من الخطأ أن تكون على صـواب .. !!

[لمّــاح]

عــدنا ..

الاخت هــزايم ..

احسهم رغم انهم يطبقوون التعليماات والنظرياات إلا نشووف فيهم نوع من ابتكاار..يعني يشملوون الطريقتين طريقه الإتباع والإبدااع..

استفادو من تجارب الآخرين .. و مافي نجاح من أول مره .. اكيد هناك فشل، و اكيد هناك تجارب و مجازفة و في النهاية حبهم للهدف و إيمانهم بأنهم قادرين على الوصول لمبتغاهم هو السبب الرئيسي لنجاحهم ..

اختيه شكراً على التواصل و الرد، اسعدني تواجدج ..


قــرموشه ..

عنـي أنـا شخـصيــا .. أحـب يكـون لي تفكـير مختلف عـن غيري .. أحـب أشاركـ في شي يخـليني أبدع فيـه ..

هذا هو المهم ، حبج و ايمانج بأنج مختلفه و قادرة على انج تحققين الأفضل دايما .. الانسان يوم يطمح لشي معين، يطمح لشي أكبر عن الي هو يبغيه عشان اذا فشل يوقف عند النقطة الي تمناها في الأساس و اذا توفق ترا زيادة الخير خيرين مثل مايقولون ..

يامـا واجـهت انتــقادات اتجـاه شيء رغبت فيـه لكـن أبدا ما خـلييت هـ الانتـقادات تأثر علي .. يمكـن في البدايـه بس حـسيت باحباط بس بعديــن اتخـذت منها وسيـله عشان أطـور نفسي أكـثر وأكـثر ..

لاحظت فيج حب المغامرة .. يُقال اذا الشي قالو عنه مايستوي، سويه .. لأنج اذا ماسويتيه مابيكون موجود من الأساس عشان نحكم عليه ( يستوي ولا مايستوي ) .. !
الافكار اليديدة الي في مخيلتج و حابه اتسوينها، يمكن تكون غريبه - سخيفه او حتى الثنين ويا بعض ( غريبه و سخيفه في نفس الوقت ) .. :puppyeyes:
الافكار تبقى أفكار لأنه مهمى حاولنا مابنقدر نحكم عليها لأنها مجرد افكار في مخيلتنا ولازم نسويها عشان تكون موجوده .. و انا شخصياً مايهمني اذا نجحت ولا فشلت ( اذا كان الفشل هذا مابيخليني اخسر اشيا ثانية طبعاً ) لأني عالأقل جربت شي يديد و تعلمت و هذا هو الهدف الرئيسي ..
و من الطبيعي اذا كانت عندج فكرة يديده ماتحصلين ناس يوافقونج الراي او عالاقل يعطونج الرد الي توقعتيه منهم ..
انا اقولج، مب مهم .. !
ليش ؟؟
يمكن لأنهم مايفهمون الفكرة 100% .. يمكن طريقتج في سرد الفكرة و طرحها امامهم ماكانت بالطريقة المطلوبة عشان تخليهم يوافقون و يمكن و يمكن و يمكن ( حطي احتمالات لين مايشيب شعر راسج ) .. لكن يتم هناك حل واحد الا وهو انج اتجربينه بنفسج و اتشجعين نفسج بنفسج و على الله اتوكلي و بإذن الله بتتوفقين ..
للتجارب في هذه الحياة متعة فريدة مايحسبها الا الي يجرب ... يحس بالمتعة، يحس بالمغامرة، يحس بالصعوبة و التحدي ويحس بالسعادة حتى لو ماوصل للنتيجة الي هو يبغيها .. و مانسميها تجربة الا لأنها صعبه، لنها لو كانت سهله جان كل حد سواها وماحسينا بالتحدي و المتعة الي نباها ..

