الجزء الرابع والعشرين

************************
(الجمعه) 18 مارس 2005
************************
على الغدى كانوا الكل متيعين ع نفس السفره .. قامت اسما بسرعه وسارت فوق تلبس عباتها لانها متأخره عن الباصات .. اما لطيفه فكانت جاهزه وتاكل براحتها تتريا اختها لين ما تخلص..

ريم: اسوم وساروه ياخذن من اطباع بعض
مريم: هذيل طالعات على حياة يدوه .. باردات ..
نايف: ماعطتهن امايه عفرا عيل هههههههه
ريم: فديتها امايه.. لانت يبوك الحين .. مب شرات قبل ..
مريم: الله يطولي بعمرها..
الكل: امين ..
خلفان: نايف شو سويت بالسالفه اللي قلتلك عنها
مريم وياها الفضول: أي سالفه؟
خلفان ضحك على فضول حرمته بس تجاهلها.
نايف: أي وحده ابويه؟
مريم: بس فيه سوالف وايده ثرها
خلفان: هاذيج .. اللي موصنك عليها
نايف وهو يغمز لابوه : هييه .. الــ
خلفان: خلاص عقب عقب
مريم: نايف قول قول .. شو داسين عني
نايف ضحك .. وكمل ويا ابوه..
نايف: هي امايه .. الصراحه انا ما ابا اخبي أكثر ..
خلفان: نايف غد ريال عااد
نايف: ابويه انا ريال .. بس ها السالفه ما ينسكت عنها
مريم: يالله طيحتولي قلبي.. شو مستوي؟
نايف: امايه ترا ريلج يبا يعرس عليج.. عايبتنه سكرتيرة خالي سيف ويباها
مريم وهي تطالع نايف وعلامات التوتر باينه على ويها ..
خلفان: وشحقه ترمس انته .. انا بروحي بشاور حرمتيه وبخليها تخطبلي اياها
مريم فولت ولفت على خلفان: الا على قص رقبتيه ها الي قاصر..تيبلي لبنانيه ف البيت تتميعلي .. والله ثم والله مـا
نايف: بل بل بدت تهدد الواالده ..
خلفان: هههههههههه عن يرتفعلج الضغط
البنات كانن يسمعن ويشوفن ملامح الويوه ومب مستوعبات وفنفس الوقت بدن يتحاملن على خلفان ..
نايف: ههههههههههههه امااايه هدي هدي كنتي في برنامج صادوه
مريم وهي تطالع نايف: سود الله ها الويه.. عنبو زين ما نطرت ميته..شو بتستفيدون عقب
خلفان: يالله .. ها الكثر تغارين؟
مريم: لا هب غيره ..
ريم: ههههه والله انكم خوفتونا نحن بعد .. امره على الخط نايف ويا عمي
لطيفه: هههه حليلج يا امايه..
مريم: عيل ..
خلفان ونايف تموا يضحكون ..
خلفان: انزين لا صدق .. شتريت الاسهم اللي قلتلك عنهن
نايف: لا ابويه بعدني.. بسير ان شاء الله باجر وبشتريهن ..
مريم: الا سالفة اسهم هيه
ريم: وشو شغلهم الشاغل ها الايام غير الاسهم يا عمتيه ..

من بعد الغدى .. ركب لطيفه واسما ويا نايف اللي سار يوصلهم موقف الباصات .. نزل نايف وياهن الاغراض وسلم عليهن وعقب ركب سيارته بيروح ..



****

العصر قبل مايسير مروان العين طلع سيارته من حوي البيت ووقفها جدام بيت يده نزل عسب يسلم عليهم .. لقى يدته وامه يالسين في الحوي مع مرت عمه وبناته.. سلم عليهم ويلس يشرب قهوه ..

احلام: عاش من شافك
مروان: هههههه عاشت ايامج بنت محمد
احلام: بطرت علينا احين ماتي تسلم شرات قبل
مروان: لا افا .. انا ابطر ع خواتي مايستوي
احلام: هيه قص عليه انته
مروان: ههه عموه عليا وينها ؟
ميره: داخل .. سيرلها

كان مروان مرمس امه .. اللي ما مانعت بالعكس استانست وايد وحثته انه يقنع عمته جان بترضى..
دخل مروان الصاله لقى عمته يالسه اتابع مسلسل..

مروان : السلاام علييكم العمه ..
عليا وهي تطالع اللي ياي.. ابتسمت: وعليك السلام..هلا فديتك اشحالك؟
مروان: الحمدلله اشحالج انتي عموه؟
عليا: الحمدلله .. شو شكلك ناوي الجنوب..
مروان: هييي يا العمه ..والله مليت من الدرب..
عليا: يالله شو بتسوي
مروان: الحمدلله على كل حال..
عليا: الحمدلله .. ملازم ومتخرج من كلية الطيران .. نعمه يا وليدي ..
مروان:الله يديمها ان شاء الله
عليا: ان شاء الله..

مروان ماعرف شو يقول بس يخاف ياذن المغرب وكل الحريم يدخلون ويخربون عليه..
مروان: ويديمها على حرمتيه ان شاء الله
عليا ابتسمت : حرمتك بعد ان شاءالله بتخلص وبتتوظف وبتعاونك..
مروان: ان شاء الله ..
عليا يت فبالها بنتها وهي تشوف مروان .. وحمدت ربها على ها النعمه وانه ريال مثل مروان خطب بنتها ويباها..

مروان: عموه طلبتج
عليا: امر فديتك
مروان دش فالموضوع ع طول: عموه انا بغيت املج ع ساره
عليا بدهشه: تملج عليها ؟ ليش فديتك مستعيل.. بعدها ساره باقلها سنتين
مروان: عموه انتي تشوفين كيف صندوق الزواج ياخر الطلبات .. الناس يعرسون واييبون ولدهم الثاني عقب يطلع لهم .. هذا غير قرض الاسكان اللي يباله وقت وايد .. وانا على معاشي بس مابقدر .. ابويه مابيقصر بس انا احب اعتمد على عمري ..
عليا سكتت كلام مروان مقنع بس بعد الوقت طويل : انزين اذا ملجت احين متى تبى تعرس !
مروان: ماعرف عموه متى ما يناسبكم .. انا عايش في العين ولو عرست ساره بتكون في البيت وبتسير كليتها وبترد ما بيأثر عليها شي .. بالعكس بتكمل دراستها وانا بشجعها أكثر.. ولو ما بغت العرس معليه بصبر لين ما تتخرج.. المهم املج الحين ..
عليا وهي تضحك: بتصبر..
مروان: هي.. ليش
عليا: الريال من عقب ما يملج خلاص..بيستعيل على العرس.. وانته ما مداك خطبت والحين تقول تبى تملج..
مروان: انزين.. مادري.. عموه انا ابا املج.. ماروم اتريا ..


عليا ابتسمت .. مروان يبين عليه متستعيل.. ما ينلام .. متخرج من الكليه من سنه ويبى يستقر..

عليا: والله انا ماقدر ارد عليك لكن برمسها وبشوفها شو رايها
مروان: عموه انتي شو رايج ؟
عليا: لو كنت واحد غريب ماكنت برضى بس انته ولد اخويه والثقه فيك قبل غيرك ويسعدني انك حاب تعتمد على عمرك وهالشي يطمني اكثر ع مستقبل ساره .. الله يوفقك وياها فديتك.. انا موافقه وان شاء الله هي توافق بعد

مروان نش حب عمته ع راسها
عليا: بارك الله فيك وليدي ..
مروان: يالله عيل عموه.. ورايه درب بترخص منج
عليا: درب السلامه فديتك.. الله الله فالمعرس عاد
مروان وهو مستانس حده: لا ماعليج .. بس خلها توافق هيه..
عليا: اللي رايده ربك بيصير..

سلم مروان على عمته وظهر من عندها متوجه صوب سيارته نسى حتى يمر على الي يالسين فالحوي .. زقرته امه .. وانته الهم وسار صوبهم..

احلام: وين تبى طار السكه..تعال سلم وروح..
مروان: ههههه اسمحيلي بنت محمد

سلم عليهم مروان وغمز لامه عشان تفهم انه عمته وافقت .. لكن هي فهمت من قبل حتى هالحركه.. لاحظت ابتسامته وعرفت انه عمته وافقت .. وروح مروان عقب ماسلم عليهم ..
الحين باقي دوره ويا ساره وكل شي بيمشي ان شا الله ..
طلع عنهم مروان واتصل باخوه فارس اللي ماشافه هالاسبوع ..

