الجــزء العشـــرون

***********************
(الاحد) 14 نوفمبر 2004
***********************

اليوم ثالث العيد .. كان المفروض عرس عزه يصادف هاليوم .. ولكن بما انه تاجلت الاعراس لمده 40 يوم فترة حداد المغفور له باذن الله الشيخ زايد ..
تم تأجيل العرس لبعد شهر ..
قررت العايله كلها تطلع رحله للبر يغيرون جو ويلتمون كلهم فمكان واحد وطبعا كانت وناستهم الكبيره فها الأيام ردة مانع اللي حصل على اجازة قبل العيد باسبوع .. وبيقي وياهم كم يوم وبيرجع يكمل دورته اللي بتخلص ع شهر واحد..

كان الجووو مغيم وحلووو .. والدينا خضره ..
طلعت عايله بوراشد وعيالهم وعيال عيالهم .. كلهم بلا استثناء .. حتى سلطان اللي كان بالعاده مستثنى شاركهم هالمره الرحله .. لغرض في نفسه أكيد ..

ركب مانع سيارته وشل وياه امه وابوه واخته شيخه وركبوا وياهم جاسم ومايد..
وراشد شل حرمته وبناته عزه وايمان وشلوا كل أغراض الرحلة وياهم..
اما محمد فخلى فارس يسوقبهم وخذ وياه عبير وفجر ومديه ..
وسلطان شل اخوانه منصور وخليفه وياه..
اما مروان شال عمته عليا وريم وساره ومي ومها ومهره واحلام.. زاحمات البنات عمارهن بس عسب يكونن ويا بعض..
مروان كان رابشنهم وكل شوي يشغل لهم اغاني ميحد واحلام ومهره ومها في الدبه مرتبشات ويصفقن ..

صدت لهم عليا : شو ياهن هاييل اللي ورا ارتبشن مره وحده ؟
ساره : خليهن ماورى عليهن من زمان ماظهرن رحله
مي: ساروه في خاطرها تسوي شراتهن واكثر الا ميوده عمرها
ساره: جب انتي
عليا: بس انزين هب تتظاربن ..
وصدت عليا لمروان: وانته شو ياينك مرتبش جيه ؟
مروان: عادي عموه عيد عيد
مي ترمس بصوت واطي: عاد العيد عيدين عند مروان .. عيد الفطر وشوفه ساروه

ساره انغزت مي عشان تسكت وتتوعدلها ان ما طبت حلجها .. انتبهت ريم لمناغزهن وحست باللي صاير وضربت مي اللي كانت يالسه فوسطهن ع ريلها ..
التفت مي لريم وهي تبتسم ببراءه .. ويا فبالها تسألها..

مي: قلتي حق ريلج انج ظاهره ؟
ريم: هيه اتصلت به قبل ماطلع
مي: زين بعد .. عن ينتفخ عليج
ريم: هههههه انتي محد يقولج شي
مي: هيهي فدييتني

تموا يحوطون ورا خالهم راشد لين حصلوا بقعه مناسبه .. على تل اخضر بين الغاف الطوال.. حلوووه وبعيده عن الزحمه ..

ساره: ميوه ميوه
مي: شو ؟
ساره: مب جنه المكان جيه بين الشير نفس تصوير اغنيه تملي معاك مال عمرو دياب
مي: هيه صدقج والله هههه

نزلوا كلهم وفرشوا المفارش عزلوا مفرش للحريم عشان يطبخون ويشوون عليه .. وفرشوا مفرشين كبار حذال بعض يتوزعون عليها .. الرياييل ع حصير والحريم ع الثاني ..

يلسوا الحريم يجهزون الاكل .. والبنات تيلسن ع طرف وفجر وياهم .. اما الشباب نشوا يحوطون ويفجون الدرجات اللي يايبينها من السيارات..

رن تيلفون فجر في هالوقت.. شافت الرقم ونشت من مكانها وردت ع طول بابتسامه ولهفه ..

فجر: الوووه
احمد: الوه هلا فجر مباركن عيدج
فجر بدلع: تو الناس .. الله يبارك فيك
احمد: اسمحيلي عاد مارمت اتصل بج قلت اكيد انتي اهناك ويا الاهل ومنشغله وياهم
فجر: لا عادي .. المهم مانسيتني
احمد: يالله وانا اروم انسى

وكملوا سوالفهم بينما سلطان كان يالس في سيارته يراقب فجر وهي ترمس وتبتسم ومندمجه مع المكالمات اللي عندها ..
كانت لابسه بنطلون وردي مع قميص ابيض طويل لين الركب .. ومحطيه حجاب وردي ولكن شعرها الاشقر من جدام طالع..
ورجع التفت لبنات العايله .. كانن ساره ومي واحلام وعزه وريم يتمشن ويا بعض ويسولفن .
ليش مب مندمجات ويا فجر ؟ والا هي طبعها جيه ماتندمج ويا حد ..ولا طبعها غير عنهن..انتبه انه فجر سكرت التلفون وفي طريقها لليلسه
اتصل بها تلفون على طول ..فجر شافت الرقم والتفتت تدوره وين هوو وردت ع التلفون ..

فجر: سلطان
سلطان: هلا
فجر: شفيك ؟ ينيت ؟ الحين يشوفوني رافعه التلفون وانته رافعنه
سلطان: محد بيفكر هالتفكير انتي من قبل كنتي ترمسين .. بس منو ترمسين ؟ّ
فجر: رفيجتي
سلطان: رفيجتج ؟
فجر: ايه رفيجتي متصله من الكويت ..
سلطان: هيييه اوكي .. ابا ايلس وياج
فجر: شووو ؟ وين تقعد معاي جدامهم كلهم
سلطان: لا.. خلنا نسير اي مكان بعيد
فجر: مافي مكان بعيد اهني ومابي حد يشوفني معاك
سلطان: بنشوف الوضع انزين جان يسمح ليش لا .. بينا مسجات اوكي .. يالله باي
فجر: باي ..

رجعت فجر تيلس ويا اختها عبير و سلطان تم يالس في سيارته يجلب في التلفون لكن وصله مسج ..
من بدريه ؟! غريبه هي من متى ماتصلت ولا طرشت مسج ..
فتح المسج لقاها كاتبه فيه

" قال تعالى : (فلما نسوا ما ذكروا به فتحنا عليهم ابواب كل شيء حتى اذا فرحوا بما اوتوا اخذناهم بغتة فاذا هم مبلسون)
ولدك اللي حملته من الزنا مات في بطني
وبسببه شالوا عني الرحم ..
الله عاقبني ومن بعد ابن الحرام حرمني من اي ابن بالحلال ..
وانته بعد بيي يوم والله بيعاقبك باللي سويته ..
ان الله يمهل ولا يهمل .. "

تم سلطان يقرا المسج مره .. مرتين .. ثلاث.. بس يبى يستوعب اللي يقراه.. حس بوقع الخبر شديد عليه ..بدى العرق يتصبب ع يبهته ودقات قلبه في تزايد وهو يسحب الهوا بصعوبه ..
حطي ادينه الثنتين ع راسه واتاكى بسكان السياره ..
الحين هذا كله صار لبدريه بسبته هو ؟
حس برعشه تنتاب كل جسمه وهو يتخيل اللي يصير واللي ممكن يصير حقه..
شو من العقوبه بيعاقبه فيها الله بالدنيا هذا غير الآخره ..

عق الغتره الي ع راسه ع صوب وضغط باديه ع السكان وحرك موتره بدون حاسيه وسار بعيد عنهم ..

شيخه: خليفه اخوك وين ساير ؟
خليفه : مادريبه لكن لاتستعجبين جان سار عنا .. اصلا العجب انه يا ويانا

مشى بسيارته في البر لين وصل للشارع العام ..
وقف عند بقاله يبى يشتري ماي حس بعطش فظيع .. عند البقاله
سمع صوت الاذان وتذكر دنياه اللي ماسوى فيها شي
وقف موتره عند المسيد .. شاف المصلين يتوافدون عليه وهو بعده يالس في سيارته انتبه لخاله مانع وخاله راشد ويده يدشون المسيد وهو بعده يالسه فسيارته فدنيا غير ها الدنيا.. فباله اللي صار لبدريه .. الله حرمها من العيال خلاص .. قلبه وقف وهو يتذكر " الله يمهل ولا يهمل" وفز من مكانه وهو يسمع دق ع الدريشه ..
فتحها بكل بطء .. كان اخوه خليفه ومنصور وفارس ومروان لاحقين مانع فسيارته لأقرب مسيد وصادف انه هو نفسه اللي واقف عنده سلطان.. انتبهو لسيارته وساروا صوبه يشوفونه..

خليفه: ليش واقف اهنه سلطان؟
سلطان بتلعثم: هاه لا ماشي
خليفه: بلاك عرقان جي .. الناس مشتيه وبردانه
سلطان: ها .. لا شوية ضغطه هنه فالموتر..
خليفه: هيه ..يالله انزل يا اخويه . قاموا الصلاة..
سلطان: هيه .. ان شاء الله ..

سلطان فتح باب السياره ونزل توضأ ويا اخوانه.. ودخل المسيد ..
من الناااااااااااادر جدا انه سلطان يدخل المسيد في غير يوم الجمعه ..