مـن الصـف 1 الى الصـف 9 كنت الاولى على صـفي .. ومــا أرضى باي مـرتـبه أقـل .. لكـن استوت لي ظـروف .. وخلتنـي أكون الثانيه في الصف العاشر .. كنت منقـهره لأبعد الحـدود .. ما أرضاها على عمري كـيف اكـون الثانـيه!! ..
وفعلا استرجـعت هـ المرتبـه بجـهدي .. واستمـريت على هـ المنـوال ..
يعني اللي أبا أقولـه انـه الشخـص لمـا يتذوق طـعم الرقـم ( 1) .. صعب عليه يستسيـغ الرقـم (2)

آآه يالاحراج :nono:
انا ماحسيت بطعم الرقم 1 الا في الروضة .. :harhar1:
بس اتعرفين .. مع اني ماكنت من الاوائل و علاماتي عادية .. الا اني دايماً احصل شهادات تقدير و غيره من المدرسة و من برع المدرسة و لين الحين في الجامعة انا ما اطلع من الاوائل لكن اتيني شهادات تقدير لأشيا ثانية اسويها ..

الدراسة في نظري هي اني احفظ نضريات قديمة اجتهد في اختراعها غيري .. و نجاحي في المدرسة او الجامعة حتى يعتمد اعتماد شبه كلّي على الحفظ و على كثر ما احفظ نضريات على كثر ما اييب علامات !!
الي يرسب في الدراسة بشكل عام مايكون مهتم و خصوصا مايكون مهتم في النظريات هاذي .. و البعض الآخر ( و انا منهم ) ذاكرتهم ماتستوعب هالكثر حفظ .. هذا مايعني اني غبي أو الي ماييبون علامات زينه يعني أغبياء، لكن مخيلاتهم و عقولهم بعيدة عن الحفظ الأكاديمي لكنها قريبة و مبدعة في امور اخرى ..
مثال على كلامي .. اذا تخرجت من الجامعة و كنت يايب B و اربيعي يايب A .. في احتمال 99% انه نتوظف في نفس المكان و نفس الدرجة الوظيفية .. لأن التوظيف في البداية يعتمد على الماضي ( الحفظ ) و مايعتمد على المستقبل ( مخيلة الشخص و إبداعة ) .. و في نظري التحدي الحقيقي يبتدي عقب الجامعة و دام انه عندي هدف فما اتوقع بيكون هناك حد لمخيلتي عشان اتخطط لي و تتخيل لي الطرق الي بتوصلني للهدف الي ابغيه ..
لكن هذا مايعني اني اودر دراستي و اكتفي بالشغل، كل شي يكمل الثاني و الترقية و النجاح ايضا له اساسيات و من ظمن هالاساسيات الدراسة و الشهادة

اختيه قرموشه .. ردج وايد عيبني و خلاني افتح بيبان يديده و اتكلم وايد .. :kcl:
السموحه عالاطالة و لي عودة ..

[لمّــاح]

عــدنا ...

تنينه :kcl:

الجزء الاول عيبني و ماعندي اي تعليق عليه ..

هـناك أنااس يتفادون التجارب ويحاولون يعيشون في روتين المـهم هالـروتين لا يسبب لـهم التـعب أو الأرق

هالناس ماعندهم حب المغامرة .. يمكن خوفهم من انهم يخسرون هو الي مأثر عليهم .. و يمكن مايخسرون شي ( مادي ) لكن يمكن يخسرون شي ( معنوي ) و خوفهم هو من كلمة ( خسرت - فشلت ) ..
بس ماشوف انها بتأثر .. ياما ناس خسرو و ياما ناس فشلو .. !!
على سبيل المثال .. الارقام في دبي ياما غيروها .. ( اقصد ارقام السيارات ) .. نعم يمكن فشلو في اختيار الشكل المناسب من اول مرة وثاني مره و ثالث مره .. لكن في النهاية اختارو شكل مناسب ..
انا بصراحه ما اهتميت وايد بالفشل و التغيرات هاذي، لكن لين اليوم وباجر بتم اقول ان شرطة دبي حاولت و غيرت الارقام في دبي للأحسن ..