فارس: الوه
مروان: هلا والله بالدحيح
فارس: متصل تحسد انته ؟ الله واكبر عليك
مروان: ههههه عنبوك مابتطير الكتب عنك هاتها وتعال اهنه ادرس
فارس: ياخي ان رديت مايلست في البيت .. تباني اجابل ملعب الكره وايلس
مروان: ياخي مايركب دحيح ولاعب كوره ..
فارس: يوز عني مروانوه
مروان: انزين اخر سؤال
فارس : تفضل
مروان: ماحيد انا امك سميره وابوك مدحت عشان تطلع جيه مصري
فارس حاول ايود عمره لكنه ظحك: ههههههه الله يقطع شرك .. بلاك عليه بقوم اقرالي في ماي بتاكلني
مروان: ههههه اسولف وياك الا ..
فارس: وين انته ؟
مروان: ع الخط ساير العين
فارس: مابتخطف صوبي الشارجه شوي
مروان: ليش ؟
فارس: بطلع بحوط وياك
مروان: زين والله ..انا رايق ع الاخر .. خلاص انا من اوصل جريب منك بتصل بك
فارس: اووووكي
مروان: يالله باي
فارس: مع السلامه

سكر فارس عن اخوه وهو يضحك عليه .. شكله مستانس وايد .. وطى فارس التيلفون ع طرف وقبض الكتاب يفصص المسأله يبى يحلها وهي مستعصيه وياه ..
ويوم انقهر .. رفع التيلفون واتصل فربيعه ..

فارس: الوو
مبارك: ها
فارس: هب هباك.. حد اييه اتصال يقول ها ..
مبارك: شو تباني اقولك
فارس: بلااك انته
مبارك: ماشي
فارس: بسم الله شوفيه حسك؟؟
مبارك: ولا شي..
فارس: يلااا عاد لا تستهبل
مبارك: تعبان مرقد فالمستشفى
فارس وهو مصدوم: من متى؟؟؟
مبارك: من يومين
فارس: اووه..الحمدلله ع السلامه.. ليش شو استوى فيك؟؟
مبارك: الله يسلمك طحت عليهم محموم
فارس: يالله الحمى جيه تهد حيلك وتنومك فالدختر
مبارك: حمى قويه يتني والله يا اني اهاذي طول الوقت..
فارس: انزين وشو هباتك الحين؟
مبارك: والله اليوم الحمدلله احسن بواايد عن امس.. رمت ارمس ع الاقل..
فارس: اسمييك.. اسمحلي الشيخ محد خبرني..
مبارك: لازم محد بيخبرك .. ثرك مرابع حد انته؟
فارس: هههه هيه مرابعنك انته
مبارك: بس عليك.. انا ما تم حد ماعرفني وانته ما تعامل غير ويايه
فارس: ماعلينا.. انا انسان ملتزم فدراستيه الحين مب متفيج لخربطان الشباب.. ولو بغيت استانس منصور ولد عمتيه مايقصر دومه ويايه.. وانته بعد ماتقصر
مبارك: هههه هي مابقصر.. بس يوم اقولك بنسير ميلس قوم فلان ما طيع ولا يوم بقولك بنسير معزومين عند شلة فلان ماطيع
فارس: مشكلتك اتي فأوقات صدق متأزم فيها وماشي وقت اني اطلع..والله الدراسه تهد الحيل وها نحن فأول سنه ..
مبارك: الله يعينا يا خوك .. يلا بتعدي ها الكم سنه
فارس: ياحيك .. عيل بروك طايح تعبان ..
مبارك: هي يا فروس
فارس: طحت عليهم فويكند .. ماطافك شي ولا سويتلك شغلك
مبارك: هي مداوم لين الاربعا ومخلص .. جان الا بتسويلي اشغال الاسبوع الياي
فارس: ههههههه يلا اجلب ويهك.. بتقوم شرات الحصان وبتسوي لعمرك..
مبارك: يا المصري
فارس: عدال عاد..
مبارك ضحك على فارس .. لأنه يدري انه الكل يعلق عليه بها الكلمه .. وطايحين فيه لمجرد انه انسان مفرغ عمره لدراسته..
فارس: يلا ابويه .. انا بكمل حل ها المسأله الكريهه .. وعقب بييني مروان اخويه.. وان شاءالله بنخطف عليك .. بدقلك عقب ودلني ع مستشفاك
مبارك: خلاص اوكي .. اترياكم
فارس: اوكي.. يلا فمان الله ..

سكر فارس التيلفون .. سرح شويه بفكره.. صحيح هو مبعد عن الكل .. بس مستانس باللي هو فيه !
يعرف انه طبعه صعب بعض الشيء..وانه ما يندمج وأي حد .. بس بعد مايعير ها الأشيا أي اهتمام .. ركز اهتمامه فالكراس الي جدامه ..
واخيرا بعد ما حل ها المسأله ارتاح نفسيا وقام بيتسبح وبيتزهب لين ما يوصل اخوه..

****

فليل في سكن البنات .. وبالتحديد فالجناح .. كانت مي طالعه من حجرتها عقب ما خلصت لبس.. جيكت ع تيلفونها وشافت مكالمه .. ردت اتصلت ..

عبير: مرحبا
مي: مرحبتيين.. شحالج عبير..
عبير: الحمدلله تمام .. اخبارج انتي؟
مي: والله تمام .. شخبار خالي والبنات
عبير: كلهم بخير الحمدلله.. ها فالسكن
مي: هي يبوج .. عيل حلام وين؟
عبير: هي هيه دقتلج وما رديتي تقول
مي: هي كنت راقده..
عبير: اها .. خلاص بناديها لج ..

خذت احلام تيلفون امها وسارت حجرتها ترمس مي..

احلام: شحقه كنتي راقده
مي: مادري راسي يعورني .. اول ما وصلت وطيت راسي وقبل شويه واعيه
احلام: اها ..وساروه اخبارها
مي: الحمدلله .. هي بروحها منطبه راقده
احلام: ههههه حليلها .. اليوم يانا مروان وشكله متشقق .. لا ويلس ويا عموه عليا بعد بروحهم .. احس وراهم شي
مي: يالله يا انتي يا ام الدواهي.. شو بيكون وراهم
احلام: شدراني خخخ
مي: يا حليله مروان..
احلام: شكله مستااانس واايد من عقب ما خطب
مي: وعاده هيه مب مسويه سالفه..جامده ها البنت..
احلام: ما عطيناها من رومانسيتنا
مي: ههههههه مالت علينا ..جان حصلنالنا اللي يحبنا عيل
احلام: ماعليج ماعليج .. فالدرب يايين ..
مي: هههههه مستخفه..

وفنص السوالف انتبهت مي لوحده من بنات الجناح يايه صوبها وفايدها كيس .. عطته اياها ..

مي: من منو؟
منى: فطوم
مي اطالعت منى بنظرة يأس
منى: ياخي اذيتينا وياها انتي.. بتم وراج لين تكلوزينها هاي
مي: تهبي الا هيه .. ما لقت غيري انا
منى: هههه على بابا يا ماما
مي: لاوالله
منى: صدق مستجده مستعصيه انتي ههههههه
مي: منووه عاد.. كم مره قايلتلكم لاتسوولي سوالف وياها.. بس وايد طرشت اهداءات وتشوفني اني مب معبرتنها .. شو تبى هاي
احلام: بل عليج يا ميوه..
مي: صخي انتي بعد
منى: هههههه والله ما يخصني .. شو ذنبي اني وياها فالباص .. كل اسبوع تحملني اغراض حقج
مي: هاي محد غير ساروه مخلتنها تكمل .. بأدبها انا ساروه
احلام: عاد ساروه تستانس على ها السوالف
مي: والله مب مريحتني .. كل ماتشوفني تطالعني بنظرات جني مجرمه.. شو تباني اسوي تعاملت وياها عادي حالها حال أي وحده من ربع ساروه وتمت تتشره.. خذت وعطيت وياها بغت أكثر.. بس خلاص عاد..
منى: ههههههههههه قسم بالله انج تحفه ..
مي: منوه الله يخليج .. رمسيها انتي.. انا مب ويه تكلويز .. ادورلها وحده تسايرها فها السوالف ..

منى يلست حذال مي وهي تشوفها انها صدق متغصصه .. مي بتكمل وياهم كورسين .. عرفوا كيف طبعها المخاالف لطبع ساره .. استانسو بعشرتها .. وبسوالفها .. ومايرضون عليها شي .. اسلوب مي يجذب وايد من البنات صوبها .. واللي تشوفهم مي انهم كفو ترابعهم تمشي وياهم ك ربيعه ويستانسون وايد عليها.. لكن اللي تشوف انه غرضها شي ثاني على طول تتجاهل مي وجودها..

منى:حبيبتي والله ميوه .. شورايج تحبيني واحبج
احلام: خيييبه شو تقول هاي
مي: هههههههههه فديييت منووه والله وين بحصل حبيبه شراتج ..
منى: هيه ما شي انا خريجه ما بتحصلون شراتي عقب..

