من الخطأ أن تكون على صـواب .. !!

[لمّــاح]

الســـلام عــلـيكم ..

من يوافقني الرأي عندما أقول: من الخطـأ أن تكون على صواب ؟؟ :kkk:

هممم ... خلوني اقنعكم تغلطون و ماتكونون على صواب دايماً :harhar1:

----

الشخص الذي يمشي على خط مستقيم في هذه الحياة من دون تجارب و أخطاء، هو إنسان في معظم الاوقات لايفعل شيئاً يُذكر .. و الانسان الناجح بكل بساطة هو الذي يحوّل نقاط فشله الى نقاط ناجحة ..

أن تكون على صواب دائماً فهذا مبني على أسـاس ماتعلمته من قرارات إتخذتها في مواقف قديمة، بمعنى آخر الخبرة; و تعريفي الخاص للخبرة هو عكس الإبداع فالخبير يستخدم نضريات قديمة، و المواقف الراهنة هي مواقف متجددة أبطالها جُدد و ليسوا هم نفسهم الذين كانو في المواقف القديمة و في معظم الاوقات الخبرة وحدها لاتكفي مع هذه المواقف إلا في حالة وحدة إذا كانت هناك ترقية لهذه الحلول "للفيرجن الجديد" كي تواكب عصر التطور

أن تكون على صواب دائما هو ان تكون إنسان ممل فتفكيرك مغلق و محصور فقط على النضريات التي تظمن لك الصواب فقط و لاتؤهلك للإستكشاف و التعلم من الاخطاء، و الدنيا دار إختبار و محطة للتعلم، و انت امام طريقين الأول هو العيش على أساس اعتمادك على نضريات غيرك التي تؤهلك لأن تكون على الطريق الصواب دائما و تستفيد من خبراتهم و تجاربهم ..
و الطريق الثاني هو أن تتعلم من تجارب غيرك و في نفس الوقت ان تكون مُستكشفاً لأنك "اذا ماضعت و تهت عمرك مابتكتشف الطرق الجديدة الي بتوصلك للهدف الي تباه و بتم على الطريق القديم" ..

ولايخفى على الجميع، أن تكون على خـطأ فهذه مجازفة و على المُجازف أن يتحمل النتائج ولو كانت نتائج سلبية، و الانسان الذي لايجازف هدفه الاساسي هو المحافظة على ماعنده ..
معظم المشاهير و العظماء في هذه الدنيا ليسو مبدعين، متعلمين، او حتى جميلين ( يعني حلوين ) .. السبب الرئيسي لنجاحاتهم هو حبهم للهدف و إيمانهم بالقدرة على الوصول لمبتغاهم .. نضرتك الحالية ( من تكون ) و نضرتك المستقبلية ( مذا تتمنى أن تكون ) و تخطيطك للوصول الى هدفك هم اغلى الأسلحة و أهم ثلاث أوراق رابحة ( مثل الجوكر :puppyeyes: ) تمكنك من خوض معركة رابحة .. لكن من دون أن يكون هناك هدف، الجواكر لامنفعة مرجوة منها :nono:
انظر حواليك فالحل دائماً موجود والله يجعل بعض أقوى و اكبر اسراره في أضعف المخلوقات و تذكر دائماً القصة التي ذكرها صاحب السمو الشيخ محمد بن راشد في كتاب رؤيتي ، "مع اطلالة كل صباح في افريقيا يستيقظ الغزال مدركاً ان عليه ان يسابق أسرع الاسود عدواً والا كان مصيره الهلاك. ومع اطلالة كل صباح في افريقيا يستيقظ الاسد مدركاً ان عليه ان يعدو اسرع من ابطأ غرال والا اهلكه الجوع.. لا يهم ان كنت اسداً او غزالاً، فمع اشراقة كل صباح يتعين عليك ان تعدو اسرع من غيرك حتى تحقق النجاح."
و التاريخ دائما يتذكر فقط الرقم "1" .. و أبسط مثال هو هذا السؤال: من يعرف ثاني رجل صعد لقمه ايفرست او وصل لسطح القمر ؟؟ :nono:

بهذه القصة أختم موضوعي ..

دمتم بود

[ذنـيـنـي]

فعلا اخوي لمّاح الالتزام التام بدون أي اخطاء تذكر يعتبر مع مرور الايام نوعا من التخلف و ابسط مثال على هذا هو "سواقة الهنود" يمكن تكون اجابتي ما لها علاقة بالموضوع الي تطرقت له
لكن الهنود سواقتهم ابدا ما تطور لأنهم يلتزمون بالي تعلموه حرفيا و ما يحاولون انهم يطورون سواقتهم و هذا الشي يسبب لنا ازمه مع الايام >> اعتقد انه فاهم قصدي

و بعطيك مثال على من خلال حياتي العملية في المطار,,

مثل ما تعرف, انا اداوم في قسم العلاقات العامه, و هذا القسم دااااااااااااااااااائما فيه آكشن
في البداية كنت وااايد اغلط و وااايد يحرج علي المسؤول,,
لكن تعال شوفني الحين,بقدرة قادر صرت المرافق الاول للمسؤول و وين ما يسير يوديني وياه,

