اووه عندكم اكشن اهنيه .. ..


بخصوص سالفة الاختلاط .. المرأة في حال التزمت بالحشمة الشرعية في لبسها ومظهرها وطريقة تعاملها يعني حشمة قولية وفعلية وسلوكية و تجنبت الخلوة مع رجل في مكان واحد .. ومع مراعاة أولويات حياتها و ضرورياتها .. تقدرتباشر اي نوع من انواع الأعمال المباحة .. كعمل أو دراسة او أي شي مباح شرعا .. لكن لازم اتكون الحشمة صدقية مب مجرد كلام.... هذا من خلال اللي اتعلمته مب اني افتي في جواز الاختلاط او حرمته..

هذا بشكل عام للمرأة اذا تبا تتجنب الحرام هو انها تتقيد بالضوابط الشرعية اللي تحفظها من الرجال ..

واللي تداوم بكشخة عرس واترابع زملاء العمل وتدق سوالف وياهم الكلام مايشملها طبعا ..

لكن سؤال الأخ المقاتل كان بخصوص الاختلاط في المدارس و الجامعات ..

اعتقد انه مسألة الخلط في المنشآت التعليمية شي حساس جدا ويرتبط بمنهج حياة وبثقافة بلد وبأعراف مجتمع ..

وفي ضغوطات خارجية للأسف تبا اتدرج الاختلاط عندنا من قمة الهرم ابتداءً ببيئة العمل وعقبها الجامعات والكليات وبعدها المدارس ..

نجحوا في الاولى وهم في سعيهم لاكمال االمهمة من خلال زرع تقبل هالشي في عقولنا وقلوبنا _ غزو فكري _ ..

شخصيا ما اؤيد فكرة الاختلاط واشوف انها فكرة مالها داعي .. وخاصة انها مالها ايجابيات واضحة تذكر و تستدعي القيام بهاي الخطوة .. و بعض الدراسات اوضحت ان المستوى الاكاديمي في حالة الفصل أعلى من المستوى الاكاديمي في حالة الخلط ..

وهذا غير عن ان الاختلاط يسرق الحياء من البنت تدريجيا و اقل شي ينتج من خلال هالشيء ان البنت تعامل الريال مثل ماتعامل البنت .. بحكم التعامل اليومي والالفة .. فيوم عن يوم ومع الأيام تسقط الكلفة بينهم وتعده من المحارم .. وهالشي ألمسه واعتقد نلمسه كلنا ( البنات ) في تعاملاتنا مع دكاترة الجامعة .. وكيف نحس انه الدكاتره خلاص مستويين من الأهل .. وهم غير ..والرياييل الثانيين غير ..

اذكر اني اول مرة تعاملت فيها مع ريال غريب او بالاحرى تكلمت وياه فيس تو فيس من غير غشوة ( نحن في بوظبي نتغشى :ice: ).. كانت مع اول دكتور يدرسني في الجامعه .. واذكر كيف كنت خايفة وانا ارمسه وابلع ريجي كل ساعه والثانيه واستجمع كل قوتي بس عشان ارمس وانا مرتاحه .. ومع الايام خلاص تعودت .. واستوى عادي عندي (مب حد يقولي بالعكس هالشي زين وانتي اكتسبتي ثقة في التعامل .. انا متأكده انه هالشي ماله علاقة في الثقة لانه ماكان عندي اهتزاز ثقة قبل لا ادخل الجامعه بس له علاقة بالتعامل مع الرياييل) .. ومب انا بس .. وايد من ربيعااتي نفس الحالة .. دوم نقارن بين اول يوم دشينا الجامعه وبين احين.. ولين احينه مانعرف اذا هالشي ايجابي أو سلبي !!!..

فلو كان الاختلاط بشكل عام اكيد اني في اول ايام بتهيب من الشباب عقب مع الايام بتعود عليهم وبتطيح الكلفة بيني وبينهم .. ( أنا ماعرف الوضع كيف بيكون.. بس اتصور جيه ) .. واللي يدرسون في الجامعات المختلطه اكيد ادرى..


باختصار لو يبون يخلطون في التعليم يبالهم بعد يغيرون في الأعراف اللي يؤمنون فيها الناس .. مثلا يلغون كلمة منقود وغلط وعيب ومايووز عندنا وعند اهلنا .. ويصادروون غيرة الاب والاخو على بنته و اخته يوم يشوفونها بين رياييل يالسة.. ويتقبلون فكرة ان البنت يكون لها اصدقاء ذكور من غير اي همز أو لمز يعنيها..

قد يكون هناك فئة من الأهالي تتقبل فكرة الاختلاط ..لكن في نسبة كبيرة بعد من الأهالي بعدها ماتقبل بدراسة بناتها بين صفوف الشباب.. وهالشي اظهرته نسب الاستبيان عن قبول الاختلاط في ابوظبي .. ماشي بنات مواطنات بيكونن في الجامعات .. او قلة قليلة جدا منهن..

واللي يستشهدون بجامعة السلطان قابوس .. صح انها مختلط .. لكن شي فرق بينا وبينهم .. الشعب العماني شعب كادح وجاد .. وجامعتهم اعتقد مادخل غير اللي نسبته فوق ال 95.. يعني الفئة اللي تدخلها هم الناس اللي يايين حق الدراسه والجد .. لكن الشعب اهني شعب مرفه والدراسة عنده على طريقة مشي حالك .. والاختلاط برايي مابيحقق انفجار علمي ومعرفي في الدولة كثر ماإنه بيزيد الطين بلة ..

والعرب يحاولون يقلدون الغرب في كل شي بحجة التطور .. ومايدرون ان الغرب يالس يكتشف انه تعاليم الاسلام هي اصل الرقي و الحضارة .. في اوروبا مدارس للطبقات الراقية يعتمدون الفصل فيها بحيث يكون في رقابة وتهذيب لسلوك الطلبة.. وشي منها على نظام المدارس الداخلية وشي منها على النظام العادي .. والطبقات العادية يعتمدون الخلط .. فالأرقى عندهم الفصل .. والأقل مستوى عندهم الخلط .. .. نحن كلنا الحين على النظام الراقي ..لكن .. يبون يردونا لورى..


اتم هاي القضية من القضايا اللي تنقسم فيها اراء الناس بين مؤيد ومعارض .. وكلن له وجة نظر في طرحه .. لكن اعتقد ان كان للاختلاط ايجابيات فسلبياته أكبر من ايجابياته .. ومن اللي اعرفه انه شي قاعده شرعية اتقول درء المفسدة أولى من جلب المصلحة .. وتجنب الاختلاط احسن وأفضل وأحمى للمجتمع من الشروع فيه ..


مب جني خذت راحتي وايد في الكتابه brgll: