الجـــزء الســـابع عشــر


*************************
(الخميس)30 سبتمبر 2004
*************************

بعد مرور أسبوع ..الظحى في بيت سيف ..
نزلت ناعمه من السياره وبطلت الدبه .. وساره نزلت من الصوب الثاني وفتحت باب السياره الوراني ..

ساره: نعوم زقري ع البشاكير وايد أكياس
ناعمه : دقيلهن هرن

ضربتلهن سارة كمن هرن وتوجهت عقب صوب ناعمة وساعدتها فتنزيل بعض الأكياس لين ما يت نجمه ..

نجمه: الله ماما شو هذا كله
ناعمة: شو شو هذا .. حق الله ترا اليوم
ساره: هذا كله يباله تقرطيس وعباله .. متى بنخلص!
ناعمه: ماعليه بنتساعد كلنا .. نجموه شلو ها الاكياس وودوها الصاله ..
نجمه: جين ..

ودخلن البيت ..ناعمه توجهت للصاله عسب تراوي نجمه وين تحط الأغراض. أما ساره على طول سارت فوق تشوف خواتها شو يسون .. كانت ريم يالسه ويا مها وترمسها عن ذكرياتها ومها تسمعها مستمتعة باللي كان يصير قبل ما تنولد هي ومهره .. ويوم انتبهن لساره اللي كانت واقفه وراهم سكتت ريم ..

مها: انتي وين سرتي؟
ساره: سرت ويا نعوم السوق .. ناخذ مال الليله.. الباجيات وين؟
ريم: فحجرهن
ساره: اها .. كملي القصه ريم .. ولا تنسين تقوليلها شو كنتوا تسووبنا انتي ونايف

ريم احمرن خدودها على ها الطاري وساره ابتسمت بخبث وروحت عنهم ..

مها: هااا شو كنتوا تسووبهم
ريم: ههههه خس الله الهوش ... ساروه الا تسوي سوالف
مها: لا عااد رمسي
ريم: ماشي مهوه .. عادي كنا نلعبهم ونقص عليهم
مها: هههه يا الشر .. وبعد

سكتت ريم عن مها وما ردت على أسئلتها .. مسحت ع شعر مها وهي تغمزلها.. ردت حجرتها ويلست على طرف السرير .. فتحت لعمرها باب للذكريات .. مرت عليها أحداث صارلها دهر .. كانوا صغار يلعبون يركضون يضحكون .. دار عليهم الزمن وفرقهم ..
السبب كله كان هو ها الشخص اللي كبرت وهي تتجنبه .. والحين ..
تعيش وياه تحت سقف واحد .. تتعامل وياه ..
معقوله المياه ردت لمجاريها .. لكن ريم مستحيل تنسى اللي سواه قبل..
غمضت عينها وطاحت ع السرير .. حطت ايدها ع راسها كأنه شي متعوده عليه ..
تعودت ع الصداع لو أنه ما قام يزورها الا من فتره لفتره ..
خاطبت عمرها أنها أقوى من جي .. صارتلها أمور وايده خلال ها الاشهر خلتها تكون أقوى.. تتغلب على آلام الصداع وآلام الذكريات .. الا ها الايد الي ما لقتلها تفسير.. رصت بعيونها وهي تتخيل ها الايد .. حطت ايدها على ويها تخبي النور اللي تتهيئ انه سطع عليها ودمعت عينها .. قامت تتأوه ع الخفيف .. ويلست وهي تحاول انه تتغلب ع الصداع وما يهزمها ..
صوت فمخيلتها قام يهمس .. تعرفه زين .. ميزته ..
بطلت عينها بسرعه وشافت كل شي هادي فحجرتها .. كل شي ساكن وفمكانه .. قامت من على الشبريه وسارت صوب الدريشه .. وتمت تتأمل بيت عمتها .. مشاعر فداخلها متضاربه والآم فراسها ..
الملجه تحدد موعدها .. والمواجهه يايه لا مفر منها .. لكن هي شو بيكون حالها فذاك الوقت ..
مسحت دمعتها اللي نزلت غصب عنها وعاهدت عمرها انها من اليوم ماتكون بها الضعف اللي يخلي ألمها يتغلب عليها..
طلعت من الحجره تبى تبدد احاسيسها المتداخله وسارت الصاله.. ها المره حصلت مي يالسه تشوف التلفزيون ..

مي: ريموه قومي ننزل نسوي اكياس الليله .. الحين 12 الساعه واليهال من الظهر يهجمون
ريم اطالعتها وتحس انها تبى أي شي يغير تعكيرة مزاجها..
ريم: يلا انزين خلينا ننزل
مي: اوكي .. بشوف مهوه ومهره

وطت مي الريموت من ايدها وركضت لحجرة التوم تزقرهن .. ونزلن كلهن الصاله وشافن يدتهن هناك ويا نجمه يرتبن الاكياس .. ويلسن وياهن يساعدنهن ..


****

الظهر كانت بدريه طايحه في سريرها .. تحس بأرق وتعب ها الأيام وماتعرف شو سببها .. ماكان الها خاطر لشي..
اندق عليها الباب وانفتح ع طول .. كانت ام ريلها داشه تتطمن عليها ..تقربت من سريرها ويلست ع طرفه ..

ام عدنان: بدريه .. امي شو يعورج ؟
بدريه تحركت وصدت صوب عمتها واعتدلت في يلستها: تعبانه عموه راسي يعورني
ام عدنان: مايتي تاكلين ويانا اميه عشان اعطيج بندول
بدريه: لا ما اشتهي بطني يعورني
ام عدنان: من شو يعورج ؟
بدريه: ماعرف عموه
ام عدنان: ويهج مصفر وحالج مب عايبني موول .. مايكون انتي حامل وماتدرين بعمرج ؟

بدريه فتحت عيونها على آخرها وبدت دقات قلبها تزيد.. معقوله تكون هذي اعراض حمل .. وطت راسها وهي مرتبكه وتفكر
ام عدنان: ههه بلاج امي استحيتي .. جان هالشي طلع صدق عليه نذر لاذبج الذبايح واجسمها ع الفريج .. يالله جانه نحن من سنتين نتريا هالحمال ..

بدريه بدت ايدها تتنافض وتحس بتعب فظيع .. شو بتسوي لو هالشي صار صدق؟
ام عدنان: انا بقوم اسويلج شوربه .. اشربي لو طشونه عشان تخفين وترومين تسيرين ويايه العياده خلاف
بدريه: عياده ؟ ليش؟
ام عدنان: عشان نتاكد انه اللي فيج حمل
بدريه: ها لا عموه مب حمل ماظن ..
ام عدنان: لا لا انا بوديج وبتاكد وان شا الله بنتصل بعدنان وهوفالجزيره واكيد انه بيفرح ..
بدريه: عموه!
ام عدنان:لا عموه ولاغيره انتي طيحي ارتاحي فديتج..وانا بقوم بييبلج شوربه وشي خفيف تاكلينه والعصر ان شا الله بنطلع رباعه صوب العياده ..

طلعت ام عدنان ويلست بدريه مكانها تفكر في حالها شو هاللي صارلها .. الأعراض الي اتيها خلال ها الأيام كانت تخوفها وايد .. ومب لاقيه الها غير تفسير واحد .. والحين عمتها يتها تأكدلها ها الشي .. خافت وايد .. ماقدرت تركز فأي شي.. تتمنى بس ما تكون ها الافتراضات صحيحه ..

****

العصر كانوا البنات متيمعات ويا يدتهن فالمنامه يشاركونها فرحة الليله لأول مره وصينيه الحلويات والاكياس جدامهم .. يوزعون منها لليهال اللي ايونهم ... وياكلون منها في نفس الوقت .. وكانت معاهم ام خالد يارتهم وصديقه ام سيف..
ام خالد تاكل من اللوز وتسولف وياهم ..

ام خالد: وريم طالعه تشبه منو ؟ انا اشوفها تشبهكم يا ام سيف
ام سيف: لا لا ريم تشبه امها ويدتها سلامه اكثر..
ام خالد: عيل ماخذه المتن منج
ساره : وين ياها ريموه متينه
ام خالد : هب متينه يعني لكن مغززه و ويها مدور

كانت ريم قابظه الحصاه وتضرب فيها اللوز عشان تكسره وتطالع ام خالد وهي محتره من رمستها .. ومن غير ما تنتبه ضربت الحصاه صبعها بقوو وصرخت..

ريم: آآآآآآآآآآآآآآي
مي: حشى صاروخ ارض جوو هذا

ام سيف قرصت مي اللي يالسه عدالها عسب تسكت
ام سيف:بسم الله عليج امايه حطي ايديج في الغسول البارد اكوه..
ريم: هب بارد ها .. بقوم اييبلي ثلج مافيني يتورم عليه
ام خالد: هي عاد وراها ملجه .. تلاحقي عمرج اميه..

مي وساره كانن يطالعن ام خالد ويتاهمسن ويضحكن

ساره: سيري ورا ريموه شوفيها عن تدربح خاري
مي: خخخ وياويهج .. شوفي امايه كيف تطالعنا بنظرات حست ابنا شو نرمس
ساره: والله صدق عليها صوااريخ ..

وعلى سوالفهم دخلت سياره البيت .. ونزلوا الكل منها .. كانت مريم يايه ويا بناتها طلعتلهم مي من المنامه عسب اييون عندهم ..
وبعد السلام واخذ الاخبار .. يلسن الحريم يتقهوين .. ومها ومهره متكفلات فتوزيع اكياس الليله لليهال اللي اييونهم ومتيلسات عند دري المنامه .. اما البنات فيالسات مجابلات اكياس الليله ويقرضن منه ويسولفن ..

لطيفه: وينها ريموه؟
ساره اطالعت مي وضحكت..
مي: سارت ادورها ثلج تحطه ع صبعها
اسما: ليش بلاها..
مها: ضربت صبعها بالحصاه وهي تكسر اللوز
لطيفه: حليلها
اسما: وانتن شحقه تضحكن!!
مي: لا ماشي ماشي..
لطيفه: ساروه يبتوا فساتينكم؟
ساره: باجر بيخلصون تعديلهن
اسما: ليش شو عدلوا فيهن؟؟
مي: عريانات تراهن الشال اللي وياهن عدلو فيه وخلوه ايد للفستان
اسما: اها
ساره: وانتو؟
لطيفه: اليوم الصبح يبناهن..حلو تفصيلهن
ساره: هي زين ..
مي: احس بحماس خخخ ماشي باقي عن الملجه غير اسبوع
اسما: عاد اول عرس فبيتنا وبيتكم .. ونااسه

وهاذي كانت سوالفهن البنات لين ما يت ريم .. وبدن يرمسن عن تجهيزات البيت كيف بتكون والترتيب كيف تباه ريم ..

****

المغرب طلعت بدريه من العياده ويا عمتها وهي متغشيه ودموعها تنزل من تحت غشوتها .. ونفس الشي عمتها .. لكن الفرق بينهم كبير .. عمتها تصيح من الفرحه بالحفيد المنتظر .. اما بدريه تصيح من الضيج والخوف اللي فيها .. كيف صار هالشي.. كيف يفرحون ويستانسون وهي تاكل بعمرها من القهر ..
كيف يفرحون بها الحفيد وهي على قناعه انه ها الشي مب فصالحهم..

ام عدنان: بدريه بلاج امايه صاخه اكيد انج مب مصدقه شراتي
بدريه مانتبهت لكلام عمتها وكانت سرحانه ..
ام عدنان شلت تلفونها واتصلت بولدها وبدت ترمسه وتزف له خبر حمل بدريه..

ام عدنان: بدريه اميه هذا عدنان يبى يكلمج
انتبهت بدريه لعمتها .. زادت دقات قلبها وخافت اكثر ..
بدريه بصوت متقطع: الوه
عدنان: هلا يا احلى زوجه في الدنيا .. بدور صدق اللي تقوله امي؟ انتي حامل حبيبتي
بدريه وهي متأسفه على ها الشي: هيه
عدنان: ليش تقولينها وانتي زعلانه ؟ والا هالزعل عشان انا محد وقت هالخبر المفرح ..
بدريه: هيه
عدنان: خلاص ولا يهمج نهايه الاسبوع الياي برجع صوبكم .. وانتي تحملي على عمرج وعن الحركه الزايده .. ولاتطلعين وايد .. ارتاحي وكل شي تبينه قولي لامي بتيبه لج
بدريه: ان شاء الله
عدنان: بكلمكم انا عقب .. وكلي زين ما اوصيج .. مع السلامه
بدريه: مع السلامه ..

سكرت عنه بدريه و هيه يأسانه ..وصلوا البيت ونزلت عمتها من السياره..أما بدريه كانت تحس بعتب شديد كانها شايله جبال على جتوفها ماتقدر تنزل من السياره الا بصعوبه .. ظايجه عليها الدنيا .. لكن لازم تتصرف لازم تخبر سلطان ..
أول ما نزلت على طول صعدت حجرتها.. الوضع ماينسكت عنه .. وماتقدر تتحمل مسؤوليه هالشي بروحها..


فتح سلطان باب سيارته ولقى تلفونه يرن .. كانت المتصله بدريه ..

سلطان: الوووه
بدريه: انته وينك انا اتصل من الصبح ماترد
سلطان: بلاج محتشره انتي ؟ كنت في الصاله العب حديد
بدريه: اوكي انته وين احين ؟
سلطان: اهنه في السياره بعدني ماتحركت
بدريه:سلطان بقولك شي
سلطان: شو
بدريه: انا حامل ياسلطان
سلطان بتعجب: حامل ؟! زين مبروك
بدريه: شو مبروك ؟ سلطان انا حامل منك
سلطان وهو مصدوم: شو حامل منك بعد هاي ؟ يايه تبلين عليه انتي!
بدريه: والله منك يا سلطان
سلطان: لاتحلفين يا بنت الحلال .. سويتيها ورديتيها ع راسي انا
بدريه: انته اللي سويتها وتبريت
سلطان: شو تبريت .. حرمه معرسه تراج
بدريه: سلطان انا على حسابي حملت منك انته لانه عدنان كان مسافر قبل باسبوع
سلطان: لاحسابات ولا غيره .. انتي شعرفج
بدريه: سلطان قلتلك انا اعرف .. وانته تدري انه ريلي عنده ضعف ولو اني بحمل جاني حملت منه من سنتين .. شمعنى يعني يوم ظهرت وياك حملت
سلطان: ربج رايد عاد شو اسوي انا لاتعقينها ع راسي
بدريه: سلطااااااااان سويت فعايلك وتبريت مني
سلطان: جان خذتي حذرج يوم انج كنتي خايفه .. وبعدين قلتلج هاللي في بطنج هب مني ولاتتبلين عليه زياده .. انا الغلطان اللي عاطنج ويه
بدريه وهي تصيح: سلطان
سلطان: قولي لريلج انه ربج كتب وصار هالياهل منه وخلصت السالفه .. لاتصدعيبي يا بدور.. و تصرفي بروحج وحلي مشاكلج ومصايبج وانتي بعيد عني
بدريه: حرام عليك يا سلطان .. هذاك شو ذنبه اقص عليه و اللي في بطني شو ذنبه يربيه واحد غير ابوه
سلطان: وان شا الله تبيني اربيلج اياه ؟! واحين افتكرتي في ريلج شو ذنبه ؟ ذنبه انه خذ وحده شراتج خاينه ولاتتحمل المسؤوليه الزوجيه ..
بدريه وهي تزيد فالصياح وصوتها يقطع القلب: خذت اللي تباه وقلت عني خاينه ؟
سلطان: ماخذت شي ولا ابا منج شي .. ولاتزيدين الرمسه ويايه وتسويلي ها الافلام الهنديه .. يالله باي

