الجزء السابع والعشرون

***********************
(الثلاثا) 19 ابريل 2005
***********************

ع المغرب قامت ساره وثنتين من بنات جناحها وشلن التلفزيون اللي فالصاله وودنه حجرة منى .. طلعن الفيديو اللي يايبتنه منى ها الاسبوع عسب يشوفون كلهم ملجة ساره بالفيديو .. وتمن يضبطن الشاشه لين ما تيمعن البنات فالحجره وقفلن عليهن الباب .. وشغلن الفيلم وبدن يطالعن ..

مي: ساروه ريلج يدري انج يايبه الفلم؟
ساره وهي تطالع مي: لاااا.. يويلج ان زل لسانج جدامه بياكلني
مي: ليش ماشاورتيه
ساره وهي تصاصر مي: يسد سالفة كيمرتج مافيني
مي: افف.. لازم يعني تذكريني

انتبهت منى لمي وساره وهن يتجادلن ودشت ع الخط

منى: اييه شو بلاكن
مي: ها .. لا ماشي ..
منى: سارووه طالعه تجننين ..
ساره: جااان استحي ..
منى: ماشالله الملجه كانت وايد حلوه..اول مره اشوف ساروه متلومه
مي: هههههه صدقتي والله ..
منى: لين الحين انتي ماطلعتي
مي: صبري بظهر عقب شويه..شكلي يظحك
منى: هااذي انتيي .. اييه شووفو ميووه والله تضحك مسويه عمرها برستيج مااايلييق
ساره: ههههههه هي والله ما يليق
مي: ايه جنكم الا طايحين فيني .. حمييير .. عن تخلوني اسير اخبر عليكم المدام واتي توقعكم
منى: بتتوقعين ويانا تراج
مي: لا انا مايخصني متعاونه ويا المدام
ساره: حليلج انتي ..

وها حالهم كل شوي تعليق وضحك واستهبال .. طلعت من عندهم ساره لان مروان كانت متصللها .. وطبعا تكتمت ع موضوع الفيديو لانها ماتبى مروان يحرج عليها لو درا انها شاله الفيلم السكن..يكفي سالفة الكيمرا ..

ساره: اخبارك بعد؟؟
مروان: والله طيبه.. انتي اشحالج؟
ساره: زوينه
مروان: افا ليش شوفيج؟
ساره: ماااعرف .. احس بتعب مروااان ..
مروان: انتي من ملجت عليج وانتي تدلعين عليه..مافيج الا العافيه
ساره: ههههه يالله عنك الحين انا ادلع
مروان: هي عيل.. كله تتشكين ..
ساره: فديتني
مروان: هي والله فدييتج
ساره: احم احم
مروان: تولهت عليج سااارووه
ساره: همم شكثر
مروان: أكثر من كل شي
ساره: ههههههه كيف بعد هاااي
مروان: فسريها ع كيفج المهم متوله عليج
ساره: الله يعينك عيل
مروان: هي والله الله يعيني عليج
ساره تسوي عمرها تشهق: ليييش شو سويت؟
مروان: عيل بالذمه اقولج متوله عليج وتقولين الله يعينك.. انزين جامليني جاملي شعوري قولي انا اكثر
ساره: هههههه انا أخجل
مروان: هي امره ..

وتموا يسولفون ويطنزون على بعض .. كانت ساره يالسه فالصاله بروحها بما انه البنات كلهم متيمعات فالحجره .. رفعت راسها على صوت وحده دشت الصاله وقامت واقفه وهي زايغه ..

ساره: مداام
المدام: هلا ساره .. ماشالله الجناح فاضي .. وين الناس
ساره : مادريبهم مدام .. يمكن فالكليه ..ولا فحجرهم رقوود

ومروان مازال ع الخط .. رمسته ساره ع الخفيف انها بتسكر عنه .. وسكرت ع طول ..

المدام: انزين انا يايه اشوف الحمامات اذا تحتاي صيانه ولا لا ..
ساره وهي مرتبكه تخاف تكون اصوات البنات عاليه وتكتشف المدام سالفتهم..
ساره: مدام احس حماماتنا اوكي
المدام: ماعليه بدش بشوف..
على طوول رفعت ساره تيلفونها واتصلت ع رقم ميوه .. والمدام دخلت الجناح .. مي ما ترد .. ردت تتصل فمنى .. بعد ما ترد ..

المدام: شو ها الحشره ساره؟؟
ساره: ماعرف مدام..

دخلت المدام الحمام تلقي نظره عليه .. وردت ساره تتصل فمي .. وفالاخير ردت عليها

ساره بصوت واطي: يعلكم ليش ماتردون.. ترا المدام عندنا فالجناح خفوا الحشره ودسوا الفيديو .. بســـــــــــرعه ..

وسكرت ساره عن مي اختها .. اللي خبرت البنات وبدت الزوبعه تستوي فالحجره اللي فيها الفيديو قامن ايرن وايرات الفيديو ودسنه فواحد من الكباته وقفلن عليه.. طلعن منى ومي من الحجره وسارن عند ساره صوب الحمام ..

ساره: الله يغربلكن
مي: وينها
ساره: داخل تعابل بالرشاشات ..
منى: والله زغت .. ميوه خل اندش اونا نسولف وياها .. وانتي ساروه خلي البنات يفظن الاجتماع عن تشك بشي ها المدام
ساره: اوكيك ..

ووقفن مي ومنى ويا المدام وتمن يستعبطن ويسولفن وياها .. وطلعت من الجناح وهن وياها لين ما تأكدن انها نزلت من الدري .. واتنفسن الصعداااء.. وردن داخل الجناح يطمنن الباجي انها روحت ..
وما تأدبن البنات وردن مره ثانيه للحجره اللي كان فيها الفيديو وكملن الفيلم لانهن واصلات على نهايته ..

وانفض الاجتماع بين البنات .. اللي سارت تكوي ثيابها واللي دشت تتسبح واللي سارت المطعم ..

وفليييل .. نزلن ساره ومي وأسما ووياهم منى وكم وحده من بنات الجناح .. ويلسوا جدام المبنى يستعبطون ويحاولون يلهون عمرهم بأي شي بما انه اليوم الثلاثا والاغلبيه ما وراهم دوام والسهره فها اليوم صباحي..
وساره كانت يالسه ع جنب والتلفون فاذنها ....

اسما: زين ما كشفتكم عيل المدام
منى: هي والله تخيلي .. ساروه مصفره من الخوف يوم شافت المدام.. بس زين عدت السالفه ع خير
مي: هههه والله اشكالنا تضحك ..
اسما: يا حليلكم ..
مي وقفت من مكانها: اقولكم خلونا نسير نلعب طايره
اسما: والله فخاااطري انا بعد .. كنت بقولكم مساعه
منى: انا بسير اييب الكره من فوق .. اوكيك
مي: زين وزقري باجي البنات جان يبن اين
منى: اوكي بشوفهم
اسما: ساروه بسج هذربان سكري عنبوه .. ملينا
ساره اطالعتها بنظره تخليها تسكت..
مي: ايه انتي منو ترمسين
اسما: شكله الريل
مي: هي امره الريل بترمسه حذالنا .. هاي وحده من مسابرها ..

شوي صكت ساره التيلفون وصدت عليهن ..

ساره: بلااكن انتن
مي: ها الكثر هذربان.. يوم انتي فالقروب ودري عنج التلفون
نوره: بل عليكن خلنها ترمس شو تبنهاا
اسما: ملينا .. دومها زاخه التيلفون
ساره: انزين فكني خلاص ما برمس حد لين يتصل مروان
مي: وليش حظرته متى بيتصل
ساره: هههه ماعرف .. مسكره عنه من نص ساعه
اسما: لا ماعليه بيصبر عيل عنج لين الفير .. جب ولا كلمه
ساره: يلاا مناك ..
مي: هي الحين ماتروم هيه تصبر.. شبكتها خلاص
ساره: قومن قومن بدال ها الرمسه .. خلنا نسير نلعب طايره وايد ابرك..
نوره: صبري منووه سارت تيب الكره ..
مي: نواري سبقونا انتوا .. اخاف حد فالملعب ..
نوره: خلاص اوكي ..

قامن ربعهم وتمن مي وساره واسما يترين منى تنزل..

