الجـــزء الـــرابع عشــر

**************************
(الاربعا) 25 اغسطس 2004
**************************

الساعه 8 الصبح دخلت لطيفه على نايف ولقته واقف عند التسريحه يتسفر .. وشكله رااايق ع الاخر .. ومزاجه عال العال .. شاف لطيفه من المنظره وحب يغلس عليها شوي..

لطيفه: صباح الخير
نايف: اطلعي برع ودقي الباب
لطيفه: نايف عن المصاخه
نايف: لطووف اطلعي برع ودقي الباب ..
لطيفه طلعت من الغرفه ودقت الباب ..
نايف: منوو ؟
لطيفه: عن المصاخه ناااايف..
نايف: انزيين شو تبين؟
لطيفه: بدخل بعد شو ابا
نايف: صبري بفكر
لطيفه: ناااااااااايف
نايف: هههههههه ادخلي
لطيفه: والله انك قاص عليه
نايف: عشان تتادبين وتدقين الباب قبل ماتدخلين شو تتحرين وكاله من غير بواب .. باجر انا بعرس بتدفشين جيه وبتدخلين علينا
لطيفه: ويـــــــه مايسوى علينا يابوك يوم بتعرس يصير خير .. انا يايه بوعيك اشوفك مااشاء الله نشيط ..
نايف شل العطر يتعطر به : عيل شوو تتحرين ..وبعدين انا من زمان نشيط
لطيفه: هيه ماشا الله نكسر عليك باب الحجره عشان تقوم حق الدوام صدق وايد نشيط
نايف وطى العطر والتفت للطيفه : انتي شو تبين تقولين هاتي من الآخر !
لطيفه: ابا اقولك انه عشان ريمان بتي ويانا انته ناش من الصبح والا موعد امايه عفرا مايهمك ذاك الزود
نايف: وانا بختصرلج اياها .. موعد امايه عفرا يهمني اكيد وابا اتطمن على صحتها وفي نفس الوقت وجود ريمان في السيره هذي يهمني بعد
لطيفه: هيه جيه اباك خلك قوي وقولها على طول
نايف شل سويجه ومحفظته والتفت للطيفه اللي تسندت على التسريحه
نايف: لطوف ريمان ماترمسج عني؟
لطيفه: ولا نطقت
نايف: ولا سالتج ولا شي
لطيفه: ابدا
نايف: وانتي مارمستيها عني ؟
لطيفه: امبلى
نايف: شو قالت ؟
لطيفه: ماردت
نايف: اووف ليش انزين .. انتي متاكده هي موافقه والا مغصوبه ؟
لطيفه: لا مب مغصوبه بس هي وايد خجوله واحس بعدها تستحي ترمس عنك
نايف: انا اشوفني اجدم الملجه احسن يالله تتعود عليه لين العرس
لطيفه: مادريبك بس انته اصبر شوي ليش مستعيل جيه
نايف: مادري والله ..

ابتعد نايف عن لطيفه شوي ويلس ع طرف الشبريه .. شكله يفكر جد فالموضوع .. لطيفه تمت تطالعه وهو محتار .. رفع راسه وسألها..

نايف: انزين لطوف قوليلي ريمان شو تحب
لطيفه: كيف يعني.. كيف شو تحب ؟
نايف: يعني هواياتها شو .. شو تحب تسوي
لطيفه: اهااا .. شوف هي هواياتها تغصص على عمرها وتحاتي دوم .. ههههه بس تحب تقرا وايد
نايف: تقرا شو ؟
لطيفه: امم الصراحه ريمان مدمنه روايات .. وايد تقراهن بشكل ماتتصوره في اليوم الواحد عادي تخلصلك روايتين ..
نايف: روايات عاد لو شي ثاني اوكي
لطيفه: شي ثاني مثل شو يعني
نايف: مادري .. لطوف
لطيفه: يا نعم
نايف: شو رايج اشتري مجموعه كتب تعطينها اياها تقراها
لطيفه: كتب ؟ مثل شو يعني
نايف: امم تحفه العروس .. الرجال من المريخ والنساء من الزهره .. من هذيل الكتب اللي بتنفعها حق مستقبلنا
لطيفه: اونه .. يعني انته الحين تبى تتقرب اكثر عشان توافق ع الملجه هيه هاااا
نايف: لا مافكرت فالملجه . يعني انا اباها تاخذ وتعطي ويايه .. ماباها اتم كله مستحيه مني .. انزين قوليلي شو رايج بالفكره
لطيفه: حلووه.. بس اقولها انه الكتب منك يعني ؟
نايف: بتقبلهن ؟
لطيفه: الصراحه ماعرف .. بس خلنا نشتري مجموعه هالكتب ونغلفها بشكل حلو وعقب بنشوف شو بنقولها اوكيك
نايف: اوكي يالله قومي تاخرنا عليهم موعد امايه الساعه 12 ..
لطيفه: يالله انا جاهزه ..

طلعوا نايف واخته لطيفه من البيت ومروا على يدتهم اللي كانت عندها مراجعه في بوظبي .. واضطرت طبعا ريم انها تسير وياهم لانها هي اللي أكثر شي تعرف بأدوية أم سيف وصحتها ..


****

كان محمد في مقر الجريده اللي يشتغل فيها .. يالس مع رئيس التحرير ويناقشه في مقاله اليديد .. وبعد ماخلص حواره معاه ومقابلته .. اتوجه لمكتبه ولقى في تلفونه مكالمه لم يتم يرد عليها .. وكانت اللي متصله عبير ..
رجع عاد الرقم واتصل بها مره ثانيه ..