لأنه يعرف اني تعلمت من اخطائي السابقة و هذا الشي بيساعدني على اني ارتقي بمستواي الوظيفي مع الايام

في المقابل,, ربعي الي وياي دائما يخليهم عند البوابات,
لأنهم ما حاولوا يطورون من انفسهم و شغلتهم هي تنفيذ الاوامر حرفيا بدون ما يقولون ولا كلمه

طبعا نفس الكلام ينطبق على كلكلووش لأني انا و هو انداوم ويا بعض و ننهزب مع بعض لول




كلام كبير منك يا لمّاح و يدل على وعيك و تفكيرك السليم

تسلم على الموضوع الرائع

[عفاريتووو]

عليكم السلام


أوافقك الراي

الإنسان اللي دووم يبا يكون على صواب ,, ما بيضيف اي شي يديد في حياته و بالتالي في مجتمعه
بيكون مجرد نسخه من اللي موجودين حوليه ,, بيكون تابع ..

أما الإنسان اللي يدور عــ الشي اليديد و يجازف ,, هــ الانسان اللي بيكون مختلف عن غيره
هــ الانسان اللي ممكن يضيف شي يديد لــ مجتمعه ,, هــ الانسان اللي ممكن يوصل لـ مرحلة
يكون فيها مبدع ..

الشيخ راشد الله يرحمه يوم سوا ميناء جبل علي ,, كل اللي حوليه كانوا يجوفونه شي غلط
شي ماله داعي ,, بس الأيام ثبتت انه قراره ها كان عين الصواب ..

و مثل ما يقولون ,, الحياة تجارب ,, و انك تغلط مب شي غلط ,, الغلط انك ما تتعلم من أخطاءك ..


تسلم اخوي عــ الموضوع الحلو

[ريم العين]

الشخص يوم يبا يبدع لازم يشوف فداخلة شو اللي يقدر يوصل له ويوم يوصل له يحط طموحه على هالشي

مب يكون على صواب وبس يعني مب يكون يسوي شي واحد وهو الصح مايبا يكمل على اساس انه على صواب >>هذا هو الخطا

لازم انا اطور من نفسي احط لي مستقبل جميل حتى لو قالو ما مني فايدة لازم اتبث للكل اني بنت ومب اي بنت انا بنت ناجحة ومب فاشة^_^


حتى لو ماكان شي تشجيع من اللي حوالي

وحتى لو قالو عني اني ما مني فايدة مايهمني كلام الغير اذا انا وثقة من قدراتي

انا بروحي اقدر اكون نفسي واكون لي مستقبل جميل

ثانكس اخوي عالموضوع
وادا الامام دائما

[وحي القلم]

لمـــــاح

مشكور اخويه على هالموضوع الحلو

و أنا أوافقك الراي فكل الى قلته

بس ابـ شرط أنه الواحد يلتزم بالأساسيات

الى اكتسبها من تجارب غيره



..

و السموحه

[تحفه]

وعليكم السلام ..

عجبتني الطريقه الي طرحت فيها فكرتك

[هزاايم]

مدري ليش طرى على بالي اهل الشرق>>اليابانيين والصينيين<<
احسهم رغم انهم يطبقوون التعليماات والنظرياات إلا نشووف فيهم نوع من ابتكاار..يعني يشملوون الطريقتين طريقه الإتباع والإبدااع..

لمااح
عجبتنيه شيخي طريقه سردك للفكره وسلمت يمنااك ولابد كل فرد يفرض نفسه بطريقته إلي يسلكها مهما كانت بس لابد يترك بصمه واضحه
واستفدت من ردود بقيه الأعضااء
عسااك عالفايده

[قرموشة]

في البدايـه سجـل اعـجـابي بهـا المـوضـوع .. :kcl:
ووو أنـا أوافقك الراي بشــده بعـد ..

بنـي آدم بطـبيعـه الحـال خطــاء ومن الخطـأ يتعـلم .. وفي مـواقف ثانـيه يتطـلب منـا نخطــأ عشان نعرف جيمـه هـ الخطــا .. ويجنبنـا الوقـوع فيـه في مـواقف اكـبر ..
الانسان الصـح .. واللي يكـون على صـواب دايمـا .. تفكـيره محدود .. ودايمـا يفكـر في الشي اللي يخـليه على صـواب .. وأبدا ما يفكـر في أبعاد ثانـيه تخليــه يبدع في مجـال ..
يعني يختار الحـل الصـح .. والآمـن في وقـت واااحـد ..
لكـن الابداع في مجـال لو شو مكـان يتطـلب انـه الشخـص يكـون أوبن مايندد .. ويكـون مـجـال أونطـاق تفكـيره لابعـد الحـدود .. think out of the box ما أدري جان هذا هـو المـثل الصح :harhar1:
وهـ الشي هـو اللي يخـلييه يبدع .. .. ممكـن يمر بأوقات ويحـس انـه اخطـأ في شي بس هـذا اكـيد ما يمنـعه من انه يكـمـل .. بالعكـس يعطييه الدافـع .. ويسوي أشيـاء محد سواها قبلــه
.. ممكـن ما تكـون أفكـار آمنــه .. ويلقــى في المـقابل انتقادات من الناس أو أي شي ثاني بس في نـفس الوقـت يكـون حـقق اللي في بالــه .. ووممكـن يكـون على صـواب ووممكـن يكـون وقع في أكـبر خطــأ .. بس في المقابــل استفااد ..
عنـي أنـا شخـصيــا .. أحـب يكـون لي تفكـير مختلف عـن غيري .. أحـب أشاركـ في شي يخـليني أبدع فيـه ..
يامـا واجـهت انتــقادات اتجـاه شيء رغبت فيـه لكـن أبدا ما خـلييت هـ الانتـقادات تأثر علي .. يمكـن في البدايـه بس حـسيت باحباط بس بعديــن اتخـذت منها وسيـله عشان أطـور نفسي أكـثر وأكـثر ..
وبالنـسبـه للرقـم واحـد .. هـذا طـالمـا كـان هدفي .. والين ألحـينه حاطتنـه نـصب عيني ..
ما أرضى بالمركـز الثانـي أبداا .. !!
مـثال ..
مـن الصـف 1 الى الصـف 9 كنت الاولى على صـفي .. ومــا أرضى باي مـرتـبه أقـل .. لكـن استوت لي ظـروف .. وخلتنـي أكون الثانيه في الصف العاشر .. كنت منقـهره لأبعد الحـدود .. ما أرضاها على عمري كـيف اكـون الثانـيه!! ..
وفعلا استرجـعت هـ المرتبـه بجـهدي .. واستمـريت على هـ المنـوال ..
يعني اللي أبا أقولـه انـه الشخـص لمـا يتذوق طـعم الرقـم ( 1) .. صعب عليه يستسيـغ الرقـم (2)
وفعــلا .. الين الحـينه .. هـ الشعـور يخـليك تستانـس
يعنـي لين الحـينـه الناس تذكـرني بها الشي .. مثلا في حـفله تخـرج بنت خالتي هـ السنـه .. الكـل كـان يسأل عنـي .. ويـقول وينـها بنت فلااان اللي كانت يايبـه .... % :smartass: مـع اني متخـرجـه العام !!

أحـس اني طـلعت بررع المـوضووع طشوونه .. بس المـوضوع حـلو ويفتح المجـال للمنااقشـه ..
بس حبيت أعبر عن شعووري يعنييي لوول

ووشكـرا مرة ثانـيه لمـاح ..
لي عـودة بأذن الله .. :)

[تنينه]

الفشل هو مضاد لكلمة النجاح، وفي حالـة الفشل لا يستطع الفرد تلبية أهدافه الراغب فى تحقيقها .. وأولائك الذين أختاروا الـخط المـستقيم يرون مشكلة في كل حل ,, لـهذا لا يـحاولون أن يـجربوا ويتعلموا مـن كـل جـديد بـعكـس الـناجح الذي يرى حلاً في كل مشكلة، ويـقول أن الحـل صعب لكنه ممكن، بـعكس الفاشل الذي يـرى أن الحل ممكن لكنه صعب ,, لــهذا يـبقى ملـتزما بـخطه المـستقيم ,,


.. هـناك أنااس يتفادون التجارب ويحاولون يعيشون في روتين المـهم هالـروتين لا يسبب لـهم التـعب أو الأرق ,, المـهم أنه وصل للـراحه ,,,, فـ لا يخوضون بكل شي جديد ويجربوونه ويغامروون ,, طبعاً هاذيله حـياتهم أكيد بيحكمها الملل والروتين ,, ما طوروا بـأنفسـهم ورضوا باللي هـم فيه بـسبب خـوفهم من كل جديد وافتقارهـم للطموح والعزيمه ,, أوـلربما قـد مـرّ هـذا الشـخص بتجارب وقـرر أن يـقف عـندها كـما ذكـرت >>

ممل فتفكيرك مغلق و محصور فقط على النضريات التي تظمن لك الصواب فقط و لاتؤهلك للإستكشاف و التعلم من الاخطاء،

شـي أكـيد أنـه النـجاح لا يـأتي بين يوم وليـله ,, ولا بـد دون شـهد النحـل من أبر النـحل ,, تـجارب اخـطاء حـزن فـرح تـعب سـهر عـزم وأراده وفي الـنهايه الوصول للـقـمه ,, والذين حققوا إنجازات باهرة في حياتهم، وخلد التاريخ أسماءهم قد تجرعوا مرارة الفشل طويلاً قبل أن يحققوا هذه النجاحات، فالنجاح الحقيقي الدائم لا يأتي عادة إلا بعد صراع مرير مع الفشل،