ميوه حضنت بنت جناحها وباستها ع خدها ..

منى: ميوه خلاص بنمثل دور الكلوز .. واوني بغار عليج ومحد بيقرب صوبج
مي: هههههههه لا حبيبتي مابا سوقي يطيح
منى: شوف شوف مابا مابا دزوني عليه
مي: هههه استعبط فديتني
منى: خلاص كلووزي.. انا الخرييجه منى .. اكلوز المستجده مي
مي: هههههههه ايه وايد مصدقه عمرج..بلاهن المستجداااات
منى: بل عليكن حلوج مانروم الكن ..

احلام عصبت من ميوه اللي مخلتنها ع الخط وتسولف ويا بنت جناحها .. سكرت في ويها ..

مي: ابييه حلامي عصبت ..
منى: هههههههه ما تنلام مسوتلها طاف
مي: يالله انتي يايه ترمسيني تبيني اطنشج
منى: خخخ يعني مني الغلط
مي: نص نص
منى: الا تعالي اقولج..ماخبرووج عن بنات جناحنا شو صارلهم اليوم؟؟
مي:شووو
منى: ميوه ماتدرين انه جناحنا مسكوون!!
مي: ويه بسم الله
منى: هي والله.. يقولج امون كانت سابحه ويوم طلعت شافت انه ايدها مشمخه مع انها تقول مافيها ظفور
مي: وييييه سمعنا وسلمنا
منى: وسعادوه بعد وسمة فرقبتها اليوم انتبهنالها..ماكانت فيها
مي: ايه منوه لاتخوفيني ..
منى: مادري شياهم ها الينانوه
مي: امييييه بنشغل قرآن فالجناح يابوج
منى: يبالنا والله.. الشي مب من فراغ ياي..
مي:يالله ماحصلوا الا جناحنا يسكنونه ..ايه انا اخاف
منى: بيني وبينج هو عادي نحن من يينا الجناح قايليلنا ترا ها الجناح ثجيل شوي وتخيلي مره سمعنا ركيض فالممر واصلا محد كان فيه..ومره سمعنا صوت ياهل يصيح ..
مي: ويه ويه ويه لا ترمسين اكثر عن يشرفونا
منى: ههههه يلا تعودنا عليهم من سكنا ها الجناح .. صاروا ربعنا عادي
مي: شياهم عيل اليوم اعتدوا ع البنات
منى: انا ادري!
مي: الله يقفع بليسج الحين كيف برقد .. قبل تقولي ساروه سوالف بس ما صدقها لكن اليوووم السالفه فيها اعتداااء.. ما بنسكت عنهم
منى: وين تبييين .. شو بتسويلهم بتحاربينهم يعني
مي: بنمزر الجناح بالغام ومتفجرات ههه
منى وهي تضحك: والله انج تحفه.. بعدين بيعصبون عليج
مي وهي حايسه بوزها: وييين الا رمسه .. ولا انا ديايوه ما أيسر خخخ
منى: الله يكفينا شرهم
مي وهي ترفع ايدها للسما ومغيره ملامح ويها: امييين

وضحكوا ثنتيناتهم .. وعقب ما روحت منى تذكرت مي انه احلام سكرت فويها.. شلت تيلفونها وردت تتصل فأحلام..اللي خلته يرن وما ردت .. بس فالاخير ما قاومت وردت وهي ماده بوزها .. وتمت تحايل فيها ميوه عسب ترضى.. وفالأخير قردنتها ميوه ومشت وياها أحلام كالمعتاد..


************************
(الاثنين) 21 مارس 2005
************************

كانت ام سيف الظحى يالسه مجابله مكينه الخياطه وتعدل كندورتها اللي كانت طويلها عليها .. وقالت بتقصرها ع قياسها ..
رن التلفون اللي محطتنه حذالها ووقفت مكينتها .. ردت ع التيلفون ..

ام سيف: مرحبا
الريال: مرحبتين .. هذا بيت جاسم سيف
ام سيف: هي نعم بلاه جاسم ؟
الريال: انا اخصائي المدرسه .. عسى ماشر جاسم اليوم ماداوم ؟
ام سيف: جاسم ماداوم ؟ كيف ؟ انا بروحي موعتنه وشفته وهو ظاهر من الباب
الريال: بس وصلني توه الملف وهو غايب ..سألنا طلاب الصف اذا شافوه والا لا قالوا لا ..
ام سيف: ومايد اخوه ؟ والا صح مايد هب وياه في نفس المدرسه .. دوروه ابويه ترى عنده السكري هالولد وساعات يطيح علينا .. انا مريقتنه عيل قبل مايظهر
الريال: اعرف الوالده ولكن هو مايانا .. تاكدي من السايق اوالشخص اللي اييبه اذا هو يا المدرسه والا لا
ام سيف: ان شا الله .. فمان الله ..

سكرت ام سيف وهي خايفه مب عارفه تتصرف .. وين سار جاسم ؟ اتصلت لولدها تستنجد به ..

ام سيف: الوه سيف
سيف: مرحبا امايه
ام سيف: مرحبتين.. ابويه ها الاخصائي مال مدرسة جسوم متصل يقول جسوم ماسار المدرسه اليوم ..مادري وين ولدك قوم اطالعه
سيف: امايه يمكن سار فوق رقد
ام سيف: انا جدامي شايفتنه يوم متريق وشال شنطته بيسير المدرسه
سيف : انزين انزين بتصل بالدريول بطالعه
سكر سيف التلفون واتصل للسايق اللي اكد له انه جاسم ماركب وياه .. لانه متعود يودي جاسم قبل البنات .. اما مايد يسير ويا عمار ولد عمته ..
طلب سيف من الدريول يدور عليه جان في الحجره اللي برع والا أي مكان .. لين يوصل البيت .. اما ام سيف كانت تحاتي وكل شوي تطرش نجمه تدوره في مكان ..
قبل مايرجع سيف البيت .. انفتح باب الصاله ودخل جاسم

ام سيف: جسوووووم انته وين سرت
جاسم وهو يحج عيونه : شووو
ام سيف: بلاك ابويه شي يعورك؟ وين سرت انته ليش ماسرت المدرسه
جاسم: سرت ارقد انا تعبان.. قلت لج الصبح انا تعبان انتي ماتخليني ارقد
ام سيف: وين سرت ترقد
جاسم: في المسيد عقب يا ها المطوع وعاني حشره ها بعد
ام سيف: حسبي الله على بليسك جانك خليتني الا احاتي واخاف ولا خليت حد ماخبرته حتى ريم اتصلت بها
جاسم: اوهو امايه انتي ليش جيه وشايه ماتعرفين تسكتين
ام سيف: صه يالله .. مسود العين ..

قامت ام سيف واتصلت تلفون لسيف ولدها .. وخبرته .. واول ماسكرت ياها اتصال من ريم ..

ريم: ها امايه
ام سيف: لاتخافين هاذوه ها مسود العين ميلس اهنه
ريم: وين كان ؟
ام سيف: سار يرقد في المسيد اونه ماشبع رقاد الصبح يوم اني وعيته
ريم: حسبي الله ع بليسك يا جسوم .. وقفتوا قلبي والله
ام سيف: شدراني انا بعد شحقه اتصلت بج .. من خدايتي ماعرفت منو ارمس
ريم: لا ماعليه امايه الحمدلله انه بخير انا يوم برجع دواه عندي
ام سيف: عندج اياه .. يالله برايج بقوم اشرب لي ماي نشف ريجي
ريم: يالله فمان الله

سكرت ام سيف عن ريم..و ردت لمكينتها من عقب ما تطمنت على جاسم ..
اما جاسم خلى يدته وروح فوق يكمل رقاد في حجره ريم..

وريم من عقب ما تطمنت على اخوها طمنت ربيعتها ..

سميه: وين لقووه؟؟
ريم: ههههه والله سالفه جسوم.. اونه ماشبع رقاد وسار المسيد يكمل رقاده .. اتمرد من طلعت عنهم امبونه ماييسر يقول مابسير المدرسه .. الا امايه حليلها هب رايمتله..
سميه: يالله المهم انه هو بخير .. قومي انسير الكافتيريا مدام الكلاس بدى وبعدنا مادخلنا اكيد بيحسبنا غياب طافت ربع ساعه ..
ريم: يالله عيل ..

تذكرت ريم شي..

ريم: كم التاريخ .؟
شافت تيلفونها ع الكلندر..
سميه: ليش؟؟
ريم: اليوووم عييد الأم .. والله فبالي من كم يوم .. نسيت السالفه.. بتصل فاميه ..

سميه اطالعت ريم وابتسمت .. مازالت سميه تتمنى تكون شرات ريم فاهتمامها لامها ..
ريم: اتصلي لامج انتي بعد
سميه: ها.. هي بدقلها ..