محمد: الوه
عبير: الوه هلا محمد
محمد: اهلين ..
عبير: شلونك ؟
محمد: اجلح واملح
عبير: هههه
محمد: شو لوني بعد ؟ من زود البرد اللي عندنا عشان يطلع لونا حلو .. ماشي الا ركضه بسياره الجريده من دبي لين اهنه في هالحر ..
عبير: الله يعطيك العافيه ..
محمد: الله يعافيج
عبير: محمد بغيت اذكرك
محمد: بشو ؟
عبير: عشان سالفه شحن سياره فجر
محمد: لا خلاص انا رمست بشار البارحه وهو قال بتوصل عقب 10 ايام اظن
عبير: زين ماتقصر رحت معاها اليوم وفتحنا ملف لليسن وبتقدم ان شاء الله وبتاخذ ليسن الامارات .. بس بعد في شي..
محمد: امري
عبير: ما يامر عليك عدو .. بس فجر تبي رقم تلفون حقها في البلاد
محمد: هيــــه ماعليه ان شا الله بييبلها شو تبى خط والا واصل ؟
عبير: لا واصل
محمد: خلاص ان شاء الله ..
عبير: اسمحلنا يامحمد كثرنا عليك بالطلبات
محمد: لا افا شو هالرمسه ..
عبير: خاطرك بشي معين على الغدى؟
محمد: يمكن مارجع ع الغدى اليوم اذا ماخلصت شغلي
عبير: شدعوه ماكو غيرك بها الجريده كل يوم ماترجع تتغدى عندنا
محمد: لا شي غيري بس مافي حد بمثل كفائتي وقدراتي
عبير: لا والله زين قلتلي عشان ابخرك عن العين
محمد: هههههه .. يالله عن الطنازه ان شاء الله بحاول اخلص واتغدى عندكم وكل شي من ايدج حلو ..
عبير: زين الله يوفقك مع السلامه
محمد: فمان الله ..

سكر محمد التلفون وفكر كيف ممكن يروح ياخذ لفجر بطاقه وهو مب ملحق حتى يرجع يتغدى مع اهله .. اتصل بمروان عشان يطرشه بداله

محمد: الوه السلام عليك
مروان: وعليك السلام هلا والله
محمد: اهلين هاه شو الاخبار ؟
مروان: الحمدالله ..
محمد: وين انته ؟ اسمعك في السياره
مروان: هيه مبتلش ببنت اخوك وامها .. ساير اوديهن العين
محمد: هههه يالهرم وبنت اخويه وامها مب اختك وامك
مروان: كل الطرق تؤدي الى روما
محمد: شو يسون في العين؟
مروان: هاي عنزوه جنه محد بيعرس الا هي .. عافده بخياييط العين تفصل ثياب..يمدحون مخاويرهم اونه ..
محمد: هههههه لا زين زين تستاهل عزه ..
مروان: ياخي والله جني ماخذ هالاجازه الا حق حواطتها ..
محمد: ماعليه تراك اخوها العود .. انا كنت اباك تسير الاتصالات بس برايك بتصل بخليفه بطالعه
مروان: حق شو؟
محمد: بغيت رقم حق اخت عبير .. خلاص برايك بتصل بخليفه بشوفه
مروان: انزين عيل
محمد: فمان الله
مروان: مع السلامه

سكر محمد واتصل لخليفه لكنه كان في العزبه ويا العمال ..
وفي الاخير قرر محمد يتصل بسلطان رغم انه كان شاك انه سلطان واعي هالحزه لكنه استغرب يوم لقاه راد عليه ..

محمد: الوه هلا سلطان
سلطان: هلا خالي اشحالك ؟
محمد: بخير وانته ؟
سلطان: الحمدالله
محمد: وينك انته ؟
سلطان: انا عند خالي راشد في الشغل
محمد: ماشا الله .. انزين تروم تترخص من راشد شوي بغيتك في شغله
سلطان: آمر
محمد: مايامر عليك ظالم .. اباك تسير الاتصالات وتطلعلي رقم واصل
سلطان: حقك ؟
محمد: لا ..
سلطان: عيل لمنو
محمد: لواحد .. بتسير ولا
سلطان: بسير بس منو ها الواحد اللي مايروم يظهرله رقم بروحه!
محمد: بتسويلي تحقيق انته
سلطان: لا بس يعني استفسر
محمد: ماتيوز انته ..
سلطان: انزين قول لمنووه؟
محمد تغصص من سلطان وقاله: لاخت عبير
سلطان خفت ملامح الحده فويهه وابتسم شوي اول ماتذكر اخت عبير .. فجر ..
سلطان: اهاا جان قلت من اول يعني لازم تشغل الفضول فينا .. خلاص ان شاء الله بسير ..
محمد: زين بتسوي والله بتريحني لانه انا مول ماعندي وقت
سلطان: لا لا بسير افا عليك
محمد: اعتمد يعني ؟
سلطان: اعتمد
محمد: خلاص اول ماتيبه اتصلبي خبرني
سلطان: ان شاء الله .. مع السلامه
محمد: مع السلامه ..

سكر سلطان عن خاله وهو سرحان فتفكيره .. شكل نواياه ها المره مب سهله بس محد يعرف للي يفكر فيه سلطان وشو ممكن يسويه ..
زقره خاله راشد وانتبه له .. كمل الشغل اللي فايده وترخص عقب من خاله وقاله انه محمد مطرشنه يسويله شغله .. وطلع للاتصالات وظهر الرقم .. لــفجر..


****

في طريق بوظبي كانن ام سيف وريم يالسات ورا .. ولطيفه يالسه جدام حذال نايف .. ريم اول مابغت تركب السياره حاولت تيلس ورا لطيفه عسب تتجنب اللي ممكن يصير عقب وهي يالسه ورا نايف.. لكن كان ها الباب اقرب ليدتها الشي اللي خلا ريم تضطر تيلس ورا نايف ..
كانت ريم مستاءه من الوضع وايد خصوصا لما عرفت انه نايف اللي بيوديهم من بعد ماتعذر ابوها .. وفوق هذا زادها استياء يلستها ورا نايف..تحسبه قريب منها وايد .. تمت مرتبكه طول الوقت .. بغت تتهرب من ها الجو وفتحت شنطتها وطلعت روايتها تتسلابها .. نايف شافها من الجامه وتذكر كلام لطيفه عن حب ريم للقرايه.. كل شوي كان يطالعها ويوم يحس انها بترفع راسها ينزل عيونه ع طول ..لكن جكته ريم وهو يختلس النظر عليها حست بحراره فضيعه فويها .. حتى الروايه ماقدرت تيودها عدل وكل شوي تبدل فالصفحات بس عسب تتهرب..
نايف ماحب احساسها بعدم الراحه والربكه.. وتم يلوم نفسه وايد لانها انتبهت عليه وهو يطالعها ..مد ايده ورفع الجامه شوي ع فوق عسب ترتاح ريم وتعرف انه ما بيقدر يشوفها خلاص..
لطيفه انتبهت لحركة نايف وسألته باستغراب: ليش رفعت الجامه ؟ كيف بتشوف الحين الشارع ورا ..