سكر سلطان تلفونه وهو متظايج من اللي صار لكنه بكل قوه حاول يسكر الموضوع ويطلع منه.. اما بدريه الله يعينها ع اللي بيصير ..


**********************
(الأربعا) 6اكتوبر 2004
**********************

قامت ساره من رقادها وهي متضيجه من الحشره والصدعه اللي فالبيت .. سيايير داخله طالعه .. هرنات .. ومي مسوتلها ازعاج فالحجره وهي تناقز وتسوي تمارينها الصباحيه .. تمت طايحه وهي توها تستوعب انها فالبيت ..

ساره: ها الحشره كله والهرنات وانا فالرقاد عبالي انها اصوات الباصات وانه اليوم النزله ..
مي: هههههههههه مالت عليج .. والله راحه يوم تنزلين بسياره ..
ساره: حراام طوفنا علينا ها الثلاثا ..
مي: شوف شو حااتت ..قومي بسج منخمده ها الكثر .. بتي 12 الحين ..
ساره: بس فكينا..
مي: واحد ثنين واحد ثنين .. والله الرياضه حلوه .. نشاط ..

وبعد ما خلصت مي تمارينها الخفيفه .. خذت الروب من على الشماعه ودشت الحمام تتسبح .. وساره قامت من على الشبريه وهي متضايجه من مي ومن حشرتها .. وايقت فالصاله شافت ريم واقفه تستعد انها تطلع ..

ساره: وين سايره؟
ريم: وعيتي انتي.. بسير تحت بشوف شو يسوون
ساره: هي زين ..

طلعت ريم من الجناح ومرت ع جناح قوم ابوها تشوف ناعمه رمست الحنايه ولا لا.. ماحصلت ناعمه وخمنت انها تحت ..
نزلت ريم وهي تشوف البيت كيف معدل .. ووقفت عند باب الفله وشافت ياييبن الطاولات ويرتبونها فالحوي .. رجعت الصاله .. وماحصلت حد .. يلست ويت فبالها امها .. قبضت التيلفون واتصلت بها ..

عليا: هلا بالعروس
ريم: اهلين بـ ام العروس
عليا: فديتج والله .. شهباتج اليوم
ريم: مم يعني .. عادي
عليا: ماعليه .. بتحسين بالعادي باجر
ريم: هههههه حليلي.. اميه عاد مب تخونين فيني وما اتين
عليا: لا فديتج كلنا بني ان شاء الله.. بس انتي الله الله فعمرج باجر ما اوصيج قري على عمرج قبل ما تظهرين ع الحريم .. ولا تخافين مول.. وها الصداع يا ويله ان ياج
ريم: ههههههه لا يهبي .. خلاص نقاومه الحينه
عليا: هي زين .. الله يهنيج يا امايه ويبارك لج فنايف ان شاء الله
ريم: امين ان شاء الله
عليا: وين الناس عيل عنج
ريم: مادري يا اميه .. لاهين شكلهم .. الحين ابا نعوم ماعرفها وين سارت
عليا: ليش سو تبيبها
ريم: رقم الحنايه عندها ابا اشوفها رمستها ولا .. ماعرف متى بتي
عليا: هي .. قومي عيل فديتج رمسي حرمة ابوج.. الحنايه ما بتلحق عقب .. كم وحده انتن ماشالله ..
ريم: بدقلها ع تيلفونها بشوفها
عليا: خلاص عيل فديتج ..
ريم: سلمي ع الاهل
عليا: ان شاء الله يوصل فمان الله..

سكرت ريم عن امها واتصلت بناعمه تشوفها وين هيه .. وطلعت ناعمه طالعه ادل الحنايه ع بيتهم .. سكرت عنها ريم وسارت فوق تشوف خواتها اذ قامن ولا عسب يكونن جاهزات اول ماتي الحنايه وما يتأخرون .. وبما انه خواتها بيبدون قبلها في الحنا رجعت مره ثانيه تحت تشوف يدتها ولقتها يالسه في المطبخ التحضيري اللي داخل الفله ..
ريم: امايه انتي اهنه ؟
ام سيف: ها امي .. يالسه اتريا نجموه من الصبح مادريبها شو تعابل برع
ريم: شو تبينها ؟
ام سيف: اباها تحنيلي راسي
ريم: انا بحنيلج اياه
ام سيف: لا لالاتحنين ولا تعنين انتي عرووس بتوصخين ايديج
ريم: امايه عنبو مابحني بديه انا بحنيلج اياه بالقفاز
ام سيف: لا تعبلين عمرج خليه نجموه بتي
ريم: عاد انا في خاطريه انا احنيه بترديني ؟ اعرف احني لاتحاتين متعوده احني امايه سلامه
ام سيف: انزين برايج حنيلي اياه
لبست ريم القفازات وهي مستانسه وبدت تحني شعر يدتها ..
ام سيف: تشوفينه هذا شعري .. يوم ياخذني يدج .. حرمتين يسحولي اياه من طوله والا انا بروحي ماروم له لكن طاح كله ماتم منه شي
ريم: خساره ماكانت عندكم صور والا جان شفناه احين .. عيل انا شعري الا شراتج
ام سيف: لا ولا طشه شعرج هالنتفه بعد تسمينه شعر
ريم: حرام عليج امايه شعري طويل انا .. بعدني ارحم عن ميوه وساروه
ام سيف: هذيلاك عاد خليهن في صوب.. بنقول ساروه زوين طوله الحين نص ظهرها الا ميوه شعر صبيان .. ها اتحملي عن يوصل الحنا ع يبهتي ويوصخها
ريم: لا لا اشوفه لاتخافين ..

ويلست ريم تحني شعر يدتها وتسولف وياها سوالف امتزجت بين ماضي يدتها وحاظر البنات ..

****

دخل نايف البيت الظهر ويا امه راجعين من السوق و وياهم عمار .. اما اسما ولطيفه كانن يالسات في البيت ..