اطالعاتها ريم وفخاطرها ترمسها عن وضعها هيه وامها ..ريم كانت تشغل بالها من تشوفها تستعر من امها .. امها ما سوتلها شي شو ذنبها يعني انها مب مواطنه! تراها بتم امها .. لكن ريم ما اقحمت نفسها فالموضوع .. عل وعسى سميه بروحها من نفسها تحن على امها ..

اتصلت ريم فامها عليا وهنتها بها اليوم .. وعقب اتصلت فيدتها ..

ام سيف: ها امايه
ريم: ههههه امايه .. ترا اليوم يوم الام .. وانا نسيت مساعه ما اهنيج ..كل عام وانتي بخير
ام سيف: فدييت روحج .. وانتي بخير يا اميه.. الا عاد انا شدراني بها السوالف
ريم: ههههه يلا ماعليه المهم نهنيج .. سموه تراهم يوم الام ..

وسكرت عن امها .. وما نست ناعمه .. قالت اكيد انها راقده .. طرشتلها ع تيلفونها تهنيها .. وطرشت مسج لخواتها مي وساره تذكرهن بها المناسبه ..
وكملت دربها ويا ربيعتها للكافتيريا..

اما ساره فها الوقت كانت راقده .. انتبهت ع المسج الي مطرشتنه ريم .. ابتسمت وعلى طول طرشت مسج لامها تهنيها .. شافت انه الساعه وصلت 10 .. دوامها اليوم يبدى 12 .. تمت تجلب ع السرير وعقب قامت .. طار عنها الرقاد..
وعقب ما تغسلت ردت الغرفه .. شغلت الليتات وفتحت الكبت اطلعلها لبس..

انتبهت لميوه انه بدت تجلب .. ونشت ..
مي: ساروه احترمي نفسج وسكري الليت
ساره: اف قومي بسج انزين انتي
مي: والله انا انسانه ماعندي دوام لين الظهر
ساره: بتلبس وبتعدل وبظهر عنج
مي: والله انج سخيفه..
ساره: قلتلج بخلص وبظهر
مي: لاتقرقعين الكباته انزين..ادريبه الا شغل مغايض
ساره: ميوووه لاتسوينهاا سالفه..
مي: مالت عليج صدق حقوق الغير مهضومه عندج.. بتشوفين انزين.. وحده بوحده
ساره: انتي الي تبين تغايضين..
مي: اوكي انزين

غطت مي نفسها باللحاف وحاولت ترقد .. لكنها جيكت ع تيلفونها تشوف الساعه وشافت انه واصلنها مسج قرته .. خوزت اللحاف ..

مي: ايه السودا
ساره: ريلن بياخذج
مي: جب.. هنيتي اميه؟
ساره: هيه ..
مي: بدقلها عيل
ساره: يمكن عندها حصه
مي: بدق بشوف..

اتصلت مي بامها .. بس ماردت .. فطرشتلها مسج ..

مي: بطرش اهني نعوم بعد
ساره: هههه نسيتها هاي
مي: تعالي اندقلها عيل..

اتصلت مي فناعمه وحطته سبيكر ..

ساره ومي فنفس الوقت: مبرووووك .. كل عام وانتي بخير
مي: بل عليج بدق الخشب
ساره: لاحبيبتي مخطوبه انا شو عبالج
ناعمه وهي تثاوب: شو صاير؟
ساره: ايه انتي راقده.. قومي قومي .. اليوم يوم الام .. لا ترقدين
ناعمه ابتسمت : هي نسيت .. الله يبارك فيكن ..
مي: ليش مرقده لين احين؟
ناعمه: قمت الصبح وعيت العيال وركبتهم السياره ورديت ارقد .. احس بتعب
مي: ياويلي عليج.. ماياج خير انتي من ها الحمال..
ساره: سكتي لا تذكرينها .. بتلوعنا بوحامها الحين
مي: هههههه حليلج يا نعوم
ساره: حليل الياعده لله ..
ناعمه: يا مسودة الويه ..
ساره: هههههه فديتني بيضا ..

انتبهت ساره لتيلفونها يرن .. وربعتله .. اما مي كملت سوالف ويا نعوم .. انتبهت لملامح ساره .. استغربت ليش مخلتنه يرن وماترد.. وشكلها امبين انه مختبص..
وبعد ما سكرت عن ناعمه ..

مي: شو بلاج صاخه
ساره: ها
مي: منو يدق؟
ساره: منو
مي: بلاااج مضيعه
ساره: لا .. بس غريبه .. ليش يتصل؟!
مي قامت من الفراش ويلست تستوعب..
مي: مروااان؟
ساره: في غيره!
مي: ليش مارديتي
ساره: ميوه تبين تسويلنا سوالف انتي!!
مي: انزين عادي خطيبج تراه
ساره: انا ما يعيبني جيه.. اذا الحين بنطلع كل اللي فخواطرنا شو خلينا لعقب العرس!!!

مي قامت من سريرها وتوجهت لكبتها .. طلعت فودة ويها وفرشاتها ومعجونها وغسول للويه.. طلعت من الحجره وخلت ساره فحيرتها ..

مروان ما يأس ورد يتصل مره ثانيه لكن ساره مب طايعه ترد .. وشوي وصلها مسج من مروان ..

" صباح الخير ..

ساره لو كنتي واعيه ردي عليه .. ابا ارمسج ضروري .."
عقت التيلفون من ايدها ولحقت مي اختها الحمام .. شافتها يالسه تفرش اسنانها..

ساره: ميووه .. مروان طرش مسج يبا يرمسني ضروري اونه
مي هزت راسها بالايجاب
ساره: افف بسرعه خلصي ..

بعد ما تغسلت مي وهي تنشف ويها ..
ساره: شو الحل الحينه
مي: رمسيه شوفيه شو يبا انزين
ساره: ميوووه استحي ..كيف برمسه
مي: اللـــه وأكبر ..ساروه البليوت تستحي
ساره: اف ميووه لاتمين تغصصيبي
مي: صخي انزين تعالي الحجره فضحتينا ..

ردن الغرفه .. وساره قبضت التيلفون وشافت مس كول ..

مي: دقيله ساروه ما بتخسرين شي
ساره: مي انتي تحبين تسوين شي من ورا اميه؟؟
مي: طبعا لا .. بس جبري بخاطره ها الفقير وشوفيه شو يبا.. بيتم ولد خالج تراه
ساره: ماعرف
مي: هاتي تيلفونج انا برمسه ..
ساره : هزرج؟
مي: هيه هاتي ..

زخت مي التيلفون .. اول ما بغت ادق ع رقمه اتصل ع طول ..

مي: يالله تستر علينا.. اسميه متخبل ها الريال ..
ردت مي: الوو
مروان: السلام عليكم
مي: وعليكم السلااام والرحمه
مروان وهو متردد: شحالج ساره!
مي: ههه انا مي .. وانا الحمدلله بخير
مروان وهو حايس بوزه: ثرج انتي
مي: ها بديينا
مروان: راقدات انتن؟
مي: هي .. قبل شويه ناشين.. عاد تعرف دواماتنا متأخره
مروان: اهاا.. عيل ساره وين؟!
مي: ممم
مروان: ها؟
مي وهي تتطالع ساره تباها ترمس . وساره متردده ..
مي: هاذيه هاه .. اندوك اياها شكلها تتغلى عليك ..

فرت مي التيلفون على ساره وخلتها فالامر الواقع .. رفعت ساره التيلفون .. حست بأنفاس مروان فالتيلفون وبدت تتوتر.. سحبت مي من بدي البيجامه من ورا وظهرتها برع الحجره وميوه تصرخ عليها .. قفلت الباب ويلست ع الشبريه ..