نايف سكت ومارد عليها لكن ريم انتبهت لسؤال لطيفه ولما رفعت راسها هالمره شافت انه نايف رفع الجامه وانه مايقدر يشوفها احين ..
استغربت من حركته هاي .. بشو ممكن تفسرها
هل نايف يحترم رغبتها في انها ماتباه يتم يطالعها ؟
او انه حس باستياءها وهالشي ضايقه وخلاه يتصرف هالتصرف؟
تمت تفكر وايد في هالشي لكنها قطعت تفكيرها ورجعت لروايتها اللي فايدها تكملها ..
بعد ساعتين ونص وصلوا بوظبي .. وعلى طول توجهوا للمستشفى عشان موعد ام سيف .. بعد الفحوصات طلعت نتايج ام سيف سليمه الحمدالله وصحتها في تحسن..
طلعوا من المستشفى وكانت الساعه 2 الظهر ..
نايف: هاه امايه نسير نتغدى ؟
ام سيف: وين نتغدى بعد
نايف: فمطعم
ام سيف: لا لا مابا ردني البيت
لطيفه: حشى يا امايه طالعين من الساعه 8 ماكلنا شي .. يعنا
ام سيف: لا انا ابا اروح .. فديتهن بناتي بيوصلن اليوم
لطيفه: يـــيــه ذليتينا عاد انا يوم سرت الجامعه محد سوالي سالفه جيه حتى يوم نايف سافر .. شمعنى يت على ساروه وميوه
ريم نست وجود نايف وردت عشان تغايظ لطيفه: نحن وياها في البيت مجابلتنا 24 ساعه انتن بعيد عنها ..
لطيفه: يالله وين بعيد عنها بعد
ام سيف: يالله اسكتي يالطوف .. سارت عني ساروه وميوه وبتلحقهن ريمان .. مادري شو بسوي بعمري انا
ريم اسكتت كلام يدتها احرجها والاكثر وجود نايف ..
نايف: برايه امايه بنعيش عندج
ام سيف: صدق؟ جان زين
لطيفه: ههه لا مايستوي بنات عندكم في البيت
ام سيف: مايخصج انتي انا بخليهم في الحجره اللي حذالي محد فيها
ريم ماعرفت شو تسوي حزتها كانت وايد منزعجه من هالطاري ومب عارفه شو تسوي عشان يسكتون عنه ..
لطيفه اللي التفتت لها بها الوقت وهي تبتسم لاحظت الاستياء على ملامح ريم وماحبت انها تتظايج زياده .. وحاولت تغير الموضوع
لطيفه: مب لازم نسير نتغدى عيل مربنا أي مكان بناخذلنا سندويشات او أي شي خفيف ..
نايف: هاه ام سيف شو رايج ؟
ام سيف: زين احسن عشان نوصل من وقت .. ريم امايه اتصلي اطاعي خواتج جان ظهرن
ريم اتصلت بمي وعطت السماعه يدتها ترمسها ..
ام سيف: الووه
مي: فدييييييت هالحس انا يعلني ماخلى منه
ام سيف: هههه فديتج الغاليه اشحالج؟
مي: بخير انتي اشحالج شو نتايجج؟
ام سيف: الحمدالله كلها زينه
مي: الحمدالله
ام سيف: ظهرتوا والا بعدكم ؟
مي: بعدنا امايه ماطلعنا غربلونا يعلهم ان شاء الله
ام سيف: جي بعد
مي: لعوزوني اوني مب مسويه تصريح ورديت الاداره عسب يسوولي والحين راكبين الباص.. ثنتين ونص بيحرك
ام سيف: واعليه عنكم .. يوم قلتلج شو تبينها الجامعه الا سقم.. درسي ويا ريمان ماطعتي.. تبعتي شور ها الرغيد ساروه
ضحكت ميوه ع رمسة يدتها: هي والله صدقج يا امايه انها رغيد.. مب مخليه بنت ماعرفتها فالجامعه ..
ام سيف: سايره تلعب الهرمه هي .. بس ماعليه دواها عندي
ساره انتبهت لرمسة مي وبغت تمط التيلفون من مي بس مارامت الها ..
مي: انزين امايه.. انتوا بعدكم ماوصلتوا ؟
ام سيف: احين ظاهرين
مي: زين بتوصلون قبلنا
ام سيف: هيه اظن
مي: زين امايه انا ميته من اليوع
ام سيف: فديتج ليش ما ياكلونكم اهناك
مي: والله اكلهم سقم يا امايه .. ناكله غصبن عنا
ام سيف: وعليه عنكن انزين امري شو تبين ع العشا
مي: كل شي ابى .. سولوي معكرونه بالباشميل اهم شي .. وبيتزا وورق عنب.. وشو بعد .. هي قرص مدقوق ويا اللبن بعد والله مشتهتنه
ام سيف: يالله يالله هذا كله تبينه
مي: هيه والله امايه في خاطريه
ام سيف: ههه فالج طيب بنت سيف ولا يهمج .. بس عاد القرص دقي لامج خلها تسويه شغلة البداو هاي
مي: هههههههه ماعليه يوم بنسيرلها بخليها تسويلي.. اقول امايه منو بيي ياخذنا؟
ام سيف: ابوج والا الدريول
مي: زين يوم بنكون قراب بنتصلبكم عشان يظهرون
ام سيف: زين تسوين .. يالله عيل فداعه الرحمن
مي: فمان الله ..