فليس هناك نجاح يرتفع به الإنسان في الدنيا والآخرة ، إلا إذا سبقه صبر على ألم و المحن والشدائد والإخفاقات، وأما من يريدون السلامة، فإنهم أبدًا يعيشون بالأسفل وعـلى الهـامش, ,

لا تحسب المجد تمرا أنت آكله لن تبلغ المجد حتى تلعق الصبرا:bow:


أشـكرك أخويه لـمّـاح ع الموضوع المـفيد والجميل


تـنيـنه:gof:

[الغاليه]

من بعد قرايتي لنظريتك اللماحية.. يلست أفكر هل أستطيع تطبقها في حياتي وأحاول أن لا أتبع الصواب ! مثل ماتقول النظرية بنقاطها المندرجة عنها .. ولا لا ؟


من بعد الاستنتاجات اللي اتوصلتلها حسب فهمي .. لقيت اني اصطدم معاك في نقاط التعريف لموضوعك.. نحن كأشخاص وأفراد يطلب منا فعل الصواب ونحث عليه، ويطلب منا استخدام الخبرة والتعامل معها، ويطلب منا التعلم من الأجيال اللي سبقتنا والاستفادة من خبراتهم، لأنه من الغير منطقي ابدا أن اتجاهل خبرات الاخرين وأعيد نفس تجربة تكرار الأخطاء فأضيع بهالشي الوقت والجهد والتفكير، و مثل مايقولون علينا أن نبدأ من حيث مانتهى الآخرون وأن نكمل المشوار.. لا أن نبدأ من نقطة الإنطلاق في كل مره.. الخبرة عنصرهام من عناصر قوة الشخصية اللي محد يقدر ينكر فعاليتها وأهميتها في صنع القرارات وإدارة الأمور.. ومن أهم مقومات القائد ( leader ) الناجح انه يكون متميز بالخبرة اللي تؤهله لتعاملات ناجحة وقرارات سليمة وحسن دراية بالأمور.. والخبرة ليست ضد لللإبداع فنظري.. الخبرة فرايي اساس متين لانطلاق الإبداع وضمان نجاحه..


قد تكون تقصد في موضووعك هنيه أن نتجنب الدخوول في دائرة الحياة الروتينية واللي عبرت عنها ب( فعل الصواب ) .. او تقصد النجاحات ذات المستوي العادي والمشتركة بين مجموعة كبيرة من الأفراد ... يعني إنه مافي تميز في النجاحات أو تكوين الذوات.. انت تتكلم في هالموضووع عن فئة في العالم يسمونهم ( المبتكرون innovators ) وهاييلا نسبتهم في العالم ماتتجاوز ال 13% .. وهم اللي يقودون عمليات التطوير والابداع والاختراع والاكتشاف في هالحياة ..اي مخترع ومكتشف وقائد متميز وانسان له تاثير قوي على الناس .. يدرجونه تحت هذا التصنيف.. وهاي الفئة من الناس يتميزون عن غيرهم بإنهم يحبون يدخلون في المجازفة والتجربة مع حب النجاح لشي يديد محد ابتدا فيه قبلهم سواء على مستوى مجتماعتهم او مستوى العالم.... ندين بالفضل لهالمجوعة من الناس لانه من غيرهم بتكون الحياة غير متقدمة ومتطورة .. أو غير مزدهرة بالنجاح ...


من خلال هالشي ماقوول انه نحن مستحيل انه نكون مثلهم او استبعد هالشي .. لا طبعا .. هم في يوم من الأيام كانوا بشر مثلنا .. وفي يوم قد يكون واحد منا مثلهم في العطاء والتميز ..وان ماقدرنا نكون فمستواهم مب غلط ولا عيب ان نكوُن نجاحاتنا الفردية على المستوى الشخصي لانه مب بالضرورة لأن اكون ناجحه ان يظهر نجاحي عالمستوى العام.. وشي طيب وحلو انه نطمح ونحدد الاهداف في حياتنا ومن ثم نبدع فيها .. لكن علينا طبعا أن نطمح بواقعية وبعقلانية وبمستوى قدراتنا عشان نستطيع تحقيق هذي الأهداف ولا نستصعبها ونحقق التوازن المطلوب ومن بعدها نبذل كل جهودنا في سبيل تحقيقها.. ودايما هدف عن هدف يفرق .. والأهداف تتدرج في مستوياتها وأنواعها .. وكل انسان هدفه يعكس مقدار طموحه ونوعية تفكيره ووجهته في هذه الحياة .. ومثل مايقولون من عرف قيمة مايطلب هان عليه قيمة مايبذل..



مشكور لماح على هالطرح الحلو والمفيد ..