وقف سلطان وياهم وصلى .. حس بشعور خووف ينتابه اكثر من شعور اطمئنان .. لانه كم مضى عليه من الوقت ماصلى فجماعه وشو ممكن يسوي علشان الله يغفر له اللي صار وتجنب عقوبة رب العالمين ..

بعد ماصلى التفت له خليفه وقاله بصوت واطي
خليفه: مابتسلم على مروان؟ مب زين اتمون جيه متزاعلين انتوا اهل والحين عيد

كان سلطان مستسلم في هالوقت لاي شي .. مايفكر في اي شي ..
قام وزقر على مروان اللي كان توه بيطلع من المسيد .. ومد له ايده
كانت رده فعل مروان متاخره مستغرب حركه ولد عمته لكنه مد ايده وهو يبتسم وبادر بالكلام

مروان: مباركن عيدك يا اخويه..
سلطان: عساك من العايدين والسالمين ..

وبلا ارادي سحب سلطان مروان وحضنه وهو يربت ع ظهره .. مروان مستغرب من ها الحال لكنه كان يحس بفرحه تسري فقلبه وراااحه ..

خليفه وهو يبتسم الهم : ها بو ميوود مابترد ويانا ؟
سلطان يبتسم لاخوه: لا انا بروح البيت احس راسي يعورني ومصدع وايد.. انتوا جان بغيتوا تردون وماشي مكان اتصلوبي بييكم ..

روح سلطان عقب ماقال كلماته هاي .. ورجعوا الشباب مع بعض في سياره مروان ..
منصور: سلطان شوبلاه ؟
خليفه: والله انا بروحي ماعرف شو بلاه .. ماصدقت يوم شفته واقف عند المسيد ..
مروان: يمكن الله هداه انتوا بلاكم ع الريال
فارس: السموحه منكم الصراحه ها السلطان ما اثق فيه ولكن ياخبر اليوم بفلوس باجر ببلاش
مروان: على رايك .. توكل خلنا نلحق على الغدى ترا ريحه الذبيحه المشوايه ظاربه في راسي ..

توجهوا للمكان اللي كانوا يالسين فيه وبدوا كلهم يتغدون مع بعض ..

شيخه: وينه اخوكم ؟
خليفه: سار البيت وعقب بيي يشلنا
شيخه: بلاه ؟
خليفه: مابلاه شي امايه راسه يعوره ..

غيروا الموضوع عشان ماتيلس شيخه تسال اكثر بوجود خوالهم..

عقب الغدى يلسن عزه وريم يسوون جاهي حليب ع الضو..
عزه كانت مستآه نوعا ما ويلست ويا ريم ع طرف ..

ريم: جاسم قوم حبيبي انته ومايد هاتولنا سمر عشان نوري به الضووو
جاسم: انزين تبين كبار ؟ والا صغار
ريم: صغار .. سير انته وميود مب بروحك
جاسم: اوكي..

ساروا جاسم ومايد يدورون السمر .. ويلست ريم ويا عزه
انتبهت ريم انه عزه تلعب في تلفونها وموخيه

ريم: ليش مويمه ؟
عزه: المفروض عرسي اليوم
ريم: العرس تاجل عزه ما انلغى وصدقيني كل تاخيره فيها خيره
انتوا متى حجزتوا احين ؟
عزه: عقب شهر يعني قولي على اخر شهر 12..23 ولا 30 على حسب الحجوزات..
ريم: زييييين يابنت الحلال كملي الشغلات اللي ماخلصتيهن من الزهاب وخلي هالشهر للراحة.. تريحين بشرتج وتهتمين بنفسج .. عشان شكلج يطلع احلى في العرس
عزه: صدقج بس فيصل متضيج..
ريم: ماعليه حبيبتي قوليله هالرمسه وبيطيب خاطره.. لكن يوم انتي متضيجه وترمسينه بها النفسيه لازم بيضيج .. بيخطف بسرعه ها الشهر..
عزه: ان شا الله ..انزين ماعليج مني.. المهم انتي مرتاحه ويا ريلج ؟
ريم: الحمدلله
عزه: متى عرسكم ؟
ريم: شهر 1 بس ماعرف اي وقت بالضبط
عزه: يالله زين .. تريني لين ارد من شهر العسل عشان احظر ..
ريم: لا بتحظرين ان شا الله.. كيفج جانج بتسافرين تقطعين سفرج وتردين تحظرين عرسي
عزه: هههههه ما طلبتي.. اصلا يمكن مانسافر .. بنأجله للصيف..
ريم: ماعليه المهم تحظرين عرسي
عزه: ان شاء الله خير..

كانت ساره يالسه بعيد عنهم .. ع نقى صغير ومحطيه تلفون امها عندها وتتسمع الاف ام ..
مروان شافها وسوى عمره يتمشى لين وصل صوبها ..
مروان: ساره..
ساره وهي ترفع راسها .. استغربت ليش مروان ياي لين عندها ..
ساره: هلا
مروان: شو تسوين بروحج ؟
ساره: ماشي ..
مروان: اها.. انا اقول بلاها.. كنت مار تحت وشفتج يالسه ع النقى مويمه..
ساره: هههه لا بس كنت موخية العب بالتراب..
مروان: شو تتسمعين
ساره: ماشي.. مشغله الاف ام ..
مروان باستعباط: انزين غنيلي
ساره اطالعته باستغراب : اغنيلك ؟
مروان: هيه غنيلي
ساره : ماعرف اغني
مروان وهو يغمزلها: جذوب .. انا سامعنج تغنين

فجأه انتبهوا لصراخ جاسم ومايد متوجهين صوب تجمع العايله
ساره: بسم الله بلاهم هاذيل..
مروان: يلعبون
ساره: لا شوفهم هكم يتراكضون ..
مروان: هي صدقج.. خل نسير صوبهم ..

يايه بتقوم ساره من محلها بس طاح التيلفون من ايدها ع الرمله .. وخى مروان ويابه ..

مروان: سلمتي
ساره: الله يسلمك ..
مروان: يالله تعالي.. جاد انهم شايفيلهم حصني مافينا بعد يهجم عليج ياكلج

ساره ضحكت على طنازة مروان واطالعته بنظره ومشت قبله وهو لحقها
وساروا صوب العايله..

جاسم كان يركض وهو يصارخ: الحقووووووووووووووو جني اهنااااك

ريم نشت من مكانها وكلهم وقفوا ..عليا يودت ولدها

عليا: جاسم شو بلاك
مايد كان منخش عند ريم
جاسم: شفت جني جني
ريم: ميود بلاكم شو شايفين
مايد: اهناااااااااااك شفنا ايد طالعه من الرمل
ريم: بسم الله ايد شو
مايد: ايد انسان
جاسم: لااااااا مب انسان جني جني
محمد: وين انزين ؟ قوم مايد ودني المكان اللي حصلتو فيه الايد

وساروا الشباب كلهم للمكان اللي دلوهم عليه مايد وجاسم .. ومن قبل ما يوصلون للمكان تم جاسم يصرخ ويأشر ع المكان .. تجمهروا كلهم فها المكان ..
والحريم يالسات يحاتن ومايعرفن شو صاير..

منصور: بسم الله شو هاااااااااي ؟ جثه ؟
مانع: خلوها لاحد يزخها ..
شل محمد حطبه وحرك الايد وجاسم يصارخ ومروان لاوي عليه مايباه يشوف ..
مروان: عمي اتصل بالشرطه ؟
محمد: مانع اتصل انته .. هاي ايد حرمه ..
مانع: لاحول ولا قوه ..

قبض مانع تيلفونه واتصل بالشرطه..
ردوا فارس ومنصور لمكان يلستهم واستلموهم الحريم يسألون شو صاير وخبرهم انها جثه مدفونه .. ركبو وحده من السيايير وتوجهوا للشارع العام عسب يتريون سيارة الشرطه ويدلونهم ع المكان ..

اما البنات ما قدرن ييلسن من غير ما يشوفن بنفسهم.. وسارن عليا ومي وساره وعزه واحلام.. لين وصلوا المكان اللي كانوا فيه الباقين عشان يشوفون
ساره: بسم الله شو هاي ؟
مروان: انتن شو يايبنكن احين بيون الشرطه اهنه ردن
مي: بنطالع انزين
عليا: يالله تعافينا .. جاسم ابويه تعال لاتطالع ..
جاسم: ماعليج انا ريال ما اخاف
مروان: هي ريال ومن مساعه تصرخ ..
عليا: فديته استقطع ماعرف شو السالفه ..
عزه: عموه تلقين هاي وحده ظاهره ويا واحد وجتلها
مروان: عزوه انطبي وسيرن يالله الشرطه بيون
مي: بلاك انزين منهد علينا بنسير .. عاد اللي يسمع الشرطه .. هاييل تتصل بهم تقولهم تعالوا عندنا حد بيموت مايون لين ايموت الريال ويخلص .. احين قايليلهم حد ميت بيون ؟
محمد: هاي ميوه وين تروم للسانها .. يالله سيرن وعليا شلي وياج مايد وجاسم ..
عليا: ان شا الله قومن بنات يالله

سارن عليا والبنات ووصلت الشرطه .. بعد الحفر طلعوا جثه حرمه يبين من شكلها روسيه مجتوله .. كانت الجثه ريحتها خايسه .. وكلهم قاموا بعيد عنها

الشرطي: الظاهر انه هاي اللي ندور عليها من زمان
محمد: تدورون عليها ؟ منو هاي
الشرطي: واصلنا بلاغ عن اختفاء وحده واظن انه المواصفات مطابقه بنوديها الفحص الجنائي وبنشوف .. منو منكم بيتفضل عشان يوقع البلاغ ..
محمد: انا .. بودي الاهل البيت وان شا الله بنيكم المركز ..
الشرطي: خلاص ان شا الله نتلاقى اهناك

بعد ها الاكتشاف اللي عكر عليهم صفو رحلتهم .. رجعوا كلهم البيت ..وعقب ركب محمد ويا مانع ومروان وتجهوا للمركز.. اما جاسم مازال خايف وكل شوي تتراواله هاييج الايد اللي كان بيشل السمره من عدالها ..