ام سيف: هههههه فديتها ميوه ميته من اليوع ماخلت شي ماقالت تبى تاكله
ريم: وشو اللي بتسويه الها اميه
ام سيف: فخاطرها قرص ويا اللبن ..
لطيفه: ههههههه ها كورن فليكس البدو
ريم: هي انتي اطنزي يا الهرمه ..
نايف ابتسم ووجه الكلام لام سيف: عيل العشا عندج اليوم ام سيف
ريم اطالعت يدتها بنظرة يأس وكأنها تقول .. وأنا ناااقصه!!
ام سيف: حياك الله .. يالله انته سوق سوق خلنا نوصل ونسوي عشى بنت سيف.. ريموه اتصلي البيت برمس نجموه عن العشا..

ريم رغم توترها الا انه اهتمام يدتها وفرحتها بخواتها ورجعتهن البيت حسستها بفرحه وعرفت شكثر يدتها تعلقت فيهم خلال ها الفتره القصيره .. وهالشي يخليها بعض الاحيان ترتاح من ناحيه محاتات اخوانها..


****

الساعه 4 العصر احلام كعادتها ..ملانه وما تعرف شو تسوي .. اخر شي قررت تفتح درجها وتطلع اوراق ابوها .. وتطبعله الروايه اللي كاتبنها بخط ايده على الكمبيوتر عشان تكون جاهزه مطبوعه اول مايخلصها .. وتفاجأه بهذا الشي ..
قفلت باب الغرفه ويلست ع الكمبيوتر تطبع ..
في هالوقت اندق الباب وركضت احلام تدس الاوراق وتخزن اللي كتبته بسرعه وتفتح الباب
عبير: ساعه لين تفتحين الباب
احلام: اسفه
عبير: شو كنتي قاعده تسوين ؟
احلام: اقرا قصه ع الكمبيوتر
عبير : بلا هالقصص والخرابيط اللي تقرونها وتشحن مخكم بالافكار الغلط
يلست احلام على السرير بلامبالاه: اذا افكار القصص غلط ترا تربيتكم انتوا صح
عبير ماعرفت ترد على احلام خصوصا انه ردها سكتها ..
يلست عبير حذالها: احلام شو رايج نتمشى برع
احلام: وين ؟
عبير: في الفريج .. احس اني صايره كسوله وقليله حركه
احلام: فجر بتروح ويانا ؟
عبير: ماقلتلها
احلام: اذا بتروح انا مب رايحه
عبير: اظن انها نايمه للحين ماقعدت
احلام: اوكي بسير وياج .. عموه عليا بتي ويانا ؟
عبير: لا عليا وعمتي وشيخه بيروحون عزا
احلام ابتسمت: اوكي ثواني وبكون جاهزه ..
عبير: يالله انا بروح البس

سكرت احلام الكمبيوتر وسارت تلبست وطلعت لقت امها يالسه في الصاله تترياها
وطلعن يتمشن في الفريج .. كانت سوالفهم في البدايه عاديه .. وبعدها ساد الهدوء لين قطعته احلام بسؤالها: اميه
عبير: نعم
احلام: ابويه كيف حبج
عبير التفتت لاحلام مستغربه هذا السؤال: شنو هالسؤال بعد!! مو منكم من اللي تقرونه
احلام: اميه جد ارمسج يعني كيف شافج كيف خذج
عبير: ابوج كان رفيج بشار اخوي بالكليه يدرسون مع بعض
احلام: انزين وعزمه خالي عندكم في البيت وانتي كنتي تفازعين امج وسرتي تودين الاكل الميلس وشافج
عبير: صج حجي قصص
احلام: ههههه انزين خلاص قوليلي كيف
عبير: شوفي ايامها انا كنت يمكن في عمر ريم بنت عليا .. وكنت مو متحجبه تعرفين امي اجنبيه ولو انها اسلمت لكنها ماتحجبت وانا كنت مثلها ..
احلام: ويه عيل ما تنلام فجر!
عبير: فجر عندها اللي يصححلها افكارها او يقولها الصح من الغلط..لكن انا ايامها امي كانت لو انها مسلمه بس ماتعرف لامور الدين وايد.. يعني كنت شراتها وماتحجبت ..
احلام: فديتها ببوشكا
عبير: هههه من علمج ببوشكا
احلام: هههههه مب صح ببوشكا يعني يدوه بالروسي؟
عبير: ايه صح من قالج ؟
احلام: هييه عيل تتحرين انا سهله .. انا اشبه يدوه لازم ارمس روسي شراتها
عبير: هههه
احلام: انزين كملي
عبير: المهم انه ابوج كان رفيج بشار يروح ويرجع معاه .. وعادي يدخل البيت يسلم على ابوي وامي وانا كنت اقعد معاهم
احلام: ومشتغلين انتي وابوي كلام بالعيون
عبير: هههه لا يالطفسه بس ابوج على طول كلم بشار انه يبي يخطبني
احلام: وانتي ماجذبتي خبر
عبير ظربت احلام على جتفها: احلاموه بتسكتين والا ماكمل !!
احلام: هههه خلاص بسكت
عبير: امم طبعا لمن قال بشار انا اوكي وافقت بس امي مارضت
احلام: ويه شحقه !
عبير: تعرف اني بروح بعيد عنها
احلام: هيه صح .. انزين
عبير: ابوي كان وايد معجب بمحمد وباخلاقه عشان جي ماعارض ها الزواج.. بالعكس شجعني وتزوجت ابوج على اساس اقعد بالكويت لين يخلص دراسه بعدين ارجع معاه الامارات ..
احلام: وانتي عادي كان عندج تين الامارات
عبير: كنت متردده بس انا شريت ابوج
احلام: انزين وابويه عاش عندكم؟
عبير: ابوج مارضى يسكن معانا بنفس البيت .. عشان مايقولون انه قاط نفسه عليهم ومحملنهم مصاريف كل شي
احلام: والنعم بابويه
عبير: اجرنا بيت يم بيت ابوي كان صغير صاله وغرفه ومطبخ وحمام
احلام: بسج بعد شو تبين اكثر عن جيه
عبير: احلاموه سكتي عاد
احلام: انزين انزين
عبير: سكنا فيه لين يبتج وصرت كل يوم اوديج عند امي واروح الجامعه مع محمد واحيانا يكون عندي امتحان العصر محمد يوديني الجامعه ويقعد يحوطج بالسياره لين تنامين واخلص انا
احلام: هههه وحليلي كنت ماذتنكم .. انزين اميه كيف تحجبتي عقب
عبير: من خذت ابوج بديت اتحجب لان هو طلب ها الشي .. تعرفين وايد اشيا فأمور الدين علمني اياها ابوج ماكنت اعرف عنها وايد .. والحمدلله ويا العشره وياه صرت ملتزمه بديني ولله الحمد ..
احلام ابتسمت لامها : انزين وعقب ..
عبير: المهم..ومشت الايام لين الغزو والمأساه اللي صارت .. طلعنا من الكويت .. توفت امي في الطريق قبل مانوصل السعوديه لانها كانت مريضه واسروا ابوي..رجعنا الامارات تقريبا تمينا لين هدت الاوضاع فالكويت وصار التحرير.. وعقب رجعنا الكويت عشان يكمل ابوج دراسته.. ولما خلص واستلم شهادته رجعنا بلاده.. اللي هي بلادي الثانيه..
احلام: فديت الامارات والله .. انزين اميه انتي ليش ماكملتي دراستج دام ابويه رد يكمل ..
عبير: ماعرف .. كانت حالتي النفسيه هاذيج الفتره ماتسمح .. تخيلي يعني أزمة البلاد ووفاة امي وأسر ابوي وانتي كنت اربيج منو بيهتم فيج وانا اسير الجامعه.. كانت امي تساعدني لكن عقب منو بيمد لي ايد العون!!
احلام: فديتج والله يا امايه .. انزين احين مب في خاطرج تكملين؟
عبير: اكيد
احلام: ليش ماتكملين عيل ؟
عبير: انا ماكملت قبل بكمل الحين
احلام: هيه ليش لا .. مافيها شي
عبير: وانتوا وين اخليكم؟
احلام: احنا مب صغار احين كبرنا ومن حقج تكملين دراستج وبعدين بتحققين حلمج وفي نفس الوقت بتعاونين ابويه
عبير: وين اكمل ؟
احلام: كملي في كليه الخليج الطبيه في عجمان وروحي كل يوم وارجعي
عبير: ومصاريف دراستي؟
احلام: ابويه مابيقصر فيج لين تخلصين
عبير: لا ويه احلام انتي تعرفين الطب كم سنه ؟ وبعدين كم بيصير عمري لين اخلص
احلام: اوكي مب مشكله درسي شي ثاني في جامعه عجمان
عبير: مثل شنو؟
احلام: علاقات عامه مادري شو أي شي
عبير: امم ماعرف
احلام: اميه كملي دراستج حلو انج تكملين وحتى لو ماتشتغلين شهاتج تكون عندج
عبير: ان شا الله بفكر في الموضوع
احلام: زين ..