[قرموشة]

نحن كأشخاص وأفراد يطلب منا فعل الصواب ونحث عليه، ويطلب منا استخدام الخبرة والتعامل معها، ويطلب منا التعلم من الأجيال اللي سبقتنا والاستفادة من خبراتهم، لأنه من الغير منطقي ابدا أن اتجاهل خبرات الاخرين وأعيد نفس تجربة تكرار الأخطاء فأضيع بهالشي الوقت والجهد والتفكير، و مثل مايقولون علينا أن نبدأ من حيث مانتهى الآخرون وأن نكمل المشوار

اممممممم .. كـلامـج مـن ناحـيه اتخـاذ القرارات الصحـيحـه .. صــح يعنـي في أشيــاء أبــدا ما تتطـلب منـا التفكـير*مب يعني ما نفكر * ..بس نفكـر بس بالشي اللي يضمـن لنا الصـح والراي فيهـا لازم يكـون سديد100% .. والا ممكـن نخسـر أشيــاء كبيره بالمـقابــل ..
وهي المـواقـف اللي تتطـلب منـا الابــتعاد كـليـا عـن كـل شي فيـه نسبـه لو صغيـرة من الخطــأ .. يعنـي الراي * الآمـن والمضمـون *
بس في أشــياء وهي المـقصـوده في المـوضـوع ان الواحـد المـفروض يبدع فيـها .. ويكون uniqe
بمـعنى آخـر .. وتتـطـلب منـا نحـاول ونجـرب .. وبهــا الطـريـقه نكـون حـققنا شي واستفدنا حـتـى لو حـصلنا انتــقاد من النــاس .. :)
ووعـذرررا للمدااخـله لماااااااح :kcl:

[لمّــاح]

الســلام عـليكم ..

أسعدني كثيراً تواصلكم .. و طبعاً الاختلاف في الرأي لايفسد للود قضية ..

ذنيني ..

عيبني المثال الي حطيته :harhar1:

لكن الهنود سواقتهم ابدا ما تطور لأنهم يلتزمون بالي تعلموه حرفيا و ما يحاولون انهم يطورون سواقتهم و هذا الشي يسبب لنا ازمه مع الايام >> اعتقد انه فاهم قصدي

نعم ياخويه .. و مب الهنود بس، كل انسان واعي بيفهم ان الاخطاء الي ارتكبها ماهي الا مجرد بداية للنجاح ( مثل ادسون الي اخترع الليتات، حاول 200 مره و فشل .. ماقال انا فاشل، قال انا الحين عرفت 200 طريقة ماتخلي الليت يشتغل !! ) مثل هالانسان حول المواقف الي فشل فيها الى مواقف تزيد من حماسه و تعزز ثقته بنفسه ..
همم .. ظاهرياً هو فشل، لكن معنوياً و باطنياً هو يرفع من معنوياته و يزيد من عزيمته بنفسه ..
اتمنى انك تكون فاهم عليّه ..

شكراً على ردك الحلو ياخويه

عفاريتووو ..

و انك تغلط مب شي غلط ,, الغلط انك ما تتعلم من أخطاءك

انتي اختصرتي كل شي في هالجملة ..

نعم صحيح .. ولو تلاحظين معظم الي نجحوا استفادو من تجارب سابقة مرو بها و جازفوا مع درايتهم الكاملة بأنهم في احتمال يخسرون لكن في حالة اذا ربحوا ربحهم بيكون كبير !!

و الانسان العادي .. هو العادي الي عاش حياته عادي و مات عادي و سيرته الذاتيه عاديه لأنه انسان عادي و ماسوا شي مب عادي .. !! سرقتها من الاخت طلفة من هذا الزمن :harhar1:

اختيه عفاريتو .. ردج وايد حلو ..الله ايوفقج ان شاءالله و شكراً على المشاركة ..

اختيه ريم ريم ..

عيبتني ثقتج في نفسج ..

لكن مب دايماً انج اتكونين على عكس الناس و آرائهم يعني انتي صح .. يمكن هم يشوفون شي انتي ماتشوفينه ..!
المجازفة اتكون من عقب ما اتشوفين و تدرسين كل الجوانب الي اتشوفينها و غيرج يشوفها عشان اتكون نسبة النجاح كبيرة و اتكونين مستعدة لأي مشكلة اتصادفج ..

شكراً على التواصل اختيه

وحي القلم ..

بالمختصر المفيد انت من المشجعين للطريق الثاني الي ذكرته في الموضوع ..

عموماً ياخويه تسلم على المرور و تواصلك ويايه :kcl:

بوظبي ..

يعيبني تواصلج ويايه في مواضيعي ..

لـــي عـــودة ..

[لمّــاح]

عــدنا ..

الاخت هــزايم ..

احسهم رغم انهم يطبقوون التعليماات والنظرياات إلا نشووف فيهم نوع من ابتكاار..يعني يشملوون الطريقتين طريقه الإتباع والإبدااع..

استفادو من تجارب الآخرين .. و مافي نجاح من أول مره .. اكيد هناك فشل، و اكيد هناك تجارب و مجازفة و في النهاية حبهم للهدف و إيمانهم بأنهم قادرين على الوصول لمبتغاهم هو السبب الرئيسي لنجاحهم ..

اختيه شكراً على التواصل و الرد، اسعدني تواجدج ..


