الجـزء التاسـع والعشـرون و
الأخيــــــــــر
***********************
(الأربعا) 27 ابريل 2005
***********************
بعد ما رجعت عليا من الدوام .. نزلت من السياره هي واحلام ومديه .. دخلوا البيت كان محمد ومانع يالسين ويا ابوهم وامهم .. ويبين عليهم انهم يرمسون عن الشغل الشاغل ها اليومين.. سكتوا يوم شافوا البنات داخلات ..
احلام ومديه استغربن ها الاجواء اللي عامه البيت من يومين .. لكنهن سارن غرفتهن يبدلن .. اما عليا تمت واقفه وهي تتطالعهم ..
محمد: سيري بدلي وارتاحي ..
عليا تجدمت ويلست حذال امها وابوها .. شكلها كان مستغبن بس كانت ميوده عمرها ..
مانع: ماياهم خير ها الاثنينه .. ما مداهم ..
ام راشد: هذا قضا من ربك ولا اعتراض عليه يا وليدي
بوراشد: الغلط منا نحن .. ليش ماكنا من قبل نعرف عن ها السالفه
محمد: صدقت يا ابويه.. ها نتايج الجهل لها الامراض ..
عليا: أي جهل يا محمد.. نحن شدرانا انه بيظهر فينا ها المرض .. ماجد حد اشتكى..
محمد: دام الحين درينا انه المرض منا وفينا ووراثي.. لازم كلنا نسوي هاي التحاليل .. كل حد فالعايله .. ساره اكيد يايبتنه منج يا عليا .. ومروان يا من ابوه ولا امه ..
عليا: واذا من امه ترا بعد ريل شيخه اختيه احتمال عنده وبعد احتمال يكون في شيخه
مانع: مستحيل في ثنينتهم الجين.. عيالهم كلهم صاحين مافيهم مرض الثلاسيميا..
محمد: هي صح .. يا سالم فيه ولا شيخه .. واحتمال ثنيتهم مافيهم الجين .. الله سلمهم ولا كانت العواقب وخيمه عليهم ..
بوراشد: بالعووونه يا عيالي.. دامكم الحين عرفتوا سالفته ها المرض ديروا بالكم على عمركم وعيالكم وسيروا سوو التحاليل
عليا: ان شاء الله .. ما بنخليهم جيه ..
مانع: والحين شو مصيرهم ها الاثنينه
عليا: خلاص يا مانع .. كلن يروح فدربه
محمد: واايد صعب الطلاق..
ام راشد دمعت عينها وتمت تمسح دموعها بطرف وقايتها اما عليا اللي كانت حذالها حبتها ع راسها وهي تحاول تقوي عمرها ..
بوراشد: شو بيسون بعد .. نحن ما نبالهم العذاب عقب
محمد: صدقك يابويه .. يهون كل شي ولا عذاب العيال ..
عليا: هي والله .. انا يوم اشوف حالة جاسم قلبي يتقطع عليه عيني ماتغضي الا وانا سامعه حسه ومطمنه انه بخير .. من خبروني انه في ها السكري وقلبي كل يوم والثاني ناغزني عليه اخاف عليه من أي تعب.. كيف لو بنتي اتيب ياهل مريض ما بقدر انا اتحمل ولا هيه ..
محمد: صح كلامج يا عليا .. كله ولا الظنى .. هم الحين متعلقين فبعض شي طبيعي ما بيقدرون يتقبلون الفكره لكن لو جربوا حب الظنى بيهون عليهم كل شي في سبيل انه ينولد معافى..
عليا وهي تتنهد: ماعليه بيكبرون وبينسون ..
مانع لف على عليا وقالها كلام ماكان مدركنه ..
مانع: جان نسيت انا ..
عليا اطالعت مانع .. سكتت ما قدرت تناقشه .. موت مديه بنت عمه وايد مأثر فيه ..على الرغم من شخصيته الحلوه الا انه ما يقدر ينسى من كانت فيوم حبيبة قلبه وخطيبته من يوم كانت صغيره .. قدر موقف مروان وساره وحس انه حالهم واايد اصعب من حاله .. مانع انحرم من شوفتها .. لكن مروان وساره الايام جدامهم واليوم اذا هو يشوفها حلاله باجر لا .. بيتعذب اكثر كل ما يشوف ساره واطيح عينه بعينها ..
بعد ها الاجواء .. قامت عليا من مكانها عسب تبدل .. دخلت حجرتها وقررت انها تتصل بساره .. دقتلها مرتين لكن ساره ماترد ..حاولت تكلمها امس الا انها مابغت تحسسها انهم يضغطون عليها .. واقتصرت على معرفه اخبارها من مي..
اما الي كانوا يالسين فالصاله .. ظلوا على حالهم .. يحاولون يتناسون الموضوع الا انه ينرد وينفتح .. نش محمد من يلسته عشان يزقر عبير الي كانت يالسه فالحجره .. دش عليها الغرفه ولقاها ترمس فالتيلفون ..
محمد: هلا ..
عبير: اهلين .. حياك .. أي فجر شو كنتي تقولين
تقرب محمد وعق غترته ويلس حذال عبير الي ترمس اختها..
فجر: اقولج ابي رقم مي او ساره ؟ ابي اطمن على ساره .. كسرت خاطري لمن قلتيلي عنها..
عبير: الله يعينهم الصراحه . بدزلج الرقم ب مسج .. الا قوليلي شو اخبار الدراسه وياج؟
فجر: تمام الحمدلله .. علامات امتحاناتي ارتفعت وايد.. وناويه ماتخرج الا بامتياز ان شاء الله .. وتذكرتج مع بطاقة دعوه حفل الخريجين بتوصلج لين عندج..
عبير: هههه ان شاء الله ولا يهمج انا وبناتي ومحمد بنكون كلنا وياج بس فرحينا انتي ..
محمد: بلاها فجر تامر ع شي؟
عبير: تقول وقت تخرجها ان شاء الله نروح نحظر حفل تخرجها وباذن الله بامتياز
محمد: اوووه يعني من احين لازم نيمع للهديه .. امتياز هذا يعني لازم الهديه شي راهي لكن برايه تستاهل
فجر: هههههه قوليله مشكور مايقصر ييتكم تكفي.. خلاص سلمي على بناتج و لاتنسين تدزيلي الرقم ..
عبير: اوكي وانتي سلمي على بشار بعد ..
فجر: يبلغ.. في امان الله
عبير: مع السلامه..
وطت عبير سماعة التيلفون والتفتت لمحمد الي كان يطالعها ويبتسم ..
محمد: ماشاءالله فجر معزمة ع الامتياز ..
عبير: أي الحمدلله يوم انها بدت تراعي دراستها ..
محمد: الله يوفقها ان شاء الله.. يلا نشي ياي ازقرج عشان نتغدى انا يوعان
عبير: اويه الغدى سوري فديتك التهيت ويا فجر..
محمد: هههه لا ماعليج .. اصلا الاجواء فالصاله تسد النفس قلت اشوف حرمتيه خل تردلي النفس شوي
عبير: ههههه هي .. يالله لا تخليني انفخ ريشي الحين
محمد وهو يغمزلها: من حقج .. مو ريلج محمد
عبير: يعلني ما خلى من محمد ..
فها الوقت سمعوا دق ع الباب .. ضحكوا عبير ومحمد على الغزل الي ماقدروا يكملونه .. شوي ودشت احلام ووراها مديه ..
احلام: اميييييه يواااعاا نحن ..
عبير: ههههه شوفوا هذا الشبل من ذاك الاسد ..
محمد: يلا انزين قوموا ..
ونشت العايله الصغيره المكونه من الاربع أشخاص وتوجهوا للصاله الرئيسيه .. ومحمد كل شوي يتحرش فوحده من بناته وهن يضحكن عليه .. ويلسوا ويا الشواب وغيروولهم جو ..
****
العصر من بعد ما وصلن مي وساره البيت من موقف الباصات .. دخلن البيت .. وكعادة يدتهم يالسه ويا دلالها تشوف التلفزيون ..
مي: السلام عليكم
ام سيف وقفت لهم : وعليكم السلام
ساره تجدمت مي وسلمت على يدتها وعقبها مي.
ام سيف: شحالكن بناتي ؟
سكتت ساره .. ماردت ع يدتها تمت يالسه ع الغنفه وتلعب بطرف شيلتها ..
ام سيف: ساره فديتج شو بلاج ؟
ساره: ماشي امايه
ام سيف نشت ويلست حذال ساره وهي تمسح ع راسها ..
ام سيف: حبيبتي الغاليه لاتتضايجين .. انا خبرني ابوج عن السالفه..من امس مابت الليل
ساره وطت راسها ودموعها تيمعت في عينها ..
ام سيف: ساره امايه انتي تبينه مروان ؟
ساره: يعني لو ماباه ليش بوافق عليه
ام سيف: انزين و عقب ماعرفتي شو تبين تسوين ؟
ساره: مابيدي شي اسويه لكن امايه دخيلج رمسي ابويه قوليله يرمسهم يخلونا في حالنا
ام سيف: بس حبيبتي انتي مابترومين تيبين عيال جيه بتمين بلا بذره بتحرمين نفسج وبتحرمينه هو
ساره بعصبيه: انا مابا عيال
ام سيف: هاي مب رمسه عاقل .. لكن والله انا ماعرف شو الحل .. ميوه ماشي علاج حق هالمرض
مي: امايه هي شاله المرض مب فيها
ام سيف: ادري خبرني ابوج .. لكن عيالها ماشي لهم علاج ؟
مي: لا امايه ماشي لهم علاج يتمون جيه يبدلولهم دم ومايعيشون وايد ..
ام سيف: يعني ماتروم تيب ياهل صاحي
مي: امبلا اذ الله راد .. لكن شو ذنبهم اللي بتيبهم مرضى!
ساره بعصبيه: مي قلتلج بفحص ع الجنين وبسقطه اذ فيه المرض
ام سيف وهي تتطالع ساره بتعجب
ام سيف: شووو تسقطين .. بتجتلين عيالنا وتبهدلين عمرج!!
ساره ودموعها تلالي في عيونها
ساره: امااايه درتي وياهم بعد!! بغيتج عون صرتي فرعون
مي: ساروه انتي فأول المشوار والله قال لاتلقوا انفسكم للتهلكه .. انتي تدرين انه فيكم ها الشي ليش تعذبون عماركم حرام عليكم لييش
اغتبنت مي وهي ترمس ودمعت عيونها .. اما ساره ردة فعلها ها المره وهي تشوف اختها وايد بارده ..
ساره : انا بسير فوق امايه
ام سيف وهي تطالع ساره: سيري فديتج ارقدي ارتاحي ..
طلعت ساره من الصاله وتمت مي يالسه ويا يدتها تمسح دموعها ..
ام سيف: ميوه غناتي مسحي دموعج
مي: امايه ماتهون عليه ساروه تتبهدل.. الحين ماخذنها حب الريل لكن عقب العيال حبهم شي ثاني..
ام سيف: يا اميه يوم انتو عيال ولدي لو صابكم مكروه جنه انا اللي صايبني كيف الام.. صح كلامج يا مي لكن ساره الحين محد بيروم يقنعها ولا حد يروم يجبرها ..خلوا ها الشي يستوي بينهم هم الاثنين ..
مي: انا بسير اطالعها..
ام سيف: سيريلها بس لا تصيحين عليها ولا تزنين خليها ترتاح
مي: ان شاء الله..
طلعت مي من عند يدتها ولاقفت ناعمه عند باب جناحهم وشكلها تتحرطم..
مي: ناعمه
صدت ناعمه عليها وتجربت منها مي ووايهتها..
ناعمه: زين يوم افتكرتي انتي بعد وسلمتي عليه
مي: ليش يعني؟
ناعمه: توها سويره خطفت ازقرها ولبستي .. ما تستحي
مي: يالله يا نعوم.. تحيدينها متضايجه..
ناعمه: بلاها انزين
مي: تستعبطين نعوم
ناعمه: ميوه بلاكم
مي: ابويه ماقالج ؟
ناعمه: عن شو
مي: عن ساروه ومروان ؟
ناعمه: لا ماطراهم لي بلاهم
مي: دخلي دخلي جناحج بخبرج ..