سكتت احلام عشان تعطي امها تفكر في كلامها .. حلو انه امها تكمل دراستها خصوصا انه بناتها كبار احين وبعدين ع الاقل بتسلي وقتها بدال ماتيلس فاظيه طول اليوم .. لكن سرعان ما شلت عبير ها الفكره من بالها.. ماتقدر تثجل على محمد ..

****

الساعه 5 العصر كانوا جاسم وعمار ومايد سايرين مع السايق عند مواقف الباصات اييبون خواتهم .. ومعاهم مها ومهرهاللي ركبن بالدس عن الاولاد لانهم ماكانوا طايعين يسيرن وياهم .. يوم وصلوا الموقف طلعن التوم من الدبه وهن يضحكن .. لف عليهن عمار اللي انصدم بوجودهن ..

عمار: انتن شو ياابكن؟
مهره: ينيات نحن طرنا ووصلنا هنه
جاسم: يا الخااايسات مب قايليلكن ماتن ويانا
مها: يا سلام ع كيفك هوو ..
مايد: عاد تمن يالسات ورا .. ماشي مكان
مهره: ماعليه عادي المهم يينا وياكم..

طنشوا الجماعه السالفه وعفد جاسم ع المسجل وشغل الاف ام .. يت اغنيه انطرب عليها جاسم وقام يسوي حركات وايبس براسه .. ومايد يطالعه ويضحك عليه

مايد: ايه انته حد ايوول فالسيااره
مهره: هههههه طلع فيه عرج البداو
عمار: علمني شقى ايول
مها: لا لا مانعلم .. الحظر ما ايولون بس البدو
عمار: عدال عاد انتي .. من الله احظريه ترااج
مها: لا انا بدويه
عمار: ابوج حظري
مها: شعليه انا من ابويه اميه بدويه
عمار: الواحد لاصل ابوه
مهره: عاد نحن لاصل امنا رابين هناك واتطبعنا بطبايعهم
جاسم: بس اسكتوووا حشره.. اففف
مايد:انزين جسوم يوم بنسير البيت تعلمني
جاسم: انزين فكنا احين انته

تموا مرتبشين في السياره لين وصل باص البنات.. انتبهت ساره لسيارتهم ودقت لمايد تقولهم انه ها الباص هو باصهم .. نزلوا مايد وعمار والدريول يشلون شنط البنات .. وركبن البنات السياره وارتبشن هن الثانيات ويا خوانهن فالسياره ..

عمار: هاه اقول حق الدريول يوديكن البيت سيده
مي: لا لا لا ودوني حوطوني ابا اشم هوا راس الخيمه يعلني ماخلى منها
اسما: هههه حليلها اول مره تسير حوطوها شوي

حاطوا شوي العيال بالسياره ع الكورنيش وطلبوا عصاير ويلسوا يشربون ويتمشون لين اتصلتبهم ام سيف تهزبهم ليش تاخروا .. وصلوا عيال مريم وعقب ردوا البيت ..
ام سيف اول ماشافت مي وساره استااانست وايد .. ساره كانت تبى ترقد لانها مواصله وتعبانه اما مي تمت لاصقه بيدتها وحاضنتنها.. ترخصت منهم ساره وسارت حجرتها ووطت رااسها ورقدت .. اما مي من بعد ماعطت يدتها تفصيل اسبوعها كيف كان وخبرتها عن امتحاناتها وشو سوت فيهن ..