يلسوا كلهم في الصاله عقب ماتسبحوا يتريون محمد يرجع ويعطيهم الاخبار

مي: احين هاللي دفنها .. دفنها بكبرها عيزان يخش ايدها ؟
ساره: لا الظاهر دفنها وهي فيها روح شوي .. فطلعت ايدها لكن طلعت روحها
عليا: شو هالرمسه انتن ناقصات نحن زياغ ..حشى والله قلبي بروحه ماينزاد
مي: عادي امايه نحن الا شفنا الايد لو شفناها بكبرها شو بتسون
عليا: يالله تعافينا .. هذيل الاجانب والدمار الي اييبونه .. اصلا سامعه من قبل وايد سوالف نفس جي مستويه .. عافانا الله ..
ساره: وي حسبي الله عليهم .. وصخوا بقعتنا ..

كلهم كانوا في صوب يرمسون عن الموضوع وفجر في الغرفه يالسه .. مستغربه من حركه سلطان..روح عقب ماكلمها على طول ولين الحين ماتصل ولا طرش مسج .. شو صار عليه ؟

دخل محمد في هالوقت ويا مروان ومانع..

احلام: ها ابويه منو طلعت؟
عبير : احلام قومي عن ابوج خليه يقعد يرتاح
ام راشد: ها ابويه شو صار ؟
مانع: امايه هاي روسيه جاتلنها واحد ظاهره وياه .. بس ليش مايدرون ..ومن متى يدورون عليها ..
عبير: اللهم ياكافي
محمد: سبحان الله لازم الله يخلي خيط للجريمه عشان ينكشف المجرم
عليا: وانتوا الحين شو سوو وياكم ؟
محمد: لانحن مايخصنا وقعنا ع البلاغ بس..

يلسوا كلهم يسولفون لين حل الليل وكل واحد سار يرتاح عقب تعب هاليوم ..والأحداث المثيرة اللي صارتلهم اليوم ..
وجاسم طول الوقت يهاذي بالسالفه وبدى يألف حكايات وانه هو البطل اللي اكتشف الجريمه ..


************************
(السبت) 20 نوفمبر 2004
************************

في الكليه كانت مي واقفه جدام كلاسها قبل ما يبدى بربع ساعه تتريا كلاس العربي .. كانت تكره الدكتور مالهم يلست هي وربعها متأففين ما يبون يحظرون .. وايقن فالكلاس ماحصلن حد ياي لانه واقفات من وقت ودكتورهم القبلاني مطلعنهم من وقت ..
مي: اووووف انا مووووووول مالي خلق اشاهد ويه هالدكتور
شمسه: انا اخس عنج لايعه جبدي ياختيه ..
وفاء: ياربي من هالدكتور شقى نحس
مي: شو رايكم نلغي كلاسه ؟!
وفاء: ياسلام عشان يوصلج حرمان مب ناقصين غيابات نحن
مي: مب نحن اللي بنغيب الدكتور اللي بيغيب
شمسه: ياريت يغيب .. ها لو ميهود يداوم
مي: لا بنكتب ع الصبوره انه الدكتور يعتذر عن المحاظره..
شمسه: عجييييبه .. يالله ..

دورت شمسه قلم صبوره .. وكتبت انه الدكتور يعتذرعن حظور هذه المحاظره

وفاء: ايه لاتسون جيه والله اخاف يجكنا
مي: عن الخوف لاه .. محد بيدريبنا ..

طلعن مي وربعها من الكلاس بسرعه قبل ما ايي حد ويخرب عليهم ..

وفاء: شوفي ميوه لو قال منو سوى هالشي موووووول لاتعترفون
شمسه: وفوي لاتحنين مابيعرف .. لكن محد بيخرب علينا الا هاييج ام نظاره
وفاء: منو ام نظاره ؟
شمسه: هاييج الملقعه اللي تيلس جدام
مي: خلها تولي محد بيحظر

وقفن البنات من بعيد يراقبن الدكتور يوم بيي .. وطرشوا وحده من ربيعاتهم اللي مب معاهم في نفس المساق تشوف شو رده فعل الدكتور ..
وصلت ام نظاره مثل ماكانن البنات يسمونها.. تمت واقفه عند باب الكلاس ..

مي : شوفو شوفو احين بتم واقفه مابتسير ..
كانوا البنات ايون عند الكلاس واول مايقرون الي مكتوب يروحون ..
الا هاييج البنت .. كانت واقفه تتريا الدكتور .. وربيعتهم اللي كانت واقفه تسوي عمرها تقرا اعلانات حذال الكلاس..
وصل الدكتور وتم واقف عند المكتب ويقرا المكتوب وهو يرمس البنت ام نظاره
الدكتور: من فعل هذا ! انا لم اكتبه

البنت: دكتور انا قلت هذا مب خطك وماطعت اسير
الدكتور: هذا يسمى تزوير .. من فعله
البنت: ماعرف دكتور .. بس البنات كلهم قروا وروحوا ..
الدكتور: لايجوز هذا الفعل

وتم يتحرطم وروح لمكتبه مره ثانيه .. كانوا قوم مي لحظتها منخشات لين روح ..
ويتهم ربيعتهم تخبرهم باللي صار وتموا يظحكون ومستانسين عقب هذا الانجاز اللي سووه..

اما وفاء اللي كانت خايفه من وناستها بالانجاز ماخلت حد ماخبرته باللي سوته ..
مي شلت عمرها وسارت ترقد كانت تتريا متى تنلغي هالمحاظره .. يوم السبت كئيب والدوام فيه طويل .. وما قدرت تأبسن فها الكلاس عسب ما يوصلها الحرمان من المساق .. بس من انلغى الكلاس طنشت الي عقبه وردت سكنها ..


****

بعد المغرب دقت ريم الباب ع غرفه مرت ابوها تطالع اذا جهزت والا لا عشان يسيرن النادي الرياضي ..

ريم: ناعمه ؟
ناعمه: هاه دخلي ريموه
دخلت ريم غرفه مرت ابوها لقتها لابسه بنطلون اسود مخطط ع الاطراف بلون وردي .. والقميص وردي مخطط باسود .. طايحه على السرير

ريم: شو مب ناويه تسيرين النادي ؟ يالله بنتاخر
ناعمه: لبست وعيزانه اسير مادري بلايه مستويه كله اتعب
ريم: هاي الا هيازه زايده قومي تنشطي ..
ناعمه: اوف انزين الله يخليج طاوليني عباتي ع الشماعه
ريم عطت ناعمه عباتها
ريم: انا بترياج تحت
نزلت ريم ولقت يدتها يالسه تحت وعندها جاسم ومايد
ريم: السلام عليكم
ام سيف: وعليكم السلام .. ها امايه سايره الرياضه ؟
ريم: هيه اميه
جاسم: انزين ريمان انا عندي امتحان منو بيدرسني
ريم: امتحان شو ؟
جاسم: عربي
ريم: قوم اركب ويانا في السياره بنزلك عند امايه تعلمك ونحن راجعين بنمر نيبك
جاسم: هيه احسن ..
مايد: انا بسير وياه بعد تعلمني ..
ام سيف: شعنه تفزعيبه اهناك وتغثين امج .. يوم بتردين بتعلمينه
ريم: اميه مدرسه عربي تراها بتعلمه زين .. اخافني ارد تعبانه او يتاخر الوقت وهو مايستوعب ..قوموا زهبوا الكتب بتصل بامايه بخبرها

زهبوا كتبهم وركبوا ويا ناعمه وريم اللي نزلوهم في طريقهم وساروا النادي
ناعمه كانت تلعب بتثاقل وكل شوي تيلس.. في الاستراحه يلست ريم حذالها تسمح بالفوطه ع ويها

ريم: بلاج نعوم ماتلعبين
ناعمه: راسي يدور ماعرف
ريم: تبين اييب لج ماي ؟
ناعمه: لا لا . قومي خل نكمل ونروح تعبانه .. برمس ابوج اييب قوم ميود ماروم امر عليهم انا
ريم: امايه قالت يوم بتخلص بتيبهم هي
ناعمه: زين بعد
قامت ناعمه وريم يكملون لعبهم مع المدربه .. وفجأه طاحت ناعمه مغمى عليها
تجمعوا حولها كلهم وقامت ريم تصب الماي ع ويها..
ريم: حد عنده عطر؟
يابولها عطر وعطرت ايدها وحطتها ع خشم ناعمه ..اللي بعد شوي انتبهت
ريم اتصلت في ابوها عشان ايي ياخذهم ويودونها المستشفى .. تمت ناعمه طايحه ع الارض ومسنده راسها ع ريول ريم اللي كانت يالسه تغسل ويها بالماي وتقرا عليها ..ريم لبستها بمساعده الموجودين عباتها ..وهي تلبست وطلعت لابوها اللي كان ياي ياخذهم..
ساروا على طول للعياده رقدوا ناعمه وحطولها مغذي لين تطلع نتايج التحاليل..
كانت ريم يالسه تجلب مجله طبيه حذال ناعمه..وابوها يالس يتريا..
بعد نتايج التحاليل دخلت عليهم الدكتوره..
الدكتوره تجدمت من ناعمه تطالعها وهي تبتسم.