اسما: ميووه.. شو استوى بسالفة الكيمرا الحين
مي وهي تتطالع اسما بنظره استغراب.. اكيد ساره خبرتها .. واطالعت ساره اللي ضحكت ..
مي: ماتخلين شي فبطنج
اسما: ههههه زل لسانها
مي: دومها جي.. عن يكون خبرتوا حد ثاني
اسما: لا محد يدري ..
ساره: ضاااع شرفها .. الحين اللي سرقت الكيمرا بتنشر صور ميووه ويااهي فضايح بتستوي
مي: جب جب ساروه .. انا بروحي ما عرف كيف عدن ها الايام ونفسيتيه جيه زفته.. والله عقب كل فرض اصلي ركعتين وادعا من الله بالستر.. كان عندي امل انه ها التحيووره تردلي الكيمرا بس للأسف
ساره: تغمض ميوه
مي: اونه متسترين ع السالفه نحن .. محد تم مادرى
ساره: محد درى الا نحن لا تحاتين
مي: والله يا خوفي اميه تدري.. بتزعل عليه
اسما: الله يعين بس .. بس منو هاي اللي سرقت
ساره: الكل اجمع انها الدارلنق .. لانه تخيلي الظهر كل حد اكتشف انه عنده شي مسروق .. بلغنا المدام وغيروها عنا ودو الدارلنق مبنى ثاني
(الدارلنق وهي عاملة السكن)
اسما: جان ع الدارلنق ترااها ما بتعرف للصور ..
مي: اه .. لا تعورولي قلبي .. متى بتنزل منوه ابا اخترش اليوم وانسى النكد.. الله ويايه وبيستر عليه ان شاء الله ..
اسما: حلييلج ..

ودقايق نزلت منى وفايدها كرة الطايره .. وساروا لين عند الملعب .. محد كان فيه لحسن حظهن .. وبدن يلعبن .. وحشرتهم تعالت وينهم ربعهم الباجين .. كانن وايد مستانسات وساره شاده حيلها فاللعب ..
لين فجأه وبدون سابق انذار وقفت ساره عن اللعب وسارت ع طرف الملعب وهي ماسكه بالشبكه وايدها الثانيه ع راسها...

مي: ساروه بلااج.؟
لفت ساره على اختها : ماشي .. ماروم العب بيلس
مي: هي بترضع فالتلفون
ساره: لاا راسي يدور
اسما: خل عنج ..

طنشتهن ساره ويلست ع طرف ع الرصيف .. تمت ماسكه التلفون فايدها تشوفه ..
مي اطالعها وردت تتطالع اسما..

مي: يوم اقولكم .. زخت تيلفونها ..

لكن ساره ما ستحملت الدوخه اللي يتها .. والبنات مسوين وايد حشره ورابشين الدنيا .. قامت من مكانها تبى تمشي توصل لين مبناها .. لكن فمشيتها قامت تترنح .. مش متوازنه ابدا .. لاحظتها اسما ..

اسما: ميوه شوفي اختج ..
مي: بسم الله بلاها .. جنها سكرانه
اسما: نسير نشوفها ..

ركضن مي واسما صوب ساره.. والبنات اللي يلعبن خفت ربشتهن شوي وهن يطالعن صوب ساره .. مب عارفات شو ياها مره وحده ..

مي: ساروه بلاج
ساره وهي تمسك بايد مي: وصليني المبنى ..
اسما: بسم الله بلاااج
ساره: راسي يدور ..
مي: مره وحده ياج .. من شوو
ساره: لا .. من يومين اتيني دوخه وتسير.. اليوم ماعرف ليش جي..
اسما: ميوه قومي نوديها النيرس
ساره: لامابا .. بسير حجرتيه
مي: مب ع كيفج ..

وصلنها اسما ومي عند النيرس .. واتصلت اسما باختها لطيفه تقولها انه ساره تعبانه .. كانت بعدها الساعه 11 والبوابه الفاصله امبينهم مب مسكره ..
يتهم لطيفه عند النيرس وشافت ساره اللي كانت طايحه ع السرير فغرفه حذال النيرس .. كان ويها شاحب ومصفر وشفايفها جافه ..

لطيفه: بسم الله بلاها
مي: مادري يا لطوف كانت زينه ولعبت ويتها الدوخه هاي ..
لطيفه: وايد لعبتوا؟؟
اسما: هي ما لعبت الا شويه ..
لطيفه: بسم الله عليها ..
اسما: فديتها ..مادري شو ياها ..
لطيفه: اسوم ميوه.. بتسكر البوابه عقب شويه .. ماقدر اتم عندي دوام باجر..
اسما: خلاص سيري انتي .. انا بتم ..
لطيفه: خلاص اوكي ..شلة ربعكم كلهن جدام ها المبنى
مي: زايغات ع ساروه ..


طلعت لطيفه من الغرفه .. وتمن مي واسما يالسات حذال ساره .. دشت عليهم بنت ربيعتهم منى .. ووياها فاطمه .. مي اطالعتهم .. ما بينت أي تعبير .. كانت مستهمه وايد على اختها ..
يلست فاطمه حذال مي وربتت ع جتفها ..

فاطمه: ان شاء الله بتقوم بالسلامه ..
مي: ان شاء الله
منى: شو قالت النيرس؟؟
مي: عطتها مسكن .. قالتلها اذ تبى تسير المستشفى بس ساروه ما طاعت..
منى: من زين المستشفيات هنه عاد .. وين بيودونها توام ولا الجيمي والعثرتين اسما: خلها بترتاح هنه وباجر بيودونها العياده قوم اميه
فاطمه: هي والله احسن ..

رن تيلفون ساره اللي كان حذال مي .. شافت مي المتصل وع طول ردت ..

مي: مرواان
مروان وهو مستغرب الحس: مي!
مي: هيه .. مروان ساروه طاحت علينا
مروان خاف وبدى التوتر يلعب بحسه: شو بلاها؟؟؟
مي: ماعرف كنا نلعب وطاحت علينا .. مصفره وحالتها لله
مروان: ولييش .. شو السبب مسااعه كانت صااحيه
مي: ماعرف.. مروان ماعرف شو اسوي
وبدت ادمع عين مي .. ومنى تتطالعها وترمسها بصوت واطي ..

اسما: ميوه لا تستهبلين .. ليش جي خوفتي ريلها.. لا تقوليله

مي ماكانت لاقيه اللي يواسيها فاضطرت انها تقول لمروان .. تباه يقوللها أي شي تقدر تسويه لساره عسب يخفف عليها ..او انه يقولها أي شي عشان تتطمن على اختها ..
مي: انزين مروان شو اقدر اسويلها!!
مروان: مي هيه حست بدوخه ؟
مي: هيه .. داخت وطاحت علينا
مروان: من شو هزرج .. من يومين وهي راسها يعورها وتقولي دوخه خفيفه اتيها..
مي: يا ربي .. ما لقت غير يوم نحن فالجامعه.. انا ماداني جي
مروان: ماعليج ميوه .. ان شاء الله مافيها غير كل خير .. لا تمين زايغه وتزيغينها.. سيري هاتيلها عصير برتقال فرش..
مي: وين بييبه الها بالله عليك
مروان: دوري مني مناك
مي: خلاص بشوف ..
مروان: اوكي بتصلج عقب بطمن عليها اوكيك
مي: خلاص اوكي ..

سكرت مي عن مروان .. واطالعت منى اللي مجابلتنها ..

مي: ماعندكم برتقال؟؟
منى: ممم ماظن شي فالجناح ..
مي: أي حمضيات ..
فاطمه: ماعليج ميوه .. انا الحين بطلع وبسير ادورلها وبسويلها عصير وبيي
اطالعتها مي : لاتعبين عمرج.. بقوم اسويلها انا
فاطمه: لا تعب ولاشي .. انتي تمي ويا ختج .. يمكن تقوم فاي لحظه وماتحصلج عندها اتم خايفه

وخت مي براسها وهي تشوف اختها اللي راقده من التعب ..

منى: تمن ويا ساره .. انا بسير بعد بدورلها شي تاكله .. مب من شي جي مستولها ماتاكل اكل نفس الناس والعالم
اسما: خلاص اوكي ..

تجدمت منى من مي وحبتها ع راسها ..

منى: غناتي لا تمين جي خايفه .. اختج مافيها شي ان شاء الله
مي: اوكي
منى: يلا بنسير وبنرد

وقفت فاطمه اللي كانت حذال مي .. اطالعت مي وحطت ايدها ع راس مي ومسحته بكل حنان .. مي اطالعتها ولأول مره تبتسملها .. كانت ابتسامتها ابتسامة تقدير على وقفتها وياهم وطلعن من الغرفه ..
بتم فاطمه وحده من ربعهم .. لو اليوم مي ترفض أي صله فيها لكن وقت الشده يتضح للشخص النوايا .. ممكن تكون فاطمه أساءت التعبير عن نفسها وعن مبتغاها .. لكن مي شاله كل فكره من بالها وفاطمه بتم الها ربيعه..
رد تفكير مي لأختها اللي طايحه تعبانه وغامظتنها .. تمت ماسكه ايدها وتقرى عليها .. وتدعي من الله انه ايي باجر بأسرع وقت عسب ينزلون البيت وترتاح هناك ساره اكثر ..