قــرموشه ..

عنـي أنـا شخـصيــا .. أحـب يكـون لي تفكـير مختلف عـن غيري .. أحـب أشاركـ في شي يخـليني أبدع فيـه ..

هذا هو المهم ، حبج و ايمانج بأنج مختلفه و قادرة على انج تحققين الأفضل دايما .. الانسان يوم يطمح لشي معين، يطمح لشي أكبر عن الي هو يبغيه عشان اذا فشل يوقف عند النقطة الي تمناها في الأساس و اذا توفق ترا زيادة الخير خيرين مثل مايقولون ..

يامـا واجـهت انتــقادات اتجـاه شيء رغبت فيـه لكـن أبدا ما خـلييت هـ الانتـقادات تأثر علي .. يمكـن في البدايـه بس حـسيت باحباط بس بعديــن اتخـذت منها وسيـله عشان أطـور نفسي أكـثر وأكـثر ..

لاحظت فيج حب المغامرة .. يُقال اذا الشي قالو عنه مايستوي، سويه .. لأنج اذا ماسويتيه مابيكون موجود من الأساس عشان نحكم عليه ( يستوي ولا مايستوي ) .. !
الافكار اليديدة الي في مخيلتج و حابه اتسوينها، يمكن تكون غريبه - سخيفه او حتى الثنين ويا بعض ( غريبه و سخيفه في نفس الوقت ) .. :puppyeyes:
الافكار تبقى أفكار لأنه مهمى حاولنا مابنقدر نحكم عليها لأنها مجرد افكار في مخيلتنا ولازم نسويها عشان تكون موجوده .. و انا شخصياً مايهمني اذا نجحت ولا فشلت ( اذا كان الفشل هذا مابيخليني اخسر اشيا ثانية طبعاً ) لأني عالأقل جربت شي يديد و تعلمت و هذا هو الهدف الرئيسي ..
و من الطبيعي اذا كانت عندج فكرة يديده ماتحصلين ناس يوافقونج الراي او عالاقل يعطونج الرد الي توقعتيه منهم ..
انا اقولج، مب مهم .. !
ليش ؟؟
يمكن لأنهم مايفهمون الفكرة 100% .. يمكن طريقتج في سرد الفكرة و طرحها امامهم ماكانت بالطريقة المطلوبة عشان تخليهم يوافقون و يمكن و يمكن و يمكن ( حطي احتمالات لين مايشيب شعر راسج ) .. لكن يتم هناك حل واحد الا وهو انج اتجربينه بنفسج و اتشجعين نفسج بنفسج و على الله اتوكلي و بإذن الله بتتوفقين ..
للتجارب في هذه الحياة متعة فريدة مايحسبها الا الي يجرب ... يحس بالمتعة، يحس بالمغامرة، يحس بالصعوبة و التحدي ويحس بالسعادة حتى لو ماوصل للنتيجة الي هو يبغيها .. و مانسميها تجربة الا لأنها صعبه، لنها لو كانت سهله جان كل حد سواها وماحسينا بالتحدي و المتعة الي نباها ..

مـن الصـف 1 الى الصـف 9 كنت الاولى على صـفي .. ومــا أرضى باي مـرتـبه أقـل .. لكـن استوت لي ظـروف .. وخلتنـي أكون الثانيه في الصف العاشر .. كنت منقـهره لأبعد الحـدود .. ما أرضاها على عمري كـيف اكـون الثانـيه!! ..
وفعلا استرجـعت هـ المرتبـه بجـهدي .. واستمـريت على هـ المنـوال ..
يعني اللي أبا أقولـه انـه الشخـص لمـا يتذوق طـعم الرقـم ( 1) .. صعب عليه يستسيـغ الرقـم (2)

آآه يالاحراج :nono:
انا ماحسيت بطعم الرقم 1 الا في الروضة .. :harhar1:
بس اتعرفين .. مع اني ماكنت من الاوائل و علاماتي عادية .. الا اني دايماً احصل شهادات تقدير و غيره من المدرسة و من برع المدرسة و لين الحين في الجامعة انا ما اطلع من الاوائل لكن اتيني شهادات تقدير لأشيا ثانية اسويها ..