الدكتوره:كيف حالك الحين احسن ؟
ناعمه: هيه الحمدلله ..
الدكتوره: انتي مافي معلوم انتي في حمل ؟
وريم وسيف تقربوا من الدكتوره عشان يسمعون اللي قالته
سيف: حاااامل ؟
الدكتوره: هيه مدام حامل في شهر 3

سيف اطالع ناعمه وملامح الفرحه غطت ويهه..كان يتحرى انه عفرا اخر عنقوده وخلاص..ناعمه كانت منصدمه من الخبر..ماحست للحظه انها بتيب ياهل غير عيالها الاثنين وماكانت تفكر في هالشي
اما ريم كانت وايد مستانسه انه بيكون في البيت ياهل صغير يملا عليهم البيت بصريخه ولعبه ..

الدكتوره: انا بكتب شوي فيتامين زين حق حمل .. يقدر يروح بعد مايخلص جيلكوز
سيف: شكرا دكتوره .. ريم قومي ييبي عنها الورقه
قامت ريم ويا الدكتوره تيب عنها الورقه ..
اما سيف تجدم من ناعمه وحبها ع راسها
سيف: مبروك يا ام مايد
ناعمه: الله يبارك فيك..

كانت تقولها وهي بعدها مب مقتنعه انها فرحانه..بس كانت تشوف الفرحه على ويه سيف.. بعد المغذي رجعوا البيت ولقوا جاسم ومايد يتريونهم اهناك .. كانت عليا يايبتنهم .. وصعدت ناعمه غرفتها على طول من غير ما تنبس بأي كلمه .. ما بغت غير انها اطيح ع سريرها وتغمض عينها وتفكر بالي صار وبالي بيصير ..

****

في الحرم المكي .. كانت بدريه يالسه حذال عمتها ام زوجها على واحد من الدريات اللي تحيط بالكعبه .. يشوفون الكعبه بعد ماصلوا العشا ..
كانت رحلتهم للعمره بعد الحاح ام عدنان على ولدها انه يوديهم العمره عشان تتحسن نفسياتهم .. خصوصا انه اللي صار لبدريه اثر على علاقتها بزوجها ..
كان حزين لدرجه انه ماكان يقدر يواسي زوجته .. واقتراح امه للعمره كان في وقته .. عشان كل واحد منهم تطمئن نفسيته ..
كانت بدريه ظامه ريولها لبطنها ومسنده ويها ع ركبتها وتتأمل الكعبه..
تشوف الناس تطوف حوالينها بشكل مرتب .. يدعون ربهم ويرتجون منه الرحمه..
رفعت نظرها للسما .. سمعت انه عرش الرحمن فوق الكعبه تطوف عليه الملائكه

دمعت عينها وهي تتخيل هالشي .. تمت تطالع فوق ورفعت ايدها تدعي ربها انه يغفر لها ويصبرها هي وزوجها ..
انتبهت لعمتها تدقها ع جتفها .. التفتت بدريه وهي تسمع دموعها ..

ام عدنان: قومي بدريه خلينا نسير ..
بدريه: يالله ..
قامت بدريه وهي تتمشى ويا عمتها
ام عدنان: قومي بنسير شوي السوق .. بناخذ قطع
بدريه: ان شا الله

ساروا صوب السوق .. كانت بدريه لابسه عباه ع الجتف مع شيله سودا ..
دخلت عمتها لمحل القطع وبعدين التفتت بدريه لمحل عبايات .. وطلبت من عمتها انهم يدخلونه ..
دخلت المحل وطلبت نقاب مع عباه الراس ..
عمتها صدت لها : بتاخذين لامج ؟
بدريه: لا عموه .. انا ابا نقاب وعباة راس ..

ارتسمت ابتسامه فرحه على ويه ام عدنان وربتت على جتف بدريه
ام عدنان: بارك الله فيج يابنتي
اشترت بدريه العباه وكانت تحس بفرحه تبى ترجع الفندق بسرعه .. عشان تجربهم في اللبس ..
رجعوا الفندق وفتحت بدريه الاكياس تجرب العباه مع النقاب ..
التفتت لعمتها اللي كانت يالسه تسوي حليب .. ونادتها
بدريه: عموه شو رايج ؟
ام عدنان: تبارك الله حلوه عليج
وقفت بدريه وهي تتامل نفسها في المنظره..
في هاللحظه دخل عدنان الغرفه ولكنه وقف يتحرى حد عند اهله ..
بدريه: هاذي انا عدنان
ورفعت النقاب علشان يشوفها ..
ابتسلمها .. كانت اول مره يبتسم فيها عدنان لبدريه من بعد اللي صار ..
بدريه تجدمت منه: شو رايك ؟
عدنان: حلووه . هاي لج ؟
بدريه: هيه لي .. بلبس على طول جيه .. احسن واستر
عدنان ابتسم وهو يشوفها ويلس ع الكرسي
عدنان: صح .. جيه احلى عليج

بدريه ابتسمت وفصخت عباتها والنقاب .. ويلست تجهز ويا عمتها العشا حق ريلها..



************************
(الاربعا) 24 نوفمبر 2004
************************


كعادة كل أربعا نزلة مي وساره من الجامعه .. وصلن الموقف متأخرات شوي ها المره .. نزلن من الباص وشافن جاسم واقف ويبين من شكله معصب ..
تجدمت مي صوبه وسلمت عليه ..

مي: شو بلااك
جاسم: وينه هذا دريول الباص بسير اضارب وياه
مي: عوذ بالله .. جي شو تبابه
جاسم: عنبوه من ربع ساعه ونحن نتريا ..
مي: هد اعصابك انزين .. ازقر ع الدريول خله ايي يشل الشنط ..
ساره وهيه يايه صوبهم..
ساره: نزلت الشنط تحت .. وين الدريول
مي: يلا انزين نركب السياره ..

وركبوا ثلاثتهم السياره ونزل الدريول اييب الشنط ..

مي: ههههههه ضحكني جسوم يبى يسير يتكافخ ويا راعي الباص
ساره: لييش
مي: اونه ليش متأخرين ..
جاسم: والله صدق.. عيزنا من كثر ما نتريا ..
ساره: غريبه جسوم ياي بروحك .. وينه ميود؟
جاسم: خله ها ولد امه ..
مي: لييش
جاسم: من درى انه امه حامل وهو كله مطيح عندها .. الا يربع اييبلها الدوا واييبلها الما وينزلها من الدري .. مصخره ها
مي: فديييته يداري على امه .. مستانسين بالياهل اللي بييهم
ساره: غربلاااات بليسج يا نعوم بتيبلنا ياهل .. تصدقين ميوه احس من خبروني وانا جي مستانسه
مي: حتى انا انزين . . اول ما نزل من السياره بسيرلها ..

وفعلا .. اول ما وصلوا البيت .. نزلن البنات سلمن على الموجود فالصاله وتسابقن لين فوق .. دشن قسم ابوهم وحصلن ناعمه مستلقيه على وحده من الغنفات وفايدها الريموت كنترول وتبدل ..

ساره: ام ميووود شحاالج

سلمن عليها ويلسن حذالها ..