***********************
(الاربعا) 20 ابريل 2005
***********************

الساعه اربع وثلث العصر .. كانت مهره طايحه ع سريرها وتتجلب من عقب ما نشت من الرقاد .. ومها كانت تصلي .. بعد ماخلصت لفت على اختها توعيها .. لقتها تتجلب تمت يالسه مها ع السياده وتدعي ..
قامت مهره وشافت مها ع السياده ..

مهره: تقبل الله حجيه ..
مها وهي تتطالع مهره: منا ومنكم ..
مهره:افف تعب اليوم فالمدرسه .. احس عضمي يعورني
مها: من الرقاد
مهره: وين الا ساعه راقده فيها ..
مها: انتي ما تشبعين رقاد .. اقولج
مهره: ها
مها قامت من على السياده ووطت الوقايه وخلتها مفتوحه عشان مهره بترد تصلي..
مهره: بلاج صخيتي .. شو كنتي بتقولين ..
مها: ماشي .. صلي وتعالي الصاله اليوم عمار مطرشلي كم فيلم وايد حلوين
مهره: والله .. مال شو
مها: مادري .. بسير اشوفهم مخلتنهم فالصاله
مهره: اوكيك ..

دشت مهره الحمام .. اما مها طلعت الصاله .. ماحصلت لا جاسم ولا مايد حمدت ربها عشان ما يخربون الجو عليهم .. سارت جناح ناعمه تشوف عفرا اختها .. لقتها يالسه فالصاله زقرتها عشان اتي اتابع وياهم الفيلم .. وتيمعن ثلاثتهم فالصاله سكرن الليتات وشغلن التلفزيون وحطلهن فيلم ف جهاز الدي في دي وتمن يتابعن ..

اما تحت فكانت ام سيف يالسه ترمس بالتيلفون ويا بنتها مريم .. اول ما انتبهت للبنات داخلات البيت سكرت التيلفون وهي تتطالعن مبتسمه
سلمن مي وساره ع يدتهن ..

ام سيف: هلا امايه هلا الغاليه
ساره: اهلين امايه
حبتها ع راسها ويلست حذالها
ام سيف: بسم الله بلاج بنيتي شو غدى عليج جيه مصفره كلوج في الملجه
ساره: راسي وايد يعورني امايه
ام سيف: فديتج من الاغاني اللي تسمعينها
ساره: اوه امايه بروحي تعبانه
دخلت مي هالوقت
مي: اوف تعبت دخلتي وخليتي الشنط فالسياره.. وينهن البشاكير ماروم اسحب الشنط ؟!
ام سيف: بلاج تحرطمين يا امايه
مي: سلام عليج امايه
ام سيف: وعليج السلام
مي: اشحالكم ؟
ام سيف: الحمدلله شرا ماتشوفون ميلسه روحي ..
مي: جيه وينهم عنج ؟
ام سيف: مها ومهره رقود احيدهن من ين من المدرسه مادري جان نشن .. وجسوم وميود بيسيرون يلعبون كوره ..
ساره: ونعوم مايحتاي ميلسه فوق
ام سيف: ماتروم تصعد وتنزل بعد مب زين للحامل
ساره: تباها عاد من الله هي
مي: امايه شو ها الدلال؟؟ شي جاهي
ام سيف: هي فديتج .. قربي بصبلج
مي: خليه عنج بصب لعمريه ..
ساره كانت يالسه و ويها شاحب
مي: ساروه صدق شكلج اييب الفقر .. شو ها
ساره: بروحي تعبانه لاتزيديني
مي: عاد ماخبرنااج يا امايه.. بنتج امس طاحت علينا تعبانه
ام سيف وهي تطالع ساره: ويه بسم الله بلاااها
ساره وهي تطالع مي: لازم تسويلنا سوالف.. ماشي امايه دوخه يتني وتم راسي يعورني عسب جي تعبانه..
ام سيف: وشعنه ما تخبرني هااا .. قومي نشي بوديج الدختر ها كله من السهر واللعب فالجامعه ماترقدين ولا تاكلين شي
ساره: يا امييه مايخصه تعبت شوي وقمت حصان
ام سيف: وين حصاان شفتي ويهج انتي بالمنظره..
مي وهي تطالع مي وتسويلها حركه بمعنى الذبح..
مي: هههههه مايخصني .. انزين بغير الموضوع ..تعالي امايه ما خبرتج
ام سيف: ها شو بعد
مي: مروان بيي الييوم
ساره وهي تطالع يدتها
ام سيف: ويه ريلج بييج اليوم!!
ساره: هييي بيي ..
ام سيف: ماخبرتينا امايه عشان نسويله عشى
ساره وهي تطيح ع ريول يدتها تستعطفها
ساره: مب لازم ياكل
ام سيف: عجب ماتستحين .. شقى الريال اول مره يدخل بيتنا ومانكرمه
ساره: مب اول مره داخل الاسبوع اللي طاف
ام سيف: هاي اللي بتفضحنا ..
ساره: تعبانه امايه ماروم اشل عمري
مي: توج حصان .. عن ها المنكر ..
ساره: جب انتي
ام سيف: تمي طايحه بقرا عليج هاي عين ماصلت على النبي.. وانتي ميوه سيري امري على نجمه خلها تسوي عشا لريل ساروه

تمت ام سيف تقرا على ساره اللي رقدت ع ريول يدتها وهي تقرا عليها .. اما مي عقب ماخبرت نجمه ردت ليدتها لقت ساره راقده ع ريولها ..

مي: ويه انطبنت
ام سيف: اوص عن تنش.. مب صاحيه تنشاف .. فديتها مادري شو ياها .. قومي هاتي موسده من حجرتي ولحاف

سارت مي يابت موسده ولحاف..وطت ام سيف راس ساره ع الموسده اللي انتبهت عليهم
ام سيف: تمي تمي طايحه امايه .. رقدي فديتج
ردت رقدت ع الغنفه ولحفتها مي ..
ام سيف: المغرب بنوعيها تسبح وتتلبس ..احين خليها ترتاح شوي ..
مي: عيل انا بقوم امايه بسير بتسبح بعد وبرقد شوي
ام سيف: سيري فديتج ارتاحي ماورى عليكم على هالدرب 3 ساعات ..

صعدت مي فوق .. وشافت عرض السينما اللي مسوياتنه خواتها فالصاله .. شغلت الليتات عليهن وتمن متذمرات .. قامن وسلمن عليها وسكرن الليتات وردن يتابعن .. دشت مي حجرتها وهي تضحك عليهن .. كل حد فدنياه .. تسبحت ولبست بيجاماتها وطاحت بترقد ..
بعد المغرب نشت مي على ليت الغرفه اللي فتحته ساره ..

مي: ساروه رحميني تعبانه
ساره: ميوه انتي الي رحميني انا تعبانه قومي ساعديني شوي
مي: شو تبين اسوي استقبل مروان عنج
ساره: يالخايسه قومي سشوريلي شعري .. توه غسلته ومكشش
مي سكتت
ساره: ميوه قومي صلي المغرب صلت يبهتج
مي: صلت يبهت العدو ان شاء الله
نشت مي تغسلت وتيددت وصلت وعقب بدت تسشور شعر ساره .. وبعد ما خلصت سارت ساره تتلبس ومي كانت قابضه السشوار ويلست تسشور شعرها هي الثانيه.. بعد ما خلصت ساره لبس ..

ساره: متفيجه تسشورين شعرج
مي: خخخخ مايباله شعري الا اترياج تخلصين
ساره: ميوه احس راسي يدور
مي: لازم تسيرين تفحصين ساروه يمكن دمج نازل
ساره: مب متفيجه
مي: هاتي العوق لعمرج وهناك فالسكن خوفيني عليج
ساره: ليش تخوفين عمرج .. مايرزا الا دوخه
مي: طاع انتو ..

ضحكت ساره .. ويلست جدام التسريحه تحطلها شدو خفيف وبلاشر وقلوس تخفي الاصفرار شوي من ويها ..
لفت ع مي وشافتها يالسه تنبش فالطاوله..

ساره: شو دورين!!
مي: ها
ساره: بسم الله بلاج.. شو ادورين
مي: والله اني مافيني عقل.. ادور الكيمرا
ساره: هههههههه الله يخس بليسج الكيمرا شو بييبها هنه
مي: يمكن اصلا انا مب شالتنها الجامعه
ساره: بسم الله عليج ميوه من الله شايفين الصور رباعه ونحن فالحجره هناك
مي: والله اني تخبلت ..
ساره: بس انزين انسي السالفه كملت اسبوعين ..
مي: قصوا علينا مروان وسلطان .. التحيووره مافادت
ساره: هم شلهم .. ها امر من ربج .
مي: حسبي الله عليها اللي سرقت .. يعل ايدها القص.. وين بتروح من عذاب ربها
ساره: المشكله فالصور هيه
مي: وانا شو الي معورني غير الصور ..
ساره: يلا الله كريم .. انا خلصت قومي ننزل ..