ام سيف: انزين سهلات عاد امتحاناتج؟
مي: يعني نص نص .. المهم طحت فمستوى اول عربي وثاني فالرياضيات والكمبيوتر ..
ام سيف: يالله جيه عاد اول بس فالعربي.. ثرج مب شاطره فالرياضيات وها ربيعكن الجامبيوتر..
مي ضحكت على يدتها.. اما ريم صححت مفهوم يدتها للمستويات ..
ريم: امايه .. فالجامعه مستوى اول يعني اساس ماعدت فالامتحان لكن ثاني حلت زين فالامتحان وعدت المستويات الاولى
ام سيف: كيف ها بعد
مي: هههههه والله امايه سوتلنا سالفة ابو وحده من ربعنا .. طاحت كله فمستويات اولى ويوم خبرته عن مستوياتها قالها عاد زينه ها المستويات قالتلته امره فوق الزين بعد ههههههه والله هلكتنا من الضحك ..
ريم: وحليله ابوها قاصه عليه .. يلا عاد بنشوف الانجليزي فاي مستوى يحطونج..
مي: واخيبتيه اخاف اول .. اسميني بكون ميح فالعربي والانجليزي..
ام سيف: لا ان شاء الله يطلع مستواج زين
مي غمزت لريم: امااايه ترا لو اول يعني انا توووب فالانجليزي
ام سيف: لا عاد عن تقصين عليه جي تتحريني هب فطين تراج تقولين اول يعني اخر شي اسااس الا ..
مي: هههههههه فديييت عيوووزي انا .. ذكيه ..

ريم ابتسمت وهي تشوف ميوه كيف لاصقه بيدتها وكل شوي تنغزها وتغصصبها .. تحرج عليها ام سيف وتهزبها لكن شوي تلقاهن يضحكن .. قامت ريم من عندهم وسارت المطبخ تشوف نجمه شو خبصت ع العشا .. وقالت بتساعدها شوي.. الفقيره أمرت عليها ام سيف تطبخ من كل أصناف الاكل ويدوبها تلحق تسوي كم أكله .. زقرت مها ومهره وسارن كلهن المطبخ يساعدن نجمه ..


***********************
(السبت) 4 سبتمبر 2004
***********************

الساعه 7 الصبح نشت فجر على صوت المنبه .. فتحت عيونها بكسل واعتدلت في طيحتها .. وهي متملله وتحس راسها بينفجر ..
كانت هاي ليلتها الاولى في السكن .. وماياها رقاد موول .. طول الليل تتجلب
و نشت وهي متظايجه .. هذا اول يوم دوام جيه بتروحه وهي مسطله ..
تغسلت ولبست ثيابها .. كانت لابسه بنطلون جينز ازرق مع قميص اخضر فاتح ايده قصيره .. فتحت شعرها ولبست نظارتها الشمسيه وطلعت وهي شاله شنطتها
نزلت من المبنى وركبت سيارتها الحمرا اللي طرشولها اياها من الكويت .. وتوجهت للكليه ..
كانت ماسكه ورقه الجدول في ايدها وتحاول تعرف اول محاظره لها وين .. عرفت المبنى وتوجهت له .. لكن ماعرفت موقع القاعه ظلت تمشي لحد مالقتها ..
ودخلت .. كانت المحاظره باديه من 10 دقايق ..
يلست على واحد من الكراسي الفاظيات اللي حصلتهم في وسط القاعه .. بعدها بخمس دقايق دخل شاب.. على طول توجه للكرسي الفاظي حذال فجر ويلس ..

احمد: ممكن اقعد
فجر: قعدت خلصت
احمد: اوكي اقوم؟
فجر: خلاص it's ok

سكتت فجر وهي تحاول تسمع الدكتور شو يقولهم عن تعليمات الكورس ..
وطلب منهم يكتبون شي ..
فجر ارتبكت لانه ماكان معاها ورقه.. والتفتت للي يالس حذالها كان عنده

فجر: ممكن تعطيني ورقه ؟
احمد خذ ورقته وعطاها : تفضلي
فجر: مشكور
احمد: it's ok

فجر حاست بوزها وبدت تكتب اللي طلبه منهم الدكتور .. وبعد المحاظره قام احمد من مكانه وتمت فجر يالسه..

احمد: خلصت المحاظره
فجر: اعرف بس ابي اشوف المحاظره الثانيه وين باي قاعه
فتحت فجر جدولها .. وتمت تقرا فيه
احمد: ممكن اشوفه ؟
فجر عطته الجدول ..
احمد: محاظرتج بعد ساعه في المبنى الثاني اللي مجابل هذا المبنى
فجر: مشكور
احمد: العفو ..
قامت فجر من مكانها واحمد مشى قبلها
فجر: لو سمحت ؟
احمد: نعم
فجر: وين الكافتيريا ابي اتريق لين المحاظره الثانيه
احمد: انا ساير الكافتيريا احين اذا تبين امشي ورايه بتعرفين وينه
فجر: خلاص اوكي

مشت فجر وراه لكنه عقب بدت توازيه في المشي عشان ماتظيع
فجر: انت من الامارات؟
احمد: هيه
فجر: انا من الكويت
احمد: عرفت
فجر: شلون ؟
احمد: لا بس حسيت يعني
فجر: ايه
احمد: وصلنا هذا الكافتيريا .. تامرين بشي؟
فجر: مشكور ماقصرت
احمد: مع السلامه
فجر: باي

ابتعد احمد عن فجر ولا رد يلف عليها .. وهي الثانيه توجهت للكافيتريا تطلبلها شي تاكله لانها بتموت من اليوع .. يلست بروحها ع طرف وسلت عمرها بالاكل اللي جدمها ..