دخلت مي ويا ناعمه وحكت لها اللي صاير واللي يمكن يصير
ناعمه وايد تضايجت من سمعت الخبر وتمت تصيح ..
مي: ناقصتنج انا ..بروحي ضايجه تصيحيلي انتي بعد
ناعمه: تكسر الخاطر ساروه والله ماتستاهل
مي: ها حالها .. لا تاكل ولا تشرب الا بالزور من امس الصبح ماطاح بطنها شي لين اليوم ..
ناعمه: ماتنلام .. انزين احين قوم امج شو بيسون
مي: اميه وخالي مصرين انه مروان يطلق ومروان طابنهم ولا يرد عليهم
ناعمه: وساروه ؟
مي: ساره استخفت .. اول البادي تقولي انا لاني احبه مابحرمه من العيال مصيره يبى يشوف عياله .. وعقب ردت تقول والله قالولي اقدر اسقط الجنين اذ فيه المرض ويوم نتحرطم عليها تقول انا وهو اتفقنا خلاص مانبى عيال..
ناعمه ردت تصيح يوم سمعت مي جيه ترمس
مي: اوهو نعوم عاد مب متفيجه انا اراضي منو والا منو
ناعمه: قلبي معورني عليها
مي: يعني انا اللي قلبي مب معورني .. هي على فراشها طول الليل تصيح وانا تحت لحافي اشاركها ..
ناعمه : الله يعينها ..
مي: يالله بقوم انا بسير اتسبح وبرقد
ناعمه: يوم بتقومين تعاليلي
مي: انزين
طلعت مي من عند ناعمه وسارت غرفتهم لقت ساره طايحه ومتلحفه .. خلتها يمكن ترقد وترتاح اكثر في البيت بما انها مارقدت هاليومين زيين..
****
دخل مروان البيت بساعه متأخره من الليل .. استغرب يوم شاف امه وابوه فالصاله يالسين ها الوقت .. شكلهم يتريونه يوصل .. ما بيعدون له ها الليله ع خير .. سلم عليهم مروان وطلع بيروح حجرته لكن ابوه وقفه ..
راشد: ويين ؟!
مروان: ها ..
ميره: مروان نحن نترياك توصل البيت ..
مروان وهو واقف ع طرف ويشوفهم: بسير ارقد
راشد: تعال اباك
مروان: ابويه تعبان من الدرب .. بسير اوطي راسي.. ومن اصبح افلح
راشد بحزم: مروان اقولك تعال
مروان تقرب من ابوه بيأس ووقف مجابلنهم: آمر طولي بعمرك..
ميره: ايلس انزين
يلس مروان على قبضه الكرسي
راشد: مروان شو صار احين بموضوع ساره
مروان: ماصار شي .. ساره حرمتيه وباخذها
راشد: مروان عن الخبال ارمسك رد عليه زين
مروان: وانا شو قلت لك ابويه ساره حرمتيه ع سنة الله ورسوله وبتم حرمتيه
راشد: شوف انا ها خبالك مايوز لي
ميره : راشد شوي شوي ع الولد
راشد: ماتسمعينه انتي
مروان: شو تبوني اسوي انزين
راشد: طلقها
مروان: مابطلق
راشد: مروان ابويه مدامك ع السيفه لاتوهق عمرك وتعلق البنت فيك زياده خلاص
مروان: ابويه انا وساره راضين ونحن مب يهال عقولنا ف روسنا ونعرف نتخذ قراراتنا..
راشد: الا ماتعرف شي يوم انه ها قرارك ولا بتعرف حتى لا انته ولا هيه..
مروان: ابويه انا ساره اباها وراضي اتم بلا عيال انا وهي .. وجان يبنا عيال والله بلانا بمرضهم ها قضاء من ربنا ما بنعترض عليه
ميره: يا بويه الله سبحانه وتعالى قال لاتلقوا بانفسكم الى التهلكه حرام الله مايرضى اللي بتسونه بعماركم ..
راشد: مروان طلاق انته بتطلق و ساره خلاص ودر سيراتك لها لانها بتحرم عليك
تم مروان يطالعهم ويحس عيونه بتظهر من جفونه من كثر ماهي مخبيه دموع وراها.. شو يقولون اهله .. شو ها الرمسه اللي ما تدخل راسه.. عقب كل شي .. يتخلى عنها وبكل ها السهوله.. ما يقدر .. هو ما يقدر يتخذ ها القرار.. حاول وايد يقنع نفسه لكن يشوف عمره فدرب مظلم بلاها .. كانت لعيونه النظر ولقلبه شرايينه اللي يموت بلاهم ..
هذي ساره .. حبه .. من صغره .. بعد ما ضمن انها له .. ينحل ها الضمان.. كيف جي .. مايقدر يستوعب ها الكم من الضغوط عليه ..
روح عنهم مروان غرفته بدون مايرد عليهم .. خلاص تعب من هالسالفه.. الكل ضدهم هو وساره .. محد بيقدر ها الحب .. اللي اصبح فها الزمن من العجايب السبع..
************************
(الخميس) 28 ابريل 2005
************************
نزلت ريم من جناحهم وهي لابسه عباتها ووقايتها وفايدها شنطتها .. لقت عمتها ولطيفه وعمار ونوره فالصاله يالسين يتريقون .. صبحت عليهم ويلست وياهم ع الطاوله ..
مريم: عيل نايف وينه؟
ريم: الحين ياي ..
مريم: مادريبكم بتنشون من وقت ولا ترييناكم ع الريوق
ريم: لا عادي فديتج ..
لطيفه: ريمان بتسيرين عند خواتج؟
ريم: بنشلهم وبنسير بيت اميه
مريم: هيه .. بتيمعون هناك اليوم ..
نوره: ماما ريمان .. انا بسير وياكم
ريم وهي تطالع نوره: حبيبي عقب هناك بتصيحين تبين امج
مريم: لالا انا اباج يلا ماشي سيره
نوره تمت مبرطمه .. وريم تطالعها وتبتسم الها ..
ريم: لاتزعلين نواري .. بنوديج الالعاب عقب انا ونايف اووكي
نوره اطالعت ريم: مابا
مريم: ههههه ييه يا انتي.. ماعليج منها ريمان ..
لطيفه صدت على ريم وسألتها: وساروه شحالها؟؟
ريم بأسى: اخ يا ساره .. كاسره قلوبنا
مريم: الله يعينها على مابلاهاا .. والا منو كان متوقع يصيبهم جي
لطيفه: والله يا امايه انها كسرت خاطري.. يالسين عندها يومين وهي تصيح صياح يقطع القلب.. تسكت وترد تذكر الموضوع وتصيح
مريم: فديت روحها .. ماتستااهل والله ..
ريم تمت موخيه .. هي بروحها قلبها متقطع على اختها .. ما علقت على شي .. وتمن لطيفه ومريم يرمسن فالموضوع وهن قلوبهن على ساره ..
دش عليهم نايف ها الوقت .. سلم عليهم وحب امه ع راسها .. كان يسمع المناقشات وطاحت عينه ع حرمته اللي كانت موخيه تلعب بسير شنطتها .. يلس حذالها وغمز لامه عسب تغير الموضوع .. نفسية ريم ها اليومين وايد تعبانه بسبة اختها وكله تحاتيها ..
نايف: ريمان فديتج صبيلي حليب ..
ريم وهي تطالع نايف: ان شالله ..
مريم وهي تقرب الطبق منهم ..
مريم: كلوا فديتكم .. عاد تريقنا نحن عنكم
نايف: بالهني والعافيه ..
وبعد الريوق ترخصوا ريم ونايف من الي يالسين وطلعوا .. ركبوا السياره وحرك نايف صوب بيت خاله سيف.. دخلوا السياره داخل البيت ونزلوا بيسلمون على ام سيف.. كانن مي وخواتها يالسات تحت فالصاله يتريون ريم تمر عليهم ..
ريم: وساروه وين؟
مي: ساره ما بتسير .. مالها بارض تقول
ريم اطالعت نايف وردت تتطالع يدتها .. ما يقدرون يجبرونها على شي ..
نايف: خلها ترتاح فالبيت
ام سيف: الله يطولي بعمرها .. مويمه من يت وحالتها مول ما تسر لا عدو ولا صديق..
ريم: الله يعينها ..
مي: والله صدق كآآآبه ..
مها: حتى رقاد اظني ما ترقده هيه ..
ام سيف: وين بتغضيلها عين وهي يبونها تبعد عن ريلها..الله يعينهم ع مابلاهم ..
ريم تنهدت بيأس: يلا عيل نحن بنسير .. وينه جاسم
مي: بزقره .. يلعب بلي ستيشن جنه ..
سارت مي تزقره لقته ويا مايد يالسين يلعبون ..
مي: يلا جسوم ميوود بنسير بيت امايه
مايد: انا مابسير ..
جاسم: شحقه ما بسيير
مايد: جسوم ماروم اميه حليلها تعبانه وحامل بيلس عندها
جاسم: ولد امك يا الهرم..
مي: جاسم خله شو تباه .. يلا بنسير ..
جاسم: ما بيي انا بعد
مي: جب ولا كلمه.. امايه بتزعل .. ميود ما يبا يسير عشان ما يزعل امه
مايد: هي جاسم سير شوف امك .. انته ما تلقاها دوم
جاسم: انزين انزين بسير .. اصلا بروحي متوله عليها .. ماشفتها ها الاسبوع..
طلع جاسم ويا مي من الحجره وتوجهوا للصاله وين كانوا الجماعه يالسين .. سلموا على يدتهم وظهروا ويا نايف وريم سايرين عند امهم ..
اما ام سيف .. فتمت يالسه محلها وفاديها مسباحها تسبح .. محد تم فها الايام ما فكر فساره ومروان وفها المصيبه اللي طايحين فيها .. كانت ام سيف وايد متضايجه .. زقرت على مايد عشان يسير يشوف ساره ويرد يطمنها عليها ..
مايد: انزين الحين بسير اشوفها
ام سيف تمت متردده ..
ام سيف: ولا اقولك ميود .. تعال بأجب عليك .. انا بسير اشوفها بروحي
مايد: امايه وين بسيرين..ماترومين تركبين الدري
ام سيف: لا ماعليك اروم ..
ركبت ام سيف الدري وهي مجأجبه باديها على جتف مايد .. وبخطوات بطيئه وصلت ام سيف فوق .. توجهت لقسم البنات .. كان مظلم وماله حياه .. دلاها مايد ع حجرة ساره وبطللها الباب من عقب ما دقه ..
ساره ركزت اكثر باللي عند الباب .. ما توقعت يدتها بتركب لين فوق .. قامت من طيحتها ..وام سيف شغلت الليتات ..
ساره: امايه شو يايبنج فوق..ماترومين
ام سيف: رمت عاد انا .. يايه اطمن عليج بنيتي
ساره: تعالي يلسي ..
تجدمت ام سيف من ساره ويلست حذالها ع الشبريه .. كان شكل ساره باهت وتحت عيونها سواد فضيع .. ضعفانه وايد وهموم الدنيا ع راسها ..
مايد: امايه زقريني يوم بتنزلين ..
ام سيف: خلاص فديتك ..
طلع مايد وهو الثاني مستغرب من حال ساره اللي وصلتله .. وينها ساره الانسانه الي عايشه حياتها ومايخرب على وناستها شي .. وينها اللي تحشر الدنيا عليهم بضحكها ومصخرتها وغناها .. ماعاد لها حس .. ولا وجود .. جثه طايحه ع السرير ..
ام سيف: ليش معذبه عمرج جذيه يا اميه؟
ساره: ما عذبت عمري
ام سيف: شوفي عمرج فالمنظره شقى غاديه .. هلكانه انتي
ساره: ماعليه امايه ها من فقر الدم ..
ام سيف: اشهد .. ها حالج الا من دريتي عن مروان ..
ساره: امااايه
ام سيف: فديتج لا تعذبينا جذي .. حالج ما يسر مول ..
ساره: ماعليه امايه ..
ام سيف: شو ماعليه
ساره: مادري مادري .. بطيح برقد انا
ام سيف: تقصين عليه .. ولا بترقدين
ساره: امايه خلاص .. بس ماروم اتحمل لا ترمسون فالسالفه خلاص
ام سيف تمت تتطالع ساره اللي تذرت عنها تحت لحافها .. شكلها كان يغمض واايد .. ام سيف دمعت عينها وقامت من ع الشبريه .. عل وعسى ترقد .. بندت الليتات وطلعت من قسم البنات وتوجهت عند ناعمه ..