عمار: اخ يا راسي هلكنا هلكنا
نايف: عدال عاد ماجنه انا اللي اسوق
يلست مريم ع الغنفه وفصخت شيلتها : صبيلي قهوه اسموه راسي يعورني
لطيفه: بسم الله بلاكم ؟
عمار: هلكتنا امج ماخلينا محل مواعين ماسرناله .. الا هالدله مب زينه لا هذي مب غاويه .. لا هذي تبرد .. لا ماشي من هذي درزن ابا كلهم شكل واحد .. ذبحتناااا
مريم: اوص انته مسود الويه .. يزاتي ابالكم الزين والعدال
نايف: فديتج والله يا ام نايف ماتقصرين انتي الخير والبركه
اسما: انزين واحين خذتوا الدلال ؟
عمار: هيه خذناهن
مريم: وييييه اندوج
اسما: شووووو
مريم: ماخذت مداخن
عمار : السموحه انا ساير حجرتي
نايف: شو مداخنه امايه بعد ؟
مريم: مداخن حق الدخون بعد شووو
لطيفه: خذيهن طقم كامل ويا العطور بتلقينهن
مريم: قومي البسي عباتج بنسير نطالعهن
نايف: وين احين القايله ؟
مريم: تبى الحين قوم ماتبى هب لازم نسير.. ملجتي والا ملجتك
نايف: انزين ماقلت شي انا لكن ارتاحي امايه وتغدي وبنظهر خلاف بروحه راسج يعورج ..
مريم: ماعليه .. بقوم بسير اصلي انا وبطيح شوي لكن لاتخلوني وايد تعالوا وعوني يالله يمدينا نخلص
نايف: اسميها سالفه
لطيفه: منك انته مستعيل ماعطيتنا وقت نسوي شي لو عندنا وقت مابننكظ جيه
نايف: لاحول انزين خلاص احين حصل خير وتراني وياكم احين افازعكم وحاول ما اقصر بعد شو..
مريم: قصورك بعد تقصر في عرسك
اسما: افا هزأوا المعرس
نايف: تأبى المرؤه ان يتهزأ المعرس ولكن بعتبرها مداعبات خفيفه من الوالده قبل ماستوي ريال ع ذمه حرمه
لطيفه: ههههه احين الحرمه ع ذمه الريال هب الريال ع ذمه الحرمه
نايف: كله واحد
مريم: الله يوفقكم يالله بقوم انا
نايف: لطوف وعيني انا بعد بسير ارتاح
لطيفه: اوكي

وطلع نايف حجرته .. مرتاح ع الاخر ها الايام وخصوصا وهم يراكضون ويجهزون للملجه .. يحس انه ملك الدنيا كلها .. ووده بسرعه ايي يوم الملجه عسب يرتاح من همه وياخذ ويعطي ويا ريم ..

****

كانت نايمه ع سريرها وقت مانفتح الباب .. حست بالنور اللي داخل من الباب منعكس ع الجدار اللي مجابلنها وصاحب النور انعكاس ظل ..
بحركه بطيئه التفتت لوراها ولقته يتقرب منها .. لا اراديا ارتفعت من طيحتها وبدت علامات الخوف تجتاح ملامحها ..
تقرب منها ويلس حذالها ولما قرب ايده من راسها حست بالخوف يسري في اطرافها

عدنان: هلا حبيبتي
بدريه مب قادره ترفع نظرها وتركزه في زوجها : اهلين الحمدلله ع السلامه
عدنان: الله يسلمج .. وعدتج اكون موجود نهايه هالاسبوع وييت
بدريه وهي مازلت تتحاشى نظرات ريلها: حياك الله ماكنت اعرف انك بتوصل الحين
عدنان: من جيه بعدج راقده؟ ماعليه عاذرنج اهم شي راحتج وراحت ولدي
بدريه حطت ايدها ع بطنها وبدون سابق انذار بدت دموعها تتخاطر ..
عدنان: افا ليش تصيحين ؟ ييتي ظايقتج
بدريه مب عارفه شو تقوله .. يحز في خاطرها وايد اللي تسويه لكن ماباليد حيله ..
شي مؤلم تشوف ريلها فرحان بولده اللي في بطنها ورغم هذا مب ولده ..
لكن لازم تحاول تتاقلم عشان تستمر حياتها بدون فضايح او مشاكل ..
عدنان: بدريه
بدريه رجعت لارض الواقع وحاولت ترجع بدريه الاوليه اللي تقدر تتصنع في تعاملها: لا الغالي انا اصيح من فرحتي بشوفتك وفرحتي بولدنا ..
عدنان ابتسم لها وتقرب منها .. ولازم على بدريه من اليوم ورايح ترسخ في بالها قبل بال غيرها انه اللي بطنها ولد عدنــــــــــــان ..

****

فليل ع الساعة 11 .. كانوا عيال سيف كلهم يالسين فصالة البنات فوق من عقب ما رقدوا الكبار .. حتى عفرا اللي بعدها ما تعودت فها الأشهر على خواتها .. قامت وايد خلال ها الايام تكثر من يلساتها وياهم ..

ريم: يلا عاد ابا اسير ارقد .. مافيني باجر ويهي يتم مصفع.. ابا اعق ها الحنا تعالن ساعدني
مي: لا بعده ريموه ما جف تمي ..
ساره: اللي فريولج بعده لين .. لاتستعيلين
ريم: اف مليت ..
جاسم وهو يشوف الحنا: افف بااجر .. ريموه بتكسر كل حد
ريم: ههههههه ليش تراني ضعفت شو اكسرهم بعد
جاسم: لا لا بتكسرينهم بحلاتج..
مي:الله الله .. آآآويلي ويييلااه عليك يا جاسم
ساره: يا الهرم يا جسوم وجي انا ما بكسر
مايد: الحين عاد جسوم بيساحل كل وحده منكن ههههه
جاسم: جب جب انته جي مصلحجي تحراني
مها: ريموه كيف بيكون شعورج باجر يوم بيدخل نايف

ريم اطالعت مها وابتسمت ع رمستها .. ماردت عليها لانها هي بروحها ماتعرف شو بيكون موقفها ها الوقت .. حست بقشعريره وهي تتخيل بس كيف بيشوفها نايف وهي بكامل زينتها باجر ..

ساره: اوه ستحت ريموه ما بتجاوبكم
مي: قومي قومي ساروه بنمثل دور ريم ونايف
ريم: ايه اصطلبن
مي: يلا ساروه انا عاد نايف .. وانتي يلسي ع الغنفه اونج ريم ..
مهره: يلا ونحن يهال العرس ههههه

ارتبشوا الكل وريم مفتشله ع الاخر ..

مي: جسوم عطني وحده من غترك بسرعه
ساره: انا بسير شوي ارتب عمري واتعدل ..

سار جاسم ويابلها غتره شال لونها بيج .. شافت الغتره واطالعت جاسم ومايد .. بنية مايد اكبر من جاسم .. فيه طول ماشالله وعرض شوي .. وقفت حذاله مي وشافت انها اطول عنه بشوي .. وسحبته وياها برع جناحهم وساروا حجرة مايد ..

مي: ميود طلعلي وحده من كناديرك
مايد: ليش؟
مي: تراني نايف بعد شو ..
مايد: هههههه الله يغشج .. انزين

فتح مايد الكبت وطلعلها كندوره بيج تناسب الغتره اللي يابها جاسم .. وطلعت مايد من الحجره وبدلت .. وقفت عند التسريحه وردت شعرها القصير على ورا وتغترت . طلعت شوي من شعرها ع الطرف وتمت تتطالع عمرها وهي تضحك..

طلعت من الحجره وشافت مايد فويها .. اللي تم مبطل عيونه وفاج حلجه ..