الدراسة في نظري هي اني احفظ نضريات قديمة اجتهد في اختراعها غيري .. و نجاحي في المدرسة او الجامعة حتى يعتمد اعتماد شبه كلّي على الحفظ و على كثر ما احفظ نضريات على كثر ما اييب علامات !!
الي يرسب في الدراسة بشكل عام مايكون مهتم و خصوصا مايكون مهتم في النظريات هاذي .. و البعض الآخر ( و انا منهم ) ذاكرتهم ماتستوعب هالكثر حفظ .. هذا مايعني اني غبي أو الي ماييبون علامات زينه يعني أغبياء، لكن مخيلاتهم و عقولهم بعيدة عن الحفظ الأكاديمي لكنها قريبة و مبدعة في امور اخرى ..
مثال على كلامي .. اذا تخرجت من الجامعة و كنت يايب B و اربيعي يايب A .. في احتمال 99% انه نتوظف في نفس المكان و نفس الدرجة الوظيفية .. لأن التوظيف في البداية يعتمد على الماضي ( الحفظ ) و مايعتمد على المستقبل ( مخيلة الشخص و إبداعة ) .. و في نظري التحدي الحقيقي يبتدي عقب الجامعة و دام انه عندي هدف فما اتوقع بيكون هناك حد لمخيلتي عشان اتخطط لي و تتخيل لي الطرق الي بتوصلني للهدف الي ابغيه ..
لكن هذا مايعني اني اودر دراستي و اكتفي بالشغل، كل شي يكمل الثاني و الترقية و النجاح ايضا له اساسيات و من ظمن هالاساسيات الدراسة و الشهادة

اختيه قرموشه .. ردج وايد عيبني و خلاني افتح بيبان يديده و اتكلم وايد .. :kcl:
السموحه عالاطالة و لي عودة ..

[لمّــاح]

عــدنا ...

تنينه :kcl:

الجزء الاول عيبني و ماعندي اي تعليق عليه ..

هـناك أنااس يتفادون التجارب ويحاولون يعيشون في روتين المـهم هالـروتين لا يسبب لـهم التـعب أو الأرق

هالناس ماعندهم حب المغامرة .. يمكن خوفهم من انهم يخسرون هو الي مأثر عليهم .. و يمكن مايخسرون شي ( مادي ) لكن يمكن يخسرون شي ( معنوي ) و خوفهم هو من كلمة ( خسرت - فشلت ) ..
بس ماشوف انها بتأثر .. ياما ناس خسرو و ياما ناس فشلو .. !!
على سبيل المثال .. الارقام في دبي ياما غيروها .. ( اقصد ارقام السيارات ) .. نعم يمكن فشلو في اختيار الشكل المناسب من اول مرة وثاني مره و ثالث مره .. لكن في النهاية اختارو شكل مناسب ..
انا بصراحه ما اهتميت وايد بالفشل و التغيرات هاذي، لكن لين اليوم وباجر بتم اقول ان شرطة دبي حاولت و غيرت الارقام في دبي للأحسن ..

والذين حققوا إنجازات باهرة في حياتهم، وخلد التاريخ أسماءهم قد تجرعوا مرارة الفشل طويلاً قبل أن يحققوا هذه النجاحات، فالنجاح الحقيقي الدائم لا يأتي عادة إلا بعد صراع مرير مع الفشل،

صح و الامثلة على كلامج كثيره ..

تحسب المجد تمرا أنت آكله لن تبلغ المجد حتى تلعق الصبرا


أشـكرك أخويه لـمّـاح ع الموضوع المـفيد والجميل

اختيه تنينه ..

بصراحه ؟؟

لج اسلوب حلو و يعيبني .. و عندج امثلة و موسوعة تظم الكثير من الامثال و غيره و هذا يدل على ثقافتج و حبج للمطالعة ..
اتوقع لج مستقبل حلو .. و الله ايوفقج ان شاءالله

الـــغاليــة ..

أسميني عيزت و انا اكافح و ارد بالدور عشان اوصل لردج:harhar1: لأنه عيبني خصوصاً و ان بعض الي كتبتيه عكس الي انا كتبته و يعيبني يوم اشوف حد مختلف ويايه في نقطة او اكثر ..
بس قبل كل شي الاختلاف في الرأي لايفسد للود قضية ..

نحن كأشخاص وأفراد يطلب منا فعل الصواب ونحث ... الى نهاية الفقرة

كلامج صحيح 100% .. انا ماقلت اني بنسى الخبرات القديمة و ببتدي من الصفر .. بالعكس !!
لكن الي قلته، الخبرات هي من قرارات اتخذها غيرنا في مواقف قديمة، و عشان نستفيد منها لازم نطورها للأحسن .. السبب ؟؟
مواقفنا - زماننا - و الشخصيات كلها تغيرت ولازم انعدل في هالخبرات لو شويه بس عشان تطلع بالحل الصحيح الي بيخلينا في السليم و المظمون .. اتوافقيني الراي ؟؟

قد تكون تقصد في موضووعك هنيه أن نتجنب الدخوول في دائرة الحياة الروتينية واللي عبرت عنها ب( فعل الصواب ) ..

عليج نور .. ما اكون انسان عادي .. أكون انسان لي بصمة في الحياة، مب شرط اسوي شي يخليني مشهور عالمياً مثل اديسون او نيل ارمسترونغ .. لكن عالأقل اكون مشهور في المجتمع او البقعة الي انا عايش فيها و مايهمني راي الناس كثر مايهمني رايي انا شخصيا في عمري ..

تتكلم في هالموضووع عن فئة في العالم يسمونهم ( المبتكرون innovators ) وهاييلا نسبتهم في العالم ماتتجاوز ال 13% .. وهم اللي يقودون عمليات التطوير والابداع والاختراع والاكتشاف في هالحياة ..اي مخترع ومكتشف وقائد متميز وانسان له تاثير قوي على الناس ..

