل وقشـره.. مالك الا الخـياس.. ههههههههههههههههههههههههه ههههههه

مناير وهي تهز امها: يمه شوفي هالثنتين شقاعدين يقولون الحين انا تقزيرة

ما تكلمت ام جراح ولاذت بالصمت الحزين وهي تراقب احتضارات فاتن وتضحياتها.. قلبج كبيـر يايمة.. كبير ومايسع هالدنيا من كبره.. تضحين بفرحتج لفرحة اخوج ورفيـجتج.. كل هالطيبة اللي فيج وما تلاقين الخيـر لج؟؟؟ ليش يا بنتي ليش؟؟ اللهم لا اعتراض.. بس اللي اتمناه يا يمة.. اهو السلام.. لان ابواب السعادة تقفلت عليـج يا يـمة..
.
.
(( تابعوااااااااااااااا الحلقه الاخيره )) :ttmasha: :ttmasha:

الجزء [50] والأخير من قصة نظرة حب
اتفقت فاتن ويا مساعد ان في بعد يوم بيروحون المحكـمة.. وما خبروا احد بهالسالفة الا بين الاربعة.. وسماء اللي عرفت بحكم الصدفة.. ولكنها ما تكلمت لكن الحزن ملكها بقـوة.. وبالليلة الي سبقت الانفصـال.. قعدت فاتن بدارها وهي تحس بدقات قلبها الضاغطة على صدرها بقـوه.. ولمن حست ان اللي فيها ماله اي علاج راحت لدارها وجمعت كل شي ربطها في مساعد.. الطقم والرسالة اللي تركها في غرفتها يوم رجع البحرين بهذاك الصبح صور لهم مع بعض واشياء ثانية.. لمتها كلها وحطتها في نوع من البوكس.. وعشان تصور وضعها راحت الحديقة وحفرت في الأرض... لمن خاست ولاثت ثيابها منالتراب.. حطت الصندوق من بعد ما تصفحت كل شي فيه تحت الأرض وغطته بالتراب.. كانها تدفن نفسـها وتدفن ماضي اهي قضته في اكثر الذكريات الما وحلاوة في نفس الوقت على قلبها..

الى ان ابـلج الصبح.. ومسـاعد ما غفى له جفـن.. قدم على اجازة من امس.. وهو يظن انه محتاج الى الابتعاد عن هالمنطقة نهائيا ولاطول مدة ممكنة.. يروح مكان يغسـلون له دماغه من ذكريات فاتن اللي تجول في باله مثل الروح الهائمة.. ظل طول الليل وهو يناظر السمـاء ينتظر من الليل انه مايبعد استاره.. صلى بهذيج الليلة بكل ما فيه من جوارح ان الله يخفف عليه الهم والحزن.. ويفرج كربته وكربة فاتن.. ويلاقي لهم المعجزة اللي تردهم لبعض.. الشي اللي يمكن فاتن ما فكرت فيه ولا لحظة لانها تعرف الموضوع عقم وغير سهل الحصـول عليه.. الا ان الوقت ما مر والصبح يطل عليهم بشمـسه الطاهرة.. لبس مساعد ثيابه من وقت مبجر.. ولان موعدهم كان في الساعة 10 ظل قاعد مكانه وهو ينتظر الوقت يمر..

حتى ام مساعد ما قدرت ترقد وظلت عينها ساهدة عن النوم وافكارها تاخذها يمين ويسـار.. وام جراح بالمثـل وحتى سماء.. اللي فكرت ان صمتها خيار تقدر تغيره الى الكلام.. وان عرفت مريم ما راح تخلي فاتن وحتى جراح نفسه..

سماء وهي تحس بالضياع في ذيج اللحظة .. وتمنت لو ان مشعل كان موجود عشان يهديها..

بدمعتها الحارة: ياليتك موجود يا مشـعل.. عشان تهدي بالي وتخبرني باللي يمكن اقدر اسويه.. لاني ان سكت بكون مشتركة في هالحديعة.. وان تكلمت يمكن اجمد الوضع للأبد بحاله هذا.. وما اقدر اصبر على الوضعين.. ماقدر..

وراحت سماء الى مناير.. لان ماكو احد غيرها يمكن يعطيها الراي.. لان مناير تملك اللي يملكه مشعل في سماء.. الا وهو القرب العاطفي.. وصار بالصدفة انها تلاقت ويا خالد في هذيج الصبحية .. وحست بالهدوء يوم لاقته..

خالد وهو واقف بعيد عنها: صباح الورد..
سماء وهي تبتسم له: صباح الخيـر..
خالد وهو مستغرب: مو جنه الوقت مبجر على صحوج؟؟ ما رقدتي زين؟
سماء وهي تفرك اصابعها؟: لا.. ما رقدت زين.. ولا اظن ان اكو جفن يغمض لي بهاللحظة..
خالد وهو مستغرب تجدم من سماء: شي صاير سماء ؟؟
سماء وهي متوترة: مادري يا خالد.. ضايعة. قلت اروح لمناير تخبرني..
خالد: روحي لها زين.. وانا بعد بيي وياااج..
سماء: اوكي عيل..

راحت سماء ويا خالد لغرفة مناير اللي كانت غاطة في سابع نوووومه وطرق الباب عليها خلاها توتعي وتحمل وياها الشال لانها سمعت حس خالد.. وبويهه عكر من الصبح جابلتهم

مناير: مابدت المدارس على حد علمي..
سماء دخلت الغرفة: المدارس ما بدت لكن شي عوود قاعد يصير منووور؟؟
مناير تطالع الساعة لقتها ثمان الصبح: شي قاعد يصير بهللحظة ادري.. الرقااااااااد.. ان جان ما تعرفونه وانا احتاااجه وايد.. لذا طلعوا بره.. ابي انام..
خالد بجدية: منووور فهمي السالفة زين.. الموضوع ما يستحمل اي تاخير..
مناير وهي تتثاوب: والله مالي بااارض.
سماء انفجرت من قلة اهتمام مناير: فاتن بتتطلق اليوم من مساعد لو ماتدرين يعني

بالفعل.. الشي صدم كل من مناير وخالد .. اللي وقفوا وهو باهتين

خالد بغير تصديق: انتي شقاعدة تقولين..
سماء وهي تناظره بحيرة: سمعتها هذاك اليوم تتكلم ويا خالتي.. عند النافورة.. وكانت تبجي.. ومادري لكن متى الموعد..
مناير وهي تهمس لروحها : ما يصير.. مو الحين وقته... مو وقته هالطلاق.. زين مادريتي ليش ؟
سماء: عشان جراح ومريم يقدرون يلاقون بعض.. وعشان ان فاتن ومساعد بينهم مشاكل ما يقدرون يبارونها..
خالد ووهو يضرب يدينه مع بعض: كنت اعرف انه مسوي فيها شي.. لكن هالدرجة.. والله لا كسر ويهه
مناير وهي تسكت خالد: انت ما عندك سالفة؟؟ اهو شمسوي لها خانت حيلي.. مو جن اهو اللي طايح بغيبوبة ثمانية شهور عشان يطلع منها معاق.. الكلام هذا مو وقته الحين.. لازم نعرف ان الطلاق صار ولا لاء..
سماء: ماظن.. انا سمعت فاتن تتكلم امس ويا خالتي.. واكيد هالشي ما صار للحين..
مناير: او يمكن اليوم؟
خالد: او بهاللحظة.
سماء: لازم نوقف هالشي.. لازم
خالد: بس احنا شبيدنا يا سماء.. أذا انتي تقولين انهم مو مرتاحين بحياتهم؟؟
مناير: لازم نوقفهم لان... مساعد يحب فاتن.. وفاتن المثل.. واللي بينهم شي عميق.. اعمق من الدنيا كلها..
خالد: هذا كله كلام يا مناير.. لكن الفعل وينه؟ وين نقدر نوفج بيناتهم ؟؟ ماكو شي..
مناير: بلى.. اكو الشي اللي بيسوي فيهم كل اللي نتمناااه..
خالد باستغراب: وينه هالشي؟؟ او شنو اهوو..

تجاهلت مناير كل تحذيرات مريم لها بخصوص هالموضوع وراحت وسحبت الكتاب الصغير من تحت مخدتها وين ما كانت مخبيته لانها كانت تقرى فيه وعطته خالد..

خالد باستغراب: شهالكتاب؟؟؟
مناير وهي تناظر سماء وخالد: هذي اشعار مساعد كاتبها لفاتن .. احنا اخذناها وطبعناها.. عشان نبين لفاتن ان مساعد يحبها ويموت فيها..
خالد وهو مو فاهم شي: ترى انا مو فاهم ولا شي
سماء: حتى انا.. مناير ليش هالكتاب اهو بيكون الحل للي يصير بين الاثنين..