دخلت عليها ولقتها يالسه ويا مايد وعفرا وتسولف وياهم عن الياهل اللي فبطنها ويسألونها عنه ..
ابتسمت الهم ام سيف ويلست وياهم تقزر شوية وقت لين اذن الظهر ونزلت عنهم ويا مايد ..
قبل المغرب كانت ساره بعدها طايحه ع سريرها طول الوقت تحاول ترقد لكن تيلفونها الي ما وقف من الدق ما خلاها..ماتقدر تحطه ع الصامت تخاف مروان يتصصلها فأي لحظه ..كانت امها تتصل .. خالتها .. خالها .. مي واحلام .. ماترد على حد أبدا .. تمت تتطالع المكالمات بضجر.. شو يبون منها .. كافي اللي صاير ليش هم حارقين اعصابهم لها الدرجه .. خل يخلون حراق الاعصاب الها هيه ولمروان..
دق تيلفونها مره ثانيه .. كانت المتصله مي من تيلفون البيت .. ترددت ساره فالرد لكنها توقعت انها تكون وحده من البنات ..
ساره: الو
مي: عنبوج شعنه ما تردين علينا من اصبحنا نتصل
ساره: بس جي
مي: سارووه..
ساره: مي شوفيكم .. انا يالسه فالبيت بخير وماعليه شر .. بداله حشى كل شوي حد اتصل
مي: ساروه ما ينلامون .. يبون يتطمنون عليج.. اول مره تسوينها كلنا نسير وانتي لا ..
ساره: مالي بارض اجابل أي حد
مي: اميه وايد زايغه عليج
ساره: شو يزيغها .. انا بخير ما فيني شي
مي: همم .. والله انتي ..
ساره: بلاني انا ..
مي: ماشي ماشي.. خلاص بخليج ..
ساره: اوكي باي
سكرت ساره التيلفون على طول من غير ما تاخذ أي رد من مي اللي تمت تتطالع سماعة التيلفون وتتطالع امها اللي يالسه حذالها .. عليا كانت وايد تحاتي ساره لكن ما بديها تسويلها شي ..
عليا: شو تحسين بصوتها
مي: ماعرف.. مالها بارض ترمس مول
عليا: الله يعينها .. الواحد شو بايده يسوي غير انه يدعالهم ..
مي: الله يعوضهم ان شاء الله ..
عليا اطالعت مي بنظرة كلها أسى .. وقامت من مكانها وخلت مي بروحها وهي تفكر باللي صاير الهم ها الاسبوع .. كل الاحداث ما تطاق .. متى بس بتعدي ها الايام ع خير ..
أما ساره من بعد ما سكرت عن مي.. وصلها مسج من مروان .. قامت على طول ودشت تتسبح .. لبستلها مخوره سودا عليها ورود حمرا .. سحت شعرها المشعث ورفعته .. نزلت تحت حصلت يدتها يالسه ..
ام سيف: هلا امايه .. نشيتي من الرقاد
ساره: ليش رقدت انا ..
ام سيف: من روحت عنج وانتي هاذيج طيحتج
ساره: الا طايحه مارمت ارقد .. حد خلاني ارقد كل شوي يتصلون
ام سيف وهي تربت ع ظهر ساره: خايفين عليج يا اميه..
سكتت ساره ..
ام سيف: ماتغديتي عاد ولا كلتيلج شي ..
ساره: ماشتهي
ام سيف: متلبسه فديتج ؟
ساره: مروان بييني
ام سيف: هيه .. عاد جي لابستله مخوره جان لبستي شي غير
ساره: مالي خاطر
ام سيف: يالله بالستر وبتجابلينه جيه وعينج بيضا .. حطي فيها جحال يا امايه
ساره : مابا
ام سيف: يا امايه لاتسوين بعمرج جيه بعدج صغيره
ساره: شو اسوي انزين امايه انتي قوليلي
ام سيف: والله السواه سوات ربج يا ساره .. انا بروحي اجلبها يمين ويسار في مخي لكن ماعرفت شو
في هالوقت يت نجمه يايبه دلال الجاهي والقهوه لام سيف ..
ساره: نجمه سيري ويا الشغاله الثانيه فوق في حجرتيه شلوا الاورج وديه أي مكان المهم طلعيه من الحجره
نجمه: وين ودي؟
ام سيف : نزليه مكتب سيف ..
نجمه اطالعت ساره بأسى .. حتى نجمه شاركت البيت همه .. طلعت من الصاله وزقرت ع البشاكير عسب ينزلنه وياها ..
تنهدت ام سيف..انسدت نفس بنتها عن كل شي .. غناها القبلي ماعاد بيسمعونه !
ساره: امايه ترا خالي قال لمروان لا اييني البيت خلاص
ام سيف: ليش فديتج؟
ساره قالتها بحزن: يبونه يطلقني
ام سيف صخت ماعرفت شو ترد عليها : من جيه محطيه وقايتج ع راسج ؟
ساره: لاتقولين لحد امايه انه ياني اليوم .. انا ابا اشوفه واتناقش وياه
ام سيف: ان شاء الله امايه بس قومي سيري حجرتي وحطي شويه صراي في عينج مب زين
ساره: ان شاء الله
ام سيف: بتلقينه في السده
شوي واسمعت ام سيف خرخشه صوب الدري وقامت تشوف .. حصلت نجمه ويا البشاكير يتفازعن ع شل الاورج .. ويوم وصلن تحت وطنه ..
نجمه: يالله مااما .. ساره الحين مول مافي يضحك مول مافيي غني
ام سيف: يا نجمه وين الها بارض تغني هييه!
نجمه: حلييله ساره .. ماياهم خير ..
ام سيف: ياحافظ عليج يا نجمه يوم ترمسين عربي..
نجمه: ماما هذا شلي حطي داخل مكتب بابا سيف؟
ام سيف: هيه وديه هناك..
رجعت ام سيف لحجرتها تشوف ساره .. اللي كانت مطلعه الجحال وتشوف عمرها فالمنظره ..
ام سيف: امي شو تسوين ها الكثر.. الا جحال
ساره انتبهت ليدتها ولفت بسرعه عليها
ساره: ها
ام سيف: سرحانه ..
ساره: لا لا .. بجحل عيني الحين ..
جحلت ساره عينها ع الخفيف وردت الجحال محله وقامت .. توجهت لام سيف اللي كانت واقفه عند الباب ..
ساره: ها شرايج فيني؟
ام سيف وهي تبتسم: قمر ..
فها الوقت دق مروان لساره يقولها انه وصل..
سارت ساره للميلس وفتحت الباب لمروان الي ويهه ماكان احسن حال عنها .. مد لها ايده وسلمت عليه كان في خاطره شي ومتردد .. لكن اندفع وحبها ع راسها
تمت ساره موخيه .. بدت تحتار .. ماتدري اذا اللي تسويه يصير والا مايصير
دخل مروان ويلس حذالها ع الغنفه ..
مروان: اشحالج
ساره: مثل حالك
مروان: الله كريم .. مغطيه شعرج عني؟
ساره: ها.. لا بس عشان لابسه كندوره
مروان: تحسين انه كل شي بينا بينتهي ولازم نرد مثل اول يوم كنت محرم عليج
ساره وطت راسها.. ماتبا تناظره فعيونه .. وفالحقايق اللي يقولها..
مروان: مابا اتخلى عنج ساره
ساره: ولا انا ابا
مروان: اليوم ابويه رد يوصي امايه عشان ما اييج ..
ساره: وامايه تمت تتصل تبى تعرف ليش انا ماسرت اهناك بس مارضيت ارد على حد ..
مروان: البيت اهناك معفوس وسالفتنا استوت حديث الموسم
ساره: مروان انته شو بتسوي
مروان: ماعرف
ساره: ان ييت للمنطق اللي يبونه صح بس مب الحين عقب ماملجنا عقب ما
وسكتت
مروان: عقب ما شو ؟
ساره: عقب ماتعلقنا ببعض
مروان بدت عينه تلمع : شو اقول انا اللي من زمان قلبي متعلق مب من الحين
ساره: تتحرا ماكنت اعرف والا مايهمني الموضوع.. بس بطبعي اقدر اسيطر وما استبق الحدث .. الا الحين انا ماقدر اسيطر على شي ..
قالتها وبدت تصيح .. مروان مد يده وبدى يمسح على ظهرها عشان تهدى في هالاثناء انفتح باب الميلس ودخلت ام سيف ..بحركه سريعه مسحوا دموعهم ..و وقفوا لها ..
ام سيف: السلام عليكم
ومروان: وعليكم السلام
وتجدم وحبها ع راسها
ام سيف: بارك الله فيك .. اشحالك مروان
ساره: ايلسي امايه
مروان: الحمدلله
ام سيف انتبهت لساره اللي ساح جحالها وعرفت انها اكيد صاحت
ام سيف: ساره قومي يبي لمروان عصير
ساره نست انها ماسوت له شي : ان شاء الله
طلعت ساره واستغلت ام سيف الوضع
ام سيف: مروان انا اعرف ابويه شو اللي يالس يستويلكم .. لكن ها قبل كل شي قضاء الله وقدره .. انا مابجبرك مثل اهلك ع الطلاق .. لكني انا اباك تفكر زين انته تعز ساره وتعنيلك .. ومابتهون عليك انك تعيش وياها وتحرمها العيال ولا هي بتهون عليها انته .. يمكن ايي اليوم اللي تفكر فيه انه حياتك محتاجه ياهل يفرحكم بها .. وبعد مابتهون عليك ساره تعرس عليها ولا بتهون عليك كل مره تسقطون عيالكم وتعرضها للخطر..
مروان سكت كان يسمع ام سيف شو تقوله .
ام سيف: لازم تضحي اذا انته تحبها ولاتخليها تتعلق فيك اكثر ..
في هالوقت دخلت ساره شاله في ايدها صينيه فيها كوبين عصير .. عطت يدتها اللي ما بغت .. وعطت مروان اللي تم ميود الكاس ويطالع ساره للحظات وخذه من الصينيه..
يلست ساره حذال يدتها ..
ام سيف: اسمحولي بترخص انا عنكم .. يالله ابويه فمان الله
مروان: فمان الكريم امايه
طلعت ام سيف وسكرت الباب وراها ..
مروان: طيبه العيوز حليلها
ساره ابتسمت له
حط مروان الكوب ع الطاوله وسند راسه للغنفه
مروان: ساروه
ساره: نعم
مروان: قومي نشرد
ساره رغم انها متضايجه الا انه فكره مروان ضحكتها
مروان ابتسم وهو يشوفها تضحك: يبون يحرموني من هالضحكه !
ساره رجعت ويمت وحست انها بتصيح
كان الوضع بينهم متوتر .. يلس عندها للساعه 10 يناقشون الموضوع شوي .. وشوي يصيحون .. ويفكرون كيف ممكن يتخذون قرار ..
اتصله ابوه يسأل عنه وينه .. طبعا ما قاله هو وين .. لكنه بعد ما سكر ترخص عن ساره عسب ما يحسوبهم .. ودعها عند الباب وركب سيارته وهي تتطالعه .. دمعت عينها .. حست بأحساس غريب .. ما قدرت تفسره .. لكنها تجاهلته ورجعت داخل البيت .. اما مروان من بعد ما وصل بيتهم .. دخل وحمد ربه انه محد من اهله شافه .. طلع ع طول غرفته و سكر الباب لكن مامداه يبتعد عند الباب يوم اندق ..