والذين حققوا إنجازات باهرة في حياتهم، وخلد التاريخ أسماءهم قد تجرعوا مرارة الفشل طويلاً قبل أن يحققوا هذه النجاحات، فالنجاح الحقيقي الدائم لا يأتي عادة إلا بعد صراع مرير مع الفشل،

صح و الامثلة على كلامج كثيره ..

تحسب المجد تمرا أنت آكله لن تبلغ المجد حتى تلعق الصبرا


أشـكرك أخويه لـمّـاح ع الموضوع المـفيد والجميل

اختيه تنينه ..

بصراحه ؟؟

لج اسلوب حلو و يعيبني .. و عندج امثلة و موسوعة تظم الكثير من الامثال و غيره و هذا يدل على ثقافتج و حبج للمطالعة ..
اتوقع لج مستقبل حلو .. و الله ايوفقج ان شاءالله

الـــغاليــة ..

أسميني عيزت و انا اكافح و ارد بالدور عشان اوصل لردج:harhar1: لأنه عيبني خصوصاً و ان بعض الي كتبتيه عكس الي انا كتبته و يعيبني يوم اشوف حد مختلف ويايه في نقطة او اكثر ..
بس قبل كل شي الاختلاف في الرأي لايفسد للود قضية ..

نحن كأشخاص وأفراد يطلب منا فعل الصواب ونحث ... الى نهاية الفقرة

كلامج صحيح 100% .. انا ماقلت اني بنسى الخبرات القديمة و ببتدي من الصفر .. بالعكس !!
لكن الي قلته، الخبرات هي من قرارات اتخذها غيرنا في مواقف قديمة، و عشان نستفيد منها لازم نطورها للأحسن .. السبب ؟؟
مواقفنا - زماننا - و الشخصيات كلها تغيرت ولازم انعدل في هالخبرات لو شويه بس عشان تطلع بالحل الصحيح الي بيخلينا في السليم و المظمون .. اتوافقيني الراي ؟؟

قد تكون تقصد في موضووعك هنيه أن نتجنب الدخوول في دائرة الحياة الروتينية واللي عبرت عنها ب( فعل الصواب ) ..

عليج نور .. ما اكون انسان عادي .. أكون انسان لي بصمة في الحياة، مب شرط اسوي شي يخليني مشهور عالمياً مثل اديسون او نيل ارمسترونغ .. لكن عالأقل اكون مشهور في المجتمع او البقعة الي انا عايش فيها و مايهمني راي الناس كثر مايهمني رايي انا شخصيا في عمري ..

تتكلم في هالموضووع عن فئة في العالم يسمونهم ( المبتكرون innovators ) وهاييلا نسبتهم في العالم ماتتجاوز ال 13% .. وهم اللي يقودون عمليات التطوير والابداع والاختراع والاكتشاف في هالحياة ..اي مخترع ومكتشف وقائد متميز وانسان له تاثير قوي على الناس ..

اختيه انتي تتكلمين عن اشيا صارت و انتهت ( مثل الي اخترع التيلفون و الي اخترع الطيارة و السيارة ... الخ ) .. نحن في زمن تقريبا كل شي موجود فيه .. و المبدع في زمننا هو الي يطور الاشيا الموجوده من جيد الى جيد جداً و من جيد جداً الى ممتاز و هكذا ...
نحن كلنا نبغي انكون متميزين في شغلنا، دراستنا أو اي شي نحن مهتمين فيه ..

لكن علينا طبعا أن نطمح بواقعية وبعقلانية وبمستوى قدراتنا عشان نستطيع تحقيق هذي الأهداف ولا نستصعبها ونحقق التوازن المطلوب ومن بعدها نبذل كل جهودنا في سبيل تحقيقها..

هالنقطة مهمة و يمكن فاتتني .. الواحد يوم بيطمح لشي يطمح لشي هو يقدر يسويه .. يعني مايقول لي بخترع مثلا آلة الزمن ( مثل الي في رسوم رحلة عنابة ) لأن هالشي مستحيل يستوي

ودايما هدف عن هدف يفرق .. والأهداف تتدرج في مستوياتها وأنواعها .. وكل انسان هدفه يعكس مقدار طموحه ونوعية تفكيره ووجهته في هذه الحياة .. ومثل مايقولون من عرف قيمة مايطلب هان عليه قيمة مايبذل..