شرحت مناير لخالد وسماء وضعية حب مساعد وفاتن وشلون ان عالية تدخل بيناتهم.وسماء بينت ضايعة اصلا لانها ما تعرف من اهي عالية لكن من ملامح خالد المتعجبة حست ان هالشخصية شي عود وكبيـر في بيت بو جراح الله يرحمه..

خالد وهو يقعد على الكرسي: ماصدق.. كل هذا يصير في بيتنا واحنا ما ندري فيه؟؟
مناير: انا بعد ما كنت ادري فيه ودريت يوم فاتن عرفت الموضوع..
خالد: بس هذا مو سبب يخلي اثنين يتفارقون .. من بعد ما شفت الحب في عيون فاتن لمسـاعد.. عرفت انه اهو المرسوم لها..
سمـاء: اذا جذي السالفة فليش بيتطلقون؟؟
مناير: ام مساعد غضبانه عليه في فاتن وماراح تقبل في جراح لمريم ابدا.. وفاتن مشاكلها كثيرة ويا مساعد واولها هروبها وفرقتهم لمدة 8 شهور .. كل هالامور تصعب الحياة على اثنين..
خالد: بس مو لازم يتطلقون.. وينه جراح؟؟ خلونا نخبره
مناير: لا تستعيل خالد.. الناس توها صبـح وما نبي نسوي فوظى..

وصوت باب ينفتح بصريره يسمعونه الثلاثة في دار مناير فيلتزمون بالسـكوت.. انتظروا وقع اقدام ولقوها.. وكان احد ينزل من الدري.. طل خالد براسه فلقاها فاتن لابسـة عبايتها وشيـلتها على راسـها متوجهةتحت..

خالد بهمس: هذي فاتن نازلة... بروح وراها لا احد يلحقني..

هزت الثنتين روسهم وراح خالد ورى فاتن يتجسس عليـها.. لقاها واقفة عند دار امها تطرق الباب وكلها ثواني وام جراح تفجه.. وفاتن تدخل داخل.. وويتسكر الباب..

راح خالد على طول عندالباب يحاول انه يتسمع لشي ينقال بين الثنتين وكل اللي قدريسمعه اهو استفسار من ام جراح

ام جراح: الحين يا يمة؟
فاتن: دز لي مساعد رسالة يخبرني عشان نتزهب..
ام جراح: ان شاء الله يمة دقايق وانا جاهزة..

هذا اللي قدر يسمعه خالدلكن ما قدر يتبين هالطلعة لويـن؟؟ يمكن للمحكمة عشان يبتون الطلاق..

راح على طول فوق يلحق على البنتين.. وفجت الباب سماء بلهفة: ها خالد؟؟ علمني شصاير؟؟ شسمعت؟
خالد: الظاهر ان الطلاق اليوم...
مناير بصدمة: بهالـــسرعة؟؟ وي تعال لازم نخبر مريم..
خالد: ولازم نخبر جراح بعد..
سماء: لكن شنو بتكون رده فعلهم..؟؟؟


ظلوا الثلاثة واقفين بشكل مثلث وهم مو عارفين شلي يمكن يصير.. يمكن جراح وما مريم ما يعترضون فمهما صار هذي رغبـة اثنين احرار.. لكن مستحيل اثنين يحبون بعض جذي مايقدرون يبحثون عن المسامحة والغفران في قلوبهم.. شالحل يا رب.. شالحل؟؟؟

لبست ام جراح وتمت فاتن وياها بالدار وهي تكبت ارتجافات في نفسها.. شعور عظيم اهو شعور الطلاق.. وكأنها متوجهة الى حكم الاعدام.. اللهم انها بتعيـش.. ما بتموت.. لكن اي حياة اهي من بعدك يا مساعد.. اي حياة اهي اللي بتعيشها فاتن واهي مو لك ولا تقرب لك باي شي.. ويكون لقبها في العالم طليـقتك..

مناير بعد مرور ساعة في غرفتها واهم ساكتين وحالتهم حالة من التفكير العميـق:.. اوووووووووف انا ماقدر صراحة.. لازم ما نتأخر في ردة الفعل.. لكن شنسوي في هالصبحية..
خالد وهو يطالع الساعة: الساعة الحين تسع الا ربع.. ومريم اكيد راقدة
مناير: لازم اتصل فيها... يا خالد هالوضع ما يتحمل اي مراعاة..
سماء: وجراح؟؟
خالد: جراح اهني.. لكن هذا مو وقته.. لازم جراح يقعد في اللحظة المناسبة اللي بتوصل مريم فيها..
مناير: عيل خلوني اتصل في مريم واتأكد منها..
خالد: اوكي جربي حظج (وهو يعطيها التلفون) شوفيها..

سحبت مناير التلفون وقعدت على السرير ويا سماء ودقت رقم مريم اللي حفظته... وتم يرن يرن ويرن.. لمن شالته مريم بصوته المثقل بالنوم..

مريم: الوووو؟؟
مناير: الو .. مريم.. هذي انا مناير!!
مريم وهي مستغربة اتصال مناير: منووور علامج متصلة.. (ترفع التلفون عن اذنها وهي تراقب الوقـت..) توها ثمان
مناير: الحين تسع الا خمس .. مريوم قومي بسرعة فزي من مكانج جوفي اخوج طلع من البيت؟؟
مريم وهي بعدها بنوم: اي واحد فيـهم؟
مناير: مساعد اكيد ..
مريم وهي ترفع راسها وكانها بدت تصحى: منووووور من الافضل لج ان هالموضوع يكون مهمم
مناير وهي تطالع خالد وسماء: صدقيني.. الموضوع حد امه مهم..

قامت مريم من السرير وهي طالعة من الغرفة.. توها بتنزل من الدري الا صوت في غرفة امها وابوها.. وكان صوت امها ويا مسـاعد وكانه يستعيلها..

مريم دخلت دارها وسكرت الباب: الوو منوور؟؟
مناير: ها طلع؟؟؟
مريم: لا اهو في دار امي... (صحت مريم اكثر واكثر) شصاير مناير؟؟
مناير وهي تطالع خالد وسماء: مريم تعالي البيت بســرعة السالفة ما تنقال في التلفون..
مريم وقلبها متوجس من الخوف: منوووور تكلمي الحي لا كفخج؟؟
مناير: مريوم تعالي البيت السالفة ما تنقال بالتلفون يالله بسرعة
مريم : يالله عطيني دقايق وانا بيييج.. يالله باي
مناير: بايات..

سكرت مناير عن مريم اللي راحت وغسلت ويهها بالحمام بسرعة وكانها تشطف ويهها.. وطلعت من الغرفة وهي ترمي الفوطة على السرير. .لست عباتها بسرعة وسحبت ميداليه المفاتيح وطلعت من غرفتها.. وتوها بتطلع من الدري الا لؤي طالع من الحمام وشكله معفوس من الرقاد..

لؤي: هوي هوي هوي.. على وين من صباح الله
مريم وهي تتقرب من لؤي: مادري بس سالفة جايدة قاعدة تصيـر..
لؤي وهو يصحصح: تخص من؟؟
مريم: قالت لي مناير ان مساعد فيها.. واذا مساعد في السالفة اكيد فاتن بعد..
لؤي وهو يحك راسه: عيل انا مالي سالفة بروح انام
مريم وهي تطلع من البيت: الله يستـر بس..

طلعت مريم من البيت وفي اللحظة اللي تحركت فيها من السيارة دخل مساعد غرفتها من بعد ما قعد يدق الباب ولا يلقى اجابة.. ولسبب او ثاني حس انها مو موجودة...

يوم دخل الغرفة شاف السرير فاضي طل على الحمام لقى الباب مفتوح وماكو صوت.. دخل اكثر وطل فيه من بعد ما طرق الباب.. ما كان احد موجود هناك ..وتوها بيطلع من الغرفة الا يلتفت حق كتيـب.. راح لعنده وقراه..

(مابــعد الحب)

وقعد يتصفح في الأوراق ولقى العجب .. خطه في الصفحات المطبوع في صفحات ناعمة.. وتم يقرى وهو يحس بالغرابة.. هذي هي اشعاره اللي كان يوجهها لعالية بغياب فاتن... وكلها موجهة غير مباشرة لفاتن ...

قعد على السرير وهو في حالة غريبة وعجيبة.. فدخلت عليه ام مساعد..

ام مساعد: علامك يمة؟؟؟ وينها اختك....

ما لقت اي جواب عند مساعد.. فتقربت منه وطالعت اللي يقراه في يد وشكله المبهت..

ام مساعد:... شنو هذا اللي في يـدك..؟؟؟
مسـاعد وهو يطالع جدامه وشعور غامربالأمل يدخل فيه:... المعجــزة..