مروان: منوه ؟
عزه: انا عزه
مروان فتح لها وسلم عليها: هلا عزوه اشحالج
عزه: الحمدلله انته اشحالك
مروان: حالي مايسر
يلس مروان ع السرير ويلست عزه مجابلتنه
عزه: من وين ياي ؟
مروان: كنت طالع
عزه: وين سرت
مروان: ليش
عزه: سرت عند ساره ؟
مروان: منو قالج ؟
عزه: محد بس انا حسيت لاني سرت بيت امايه سلامه وماشفتها
مروان: هيه سرت عندها
عزه: ليش ؟ تبى تعذب عمرك وتعذبها وياك زياده ؟
مروان: شو تبوني اسوي انزين ؟ عزوه احبها
عزه: اعرف مروان بس انته لازم تعقل عمرك شوي .. انته تحبها واللي يحب شخص يضره ؟
مروان: عزوه تتخيلين عقب ماخذتي فيصل حد يفرقج عنه ؟
عزه سكتت حست بصعوبه الموقف يوم حطها فيه مروان لكن لازم ترمسه وتقنعه
عزه: بعدكم انتوا باول الطريق صح انها صعبه الحين لكن لو طولتوا بتصعب عليكم.. شوف مروان .. يعني لا قدر الله واكتشفنا انا وفيصل انه فينا ها الشي بنتم عايشين حياتنا فندم ليش انه ماسوينا ها الفحص من قبل وبنتم نحاتي سلامة كل ياهل ايينا ليش ها البهدله كلها من البدايه دام الموضوع فايدكم ترومون تسيطرون عليه .. ياما ناس فرقهم الموت عن حب حياتهم لكن الدنيا بعدها فيها خير .. الواحد يعيش يكمل حياته ما يموت عمره باليأس!
مروان: ماعرف عزوه ماعرف
عزه: تعرف مروان شو احسن شي ممكن تسويه
مروان : شو ؟
عزه: صل الاستخاره
مروان: اصلي عشان اطلقها ؟
عزه: هيه انته صل والخيره فيما اختاره الله .. جي انته مابتحتار في شي وبتسوي شي عن قناعه مب ضغط
مروان: بس انا مقتنع اني اباها
عزه: قلبك يباها .. بس انته مقتنع انه لازم ماتكملون
مروان سكت صح كلام اخته بس ما يبا يفتح لنفسه اي مجال للتفكير
عزه: صل ووكل امرك لربك
مروان: انزين ماعرف دعاء الاستخاره
عزه: قوم اتوضأ انا بسير اييب لك كتاب فيه الدعاء ..
مروان: انزين
طلعت عزه يابت الكتاب لمروان اللي كان مستعد للصلاه .. واطلعت عنه عشان ياخذ راحته ..محد كان فالبيت .. امها شكلها بيت بو راشد .. طلعت عزه من بيتهم وتوجهت بيت يدها .. ويوم دخلت حصلت احلام ومي فالحوي يحوطن .. سلمت عليهم
مي : هلا والله هلا .. حيا الله ام عزوز
احلام: منو قال بتسمي عبدالعزيز؟
مي: كيفي انا ابا عبدالعزيز بن فيصل حلووو اسم شيوخي
عزه: حلو والله انا احمل واتعب وميوه اسمي ع كيفها
مي: لا انا اقترح فقط
عزه: هيه انا اقول بعد ..
مي: ولا اقووولج
عزه: ها شوو
مي: سميه نوااف
احلام: ول عليج .. شو لنا فنواف نحن .. ما نسمي ها الاسامي
عزه: هههه والله ميوه حالات
مي: انتن شدرااكن لاه.. نوااف بن فيصل.. أسير الشوووق
عزه: ههههههه
احلام: سيري لاه ميوه.. هلكتينا بها الشعر والشعرا .. اديبه اديبه ونحن ماندري
عزه: والله ميوه سوالف ..
مي: ها اللي مايعرف يقدر الأدب ..
عزه: لا افا عليج مقدرين .. الا انتن شو تسون اهنه ؟
احلام: نغير جووو شوي عن حديث الموسم
عزه: هيه والله صدقتن .. لكني انا احب اكون في قلب الحدث ..
مي: عيل هاكوه الباب تدلينه .. اخبار الحدث على مدى 24 ساعه داخل
عزه:هههه الله ينطبكن يالله برايكن بسير
سارت عزه وصدت مي لاحلام
مي: قومي ندش داخل ..
احلام: لالا ميوه دخييلج .. مابا
مي: مم ادري كآابه داخل وماعندهم غير سيرة مروان وساره.. لكن شو بنسوي ..
احلام: ميوه ..
مي: شو
احلام: قومي نركب البيك اب مال عمي مانع
مي وهي تتطالع البيك اب الموقف حذال الكراج
مي: شو تبيبه
احلام: قومي بنركب ورا وبنسولف تحت ضوء القمر
مي: هههههه متفيجه
احلام: يلا قومي ..
توجهن احلام ومي للبيك اب .. وركبت مي وركبت وراها احلام وتربعن وهن يضحكن ع عمارهن..
مي: يالله يا الجت .. والله لو كان قوتنا ها ما حاتونا ويابولنا ها الكثر
احلام: هههههه انتي ما وراج فايده.. خلهم يطعمون رجابهم وراهن خير
مي: يا الهرمه ..
مانع كان متوجه لسيارة العزبه . سمع حسوس تصدر منها .. تم متردد .. وبعدين كمل دربه ووايق .. شاف بنتين يالسات ميز الحس وكتم ع ضحكته .. سار وركب السياره وهن يطالعن شو السالفه وتمسكن بالحد اول ماحسن بالسياره تتحرك .. قام مانع يشوح بالبيك اب فالحوي وهن يصارخن وهو ميت من الضحك عليهن .. وتم يزقر عليهن بصوت عالي ..
مانع: ها بسكن ولاااا؟؟
مي وهي لافه ع جدام وتتطالع .. عرفت انه خالها مانع .. هاي حركاتها وخساسته..
مي: حرام عليييك بس هلكتنا روسنا اتدور
احلام: عمي بعد بعد .. ونااسه
مي: بس وقف خاااالي ..
طلعوا الشباب من الفله من بعد ما سمعوا التشويح .. صراخ وحاله .. وبنتين ورا ميلسات ومانع يستهبل .. تجدم سلطان يبى يوقف مانع .. ومانع يسرع بالسياره ويلف بسرعه ..
مي: بس والله توبه خلاص خالي .. والله خلاص
وقف مانع السياره وهو هلكان من الضحك .. نزل وسلطان يطالعه باستغراب .. توجه مانع لورا وهو يشوف البنات .. كانت احلام طايحه وهي تضحك ومي متيوده بالحد ..
مانع: ههههههههههه بلاكن؟
زخت مي بريدة جت وفرتها ع مانع .. ووقفت ..
مانع: ها شي ياج ..
مي: لو جلبتبنا الحين ..
مانع: ماعليج ما بيصيبكن شي
سلطان: وين ما بيصيبهن شي .. تخبلت انته ..
مانع: هههههههه طلعتوا كلكم انتو
سلطان: سمعنا الحشره داخل وطلعنا انا ومنصور وفارس
مي تمت واقفه متولمه تنزل جدام الشباب .. واحلام وقفت وراها ..
احلام: يلا عمي نزلنا
مد مانع ايده بينزل احلام الي تمت واقفه ع الحد اما مي عيبت ع خالها مانع ولفت الصوب الثاني ونزلت بروحها عسب محد يشوفها .. تم مانع ينكت عليها وهي لابستنه سحبت احلام ودشن البيت .. اما مانع الي ما وقف ضحك عليهن ركب السياره ويا سلطان وطلعوا سايرين العزبه .. ولحقوهم فارس ومنصور ..
***********************
(الجمعه) 29 ابريل 2005
***********************
كعادة كل جمعه الظهر .. مي وساره يالسات فالباص .. ملت مي من الدرب وشغلت لابتوبها ويلست تلعب .. اما ساره اللي كانت ساكته طول الدرب تيلفونها فايدها وهي تتطالع المسج ومسنده راسها ع الدريشه ..
" صعب السؤال
ليه نفترق
صعب السؤال
وين نلتقي
انت الجنوب وانا الشمال مابيننا بحر ورمال
لكن نحب والله نحب
فوق الخيال
صعب السؤال"
تنهدت ساره وهي تشوف المسج .. ورجعت طرشت لمروان ..
" يوم شافوني انا بقربك .. ابعدوني عنك يالغالي
مادروبي كم انا احبك .. ياسعاده عمري وفالي"
مي لفت ع ساره الي كانت قابضه التيلفون فايدها ولافه الصوب الثاني .. طول الوقت ساكته والحين مسجات .. ماعرفت كيف تكسر الجو هذا .. بس بغت ترمسها..
مي: ساره
ساره: هاه
مي: لمنو تطرشين مسجات؟
ساره: مروان
مي: شو تطرشيله ؟
ساره عطت مي التلفون تطالعه
مي قرت وتنهدت : ليش جيه ؟
ساره: ميوه قلبي يعورني وايد
مي: شو قالج بيسوي؟؟
ساره: ماتصل من روح امس عني .. لين اليوم والظاهر بيسوي اللي يقولوله اياه
مي: محد متمسك فيج ويحبج كثر مروان .. واعرفي انه ان سوى هالشي فهو من دافع حبه وخوفه عليج .. وضحى بوايد اشيا في خاطره بس عشان مايضرج
ساره: اعرف اللي يقولونه هو المفروض ميوه .. بس انا تعلقت بمروان
مي: مب احسن عن تتعلقينه زياده!
ساره: كيف بقدر اشوفه عقب ؟ كيف برمسه .. على اساس شو ؟
مي: ولد خالج شرات ماكنتي ترمسينه قبل
ساره: كنت ارمسه قبل على اساس انه ولد خالي اللي يباني .. والحين ؟
مي: ولد خالج اللي رابيه وياه وحسبه اخوج
ساره: عقب ريلي يستوي اخويه ؟
مي: ماعليه ساروه حاولي تساعدين نفسج والا بتتعبين
ساره: اكثر من هالتعب ..
رجعت ساره تصيح وصدت عن مي صوب الدريشه .. مستويه حساسه وماتتحمل حد يقولها كلمه .. مي ماعرفت شو تسوي .. ليش رمستها الحين .. ما قدرت تيود كلامها لين يوصلون السكن .. ساره نفسيتها وايد تعبانه ومي تحاول انها تخفف عنها بأي طريقه لكن ما يطلع بايدها شي ..
****
بعد صلاة العصر نزلت ناعمه من قسمها ووياها عفرا بنتها .. دشت الصاله تحت وحصلت ام سيف وسيف يسولفون ومايد وجاسم كل واحد قابضله كراس يكتب فيه والتوم فايدهن كتاب الدين يحفظن ويسمعن لبعض.. ابتسمت الهم تولهت على ها اللمات .. يلست حذال ريلها من بعد ماحطلها الموسده ورا ظهرا .. سارت عفرا وصبت عصير فرش بارد وناولته امها اللي كانت تتنفس بصعوبه ..
ام سيف: ها الدري بروحه عذاب .. لازم بتتعبين ..
ناعمه: عيزت يا عموه من اليلسه فوق ..
سيف: ماعليه الحركه بعد زينه ..
ناعمه: شحالها اليوم ساروه؟؟ ماشفتها قبل ماتروح .
ام سيف: معورتلنا قلوبنا ها الساروه ..روحت الباص و ماتغدت
مهره: هي كله جي من يت ماتاكل
ام سيف: بتموت حسيب الله بليسها بروحها مريضه
سيف: مادري هالبنت لشو تبى توصل بتصرفها ها
ناعمه: هي ماتنلام بعد يا سيف
سيف: انزين لكن خلاص الموضوع انتهى
ام سيف: كيف بعد انتهى
سيف: مرمس راشد انا وقالي انه الولد بيطلق البنت
ناعمه: حرام عليكم انتوا ليش جيه
سيف: ناعمه شو هالرمسه بعد
ام سيف: حسبي الله ونعم الوكيل
سيف: انا اتصلت بعد برمس مروان لكنه مارد عليه برد اتصله عقب..
ام سيف: والله ماياهم خير هالعيال مثل العين اللي صابتهم
ناعمه: ساروه قبل نسمع حشرتها وغناها واليوم ما نسمع الا صياحها .. هالبنت غامضتني وايد..
سيف: شو يسون انزين ؟ مصلحتهم انهم يبتعدون عن بعض والا بيواجهون وايد صعوبات وبيعانون وايد .. لكن الحين بتلتهي ساره بالبنات اهناك ويا ربعها وهو بيلتهي بشغله وبينسون ..
ام سيف: في الاخير كل واحد منهم بييه نصيبه وبيعرس هاي سنه الحياه والله قادر انه ينسيهم ..
ناعمه: الله يعينهم ..