ماعندي أي تعليق ... كلامج في محله ..

اختيه الغاليه اسعدني جدا جدا تواجدج و ردج في موضوعي و اتعمدت ارد على كل الردود بس عشان اوصل لهذا الرد ..
اتمنالج التوفيق دايما و ابداً


---

دمتم بود اخواني

[مسافرللجفا]

السلام عليكم و الرحمة

.. لماحكـو ..

عيبنـي هـدف مـوضوعـك و عيبنـي السرد و طريقـة الموضوع مع طرح الامثلـه .

في نقاط لفت انتباهي و خلتني اعيـدها اكثر من مره عسـب استوعـبها بشكل ادق ، معناته انه الواحد لازم يستفيد من كل كلمه تدخل في اذنه ، سواء كانت معلومه صحيحه او خطا ولو خبر او نظريه او الى اخره ، لازم نسمع الخطا عسب نتجنبه و نسمع الصح عسب نبنيلنا الاساس الصحيح و نمشي عليه . اذا الواحد ما بيستفيد من اخطاءه و بيمشي على الصواب فهذه فاشل نوعا ما ، اما الي بيستفيد من كل فعله ايسويها سواء صح او خطاء فهذا الناجح و المبدع .

وكلامي هذا يدله هذا العالم

مثل ادسون الي اخترع الليتات، حاول 200 مره و فشل .. ماقال انا فاشل، قال انا الحين عرفت 200 طريقة ماتخلي الليت يشتغل !!

معناته استفاد من 200 معلومه وطريقه عسب يتجبنها في المرات اليايه ،
و هذا الي يشجع الواحد انه ما ييأس لما يفشل ، هي طريقه وحده عسب يشغل الليت لكن غلط 200 مره عسب يوصل للصح .
ومع هذا ما يأس و قال اني عرفت ها الطرق كلها ما تخليني اغلط مره ثانيه .

ومثل قصة احد الصحابه مش مذكر الاسم بالضبط ويمكن واحد من الخلفاء الراشدين يوم اعطى لبنته 100 حديث و كلها غير صحيحة قالها احفظيهم
و يوم سألته عن السبب قالها عسب اذا مر عليها اي حديث تعرف اذا كان صحيح او موضوعي ، ( مب مذكر القصه لكن الهدف واضح )

الانسان كيف بيعرف الصح من الغلط الا بالخبره .

ولها الشي اتلاقون قوانين الحياه كل يوم عن يوم تتغير لانه الحياه تتغير مع الايام و يحتاج لها قوانين الواحد يبدع فيها عشان تكون حياته سليمه ،
لكن ما يمنع انه نستفيد من حياة غيرنا وناخذ خبراتهم .

و عن الرقم 1 و الدراسه ،
تبدأ منافسه الاشخاص عند اول نقطه في مجاله ، مثل ما قلت انه ممكن الواحد يتخرج و هو يايب A و الثاني يتخرج و يايب B و وظيفتهم مثل بعض ، بس منو الي بيترقى اكثر ؟
هذا الي يبدع في مجاله ، وكيف يبدع ؟ طبعا من الخبرات الي استفاد منه في ايام الدراسه . وما ننسى انه الشهادة تلعب دور كبير في ها الايام للترقيات .
المطلوب : شهادة + خبره .


امشي على صوابك و استفيد من اخطاءك .

..

شكرا لمـاح
و السمـوحة ع الاطــاله ،

[لمّــاح]

السلام عليكم ..

آسف جداً على التاخير كنت مشغول شويه ..


اخويه مسافر للجفا .. اضافتك حلوه و مفيده ..

ماعندي تعليق .. كفيت و وفيت ياخويه ..

تسلم على المرور :kcl:

[راعي الزعـامه]

متيمز اخوي لمــاح كعادتك في طرح واختيار المواضيع المتميزه بنوعها وطريقة عرضها ،،
أعتقد ان الاخوان كفوا ووفوا في تفصــيل مفهوم ( من الخطــأ أن تكون على صواب ) !!