مايد: الله يغربلج طلعتي ولد حلوو
مي: هههههه هي شرااايك
مايد: لفي لفي .. ييه الشعر لين تحت الرقبه ..
مي: تروم انته .. يلا بسير اشوف عروسي
مايد: بس الكندوره شوي قصيره
مي: ماعليه برايها..

دخل مايد جناح البنات وتم يزعج ويقولهم المعرس بيدش .. ودشت عاد مي وهي موخيه براسها .. ويوم رفعته شافت ساروه يالسه ع وحده من الغنفات ولابسه فستان وناشله شعرها ومتمكيجه .. ضحكت مي وخواتها منبهرات فيها ..

مي: الله يسقمج ما صدقت خبر وسارت تتعدل
ساره: يلا انتي تعالي انزين .. ابا اشووفج
مي: وابووك يا الابو .. خل الحق عيل الحرمه تزقرني

الكل فطس من الضحك عليهم .. وريم من كثر الحركه وهي تضحك خربت حنى ريولها وتمن مها ومهره ينازعنها ويعدلنه .. جاسم ومايد يالسين ع الطرف ويشوفون مي شو تسوي .. صدق اتقنت الدور .. وعفرا تطالعهم وهي مستغربه.. وتقول فخاطرها شو ها الميانين..
ماعليه ماتنلام ما عاشرتهم..

مهره: يعلج يا ميوه .. مستويه حلوه .. اول مره اكتشف جمالج
مها: هي ما بنكتشفه الا لانها لاعبه دور الولد الحين هههه

تجدمت مي.. وساره وقفت عاد تتريا المعرس لين يوصل.. ويوم جابلتها مي.. مدت ايدها بتسلم
ساره: شو واحد من الشباب جدامج تسلمين عليه بالايد ..
سحبت ساره مي تخليها توايها وتبوسها ع راسها..

ريم: ايه عاد ساروه مصختيها.. يوم بتقلديني قلديني زين
مي: هههههه هاي مب شايفه خير خوفاتي عقب تسوي جي يوم بتعرس
ساره: جب جب يلا .. يلسي حذالي ..

ويلسن ساره ومي حذال بعض .. وتمن يسون حركات .. ساره كله تقرب من مي ومي تسوي عمرها طفرانه وتلز عنها .. ساره تحط ايدها ع ايد مي ومي تسحب ايدها .. وتم ها حالهم .. وكل حد يصرخ من صوب ويضحك من صوب .. ماحسوا بالوقت حتى .. لين شافت ريم انه حناها يبس وتقدر انها تبطله .. وتمن مها ومهره يساعدنها ..

************************
(الخميس) 7 اكتوبر 2004
************************

الساعه 12 الظهر نشت ريم على دق باب حجرتها .. تمت طايحه ع الشبريه ومالها خاطر تقوم .. رفعت ايدها تبى تعدل شعرها وانتبهت للحنى اللي فايدها .. وتمت تتأمله .. وسمعت بعدها الدق مره ثانيه ..

قالت بكسل: منووه

ردت عليها اللي كانت ادق الباب وكانت لطيفه بنت عمتها .. ابتسمت ريم يوم سمعت حسها ..
ريم: دخلي الباب مفتوح ..

دشت لطيفه وشافت ريم بعدها طايحه..

ريم: ماشالله ييتوا !
لطيفه:انتي بعدج راقده ريموه ؟ قومي راعيه الصالون بتي احين عنبو ماجنه عندكم ملجه كلكن مرقدات
ريم وهي تصلب عمرها: تعب والله امس ما قرينا .. من ترتيبات برع وديكورات للحنايه لليلسه مادري كم ساعه .. وغير ها سهرونا خواني ..
لطيفه: يحيكم عاد مرتبشين..
ريم: هي يبوج .. خبلوبي امس ..
لطيفه: والحنى شخباره
ريم: شو تشوفينه؟
لطيفه : وايد حلو ماشا الله .. نقشاته وايد حلوه .. والبيت بعد وايد مرتب وحلو
ريم: صدق؟
لطيفه: هيه ..يالله قومي عشان راعيه الصالون بتوصل احين بتبدابج مافينا نتأخر..
ريم: اوكي خواتي نشن ؟
لطيفه: اسوم سارت توعيهم ..
ريم: عموه تحت ؟
لطيفه: لا بتي خلاف يالسه تزهب طوس الحلوى .. وماعرف شو بعد
ريم: هيه فديتها اوكي بقوم اتسبح انا وبييكم ..
لطيفه : اوكي .. يالله اترياج بيلس فالصاله ..

طلعت لطيفه عن ريم .. وقامت ريم تتسبح وطلعت لخواتها لقت عافسين الصاله كلها عشان راعيه الصالون وصلت من دبي .. بدت في ريم .. سشورت لها شعرها ولفته وخلته .. وبعدين بدوا الباقين يتعدلون .. خلصوا كلهم ع الساعه 6 المغرب..

بعد صلاه المغرب وصلوا الريايل وتيمعوا فالخيمه اللي كانت مسوايه جدام البيت..واغلب اللي وصلوا خوال ريم وعيال خالها .. الاهل بس يعني ..
في هالوقت وصل المليج .. وريم كانت يالسه في الصاله اللي فوق ويا بنات عمتها بس اما اهل امها محد منهم وصل ..
انفتح باب الصاله وكان جاسم داخل وهو كاشخ ..
جاسم: هود يابنات
لطيفه: شوفن اخوكن انتن .. دخل وعقب هود
جاسم: براااايه .. المهم ترا ابويه وصل
ريم: انزين
جاسم: شو انزين قومي بتوقعين
لطيفه: وين تقوم خل خالي يدخل عادي
جاسم: انزين تلحفوا
ساره : ايييييييييه شو يتلحفون هذا خالهم
جاسم: اوف شدارني انا سوي طااف.. ابوووويه تعال سويت لك درب
دخل ابوهم سيف وسلم على ريم
سيف: ريم تعالي عند الباب بيسالج المليج
ريم: ليش يسال مايستوي اوكلك
سيف: رمسناه ماطاع يالله تعالي عشان الشهود بعد يسمعونج
ريم: منو الشهود؟
سيف: خالج محمد وبطي عم نايف
ريم : انزين شو اقول
سيف: بلاج زايغه بيقولج موافقه جان موافقه قولي هيه
مي: قصورها تقول لا بعد وهي ميلسه بالفستان والناس تحت
سيف ظحك ع تعليق بنته
ريم وهي تلعب بخاتمها ومتوتره: انزين
ساره: ريموه جان ماترومين تقولي موافقه انا بقول
سيف: لا مايستوي قري انتي محلج ..
طلع سيف برع وقرب بالريايل صوب الباب وريم منخشه ورا باب الصاله ..
المليج: ريم تقبلين بنايف زوج لج ؟
ريم: هيه نعم
المليج: ماعندج أي شروط
ريم: لا ماعندي
المليج: خلاص مبروك
دخل ابوهم سيف وفي ايده الدفتر ومي بعدعا قابظه كميرا الفيديو تصور من اول مادخل ابوها لين يلس حذال ريم ..
ساره: مقواج ياريموه وتقولين خايفه .. قابظه للمليج هيه نعم
ريم: عيل شو اقول
سيف: ماعليج منها .. وقعي اهنه وين مكتوب الزوجه
ريم كانت ايدها تتنافض .. وتوها بتوقع الا صرخت مي
مي: لاااااا صبري
سيف: شوو
مي: صبروا خلوني اصور الورقه عدل كامله واصورها يوم توقع
سيف: قفزتينا حسبي الله ونعم الوكيل
وقفت مي ع راس ريم وهي توقع وبعد ماخلصت توقيع حصلت على طول قرصه على ركبها من ساره
ريم: ايييي
ساره: اسفه بس عشان اعرس عقبج على طول
اضحكت ريم ع تعليق ساره..
سيف حب بنته ع راسها وزغرطت لطيفه وقاموا البنات يسلمون على ريم وطلع ابوهم ونزل تحت ..
وشغلوا البنات الاغاني وارتبشوا .. واهنه يوهم بنات خالهم محمد وعزه بنت خالهم.. وتيمعوا البنات فوووق والامهات تحت ..
ويت عقب المصوره واستلموا ريم يصورونها .. وكل شوي وحده من خواتها تصور وياها وبنات عمتها وبنات محمد .. وعقب خلوها ونزلوا عنها تحت يشوفون الربشه كيف.. وبعد اذان العشا بدوا الحريم يتيمعون اكثر .. كل اهلهم وصلوا الا امهم .. بعدها مايت ..