مي: هاااا بيي ولي عهد يديد عيل
ناعمه وهي متلومه: شفتن عاد
ساره: بلاج جي محمره .. عادي انتي ماسويتي جريمه مب اول حرمه كبيره فالسن تحمل .. عاادي
ناعمه وهي تتطالع ساره بنظره: شوو تقصدين .. انا بعدني صغيره اللي كبري ما وقفن حمل ..
ساره: ههههههه بلاج حرجتي عادي عادي الا اسولف .. يالله اصلا نحن شو مستانسين انه ياهل بيينا البيت ..
مي: داري على عمرج عاد وخلي عنج الهوامه ولاتسوقين خلاص..نباه ولدنا نحن.
ناعمه وهي مستانسه على ها الاهتمام من قبل البنات ..
ناعمه: اصلا سيف مانعني من كل شي .. حتى الشغل يباني اقدم على اجازه بدون راتب..
مي: هيه ومن ايي حطي فبالج تراني انا بربيه من الله انتي ما تفيجين لتربية عيالج
ناعمه: اييه انتن يايات تسبني ولا تباركلي .. مالت عليكن تفرحني دقيقه وتغصصبي عقب
ساره: ههههههههههه وحليلج يا نعوم .. والله نسولف وياج
مي: يالله لا تغصصين الحين انتي مجابلتنا من كم شهر ما عرفتي لطبايعنا .. تراج حرمة ابونا بعد وماتهونين علينا..
ساره: يلا انا بسير ابدل وبرقد ..
ناعمه: هاي من تي البيت الا كله رقاد ..
مي: لازم .. مجابله فلانه وعلانه فالجامعه وكل يوم سهر
ساره: بس بس ميوه لاتفتحيلي موالج الدايم ..
ناعمه: وميوه ليش انتي بعد ماتلعبين شراتها
مي: فديتني انا .. اوني ثجيله يسابرولي بس ما سوي سالفه لحد ..
ساره: بس عيل.. كل حد يقول عنها وغيده
ناعمه: يالله الوغاده عندج انتي مب عند ميوه .. ماعرفن يحكمن
مي وهي متشققه: ههيهي جان استحي..
ساره: ماعليج منها نعوم.. هي بعدها ماخذت وايد ع البنات بس صبري عليها .. من الله مستجده ومسويه عمرها قو ما تمشي ويا البنات
مي: سيري لاه انتي .. يوم بتي البنت تتعرف عادي بمشي وياها لكن حركاتكن هاي سلمي على فلانه وهاتي رقمها بس لا تخبرينها ومادري شو ..
ناعمه: والله سوالف بنات الجامعه .. خبرني بعد شو تسوون
ساره: ههههه مشكله عاد نعوم تعيبها ها السوالف .. انا بسير ابوي .. يلا باي

طلعت ساره من قسم ابوها .. اما مي فتمت يالسه ويا ناعمه وكملوا سوالفهم عن الجامعه وعن تعامل البنات ..

ناعمه: عيل شو الرمسه اللي توصلنا عن البنات وحركاتهن.. والبويات الي مزرن الجامعه ..
مي: مم مادري والله يانعوم..اصلا الكل ماخذ فكره غلط وعباله كل حد جي.. ماعليج مني يوم اقولج ساروه مال حركات وجي بس هن غير يعني سوالف وعايشات حياتهن ويتعرفن عادي عندهم ..وعن البويات ترا ها الظاهره فكل مكان منتشره حتى فكليات التقنيه والجامعات الثانيه ..
ناعمه: وشو ها الكلوز ..؟
مي: ههههه بعد .. الكلوز ها تسميه منتشره فالجامعه .. الصراحه انا ماحب ها الكلمه بس شو بتسوين فالبنات ..
ناعمه: انزين شو هي؟
مي: ماشي بنتين ربع قو سموهن كلوز
ناعمه: يعني يكونن مب اوكي ؟ مب زينات؟
مي: ههههه تراه اللي مب عايش ويانا بياخذ ها الانطباع.. يعني عادي نعوم يكونن ربع ووايد ويا بعض سيراتهن رداتهن لبسهن نفس الشي وسموهن كلوز .. تعرفين انا استغرب عندنا ربع من بنات العين تتخيلين انهن مايطبن السكن .. اونه يخافن..
ناعمه: اونه
مي: هي والله.. اللي محلوفلها ما دش السكن .. واللي تخاف من البنات .. واللي واللي..
ناعمه: اسميهم عيل ماخذين فكره غلط
مي: شدراني..بس استغرب انه هن بعد عندهن سوالف مسابر وكلوز وجي بس ماعرف ليش كله طايحات فبنات السكن .. مب الكل طبعا بس كل ماكون ويا شله وفيها ربعهن بنات العين كله يتضجرن من بنات السكن..
ناعمه: كل مكان فيه الزين و الشين
مي: خخخخ ترا هاي مقولتيه .. بس احلى مافي السكن ربشة البنات
ناعمه: يالله عاد انتي اربشوني وبخترش
مي: ههههههه فدييتني ..

وكملو سوالفهم شوي وعقب ترخصت مي من ناعمه وسارت تسبح من عقب تعب الباص .. وعقب نزلت تحت عند يدتها واخوانها تاخذ اخبارهم وشو سوو خلال ها الاسبوع ..

****

المغرب كانت فجر طالعه ويا ربيعتها زهره .. فجر تعرف زهره من فتره بسيطه وعلاقتها قوت وياها واايد حتى اكثر من علاقتها بدلال ولولوه بنات بلادها ..
لدرجة انه فجر أمنت زهره بوايد من اسرارها وخصوصا مشاعرها تجاه أحمد ..
زهره كانت تشجع فجر على علاقتها بأحمد وتعطيها من النصايح وطبعا فجر مستانسه وايد عليها .. كانت ترتب اللقاءات امبينهم في أمل انه أحمد يصارح فجر باللي فخاطره قبل ما تفضفضله فجر بنفسها .. وكان اليوم واحد من ها اللقاءات ..
اتفقوا انهم يتلاقون في المول ..
طلعت فجر بسيارتها وتلاقت في المول مع زهره اللي تمت تتمشى وياها وقصوا تذكرتين للسينما ..
في هالوقت وصل احمد .. سلمت عليه فجر اللي كانت لابسه تنوره بيضا قصيره اطول من تحت الركبه بشبر .. مع قميص ايده قصيره لونه اسود .. ورافعه شعرها بشكل عشوائي ..
سلم عليهم احمد وعلى ربيعتها زهره .. اللي كانت لابسه عباه مفتوحه فوق بنطلون جنز .. وشيلتها كل شوي اطيح ع جتفها..
يلسوا في الكوفي شوب كلهم يسولفون عن امور مختلفه
رن تلفون زهره .. كانوا اهلها متصلين ..
اضطرت انها تعتذر منهم بحجه انه اهلها يبونها ضروري ..
فجر: شفيج مستعيله وين رايحه ؟
زهره: اسمحولي اميه متصله وتباني ارد البيت .. مادري شوعندها مع اني قايلتلها اليوم يعطوني اجازه لين بالليل .. هههه شكلهم ما يستغنون عني ..
فجر: ايه من قدج عيل ..
احمد: كان ودنا تقضين وقت اكثر ويانا
فجر اطالعت احمد بنظره وردت تتطالع زهره اللي ابتسمتلها وغمزت ..
زهره: يلا ماعليه .. اليايات اكثر.. يلا بااي
احمد: وحليلها ربيعتج شكلها طيوبه
فجر: ايه ..
احمد: من وين هيه
فجر: من دبي
احمد: اها .. من قوم منو
فجر وتحس بحراره فويها: وانته شكو فيها ..
احمد: ههههههه لا بس أسأل ..
فجر: عيل لو تشرب قهوتك وايد احسن ..
استغرب احمد من ردة فعل فجر بس اكتفى بابتسامه ساحره لفجر..
احمد: بدشين الفيلم انتي؟؟
فجر: ايه
احمد: متى بيبدى
فجر: بعد 5 دقايق ..
سكتت للحظه لكنها تجرأت وقالت له : تدخل معاي ؟
احمد ابتسم: اوكي يالله ..

مشوا مع بعض للسينما .. وهم يسولفون عن اخر فتره قضوها مع بعض .. كل منهم حس انه كان وايد قريب من الثاني .. فجر وايد مستانسه لقرب احمد .. ولكن ماتدري هل هو يبادلها ها الشعور ولا لا!

وفها الاثناء..
كان هو يمشي ويا امه اللي اصرت انه اييبها صحارى تتسوق ..
انتبه لوحده مألوفه تمشي ويا شخص غريب وهي الابتسامه ما تفارق محياها ..ركز أكثر وحس جنه حد صافعنه ع ويهه ..

سلطان: امايه لا تظهرين من المحل ليين اييج .. بسلم على واحد من الربع وبييج ..

مشى سلطان يبى يتاكد من اللي شافه .. فجر تمشي ويا واحد غيره !!
كانت تلعب عليه يعني ؟ والا شو سالفتها ؟ مالها تفسير ثاني ..
فجر لعبت عليه ..
لاول مره في سلسله معارف سلطان .. ينلعب عليه .. لعب على كل حد وخذ كل اللي يباه ولا حد يقدر يكسر كلمته او رغبته ..
والحين تدور عليه الدواير وينلعب عليه هو ..
اول الغيث قطره
وهاي أول قطره ..

حس بألم فراسه وهو يتذكر بدريه ومصيرها اللي آلت له .. من عشر ايام وهو عايش فكابوس بدريه .. بس خوز ها الأفكار بسرعه من راسه
ورجع عند امه قالها انه المكان بدى يزدحم ولازم تخلص بسرعه عشان يرجعون .. ماكان له مزاج انه يتم اكثر فها المكان اللي شهد فيه خيانة فجر .. صح ما عنتله الكثير . لكن هو سلطان .. كرامته فوق كل شي .. محد يدوسله اياها ومحد يلعب من وراه .. واليوم شاف اللي لعب من وراه وماعبره ..
حس بخنقه فضيعه .. وتم يبطل فصم كندورته وبدى يتأفف لين حستبه امه وطلعت من المول ورجعوا البيت ..



****


وفي بيت مريم .. يلسن اسما ولطيفه ويا امهن يسولفن وحده تتشكى من دواماتها والثانيه تتخبرها عن الاهل وشو سووا ها الاسبوع..