وواضح التأثر الشديد بكتاب رؤيتي .. وهالشي مب غريب نتيجة الحكم والعبر الكثيره اللي تعلمها كل من قرا سطر واحد عالاقل من هذا الكتاب القيم ،،

ومثل ما ذكر داخله أن هذا المفهوم صحيح و لاغبار عليه .. ونحن بنتعلم من اخطائنا واللي يتعلم يبدع واللي يبدع يصل لمراده ولأهدافه ويمكن أعلى ،،

والانسان من صغره يغلط ويتعلم .. الرضيع يمشي ويطيح .. ويحاول يعرف سبب الطيحه .. ويقوي عمره عشان يقدر يوقف على رجليه .. فالتعلم من الخطــأ هي قاعده بتم وياك طول عمرك ،،

لكن شو هو الخطــأ اللي من الممكن نتعلم منه .. ؟؟
الخطأ البسيط .. الخطأ الكبير .. كلهم أخطاء ..
اول شي لازم يكون في وراك مسؤول مهتم فيك يبينلك الصح من الغلط .. ولولاه انت ماتعرف ان العمل اللي اترتكبته خطأ ولازم تداركه في المرات القادمه ..

ثاني شي الخطأ اللي ينتج من جراء عمل تعبت عليه ومن جرات مجهود كبير ارتكبت من خلاله خطأ (( وقعت سهوا )) هذا الخطــأ اللي بتتعلم منه ،، أما الخطأ اللي يأتي من جراء الكسل والتقاعس ،، هذا اللي ما بنتعلم منه و لا يمكن نتعلم منه ،،

ثالث شي .. وهي نقطه ذكرها القبل .. هو العمل على تدارك خطأك وتصحيحه لو وضعت في نفس الموقف اللي أخطأت فيه .. وترد وتصححه بل و تعمل اللي اكثر عن الصح بفكرك وابداعك الخاص ،،

رابع شي .. ما يسعني الا اشكرك على انتقاءك المواضيع والنقاط المهمه اللي من الممكن نستفيد كلنا منها ونتعلم من خلالها واتساعدنا في بعض المواقف في حياتنا ..

[طفلة من هذا الزمان]

مــوضوع ممتع جــدا .. أهنيك اخويــه لمـاح على هالوعي ،،

و اهني واحــات بن دبي على هالأعضـــــاء المميزين ،،

ولأن الأغلبيــة مؤيــدة للـرأي المطروح فـلا جــدوى من الانضمــام للركــب .. لأننا عرضــة لنكـون عاديين .. و على صــواب ..
حقوق الطبع محفوظــة

هنــا.. أفكـــار أود طرحهـا .. لعلها تستفز قريحـة أحدكم ،،

تحدثنا مطـولا عن الصواب و الخطــأ .. بدون أن نعرّف بشكل منفرد ما هو الصواب؟ و ما هو الخطــأ؟
بنظري الصـواب و الخطــأ خاضعين لنا نحن بني البشــر .. نحن ما نحددهما بتجاربنا كما أسلفتم ..فالصواب ما فعلته في حياتي و بطريقـة ما أدى إلى النتيجـة التي أردتها .. و الخطــأ هو ما ارتكبته أيضــا لأصل إلى نتيجـة ظننت خطأ أنني سأصلها بهذه الطريقــة ..و الفشــل هو تكرار عمل شيء ما بنفس الطريقــة ... اتفق مع الجميع هنــــــا ..

الصواب و الخطأ في أفعـــالنا غير مرتكزة على ما فعله من سبقونا أو من يكبروننــا العمر و بالتالي بالخبرة .. لأن المعطيات تختلف ..و الأهداف تختلف .. و القيم تختلف..
وليس بالضــرورة أبــدا .. أن الطريقة التي اتبعهــا غيري ستكون فعــالة بالنسبــة لي .. و تاريخيــا نعم من الغبـاء أن نعيد اختراع الكهرباء و خلافه بل الصواب أن نبني على هذه الاختراعات ..