ساره: الو
مروان: اخيرا تكرمتي علينا!!
ساره: ها.. لا سوري كانت ميوه مسويه حشره
مروان: هي.. شخبارج
ساره: الحمدلله تمام.. شحالك انته
مروان: يهمج حالي!
ساره تمت ساكته يبين على لهجته انه عتباان واايد.. لكن هيه شو بايدها تسوي ..
مروان: ساره انا داقلج وابا اقولج سالفه
ساره: شو مستوي؟
مروان: سمعيني زين .. ماباج تاخذين قرار متسرع.. ساره الصراحه بيني وبينج انا عيزت من صدودج الدايم .. خلاص ماروم اصبر ابا املج ..
ساره انصدمت من قرار مروان وتمت ساكته ولا تنطقت بشي..
مروان: ساره الله يخليج لاترديني .. انا محتاجنج..بس ماروم اصبر بدونج.. فخاطريه اخذ واعطي وياج بدون قيود.. انتي تحججين انه ما في بينا شي رسمي .. وانا الحين بسوي ها الرسمي وبملج .. قولي شو رايج
ساره: مروان
مروان: عوون مروان
ساره وبدى صوتها يتغير ومب قادره انها تتمالك اعصابها
ساره: انا بعدني .. كيف تبى تملج
مروان: ساره قلت ملجه هب عرس
ساره: ولو
مروان: يا ساره فهميني
ساره تمت ساكته
مروان: ساره لا ترديني ..
ساره: مروان لو انا وافقت عبالك الاهل بيوافقوون!!
مروان: لا تحاتين الاهل ولاتاخذينهم علثه.. انا رمست الكل عن ها السالفه .. حاولت قد ما اقدر اني اقنعهم .. وقلتلهم اني بقدم لصندوق الزواج وقرض الاسكان وشكلهم مقتنعين لانهم يعرفون كيف ها الامور تبطي.. ساره خلي كل حد عنج .. سمعي لقلبج يا ساره .. بتريا منج الرد ..
ساره: بس
مروان: اكيد امج بتشاورج .. وانا بتريا ردج لين هذاك اليوم .. خلاص مابضغط عليج اكثر وما بقنعج اكثر.. اذ وافقتي تراه يوم عيدي واذ لا تراني مالي غير الصبر .. فكل الحالات تراج لي ..
ساره حست بحراره تسري فويها .. استحت وايد .. ماتوقعت ها الجرأه كلها من مروان .. وما ردت عليه بشي ..
مروان: خلاص انا بخليج الحين.. وسلمي على ميوه ..
ساره: يوصل ..
مروان: فمان الله
ساره: الله يحفظك

سكر مروان عن ساره .. وهو مب مطمن ابدا .. شكلها مب مقتنعه بالملجه مول..
اما ساره بدت الافكار تسيطر عليها.. سمعت دق ع الباب .. فتحته وردت طاحت ع الشبريه..

مي: سكرتي؟
ساره: هي
مي: شو يبا؟؟
ساره: يسلم عليج
مي: لا والله . يبى يسلم عليه
ساره: غبيه.. لاتميلي زنه..انا برقد
مي: غربلج الله .. والدواام
ساره: مالي بارض..
مي: مادري شو قالج خلاج مختبصه جذه ..

ما ردت عليها ساره .. وغطت نفسها باللحاف .. رمسة مروان تمت ترن فاذنها.. هو شاور الكل واقنعهم .. رمسها وحاول وياها .. لكن هي ما تبى تملج الحين.. بعدها تحس عمرها صغيره على ها الخطوه.. ما تبى تلتزم من الحين ..
لكنه يحبها.. يباها.. ويحس بتصرفاتها انها تصده ..هي ما تقصد تصد حبه .. لكن بالنسبه الها سابق لاوانه .. كل شي في وقته حلو .. ليش هو مستعيل..
حست بنفسها ضعيفه فوسط ها التفكير .. بدون ما تحس دمعت عينها .. مسحتها على طول وقاومت مشاعرها اللي تقصف بها ..

أما مي.. فطنشت الموضوع ولبست للدوام وطلعت من الحجره .. كانت تمشي وهي عيونها ع التيلفون تقرى المسجات الي واصلتنها .. تأففت من خاطرها .. رفعت تيلفونها واتصلت فأسما بنت عمتها..

مي: مرحب
أسما: مراحب
مي: وينج انتي؟
اسما: فالمبنى اليديد
مي: ومنو وياج
اسما: ربعنا..
مي: منو انزين
اسما: قوم عواش العين
مي: اهاا.. زين بمر عليكم اسلم.. انا طالعه قبل دوامي بوقت
اسما: زين تعالي
مي: يلا حبيبتي طلبيلي شي اكله لين ما اوصل
اسما: لاااوالله
مي: خخخ يلا ماشي.. ماعندي وقت اطلب .. بيي باكل وبسير اداوم
اسما: اف منج.. يلا انزين تعالي..

كملت مي دربها لين وصلت مبنى80 ودشت صوب الانشطه الطلابيه وهي عباره عن مطاعم وكافتيريات .. اتصلت فاسما تبى تعرف وين هي يالسه .. دلتها ع الطاوله اللي يالسه عليها وسارت صوبهم ..

مي: سلامو علييكو ..
عايشه: وعليج السلااام والرحمه .. مرحباااا السااع مرحبا ملايين فذمتيه ولايسدن..
مي: هيهي اخجلتي تواضعي ..
أسما: قربي حياج..
مي: وين ربعكم عيل ..
اسما: من شوي مروحين كلاساتهم ومحد تم غيرنا انا وعواش
مي: اهاا.. واشحالج يا عواش؟
عايشه: الحمدلله بخير وسهاله الغاليه.. انتي اخبارج؟
مي: والله تمام .. من متى مخلصين دوامات
اسما: من ساعه تقريبا
مي: زين يحظكم .. مب انا توي ببدى دواماتي
عايشه: والله بنات السكن ما يبن الا الرقاد.. مريحات عمارهن كله ياخذن دوام مسائي
مي: خخخ مب من شي .. نسهر الليل ونرقد النهار
عايشه: والله ماعرف كيف عيشتكم فالسكن..
اسما: وناسه السكن والله
مي: مب للكل اسوم..
اسما: صح انزين .. بس بعد لمة البنات وناسه
عايشه: يا انه فخاطريه اتم ليله وحده بس فها السكن.. لكن بينقدون عليه
مي وهي تتطالع عايشه باستغراب..
مي: وليش ينقدون علييج؟؟؟
عايشه: عاده تعرفين انتي.. اهلنا ما يواطنون السكن
اسما: وليش ها الكثر متحاملين ع السكن؟؟ شوفيه ثره ينانوه؟؟
عايشه: شدراااني يا اسوم .. تخيلي في وحده من ربعي اخوها ضربها ضرب يوم عرف انها سارت السكن عند ربيعتها
مي: حشى .. وليش ها كله..
عايشه: ماخذين فكره عن السكن والبنات اللي فيه
مي: شو الفكره عاد
عايشه: يعني
مي وهي تستعبط: هو صح السكن مسكوووون بس بناته زينات ماعليج
عايشه: ههههههه الا مسكونات بناته
مي: حرااام فديتنا والله..
اسما: بسم الله علينا.. الا جناحهم هاذيل ولا نحن الحمدلله مرتاحين
مي: يلا عاد فكل مكان تراهم متواجدين..المهم ردينا للسالفه..ليش ماخذين فكره؟
عايشه: عاد تعرفينهم عبالهم انه بنات السكن مب اوكي
مي: بس لاه .. والله ماعندهم سالفه بنات السكن حالهم حال البنات اللي برع السكن يسد انهن متغربات عن اهاليهن ومتحملين معاناة السكن عشان الدراسه
اسما: ترا اللي ما يعرفك ما يثمنك
عايشه: اجل اجل
اسما: هههههههه هاي مالتي اجل اجل
عايشه: بس والله من رابعتكم بالعكس وايد حببتوني فالسكن.. احس صدق فرق بين افكارنا قبل والحين ..
مي: احم احم شي طبيعي.. عرفتي بنات مو حيالله
عايشه: يالله عاد..
مي:هههههه
عايشه: الا تعالي ميوه بتخبرج
مي: هاه
عايشه: شحالها فطيم وياج..؟؟
مي: فطييم؟!
اسما وهي تتطالع مي وتبتسم..
اسما: هي فطييم
مي: اي فطيم؟
عايشه: اونج عاد الحين
مي وهي تطالع اسما.. وكأنها فهمت منو يقصدن ..
مي: فاطمه؟!
اسما: هي فاطمه
مي: بلاها
عايشه: ماشي نقولج اخبارج وياها
مي: عادي
اسما: والله ميوه تجلط الواحد من برودها..
مي: ليش شو سويت
اسما: الحين البنت متخبله الا تكون وياج وانتي طااااف
مي: اسموه كم مره بقولكم اني مب مال ها السوالف
عايشه: انزين ميوه البنيه الا تبى تكون ربيعتج
مي: لاوالله.. عادي انزين من الله امشيه وياها ربع عادي.. بس هي وايد تبالغ..بس طفرتني مسجات كل شوي وينج وين سرتي وين ييتي شو سويتي.. تيلفونات ماتوقف.. والله شي يطفر الواحد
عايشه: خيييبه يا ميوه ..
مي: هي والله.. انا من قبل قايله لساروه واسوم ربيعتكن لاتعطنها أمل اني بكون وياها قو
اسما: انزين ميوه ليش يعني ماتكونين وياها ربيعه قو
مي: ليش هو بالغصب؟!
اسما: لا مب جيه.. بس فطوم وااايد اووكي
مي: اف اسوم بس لاتلعوزوني.. انا الكل عندي ربعي وكلهم نفس الشي..
عايشه: الا ماتحتايين تكون عندج وحده وااايد وياها فالسكن
مي: مب لازم ..
اسما: راسها يابس هذي
مي: خخخ شو بسوي ..