---------
وصلت مريم بيت ام جراح بسرعة.. ولقت مناير واقفة على الباب وكأنها تنتظرها.. وطلعت مريم من السيارة ودخلت البيت..

مريم وهي تمسك يد مناير: مريوم شالسالفة وقعتي قلبي..
مناير : اووش.. دخلي بسرعة لا تسمـع لج فاتن..
مريم: يعني فاتن بعد في السالفة؟

سحبت مناير يد مريم الى داخل البيت.. ومن البيت الى فوق الدري والى غرفة مريم وين ما كانت سماء بس اللي قاعدة.

مريم وهي تقعد على السرير: انزين الحين انا صج صج صج متوترة شالسالفة اللي ما قدرت تنتظر بهالصبـح؟
مناير تفجر اللي فيها: مساعد وفاتن بيطلقون بعد شوي؟؟؟
مريم وهي منصعقة بصوت عالي: شنوووووووووو؟؟؟
مناير: اووووووووووووش. سكتي .. بتفظحينا انتي؟؟
مريم وهي مصعوقة: شنو؟؟ وانتو شدراكم؟؟
سماء بخوف: انا سمعتها امس تتكلم ويا خالتي...
مريم وهي متوترة وترتجف: ليش زين؟؟؟؟

سكتت كل من مناير وسماء وهم يطالعون بعض.. وكانهم ما يقدرون يخبرونها..

مريم وقفت وراحت لمناير:تكلمي منووور شالسالفة؟؟؟
مناير وهي تسحب مريم لعند الزاوية:.. مريم.. فاتن بتطلق من مساعد.. عشان انتي وجراح تقدرون تتزوجون.. لان بوجود فاتن امج ما راح ترضى في هالامر.. ومسـاعد نوعا ما ساوى بين هالشي والشي الثاني

يا للهول والمصيبة على راس مريم.. اللي مسكت جبينها وقعدت على السرير بعنف...

مناير وهي تتقرب من مريم:مريم علامج؟؟
مريم وهي تذرف دمعه ساخنة وهمس قاتل: باي حق؟؟؟؟؟؟؟؟؟؟؟
مناير وهي متعاطفة ويا مريم: انا بعد منصدمة.. يعني بعد كل هالتعب.. وكل هالمحاولات.. صار كل شي عقيـم وماله فايـدة..
مريم وهي تبجي: باي حق... باي حق.....(التفتت الى مناير) وينه جراح؟؟؟

في الوقت نفسه خالد كان ويا جراح يخبره عن الموضوع

جراح بنقزة من فوق السرير:.. شنووووووو؟؟؟؟ شهالحجي؟؟؟ شهالخرابيط؟؟ انت من صجك؟؟
خالد: ياجراح انا بروحي اخس منك.. انا توني ادري بهالموضوع..
جراح وهو معصب لدرجة ان عروقه بدت واضحة على جبينه:.. شهالخرابيط؟؟ وشهالحركات اللي ما تصير.. شناويين علينا انتو؟؟ ناوييين علينا بالفظيـحة؟؟ وينها فاتن؟؟؟
خالد: هدي بالك يا جراااح..
جراح وهو ينفظ يد خالد: روووح عني انت.

طلع من الغرفة وفي نفس الوقت انفج باب غرفة مناير ومريم اللي كانت طالعة.. وقف جراح يناظرها بنفس الصدمة اللي اهي فيها وبعدين طلع من على الدري متوجه لغرفة امه اللي كانت فاتن توها طالعة منها...

جراح: فاتن.. فاتن؟؟
انتبهت له فاتن وهي مستغربة صحوة جراح وبتوتر: علامك جراح؟؟؟
جراح: انتي ما تخبريني انتي وين عقلج؟؟ انتي لمتى بتمشين كلشي على كيـفج؟؟ ومن سمح لج تسوين اللي تسوينه بكيــفج؟؟؟ مالج ولي امر مالج ولي نعمة
فاتن في موقع شديد الحساسية حست انها بتنسحق على يد جراح اللي كان موجة من الغضب:جراح هدي اعصابك..
مسكها جراح ولفها داخل الصالة برمية قوية: من طلب منج تروحين تساومين علي. شنو انا ما سد عينج؟؟ مو ريال كفاية بعيووونج؟؟ تروحين تساومين علي بطلاقج؟؟ انتي مينونة ولا صاحية
ام جراح اللي طلعت من الغرفة على صريخ ولدها ومريم اللي نزلت من الدري:.. يمة خل اختك..
جراح يلتفت لامه: وانتي وياها بعد بهالموضوع؟؟؟ انتو علامكم. .ينيتوووا؟؟ ينيتوا وقعدتوا مكانكم..
فاتن وهي تبجي بقوة: جراح واللي يســلمك
جراح ودموعه فضحوا مشاعره: من سمح لج يا فاتن... ماسد عينج؟؟ مو ريال انا؟؟ تروحين تساومين علي؟؟؟؟ عيب علييييييج.. ما تسد عينج هاللحية تروحين تساومين علي.. وان رفضوووني اهل مريم .. ماهي اخر الدنيا ولا هي اخر البنات..
فاتن اللي بعدها ما شافت مريم: اسمعني جراح.. الموضوع مو مثل ما تتصور.. انا...
قطعتها مريم وهي تبجي: شالموضوع يا فاتن؟؟
فاتن وعيونها مفتوحة على وسـعها..:... مريـم؟؟؟ شتسوين هني؟
مريم: انا هني بالطريقة اللي يييتها.. الموضوع شنو يا فاتن؟؟؟ قولي.. فهميـني.. باي حق؟؟؟ باي حق؟؟؟
فاتن وهي فاقدة كل عذر.. والصمت حابس لسانها.. والتفتت الى امها برجاء وعلى طول تقربت منها امها:.. يمــة
امجراح وهي تلم بنتها لصدرها وجراح توه بيتكلم وقطعت عليه الكلام: بـــس...

سكت الكل من كلمة ام جراح وصبعها موجه لولدها

ام جراح: ولا كلمة.. ولا احد ينطق بكلمة وحدة بحقها.. مو كفاية.. مو كفاية ذنب هالبنت اللي في رقابنا؟؟؟؟ حبسنا امالها واحلامها وسيرناها على كيفـنا واهي انسانة وتحس ولها رايها ..
بنتي هذي ( وهي تاشر على بنتها) تسواكم كلكم.. لانها عمرها مافكرت بنفسها على الناس وعلى الغير؟؟
جراح وهو يهدي من نفسه لكن بعد جمرة الغضب مشتعلة فيـه: بس يا يمة؟؟ شلون تتطلق.. عشان تبني سعادتي انا ومريم؟؟؟ من في هالزمن يا فاتن.. ولا تظنين ان اخوج يقدر يفرح بشقاج؟؟ هالكثـر فكرتـج متدنية عني
ذابت فاتن في صيـاح وانين شديد وام جراح: بسك يا جراح.. والله بسـك.. كافي اللي فيها.. كافيييي..

الا وجرس البـاب يندق.. وخالد اللي يتوجه ويفـجه.. اما جراح فهو قعد على الكرسي وهو منهار نفسييا ومريم لامتها مناير وسط الدموع وسماء تخفف عليها وفاتن في حظن امها.. وهم على هالحالة.. تدخل ام مسـاعد بهيبـتها وسنها العريق بنظرة كسيـرة وقلب متألم.. وهي تشاهد الموجودين بهالحالة.. يتبعها مسـاعد اللي طل من باب البيـت ونظراته ما خلت الارض

مريم من شافت امها داخلة البيت زادت في بجيـها وفاتن ذايبه في حظن امها.. وام مساعد ما تدري تروح لمن.. فمن بعد ما خبرها مساعد ومن بعد ماقرت اللي في الكتاب وعرفت ان اللي بين هالاثنين شي يتعدىالزمن ويتعدى المكان والكون كله.. آثرت الصمت والذنب على اي شي.. ولكن هالمرة شخص ثاني محتاج الى حنان ام مساعد.. وما هي غير سعاد نفسـها..

سعاد: شفتي.. شفتي يا م مساعد.... شفتي شجرى على بنتي؟؟؟ بنتي اللي عطيـتكم اياها.. امانة عندكم واهي الغاليـة.. شفتي شجرى عليـها؟؟
ام مساعد: لا تشكيـن الحال.. لا تشكيــنه يا سعاد ترى انا بعد قطعة فوادي المتدخلة في الموضوع..
فاتن وهي ترفع ويهها المضرج بالدموع: .... يمة (ام مساعد) يمة سامحيـني.. يمة (وتهوي على يد ام مساعد تبوسها)ابوس ايدج يمة .. سامحيني.. انا ما كان قصدي يصير كل هذا في مساعد..
سحبت ام مساعد يدها وهي تذرف دمع: لا يا يمة.. انتي مالج ذنب.. الذنب مو ذنبج يا يمة.. الذنب ذنب الزمن وقلة الصراحة اللي تييب المواجع.. الذنب ذنب امج وذنبي وذنب كل كبير عرف بهالموضوع وما تكلم لج فيـه.. يفهمج ان انتي مقبلة على واحد ميت من 6 سنوات يرجى من الله شفاااااااء لعيونه ولروحه المسلوبة.. يا يمة لا تلومين احد.. لوميني انا.. انا اللي وقفت في درب سعادتج.. سامحيني يا يمة.. سامحيني.. عمت عيني الكراهية.. وحبي لولدي.. يوم شفته طايح في المستشفى.. وماله احد يراعيه.. وانا امه العيوز ما قدرت اشيل عمري رحت له.. فما بالج انتي الشباب.. يا يمة سامحيني.. بغضي للحال اللي وصـل له ولـدي اهو اللي خلاني اسوي جذي..