سيف وهو يتذكر شي: الا اقول ام سيف
ام سيف: ها ابويه
سيف: تراني الاسبوع الياي مسافر ان شاء الله
ام سيف: ويدي ليش
ناعمه وهي تتطالع سيف اللي ما عدل عن فكرة السفر
سيف: بسير ويا راشد .. تعبنا من الشغل وهم العيال خلنا نرتاحلنا شهرين فمصحات التشيك وبنرد شباب ..
ام سيف: هييه .. عيل ودوني وياكم يبالي انا ها المصحات
ناعمه: عموه يبون يشردون عنا ..
سيف: ههههههه ما بنشرد .. بس استجمام شويه
ام سيف: زين زين .. تسيرون وتردون بالسلامه..اهم شي صحتكم ..
جاسم: ابووويه .. ودنا انا وميود .. رياييل نحن بنسير وياكم
سيف: وين اوديك ابويه .. وراك دوام ومدرسه
جاسم: الله يغربلها من مدرسه ..
مايد: ابويه فالصيف وين بتسفرنا
مهره: نبا دولة اوروبيه ها المره
سيف: ها الصيف ما بنروم انسافر .. ناعمه حامل وبتربي فنص الاجازه بتخرب علينا ..
مايد وهو يطالع امه: اووهووو برايها اميه بتم فبيت يدي
ناعمه: طاعوا ها .. يلا ماشي مابتم بروحي انا
مها: انزين ماعليه عقب ما تربي ودنا
سيف: بيكون عندها صغيرون ما بنروم نوديه مكان
جاسم: يووهو يعني ما بنحوط مكان ..
سيف: ههههههه بحوطكم فالبلاد عادي ..
مها: حر حر البلاد منو يتحمل الصيف
ناعمه: يلا صخوا ماشي سفره لاتفرون راس ابوكم .. بتمون ويايه وويا البيبي ..
مهره: يالله ها البيبي من عرفنا عنه والمشاكل ما وقفت والحين يوم بيي بيحرمنا من السفر
جاسم: شباب قوموا نقضي عليه ..
سيف: هههههههههه ها وين تبون بتذبحون ولدي شو ..
ام سيف كانت تتطالعهم والبسمه مرسومه ع شفايفها .. سيف وايد اعتدلت حالته ويا عياله .. يقضي وياهم اوقات وايد حلوه .. وناعمه كذلك .. حست بقيمة العايله الوحده واللمه الحلوه ..
بعد ما روح سيف عنهم .. ردوا مايد وجاسم لواجباتهم .. كان جاسم هالوقت يالس يكتب واجب الانجليزي ومب عارف يحله زين صد لمايد اخوه اللي كان حذاله ويحل واجب الرياضيات..
جاسم: ميود كيف هاي مافهمتها ؟
مايد: مادري جسوم خلني احل انا بروحي مب فاهم حق ها..
جاسم: اوهو انزين انا ابا اخلص الاستاذ بيهزبني من متى ها الواجب ومب حالنه..
مايد: اسأل اميه هي تعرف انجليزي انا ماعرف
جاسم سار ويلس حذال ناعمه
جاسم: ناعمه
ناعمه: هاه
جاسم: فهميني كيف اكتب هذا ؟
ناعمه: ماروم جسوم
جاسم: شو ها انتي مول مامنج فايده .. علميني مره وحده
ام سيف: علميه انزين شو يبى شويه.. راويه ..
ناعمه: هات انزين اشوف
قبضت ناعمه كتاب جاسم ويلست تقرا..
ناعمه: جاسم ها سهل .. يقولك اكتب جمل عن المضارع البسيط
جاسم: وانا شدراني.. انزين مليني انتي شو اكتب
ناعمه: لازم بروحك تكتب ولا كيف بتتعلم
جاسم: انزين قوليلي جمل انتي .. انا ماروم افكر ..
ناعمه: ممم انزين اكتب I write my homework
جاسم: شو يعني
ناعمه : جسووم لازم بروحك تفهم.. ها سهل انا الا عطيتك مثال
ام سيف: الله يعينك يا جسوم من ها العنجليزي ..
جاسم: انزين شو يعني .. هييي عرفت .. أي راااايت .. يعني انا صح ..
ناعمه وهي مبطله عينها وتتطالع جاسم.. مها ومهره ضحكن على اخوهن ..
مايد: ايه شو انا صح .. رايت ..يعني يمين ..
ناعمه : طاعوا انتو .. اونه بترقعها الحينه انته .. جي وين الانجليزي روح ..
مايد: هي تعاال رايت كتابه صح ..
جاسم: الله يغربلهم وياها رمسه .. الكلمه الوحده الها الف معنى وين اييبون رمستهم
ناعمه: هاي لغة العالم .. لازم تتقنونها ..
مها: نحن الانجلش مالنا طاااااخ
مهره: وايد طااخ
ناعمه: ههههههه والله يبالكم انتو اييبلكم مدرسه فالبيت .. ترمسكم انجليزي طول اليوم ..
مهره: الا نحن اللي بنجلب لسانها وبنخليها ترمس شراتنا
ناعمه: ههه والله تسوونها انتوا..
جاسم: انزييين فكوونا من الحشره الحينه .. خليني اكمل الواجب بنظرب تراني
ناعمه: انزين انزين .. عطني بكتبلك كم جمله وانقلهم
جاسم وهو شاق حلجه: يالله جان من قبل قلتي جيه
ام سيف: شقى جي ناعمه.. خليه بروحه يكتب
ناعمه: عيال سيف طمم فالانجليزي ماروم عموه.. بكتبله وخله ينقل ..
ام سيف: يالله بالستر ..
دخلت نجمه عليهم وهي شاله فايدها صينيه وحطتها على الطاوله..
نجمه: يلا عيال كلوا فواكه مشكله انا سويته..بعد سوي بسكوت..
ام سيف: يارالله نجمه هابة ريح..
ناعمه: ياسلام شكله مغري.. كل واحد ياخذله مله .. يلا كلوا الفواكه وايد زينه..
مهره: ييه يا النجمه اونها تتفنن .. البسكوت لذييذ..
نجمه: هي لازم طعم حلو عشان انا حلوو
ام سيف: هههههه اسمعوا انتوو
ناعمه: هاي نجموه عليها سوالف
مها: نجموه بسألج
نجمه: شو مها..شو يريد
مها: انتي ما مليتي من بيتنا ؟؟ متى بتردين بلادج؟؟
ام سيف: ويه غربلات بليسج يا مهوه شو تقوليلها جي تحطين فبالها السالفه..لا لا نجمه ماشي سفر ..
نجمه وهي تضحك: شو ماما يريد انا موت هني ؟
ام سيف: ماعليج يوم بتموتين بندفنج فبلادج لاتحاتين
نجمه: هههه ماماه انا عشره عمر منيه .. حتى لو في موت مافي مشكل دفن مني.. هذا بلادي انتي ماما مال انا .. انا لو يريد سافر من زماان روح بس انا حبي انتي وايد وبشتغل مني لين استوي عيوزه سيم سيم انتي ههه
ام سيف يتها الغبنه ع رمسة نجمه: يا الهرمه انا عيووزه
مها: يااا سلام عليج يا نجمه .. نعم الولاااء.. حيووها شباب
اخترش جاسم ويا خواته وقاموا يحتفلون لنجمه ويصفقولها وهي مصدقه عمرها وتضحك عليهم .. ناعمه تاكل من الفواكه وهي مستلذه ومستانسه ع الجو والربشه وام سيف قامت تصفق ويا اليهال حق نجمه اللي دمعت عينها وهي تشوف عيال سيف حولها وام سيف بصحتها وتضحك وياهم..
****
المسا فغرفة ساره ومي فالسكن .. ساره يالسه ع شبريتها تجلب اوراق فايدها .. لطيفه واسما يالسات وياها .. ومي توها داشه وشاله فايدها صحن مسويه نودلز لساره ..
مي: ساروه اندوج كليلج شي ..
ساره: ميوه ما اشتهي
لطيفه: ساره شو بتحاربين الاكل ..
مي: ساروه عشان خاطريه .. سرت وسويتلج لاترديني
ساره وهي تتطالع مي: انزين هاتيه
مي ابتسمت وناولته ساره وسارت بطلت الثلاجه وطلعت لساره العصير الي تحبه.. وعطته اياه .. ها الوقت رن تيلفون ساره .. كل البنات اطالعن ساره وهي رافعتنه تشوف المتصل ..
ساره: خالي محمد !!
مي: ردي عليه انزين ..
ساره اطالعت مي .. وتنهدت .. بعد بيتمون وراها ..
ساره: الوه
محمد: السلام عليكم
ساره: وعليكم السلام
محمد: ساره اشحالج ؟
ساره: الحمدلله خالي انته اشحالك ؟
محمد: الحمدلله .. وين محد شافج هالاسبوع ؟
ساره حست انه خالها يبى يفاتحها في الموضوع
ساره: كنت تعبانه شوي
محمد: تعبانه والا ماتبين تشوفين امج .. تراها وايد متضايجه انها ماشافتج امس.. الاسبوع الياي لازم تين
ساره: بيلس في العين خالي مابنزل عندي بروجيكت
محمد: ساره عندج بروجيكت والا انتي ماتبين تنزلين ؟
ساره: الاثنين
محمد: ليش انزين ياساره ؟ اللي تسوينه ترا مامنه فايده
ساره: انا ماسويت شي خالي
محمد: هاالعزله والتهرب ماتنفعج .. وتضر صحتج وانتي بروحج تعبانه
ساره: انا تاكدت ياخالي التعب تعب القلب مب الجسم
مي اشرت لبنات عمتها عشان يطلعون من الغرفه ويخلون ساره ترمس ويا خالها باللي في خاطرها
محمد: انا اعرف انه مروان كان عندج امس .. هو خبرني
ساره: انته رمسته ؟
محمد: هيه رمسته .. وسكرت عنه والحين متصل بج
ساره: ليش
محمد: عشان اعرف انتي في شو تفكرين
ساره: خالي انا مابا حد يضغط عليه في شي ..
محمد: وعقب مايخفون الضغط شو تبين تسوين
ساره: افكر على راحتيه
محمد: محد ضاغط عليج ساره .. امج وقفت وماردت تتصل فيج يوم انج ماقمتي تردين عليها .. حتى مروان قلت له مايتصل فيج وانتي لاتتصلين فيه .. كل واحد خله يتخذ قراره بروحه بدون ضغط من أي حد..
ساره: خالي!!
محمد: اسمعيني ساره انا افهم معنى اللي انتي فيه .. بس مثل مايقولون تجري الرياح بما لاتشتهي السفن .. و ربج قال وبشر الصابرين .. وترى هذا بلاء من رب العالمين .. مايبتلي الا المؤمن ..
ساره هدت شوي وكمل خالها كلامه
محمد: ساره فكري في مستقبلج لو يبتي طفل يتعذب جدامج .. تغيير دم ومرض وعذاب واخرتها يموت .. ساعتها بتتمنين لو الايام ترجع ورا وتنفصلين ..
اصعب شي في هالوجود انك تشوف ضناك يتالم او يعوره شي والاصعب انك تفقده
كان كلام محمد نسخه من الكلام اللي قاله لمروان..يحاول يوعيهم اكثر للي ممكن يصير .. كلامه كان مباشر استوعبوه بسرعه .. وبدوا بالتفكير الفعلي فيه ..
ساره: بس خالي
محمد: بس شو؟
ساره: في وحده قالتلي لا تحاتين .. حد من اهلها نفس الحال وكتشفوا ها الشي عقب العرس.. خالي هي قالتلي يابو ثلاثه صاحين مافيهم شي .. ليش يعني احرم عمري من ها الشي؟
محمد: ساره فديتج هاي مشيئة الله .. ربج رحمهم وعيالهم طلعوا بخير الحمدلله.. لكن الواحد يجهز الدوا قبل الفلعه .. انا بقولج اياها لو هم عرفوا انه فيهم ها الشي قبل لا يعرسون صدقيني كانوا بيتخذون القرار الأنسب الهم.. وحطي فبالج مهما كانت حياة الناس الثانيه ترا كلاً له رده فعله و اسلوبه في ايجاد الحل الانسب له واتخاذه القرار .. وكلاً له نظرته الخاصه تجاه الامور اللي تصيره .. يمكن تصير لنا نفس الاشيا بالضبط بس مب شرط نتخذ نفس القرار.