كانت ام سيف لابسه مخوره زيتيه ومطرزه وفوقها عباتها وتحوط بين الطاولات ومعاها بنات ولدها تراويهم ربعها اللي ماشافوهم وتعرفهم عليهن .. وفرحتها ماتوسع بلد ..
ساره: اوهووووو ميوه
مي: شو ؟
ساره: هاكيه الصاروخ
مي: ام خالد ؟
ساره: هيه
مي: اقري على عمرج
ساره :هههه انزين طوفي

سلموا البنات على الحريم ويلسوا شوي ويا اهل امهم ورجعوا فووق عند اختهم وكانوا يتنقلون بين فوق وتحت ..
صارت الساعه 9 وكان لازم ريم تنزل الحين ..

مريم : يالله حبيبتي قومي بتنزلين على الحريم عشان يتعشون
ريم: مب نازله قبل ماتوصل اميه
مريم: وينها هيه ؟
ريم: الحين يايه في الدرب
مريم: ليش متاخره هي .. ام العروس يحتاي اول وحده تكون موجوده
ريم: يوم بيكون بيتها يا عموه هب بيت طليقها

مريم سكتت ماعرفت شو تقول ويلسوا يتريون عليا ..
دخلت عليا بيت طلقيها سيف اللي رفضت فالبدايه انها تحضر ها الملجه ورفضت تدخل ها البيت مره ثانيه .. لكن يية ام سيف كان الها الأثر الايجابي فنفس عليا وكل اهلها .. وكلهم ساروا وهم خواطرهم طيبه ..
واستقبلتها شيخه اختها عند الباب .. مشت ولقت ناعمه وام سيف يالسين على كراسي في الجهه اليمنى عند الباب .. والجهه اليسرى عليها ميره وامها .. اما فجر وعبير فضلوا يكونون فالبيت وما ايون الملجه والكل قدر تصرفهم لانه عبير بعدها فقلبها حزن على وفاة ابوها اللي كانت عايشه على امل انها تشوفه ..

تقربت عليا من ام سيف وسلمت عليها .. ام سيف اول ماشافتها تدخل البيت وهي عينها عليها .. لين يت بنفسها عليا وتقربت صوب ام سيف وسلمت عليها..
عليا: اشحالج ام سيف؟
ام سيف: الحمدلله بخير ونعمه.. نورتي يا ام جاسم..
عليا ابتسمتلها: بالبركه عليج ملجه عيالج ريم ونايف .. وربي يبارك لهم ان شاء الله
ام سيف وهي مغتبنه: يبارج في عمرج يالغاليه .. سيري لبنتج فووق تترياج
عليا : ان شاء الله

سلمت عليا على ناعمه بشكل سطحي وتوجهت مع اختها شيخه فوق عند ريم وباقي البنات ..
اول مافتحت باب الصاله الكل انتبه لكن اشرت لهم ماينبهون ريم اللي عاطتنها الظهر ويالسه على الكرسي ..
وخت عليا وحبت بنتها ع راسها .. التفتت ريم ولقت امها وراها ووقفت الها على طول.. سلمت عليها عليا وغصبا عنها صاحت .. اما ريم ميوده عمرها وتقاوم دموعها اللي تيمعت فعيونها..
لطيفه : ريمان لاتصيحين بيخترب الميكب
ريم وهي تحاول تيود عمرها: انزين ..
يلست امها عدالها وتيمعوا البنات وتصوروا كلهم صوره جماعيه .. عليا وبناتها ..
الحين كان لازم تنزل ريم .. نزلوا كل البنات تحت .. وتمت ريم وامها فوووق ..
ريم: امايه بطني يعورني
عليا: يالله قوي عمرج وافردي ظهرج وارفعي راسج ماباج توطينه وخلي الدنيا كلها تشوف بنت عليا .. فديتج والله ياريم كبرتي وغديتي عروس ..
ابتسمت ريم
ريم: امايه تمي ويايه راويني وين اسير ..
عليا : ان شاالله .. بنزل جدامج وبترياج عن حافه الدري انزين ..
ريم: انزين ..

بدت موسيقى الزفه تدق لحنها الهادي في البدايه .. وريم نزلت من فوق بفستانها الليموني .. كان شكلها وايد متغير خصوصا انها مب متعوده تحط مكياج ..
في ايدها مسكتها الخفيفه اللي كانت على شكل طوق حوالين ايدها ونازله منها سلسلتين ورود .. وشعرها كان مرفوع ونازل شوي منه ملولو ..
نزلت شوي شوي على الدري وتحاول تركز نظرها على امها عشان تقدر تكمل مشيها .. وتعرف وين تسير ..
ارتفعت الزغاريط اول مانزلت وكانن اسما وساره هن اللي مرتبشات ..

نزلت ريم تمشي في الصاله وطلعت برع باب الفله .. وقفت شوي وهي رافعه راسها تشوف الناس وتحس نفسها مرتبكه وتشوف امها وين تاشرلها عشان تمشي .. بدت تمشي بين الطاوله وتتبع امها بخطوات متهاونه ومتزنه ..
مها يلست على وحده من الطاولات وعيونها تدمع .. شافتها عزه وسارت صوبها
عزه: مها شو فيج ؟
مها: ماشي بس غامظتني ريمان
عزه: ليش؟
مها: ماعرف
عزه: حبيبتي هي مابتروح بعيد عنكم الا بتسكن حذالكم .. ولازم تفرحيلها انتي يالله قومي مسحي دموعج ولاتخلينها تشوفج ولاتخربين شكلج يالله حبيبتي قومي ..

بعد مالفت ريم على الحريم دخلت الميلس.. وكان فآخره كوشه صغيره عباره عن كرسي ذهبي ومن فوقها طوووق ورد بلون فستانها .. وعلى طرف باب الميلس كان فيه ستاند محطوط عليه مناديس فيها الحاظر اللي يايبينه لريم مغلف بعد بنفس الوان الطاولات اللي كلها متناسقه مع الوان فستانها ..

بعد مايلست ريم بساعه .. قالوا انه نايف بيدخل .. اهنه ارتبكت وايد وكانت تتعوذ من بليس وتكبر عشان ماييها الصداع وتتعب في وقت غير وقته .. وقفت ريم تتريا دخلة نايف ..