****

الساعه 2 الا ربع الظهر .. كانت مي طالعه من السكن الداخلي للطالبات وسايره صوب مبنى 63 والمتعارف عليه عند بنات الجامعه باسم "اللابات" كان اول كلاس عندها لغه عربيه .. تمت تمشي ومب عارفه الدرب اللي بيوصلها لها المبنى..ساروه مارضت تطلع وياها لانها كانت سهرانه طول الليل ورقدت الصبح وماطاعت تنش.. اما اسما ولطيفه فتلومت انها تطلب منهن يوصلنها ويراونها المباني.. ربعها مال المدرسه تقريبا ماتعرف عنهم شي .. يعني ماعندها حد .. تمت تمشي فالممر اللي مجابل بوابة السكن .. شافت مجابلنها مبنى تعرف شكله او تحيد انها داخلتنه فامتحانات تحديد المستوى واللي تذكره كان يتسمى" الونقات" وساروه قايلتلها انه اللابات حذال الونقات واللي مجابل الونقات هي مكاتب الاساتذه.. تمت واقفه مب عارفه وين تسير .. شافت مجموعه كبيره من البنات كل وحده قابضه جدولها وتقرى فيه واللي ترمس بالتيلفون وتسأل عن مكان المبنى اللي بتدرس فيه .. ماعرفت تتصرف .. سمعت صوت وحده تستأذنها بطلب .. لفت عليها مي..

مي: نعم؟
البنت: لو سمحتي وين مبنى 63
مي حست بحراره فويها ماعرفت شو ترد على البنت ..
البنت: تعرفينه وين؟
مي: انا بروحي ابا اسيرله .. ماعرف اي مبنى من هاذيلا ..
البنت: انزين انا قالولي هذا المبنى الونقات ..
ولفت البنت يمين وأشرت ..
البنت: وسمعت يقولون المبنى الأبيض هو الزدات..
مي شافت المبنى الأبيض وتحس بقلبها ارتاح .. شافت البنت وابتسمت الها ..
مي: عيل خلاص هذاك المبنى هو اللابات.. خلينا نسير وبنشوف

مشن الثنتين وبدت اطراف الحديث امبينهن .. وصلن المبنى المقصود وكل وحده بطلت جدولها تبى تعرف رقم الكلاس .. مي طلع كلاسها 16 اما البنت 15 .. وثنيناتهم عندهن اول كلاس عربي ..

مي: يالله لو طحنا فنفس الكلاس صدق بتكون صدفه عجيبه
البنت: ههههه يلا ماعليه كلاساتنا حذال بعض بنتشاوف مرتين فالاسبوع
مي: اتمنى .. يلا اخليج الحين بدخل الكلاس
البنت: اوكي ..

دخلت مي كلاسها وكانن تقريبا فوق العشر بنات يالسات وكل وحده ساكته .. سلمت مي ويلست ع طرف .. تشوف الويوه اللي فالكلاس .. ولا وحده تعرفها.. تأففت وجتفت ايدها وهي تنقل نظرها فالكلاس.. ها اول كلاس وتحس نفسها مب مرتاحه كيف بتكمل ها اليوم .. لكنها تعوذت من بليس وتمت تفكر فالشي الايجابي من ورا ها الدوام ..

****

الساعه خمس العصر يلست ريم ويا يدتها فالصاله تحت من بعد رقاد طول الظهر بسبة الدوام والتعب اليوم ..
دخلن مها ومهره الصاله وكل وحده شاله شنطتها اللي ممزوره من الكتب والدفاتر.. ويلسن ع الارض وطلعن كل كتبهن عسب يجلدنها .. نزلت ريم ويلست حذالهن عسب تساعدهن فها الشغله اللي مب متعودات التوم عليها .. وزقرت ريم على مايد وجاسم عسب اييبون كتبهم واتجلدهن الهم بالمره..

ريم: يالله جسووم بسرعه ..
جاسم: انا ماروم اييبهن .. ميود قوم هات كتبك وكتبي
مايد: جي مكلف عنك انا
ناعمه: انتي تجلدين كتبهم ؟
ريم: اميه كانت تجلدلنا كتبنا ونحن نفازعها انا وساروه وميوه
ناعمه: انا كل سنه اودي كتب عفاري وميود المكتبه يجلدونهم
ريم: يالله بالستر حتى التجليد ماتروميله.. هاتي كتب عيالج انا بجلدهم..
ناعمه: انا ماعرف اجلد اصلا.. خلاص زين ماتقصرين .. بخلي عفاري اتيب كتبها..
مايد: يلا جسوم قم بسرعه
جاسم: اووهو
ريم: يلاا جااسم .. سيروا هاتوا كتبكم بسرعه ..
ام سيف: بيلس حذالكن بفازعكن
ريم: تمي محلج اميه وين بتيلسين ع الارض ..
ام سيف: ماعليه شر ..بفازعكم
قامت اليده من الغنفه وقبل ما تيلس يابتلها مها مخده تيلس عليها عسب ما تتعب من الارضيه الصلبه..
مهره: ريموه اميه عليا قالتلنا مساعه فالمدرسه انطرش كتبنا عندها وهي بتجلدهن..
مها: قلنالها نحن بنجلدهن عادي ..
ريم: زين سويتن .. مافينا نعبل عليها ..
ام سيف: ياحليلها امكن تحاتيكن
ريم: هي فديتها والله اميه ..
بدت ريم تجلد لمايد وجاسم وعفرا .. اما مها ومهره يلسن يجلدن رواحهن من بعد ماعلمتهن ريم كيف يجلدن صح..
وام سيف كانت بعد مايخلصون تجليد الكتب يعطونها اياهن تقصص الزوايد
كان شعور ام سيف غريب اول مره تحسبه بها البيت .. اول مره تحس ببدايه الدراسه او بالدراسه نفسها .. كانوا عندها مايد وعفرا بس ماحست بهاي الاجواء من قبل .. و مايد كان شعوره من نفس شعور يدته ومتحمس وايد على غير أي سنه ثانيه مظت ..