ما تكلمت فاتن ورمت بروحها كليا في حظن ام مساعد الدافي الحنووون. . والتفتت ام مساعد الى مريم...

ام مساعد: يمة.. يمة انا ساومت على فرحتج ويا خوج.. ومن ساومت وياه وقلبي ما طاع الهنا في لحظة.. شلون اطلق ولد عشان ازوج بنت.. وانا القى قرب هالصبي الزين بالبلاش.. لكن امومتي عمتني يا يمة.. وحبي لكم عماااني وخلاني احس ان الدنيا كلها عدووة لكم وانا امكم ما اسمح للظيم يجيســكم.. كنت ناسية والله يسامحني ان الدنيا قدر ومكـتوب على نحور بني ادم من انولدوا لليوم اللي يموتون فيـه..

تمت مريم تبجي لكن مو بنفس الحدة اللي بجت فيها قبل.. والتفتت الى جراح لقته موخي الراس وهو يسـمع..

وهالمرة ام جراح اللي تكلمت:.. يا يمة يا جراح.. اختك ما ظنت فيـك قلة الرجولة او حاولت انها تساوم لك.. اختك سوت اللي انت سويته لها في يوم.. فكرت في سعادتك على سعادتها.. وعرفت انها يمكن تمنع درب الفرح من حياتك مع مريم مثل ما اهي انحرمت منها وما حبت تشوفك بنفس الوضع.. اختك تحبك ياجراح.. لو ما تحبك ما جدمت روحها على الغير ضحية عشان فرحتـك..

مريم وهي تكلم مسـاعد: شلون لكن.. شلون تظن اني بفرح في اليوم اللي بعرف انك مطلق فاتن عشان تفرحني انا؟؟؟ شلون؟؟ مايا على بالك اني يمكن اهد الدنيا عشان خاطرك وانت اخوي وحبيب قلبي؟؟ شلون؟؟ وانا اللي اعارضك واخالفك لاني ادري انك ما تعرف لحبك ولقلبك مثل ما انا اعرف.. انت وفاتن تكابرون في حبكم والحب مافيه كبر ولا مذلة.. فرحت وخالفتك يا مساعد(هي تمسح خدها من الدمع) وخذت اوراقك ونشـرتهم في كتيـب ونزل فيالسوق واللي عرفته انه قاعد ينشرى بالهبل بين الناس.. لانه رسـالة متألفة من اجزاء تعبر عن حبك العمـيق اللي مافيه اي كبر او غرور .. تخبون مثل هالمشاعر وهالعواطف بيناتكم.. وانتو تدرون ان الفلك ما يدور الا بيناتكم وكل ما اييله ويضيج عليكم وانتوتقررون انكم تنفصلون؟؟ اصلا من بيسمح لكم بالانفصال؟؟ لا تاخذوني وتاخذون جراح عذر لكم.. احنا نقدر نعيِش من غير بعض في ذكرى اننا في يوم لقينا المشاعر بيناتنا.. واننا ضحينا بحبنا عشان اثنين يستاهلون كل شي في هالدنيا ... لانهم في يوم ما فكروا في نفسهم وشالونا عليهم.. بكل حب وعناية.. تقومون وتساومون علينا.. علي انا يا مسـاعد.. ؟؟؟؟
جراح وهو يزيـد على مريم ولكن لفاتن: يا فاتن انا فيوم ضغطت عليج عشان تلاقين مساعد انتي كنتي رافظـته.. لاسباب خاصة فيـج.. لكن بعد قدرتي تلاقين دربج لمسـاعد.. ولكن غيرة وعمى وقلة صراحةبيناتكم اهي اللي وصلتكم لهذي المرحلة.. لانكم ما كنتوا لبعض من البداية.. ما حاولتوا انكم تتقربون؟؟ كل واحد منكم تبنى الثاني كانتقام ولا تحدي.. والزواج ما هو تحدي.. الزواج تحدي المصاعب اللي تجابل اثنين.. مو تحدي بين اثنين يوفرون المصاعب لبعض..


سكتت فاتن ووهدأت اناتها في حظن ام مساعد اللي تمسح على راسها بكل حنان...


مريم: واذا تبونا.. نسامحكم على اللي سويتوه.. لازم تبدون الفرح بينكم.. انسى يا مساعد ان فاتن بليلة تركتك من غير شورك وراحت عنك.. وانسى يا فاتن ان لمساعد ماضي ..صدقيني..هالماضي مساعد شركج فيه بكلماته وقصايدة ومشاعره الجياشة صوبج.. فتحي عينج وانت يا مساعد.. وتلاقوا لمرة في حياتكم بنظرة الحب.. بدل نظرة التعاسة والألم والحزن.. الاحزان عمرها ما بنت البيوت ولا العوالم.. نظرة الحب اللي تمكن الانسان من تجاوز وتخطي العالم بمصاعبه..
ام مساعد تكلم فاتن: انتي له يا بنتي.. له من يوم ييتي على الدنيا.. وصرختي من آآه الدنيا.. له من يوم فتحتي لليوم اللي بتسكرين فيه عيونج ان الله راد.. يمكن قضاء ربج يموتج وانتي صغيرة او عيووز.. لكن انتي ما تدرين... كل اللي ابيج.. انج تعيشين لحظتج وياه يا بنـيتي.. وانا اللي باخذج له.. ابارك لج ويا ولدي حشاشة يوفي وبقول لج اللي تقوله ام الصبي لعروس ولدها يوم تدخل عليه.. ديري بالج على ولدي.. وحطيه في عيونج.. وبوعد امج واقول لها (تطالع ام جراح ودموعها تصب) بنتج امانة برقبتي ياسعاد.. بشيلها وسط يوووفي لو ما شالتها الارض..


لمت فاتن ام مساعد من فرط المشاعر اللي انتابتها بهاللحظة.. وشي غريب شدها الى انها ترفع راسها.. وتوجه نظراتها.. الى مسـاعد. وكان موخي راسـه في الارض.. بطوله الفارغ الا راسه اللي موخى وعيونه مجابله الارض..


فما حست الا باسمه يتصاعد في حنجرتها :... مسـاعد؟؟؟
ما رفع مساعد راسه ولكن تنهيدة عميقة صدرت منه وكانها تبين عجزة فنادته امه:.. يمة مساعد.. حرمتك تناديك.. طالعها.. ولبي نداها يا يمة... خلاص.. ما عاد قلب امك يمنعك ويقول لك انه مو راضي عليك.. الدنيا راضيـه عليك يا يمة.. حط عينك بعين حرمتك.. وجابلها بالحب لان الله ما بيرضى عليك الا اذا جابلتها بكل الحب اللي في قلبك..

سكت مساعد وما كان فيـه الا انه يأثر الصمت والكل يرتقب منه اي بادرة او حركة تبين حبه لفاتن.. وهي تنتظره وعيـونها مليانة شغف وحب ويات اللحظة اللي بيكسرها مساعد على الكل ويثقول لهم انهم ما قصروا.. واحسانهم فاض عليه وغطاه من فوق لتحت.. لكنه ما يقدر يعيش مع فاتن من غير ...


ورفع عيـنه اخيـرا عشان يتكلم وما لقى الا نظرة الحب في عيـون فاتن اللي تشابكت بابتسامة ناعمة على ويهها.. قلبت فيه كل الموازين.. وتركت شفتيه مفروجتين تحاول الكلام لكنها ابت الصمت والاستمتاع بنظرة الحب من فاتن.. وما كان منه الا انه يوجه هالحب في عيـونه.. ويبتسم بحنان لويهها.. وكان كلامه كلها ضاع وتبخر.. واخر شياطينه لعنها الله وانرمت في سابع ارض.. فتجدم منها.. وسحب يدها من عند امه.. وباسها بحنااااان وهو يحطها على عينه... ويهديها احلى تشنج من دموع الفـرحة والسـعادة..

مسـاعد وهو يهمس لفاتن:... واخيــرا...