قامن مي وساره ونزلن تحت عند يدتهن ..

ام سيف: ها ساروه اهون انتي ؟
ساره: هيه امايه بخير .. امايه ترا انا ماعرف خل الشغالات يجهزون العشا ع الطاوله
مي: بدوي مروان.. مب ويه طاوله افرشيله سماط وبيضرب بالخمس
ساره ضربت مي ع جتفها: ياحماره عن الغلط
مي: اوه اوه ماتحق ع الريل
ساره: جب .. اقول امايه تعالي سلمي عليه انزين هو ماشافج في الملجه
ام سيف: لله اتلوم انا
ساره: ليش تتلومين!! تراج امه بعد .. دخلي سلمي عليه
ام سيف: عيل بقوم اغير ثيابي والبرقع ..
مي: ياحافظ على عيوزي

اتصل مروان بساره اول ماوصل البيت .. وسارت له عند باب الميلس الداخلي عشان يدخل ..
كانت ثالث مره يشوف فيها ساره من بعد الملجه .. هالمره شكلها وايد كيوت وصغير .. كانت لابسه بنطلون عليه قميص كويتي للركبه فاتحه شعرها المدرج ولامه نصه..
مد ايده مروان وسلم عليها .. ودخل وحط كيس عند الباب ..

مروان: لاتطالعين ها مب لج
ساره سكتت
مروان: ها لعيوزكم
ساره: وانته مالج عليه والا على عيوزي
مروان: هههههههه لازم نقردنها
ساره: وين اسكت .. توها سارت تتلبس لك
مروان: ياحيها والله .. بعدين انتي شو تبيبها الهديه .. انا اكبر هديه من الله لج

ساره حاست بوزها بس ماقدرت تكمل وضحكت
مروان ابتسم .. هاي ساروه يعرفها من زمان .. تخبي مستحاها ورى خراشتها ..
يلسوا ع الغنفات .. لين دخلت عليهم ام سيف ..نش مروان سلم عليها وحبها ع راسها ..

مروان: اشحالج امايه ؟
ام سيف: الله يسلمك ابويه اشحالك انته واشحال الاهل والوالده
مروان: كلهم بخير يطولي بعمرج
ام سيف: وشحالها سويره وياك ؟
مروان اطالع ساره ورد صد على يدتها: الحمدلله
ام سيف: ابويه ترا ماوصيك عليها .. شوفها شقى مصفره من يت من الجامعه وهي مطيحه .. ميهوده .. ماتطيع تسير الدختر ..
مروان: ماعليج باجر بخلي عمتيه تسير توديها
ساره: ياسلام متى خططت انته وعمتك
ام سيف: هيه سيري يالله شو بعد والا انا بوديج .. لاتمين جيه بتهلكين اهناك في العين محد عندج ولا شو تقول انته وليدي
مروان: لا لا صدق .. لازم تسير

ساره كانت تضحك على يدتها ومروان اللي داروا صف واحد عليها .. عقب ماظهرت يدتها يلست ويا مروان .. تسولف وياه .. لين وقت العشا .. وبعد العشا ترخص عشان بيسير ..

مروان: سويره
ساره: هلا
مروان: ترا الكيس فيه كيس بعد .. اللي داخل لج واللي برع حق عيوزكم
ابتسمت ساره مستحيه : مشكور
مروان: افا عليج .. يالله اسمحيلي وترا مثل ماتفقت وياج .. باجر عموه بتوديج العياده ولا انا اللي بوديج
ساره: ان شاء الله يصير خير

نشت ساره بتوصله لباب الميلس..

مروان: ميوه وينها!
ساره: شو تباها ..فوق احيدها
مروان: اها.. من عقب سالفة الكيمرا مالها حس .. حتى يوم ارمسج ما اسمعها
ساره: هي وايد تحاتي .. ومتلومه منكم انته وسلطان .. وتخاف حد منكم يخبر قوم اميه ..
مروان ابتسم على تفكير مي ..
ساره: بلاك
مروان: ماشي .. ميوه اختج وايد ياهل
ساره: هههه ليش يعني
مروان: ماعرف احسها بريئه وايد .. طمنيها قوليلها لاتحاتي ان شاء الله خير .. ومحد بيرمس عن السالفه..
ساره: ان شاء الله
مروان: وقوليلها سلطان بعد يحاتي ..
ساره وهي رافعه حايب وتطالع مروان
ساره: هيييه!
مروان: هههه حليله كم مره سألني عن السالفه واقوله ماحصلنها
ساره: لازم بيحاتي بنت خالته وصورها ضايعه
مروان: يالله الله يعين ..
ساره: لو صوري انا اللي ضايعه شو بتسوي انته
مروان: قسم بالله بتخبل.. بستعين بالجن الزرق والحمر عسب اييبون الصور ولا يطيحن فايد حد غيري
ساره: ههههههههه خيبه جن مره وحده
مروان: هي عيل شو .. صور محبوبتي هاذيل
ساره حاولت تتهرب من نظراته الي تحرقها.. تم ماسك ايدها وهو مجابلنها ..
مروان: ساروووه
ساره وهي منزله راسها: هلا
مروان: تحملي من عمرج غناتي .. مابا شي يضرج ولا ابا شي يضايقج.. انتبهي لصحتج زين ..
ساره: ان شاء الله
مروان: يلا عيل بطلي ايدي عشان اروح
ساره رفعت راسها وضحكت عليه ..
ساره: الحين منو ماسك ايد الثاني
مروان: ههههه انتي .. ادريبج ماتبيني اروح .. بس شو نسوي بيتأخر الوقت وبينازعونا عقب
ساره: اسميك تجلب الرمسه انته ..

وحاولت ساره انها تخوز ايدها لكن هو ماسكنها بالقو وتمت تحاول وهو يضحك عليها وعلى محاولاتها الضعيفه .. وفالاخير خلى ايدها فحال سبيلها وابتعد عنها شوي ..

مروان: يالله قلبي دشي داخل .. انا بروح الحين
ساره: خلاص اوكي
مروان: فمان الله
ساره: فمان الكريم ..

روح مروان وسارت ساره عطت يدتها الكيس ورجعت غرفتها .. تحس بارهاق ..بعد ما بدلت وخلصت سمعت تيلفونها يرن ..كان مروان .. لكن عشان تاخذ راحتها في الرمسه ويا مروان .. طلعت من الحجره وسارت حجرة ريم ترمس فيها .. ما طول وياها مروان وايد عشان يباها ترقد وترتاح ..


************************
(الخميس) 21 ابريل 2005
************************

الظحى كان طالع سيف من غرفته من بعد ما نش من رقاده متأخر .. شاف فالصاله ناعمه يالسه وتشوف التلفزيون .. وحذالها عفرا بنتها كانت ماسكه دفتر تلوين ويالسه تلون بألوانها الخشبيه ..

ناعمه: واخيرا قمت ..
سيف: تعبان ما رقدت زين ..
ناعمه: ما بتنزل تتريق..؟ ولا ادق للبشكاره اتيب حقك الريوق هنه
سيف: لا لا مابا ريوق .. بس كوب حليب
ناعمه: بدقلها بخليها تيبه لك
سيف: زين ..

سيف وهو يطالع بنته اللي يالسه وياهم ..
سيف: ها عفاري شو تسوين
عفرا: ها .. ماشي بس الون..
سيف: تعالي اشوف

قامت عفرا من مكانها ويلسها سيف ع ثبانه وهو يشوف اللي كانت تلونه عفرا .. حبها ع راسها ..

سيف: شطوره بنتي .. تلون حلو
عفرا: باباه .. المعلمه دوم تقولي تباني اشترك فمسابقه
ناعمه: سيف يايب بنات فنانات وحده دومها ادق ووحده ترسم ووحده مسويه عمرها اديبه تكتبلنا شعر وخواطر
سيف: هههههههه الله يحفظهن لي .. خليهن مبدعات
ناعمه: امره عاد .. عاش الابداع ..
سيف: ناعمه بغيتج فموضوع
سيف وهو ينزل بنته ويحثها انها تيلس حذاله ..
ناعمه: شو
سيف: تراني قررت اسافر ..
ناعمه اطالعه باستغراب: شو تسافر . وانا .. حامل ماروم اسير وياك
سيف: لا انا بسير ويا راشد
ناعمه: وليش
سيف: ناعمه .. انتي تدرين بالوضع اللي انا فيه .. وتراني قررت اودره وحجزنا انا وراشد ع السفر .. بتعالج وبردلكم صاحي
ناعمه: سيف انته مافيك شي .. بروحك توهم عمرك .. قلتلك حط فبالك انك بتقطع وبتقطعه
سيف وهو يشوف بنته عفرا اللي كانت مندمجه فالرسم ..
سيف: خلاص ناعمه .. انا عزمت .. والمفروض تشجعيني على ها الشي
ناعمه: انزين بشعجك وانته حذالي مب بعيد
سيف: ماعليه .. حتى وانا بعيد بحصل منج التشجيع
ناعمه وهي متضيجه: وانا حامل .. بتخليني
سيف: ما بخليج .. البيت الحين مب مثل اول .. وانتي بروحج تعرفين ها الشي زين
ناعمه تنهدت وسكتت
سيف: يلا ماعليه يا ناعمه .. جان الله كاتبلي ها السيره ان شاء الله بردلكم سيف ثاني .. غير عن الاولي ..
ناعمه: نباه الاولي .. مب مخرب عليه الا شي واحد .. وانشالله بيودره
سيف: ناعمه.. خلاص انا نويت نيه ان شاء الله
ناعمه: على هواك .. المهم تردلنا بخير
سيف: هي ها الكلام اللي اباه
ناعمه اطالعت ريلها وابتسمت له ابتسامه واهنه ..