صحيح .. و لكن دعونــا من التاريخ و العلم ،،
الحيــاة هي ما تكلمتم عنــه جميعــا .. الصواب و الخطــأ في الحياة ما نطمح إليــه ..

هنــا .. تجارب الآخرين ستكون عبر و لكن ليست بالضرورة مقيــــاس .. شو رايكم؟؟

نقطــة أخــرى ،، إذا اتفقنــا على النقطـة الأولى ::

للصواب و الخطأ مرادفان آخران إذا ربطناهم بالحيــاة .. هم الألـــــم و المتعـــــــة ..
فكل ما نفعلــه في الحيــاة هو بدافــع حاجتنا لتجنب الألـــــم او رغبـــة بتحصيل المتعـــة << أنتوني روبنز ..
بمعنــى .. ليس دائمــا بالابتكــار و الابداع نستطيع أن نفعــل الصــواب .. هناك مقومــات أخرى نحتاجها أكثر .. من منا لا يقرر كل يوم تغيير واقعــه و مجريات أحداث حياتـــه .. كلنا نفعل يوميـا .. و لكن هناك من يتملكهم الإرتباك و الغضب لأنهم رغم معرفتهم بالصواب غير قادرين على فعلــه .. و هناك من يستطيعون حقـــا تحقيق ما حلمــوا به .. و فعل الصواب ..!!

الفرق بيننـــا أن بعضنا عرف كيف يدرك الألــم و المتعــة .. و تعلم استخدامهما في حياتــه ..وبعضنا لم يعرف كيف يفعل الصواب .. السبب لأن بعضنا يستسيغ الألــم و يعيش في ردة الفعــل الناتجة عن الألــم ..أكــرر .. رغم معرفتهم للصــواب .. حتى يصبح الألم صديق يصعب التخلي عنه ..
التكـــرار ناتج عن الخوف ..و لا علاقـة له بالإصرار أو الطمــوح أو الإبداع و المجازفـة ليست هي الحــل دائمــا..

باختصــــــار ..
سر النجـــاح (الصواب) هو أن تتعلــم كيف تستخدم الألــم و المتعــــة بدلا من السمــاح للألــم و المتعــة باستخدامك ..فإن فعلت فإنك ستتحكم في حيــاتك و إلا فإن الحيــاة هي التي ستتحكم فيك <<< أنتوني روبنـــــــز

أتمنى أكــون ضفت شي مفيـــد و بُعـــــد جديد للموضــوع ..
مرة ثانيــة أحيي أخويــه لمــاح و اخواني و خواتي أعضـــــاء واحات بن دبي على التفاعــل الرائع ..

لـــــــــي عودات في حال وجود أي إضافـــــة ،،
طفلــــــة
:ice:

[عنود الريف]

أتفق مع اختي طفلة من هذا الزمان بأن الصواب والخطأ هو لنا نحن بني البشر..
وعلى ما اعتقد الكل يتفق..

اما رايي في الصواب والخطأ ... فاعتقد ان الانسان يقدر يتعلم من الاثنين ..
يعني اذا سويت شي وصبت فيه .. فانا اشوف كيف وصلت للنتيجة الصحيحة .. وهل بقدر استخدمه مرة ثانية .. او حتى يساعدني اوصل للنتيجة ايجابية ثانية.. وبهالطريقة ..

ونفس الشي بالنسبة للخطا... المفروض الانسان بتعلم من اخطائه بحيث اذا مرت عليه نفس المعطيات او مشابهه لها .. فانه يحاول يتجنب الطريج اللي سار عليه قبل ..

والحياة تجارب .. مرات اشياء ايجابية ومرات سلبية ولكن الانسان المتميز اللي يقدر يشوف النتايج السلبية بانها اشياء ايجابية بالنسبة له .. هذا تقريبا كلام سمو الشيخ محمد بن راشد في كتابه رؤيتي ..

تسلم اخويه لماح على الطرح المتميز ..
والسمووحة