استغربت فاتن من كلمة اخيـرا.. لكنها بتظل جاهلة.. ان كلمة اخيـرا يات لنظرة الحب من عيـونها.. انتهت كل نظرا ت الغموض واللوم.. الحيـرة واللغز.. والعذاب والألم.. وطلب الاعتاق وتركها في حالها.. ويات محلها النظرة اللي تشافي كل الجروح.. فبدت الايام الطوال اللي قضاها مساعد فيالألم.. قصـيرة وتافهة ومالها معنى... كل هذا نابع من نظرة الحب اللي بدت من عيـنهها لعينه..


-----------------------------

بعد ثلاثة اشـهر.. والعايـلة في جووو اشد من الفوضى.. فبعد جم ليلة راح تكون الليلة اللي تجمع كل من جراح ومريم ولؤي وغزلان. وفاتن ومسـاعد بعدهم ما ردوا من اميــركا مع ان عطله فاتن بدت من زمـــان الا انهم تأخروا لسبب من الاسبـاب..

مريم وهي تحط الحناا وتهف: والله العظيم لو ادري اهم وين رايحين.. بقلب الدنيا على راسـهم..
سماء وهي معجبة بالحنا: .. سكتي مريوووووووووووووم.. الحنة اينن..
مناير: ههههههههههههههههههههههههه ههه
مريم وهي شافقة على حال سماء لانها اول مرة تتحنى: ترى تشيلين هذا يا سماء ويصير حمر فياليد
سماء وهي فرحانة منقلب: متى ياربي يجف..
مناير: مالت عليج احد يشره على الحنااا..
مريم : منور روحي لخالتي قوليلها وين فاتن؟
مناير: اووووووووه عليج يا مريم خليهم يممكن ماخذين وقت خاص فيهم.. تعرفين quality time
مريم وهي تغضن ملامحها: روحي روحي انتي.. سودة ويه طالعة على من؟
مناير: ههههههههههههههههههههههههه ههههه

000000000000000000000
في هذاك المطار كانت فاتن واقفة عند الكاونتر ويا مسـاعد.. صار لهم اسـبوع في لندن يستمتعون باجازة الكريسماس..ومسـاعد خذها مرة وحدة علاج وتغيير للاعضاء اللي اهو مستعملها..فاتن مو مصدقة ان بعد شهر كامل بتتزوج من مسـاعد.. صج ان الايام تمر عليهم بسرعة مع ان اتفاقهم كان ان الحفلة تكوووون بعد ما تخلص من الدراسة هالسنة.. لكن ماقدروا ينتظرون اكثر..

كملت تذاكرهم ومساعد دار عشان يلتفت لفاتن لقاها سارحة في ويهه وهي تناظره.. كانت لابسة شيله بيجيه وظل ذهبي ممزوج بالبني محلي عيـونها ومتوردة خدودها وكسبانة وززن كبيـر مخليها غريبة واللي عرفها واهي ضعيفة ماعرفها واهي متينة..

مساعد وهو يبتسم ويسحب الاوراق من على الكاونتر: علامج؟
فاتن وهي تتنهد: يوعانة.. خلنا ناكل شي..
مساعد وهو يمسك يدها: يالله خلينا نروح..
فاتن وهي تمشي وياه: ما باقي على الرحلة وايد..
مساعد وهو يطالع في الساعة اللي عطتها اياه فاتن مرة ان جان تذكرون: 45 دقيقة كافية للأكل.. وبعدين حاسبي تراج وايد تاكلين
فاتن وهي تفش خاطرها بحماس: ماقدر.. احس ان فيني شراهة على كل شي.. وابي اجرب كل الأكلات..
مساعد: هههههههههههههههه.. يا خوفي لو تاكليني..
فاتن بحيا وهي تخبي ويههاا في جتفه: حلالي...

التفت لها مسـاعد وهو حاس بانه انسان متخلف مع فاتن لانها انسانة جديدة كل يوم..والاحلى انها بعدها تستحي اذا كلمها او قال لها شي من كلام الحب.. فتجاوز اهو هالشي.. وبدى يكتب لها كل مشاعره على الورق اللي بدى اهو المرسال لمشاعرهم مع بعض حتى اهي بدت تراسله ولسبب وبدون سبب ترسل له قصيـدة كل يوم صبح اذا اهي كانت مستعيلة تروح الجامعة.. في شقتهم اللي رجعوا لها بمظهر يديد وحياة يديدة وقلوب يديدة..

قعدوا ياكلون من بعدها راحوا الى نداء الطيارة والى رحـلتهم الطويـلة..اللي ظلت فاتن فيـها ساكته الا من السوالف العابرة بينها وبين مساعد.. غريبة حالة الحب اللي بينهم الصمت والحيا يكون الرسول لكل شي.. وكلمات الهوا اللي ينقشونها على صفحات من حياتهم يوميا..

فبعد ساعتين من الرحلة وفاتن مستقرة وهي تفكر فتحت عيونها فلقت الدنيا مظلمة في الطيارة ومساعد قاعد يمها ولكن نايم بعمـق.. فابتسمت وظلت تراقب شكله وكانت خصلة منشعره الناعم على جبينه فباعدتها عشان يرتاح.. ومن حركتها هذي انتبه وهو يتنفس بعمــق وكانه وعى من الرقاد خلاص..

مساعد وهو يشد على عيونه: جم الساعة الحين؟
فاتن وهي متسكرة في شكله: ساعة من الليل..
مساعد يبتسم لها : اي ساعة عاد؟
فاتن هي تحط راسها على جتفه: ساعة القرب..
مال براسه على راسها وهو يبوسه:.. ما رقدتي؟
فاتن وهي تسكر عيونها وكانها تستسلم للنوم:.. ماياني رقاد..
مساعد وهو يمسح على شعرها وبنعومة : ليش؟؟ تعبانة حياتي؟
فاتن وهي حاسة براااااااااحة تسري في خاطرها:.. لا بس بغيت اقول لك شي..
مساعد وهو حاط جبينه علىراسه: شنو؟؟

ما تكلمت فاتن وبسطت جف مساعد.. ورسمت حرف الالف.. ومن بعدها حرف الحاء.. ومن بعدها حرف الباء.. ومن بعدها حرف الكاف.. وقلب.. ووقف قلب مساعد من الدق لحركتها الرقيقة الناعمة.. وباسها على جبينها بنعووووووومة وهو مبتسم برضا.. حس لعمره صغيـر.. ما جنه تجاوز ال27 ويا فاتن. وعالية اللي انمسحت من حياتها ومن ذكرياته لانها ظلت في الورق.. وصار لازم يتجاوزها عشان يترك المجال لفاتن تنعم في ربوع قلبه..

وتموا على هالحالة لمن وصلوا الى مطار البحرين الدولي الساعة سبع الصبح.. خلصوا اجراءاتهم ويد فاتن ما تفارج يد مساعد.. لمن طلعوا من المطار وهم متوجهين الى البيـت.. نامت فاتن في السيارة عند مساعد وهو بعد غطت عيونه لكن تم يلعب في صوابع فاتن وخصوصا في الدبلة لمن وصلوا اول شي الى بيت فاتن.. وكانت الساعة ثمان وجم دقيقة وهي بالغصب وعت.. لمن سحبها مساعد من السيارة وطلع جناطها وضرب الجرس عشان احد يفج الباب..

التفت لفاتن وهو يهمس: ما عندج مفاتيح
بهبل رمت براسها على جتفه: ماعندي..
مساعد وهو منحرج من فاتن اللي باين انها مسطلة وعدلها: اعتدلي عاد مو تقطين راسج وبس..
فاتن وهي غرقانة من النوم: مساعد علامك لاتزفني..

هز راسه مساعد وطاحت فاتن عليه هالمرة لكن وقفها عدل وطلع خالد من البيت وياهي فرحة يوم لقاهم واقفين عند الباب..

خالد: يا هوووووووو مساعد وفاتن.. حيا الله من يانا.. زارتنا البركة والله
مساعد وهو يسلم على خالد بفرحة: اله يحيييك ويبجيك.. دخل الجناط واللي يعافيك خلني اوصلها لدارها نامت علي حسبي الله عىل بليسها..
خالد: ههههههههههههههههههههه ولا يهمك..