وشوي يابت البشكاره الحليب لسيف .. وعفرا ملت من اليلسه وقامت تبى تنزل .. طلعت من الجناح وسارت جناح خواتها .. ما حصلت غير مي فالصاله ..

عفرا: ميوه
مي وهي تتطالع عفرا: هاه
عفرا: وين بتسيرون متلبسين
مي: بنسير عند امنا ..
عفرا: همم ..بسير وياكم انا بعد .. مليت
مي: انزين تعالي عادي ..
عفرا: عيل ساروه وين؟
مي: ساروه يتها اميه الصبح ودوها العياده.. تراها تعبانه
عفرا: هي شفتها امس كانت مريضه.. والتوم وين؟
مي: يتلبسون .. يلا سيري تلبسي عشان ريم ونايف بيون يشولنا عقب شويه
عفرا : انزين

يايه عفرا بتتطلع من الجناح بس تذكرت شي وردت لمي ..

عفرا: مي
مي: هاه
عفرا: ابويه بعد مريض؟!
مي: ليييش بلااه؟؟؟
عفرا: هو يقول لاميه توه بيسافر يتعالج .. وبيرد بخير مب نفس قبل
مي تمت صاخه .. وردت تتطالع عفرا ..
مي: وشو قال بعد
عفرا: ماعرف .. اميه تقوله تم هنه انا بشجعك .. بس هو قال لا انا ابا اسافر خلاص
مي:وبعد
عفرا: ماعرف ميوه .. بس ابويه مريض!
مي: مم يمكن شوي تعبان وبيسير يتعالج .. بس لاتخافين هو مب مريض وايد
عفرا: هي .. لانه هو يرمس ويسولف توه ..
مي: زين .. يلا سيري تلبسي بسرعه ..
عفرا: انزين

طلعت عفرا وهي تركض .. اما مي حاولت تجمع كلام عفرا وتستوعبه صح .. ربطت موضوع علاجه .. بالموضوع اللي مأرقنها ومخلنها متأزمه من أبوها .. معقوله يعني ابوها نوى الحين انه يودر الشرب ويسير برع يتعالج من ها الادمان!!
ابتسمت مي لها الفكره وحمدت ربها من كل خاطرها وتتمنى صدق انه رمسة ابوها هاي تكون صح ويكون قدها .. وقامت من محلها تشوف خواتها عسب تستعيلهن..


****

في السياره كانت ساره ويا امها سايرات العياده ويسولفون في الدرب .. وساره تخبر امها عن الحاله اللي يتها بيوم الثلاثا وكيف انها طاحت عليهم .. وعليا كل شوي تخاف أكثر .. وساره مبسطه الموضوع لأمها ..

ساره: انا مادري ليش مكبرين السالفه انتوا
عليا: شو تترين ايصيبج بعد ؟
ساره: امايه ماعليه شر انا بلاج مزيغه عمرج خلاص نحن كبرنا امايه لاتمين تحسسينا انه نحن بعدنا عيالج الصغار اللي لازم اتمين مكوشه علينا
عليا: ماعليه من رمستج هاي اللي مالها معنى .. لوتكبرون بعدكم صغار في عيني
ساره: الله يهديج يا امايه الله يهديج

كان اسلوب ساره وهي تقولها يضحك مثل الام اللي متغصصه من عيالها
عليا اطالعتها وابتسمت لها كانها تقول في خاطرها " وين تقولين كبرتي وانتي بعدج خبله"

وصلوا للدكتور اللي شرحت له ساره حالتها..

الدكتور: انزين هذي دوخه من زمان والا
عليا : لا هي جريب يتها الدوخه دكتور لكن من فتره راسها يعورها
الدكتور: اوكي في ترجيع ؟
عليا: لا
ساره صدت على امها : احين انا المريضه والا انتي
عليا: اوص
الدكتور وهو يضحك : ههه خلاص ساره انتي احسن شي سوي تحليل دم عشان يمكن هذا الدم فيه نزول
عليا: انزين برايه احسن تسوي تحليل دم
الدكتور: بس في مشكل في جهاز التحليل في العياده .. انتي بيسير مختبر برع سوي تحليل ؟
عليا: هيه بنسويلها
الدكتور: انا بيكتب ورقه ودي مختبر وبعد النتايج انا بكتب دوا .. الحين في يعطي شوي فيتامين لين نتيجه
ساره: امايه ماتبين بعد يكتب لج من الدوا اللي بيعطيني اياه
عليا يودت عمرها عن تضحك: ساروه

ضحكت ساره وخذت الورقه وراحوا لمختبر تحاليل خاص ..
في المختبر عطت عليا الدكتور اهناك الورقه اللي كاتبنها دكتور العياده...

الدكتور: مين المريض
ساره: انا
الدكتور: خير ان شاء الله
عليا: تحس بدوار من فتره وقال الدكتور نسوي التحاليل للدم اهنه
الدكتور: لا الف سلامه عليها .. حضرتك متجوزه ؟
ساره اطالعت امها ..
عليا: كاتبه كتاب بس..
الدكتور: الف مبروك ..
عليا: الله يبارك فيك ..
ساره: الحين بيسوولي تحليل دم!!
عليا: الا تحليل دم..بلاج
الدكتور وهو يطالع الورقه: بس انا شايف ان التحاليل اللي كاتبها الدكتور شويه .. ايه رايك لو تعمليلها تحاليل شامله عن كل حاجه مدام هيه على وش جواز يعني .. وكمان تطمني عليها من كل النواحي ..
عليا: والله زين بعد انا ماعندي مانع .. ابا اتطمن عليها ..
ساره: شحقه مايحتاي
عليا: لايحتاي .. مدامج واصله سوي التحاليل شو وراج .. انزين دكتور نحن نبى لها كل التحاليل عن كل شي ..
الدكتور: الفحص الشامل فيه كل حاجه ان شا ء الله
عليا: عيل توكل

ساره حاست بوزها وامها تحثها ع السير.. ودشت غرفة التحاليل ويلست ع الكرسي.. مدت الهم ايدها ورفعت عنها العباه .. تمت مغمضه عينها بالقو ولافه على امها .. وعليا تتطالعها وتبتسم ..اول ما دخل الدكتور الابره .. صرخت ساره..

عليا: ها شياج
ساره: اوووج .. يلا خلص ..
عليا: هههههه ما يسوى الا ابره هيه

وبعد ما طلع الدكتور الابره لفت ساره عليه وهيه تشوفه يصب الدم فعلبه صغيره والباجي فانبوب..
الدكتور: التحاليل ان شاء الله بعد يومين
عليا: متى ؟
الدكتور: السبت ان شاء الله ..
عليا: على خير شكرا دكتور ..
طلعت عليا ويا ساره اللي تامه تتحرطم
ساره: خذ دم شكثر عني .. يحللون قطرتين والباجي يشلونه حقهم
عليا: من زين دمج عاد شو يبوبه كله اغاني الله يهديج
ساره: بالعكس كله فن واحاسيس .. المهم لاتنسيني شو ابا اقول
عليا وهي تركب السياره: شو عندج؟
ساره: وديني المول
عليا: ليش شو عندج
ساره: عقاب ليش تسويلي تحليل شامل انا بسير المول ابا اشتري اشيا للجامعه
عليا: ماتشبعين من مشاري الجامعه .. بعدين خواتج بيزعلن ليش اوديج وهن لا..
ساره: انا سبيشل كيس .. حاله خاصه .. انا مريضه
عليا: الله واكبر عليج .. بسير وياج بس مب تاخريني
ساره: لا لا كمن شغله بس ..
عليا: انزين ..

سارت عليا ويا ساره وين تبى .. مايهون عليها ترد بناتها في شي .. لكن ساره صدق ماقصرت في امها ماخلت مكان ماسارته ..وخذت كل شي فخاطرها وبالمره خطفت الجمعيه وشترت أكل وأغراض ناقصتنهم للحجره فالسكن.. وعقب رجعوا البيت ..