وقف نايف عند باب الميلس ووياه خواته وامه.. وشوي ودخل الميلس.. ريم من انتبهت انه دخل وطت راسها وهو يمشي شوي شوي عشان التصوير لحد ماتقرب من ريم اللي وقفت اول ما حست انه قرب منها.. وقف مجابلنها وتقرب منها ..
وطى راسه وحبها على راسها واطالعها بنظرة استحسان رهيب من غير ماتشوف ها النظره ..وعقب وقف حذالها .. وسلموا عليها ويلسوا يتصورون مع بعض ..
عقبها يابوا العقد عشان يلبسونها .. فصخولها العقد اللي هي كانت لابستنه وعطوا نايف العقد عشان يلبسها اياه
نايف وهو يلبس ريم : هذا كيف بسكره اخاف امجع لها شعرها
لطيفه: انته سو عمرك تسكره من ورا حق التصوير وانا بسكرلها اياه
نايف: اذا جيه اوكي
سوا اللي قالوا عليه وريم موطيه راسها مستحيه وايد .. ولما عطوه الحلق عشان يلبسها اياه
نايف: هذا بعد كيف
لطيفه: لاتلبسها انته بس حق التصوير ونحن بنسوي كل شي .. اسميك سالفه..

اهنه ابتسمت ريم وهي موطيه راسها ..
وبعد ماخلصوا لبس الشبكه .. قاموا خواته عنهم ويلسوا ريم ونايف حذال بعض يتصورون .. واهل نايف من ابوه يوا يسلمون عليه وكل من يا من عماته قاله عرفت تختار ..

حاول نايف يكسر حاجز الصمت اللي بينهم وتقرب من ريم وقالها
نايف: شوفي العيايز شقى فظوليات .. على طول من يدخلن الميلس يسيرن صوب الصناديق يوايقن فيهن ..
ابتسمت ريم على تعليق نايف من بعد ما ركزت النظر في الحريم اللي يدخلن الميلس.. بعد شوي دخلوا خوال ريم وابوها .. خالها راشد ومحمد ومانع و وياهم سيف وخلفان ابو نايف وسلموا كلهم عليها وتصوروا وياها وطلعوا ..

يت عليا اللي كانت مريم ساحبتنها وياها وحالفه عليها تي تسلم على بنتها ونايف وتتصور وياهم .. سلمت عليا على نايف وحبها على راسها

عليا: مبروك وليدي الله يجعل قدمها قدم خير عليك ان شاء الله
نايف صد صوب ريم وشافتها تطالع امها وتبتسم ..
نايف: امين ان شا الله عمتي
سلمت عليا على بنتها ولوت عليها ووقفت وياهم تصورت وبعدها ترخصت منهم وروحت عنهم على طول بيتها ..


طلعوا كل الموجودين في الميلس عشان يفضون المكان للتصوير .. يلست شوي لطيفه تسولف ويا اخوها وتحاول تلطف الجو بينهم .. ونواري يالسه تلعب في سله الحلويات المحطوطه على الطاوله ويابت معاها مجموعه كاكاو ويلست حذال ريم ..
ريم خذت عنها باقي الحلويات عن توصخ فستانها الابيض وعطتها وحده بس ..والباجي حطته ع الطاوله اللي حذالها ونوره طلعت كاكاو ثاني داستنه وعطه ريم وهي تضحك .. ضحكتلها ريم اللي تمت تمسح ع شعر نواري ..
تمت تلعب بالكاكاو اللي في ايدها ونايف يسولف ويا لطيفه اللي كانت بتطلع خلاص.. ومالقت نفسها الا فاتحه قرطاسه الكاكاو اللي عندها
ماعرفت شو تسوي او كيف تتصرف ..
ان كلتها بيقول شو هاي المفجوعه من الصبح ساكته عني واحين تاكل كاكاو
من الفشله ماعرفت شو تسوي قامت مدت ايدها وعطته الكاكاو
اهنه ماقدر نايف يمسك نفسه وظحك عليها وخرب الدنيا ..
يت اسما تاخذ نواري عنهم وشافتهم يظحكون ظحكت وياهم بدون ماتدري شو السالفه وخذتها وطلعت عنهم وسكروا عليهم الباب عشان ياخذون راحتهم ويتصورون ..

كانت المصوره تسويلهم حركات .. وتخليهم قراب من بعض وريم مستحيه ومب طايعه تتقرب اكثر ..
المصوره : naif come closer to ur wife
ريم: وين اكثر عن جيه بعد
نايف ابتسم وتقرب أكثر من ريم..
المصوره: reem look to ur hasband
ريم رفعت راسها لكن موطيه عيونها
المصوره : reem look to his eyes
ريم: انزين صوري بسرعه عاد
رفعت ريم عيونها ومجرد صورتهم رجعت نزلتها
المصوره: ok reem kiss ur hasband
ريم اطالعت المصوره على طول : لااا ايه وين تبين
نايف ميت من الضحك ويطالع ريم وهي منفعله ..
نايف: يالله ريمان الا بوسه.. دفاعة بلى..
ريم اطالعت نايف من طرف عينها وهي معقده الحيات.. ضيجتبها ها المصوره قربتها منه .. خلتها تتطالع عيونه .. والحين شو تبوسه .. واللي قهرها اكثر انه نايف مكيف ع الوضع ومستانس..
وبعد مشادات في الرمسه المصوره قامت ادز ريم ع نايف وهي تنازعها تقولها انه ها ريلها عادي وشلت ايد ريم وخلتها ع جتف نايف والايد الثانيه فايد نايف مشابكين اصابعهم .. لفت ريم وجابلت نايف وخت على طول ونايف يشوفها مبتسم..
نايف: شو تبانا نرقص هاي ..
ريم تنتفض وقلبها يدق بقو .. واايد وايد قريبه من نايف تحس بانفاسه تلفح ويها..
نايف مستانس ع الوضع اما ريم بروحها فدنياها .. ماستحملت ها المشاعر وها القرب من نايف .. بغت المصوره تخلص شغلها بسرعه .. قلبها بينفطر وهي واقفه ها الوقفه جدامه..صورتهم اخر صوره بها الوضعيه.. وطلعت عنهم المصوره بعد عناء وياهم الساعه 12:30 ..

طلعت ريم من الميلس على اساس تيب عشا لنايف وكانوا اهناك كلهم يالسين
ام سيف: هاه امايه خلصتوا ؟
ريم: هي امايه بس شي تام من البوفيه !!
ام سيف: هيه فديتج دخلي انتي بطرشلكم ويا نجمه
ريم: ان شاء الله
دخلت ريم الميلس ويابت نجمه الاكل في صينيه تندز وحطت لهم الاكل
نجمه: مبروووك نايف مبروك ريم
نايف: الله يبارك فيج نجمه ..
نجمه: ها متى عروسه ؟ مايسوي عروس يوم انا بيسافر صبر انته انتظر انا
نايف: احين نحن نترياج .. انتي تريي لين نعرس عقب سافري
نجمه: ان شا الله بيشوف انا
نايف: زين .. ماقصرتي ..
طلعت عنهم نجمه وقامت ريم بتغرف لنايف
نايف: افصخي الكعب عنج ريحي ريولج .. ادريبج مب طويله شايفنج بدونه لاتعذبين عمرج وياه ..
ابتسمت له ريم مفتشله وعطته يتعشى واكتفت هي بشرب العصير ..
وبعد العشا التفت لها وابتسم ..