لطيفه: امايه نايف وينه عيل راقد ؟
مريم: لا امايه فوق السطح عند الحمام .. ها مادري شقى بيعرس وهو دوم لابد فووق عند هالحمام
لطيفه: ماعليج بتيه اللي بتسحبه تحت ..
مريم: ان شا الله ..
اسما: والا صدق مرت خالي حامل ؟!
مريم: هيه حليلك ياسيف
لطيفه: يالله عاد محد هزربها بتحمل عقب ماوقفت احين مادري 10 سنين اظن مادري كم
مريم: يالله رزق من الله ياهم .. الحمدلله
في هالوقت نزل نايف من فووق شال في ايده حمامه
سلمن عليه خواته وتم يالس وياهم والحمامه بعدها في ايدها يمسح على ريشها
اسما: توه امايه تقول شقى انته بتعرس وهالحمام دومك زابن عندهم
نايف: ماعليه بسحب ريمان ويايه فوق عند الحمام
مريم: اندوكم .. واحين وين تبابها ها الحمامه !
نايف: بوديها عند البيطري شوي اشوفها والله انها
لطيفه : انزين خلنا من سالفه هالحمامه قولي شو سويت في الجناح احين ؟
نايف: اخترنا تراه بس نترياهم يخلصون تركيب الحمامات وعقب بيصبغون
مريم: والاثاث ؟
نايف: عقب بنتنقاه انا وياها بنشوف يوم واحد بنسير الشارجه او دبي
اسما: كيف بتسير وياها ؟ عادي ؟
مريم: لا هب عادي انا بسير وياهم والا هي تاخذ اخوانها ..
نايف: لازم يعني ؟ ريلها انا ع سنه الله ورسوله
مريم: يالله استح ع ويهك .. عيب .. عيزان تصبر شهرين وعقب خذها ودها وين تبى .. لو سمعتك امايه جان عرفت شو تسويبك
لطيفه: فديت امايه اشحالها ولهانه عليها .. قوموا نسير لهم الحين..
نايف: ريم تكون محد عقب المغرب
لطيفه: ليش وين تسير ؟
نايف: تسير نادي رياضي عشان تظعف اونه هب عايبنها تبى تخف شوي
لطيفه: ايواا . زين زين ..
نايف يطالع لطيفه: عقبال بعض الناس اللي لين احين مب طايعين يحسون ع دمهم
لطيفه: كيفي عايبني جيه .. انا حلاتي وانا متينه
نايف: ريمان اللي اظعف منج سوت رياضه ومادري شو وانتي تامه لين احين جيه يبوج اظعفي عندج شهرين لين عرسي خلي الناس تشوفج وتخطبج وتفكنا منج
مريم: الله واكبر ها كله ! شو تباها بنتي غاويه برايها
نايف: عدال انتي وبنتج .. يالله انا بقوم عنكم بسير اودي حماماتي
اسما: خطاها السووو ماتشوف شر ان شا الله
نايف: الشر ماييج ..

روح نايف ونشن البنات يبدلن ثيابهن عسب يسيرن بيت خالهن..




*************************
(الخميس) 2 ديسمبر 2004
*************************

كانت فجر مجابله لابتوبها ومحتاسه مب عارفه تسوي البروجيكت اللي عندها وبما انه امتحاناتهم قربت كان هذا فاينل بروجيكت ..
رفعت تلفونها واتصلت باحمد .. اللي تحس انه خلاص تملك احاسيسها خصوصا فآخر فتره زادت فيهم شوفاتهم.. اتريته يرد عليها لكنه مارد ..وطت التيلفون وهي تفكر شو يسوي احمد الحين.. ليش ما رد عليها ..
ورد بالها للبروجيكت بدت تشتغل فيه شوي بس ماعرفت تكمل .. طفرت .. وتذكرت ملاذها فها الأمور ..رفعت سماعه التلفون واتصلت حق سلطان .. يمكن يقدر يسويلها البروجيكت مثل ماسوالها من قبل كل بروجيكتاتها طول ها الكورس..

تردد سلطان لكنه رد عليها يشوفها شو تبى ..

سلطان: الوه
فجر: قوه
سلطان: الله يقويج
فجر: اشلونك سلطان؟
سلطان: لوني..مسمر ها الايام..
فجر: هههه تنكت ..
سلطان: لا بس اغير جو ..
فجر: اها .. زين اخبارك
سلطان: تهمج
فجر: هو! .. سلطان شفيك
سلطان: لا ابدن .. بس اخباري توب
فجر: ان شاء الله دوم ..
سلطان: امين
فجر: وليش ما تسأل عن اخباري
سلطان: ممم .. مايحتاي اسمعها.. اكيد انج بخير

فجر عقدت حياتها .. اول مره تسمع سلطان يرمس بها اللهجه اللاذعه .. صارلها فتره ما رمسته لكن اخر مره كان مرمسنها باسلوبه المعتاد..

فجر: لا مب بخير ..
سلطان: افا شوفيج
فجر وهي ترقق اسلوبها: ماكو ..
سلطان: اها
فجر: سلطاان.. تعبت من ها الدراسه .. مليت ابي اطلع من الجامعه خلاص

سكت سلطان يعرف اسلوبها تبى تطلب منه شي لكن قرر انه يسايرها

سلطان: ليييش ؟ خير ان شا الله
فجر: عندي بروجيكت ومحتاسه مب عارفه له زين..والله أرف..
سلطان: اهاا الله يوفقج
فجر: من 3 ايام قاعده ادور عنه في الانترنت مولاقيه شي ..
سلطان: هيه الله يعينج
فجر زاد استغرابها.. شوفيه سلطان .. في العاده يعرض عليها خدماته قبل ما تطلب منه .. والحين مجافنها واايد ..
فجر: تعبت والله ..
سلطان: يلا ماعليه شدي حيلج .. هاي الدراسه تراها ..
فجر من غير تردد:ممكن تساعدني شوي اذا كنت فاظي
سلطان بسخريه: هه كان ودي بس مب فاضي ها الايام..
فجر سكتت ..
سلطان وهو قاصد ينقم: الا ليش ماتخلين ربيعج يساعدج ؟
فجر مستنكره: منووو ؟
سلطان: اللي فالح يوديج مولات وسينمات .. خله يسويلج بروجيكتاتج بعد ..

فجر سكتت انصدمت ماعرفت شو تقول .. خافت ..

سلطان: سمعي.. ماعندي وقت اضيعه ع ناس من امثالج ..باي

سكر التلفون في ويها .. وغلق التيلفون وفره فالسده .. وطلع تيلفونه الثاني .. خلاص .. يكفي اللي ياه لحد الحين .. استغلته ها الانسانه وهو عباله انه يلعب كالمعتاد .. كره الوقت اللي قضاه وهو يشتغل الها شغلها ويساعدها فواجباتها ..

اما فجر بدت تساورها الشكوك .. سلطان أكيد شافها ويا أحمد فواحد من الاماكن اللي ساروله .. بدت تخاف على نفسها .. سلطان ما يطوف ها الامور وما بيسكت .. خافت يخبر عليها .. ارتبكت أكثر وما قدرت تركز فاللي قاعده تسويه ..


****



دش محمد البيت وفإيده مغلف بني .. شاف بناته الثنتين يالسات فالصاله ويا امه يهمزن ع ريولها .. دخل عندهم وحب امه ع راسها ويلس حذالها ..
وطى المغلف ع الغنفه .. وانتبهت احلام له وسألته ع طول..

أحلام بحمااس: ابووويه يبتهااااا؟؟
محمد وهو يبتسم لبنته : وأخيرا ..
احلام: الله .. ابا اشوفها
محمد: مايصير قبل ماتشوفها امج
مديه: ابويه شو هيه؟؟
ام راشد: ليش شو يايب لعبير
محمد: لا ماشي .. مسولها روايه ومن متى اكتبها والحين خلصتها كامله وموجوده فالنشر من عقب ما قراها رئيس التحرير وعطاني رايه .. وهاي اول نسخه مهدايه لحرمتيه..
ام راشد: ياحافظ عليك .. تستاهل ام احلام
مديه: ياسلاام .. عاد نحن قارلنا اياها بس نبى نشووف كيف الشكل النهائي..
محمد: خلاص من اعطيها امكن شوفنها ..
احلام: يا سلام .. ياحظها اميه فيك يا ابويه
محمد: هههههههه وليش مب يحظي انا فيها
مديه: يحظكم ثنينتكم فبعض ..

ام راشد كانت تشوف محمد وبناته وتبتسم من خاطرها الهم .. قلبها واااايد يرتاح وهي تشوفهم ملتمين جي ويسولفون .. طبيعة العلاقه هاي بين محمد وبناته كل حد يتمناها وكل حد يستانس عليهم .. دعت من قلبها انه الله ما يغير عليهم ويحفظهم لبعض..
قامت احلام من مكانها تشوف وين امها .. ولقتها فالحجره يالسه ترتبها وردت تركض عند ابوها ..

احلام: ابوويه ابوويه
محمد: ها شو بلاج
احلام: اميه فالحجره .. سيرلها يلا .. وخبرنا ردة فعلها ..
محمد ابتسلم لبنته ..
محمد: يالله ياامايه ماروم اسوي شي ما يشاركني فيه ها الثنتين ..لا ويتحمسن بعد..
ام راشد: هههه فديتهن .. يلا قم سير لحرمتك
محمد: ان شالله ..