اطالعت مي ساعتها وصرخت ع البنات ..

مي: كله منكن اتأخرت
اسما: وين كلاسج؟
مي: هنه فوق..
اسما: يلا سيري سيري يا الدحدح
مي: الله واكبر.. يلا سي يو .. بباي عواش
عايشه: تبيني اوصلج غناتي
مي: لا فديتج تسلمين.. خلج ويا بنت العمه
عايشه: خلاص عيل..
مي: باي
عايشه: الله يحفظج

وسارت مي صوب القاعه اللي فيها محاظرتها .. وهي فبالها الرمسه اللي دارت امبينهم توه.. بس حاولت تتجاهل الموضوع وكملت دربها ..



*************************
(الأربعاء) 23 مارس 2005
*************************

فجر كانت قاعده في محاضرتها في جامعه الكويت من بعد ماسحبت اوراقها من الامارات ورجعت تكمل فالكويت.. كانت تفكر في الامارات .. والدراسه هناك ..كانت حابه الوضع..لو ما اللي صار وعكر عليها كان ممكن تكمل حياتها هناك..لكن صار اللي صار ..
حاولت انها تبدى من اول ويديد.. حسنت من علاقتها بمرت اخوها ..حاولت تكون حياديه في البيت .. عشان ماتسوي لنفسها مشاكل .. لانه خلاص ماعاد عندها حل بديل الا هالبيت وهالدراسه..
انتبهت وهي فوسط تفكيرها لحد مركز نظره عليها .. التفتت لقته يالس يطالعها واول ماشافته اختبص ورد اعتدل في يلسته ..
طنشت فجر .. وحاولت تركز ويا الدكتور لكن المحاضره خلصت ..
لمت كتبها عشان تطلع تسير البيت .. جيكت على تلفونها لقت ربيعتها زهره مطرشتلها مسج .. ابتسمت فجر للمسج اللي وصلها .. ويوم يت بتقوم لقت حد واقف جدامها ..
ماتعرف ليش اطالت النظر فيه .. الريال تم يطالعها يبا يستأذنها فشي.. وفجر عقدت حياتها وهي تشوف صورة أحمد فها الشخص.. نزلت عينها ولملمت اغراضها وهي مستغربه من اللي صارلها توه..

الولد: لو سمحتي
فجر: نعم
الولد: ممكن انقل عنج المحاضرات اللي فاتتني ؟
فجر: انا مو مسجله شي
الولد: شدعوه
فجر: صج انا ماعندي تقدر تسال أي احد بالمحاضره
الولد: اوكي شكرا ..
فجر: العفو ..

شلت كتبها ومشت عنه .. خلاص بعد كل اللي صار .. عاهدت نفسها ماتعطي لنفسها او لغيرها مجال انه يتقرب منها او تتعلق بحد.. مشاعرها مب بالشي الرخيص عشان انها تفتح المجال للعب بها ..

وصلت للموقف وركبت سيارتها وحركتها متوجهه للبيت .. ابتسمت وهي تسوق .. من شهر وهي فالكويت تحس صارلها فتره ما خطت ها الشوارع وما سارت وردت..كانت تحس انها مقيده عمرها باخر احداث صارتلها في الامارات منعتها من انها تونس عمرها .. لكن اليوم في شي تحسه قوى عزيمتها ..
صدق تولهت على بلادها وايد ويا فبالها انها تقترح على بشار انهم اليوم يروحون البحر ..

****

بدريه كانت يالسه مع عمتها بعد الغدى تقرا وتكتب رؤوس اقلام للدرس اللي بتلقيه اليوم .. اما عمتها كانت يالسه تتقهوي ..بعد ماخلصت بدريه من اللي تكتبه صدت لعمتها

بدريه: عموه
ام عدنان: ها امي
تنهدت بدريه ورمست: العرب ماردوا عليج جان يبون الملجه الاسبوع الياي والا لا
ام عدنان: لا والله يا امايه لكن امها ردت عليه انهم موافقين وماظن بيمانعون تكون الملجه الاسبوع الياي .. البنت مطلقه وماتبى عرس ودق ولا حتى عدنان يبى
بدريه: سألي ام البنت عقب الدرس اليوم
ام عدنان: ان شاء الله
بدريه: الله يجدم اللي فيه الخير ان شااء الله ..
ام عدنان:ان شاء الله.. انا بعد سالت اكثر وتاكدت عن سبب طلاقها حليلها خذت ولد عمها بهدلها .. ماخذ انجليزيه ومادرت الا عقب العرس وطلبت على طول منه يا يطلق ذيج او يطلقها .. واللي مايستحي على ويهه بدى بنت الحمرا على بنت عمه..
بدريه: غلطه اهلها ماسألوا اكثر عن الولد .. بس عشان ولد عمها يوزوها اياه جنه عيال العم ملايكه استغفرك ربي مب اوادم
ام عدنان: صدقتي .. عاد حليلها تكسر الخاطر بنت بعدها شابه 27 سنه
بدريه ابتسمت بحسره: الله يعوضها في عدنان ..
ام عدنان ربتت على ركب بدريه اللي كانت يالسه ع الكرسي : فيج الخير يابنتي انتي ماقصرتي ويا عدنان ابدا وتراج لعدنان عيونه المركبه ولا بيقصر ان شاء الله الله يوفقكم ان شاء الله اجمعين وياجرج على كل شي فديتج
بدريه ابتسمت ابتسامه باهته ماتعنى شي : امين
ام عدنان: انا بسير اطيح شوي لين الصلاه .. اسمحيلي فديتج ..
بدريه: مسموحه عمتي ..
نشت ام عدنان عشان تخفي دموعها عن مرت ولدها..كسرت خاطرها بس ما بايدها شي .. اما بدريه تعوذت من بليس ورجعت تقرا اللي كتبته عشان تراجعه قبل الدرس ..


****


المغرب نزلت مي من فوق من بعد ما ماخذتلها دش سريع من عقب تعب درب العين .. يلست ويا يدتها تسولف .. شوي حسوا بدردشة خفيفه عند باب الصاله .. شوي دخلوا جاسم ومايد وهم يزاقرون ..

ام سيف: ها بلاكم تزاعجون
جاسم وهو متحمس: امايه طلابه يايه هاكيه واقفه عند باب البيت
ام سيف: صه عيب عن تسمعك..حرام هاي مسكينه شو طلابه!
مايد: انزين امايه شو نقولها
مي: سيروا خلوها تدخل ..

تراكضوا جاسم ومايد برع وهم مستانسين .. اما ام سيف بطلت صرتها الي ع طرف وقايتها وطلعت منها بيزات..

مي: اسميج عيوزي ما تمين خالية اليدين
ام سيف: هي يا امايه ضريت الا دومي صاره البيزات فطرف الوقايه..نحتاي ولا شي ..
مي: يحيج ..

شوي دخلت وحده لابسه عباه ع الراس ونقاب وقفازات .. وكانوا جدامها مايد وجاسم يدلونها الدرب.. اما عند باب الصاله كانن مهره ومها واقفات يوايقن ويتضاحكن..


ام سيف: قربي قربي امايه

الحرمه تمت تهز راسها .. وقربت .. وتأشر ايدها للسما تدعي وحبت راس ام سيف ويلست ع الأرض مجابله ام سيف..

ام سيف: ها اميه شحالج!
الحرمه حبت ايدها من ورا وجدام واتجدمت بتحب ايد ام سيف لكنها بعدتها عنها ..

ام سيف: يلسي يلسي.. تبين قهوه تبين تمر
الحرمه هزت بالنفي .. ومي كانت تتطالع الحرمه مستغربه منها .. وتطالع جاسم ومايد اللي كانوا واقفين وعيونهم ع الحرمه ..
اما ام سيف غمضتها عبالها ما ترمس .. وردتها الحايه للناس ..

ام سيف مدت ايدها وهي ملحفنتنها بطرف وقايتها بتعطي الحرمه البيزات .. خذت الحرمه البيزات وخشتهم ع طول .. وقامت بتترخص من ام سيف..

ام سيف: يلسي يا امايه بنيبلج اكل واكياس طحين وتمر جان تبين ..

هنه الحرمه ما قدرت تقاوم .. وهي واقفه مجابله ام سيف حبتها ع راسها وعطتها المقفى .. ماسمعوا الا قهقه وضحك يتعالى ولفت الحرمه براسها وبطلت النقاب ..

" صاااادوووه"

قفزت ام سيف من مكانها وهي تشوف عمار جدامها .. تموا الكل يتضاحكون حتى انه مي دمعت عيونها من كثر ما تضحك .. وجاسم ومايد وعمار ميلسين ع الارض من كثر الضحك .. مها ومهره دشوا يشاركون الاجواء ..
اما ام سيف من الصدمه تمت صاخه وتتطالعهم بنظرات .