نايف: الله يقدرني ان شا الله واسعدج وماخلي عليج قصيره ..
ريم وطت راسها وردت عليه: وان شا الله ربي يقدرني بعد و اوفوي بواجبي على اكمل وجه ..
نايف: بارك الله فيج .. اسمحيلي انا بقوم احين .. مافيني اثجل عليج ..
وقام من مكانه ..
نايف: قوليلهم اتريا قوم امايه في السياره ..
ريم: ان شاء الله
وصلته لين باب الميلس ..
نايف: ماتامرينا على شي ..؟
ريم: مايامر عليك ظالم
نايف: يالله عيل فداعه الرحمن
ريم: الله يحفظك ..

وطلعت لهم من باب الميلس الداخلي وخبرتهم انه يترياهم برع .. وطلعوله عمتها وبناتها ..
اما هي يلست شوي ويا يدتها وسارت فووق تبدل ثيابها وترتاح ..
لقت خواتها مبدلين ثيابهم وطايحين ع السراير .. كلهم رقدوا الا مي وساره كانن بعدهن واعيات ..
ريم: بعدكن واعيات؟
ساره: نترياج
ريم: شو تتريون ؟
ساره: نبى العلوم
ريم : شو علومه ؟
ساره: قومي سيري حجرج عشان تبدلين ثيابج ونحن ياينج احين
تجدمتهم ريم لغرفتها وسارلوها خواتها ويلسوا يسولفن وياها
ريم: شو كنت طالعه اوكي؟
مي: هيه فديتج قمر 14 كنتي ربي يحفظج
ريم ابتسمت وهي تمسح المكياج من ويها ..
ساره: يالله قوليلنا شو قالج شو قلتيله
ريم: ليش شفتني انا ارمس وياه ؟
ساره: لا بس اسوم دخلت عليكم لقتكم تظحكون
ريم: هههه .. هيه بخبركم ليش
وخبرتهم ريم السالفه وتموا يتظاحكون عليها
مي: فشلتينا بيقول مفجوعه
ريم: ههه اسكتي هذا كله ما ايي شي عند المصوره الغبيه
ساره: ليش بلاها
ريم: وايد تسوي حركات مايعه حق التصوير .. اذتنا ..
مي: حركات مثل شو
ريم: الا لزي حذاله والا حطي راسج ع صدره .. وين تبى
ساره: ايووووووه يا واد هذي العلوم الطيبه
ريم: لاتفرحين ماعطيتها كل اللي تباه .. الهرمه تباني ابوسه بعد.. وين تبى
مي: هههههههاي .. لو هو اللي يبوسج بنقول..
ريم: ليش ما سواها يعني .. تتأمر علينا الا هي .. وهو كله يضحك عايبنه
مي: هههه احس فشله
ساره: ماشي فشله ويدي .. ريلها حلاله
مي: اسكتي انتي بنشوفج عقب ..

سكتت ساره وهي تطالع مي اللي تغمزلها وساره حايسه البوز ..
ريم: فديت امايه سارت من وقت
ساره: هيه روحت هي ومرت خالي راشد وخالوه شويخ ويدوه سلامه من اول ما بديتوا تصوير..
ريم: واعليه عنهم
سمعوا صوت مسج
وانتبهوا كلهم انه المسج لتلفون ريم
مي: وييييه هذا اكيد المعرس مطرش مسج
ريم: ليش يطرش ؟
ساره: هيه صح المفروض يتصل
ريم : شو يتصل ؟ برقد انا
ساره: ياربي شو ترقدين هاي ليله ملجتج رمسي فيها ريلج انتي كم مره بتملجين فيها بحياتج ..
ريم: هو قال ..بيخليني عشان ارتاح .. مب عشان ارمس وياه
ساره: يقصد تبدلين ثيابج وتتسبحين .. مب ترقدين
ريم سارت وشلت تلفونها وقرت المسج .. واول ماقرته ابتسمت
مي: شو مطرش
ريم: مسج عادي
ساره: راوينا
ريم: مسحته
مي صرخت: ليـــــــــش ..
ساره:حرام عليج لازم تحتفظين فيه هذا اول مسج يطرشه لج
ريم تحسفت: شدراني انزين
ساره: انزين شو مطرش؟
ريم: ماشي مسج يبارك فيه وكاتب اسمه فقلب وحذاله اسمي فقلب صغير
مي: ايوه يا عم شكله مزهب ها المسج من قبل.. قومي تسبحي بسرعه شكله بيتصل عقب شوي ..
ريم : انزين يالله طلعن بتسبح
طلعن ساره ومي وسارن يرقدن اما ريم دخلت تتسبح وصلت .. واثناء صلاتها كان التلفون يرن .. لكنها مالحقت عليه ..
بعدها وصلها مسج .. بعد ماخلصت الصلاه شافت المتصل نايف والمسج منه
( شكلج رقدتي الشيخه .. السموحه على الازعاج وتصبحين على خير)

ردت عليه ريم بمسج .. ( لا مارقدت كنت اصلي .. واانته من اهل الخير)

لكن شكله نايف ماصدق يحصل منها مسج على طول اتصل ..

نايف: السلام عليكم
ريم: وعليكم السلام
نايف: اشحالج ؟
ريم: الحمدلله
نايف: تحريتج رقدتي ..
ريم: لا بس كنت اصلي العشا
نايف: هيه .. تقبل الله
ريم: منا ومنك صالح الاعمال ان شاء الله ..
نايف: اجمعين .. واشحالكم بعد ؟
ريم: الحمدلله انتوا اشحالكم ؟
نايف: الحمدلله ..

سادت فتره من الهدوء .. ورجع نايف يرمس
نايف: واخباركم الطيبه ؟
ريم: الحمدلله
نايف: شو الدراسه وياج عساج مرتاحه ؟ وماشيه اوكي ؟
ريم: كل شي تمام ولله الحمد
نايف: زين زين ماشاء الله
ملت ريم قالت بتكسر روتين الاسئله عن الاحوال
ريم: ان شا الله ترتيب الملجه والتنسيق والاختيار عيبك ؟
نايف: كل شي كان مرتب ماشاء الله .. ذوقج فنان .. حتى فستانج وايد حلو كان
ريم ابتسمت بحياء : تسلم
نايف: الله يسلمج .. اسمحيلي الشيخه مابطول عليج شكلج ناشه من وقت وتعبانه سلمي ع خواتج وان شاء الله برمسج وقت ثاني ..
ريم : مسموح .. تصبحين على خير
نايف: وانتي من اهله .. مع السلامه
ريم : مع السلامه ..

سكرت ريم عنه.. تحس بمشاعر رضا وسرور من نايف.. وتمت تدعي من ربها انه يوفق امبينهم ويكون الها نعم الزوج وما يكون مصيرها نفس مصير امها اللي كان حاجز مانعنها من تقبل أي ريال فحياتها .. بس مازالت ريم تعاني من الصداع ولكن مب بالشكل المستمر اللي كان اييها قبل .. تسخير من رب العالمين ..


اما نايف اللي كان طايح ع سريره من بعد ما سكر عنها.. تم مغمض عينه وهو يتذكر تفاصيل اليوم بأدقها .. وصورة ريم ماتفارق عيونه .. ويحمد ربه ويشكره انه الله يسرله امرهم ..

؟!؟