****

فحوي بيت بو راشد .. كانوا الشباب فارشيلهم حصير ويالسين يلعبون ورقه .. كان مانع وسلطان ومروان وفارس ومنصور .. والجدل يتعالى امبينهم عسب اللعب .. وكانوا منتبهين لمروان اللي من لعب وياهم وهو التلفون فايده وكل شوي يطالعه ..

فارس: ايه انته .. تبى ترمسها قم لا تلعب ..
مانع: هههههههه مروان بلاك ابويه مضيع .. مخرب علينا اللعب تراك
مروان: خييبه كلتوني ..
سلطان: هي عيل شو .. صاحب البالين جذاب
مروان: حشى ما يسوى عليه .. خلاص ها بوطي التيلفون يبوكم
منصور: أدبووووه ..
مانع: سلطان وينه خليفه اخوك؟
سلطان: ههههههه هذا منو يسأل عنه ملتهي ويا شغله ودوامه المسكين .. مايسوى عليه ..
فارس: يالله عيل انا يوم بشتغل بتم شراته جي ..
سلطان: لا في فرق .. ها خلوف من يومه دح وما يفكر الا بالنجاح
مروان: وجي فارس زد عنه ... تراه ولد المصريه الا شراته
فارس: هاا اشوف تقطيع انا هنه..
مانع: هههه اسمييكم بتاكلونهم .. خلهم ها الاثنينه مخوخ العايله .. يمكن يستون عباقره وعلما ويشلون اسم العايله
مروان: هي امره .. الا بيدمرون العايله وبيخلونا الامريكان ارهابيين وبيعتقلون ها الاثنينه وبيقولون انهم من تنظيم القاعده
سلطان: صدقك والله هههههههههه

وعلى سوالفهم هاي كملوا لعب .. لين أذن العشا .. طلعوا بو راشد ومحمد من البيت وشافوا لمة الشباب .. ونشوا كلهم مره وحده وساروا صوب المسيد ..
بعد الصلاه .. ردوا كلهم داخل البيت ..
وزادت ها المره اللمه بوجود الشباب .. الحريم.. البنات ..
كان مانع يالس ع الارض حذال ريم .. و ع الغنفه حذالهم كانت ساره يالسه حذال امها عليا وهي تتوارى عن نظرات الكل بسبب وجود مروان فها اليلسه وكانت منحرجه شوي .. ومي واحلام يالسين حذال بعض ع الارض .. ومكملين الدوره محمد وعبير ومديه والتوم .. والطرف الثاني كانت ام راشد يالسه ع الغنفه تتوسط بوراشد وسلطان ومروان كان حذالهم بس يالس ع الارض ..فارس ومنصور كانوا واقفين وهم يشوفون ها اللمه والزحمه .. وبالأساس كانوا ناوين يطلعون يتحووطون شوي فالفريج ..

مروان: وين بتسيرون
فارس: ماشي بناخذلنا لفه
منصور: يلا فمان الله

طلعوا من البيت .. اما الباجين فتموا يسولفون وياخذون اخبار بعض .. وطبعا الدنيا ضجه .. وفوسط ها الحشره .. رمس مانع يبى يسكت الكل ..

محمد: شو عندك
مانع: ياا جماعه .. بما انه الكل ملتم .. الصرااحه انا بعترف لريم اعتراف شنييع
ريم وهي تتطالع خالها مستغربه: بسم الله شوو هناك ..
مانع: ريم .. انا قبل .. يعني قولي من خمس ست سنين .. سرقت من عندج شي
محمد: خييبه سرقت والحين ياي تعترف
مانع: هههههه ابري ذمتيه ..
عليا: لا لا صحوة ضمير هاي ههههه
مانع: هذا هو .. تذكرين ريم ؟
ريم: ذكرني انزين انته .. شو سارق
مانع: شي تافه عندج وجلبتي الدنيا ادورين عليه
ريم: هههههههه والله مادري
مانع: المهم .. مره دخلت حجرتكم .. شفت البوكس مالج فيه كمن شريط عيبوني مال محمد عبده وعبدالكريم جي يعني هفيتلي كم شريط وروحت ..
ريم: ههههههههه مااال اول ..
عليا: ايام ماكانت ريم مدمنه ع ها الاغاني وانا انازعها وهي تزيد فها الاشرطه
بو راشد: هههه والله ويتذكر مانع.. سويت فيها خير انزين ..
مانع: عااد ها ريموه.. تراني اقولج من الحين .. اعترفتلج بامر السرقه..

الكل تم يضحك على مانع وسوالفه هذي .. وذكرياته اللي نبشها الهم فها اليلسه .. بعد نص ساعه .. اتصل نايف بريم يقولها انه بيمر ياخذهم.. خبرت خواتها الي ماطاعن يروحن ويبن يباتن..خلتهم ريم على هواهم واول ما وصل ريلها قربوبه داخل .. وبعد السلام شل حرمته وروحوا البيت..
وتمن البنات ع لمتهن هذي ويا الاهل .. دش جاسم ها الوقت البيت وهو راد من حواطة الفريج .. سار ويلس حذاله امه ..

عليا: خلصت هياته
جاسم: حليلهم ربايعيه من زمان ما يلست وياهم فالفريج
عليا: وين كنتوا
جاسم: هناك صوب الدكان ..
عليا: فديت روحك .. يلا قم اتسبح عاد عشان نعطيك الدوا
جاسم: اف مليت من ها الدوا انا ..
عليا: فديتك لا تقول جي.. لصحتك ها ..
جاسم: انزين انزين ..

مسحت عليا ع راس جاسم وحثته يسوي اللي قالته له .. وقام جاسم من عقب ما ضم امه بقو وباسها ع خدها .. وسار يتسبح من بعد حواطة اليوم ويا ربع طفولته..




***********************
(السبت) 23 ابريل 2005
***********************

في الدوام كانت سميه واقفه تتريا ريم اللي يالسه تخلص معاملات في ايدها .. تمت تتأفف سميه عسب تستعيل من ريم .. وريم اوراق وايده جدامها مب قادره تلحق..

سميه: يالله ريمان بريكنا الحين
ريم: لحظه انزين ابا اخلص شوفي شكثر الاوراق
سميه: انا من مساعه اتريا البريك عشان ابا اقولج شي وانتي تقوليلي اوراق
ريم: يالله يالله انزين خلصت ..

حطت الاوراق ريم ونشت سارت ويا سميه يتريقون في مكتب للبنات في مقر الشغل اللي يتدربون فيه .. شلوا ريوقهم ويلسوا ع طرف .. كان ريم تشوف الحماس في ويه سميه اللي كانت تبى ترمسها بسرعه

ريم: هاه يلسنا خير ان شا الله
سميه: انا .. انا ..
ريم: انتي شو
سميه: انخطبت
ريم بدهشه: صـــــدق
سميه وهي تتلفت : ايه خفي صوتج فظحتينا
ريم: مبرووووووك حبيبتي تستاهلين كل خير
سميه: الله يبارج فيج
ريم: منو الريال ؟
سميه: واحد من معارف ابويه من الشارجه .. بس الولد وايد يمدحونه
ريم: الحمدلله .. مبروك فديتج
سميه سكتت شوي وبعدين رجعت رمست: تدرين ريم .. بصارحج بشي
ريم: شو
سميه: انا عمري ماتوقعت ايني واحد يخطبني او ع الاقل اللي بيخطبني بتكون امه هنديه او شي جيه .. كنت كله محطيه في بالي انه اصل امي بيكون حاجز لمستقبلي .. بس عقب مانخطبت تاكدت انه تربيه امي هي اللي بنت لي مستقبلي .. هاللي خطبوني اسمعوا عنا سمعه طيبه .. مادري ليش انا مافكرت في هالشي من قبل .. وفكرت في اصلها بانانيه بس .. كنت اشوفج كيف تتعاملين ويا امج ويدتج .. اتمنى لو اني اقدر اتعامل وياها جيه .. لكن الشيطان عوذ بالله منه .. غشاني عن مكانتها كأم ..وخلاني افكر في نفسي بس .. كيف اواجه الناس واقولهم امي هنديه ..ومنو ها اللي بيرضى ياخذ وحده امها هنديه الا اذا كان هو نفس الشي .. بس الحين تاكدت انه التربيه هي الاساس مب الاصل

ريم: التربيه اهم من الاصل صدقيني .. ها العاقل اللي يفكر صح .. الحمدلله انج افتكرتي لها الشي الحين .. يالله بعده جدامج فرصه عوضيها وعطي امج حقوقها ترا الام ماتتعوض ابدا .. حسينا نحن بها الشي يوم خذونا عن اميه.. بس الحمدلله يدتيه بعد انسانه حنونه .. وطيبه ..
سميه: الحمدلله .. انا اعتذرت من امي .. وقلبها مثل ماتوقعت مثل قلب كل ام ماتزعل من عيالها .. وان شاء الله بعوضها عن اللي طاف .. ان شا الله
ريم وهي تربت ع جتف سميه وتبتسم: بارك الله فيج ..