ام سيف وهي محمقه عليهم: سود الله ها الويووه جنكم تخلوني متولمه مب عارفه ارمس الحرمه عبالي بكمه ما ترمس .. عنبووكم زاد ..
عمار: هههههه الله حصلنا بييزااات .. يلا ميود وجسوم نسير ناخذ افلام بلي ستيشن..
ام سيف: غيركم الله من فريخات.. ميوه هاتي عنهم البيزات.. ما يستاهلونها قصوا عليه ..
مي: هههههههه حليلهم.. يلا ماعليه امايه صدقه عليهم..

وفوسط ها الاجواء والضحك .. دش سيف هو وناعمه الصاله الي كانوا رادين من العياده ..

سيف: ماشالله شو ها الضحك .. شالين الدنيا ..
مايد: فاااتكم والله .. سوينا مقلب لامايه
ام سيف: قصوا عليه عيالك وعمار ولد اختك
سيف انتبه لمي يالسه وتقرب صوبها
سيف: ميوه .. ييتو من العين ..
قامت مي ببرود وسلمت على ابوها.. اللي يلس حذالها ..
ناعمه: ليش شو سوولج؟ وعمار ليش لابسلك عباه!
عمار: هههههههه ترا قاصين على امايه .. سويت عمري مسكينه
سيف: ههههه والله انكم مب سهلين
ام سيف: يا الهروم يا الهروم ..

مي كانت مب مرتاحه فاليلسه حذال ابوها .. قامت من محلها تبى تظهر ..

سيف: مي ليش سايره!
مي اطالعت ابوها ولفت عنه: بسير ارقدلي ساعتين .. امايه خليهم يوعوني حق صلاة العشا ..
ام سيف: ان شالله امايه .. سيري ارتاحي

طلعت مي من الصاله .. محد اعار الموضوع اهتمام كثر سيف.. يشوف بعيونه ويحس كيف مي طفرانه منه .. من دروا بالسالفه وهي ما تقرب صوبه .. كلامها جدا سطحي وياه .. ماتعود عليها جذه!
ليش عيل ساره ما تغير فيها شي .. ريم امبونها سطحيه ويا ابوها .. والحين من عرست ما يشوف منها غير واجب الاحترام كونه ابوها .. بس مي طبيعتها مرحه .. لكن تغيرت صوبه .. تم فكره حيران .. ومب قادر يركز ويا امه ومرته فالرمسه..

دايما عقب كل يلسه وكل رمسه بينه وبين مي ها الافكار وها الهواجيس ادور فباله ومب لاقي حل لها الموضوع الي معقدنه ابدا.. ع الاقل ترمس وتقولها هي شو تبى يسويه وبيسويه .. لكنها حاقرتنه ..

اما مي فصدعت فوق .. دشت على ساره الحجره لقتها طايحه ع الشبريه ومسنده راسها على ايدها وتناظر السقف ..

مي: غريبه ما رقدتي
ساره: ما غريب الا الشيطان
مي: انتي حالج مختبص من عقب رمسة مروان.. قوليلي انزين شو قالج.. فضفضيلي انا خويتج ..

تجدمت مي من ساره ويلست حذالها ..

ساره: مااشي .
مي: قووولي ساروه ..
ساره تنهدت وغيرت من وضعية طيحتها وطاحت ع ينبها ويرت اللحاف..
ساره من غير سابق انذار: مروان يبى يملج
مي وهي متفاجئه: شووو
ساره: اللي سمعتيه
مي: بلاه ها استخف .. عنبوه ليش جي مستعيل
ساره: راسي يعورني بس ماروم ارمس ..
مي: انتي شو قلتي
ساره: ماعرف ميوه .. من يومين وانا ادرس الموضوع ..
مي: يعني شو تحسين
ساره: ماعرف ماعرف ..
مي: ما رد يرمسج انزين؟
ساره: لا بس طرش مسج انه يتريا ردي ..
مي: اميه تدري؟
ساره: هيه .. بس ما رمستني عن الموضوع
مي: ولو شاورتج؟
ساره: ميووه بس الله يخليج .. خليني احاول ارقد .. لكل حادث حديث ..
مي: مم .. الله يعينج ..

قامت مي من مكانها وسكرت الليتات عشان ترقد اختها الي من يومين يبين عليها التعب من التفكير وراسها وايد يعورها.. طلعت من الحجره ويلست فالصاله.. شغلت التلفزيون .. تمت تبدل ع القنوات وانتبهت لبرنامج يعرضون فيه جلسات شعرا .. استانست عليه وتمت تتطالع ..


*************************
(الخميس) 24 مارس 2005
*************************

طلعت عليا من غرفتها على صوت بناتها فالصاله .. طار قلبها من الوناسه اول ما شافتهن .. الاسبوع اللي خطف مازارنها .. تولهت على مي وساره واايد .. مها ومهره وياها فالمدرسه تشوفهم كل يوم لكن مي وساره اللي صدق تحن الهن وايد.. ريم من عرست قامت تزور امها اكثر عن قبل .. حتى لو فنص الاسبوع اتيها شوي يسلمون هي ونايف ويروحون ..جاسم كذلك يوم تباه طرشت له الدريول واييبه عندها ..

عليا: ميوه فديتج ليش ضعفانه ها الكثر ..
مي: مب ضعفاااانه
عليا: امبلاا ..
ساره: هي امبلا ميوه .. اميه تراها كله جبدها لايعه وما تشتهي تاكل شي .. استغفر الله ما جنه نعوم هي اللي تتوحم انتقل الوحام لميوه ..
عليا ابتسمت ع تعليق ساره : عيب ساروه
مي: اميه حتى ساروه تراها ادّوخ واايد
ساره: لا اميه مب وايد .. ساعات يوم اتعب من الدوام
عليا: ياربي يا بناتي شو غادي عليكن وحده تصدع والحمدلله الله شافاها والحينه هاي اتيها دوخه والثانيه جبدها لايعه..شو هناك
ساره: اميه ماعليج مني انا .. عادي بصحه وسلامه بس هاي ميوه
عليا: انزين ميوه وشله عاد لايعه جبدج وماتشتهين الاكل
مي وهي تتطالع ساره وحايسه بوزها..
عليا: شوفيج ميوه
مي: ماشي اميه .. بس جذي..دوام وكراف
ساره: اميه تقص عليج تراها .. تعرفيين حتى يوم نسير الجامعه ماتطيع تاخذ بيزات من ابويه تقوله عندها ..

عليا عقدت حياتها ولفت ع مي .. فهمت انه فالموضوع ان .. سوت حركه لساره انها تسكت عن الموضوع ماله داعي ترمس جدام خواتها ..
ساره: اوبس .. سوري..
عليا وهي ترمس التوم: سيرن طالعن احلام ومدوي وين .. خلهن ين بنتريق..
مها: سيري مهروه
مهره: مابسير بروحي.. تعالي ويايه
عليا: سيرن ثنتيناتكن اشوف
مها: مممم انزييين

قامن مها ومهره وسارن صوب حجرة احلام ومديه .. اما عليا فانفردت ويا مي وساره ..

عليا: شو ها الكلام الي اسمعه مي!
مي: شووو
ساره: احسن خل اميه تأدبج
عليا: ميوه حبيبتي ماقلنا انا بننسى السالفه..
مي: اميه ماارمت والله.. احس كل ماشوف ابويه جنه شيطان جدامي
عليا: ميوووه شو هالرمسه
مي: والله اميه شهر وانا احاول اني اكون عاديه وياه شرات قبل بس ماروم
ساره: ميوه انتي بروحج شفتي انه الميلس هشوه..يمكن ابويه ندم وتاب من افعاله خلاص
مي: مب بيوم وليله ..
ساره: انزين ولو ..
مي: ماروم والله احاول بس ماروم
عليا: ماعليه يا بنتي .. الابو لو هو مجرم بيتم ابو .. احترامه واجب علينا
مي: بس هو يمشي بدرب غلط .. ليش انتم ساااكتين.. ما يكفيكم سكوتكم طول ها السنين.. انا مابا ابويه يتعذب فالاخره ..

نزلت مي راسها تحاول انها تخفي عنهم دمعتها الي نزلت .. عليا غمضتها بنتها اللي تحاتي ابوها وماتقدر انها تتجاهل تصرفه هذا ..قربتها منها وحضنتها تخفف عنها ألم قلبها على ابوها..
اما ساره تمت تتطالع امها واختها .. حست بضيجه فصدرها .. شلت بعمرها وسارت حجرتهم ..