مسك مساعد فاتن ومشاها لعند البيت ودخلها وراح وياها الى غرفتها اللي ردت لها وعلى طول طاحت على السرير بثيابها واغراضها.. وام جراح تطلع لهم من المطبخ

ام جراح: وصلتوا يمة؟؟ حيا الله من يانا .. حمد لله على سلامتكم
مساعد وهو يطلع لها عند الباب: الله يحيج ويسلم عمرج خالتي.. وكاهي بنتج وعندج
طلت عليها ام جراح: علامها نايمة بهدومها..
مساعد: تعبانة وما رقدت زين طول يومين.. خلوها ترتاح وانتي تكفلي بها وانا رايح البيت
ام جراح: انت بعدتعبان؟
مساعد: ايو الله راسي يفتر علي..
وتناديه فاتن في الغرفة وهي قاعدة.. ومادة ريلينها اللي مغطية بالتنورة والبوت البيجي الطويل: مساعد بتروح؟؟
التفت لها وهو غرقان من التعب والحب:.. اي فاتن بروح.. خلج انتي ارتاحي..
انسحبت ام جراح وهي تبتسم الى المطبخ ومساعد يدخل لها الغرفة وفاتن: ابي اقول لك شي.. عاد
مساعد وهو يقعد وياها على السرير: مو وقت كلامج انتي ارتاحي الحين.. تراج دايخة
فاتن وهي تحط يدينها على جتف مساعد: بس انا احبـك..
ابتسم مساعد في ويهها: واانا ادري انج تحبيني .. هم انا احبج..
فاتن وهي تفتح عيونها الناعسة شوي :.. بس عيل.. الحين رووح..
مساعد وهو يبتسم ويميل براسه: بتنامين يعني؟
فاتن: انت بتنام؟؟
مساعد يهز راسه: ايه.. عشان ليلة باجر زواج مريم..
فاتن: نا بعد بنام عشان اعدل ثياببي وملابسي وكل شي..
مساعد : بس عيل.. ارتاحي انتي لج شوية.. واذا قعدتي او انا قعدت بتصل فيـج..
فاتن: وعد؟
مساعد: اكيد وعد...
فاتن بهمس حلو: تصبح على خير
مساعد: وانتي من أهل الخيـر..

طلع مساعد من الغرفة وفاتن نامت على السرير وغطت جسمها باللحاف من غير ما تغير شي.. ومساعد اللي لحق على راعي التكسي وراح للبيت.. محد كان صاحي والبيت عفسة فوق وتحت.. راح لغرفته وهو يدخل الجنط .. سكر الباب وغط في رقدة ما قعد منها الا بعد 12 ساعة متواصلة..
----------------------
ويات ليلة الفرح الكبير.. اللي رقص فيه الصغير والكبيـر.. وين ما تلاقت احلام اثنين مع مصدر احلامهم.. مريم في فرحها الكبيـر وغزلان في غرابتها الاكبر.. كان كل شي يمشي بهدوء وبساطة على غيـر المعتاد. مع ان كل شي مدبر ومزين ومرتب كافخم العروس.. فستان مريم كان بيـجي من التوووول الانجليزي الشاحب والشك اللي عليـه بمنتهى الروعة.. قبته واسعة ويدينه طويلة الى الكوع اللي تنفرج بدانتيل وشيفون ناعم وانيـق.. طرحتها كانت كبيـرة وطويـلة وتسريحتها بسيـطة بمنتهى الجمال وماكياجها كان متدرج من الكريمي الى الغامج اللي بين حلاه عيـونها.. كان شعرها متداخل بورووود بيضا كريميه ومصمم على شكل داوئر تطل منها هالورود.. وتاج ماسي تنزل منه الطرحة الطويلة الشاحبة.. اما فستان غزلان فكان بنفس فخامة فستان مريم ولكنه من غير طرحة.. الطرحة بتستعملها بس اذا دخللو الصالة.. كان شعرها مموج ومسحوب على جهة وحدة ونوع منا لاكسسوار المصمم على شكل شبكه تتدلى منها الخرز مشبوك فيه ويغطي شعرها مع الاوركيد الناعم اللي يعطي لفحة من مكياجها الانيـق اللي يتدرج من الكحل الاخضر الى اللمعة الاستوائية..

مناير وسماء لبسوا مثل اللون التركوااازي الانيـق.. لكن بدلة مناير كانت من بانطلون تغطيه تنورة متطايرة حريرية وفيها اكسسوار من الخرز والسلاسيل تتدلى من خصـرها.. وسمـاء كان عبارة عن فسـتان له نوع من القميـص اللي يوصل الى الخصـر ولكن بفتحات واعة وينزل الى جتفها بطريقة رومانسية وروعة بشك فظيـع.. وشعرها كان مقطع بستايل اميـركي وماكياجها رسم الفراشه

فاتن كانت لابسة فستان متشابك الالوان بين البرتقالي والاحمر والفوشي مع الاخضـر.. وكانت بهجة العرس بتسريحتها الكيرلز ويذ قليتر بجوري حمر عند الاذن.. والاكسسوار اللي كان يلتف على يده لان الفستان كان يغطي رقبـها ويدها اليمين كامل اما اليسار فهي الظاهرة.. ولبست ترجيـة كبيـرة دائرية تتدلى منها بعض الالوان اللي اهي لابسـتها.. وكل ما تمر صوب احد تسمي عليها ام مساعد بالرحمن لانها كانت بمنتهى الروعة والجمال..

صار الوقت ودخلوا العرايسـ وغزلان ومريم مع كل من جراح ولؤي اللي على غير توقعات الكل مو مرتـبش او مينون.. لانه عطووه ابره مهدئ قبل لا يدش (نكته)

ومساعد معاهم في الزفة وكان لابس الدشداش السودا والشماغ الاحمر ورى المعاريس ويا ابوه واهله واهل غزلان

مريم كانت لابسـه طرحا غامجة ما تبين منها وغزلان بعد مع انها مو متحجبة.. ويوم وصلوا للكوشة طاحو تصوير فيـهم.. ومساعد يدور على فاتن بين الناس لكن ما لـقاها..

جراح ما كان مصدق اللي اهو يمر فيه..علم اهو ولا حلم. لا بهالليلة ولا ليلة العقد اللي كانت قبل اسبوع وين ما شاف مريم وحتى انه نزل عينه ناسي انها خلاص صارت من نصيبه..

وفجأة سمع شبه الصوت في أذنه.. وكان طالع من مريم..

جرب راسه اكثر لها:.. شنو؟
مريم: بس بخبرك وسط هالزحمة.. اني احبـك..

التفت لها جراح وهو يبتسم.. وما حس الا بضغط يدها على يده... فبانت احلى ابتسامة علىويـهه

اما لؤي فكان كل شوي ينقز غزلان لا يدوس على طرفها ويستسمح.. يحاول انه يضبط نفسه لكن التوتر اكبر منه.. وكل شوي يستسمع منها.. واهي تضحك عليـه..

غزلان وهي تميل صوبه: تحمل لا اتعود على اعتذاراتك..
لؤي وهو يناظرها:السموحة.. بس الليلة وخلاص.. من يوم ورايح انتي بتعتذرين..
غزلان وهي مو مصدقة: على شنو؟؟
لؤي: على اشياء بخبرج عليها بعدين..

سكتت غزلان وهي معصبة والتفت لها لؤي...

لؤي: علامج؟؟ اشوفج نسيتي عناج وتتعيبج لي والحركات اللي كنتي تسوينها
غزلان وهي بطبيعتها الثائرة: اي حركات؟؟ ها؟؟ ماتقول لي..؟
لؤي وهو يبتسم للحشد: مو وقته الحين.. بس بقول لج..
غزلان شنو بعد؟؟
لؤي وهو يناظرها بابتسامة تسلب اللب.. احبــــج..

وكانت اول مرة يقولها لؤي لغزلان من اول ما عرفته للحيـن.. فكانت حالتها النفسية مضطربه.. وشوي تترنج.. عمرها ما كانت كلمة احبك بهالحلاوة اللي اهي تصورتها..


لمن خلصوا من كل هالفوظى طلعوا الرياييل مع المعرسين وخلوا العرايس ياخذون راحتهم .. فشالو عنهم الغطا وكل شي..
وعند الباب كانت فاتن طالعة من غرفة الاستراحة المخصصة للمعازيم واول ما بتدخل القاعة حست ان احد واقف عند الباب.. والتفتت له الا مساعد هو الثاني يطل بعد.. ابتسمت له بحنان.. اما اهو فما صدق عيونه لان فاتن كانت مختلفة امية درجة.. فسحبت الجورية اللي عند راسها وراحت عطتها اياه وهي تبوسها.. واختفت عن عيونه وناظرة .. طلع اهو والنشوى عاميـة عيـونه.. لمن وصل الى الرياييل وحاله ما يسـر..

بدى العرس احلى عرس يمكن يتكون.. مع العروستين اللي بمنتهى الجمال.. والمعازيم والاهل الفرحانين وخصوصا ام مساعد اللي تلاحمت بصورة غريبة مع بيت بو جراح وصاروا مرة ثانية عائلة وحدة ما تتجزأ.. يمكن لفرحة اولادها برضاها عليـهم لان بهالدنيا ما يحلى الشي او ينسر له الا برضا الأهـل..