يلسن ياكلن هن الثنتين ويسولفن عن الخطبه وكل امورها .. وريم كانت وايد مستانسه لربيعتها سميه .. وحمدت ربها انها عرفت مكانة امها وعرفت كيف تتخطى ها الحاجز الي مخلنها تقلل من شأن أمها بس عشان انها هنديه!

****

العصر كانت عليا يالسه في السياره في طريقها للبيت تفكر باللي صار اليوم وبالكلام اللي تلقته .. ماتقدر هي بروحها انها تواجه ها الموضوع .. لازم الكل يشاركها ويدلها .. رفعت تيلفونها واتصلت براشد اخوها ..

عليا: السلام عليكم
راشد: وعليكم السلام
عليا: اشحالك بومروان
راشد: الحمدلله اشحالج انتي
عليا: الحمدلله .. انته وين ؟
راشد: انا بسير العزبه الحين ليش
عليا: تعال شوي بيت امايه بغيتك
راشد: خير ان شاء الله
عليا: ان شاء الله بس انته تعال بترياك وهات ميره وياك
راشد: ان شاء الله .

سكرت عنه عليا واتصلت بمحمد اللي كان اصلا يالس في البيت ماطلع ..اول ما وصلت عليا البيت .. سارت حجرتها عشان تبدل .. ظهرت عقب الصاله لقت محمد ويا امه وابوه يالسين .. شوي دخل راشد ووراه حرمته ميره ..

راشد عقب ماسلم ع اللي موجودين صدلها: خير ام جاسم

كانوا اللي يالسين ميره وراشد وام راشد وبو راشد .. ومحمد اخوها .. كلهم مستغربين ليش عليا ميمعتنهم ها الوقت! ..

عليا: ان شاء الله خير..
تجدمت عليا منهم .. ويلست حذال امها وابوها .. تمت تتطالعهم والانظار كلها عليها تستجوبها ..تجرأت عليا وتنطقت بالسالفه ..

عليا: ممم انتو تعرفون انه ساره مريضه من فتره.. وساعات تيها دوخه وتتعب
ام راشد: هي فديتها تراج وديتيها الدختر
عليا: هيه .. يوم وديتها ماكان شي تحليل في العياده مال الدكتور وسرت اوديها المختبر الطبي وبالمره سوينا فحص شامل
محمد: وشو كانت النتيجه
عليا وهي تطالع امها وابوها : يمكن انتوا هب سامعين بها المرض من قبل .. (ورجعت صدت لمحمد ) بس ساره طلعت حامله لجين الثلاسيميا ..

كانت الصدمه مبينه على ويه محمد وراشد وميره اكثر من ام راشد وابو راشد لانهم ماعرفوا شو السالفه

عليا اغتبنت لكن حاولت تكمل كلامها عشان توضح الصوره أكثر لابوها وامها اللي يبين عليهم انهم مب عارفين شي ..

عليا : هي مافيها المرض .. لكنها حامله الجين
ام راشد: شو جينه بعد مافهم انتوا شو تقولون
راشد: انا ماعرف عن ها المرض وايد .. لكن احيد اللي حامل الجين ماعليه شر..
محمد: هي صح يا راشد.. لكن الحين لازم مروان يسوي التحليل
عليا: هاللي كنت ابا اقولكم اياه .. مروان يسوي التحليل
ميره: ولو طلع فيه نفس ساره ؟
محمد: مايصير يتزوجون لانه 50% من عيالهم بيطلع فيهم مرض الثلاسيميا
بوراشد: ماتخبروني شو هالمرض انتوا الحين ؟
عليا: ابويه ها مرض في الدم .. ساره الحين شاله المرض ولو مروان طلع شال المرض بعد ترا عيالهم مايعيشون .. يتمون يبدلولهم دم ويمرضون وايد لين يموتون
ام راشد: اللهم ياكافي وين يتهم هالامراض بعد .. ها كله من اكل هالغثايث اللي ياكلونها مال البرجر وهالخرابيط
محمد: امايه ها مب من الاكل .. ها يصير طفره فالشخص وخلل في ترتيب الجينات ع الكروموسومات ويطلع جين الثلاسيميا
عليا وهي تتطالع محمد: الله يهديك يا محمد شقى تشرحلهم جي ما بيفهمون
محمد: ترا هذا هو السبب .. هي امايه بعد يوم الاهل يتياوزون ترا الجينات تلعب دور.. ماتسمعين مخاطر الزواج من الاقارب ..
ام راشد: يالله يا محمد البداو من استوو ما يخالطون حد الا اهلهم ها ولد عم هاي وها ولد خال هاي ..
محمد: ترا هذا الخلط هو اللي يطلع الامراض
بوراشد: عوذ بالله .. عايشين نحن واهلنا امبونا ومافينا شي ..
عليا: ها الزمن يابويه تغير .. قاموا الا كل يوم والثاني يظهرولنا مرض يديد عافانا الله ..
راشد: انزين الحين ساره من وين يباته ها المرض؟
عليا: يا مني يا من ابوها .!
راشد: يعني لازم مروان الحين نقوله يسير يسوي التحليل ها
ميره: انزين لو طلع فيه شو بتسون ؟
راشد قال بكل حزم وبدون تفكير: يطلق ساره

كلهم التفتوا لراشد الا عليا اللي وطت راسها وبدت تصيح ..
ميره:لااااا كيف يطلق .. انته ماشفته كيف سوى عشان يملج.. ماشي حل ثاني ؟
محمد: ام مروان مافي حل ثاني لو طلع شال جين ها المرض لاقدر الله .. لانه ان خذها بيصير لهم واحد من اثنين .. يا اييبون عيال مرضى وهالشي حرام مدام يعرفون من البدايه انه عيالهم جيه بيطلعون .. او
ام راشد: او شو
محمد: او يعيشون بدون عيال طول عمرهم
بوراشد: لا مايصير جيه .. ليش الناس تعرس عشان تستقر وتيب بذره
محمد كان يربت على جتف عليا اللي كانت يالسه حذاله ..
محمد: ماعليه يا عليا تصبري ها امر الله وقضائه .. زين انه تداركنا الموضوع وعرفناه قبل مايعرسون .. غيرهم وايد طاحوا فيها والله يعينهم على مال بلاهم
ميره: انزين هم مسوين تحاليل قبل العرس ليش ماقالولهم اكيد لانه مروان مافيه ماعطوا للموضوع اهميه ..
محمد: جايز بعد .. انزين انتوا لاتكبرون الموضوع الحين.. خلوا مروان يسير يسوي التحاليل يمكن مافيه بعد وانتوا جالبينها مناحه علينا
راشد: انا برمسه اليوم وبقوله.. انتي خبرتي ساره؟
كان موجه كلامه لعليا
عليا: لا ماخبرتها ولا بخبرها
راشد: عن مروان يسير يقولها
عليا: برايه يقولها هو ولا اقولها انا
بوراشد: لا حول ولا قوه الا بالله .. لا حول و لا قوه الا بالله
محمد: مدام هالمرض طلع في ساره اكيد ترا ياينها يا من ابوها او امها .. يعني يمكن المرض بينا ونحن ماندرى .. لازم احين نسوي تحاليل للعيال كلهم ..
عليا: انا بسوي لبناتي كلهم وبسويلي انا بعد
محمد: احسن شي تسوينه ..

راشد كان مب فاهم وايد عليهم بس فهم المغزى من ورا ها كله .. من عقب ماخلصت عليا اللي قالته لهم قرر راشد يطلع عنهم هو وحرمته يرمسون في الدرب لين وصلوا بيتهم

ميره: ياربي شو ها المصايب اللي طلعت لنا من مادري وين .. مامداني افرح بولديه.. يارب اسالك انك تهونها علينا ويطلع مافيه المرض ها

راشد كان ساكت مب عارف شو بيقول حق ولده ..دخلوا البيت .. ميره صعدت فوق وهي حالتها حاله وتدعي من ربها انه يهونها ع ولدها .. اما راشد تم يالس تحت يبى يتصل بمروان ..