عليا: بلاها ساروه روحت
مي: مادلها..
عليا: وجسوم ليش مايبتنه
مي: قال بيي خلاف .. يالسين هو وميود يعابلون بتلفزيونهم خترب
عليا: واونهم بيعدلونه
مي: ههه شدراني ..

وبعد ربع ساعه يت ام راشد وريلها من الزرب ويلسوا ويا عليا وبناتها وبنات محمد وامهم .. حطولهم ريوق ويلسوا البنات وعليا وعبير يتريقن ..

ام راشد: يالله حد يتريق الضحى
عليا: ههههه شو نسوي يا اميه نرقد لين تسع ولين نلتم
ابو راشد: ريوق عقب الساعه ثمان مايتسمى ريوق
احلام: يالله يا ابويه تبانا نقوم ثمان لا حشى بنرقد نرتاح فها اليوم
مي: خوالي وين عيل.. ها وقتهم يلتمون فيه
عبير: محمد طالع من الصبح .. بيرد عقب شوي .. ما بيفوت لمة ها الخميس
مي: ومانع؟
احلام: هذا اكيد راقد لين الحين ..

قامت ساره من على الريوق .. تغسلت وردت تيلس حذال يدتها.. وشوي خلصوا الكل من الريوق وبدوا ياخذون ويعطون فالسوالف مع بعض ..
وعلى سوالفهم هذي دخل راشد البيت هو وحرمته ميره .. سلموا ع الموجودين ويلسوا .. شيخه دقلتلها عليا تشوفها ليش اليوم ما يتهم .. وشوي يت هيه الثانيه وكل شوي حد يا وكعادتهم الضجيج فالصاله ما يوقف ..

ساره كانت تشوف خالها وحرمته وتحس انها مستحيه تيلس فنفس المكان وياهم..تخاف فأي لحظه مروان يدش وماتعرف هذيج الساعه شو بتسوي ..
مي كانت حاسه فساره .. أشرتلها انهم يدخلون داخل .. وافقتها ساره وقامن مي وساره واحلام ..

راشد وهو يكلم عليا اللي كانت يالسه حذاله: ها ما شاورتيها بنتج؟
عليا لفت ع راشد: لا بعدني
راشد: ما بترمسينها!
عليا: امبلا.. بس يوم بحس انه الجو يساعد .. ماباها تحس انه نحن نجبرها ع شي
راشد: هي يا ختيه .. بعد وياها حق هيه لو ماطاعت.. الا ها مروان مستعيل
عليا: ههههه فديت روحه.. يوم اشوفه اطمن على ساره اكثر .. مروان ولديه وغلاته من غلات ساره ..
راشد: الله يحفظهم ويكتبلهم نصيب ان شاء الله .. وعقب عاد بنخطب لفارس من عندكم..
عليا ابتسمت لراشد: عاد خله على هواه .. مروان بروحه رمسك وقال انه يبا ساره..
راشد: لا ماعليج.. بعد فارس ما بياخذله حد من بعيد ..
عليا: بعدهم صغار .. خلهم فدراستهم ..
راشد: ان شاء الله خير ..

كانت شيخه اللي يالسه ع طرف شوي عنهم تسمع تهامس راشد وعليا .. تضايجت.. كان فخاطرها ترمس عليا عن سلطان .. بس شكله راشد سد الباب فويها..

وقبل اذان الظهر بشوي .. اندق باب الصاله .. وصوت ريال ..

" هوووود "

ميزت شيخه الصوت وقربتبه .. كان سلطان ياي يسلم على ها اللمه اللي تعود يشوفها كل خميس تقريبا .. وكان وياه مروان ..
يلسوا شوي لين ما اذن الاذان وقاموا كلهم عشان يصلون ..

في حجرة البنات .. كانن مي واحلام وساره يالسات يسولفن عن الجامعه .. دشن عليهم مديه ومها ومهره .. اطالعن ساره بمكر وتمن يتضاحكن ..

ساره: بلاااكن!!
مها: الزوج المصون توه فالصاله كان خخخخ
ساره: سخيفه
مي: اووه فاتنا .. ليش خليتونا انرد دااخل ..
احلام: بروحه ياي؟
مديه: هو وسلطان ولد عموه
مي: افف ما خليتونا نيلس شوهااا
احلام وهي تتطالع ميوه: ها شو بلاج تأففين .. ها كله عشان سلطان
مي: والله ماتعرفين كيف بخاطري ايلس واراقبه .. يعني صدق صدق فخاطريه اعرف مدى التحول اللي صاير فيه !
مهره: خييبه .. شو دكتوره نفسيه انتي
احلام: هههههه والله ميوه تحفه..
ساره: هذا سلطان ان مارد وصاع نفس قبل .. ها ويهي
احلام: بسم الله عليه . لييش يعني
ساره: ميووه دومها حاشرتنا مب مستوعبه التغيير اللي صار فسلطان
مي: هههههه والله حرام مب جي .. بس يعني احس الموضوع في ان
احلام: يالله يا ميوه ..الواحد يوم الله بيهديه لازم يباله ان .. عيل محد التزم فها الدنيا مول لين ما تستويله الان هاي
مي: مب فاهمين عليه انتو ..
ساره: ميوه حولي علم نفس والله اصلحلج
مي: تتطنزين يا الجلبه

وتعالت ضحكات البنات فالحجره .. دشت عليا عليهم وشافتهم بها الوضع.. ابتسمت وزقرت ساره تباها بموضوع.. بدى دقاق ساره يشتغل .. وحست بالموضوع اللي تباها فيه امها .. مي هي الثانيه حطت فبالها انه امهم شكلها بتفاتح ساره فالموضوع .. ودعت من كل قلبها انه مروان وساره يتوفقون فحياتهم..

أما بطلنا الثاني فالموضوع هذا .. كان توه ظاهر من المسيد وهو يوازي ابوه فمشيته .. وحذالهم كان سلطان ..

مروان: ها الشيبه
راشد: شاب شعرك .. منو شيبه!!
مروان: هههههه سوالف شو بلاك شبيت
راشد: الجو حلو اليوم
مروان: ان شاء الله نسمع عيل الاخبار الطيبه
راشد لف على ولده: ليش شو متأمل انته
مروان: ماعرف
سلطان: هههههه ما تخيل مروان يقفط ..
راشد: ليش ما قالتلكم عليا انه ساروه ماتبى الملجه
مروان وجنه حد صب عليه ماي بارد: شووو
راشد: هي
مروان: لاتقول ابويه.. صدق صدق ماطاعت
راشد: يابويه شو بتسوي مالك غير الصبر ..
سلطان: يا حليلك يا مروان.. خلك خلك .. املج مره وحده ويايه
راشد: الا منو بتعايي انته .. راكب راسه الا يبا يملج

مروان تم صاخ عن ابوه وسلطان وهم يرمسون .. ويفكر.. ليش يعني ما وافقت .. كان متأمل خير من بعد ما كلمها ويتريا ها اليوم بفارغ الصبر عشان ترد عليه خبر .. وفالأخير ترفض .. تم متضيج واايد .. وهم يمشون يا اتصال لراشد ..
راشد شاف الرقم وابتسم ورد على طول ..

عليا: هلا اخويه
راشد: المهلي ماايولي .. هااا بشري
عليا: بالبركه ان شاء الله .. تراني توني مرمستنها .. ومن نفسها عطتني قرارها وهي موافقه
راشد: لاتقولين ..
عليا: الله يجدم اللي فيه الخير يا خويه.. طمن مروان تلقاه متحرقص من اسبوع
راشد: هههههههه هي والله ..

عيون مروان وسلطان كانت على راشد اللي يضحك ويبين على شكله انه متلقي خبر حلو .. اول ما سكر ..

راشد: ها مروان شو النفسيه
مروان: شو تتراياها تكون ..
راشد: ابشر عيل يا وليدي . كنت مساعه اسولف وياك .. وتراها توها عمتك تبشرني انه الخطيبه موافقه ع الملجه

مروان وقفت محله وهو يشوف ابوه وسلطان .. وعلى طول لوى على ابوه وحبه ع راسه .. وسلطان هو الثاني سلم على مروان ويباركله ..
فرحة مروان ها الوقت كانت مالها حدود .. ماعرف شو يسوي وده يرتبش ويخرش العايله كلها ها اليوم ..
قبض تيلفونه وطرش مسج لساره

" موافقتج تشرح الخاطر .. الله يتمم على خير"

قرت ساره المسج اللي واصلنها.. استانست وايد لوناسة مروان.. ماتوقعت انه يكون ها الكثر مشتط على السالفه .. حست انها فايد امينه وهي تتخيل عمرها بفستان الملجه وحذالها مروان ..
حمرن خدودها على ها الخيال اللي زارها وابتسمت..

السموحه ع التأخير .. رايــــــــكم !