كلها دقايق ويدق تلفون فاتن وتستغرب.. ردت عليـه فلقته مساعد

فاتن بابتسامة: كنت عارفة انك بتتصل؟
مسـاعد وهو متوتر:.. فاتن.. لو اطلب منج شي هالليـلة... ما بترديني؟؟؟
فاتن وهي مستغربة: امر يا مساعد.. روحي لك لو ما تدري..
مساعد:.. لو طلبت منج.. انج تيين لي.. وتخلين مريم.. وغزلان.. والكل.. والحفل.. عشان تكونين وياي بس انا.. تقبليـن..

سكتت فاتن وهي مستغربة من كلامه.. مع انه يدري بهالشي.. الا انه يسـال بعد..

فاتن: .. خلك عند سيارتك.. وبرد عليـك..

سكرت فاتن الخط في ويهه.. ومساعد راح عند سيارته وهو يحس بالحفوز يطق قلبه.. ما راح ينتظر الشهر عشان يتزوج فاتن.. بياخذها الليلة وبيعلن زواجه بين الرياييل.. عشان ما تصير حفلة او زواج.. العيشة من دون فاتن صارت غير محتـملة..

راح عند الرياييل وخبر ابوه عشان ينشر السالفة بين الكل.. وطلع من عندهم.. راح لعند السيارة اللي كانت واقفة عن بعد.. وظل واقف عندها واهو ينتظر فاتن اتييه او تعطيه الرد..

وسط الاغاني والرقص سماء ما كانت حاسة بالانسانة اللي تراقبها بحسـرة.. وكانها فاقدتها او تنتظر من الله يهديها هالقطعة اللي ما عرفت قيـمتها الا بعد فوات الاوان.. تجدمت صوبها وسماء مو حاسة بشي الا بالفرح والرقص.. لمن انتهبت من الانسانة اللي تجدمت منها لان اللي حواليها تصنموا يوم شافوها.. فوقفت سماء وهي حاسة بالخوف يتصاعج من قلبها الى اعضائها..

سلـوى وهي تبتسم في ويه سماء لاول مرة يمكن:.. الله حفظج.. وحماج من عيون الحساد..

سماء وهي تناظر مناير باستغراب

سلوى وهي تنشد الحب ونظرة الحب من سماء:.. ما بتلميـن امج.. اللي مفارقتها؟؟؟

ما صدقت سماء اللي تسمعه وانفرجت شفاهها... وكان جراح الماضي ترجع لها في قلبها الصغير اللي ما لمس من الدنيا غير الألم.. وكان كلهذا قاعد ينمحي بقوة تخليها تهتز.. ويحل مكانه شعور غريب مثل العسـل ولكن مخيـف لانه يستحلها كلها..

سلوى وهي تفتح يدينها:.. تعاليلي سماء... تعالي..

وبخطى مترددة.. تجدمت سماء من سلوى.. ومن شدة الغرابة ما عرفت شلون تلمها.. تخاف انها تكون ملعوب.. لكن .. كان العكس.. كان حظنها بارد وحنووون وشديد الراحة.. فما كانت من سماء الا انها تغرق في وسط دمع غزير من عيونها.. وحست بريحة مشعل في سلوى. وكان اللي يلمها مشعل ماهووو سلوى.. ولو كانت تدري ان هالشعور بتلاقيه فيها.. جان لمتها من زمان.. من زمااان..

رفعت سلوى راس سماء:.. سامحيني .. يمة.. سامحيـني.. على اني ابعدتج من حياتي.. وخليتج غريبة وانتي مني وفيني.. سامحيني .. سامحيني..
ما تكلمت سماء لانها عاجزة عن الكلام.. وكل اللي سوته انها حطت راسها على صدر سلوى الللي تلقتها بكل حفاوة.. والتفتت ام جراح الى الوضع ولقت مناير تناظرهم بفرحة وغرابه في نفس الوقت.. وتذكرت مناير شي صابها في العمرة اللي راحوا مع سماء..

كانو توهم رادين من الحرم بعد انتهاء المناسك.. وسماء كانت في حالة من الهدوء والصمت.. ومناير اللي تعودت نجرة سماء كل يوم وينونها على بيت الله ما عجبها الحال.

مناير: علامج سموي؟؟ جنج الا ماعطينج جلسة علاج كهربائي
سماء وهي تبتسم: تصدقين.. اليوم تمنيت شي.. ما كنت اظن اني بتمناه في يوم!!
مناير: شنو؟
سماء: تمنيت لو ان الله.. (تلتفت الى مناير بعيون كلها امل واشراق) يرد لي سلوى كأم.. لان مهما كانت معاملتها لي.. الا اني تذكرت شي ثاني ... طول وقتي وانا عايشة وياهم كنت اناديها يمة وانا مو حاسة بالكلمة .. الا انها كانت في حياتي.. تعرفين شلون؟
قامت مناير من مكانها وقعدت يم سماء وهي تلمها: كاهي امي ناديها يمة قد ما تبيـن..
سماء وهي تهز راسها: غير الشعور.. غير الشعور عن ام جراح عن سلوى.. مهما كانت ذيج تصير ام اخوي.. لكن ام جراح خالة زوجي المستقبلي...

مناير وهي تستمع لها بشي غامر

سماء: امنية حياتي لو سألوني عنها.. قبقول انها حنان سلوى.. ومحبة سلوى ورقتها.. لانج لو شفتيها شلون كانت ويا مشعل الله يرحمه فتستغربين من هالانسانة اللي تقدر توجه هالكم من الحب ونفس الوقت كراهية الى شخصين طالعين من الرجل اللي اهي متزوجته..
مناير وهي تمسح على شعر سماء: قلعتها ترى ان جان ما عرفت جيمتج.. انتي فيج كل الخير والبركة.. وتستاهلين الدنيا ان جان مو العالم كله.. ولا تهتمين ولا تحاتين.. اهي الخسرانة يا سماء..
سماء وهي تلتفت الى مناير بحاجب معقود: ولو انا كنت الخسرانة؟؟؟

سكتت مناير بذيج اللحظة عن سماء كاللحظة اللي اهي قاعدة فيها الحين.. لان بالفعل كلام سماء كان بليغ.. نابع من طيبتها الصافية وقلبها النقي.. للي يسامح اشد الاغلاط.. الاهمال الاسري.. تسامحهم على كل هالاغلاط بحقها وتتمنى لو انهم يوجهون لها الحب والاهتمام.. فشكرت ربها مناير لان لها ام مثل ام جراح.. وما ان التفت للامها حتى راحت ولمتها بكل قوتها..

------------------------
كان لاف ظهره مساعد عند السيارة والتف يوم سمع خطى اقدام سريعة تتجه صوبه .. لقاها فاتن وهي لابسة عباتها وشيلتها اللي مو مسكرة زيـن.. فتلآلآت النجوم في عيونه وككانه يشوفها لاول مرة.. بهالحسن وبهالجمال.. ماكان المكياج. لكن شي غريب من الالوان اللي اهي لابستها بشره بالحياة اللي بيعيشونها.. حياة مليانة بالالوان والافراح..

التف على السيارة وفتح لها الباب. وقفت لحظات تناظر في عيونه.. ودخلت السيارة من بعدها.. وسكر الباب من وراها وراح لعند مقود السيـارة.. وتحركت بهم مركبة الاحلام الى دنياهم
اللي ظلوا يتمنونها..

وقف مساعد السيارة عند البحر اللي تفارق اهو ويا فاتن فيه مرة.. عشان يعيد العهد بانهم يتلاقون مرة ثانية.. وتعود اللحظتين من حياتهم ويرمونها في البحر لان ما عاد بينهم لحظتين.. زالت اللحظتين وحلت مكانها لحظة وحدة.. لحظة الحب ونظرة الحب.

مسك يد فاتن وهو يسحبها وراه.. وهي تمشي بطواعية مستمتعة بشغف الهوا يحط على خدها وويهها..

التف لها مساعد وهو مبتسم:.. احس روحي طاير..
فاتن وهي تبتسم وعيونها تتلالا:.. وانا بعد..
مسك اصابعها وسحب منها الدبلة واهي استغربت لكن:.. فاتن.. لو اطلب منج الليلة.. انج تكونين زوجتي.. تحت عيون الله.. والنجم والهوا.. والبحر والرملا.. توافقين؟؟
فاتن وهي حيرانة: واهلك.. واهلي.. والناس..
دخل مساعد دبلتها في اليسار وبنعومة كمل:.. اذا عندنا الله.. فشحاجتنا بالناس؟؟

سكتت فاتن بهذيج اللحظة واستمتعت بكلام مساعد اللي ما تلاه اي كلام.. وضمت روحها الى صدره محل ما تلقى دقاته تنطق باسمها..