وقام محمد من مكانه وطبع بوسه على راس امه .. شل المغلف وتوجه لحجرته .. دش على عبير اللي كانت ملتهيه بتنظيف الحجره ..

محمد: السلام عليج .
عبير: هلا والله .. وعليك السلام والرحمه
محمد: شحالج
عبير: تماام .. ها وين رحت اليوم .. من الصبح طالع
محمد وهو ييلس ع الغنفه .: ابدن .. مني ومناك ..
عبير وهي ترتب الكتب فالمكتبه: حلو ..
محمد: خلي ها اللي فايدج وتعالي يلسي حذالي
عبير وهي تطالعه: متوله علي
محمد: هي وايد
ابتسمتله عبير وخلصت اللي فايدها وسارت تيلس حذاله.. انتبهت للمغلف اللي ع الطاوله ..
عبير: شو ها
محمد: بطليه وشوفيه ..
فتحت عبير المغلف وطلعت منه اللي فيه .. تمت تتأمل الواجه وتقرى العنوان ..

(اسم الروايه: شق في جبين الذاكره!

تأليف: محمد سلطان بن مانع..)

واطالعته عبير وهي مبتسمه ..
عبير: الصحفي قام يكتب روايات
محمد: هاي انطلاقتيه فمجال الأدب القصصي ..
عبير: الله يوفقك ان شاء الله
محمد: ماودج تقرينها .. او تعرفين سالفتها..
عبير: رواية ريلي حبيبي وما اقراها .. ما يصير
محمد: اووه قوموا عني ..
عبير: هههههه يلا خلنا نقرى المقدمه ..
محمد: لا .. اقري الاهداء أول ..

فتحت عبير ع الاهداء وتمت تقراه .. غرقرت عيونها وبدى قلبها ينغزها .. ها الروايه اهداء من ريلها الها .. بطلت ع المقدمه وقرت شوي تبى تعرف شو سالفة ها الروايه .. بدت تقرا بداية احداث مألوفه عليها على طول فهمت انه هاي قصه محمد معاها في الكويت .. رفعت راسها وطاحت عينها بعين محمد .. نزلت دمعتها على طول وطاحت فحظن ريلها ..
مسح محمد ع شعرها ويحس براحه تسري فجسمه لها الانجاز ..

محمد: شو ما عيبتج البدايه؟
عبير: محمد .. هذيل نحن .. هاي قصتنا ؟!
محمد: هي حبيبتي .. نحن هذيل ..
عبير: من متى وانته تكتبها؟
محمد: من فتره طويله .. حاولت انجزها فأسرع وقت .. كنت اتخيل كل شي واكتبه على طول ..
عبير وهي تشوف عيون محمد ..
عبير: هديه ولا أروع ..
محمد: فديتج والله .. تستاهلين كل خير يا ام بناتي ..

وتمت عبير قابضه الروايه فايدها وتجلب فيها .. وكل ما تقرى موقف تعود ذاكرتها لذاك اليوم ويلست تناقش محمد عن كل شي .. وهو الثاني مستانس وتموا يتذكرون اللي مروا فيه ..


****

توها مي مسكره من احلام اللي خبرتها عن سالفة الروايه .. ما يتم شي فبطنها لازم تخبر توأمها الروحي بكل كبيره وصغيره .. مي واايد عيبتها السالفه واستانست عليها وتم فخاطرها تقرى رواية خالها ..

قامت من مكانها ونزلت تحت.. لقت مها ومهره وجاسم ومايد وعفرا يلعبون مونوبولي وحاشرين الدنيا ..

مي: ايه خفوا حسكم عنبوكم طارين الدنيا
مها: هذا جسوم كله يصرخ ..
مي: يالله يا انتن كله تردنه على جسوم ..
جاسم: عادي عادي ميوه .. سووو طاااف ..
مي: هههههه فديت الطاف انا .. احسن شي ..
مها: ميوه بنسألج ..
مي: شو
جاسم: ميوه شوفي انا اقولهم خلاص ماشي عيد الاتحاد الحين .. بابا زايد توفى .. وهم يقولون كل سنه فيه عيد اتحاد
مهره: انزين شو يخصه.. عيد الاتحاد ها يا حبيبي غير عن عيد الجلوس
مايد: هذا جسوم ما يقتنع
مي: هه .. صدقه جسوم أي عيد اتحاد هذا بنعيشه وزايد محد..
مها: انزين بس كل سنه فيه عيد اتحاد
مي: والله انكم حاله .. تناقشوا بروحكم احسلكم انا بسير..



طلعت مي من عندهم وسارت مكتب ابوها .. ملاذها اللي كل ما ملت دشته .. صارلها فتره ما يلست فها المكان وطلعت خواطرها .. يلست ع المكتب وخذتلها ورقه من الاوراق المكدسه جدامها..
تذكرت خالها وحرمته وابتسمت .. حست انها متعايشه ويا الموقف..
ماتعرف شو من احساس مر عليها .. بس تذكرت شي .. وبدت خواطرها تنساب ..


هل يتحقق الحلم !!

ماذا دهانا يا عزيزي !!
بالأمس كنا نلهو ونلعب في الرمل ولا نبالي ..
نفرح وترتسم الابتسامة على وجوهنا بكل براءة ..
نأمل بتحقيق حلم لنا .. وبغد نكبر فيه كلينا ..
فنضحك لمداعبة هذه الأحلام لنا ..
فنعود ونلهو ونلعب في الرمال ولا نبالي ..
واليوم ؟؟ شتان مابينه وبين الأمس ..
كل منا أصبحت له لعبته الخاصة ..
تبدد الفرح واختفت تلك الابتسامة ..
وكست وجوهنا معالم الحزن .. الخوف ولربما الخجل من حلم مضى ..
ذلك الحلم الجميل قد زال وحلت محله أمنية للعودة إلى الصغر ..
لنأمل من جديد بتحقيق حلم لنا ..

يلست تتطالع اللي كتبته .. بمنو فكرت وهي تكتب ها الكلام.. تذكرت الماضي.. تذكرت العفويه والطفوله اللي مالها حدود .. تولهت ع ايامهم قبل..
قطع حبل افكارها دخلة ساره المفاجأه وصفقت الباب وراها ..

ساره: ميوووه ميووه ميووه
مي: بسم الله بلاااج طيرتي حمامة فوادي
ساره: ميووه
مي: وطهف.. بلاج
ساره: يشلج ..

تجدمت ساره من مي ويلست ع المكتب مجابلتنها ..

ساره: ماتدرين باللي صاار يا ميوه ..
مي: شو مستوي
ساره: يقولج مروان
مي: بلاه
ساره: اندوج التيلفون اقري ..

مي على طول حست انه مروان خايرنها فشي وخذت التيلفون وقرت المسج اللي مطرشنه ..

" ساره..
الصراحه..ماقدر اخبي أكثر.. حاولت انج تفهميني فها الفتره وأتقرب منج أكثر بس ماعرف اذ كنتي حاسه بها الشي..راسج عنيد وايد ..
بس اعرفي اني احبج .. ومابا حد غيرج"

تشققت مي وهي تقرى المسج وتم قلبها يدق ..

مي: ابيييه سارووه ماروم اتحمل
ساره وهي رافعه حايب: وانتي شلج
مي: هههههه ماشي احب جي .. ساروه شو رديتي عليه
ساره: ماشي ..
مي:من متى مطرشنه
ساره: قبل ربع ساعه .. كنا نمسج بعض عادي مثل العاده .. بس ماعرف ليش جي طرشلي ..
مي: تعب من برودج وحليله ..
ساره: ميووه انا مابا جي ..
مي: شو ماتبين
ساره: ماعرف.. يعني اوكي لو كانت امبينا مسجات بس .. يعني بس كانت سوالف.. لكن انها تكون جديه جي انا ماقدر
مي: وشو بسوين
ساره: ماعرف..

وشوي وصلها مسج ثاني من مروان .. فتحته ساره وقرته ..
ساره: اتريا ردج!
مي: افف بدى الأكشن ..
ساره: انا الغلط مني اني سايرته فالبدايه .. ميوه .. انا مابعطيه الحب الحين.. خل كل شي يستوي رسمي
مي: مالت عليج.. انتي فصوب والرومانسيه فصووب
ساره: ميوه انا ماحب جي..
مي: انا لو كنت مكانج بعيش الحب وحيااتج
ساره: اف عاد انتي عايشه بطولات القصص والشعر لازم بتكونين هيمانه
مي: هههههه ويا ويهج .. بس وينه اللي بيطلع ها المشاعر .. مالت عليهم شبابنا.. الامروان طلع قيس العايله ..
ساره: وشو يعني تترين مني اكون ليلى
مي: اقطع ايدي من هنه جان كنتي ليلى ..
ساره: انزين فكينا قوليلي شو اقوله ..
مي: قوليله اللي فخاطرج
ساره: مب فخاطريه شي .. انا ما حبه .. عادي
مي: بس متقبلتنه
ساره: هي عادي..
مي: ماعليه يا ساروه بنشوفج عقب .. الا ما تتعلقينه وتحبينه
ساره: الحب عقب العرس ..
مي: اف منج ..