مروان شل التلفون متاخر وكان صوته يبين انه راقد: الوه
راشد: مروان
مروان: همم
راشد: قوم انته راقد ؟
مروان يحاول يصحصح: هلا ابويه هي كنت راقد..
راشد: قوم انزين برمسك
مروان حس انه ابوه جدي في رمسته نش وفتح عيونه
مروان: ها ابويه امر
راشد: مروان اسمعني زين شو بقولك للاخر ..
مروان: خير ابويه شو مستوي؟
راشد: كل خير .. مصحصح انته
مروان: هي ابويه رمس لا تزيغني
راشد: انزين اسمعني ..ترا ساره بنت عمتك يوم سارت تسوي التحاليل ويا امها طلع عندها جين ثلاسيميا ..حرمتك شاله ها المرض..
مروان مب مستوعب زين ابوه شو يقول
مروان: هاه ؟ شو
راشد: شو ها .. اقولك ساره ..
مروان: بلاها
راشد: تحاليلها تقول حامله مرض ثلاسيميا
مروان سكت شكله استوعب الحين
راشد: مروان
مروان: وياك ابويه ..
راشد: والحين نباك تسوي انته هالتحليل
مروان: ليش
راشد: شو ليش بعد ؟ تسوي عمرك غشيم ماتفهم هالامور .. سو التحليل عشان اطمنا عليك .. ياثر على العيال تراه
مروان تربع في يلسته وهو عاقد حواجبه : انزين .. (قالها باسلوب انه يتريا ابوه يكمل)
راشد: الحين تسير تسويها تسمعني
مروان: احين ماشي عيادات .. باجر باجر
راشد: انزين .. يالله عيل مع السلامه
مروان: مع السلامه

مروان يلس يفكر .. احين هو كان واعي وابوه يقوله انه ساره حامله للمرض .. لكن يحس انه حلم .. مب مستوعب الفكره زين .. يلس يتذكر اللي درسه عن هالمرض.. حاول يربط كيف ساره فيها الجين .. وكيف ممكن هو يكون فيه ..
رجع يتذكر لو هو فيه شو يصير ! ماحب انه يتعمق في التفكير اكثر .. رفع تلفونه عشان يتصل بساره لازم تشاركه هاللي هو فيه ..
اتصل فيها كم مره لكنها ماترد عليه ..
كانت محطيه التلفون في شنطتها ويالسه في محاظرتها .. حست بالتلفون يهز في الشنطه.. فتحتها وشافت انه مروان اللي يتصل ..

اسما الي كانت حذالها: ساروه الدكتور يطالعج
ساره: مروان متصل لين الحين 3 مرات
اسما: بلاه
ساره: شدراني احيد يرقد هالوقت
اسما: انزين ها اخر كلاس.. يوم بتطلعين اتصليبه
ساره:ماعليه
يلست اسما وساره في محاظرتهم اللي كان باقي لها نص ساعه وتخلص ..

اما مروان نش من نومه خلاص عقب ماتسبح .. وتم يالس في غرفته ماله خلق يطلع .. يفكر شو هاللي صارله مره وحده .. يبى يشارك حد همه لكن وينها هي عنه .. لييش ماترد.. يمكن امها خبرتها ومتظايجه هي بعد ! او يمكن راقده !


****

طلعت مي من الحمام وهي لابسه الروب و حاطه الفوطه ع شعرها عشان تجففه وقفت فالجناح وهي تشوف منى ربيعتهم تكوي ثيابها .. اطالعت لبسها اللي تكويه .. وضحكت مي بصوت عالي ..

منى: ها بلااج
مي: متى خذتي ها البيجامه
منى: الاسبوع اللي خطف ..
مي: انا عندي من فتره بس ما لبستها .. شرايج نطقم
منى: والله .. يلاااا عيل
مي: بشرط
منى: شووو
مي: انتي تكويلي
منى: شوف شوف .. مب لازم اطقمين ويايه ...
مي: منووووه بليييز .. كوييلي
منى: هيه انتي وايد دلعناج .. خلاص مب مستجده انتي الحين
مي: امبلا بعدني مستجده ماعرف اتصرف ههه يلا كويلي
منى: اف منج ..
مي: ثواني وبييبلج البيجامه
منى: بسرعه ..

ركضت مي لين حجرتها .. وشافت ساره يالسه تمشط شعرها .. طلعت بيجامتها من الكبت وسارت تعطيها منى .. ورجعت الحجره ..

مي: بدشين تتسبحين ..
ساره: هيه عقب شويه .. بس برمس مروان اول .. متصللي مساعه ومارديت ارمسه
مي: اها .. زين ..سيري رمسيه برع .. انا بتلبس وبتفرك بكريم خليني اخذ راحتيه..
ساره: اف منج ..

شلت ساره تيلفونها و طلعت من الحجره وتوجهت للصاله .. قبضت التيلفون .. اتصلت ع رقم مروان .. ثواني ورد عليها ..

ساره: الوه
مروان: الوه
ساره: هلا اشحالك
مروان: زين وين انتي اتصل بج ماتردين
ساره: مروان انا كنت في الكلاس
مروان: انزين
ساره: وانته احيدك ترقد العصر مب ضاري ادق ها الوقت ..
مروان: انزين.
ساره: بلاك معصب ؟
مروان: مب معصب .. ابويه اتصل وعاني
ساره: بلاه خالي ؟
مروان: اوف ساره ماعرف شو اقولج
ساره: شو مستوي ؟
مروان: انتي مارمستي عموه؟
ساره: لا مارمست اميه
مروان: عموه عليا مخبره ابويه انه تحاليلج اللي سويتيها يوم سرتي المختبر طلعت انج شاله جين الثلاسيميا
ساره وهي مصدومه: شوووووو
مروان: صبري ساره اسمعيني ..مب المرض الجين بس
ساره: انزين !
مروان: ساروه لاتخافين مافيج المرض انتي
ساره: كيف ومتى انزين
مروان: فيج من زمان اكيد .. والحين بينت اعراضه عليج ..
ساره: يعني بيأثر عليه
مروان: لا حبيبتي فهميني .. مب كل حد يشل جين الثلاسيميا تظهر الاعراض عليه .. بس انتي يمكن بنيتج ضعيفه ودمج ضعيف فأثر عليج ..
ساره: ماله علاج
مروان: ماعتقد .. لان اصلا انتي مب مريضه بس شالتنه
ساره: وانته شدراك
مروان: ساروه معروف ها الثلاسيميا .. مايظهر للي شالين الجين ..
ساره: انزين وليش خالي داقلك انته وانا محدد قلي يقولي!!
مروان: ماعرف.. شكلهم يبوني انا اخبرج ..ابويه يباني اسوي التحليل انا بعد
ساره: وانته ليش تسوي؟؟
مروان: ساروه .. لازم نطمن أكثر ..

ساره بدت تفهم أبعاد الموضوع .. ها الشي كانوا يسمعون عنه وايد ..ماتوقعت انها هيه بتمر بها التجربه وبتخوضها ..
ساره بصوت مبحوح تحاول تقنع عمرها
ساره: انزين انا يمكن وارثتنه من ابويه .. انته ليش تسوي؟
مروان: عشان نتطمن أكثر ..
ساره: هممم
مروان: انا خايف ساروه ماعرف اخاف يطلع فيني
ساره ويتها ها الفكره فبالها :لااا .. لا تقول جيه .. ما بيطلع فيك..انا اكيد يايني من صوب ابويه لانه محد من اهل اميه شكى من قبل وانته تعرف كلهم متواخذين فيما بينهم..
مروان: ماعرف
ساره كانت تحاول انها ماتربك نفسها: بتسوي التحليل؟
مروان: انا خايف مابا اسوي
ساره:لاتخاف مروان لاتخاف مابيطلع فيك شي ان شاء الله
مروان: انتي تبيني اسوي؟
ساره: هيه سير سو التحليل ليش توتر نفسك وتعيش بقلق نفسي وانته مافيك شي
مروان: انتي ليش مقتنعه انه انا مافيني شي
ساره: لانه قلت لك محد شكى من اهل اميه من قبل واهل ابويه انا ماعرف عنهم ويمكن اني ماخذتنه من صوب ابويه ..
مروان حس انه هدى شوي و ساره كانت ترمس بثقه وتشجيع لنفسها ولمروان عشان ما تزيد التوتر أكثر من جيه ..
ساره: متى بتسير تسوي التحليل؟
مروان: ماعرف
ساره: سير باجر ..لاتعيش فها الخوف وايد .. سير ومابيصير الا كل خير ان شاء الله..
مروان: ان شاء الله .. خلاص بقوم اصلي العشا انا .. برمسج عقب
ساره: اوكي بترياك
مروان: اوكي

سكر مروان ويلست ساره في الصاله تطالع التلفون .. الخوف بدى يسري فيها .. استغربت كيف يتها الشجاعه تهدي مروان وتقوله هالكلام .. معقوله هي حامل جين المرض؟ ليش انزين ليش هي بالذات وليش الحين عقب ماملجت ..
تعوذت من ابليس وهي تسمع صراخ البنات وخراشتهن في الجناح وروحت الغرفه عقب ماشافت انه مي ظهرت من الغرفه وملتهيه ويا البنات ..


رايـــكم!