نزلن دموع ساره ع خدها بالتوالي .. مب قادره تتخيل أي شي بيصير.. الكل كلامه منطقي والكل يبا مصلحتهم .. بس هي شو تبا!
تبا مروان .. ها الي بس تفكر فيه..
محمد: على العموم ساره انا مابطول وياج وبكون على اتصال .. اهم شي اهتمي بصحتج ونفسج .. ولاتقطعين امج ترا قلبها يحترق عليج ..
ساره بحزن: ان شاء الله
محمد: يلا فديتج ..مع السلامه
ساره: الله يحفظك..
سكرت ساره عن خالها .. وطت التيلفون بكل هدووء .. انطوت على نفسها فيلستها وحطت راسها ع ركبها .. تفكر فكلام خالها اللي تم يرن فبالها .. الكل يحاول يقنعهم .. بس قلوبهم .. شو يسون فيها .. ما يقدرون يتعدون ها الأزمه ..
****
ع الكورنيش يالسين يتمشون بدريه وعدنان .. شال عدنان في ايده كيسه فيها سندويجات وعصاير وبالايد الثانيه ميود ايد حرمته .. خذولهم مكان ع البحر ويلسوا هم الاثنين ..
عدنان: تعرفين بدريه
بدريه : شو
عدنان: انا مرتاح وايد انج حرمتي .. من خذتج كنت مرتاح بس الحين انا اكثر اطمئنان من قبل ..
بدريه : عساك دوم
عدنان: حتى ليلى تراها زينه وها شي ما اشك فيه لأنه من اختيارج
بدريه: ليلى اصلا بنت طيبه وخلوقه .. ولاتنسى ام عيالك بتكون .. وانا اعدها مثل اختي .. تدري انا كنت خايفه انك يوم تعرس تهملني .. انا ماحس انه مني فايده لحياتك ..
عدنان: شو هالرمسه بدريه
بدريه: كون اني ما بييب لك العيال كنت احس بها الشي قبل .. بس يوم عرست اتضح لي العكس .. انته ماقصرت عدنان فيني واعرف انك مابتقصر .. انته وايد تحاول تعدل بينا .. وتعاملني كشخص مهم في حياتك ووجودي له معنى وها يعنيلي وايد ..
عدنان: اكيد بدريه انتي حرمتي الاولى ويكفي اللي صار لج وانتي مؤمنه بقضاء الله وانا مؤمن بعد .. وسعيد بوجودج ويايه
بدريه ابتسمت له براحه .. تحس رغم انه خسرت شي .. الا انه في شي يهون عليها .. وجود ريلها اللي حمدت ربها الف مره انه ماخلاها او تنازل عنها .. بطلوا السندويجات ويلسوا ياكلون وهم يسولفون عن امور وايده ..
*******************
(الاحد) 1 مايو 2005
*******************
طلع سلطان من مكتبه وفايده ملف مليان اوراق.. توجه لمكتب خاله ودق عليه الباب ودخل بعد ما اذن له بالدخول.. سلم ووطى الاوراق ع الطاوله وهو مجابل خاله .. كان راشد يتكلم بالتيلفون واشر لسلطان انه ييلس لين يخلص مكالمته ..
راشد: لا مارمسته.. ماتصلت به انا من روح ولا هو اتصل .. برايه جان مايبى يرد ع التلفون خليه .. لاتحاتين انتي ماعليه شر .. ها منكر ولدج هب عليه انا .. برايه خليه ..
ميره: يا راشد الولد وهو طالع قال ما بيرد ..
راشد:هو قال مايبى يرد راس الخيمه ؟ برايه لايرد انزين .. مب ياهل هو خليه ..
ميره : وجان استوابه شي
راشد: ولدج ريال ما عليه شر لا تحاتين..يالله عندي شغل انا بنتفاهم خلاف مع السلامه ..
راشد سكر التلفون والتفتت لسلطان: ها مروان مصدع بنا
سلطان: خير بلاه ؟
راشد: من يوم رمسناه هالاسبوع يوم يانا روح لاتصل ولا يرد على امه .. معاند
سلطان: ماعليه خالي بروحه بيهدى ان شاء الله شو بتسون ثركم ..
راشد: انته ماتصلت به ؟
سلطان: لا والله .. انتوا احين على شو اتفقتوا ؟
راشد: خلاص نحن قايلين له انه يطلقها .. ماشي فايده شو يبون بعد يجنون ع نفسهم
سلطان: الله يعينهم ان شاء الله ويهديه يارب ..
راشد: انا ها الاربعا مسافر .. لازم اتطمن على كل شي قبل ما اسير
سلطان: ان شاء الله خير .. بتطولون وايد؟
راشد: والله مادري على حسب.. عادي ناخذلنا شهرين
سلطان: يالله مب استجمام هذا ..
راشد: شو نسوي.. عاد الله الله بالشركه بخليها لك ها الشهرين..
سلطان: لا توصي حريص.. الا خالي دامك مسافر ماشي غير اني ارمسك الحين بموضوع مادري اذا وقته والا لا
راشد: شو الموضوع ارمس عادي
سلطان: خالي انا رمست امايه عشان تخطبلي من عند خالتيه عليا.. لكن هي قالت انك رامس بهم ..
راشد وهو يبتسمله: بنات عليا دانات وتراهن مايتعوضن ..
سلطان: تربية عليا بنت راشد ..
راشد: صدق ربت بنات ..
سلطان وهو يحاول يطلع جواب من خاله.. بس ماعرف كيف يرمس..
راشد: ابويه سلطان.. مروان بيطلق وانته صبر شوي وعقب اخطب ساره
سلطان بانفعال: لا لا خالي انا مابخطب ساره .. انا ابا مي .. وامايه قالت لي انك رامس بها لفارس
راشد تنهد واطالع سلطان اللي يالس مجابلنه ..
راشد: كنت رامس لكن الحين عقب هالسالفه خلاص .. مافينا نزيد المشاكل.. و فارس مارمس وقال انه يبى بنت عمته.. تحيده همه فدراسته الحينه وبعده صغير ع العرس ..
سلطان: يعني عادي اخطب مي ؟
راشد: توكل ع الله.. تمنيت لعيالي وحده من بنات عليا بس الله ماراد.. لكنها بعد لو كانت لك تراك انته ولدي ..
سلطان استانس : تسلم خالي ماتقصر
راشد: لكن نصيحه قبل ماتخطب سو تحليل هالمرض ولاتغلط غلطه مروان
سلطان: ان شاء الله .. لكن انا ترا بعدني عن العرس الا بس بخطب .. ناوي اكمل دراستيه
راشد: افا وبتطلع عني ؟
سلطان: ههههه لا لا خالي بتم عندك لكن بعد ابالي شهاده
راشد: زين زين .. تعال ترانا قمنا نرمس بسوالف البيت والاهل ونسينا الشغل .. شو هالاوراق ؟
سلطان: هاي اوراق التصاميم مال الدعايا اللي طلبتها قلت بروايك اياها قبل مانتفق ويا المطبعه ..
راشد: هيه هات اشوف
يلس راشد يجلب الاوراق اللي في ايده .. اما سلطان كان مرتاح من عقب مارمس خاله عن الموضوع .. بعد مايهدى الوضع .. بيسوي التحليل وبيرمس امه عشان تخطبها له .. حلت فعينه وايد ها البنت فآخر فتره .. وكل ما يشوفها يحس برابط يجمعهم .. ما يعرف شو هو .. بس يحس انها البنت الي بتفهمه وبتقدره..
****
ثلاث ايام ساره ماسمعت فيهم صوت مروان .. يتبادلون المسجات لكنه مايتصل ..
وهي ماتتجرأ انها تتصل فيه .. شكله اقتنع برمسه اهله خلاص ..
سكتت شوي وهي تتذكر مواقف كانت لها وياه ..
مروان: شو تتسمعين؟
ساره: ماشي.. مشغله الاف ام ..
مروان باستعباط: انزين غنيلي
ساره اطالعته باستغراب : اغنيلك ؟
مروان: هيه غنيلي
ساره : ماعرف اغني
مروان وهو يغمزلها: جذوب .. انا سامعنج تغنين
رجعت تذكرت يوم مره اتصل بها عقب الملجه ..
مروان : يالله غنيلي احين انا ريلج مب حرام
ساره: هههههه تراك وايد حاشرني تباني اغنيلك
مروان: صوتج حلو غنيلي عاد .. اي شي اهداء
ساره: مب احين
مروان: عيل متى
ساره: يوم انا بقولك .. انا جيه ماعرف استحي
مروان: انزين سماح هالمره
كان دايما يترياها تغنيله شي .. سمع صوتها مره بدون قصد وكان دايما يمدحه ووده يسمعه .. خذت ساره تلفونها وفتحت على التسجيل .. كانت تبى تغنيله شي وتطرشه له كتحقيق امنيه من امانيه سهل تتحقق مدام الباقي صعبوا عليهم ..
الله واكبر عليهم ماريحوني في حبك
قالوا وعادو في حكيهم قسوا على قلبي قلبك
الله.. الله .. الله واكبر عليهم
يادوبنا ماعشقنا .. واغليتني وانته غالي
يا للاسف افترقنا واحنا في اول ليالي ..
سكتت ساره ووقفت التسجيل عقب ماخنقتها العبره خلاص ..
وطرشتها لمروان..
اللي كان في سيارته يحوط .. وصله مسج ودون ادنى شك عرف انه منها ..
فتح وعلى طول اشتغل الصوت ..
يلس يسمعه ومب عارف يركز في شو .. في الكلام او في الصوت ..
اشتاق لصوتها وايد .. ماسمعه من كمن يوم لكن مابيده شي .. مايعرف شو يسويلها ... اه ياساره صدقج افترقنا ونحن في اول ليالي ..
****
في قسم الطواري كانت ريم يالسه ع الكراسي وياها نايف .. كانوا يايبين جاسم اللي تعب في نوبه سكر واتصلت ام سيف تخبر ريم عشان تسير ويا ابوها ويودون جاسم .. ولحقهم نايف .. سيف بعد ماطمن ع جاسم روح البيت اما ريم ونايف تموا ويا جاسم .. اللي كان راقد ..
نايف: ها ريمان ؟ بتتصلين الحين تخبرين عمتيه ؟
ريم: لازم اخبرها قالوا بيبيتونه يومين وانا لو بتم عنده ورايه تدريب وماقدر اغيب
نايف: انزين خبريها ..
ريم شلت تلفونها واتصلت بامها اللي تاخرت في الرد ..
ريم: الوه
عليا: هلا ريمان
ريم: اهلين امايه اشحالج ؟
عليا: بخير .. خير متصله هالوقت ؟
ريم: انتي راقده امايه ؟
عليا: لا كنت في الصاله وماسمعت التلفون توه احلام سارت يابته لي
ريم: انزين امايه لاتخافين بس ترا جسوم شوي تعب عسب السكر لكن الحين هو بخير ..
عليا: بسم الله شوياه فديته ؟ وين انتي الحين وياه ؟
ريم: نحن في المستشفى الحين بس هو بخير امايه لكنه راقد ..
عليا بتوتر: أي مستشفى انتوا ؟ منو وياج ؟ ابوج وياكم ؟
ريم: ابويه روح .. انا ونايف عنده ..
عليا: انزين يالله انا بخلي خالج محمد اييبني احين
ريم: امايه هاتي وياج ثياب لانه قالوا بيبيتونه يومين ..
عليا: وتقولين مب تعبان؟
ريم: مب تعبان امايه بس تعرفين انتي دوم تيه هالحاله ويرقدونه عشان يطمنون عليه ولين ينتظم السكر عنده ..
عليا: انزين يالله مع السلامه
ريم: مع السلامه
بعد مرور نص ساعه وصلت عليا للغرفه اللي نقلوا جاسم لها .. كان وياها محمد اخوها .. بعد ماوصلت عليا واطمنت ريم على جاسم .. ردت ويا ريلها البيت .. ومحمد بعد روح..يلست عليا حذال جاسم ولدها تقرا عليه ..