اختيه انتي تتكلمين عن اشيا صارت و انتهت ( مثل الي اخترع التيلفون و الي اخترع الطيارة و السيارة ... الخ ) .. نحن في زمن تقريبا كل شي موجود فيه .. و المبدع في زمننا هو الي يطور الاشيا الموجوده من جيد الى جيد جداً و من جيد جداً الى ممتاز و هكذا ...
نحن كلنا نبغي انكون متميزين في شغلنا، دراستنا أو اي شي نحن مهتمين فيه ..

لكن علينا طبعا أن نطمح بواقعية وبعقلانية وبمستوى قدراتنا عشان نستطيع تحقيق هذي الأهداف ولا نستصعبها ونحقق التوازن المطلوب ومن بعدها نبذل كل جهودنا في سبيل تحقيقها..

هالنقطة مهمة و يمكن فاتتني .. الواحد يوم بيطمح لشي يطمح لشي هو يقدر يسويه .. يعني مايقول لي بخترع مثلا آلة الزمن ( مثل الي في رسوم رحلة عنابة ) لأن هالشي مستحيل يستوي

ودايما هدف عن هدف يفرق .. والأهداف تتدرج في مستوياتها وأنواعها .. وكل انسان هدفه يعكس مقدار طموحه ونوعية تفكيره ووجهته في هذه الحياة .. ومثل مايقولون من عرف قيمة مايطلب هان عليه قيمة مايبذل..

ماعندي أي تعليق ... كلامج في محله ..

اختيه الغاليه اسعدني جدا جدا تواجدج و ردج في موضوعي و اتعمدت ارد على كل الردود بس عشان اوصل لهذا الرد ..
اتمنالج التوفيق دايما و ابداً


---

دمتم بود اخواني

[مسافرللجفا]

السلام عليكم و الرحمة

.. لماحكـو ..

عيبنـي هـدف مـوضوعـك و عيبنـي السرد و طريقـة الموضوع مع طرح الامثلـه .

في نقاط لفت انتباهي و خلتني اعيـدها اكثر من مره عسـب استوعـبها بشكل ادق ، معناته انه الواحد لازم يستفيد من كل كلمه تدخل في اذنه ، سواء كانت معلومه صحيحه او خطا ولو خبر او نظريه او الى اخره ، لازم نسمع الخطا عسب نتجنبه و نسمع الصح عسب نبنيلنا الاساس الصحيح و نمشي عليه . اذا الواحد ما بيستفيد من اخطاءه و بيمشي على الصواب فهذه فاشل نوعا ما ، اما الي بيستفيد من كل فعله ايسويها سواء صح او خطاء فهذا الناجح و المبدع .

وكلامي هذا يدله هذا العالم

مثل ادسون الي اخترع الليتات، حاول 200 مره و فشل .. ماقال انا فاشل، قال انا الحين عرفت 200 طريقة ماتخلي الليت يشتغل !!

معناته استفاد من 200 معلومه وطريقه عسب يتجبنها في المرات اليايه ،
و هذا الي يشجع الواحد انه ما ييأس لما يفشل ، هي طريقه وحده عسب يشغل الليت لكن غلط 200 مره عسب يوصل للصح .
ومع هذا ما يأس و قال اني عرفت ها الطرق كلها ما تخليني اغلط مره ثانيه .

ومثل قصة احد الصحابه مش مذكر الاسم بالضبط ويمكن واحد من الخلفاء الراشدين يوم اعطى لبنته 100 حديث و كلها غير صحيحة قالها احفظيهم
و يوم سألته عن السبب قالها عسب اذا مر عليها اي حديث تعرف اذا كان صحيح او موضوعي ، ( مب مذكر القصه لكن الهدف واضح )

الانسان كيف بيعرف الصح من الغلط الا بالخبره .

ولها الشي اتلاقون قوانين الحياه كل يوم عن يوم تتغير لانه الحياه تتغير مع الايام و يحتاج لها قوانين الواحد يبدع فيها عشان تكون حياته سليمه ،
لكن ما يمنع انه نستفيد من حياة غيرنا وناخذ خبراتهم .

و عن الرقم 1 و الدراسه ،
تبدأ منافسه الاشخاص عند اول نقطه في مجاله ، مثل ما قلت انه ممكن الواحد يتخرج و هو يايب A و الثاني يتخرج و يايب B و وظيفتهم مثل بعض ، بس منو الي بيترقى اكثر ؟
هذا الي يبدع في مجاله ، وكيف يبدع ؟ طبعا من الخبرات الي استفاد منه في ايام الدراسه . وما ننسى انه الشهادة تلعب دور كبير في ها الايام للترقيات .
المطلوب : شهادة + خبره .


امشي على صوابك و استفيد من اخطاءك .

..

شكرا لمـاح
و السمـوحة ع الاطــاله ،