حبها الغريب اللي جمعها بانسان غريب وحياة مليانة بالغرابة ولكن تشدها.. لكن محل كل يوم وكل لحظة.. تجول في ملامحها نظرة الحب .. والحب الجديد اللي يخليها تحس بنعمة الخالق عليـها..

فما بعد نظرة الحب الا جيل من الحب.. والرعاية والهدوء والهناء..

اما مساعد فما عاد له ماضي.. ما عاد له الا هالانسانة المتجمعة في حظنه وهي تلتجي له وترسم له اجمل وادفأ الأيام وما يتليها.. فتخيل.. اول مولود لهم.. لازم تكون بنت.. وثاني مولود..بنت.. وثالث مولود.. هم بنت.. عشان يكونون فاتن ومريم وسعاد ومناير وسماء.. يرسمون البهجة في حياته.. ولكن اولاهم لازم تكون فاتن.. عشان ان غابت عن عينه الكبيـرة في لحظات.. يلاقي الصغيرة جدامه وما يضيع الذكر من حياته..

فهنيــئا لك يا مسـاعد.. من نتاج نظرة حبـك.. واهدانا الله ما اهداك..

سلام عليك مني دوما يا رجلا.. دخل حيـاتي.. من غير استئذان..

شكـــرا..
حمران النواظر..

====================
كلمات حمران النواظر
السلام عليــكم ورحمة الله وبركاته

السموحة لاني ما رديت عليكم من قبل.. فانا كنت عازمة اني اكتب لكم رد مطول.. اشرح لكم فيه الظروف الاخيـرة اللي تركت الحساسية تقوم بيناتنا.. والحين من بعد ما هدأ بـالي.. بتكلم من كل قلبي الى الاعزاء على قلبي من بداية المشــوار الى هذي للحـظة..

نظرة حب.. اوجهها لكم اليوم.. من قلبي اللي ما عرف معنى الصداقة الا من خلال هالمنتدى.. اعضاء كثيرين مرووا في حياتي واعضاء ظلوا واعضاء بيمرون وبحكم قدر اللله راح يمكن يتمون او يرحلون..

كل هالامور من قضاء الله وقدره.

احب اخبركم.. ان نظرة حب جمعت فيني الاحاسيس المتعددة.. ونظرة الحب كلها هذي كانت مهداة الى نظرة حب الاقيها كل يوم في عيون اغلى انسانة بتعيش في كياني.. امي الغاليـة..

امي شقول لكم عنها.. على الرغم من كل المصاعب اللي واجهتها بحياتها وكان عندها اكثر من مرة الخيار انها تتركنا لزماننا التعبان لكن اثرت هنائنا انا واخواني على هنائها.. فانا اوجه اولى نظرات الحب الى امي الغالية.. واحب اقول لها شكـرا يا امي .. لانج انتي مثل ما انتي.. عساني ما افقدج بيوم ..

ثاني نظرات حبي اوجها الى اخواني اللي كانووو اعز اصدقائي في عالمي الخيالي.. اللي استمديت منهم الألهام من حنان اخوي الكبير.. وعطف اختي الكبيـرة علينا.. وشقاوة اخواني الصغار.. ومزح خواتي الراقيات..

ثالث نظرات الحب اوجههاا الى مصدر الهامي.. قصة حبي.. اللي اتمنى لها نهاية سعيـدة مثل كل النهايات اللي اتممتها في قصصي..

ولكن.. احب اوجه كلمة الحب.. الى كل انسان يظن ان الدنيا ما تنصفه...

الدرس اللي ابي الكل يستفيده من هالقصة ويمكن اولهم انا.. ان عسى ان تكرهوا شيئا وهو خير لكم.. ما تدرون.. يمكن لو دربكم اتجه الى اليسار بدل اليمين او الخلف بدل التقدم راح يكون لصالحكم..

نظرة حب.. اهي قصة حيـاتي.. اللي تصورتها في المستقبل كيف بتكون.. اني احب انسان يملك دنياي.. ولكن الله يوجه نصيبي الى انسان ثاني.. وبعد التعنت.. والغضب.. والبكاء والدمع.. راح تتوجه نظرة حبي اخيـرا الى نصيبي..

ولكن.. مو معناته هذ هو حلمي.. بالعكس.. انا حلمي بعيد البعد عن نظرة حب.. اذا تحقق حلمي في هذي الدنيا. .فراح تكون قصة حياتي.. قصة الانسان اللي احببته ونهجت درب الحياة وانا الى جنبه.. يشيلني واشيله.. يحتملني واحتمله.. يحبني واحبه.. وفوق كل هذا .. يناظرني واناظره.. لحتى ما تشيب الشعرة براسي وتجعد ملامحي ويظل فيه الحب انه يستيقظ كل صبح ويخبرني... صباح الخير يا ويه الخيـر.

اعرف ان بالعالم قضايا اهم من الحب.. لكن العالم ما ياته الفوضى الا بسبب ابتعاد الحب ... وتقصيته في جانب او زاوية من مكتبه كتب وبشلف مكتوب عليه.<< قصص رومانسية >>

لماذا على الانسان ان يحب؟؟؟ عشان يعاني المعاناة الجميلة. اللي ما فيها اصوات القنابل.. او رشاش الكلاشينكوف.. او تهديم البيوت بالجرارات العسكرية..

الانسان يحب عشان تدمع عينه .. ويحس بهشاشة الاحساس.. ويتغلف بشعور الجمال.. اللي يمكن انفقد من العالم وصار الجميل قبيـح.. للاسف الشديد..

فانا بناضل.. وبتم احب.. لان الحب يأتي من الله.. والله هو الوجه الدائم ابدا في هالدنيا وحتى الاخرى

اتمنى من الجميـع.. من بعد نظرة حب.. بدل لا يقول لي روعة وما اقدر اوصف شعورري تجاه قصتج يا حمران.. انه يقول لي.. لمن وده يوجه نظرة الحب..

carpe diem.. امتلكوووو اللحظة باجمل الاحساس.. وعبروا عن اللي فيكم.. املكو السحر والجمال.. والعطف والاخلاق والاحسان.. لنفسـكم.. ثم للناس... وبتلاقون الدنيا.. انها ما زالت بخــير..

دمتم سالميـن.. ومن صوبي صدقوني انا غسلت قلبي من اللي توجه لي من قبلكم بدمع الفرحة لان القصة انتهت والكل راضي.. بوعد اني بعود مرة ثانية.. بقصة حب.. متكونة في اسـر.. متغربة عن بعضها في غربة نفسـها..

اسـرة في غربة محبتها..
واسرة في غربة تفرقها..
واسـرة في الوانها الاجتماعية...

اشــــــــــــــكركم.. واتمنى لكم دوام الصحة والعافية..

وعساني القاكم باذن الله وكلنا سالميـــــــــن معااافيـــــــــــن..

اختـــــكمـ دائمـــا..
حمـــــــــــــ سيدة الحرمان ــــــــران

.
.
.
النهـــــــــــــــــــــ ــايه :ttmasha: :ttmasha:

[الشوق]

اترككم الان كي .. تكتبوا او تعطوا شيئا ولو القليل كي
لهذه الكاتبه الرائعه التي ابدعت واعطت الكثير لاعضائها .. .
انها فعلا كاتبه جريئه لها اسلوب جميل وممتع في الكتابه
.
.
اترك لكم هذه المساحه البيضاء
واعطوكم هذه الفرصه لانفسكم لشكر هذه الكاتبه على ما ابدعته من خلال هذه القصه
فمن احب ان يذكر شيئا لعزيزتنا (( حمران النواظر )) فليتفضل
.
.
والسموحه
خويتكم / الشوق
وانتظروني كي انقل لكم قصص اخرى
لكتاب رائعين .. ..

[تنينه]

اخييييييييييييييييييييييي ييرراً خــلصت وعرفت النهايه


قصه رووووووووووعه الصراحه ومـعاني وااايد جميله :kcl: :kcl:


شكلي برجع للقصه من فـتره لأخـرى

شوقنا تسلمين ع القصه الرووعه

[تنينه]

حـمران الـنواظـر ,,

اسلوبها جـميل ومـشـّوق جداً ,, والتشويق أهم شي أو من اهم عناصر نجاح القصه ,,

انساانه وااعيه جداً ,, ولها تجربه كبيره في الحياه و الجمييل في القصه كــيف كيف أنها بين كل موقف و ثاني تذكـر القضاء والقدر والإيمان والله :) ,,

في القصه تناولت نفسيـات كـثيره بأسلوب واايد حـلو ,, شرحها ووصفها للشخصيات أتخلي الواحـد صدق يتخيلـهم كـيف ويندمـج ويا الأحـداث ,,

أللي عـجبني أيضاً في أسلوبها كيف أنـها وصفت الحياه الخـليجيه والبيت البحريني بتفاصيله الجميله والعلاقات بين الأسـره ,,



كـل الشكر ,, ^^