جاسم انتبه لامه وفتح عيونه: امايه
عليا: هلا فديتك
جاسم: انتي متى ييتي اهني
عليا: حبيبي اناييت اتصلتلي ريمان قالتلي انته تعبان
جاسم: هي انا تعبت شوي بس الحين يوم نشيت احس اني زين
عليا وهي تسمح ع شعره وتبتسمله: الحمدلله فديتك
جاسم: انتي بتمين عندي؟
عليا: هيه بتم اهني
جاسم: كم يوم بتم انا اهنه ؟
عليا: الدكتور يقول يومين
جاسم: بس؟
عليا: هيه
جاسم: اوهو ليش ؟
عليا: ويدي شحقه تبى اتم في المستشفى
جاسم: احسن عشان ما اسير المدرسه..فكه ..
عليا: وهذا همك انته ..
جاسم: مرتااح ومكيف .. خلها تولي المدرسه
عليا: ههههههه والله انك سوالف يا جسوم .. اشغلك التلفزيون تشوف شي
جاسم: لا ماباه .. يلسي سولفيلي انتي ..
عليا: فديت روحك ..
جاسم: اتذكر قبل يوم كله ترمسن فوق راسي انتي وريمان..ماتخلني ارقد
عليا: هههههه وين هاذيج الايام .. شلوكم عني ..
جاسم: تعالي انتي بيتنا ..
عليا اطالعت ولدها وكشرت بويها على ها الفكره اللي يت فبال جاسم .. اما جاسم ضحك على امه وتم قابض ايدها ويسولف وياها لين غلبه النوم ورقد .. لحفته عليا زين ويلست ع الكرسي تقاوم النوم تخاف انه جاسم يقوم فأي لحظه يعوره شي ..
ركزت نظرها على جاسم .. طيف ذكريات سنين مر عليها .. واعاصير احداث هاجت هالسنه وكشفت لهم وايد اشيا ..
سرها اللي دفنته سنين .. كبرن بناتها ونبشن في سراديبه ..
ظحكت قلوب .. وبكت قلوب .. انتعشت قلوب .. وانجرحت قلوب
وكلها كانت معانا تحت المجهر ..
.
.
.
نـــهايـة الوقــــائع
********************
(الاحد) 3 يوليو 2005
********************
الدرب طويل ولا انا يتهيألي .. ماتعرفون شقى متحمسه لشوفة اخويه الصغير *رشودي* اليوم الفير ناعمه تعبت وودتها المستشفى امايه عفرا اللي اتصلت باسعاف العايله *نايف وريم* .. وطبعا ما قصروا وشلوها وتموا عندها لين يابت ولي العهد اليديد ..اكيد اتصلوا بابويه وبشروه بالولد الثالث .. يا حليله ابويه .. الله يشافيه ان شاء الله صدق فرحت من خاطريه يوم تأكدت من اللي فبالي بعد ما خبرت اميه عليا وقالتلي انه خالي راشد سار ويا ابويه عسب يشجعه انه يودر ها السم ..
تولهت عليه وايد ..
ما خبرتكم اخر اخباري .. احس انكم تعرفون .. سلطان خطبني .. وقع الخبر كان عليه مثل الصدمه.. ابدا ماتوقعت فيوم انه سلطان هو اللي بيرمس وبيقول اباها ..
اكيد بتقولون كيف عرفت ؟ دريت انه خالوه كانت مرشحتني وتاكدت من الخبر من مراسلتنا من بيت العايله الثاني .. عرفتوها طبعا ..
وهل يخفى القمر .. منو غيرها احلام ..
اللي سمعت سلطان يرمس اميه ويقولها انه يباني .. جان استحي ..
بيني وبينكم من يوم كان شر وانا يروقلي ها الانسان ..
فما بالكم وهو ريال ملتزم وطموح الحين!!
هزركم اعطيهم ردي النهائي ؟؟
شكلي بوافق .. وبعدني مؤمنه برايي .. اني ما اسلم قلبي لحد الا لما يتحدد كل شي رسمي .. ولا شو رايكم ..
هي صح بها المناسبه كتبت ها الخاطره ماعرف ليش!
صدفة أنا عشت العمر .. حكاية عجيبة
بـ ليلة سعد صارت
قدر .. قصة غريبة
حملت الوفا بـ قلبي أمل .. كفي الحكاية
ورجِّع دفى لـ
قلب انطفى .. بـ أغرب نهاية
وراحت الحيره لـ قلب ضوى.. بـ دفوة هنيه
سلطان يا قدر يلي نكتب..عـ دربي ومشيته
سطرت النهايه لـ شعر
مي.. بـ أحلى حكايه
احم استحي لاتعلقون وايد .. شكله ها السلطان مب سهل خلاني اكتب عنه خاطره هيهي ..
انزيــن..
تحيدون كيمرتيه اللي انسرقت ! تراني ماحصلتها..ادعولي بس الله يستر عليه .. والله كل ما تذكر السالفه اتم مستغصه .. الله يستر بس ..
اوه واخيرا وصلنا المستشفى .. خواتي مرتبشات .. مهره ومها وعفاري .. كأنهن اول مره يزورن حرمه مربي .. اسابق خواطتهن اشوفني .. صدق وايد متخبله على شوفة ها النونو ..
هذوه اسم ناعمه حذال الباب .. هاي غرفتها .. وافديت ها الصيحه انا .. يا حليلها ناعمه شكلها تعبان .. وايقت ع البيبي من ورا خواتي اللي متحاوطات عليه..
وايد عليج يانعوم .. دلع تسع شهور واخر شي يايبه هالصغيرون ..
دزيتهم شوي .. ابا اشله .. يقولون يشبهني ..
مب من شي .. من كثر ماجابلتها وهي حامل ..
تأملت شكل البيبي فديته كل شي فيه صغير ..
كشرت عن انيابي وانا ارمسه ..
" اول كلمه بتقولها مي تفهم والا "
****
اطالعت ساعتيه اشوف كم باقي من الوقت عن موعد الطياره .. يالسين انا وخالي محمد في مطار جده .. بنرد البلاد من عقب ما عزم خالي انه اييبني العمره عشان تتغير نفسيتي شوي .. جوازي فايدي وعيني تقرا المكتوب اللي مامداهم يغيرونه
* الأسم: ساره سيف زوجه مروان راشد*
بالاحرى مطلقة مروان راشد
صعبه على وحده مثلي ومن سني صح!
والا انا غلطانه؟
ماعرف كيف مرن ها الشهرين من غير ما يكفنوني .. كانت حالتيه صدق ميؤوس منها .. احس الموت يزورني كل يوم .. ابدا ماكنت مرتاحه .. صعب الواحد ينفصل عن حبيبه من بعد ماكانت امنياتهم توصل للسما من كبر مداها ..
بس الحمدلله .. سيرتيه للعمره وايد هونت عليه .. وطمنت قلبي.. انا مب معترضه على قضا ربي .. لكن الواحد شو بيسوي يوم قلبه متعلق..
مروان كان حبي المكتوم فقلبي.. ماعرفت اني ها الكثر احبه الا لما يانا الخبر المشؤوم..
اهليه وايد يعانون ويايه .. حاولت اني اكون طبيعيه لكن شو بايدي .. الايام كفيله انها تبري جرحي ولو شوي .. وارد طبيعيه .. ساره اللي تعودوا انهم يسمعون ضحكها وسوالفها وربشتها ..
بحاول قد ما اقدر ..
والله يوفق مروان في حياته .. بيتم الغالي ..
وانا جان ياني النصيب .. مم ماعرف شو اقولكم .. ويا الايام تتغير الافكار ويتغير كل شي .. ممكن اني اكون ام لعيال تمنيت انه ابوهم مروان ..
يا
مروان .. تذكر يا
مروان
علمتني ان الحياة شوق وفرح في وصالك
ودمعه تروي الاحباب ..وزهور وفراشات والوان
ولو اجبروني على غيرك ابقى .. حله وحلاله
رجيت الناس ينادوني .. ينادوني بـ
اغلى انسان
ينادوني .. أم
مروان
هممم والله وعلمتني مي الخواطر..
مادري .. فكري مشتت .. اهم شي اني اعتمرت ووكلت كل امري لربي ..
خلاص الدنيا مستمره وما بتنتهي عند ها النقطه .
****
واقفه تحت الشمس عشان نطمن على عيال نايف .. من خذته وهو يغرس حبهم في قلبي لين صاروا جزء من حياتنا مايعدي يوم الا مطمنين عليهم ..
نايف يالس داخل القفص ويطالع حمامه ..وانا اترياه برع ..
اشوف بيت ابويه من بعيد .. ابويه اللي سافر في سبيل انه يعدل صورته اللي شوهها جدامي .. انا ماقدر اقول اني مب مسامحته.. لكن ماتوقعت انه عقب هالسنين كلها اقدر اكتشف حقيقه الايد اللي ياما ارقتني من صغري لين كبرت ..
اسباب وايده خلتني اتناساها ..
اولهم امي عليا .. وجو البيت اللي كنا عايشينه ..
وآخرهم نايف ..
اللي من صار لاسمه وجود في حياتي تغيرت نظرتي المتشائمة للحياة الزوجية ..
هذا مايعني انه الحياه الزوجيه كلها حب وتفاهم .. بالعكس تصير وايد اختلافات بين الزوجين على وجهات نظر مختلفه خصوصا في الفترات الاولى من الزواج.. وهذا شي طبيعي بين كل اثنين لين يتعود كل منهم على طبع الثاني ..
والحمدلله انا ونايف كل منا يحاول انه يفهم الثاني عشان نتخطى هالاشياء البسيطه اللي لازم مانخليها تاثر علينا ..
خل اصد عليه اشوفه خلص ولا ..زاد الحر عليه وانا واقفه..
ريلي يراقبني ..
رافع راسه ..
طاحت عيني بعينه..
"
"
يعلني ما اخلي من هالشوف .. مسكينه تعبت ريم وهي واقفه تترياني .. خل اطلعلها ما فيني اتعبها اكثر ..
والله ماتعرفون شقى حياتي صارت غيير وياها ..
احس باستقرار اكثر بوجودها ..
ريم مب مثل ماكنتوا دايما تشوفونها الشخصيه الرسميه الحازمه
ريم.. ورا هالشخصيه قلب حنون يسد هالعالم كله ..
لكن ظروفها اللي عاشتها ماخلتلها المجال انها تكشف الستار عن شخصيتها الحلوه..
طلعت من الصندقه ومسكت ايد ريم ونزلنا نتزهب عشان نسير عند مرت خالي نشوف البيبي اليديد ..
عقبالنا ان شاء الله .. ادعولنا ..
****
توني طالعه من امتحان فقة الطهارة .. سويت اللي عليه والباجي على الله ..
قدمت قبل هالامتحان وخذت الاجازه في فقه الصيام .. وبكمل دراستي في الفقه باللي يقدرني عليه الله ..
اكيد تظنون انه مرت عدنان الثانيه حامل الحين ..
لكن شكلكم نسيتوا انه من البدايه .. كان الضعف من عدنان.. وما تعالج هاذيج الفتره ..
بس الحمدلله انه الدكتور طمنهم بعلاج بتقدر ليلى تحمل خلال ست شهور ..
وتقر عين عدنان بشوفه ظناه اللي حرمته منه بافعالي ..
ماقول الله يجازيني لكن الله يعفو عني ويسامحني على كل غلطه بدرت مني
وانا للحين ادفع الثمن غالي ..
ماقولكم نسيت سلطان .. لكن الحمدلله اني رغم صعوبه اللي صارلي منه كنت نقطه تحول ايجابيه في حياته ..
ماتنماله غير كل خير ..
****
مانع ماعرفتوه الا بوقت الضحك والسوالف..
لكن تبون الصدق .. هذا القناع اللي حاطنه انا على ويهي .. من داخلي احس اني انسان ضعيف ماقدرت اتخطى أزمة وفاة المرحومة بنت عمي ..مديّه..
طبعا عرفتوا انه كنا محيرين لبعض من يوم نحن صغار..
لكن حكم القدر بيظل القوي..
توفت وهي في ريعان شبابها .. وخذت قلبي وياها.. انا ماقدر اني اجامل نفسي أو اني اجامل أي حواء ثانيه ..
لما صار اللي صار لمروان وساره .. حسيت بقسوة القدر صدق .. حكايتيه تتكرر لها الاثنين .. لكن مع التعديل البسيط .. الله يعينهم الصراحه دامهم عايشين فنفس المكان ..