كتبت ساره مسج لمروان " شو ارد عليك"

رد عليها بسرعه
" ماعرف.. بس اللي ابا اعرفه تبيني مثل ما اباج.؟"

مي: ساروه .. يبى يوصلج انه يبى يخطبج وانتي شو رايج
ساره: ميوه من الله قايلتلي انه خالي رامس عنا .. بعد شو
مي: انزين هو يبا يشاورج انتي قبل ما يرمس
ساره: شو اقوله ..
مي: كتبيله .. اذا الاهل راضين انا ما بعارض..

وطرشتله ساره ها المسج ..
انقهر مروان من برودها .. يباها ع الاقل تبوحله بشي بس حس انها وايد محافظه.. رد عليها بمسج
" انا برمس ابويه .. وقريب ان شالله بينتشر الخبر .. مابا اثجل عليج اكثر..فمان الله"

ساره: شو يعني عصب مني.؟
مي: ومنو ما يعصب منج انتي .. وياها البرود ..
ساره: ميووه بالعقل يعني .. تبيني اعق عمري عليه
مي: لا تاخذينها من ها المبدأ .. مم بس ماعليه .. احسن الثجل شوي .. بنشوفه شو بيسوي..
ساره: ماعرف والله
مي: بس كاتب بيقول لابوه .. يعني قبل يوم انه خالي رمس وقال يبانا لعياله ماكان مروان يدري ولا رمس فالموضوع
ساره: همم شكله جي .. يمكن خالي بروحه رمس
مي: هذا هو ..
ساره: خلينا من ها السالفه انتي الحين .. انا شو اسوي
مي: لا سوين شي .. اتريي ..

تمن الثنتين صاخات ويفكرن باللي بيصير .. مي كانت مستانسه انه فرحه ثانيه بتدخل بيتهم وثاني وحده من خواتها بتنخطب.. وحست بقشعريره تسري فجسمها ونغزات فبطنها ..

مي: ساروه
ساره: بلاج
مي: بطني يعورني.. تذكرت اني بكون نيمونيه من عقبج
ساره: هههههههه مالت عليج .. منو يباج انتي.. غلطان اصلا خالي يوم رمس عنج ..
مي: جب جب .. كثير اللي يتمنوني
ساره: خلج جي مرتاحه ولا ها التفكير.. ويوم بتصير حزتها فكري..
مي: ليش بديتي تفكرين
ساره: ميوه لا تستعبطين .. الموضوع بعد يخلي الواحد يفكر ..

شلت ساره بعمرها وطلعت من المكتب .. تمت تتطالع المسجات .. مروان يباها هيه .. وما يبا غيرها.. لو كانوا يحسون بها الشي بس لما يأكد الشخص حبه ويوثقه يتغير كل شي .. ركبت الدري وصعدت فوق ..
ضربات قلبها زادت .. لكنها حاولت تتناسى الموضوع


****


الساعه 12 فليل كانت فجر طايحه في الغرفه .. بعدها منصدمه من موقف سلطان .. كانت خايفه انه يستنذل ويخبر عبير او محمد .. وقتها ماكانت تعرف شو بيستوي لكن اقل شي بتطيح من عينهم ويمكن تعرض اختها لمشاكل مع زوجها..
لو صار وسلطان خبر اختها .. اكيد بتجبرها عبير انها ترجع الكويت ..
يا فبالها أحمد .. كيف بترد وبتخليه .. لا ما تقدر قلبها تعلق خلاص .. تمت تدعي من الله انه سلطان يسكت عن السالفه وما يخبر ..

جلبت فتيلفونها وهي فبالها أحمد .. طول اليوم ما رمسته كل ما تدق ما يرد .. قالت بتطرشله مسج ..

( مسا الخير .. عسى ماشر مالك صوت..أتصل ما ترد!؟ )

تمت قابضه التيلفون تتريا يوصلها شي .. ملت وحطته ع جنب وقررت ادش تسبح .. وبعد نص ساعه ظهرت من الحمام وهي تنشف شعرها .. سارت اتجيك ع تيلفونها وطارت من الفرحه يوم شافت انه واصلنها مسج ..
فحته ع طول .. لكن انصدمت باللي تقراه..

كيف.. وبكل ها السهوله .. طرشلها ها المسج .. ماراعى شعورها؟!
ردت تقراه وهي مب راضيه تقنع عمرها انه اللي مطرشلها المسج هو نفسه أحمد

فجر: مسا النور ..سوري والله كنت مشغول بملجتي على بنت عمي .. بغيتي شي؟؟

فرت التيلفون من ايدها وبدت دموعها تنزل ..

فجر: هذا شنو قاعد يخربط .. كيف .. ومتى وليش.. وااايد مستانس انه مطرش ها المسج اللي يحرق .. ليش انا وين رحت .. شنو يعني كان قاعد يتسلى فيني ..


ماقدرت تتمالك نفسها رفعت التلفون واتصلت فيه ..

احمد: الوه
فجر: احمد
احمد: هلا
فجر: شنو هالمسج اللي دازه لي ؟
احمد: شو فيه
فجر: انت ملجت صدق؟
احمد: هيه البارحه .. مابتقوليلي مبروك
فجر: مبروك على شنووو ؟ انته متى خاطب ؟ وليش ماقلت لي ؟
احمد: انا محير لبنت عمي من كنا صغار .. وفجاه ابويه قرر اني املج وانا وافقت
فجر: وانا شنو؟
احمد: انتي زميله واخت يا فجر
فجر: ليش كنت تخدعني لين خليتني اتعلق فيك ؟
احمد: انا ماخدعتج وعمري ماحسستج اني احبج او اباج كنت اعاملج كزميله
فجر: هذا كله وزميله ؟
احمد: شو هذا كله .. ماصار شي
فجر: كيف ما صار شي .. يلساتنا ويا بعض وين راحت .. مكالماتنا ..طلعتنا ورجعتنا .. كل هذا وين رااح
احمد: فجر انا ماييت فيوم وقلتلج اني احبج او اني اباج .. كنت مستانس بصحبتج..زميلة دراسه لا غير ..
فجر وصوتها متقطع ودموعها تنهمر: احمد انت شنو قاااعد تقوول
احمد: شوفيج ماخذه الامر بحساسيه .. حتى انتي ما حسستيني انج تحبيني ..
فجر: لي كرامتي .. وكنت اترياك انت تبدى
احمد: لو كنتي فخاطري ما كنت فيوم بخبي مشاعري ..بس انا اعرف اني لبنت عمي وماظن مشاعري تروح لشخص غيرها
فجر: لاا .. احمد .. لاتهدني
احمد بجفا: فجر اسمحيلي ..زوجتي تتصل ع الخط الثاني .. مع السلامه
فجر: أحمــد لااا ..
احمد: فمان الله..

سكر التلفون عنها.. ويلست فجر تصيح من حسرتها ع اللي صارلها ..صفعتين فيوم واحد .. صفعه من سلطان وثانيه كانت اقوى من أحمد .. خلاص ما قدرت تستحمل أكثر طاحت ع الشبريه وهي تصيح صياح يقطع القلب ..
الشخص اللي حبته وسلمتله كل احاسيسها طلع مجرد وهم خادع..
لو حد يعرف باللي صايرها اكيد بيعايرونها .. فلحظة ضعف صدقت مشاعرها .. مشت بكل ثقه لين يا ها اليوم اللي اطيح فيه على ويها ..
جلبت صفحاتها من اول ما يت ها البيت لها اليوم .. وقررت تسكر الدفتر خلاص .. ماعاد لها مكان .. بتعلن الرحيل من بعد الهزيمه ..
وبتثبت وجودها من يديد برحيلها ..

****

كان غافل ع سريره وقت ما سمع دق ع الباب .. انتبه للنور اللي ضوى من حجرته شوي .. وغطى ويهه بايده وهو يتأفف ..

فارس: شو مرقدنك من الحينه؟
مروان وهو متضجر ..
مروان: شو تبى
فارس: ماشي ييت البيت ماحصلت حد
مروان: الساعه وحده منو بتلقى واعي يعني
فارس: احيدكم انته وعزوه تتيلسون فالصاله
مروان: عزوه راقده من وقت اليوم ..
فارس: مب منها .. خامه المولات اليوم..
مروان: انزين خلني برقد ..
فارس: اف منكم .. بدق لمنصور بسير وياه العزبه
مروان: هاي شغلتكم تراها .. ماتملون من ها الميلس
فارس: يلا باي

طلع فارس من الحجره وسكر وراه الباب ..
ومروان حاول انه يرقد بس ما قدر .. يلس فمكانه وبدى فكره يجول به .. تذكر المسجات اللي كانت بينه وبين ساره اليوم ..
قبض تيلفونه يبى يتصللها.. ومن غير تردد ضرب على رقمها .. لكن ما من مجيب..
بند بكل هدوء ووطى تيلفونه .. طاح وهو محطي ايده ورا راسه..

ليش يعني هيه متجاهله مشاعره .. وليش بارده جذي.. شو يعني ناويه على تعذيبه.. شال ها الافكار من راسه .. وقرر انه باجر يكلم ابوه فالموضوع..خلاص ما يقدر يصبر .. كان قبل متخوف انها ماترضى عليه لكن لما وصللها وبدى ياخذ ويعطي وياها تعلقها أكثرواطمن قلبه انها هيه متقبلتنه ..


بانتظار ارائكم .. وحياني الله امبينكم