طبعا مستنكرين انتوا عليه ها الموقف .. لكن مب بايدي ..
وعن العيال .. لاتحاتون .. لاتنسون اني عندي بنت ولا كل البنات ..
"
ميوه نظر عيني .. "
****
الحمدلله الحين اطمنت أكثر.. قبل شويه كنت ظاهر من عند الدكتور اللي طمني انه نسبه الكحول وايد انخفضت في دمي ..
لكن هالشي ماصار بالسهوله .. حالات الصداع والعصبيه لازمتني طول هالشهرين .. كنت كلما اضعف كان راشد دايما يشد من عزيمتي ويذكرني بذيج النظره .. نظره بنتي مي اللي حركت فيني مشاعر الابوه وصحت فيني الضمير ..
لكن الحين من بعد مابشروني براشد الصغير .. رمست الدكتور عشان اشوف اذا بيسمحلي ارجع البلاد من بعد ماقدرت اسيطر ع الوضع .. شوفة عيالي هي بتكون مصدر العزيمه اللي بكمل بها علاجي واتخطى هالشي بشكل نهائي من بعد ماقطعت فيه شوط كبير..
****
هذي هي بدايه النهايه ..
هذا هو قلبي يجرب انه ينبض لكن هالمره بصدق .. بدون خداع وزيف ..
لانسانه ماكانت ع البال والخاطر لكن كثرة المواقف اللي جمعتني فيها اخر الفترات خلتني اعرف معدنها الطيب .. وشكثر انها انسانه تنحط ع الجرح يبرى .. ماقول هالكلام لمجرد تعبير لكنها هاي احاسيس صادقه احسها الحين..
سويت تحليل الثلاسيميا بما انه ها المرض اكتشفناه فعايلتنا والحمدلله طلعت سليم ومب شال الجين.. يعني عليه الأمان .. وان شاء الله مي تكون من نصيبي..
يا جماعه.. لاتكرهون شخص سلطان .. ادري اني شكثر كنت راعي هوى ومزاجي وما اهتم لأي شي .. لكني صدق اتغيرت .. وايد اشيا غيرت فيني..
اولهم بدريه اللي لو شو ماصار بتم صورة ألمها تحتضرني من فتره لفتره..
ان شاء الله تكون مسامحتني من خاطرها..
****
التلفون مازال فايدي من بعد ما سكرت عن ام سيف.. حطيته ع طرف .. نبرة الفرحه فحس ام سيف تبرد الخاطر.. باركتلها بحفيدها اليديد .. اخو بناتي.. وبسلامة ناعمه مرت سيف..
اكيد البنات مستانسات باخوهن الحين .. فديتهم .. الله يخليهم لبعض .. ما خبي عليكم اني كل يوم انقهر لعدم وجود عيالي عندي .. لكن تعودت ويا الايام على سيرتهم وردتهم لي .. احمد ربي واشكره انه بناتي قدرن يتأقلمن على بيتهن اليديد .. وقدرن يتعاملن ويا اهل هذاك البيت ..
الدنيا مستمره .. وان اليوم راحوا عني بعيد .. ترا صورتهم تملي ها البيت الي انا فيه ..
ريم .. يعل الخير فدربها .. يكفي انها شلت المسؤوليه ويايه من صغرها .. وادعي من ربي دوم انه الله يوفقها في حياتها الزوجيه..
ساره.. شفتوني كيف كنت حازمه بموضوعها .. ماقدرت اتساهل رغم انها كسرت خاطريه.. خفت ع مصلحتها هي ومروان وكان الطلاق الاصلح الهم .. اعرف انها زعلانه لين الحين مني .. لكن ساره قلبها طيب وبتنسى
مي.. الله لا يحرمها من البسمه ف شفاتها .. عاقل ها البنت ع الرغم من خفة دمها .. الله يوفقها ويا ولد خالتها..
مهره ومها .. كل ما يكبرن يزيد الشبه بينهم .. وجودهن ويايه فمدرسه وحده خلاني اطمن عليهن اكثر..
جاسم.. الي كنت متعذبه من بعده .. ضنايه ابعدوني عنه وهو تعبان .. محتاج لحناني..لكن الحمدلله انه حنان وعطف خواته حاوطه من كل صوب ..
رفعت راسي اشوف الجو الهادي محد ويايه فالصاله .. لفيت صوب قسم محمد اخويه .. طلعت احلام بويهي ..
"
"
اشوف عموه يالسه بروحها فالصاله .. خل اسير عندها اونسها بدال ها اليلسه والملل
الصيف هالمره ملل بس مب وايد .. استويت اسير ابات عند بنات عموه يوم ابا مدام انه ابوهم مسافر منها اغير جو وياهم .. ونغير لساروه بعد ,, ياحليلها ساروه كاسره خاطر الكل.. لكن شو بنقول الله يصبرها ..
ولااا مي .. والله الصراحه اللي صار لها البنت شي خيالي ..
كيف انا عبالي انها تحب فارس تسير تخوّن وترضى بسلطان طلعت مكاره ها المي.. همم ولا يمكن انا اللي طلعت احلامي طفوليه.. بس ميوه كانت على حق يوم كانت تقول مابعلق قلبي على رمسه ..
وأنا شكلي بتبع خطى بنت العمه .. هههه ..
****
من اللي حب له طفله .. وحلم من يوم كانوا صغار
يتوج حبه بفرحه .. و امه تحضنه بتهليل
يمر الوقت و سنينه .. تمر و يستوون كبار
ويتغرب لجل حلمه .. يسابق كل شباب الجيل
و يرجع رافع ٍ راسه .. بعد ما صار هو
طيار
و بقى من حلمه الوردي .. زفافٍ يرفض التأجيل
يجيها يقول حان الوقت .. تعالي نكشف الأسرار
طفح كيل الصبر ما عاد .. في صبري و صبرج كيل
و يذكرها بوقت صار.. مع مر الزمن تذكار
بأيام
الطفوله يوم .. يغرقها غلا و تدليل
يمازحها و تردد له ( ترى الكذاب يروح النار )
يجافيها و تهمس له ( أعرف ان الجفا تمثيل ) !
و تدمع عينهم لثنين .. يهلون الدمع مدرار
ترى
الذكرى ولو حلوه .. طواريها تهد
الحيل
هي والله صدق تهد الحيل .. عرفتوني .. انا هو الطيار .. الي حلمي من صغري ساره.. لكن قلتها حلم .. وبات مستحيل من بعد ما صار التبديل ..
ادري انه ساره لين يومها ها تتعذب شراتي ..
وادري اني لين يومي ها ازيد في حبها ..
مب بالايد والله ..
لكن اللي يحب من خاطره..مستحيل ينسى بها السهوله..
حلم كبر ويايه .. معقوله بنساه ..
الله يكون بالعون..
قدمت امس على دوره.. ع الاقل اختفي من ها البلاد كمن شهر .. ابتعد فيهن .. يمكن يوم ارجع اقدر ابدى من يديد ...
يمكن اني أتأقلم على فكرة عدم وجود ساره في حياتي ..
انا اريد وهي تريد والله يفعل ما يريد ..
حكمه من الله .. مالي غير اني ادعي من الله انه يلهمنا القدره ع الصبر وفراق الحبايب ..
****
عيالي ..هيه عيال سيف كلهم عيالي ..
محوطين عليه الحين يشوفون رشودي الصغير اللي في ايدي .. من فتره طويله مايبت ياهل .. احس كاني اول مره اربي..
حلوو احساس الامومه وحلو الاحساس يوم انه اللي حواليه كلهم يحبوني .. عقب هالسعاده اللي شفتها وياهم .. قررت انه رشودي مايكون اخر طفل عندي بإذن الله..
مادري شو انطباعكم عني .. بس اكيد غيرتوه صح!
لان بنات عليا غيرن مني واايد .. صرت ما اقدر اصبر عنهن .. من اكبرهن لي اصغرهن ..
****
تعبت .. والله تعبت ..
توي مجيك ع نتايجيه من النت .. تعرفون دكتوري النذل الي محطي دوبه من دوبي.. مرسبني!!
تخيلون انتو كيف .. لكن شو بسوي .. الشكوى لغير الله مذله ..
ها كله من عيون مروان .. حشرني من كثر ما يقولي المصري .. لين ما رسبت ..
الا ع طاري مروان.. اخويه صدق مب صاحي .. حاله ما يسر .. نفسيته المرحه وايد تغيرت.. حمدت ربي اني ماكنت فيوم بمكانه .. وايد صعب احب انسانه وانجبر اخليها ..
ادري بتقولون وين انت ووين الحب.. خلك ويا كتبك ..
بس ماعليكم انا عاقل .. مخلي الحب لأصحابه .. المهم عندي دراستيه الحين واييب الشهاده .. وطبعا انمي مواهبيه فالكوره.. ربكم استوي لاعب محترف ههه احلم وايد ..
والأشيا الثانيه ..مم ترا كل شي في وقته حلو .. صح ولا!
ادعولي انتو بس ..
****
انا يجلس تحت نخله يخرف رطب حق ماما عفرا ومني هذا بجاه داخل حوي يلعب .. باقي بنيه كله سير عند مدام ناعمه عشان بجاه جديد..
انا وايد حبي هذيل نفرات هذا سيم سيم انا فاميلي ..
انا داخل بلاد مافي ريال مافي بجاه .. هذا منيه كله بجاه مالي انا ..
خلاص انا مايروح بلاد انا اجلس مني على توول ويا ماماه عفرا وبجاه مالهم ..
حليله ماماه عفرا يجلس فوق منامه انا يشوف هي صرخ عليه قول نجوه جيب رطب جلديه .. هذا حرمه كله صرخ بس انا حبي هي يوم صرخ مايحبي يوم هي مريض ..
"جين ماماه انا يجي الحين" ..
انا يقول حق هي ويشيل هذا باسكيت ودي حقها ..
"
"
يالسه ع المنامه وانتقي رطب عشان اطرش منه لمريم واتريا نجموه تيب الباقي عشان ازيده ع اللي عندي ..
هذي يت راعية الحسن والدلال نجمه.. ههه حليلها ها النجمه عاشت ويانا عمر..
زين والله خرافها .. امبونا الا انا ونجمه نتونس رباعه الا الحين عيالي محاوطين فيني ومونسيني ..
هكم مايد وجاسم يلعبون جدامي بالسياكل .
. بيتي عقب ماكان ميت قبل سنه من هالتاريخ .. حيووه عيال سيف .. ندمت على اني ماوقفت ويا عليا من قبل .. لكن اللي الله رايدنه استوى..
والمهم الحين عندي عيالي هاييل .. اعيش وياهم اللي تام من عمري .. وافرح بهم.. وافرح برده سيف ان شاء الله ..
اشوف جسوم يايني بسيكله يسوق بقووو من بعيد .. بلاه مستطلق جيه .. وي حسبي الله على بليسك يا جسوم .. دعم المنامه ..
"
"
صديت على امايه وانا محطي ايدي على راسي عقب ماظربني حد المنامه ..
دفش شو اسوي .. بس كنت ابا اخذ عنها رطبه ..
خذت الرطبه والعيوز محتشره عليه .. زاغت عليه وحليلها .. ماعليكم بو سبع ارواح انا .. يمم .. حلو الرطب .. يابوكم حارميني من كل شي حلو .. حليلي تعبان بالسكر .. يالله تعودت على ها الشي .. الحمدلله عايش مرتاح ومستانس..
سرت بركب السيكل لقيت الصنقل طايح ..
رفسته وسرت امشي لميود .. بقص عليه وباخذ سيكله خخخ ..
"
يالله سوووو طااااف بيشتريلي ابويه غيره"
.
.
.
.
كنتم مع .. قلوب تحت المجهر..
ولكم منا أجمل التحيات ..
المزيوونه & عاشقة الشمال..
كل الشكر والتقدير :
للأخت.. عذبة الروح
http://3athabah.spaces.live.com/
الشاعر ..ساقي الشوق
http://www.angelfire.com/poetry/saaqe/gar.html
رد مع اقتباس
نمبر واان
اكتشفنا المستخبي"اظهر وبان وعليك الأمان
"
"
"وش يخصه مدري"
مواقع النشر (المفضلة)