**********************
(الثلاثا) 7 سبتمبر 2004
**********************

في احد مطاعم الجامعه الامريكيه كانت فجر يالسه مع بنتين كويتيات تعرفت عليهم من السكن الجامعي وتمت تيلس وياهن لانها ماتعرفت على غيرهن .. كانوا البنات اكبر منها بسنه .. وممكن تستفيد منهم بحكم انهم قدامى بالجامعه ..

لولوه: فجر شرايج نطلع اليوم ؟
فجر: نطلع .. وين نروح ؟
دلال: نروح السينما والا سنتر
فجر: ماعرف
دلال: شنو ماتعرفين .. راح نطلع يميع بسيارتج عشان تدلين المنطقه بالمره
فجر: اوكي مو مشكله
لولوه: ويه طالعوا مو هذا احمد ؟
دلال: ايه اهوو
فجر ارفعت نظرها وانتبهت انه هو نفسه الشاب اللي كلمها في اول يوم دراسه
فجر: تعرفونه ؟
لولوه: منو مايعرفه !
فجر: ليش يعني ؟
دلال: وايد وسيم لكنه مايعطي البنات ويه
فجر: ليش ؟
لولوه: مغرور وايد .. ومايتكلم مع احد من البنات مع انهم يموتون ويلتفت صوبهم
فجر تمت ساكته واستغربت .. هو كلمها و ساعدها .. ليش يعني ؟!
دلال: شفيج فجر
فجر: ماكو
لولوه: يالله خلونا نروح نبدل هدومنا ونطلع
فجر: يالله ..

طلعن البنات من عقب مابلدوا ثيابهم.. اتوجهوا لاحد سناتر الشارجه ويلسوا يتحوطون فيها .. دخلوا السينما وتغدوا وبعدها رجعوا السكن ..
فجر كانت تحس انها مستانسه مع البنات وبدت تتاقلم معاهم .. وشوي شوي بتقدر تحفظ المنطقه وتقدر عقبها حتى تطلع بروحها ..

****

الساعه 2 الظهر طلعت ناعمه من دوامها مروحه بيتها .. كانت تسوق وترمس في التلفون مع صديقتها امل .. كانت نبرة صوتها حاده وعاليه وتدل على غيظ كبييير وقهر ..

امل: انا قلتلج من قبل انه الموظف هذا مب هين
ناعمه: الحيين انا يقوم يشتكي عليه عند المدير على شو
امل: ناعمه انتي ماتعرفين تسكتين عنه دومج محطيه راسج براسه
ناعمه: يخسي الا هو اسكت عنه.. انا براويه شغله الخايس
امل: ماتوبين انتي شو بتسوين بعد ؟!
ناعمه: بخبر عليه سيف بخليه يتصرف وياه
امل: ياربي اسميه هذا سيف مبتلي من وراج
ناعمه: اموووول
امل: هي والله صدق
ناعمه: امل انا مب ناقصتنج انتي الثانيه
امل: خلاص انزيين بنسكت ما بنعلق..
ناعمه: يكووون احسن ..

وفها الوقت وقفت ناعمه عند الاشارات .. وخذت اخر جهه من الشارع عشان تلف يسار .. انشغلت ناعمه بالتيلفون والهذره ويا ربيعتها ..و لما صارت الاشاره خضرا انتبهت ناعمه الها وبدل ماتاخذ الناحيه اليسار مشت على طول ودعمت السياره اللي كانت حذالها وبتلف يسار ..
وقفت السياره بسرعه وتمت يالسه مكانها من الخوف .. تلفونها ماتدريبه وين طاح ونزلت من السياره على طول تشوف اذا اللي في السياره الثانيه صابه شي خصوصا انه الظربه يت عند باب السايق .. مشت وهي خايفه وتوجهت للسياره الثانيه .. كان فيها شاب دقت عليه الدريشه و اصابعها ترجف..
ناعمه: انته بخير !!
لكنها ماسمعت شي كان يشوفها ويحاول يفتح الباب لكن ماقدر .. وحاول انه يتحرك ونزل من الباب الثاني
ناعمه: انا اسفه ماكنت اقصد
سلطان: عميا انتي ماتشوفين ؟ واقفه عشان تلفين يسار شو اللي خلاج تمشين سيده ؟!!
ناعمه وهي خايفه: كنت ارمس بالتلفون
سلطان: ياسلاااااااام عليج ارمسي وسولفي وادعمي خلق الله
ناعمه: انته ليش تصارخ عليه
سلطان: احمدي ربج انا مامديت ايدي عليج .. خس الله هالويه .. انطبي خليني بتصل حق الدوريه

اتصل سلطان وسارت ناعمه صوب سيارتها تدور تلفونها واتصلت حق زوجها ..
وصلت الدوريه وخططوا الحادث وطبعا الغلط كان راكب ناعمه وفوق هذا خذت مخالفه بسبب كلامها بالتلفون ..
في هالوقت وصل سيف لمكان الحادث .. واول ماشاف سلطان تم واقف وكانه مشبه عليه .. سار صوبه بيرمسه ..

سيف: السلام عليك
سلطان: وعليكم السلام
سيف: اسمحلنا ياولدي وان شاء الله السياره بنصلحها لك..
سلطان تم يطالعها وكأنه هو الثاني مشبه عليه ..
سلطان: ماعليه .. بس قولها لاتم ترمس في التلفونات وهي تسوق بتجتل خلق الله
سيف: ان شا الله .. منو اسمك انته ؟
سلطان: سلطان
سيف: عاشت الاسامي
سلطان: عاشت ايامك ..
سيف لف صوب السياره بيشوفها .. ورد لا ارادي لسلطان وتم مركز فيه ..
سيف: سلطان انته ولد منو؟!
سلطان عقد حياته
سيف: شو اسمك بالكامل؟
سلطان بدون تردد: سلطان سالم بن مانع
سيف: يدك سلطان بن مانع؟؟
سلطان وكأنه بدى يشك بمعرفته لها الشخص بس ماعرف منو ها بالضبط..
سلطان: هيه .. ابو الوالده ..
سيف: هممم يعني راشد خاالك ؟
سلطان: هيه خالي ..
سيف ابتسم وهو يشوف سلطان .. ماشالله كبروا الشباب .. يذكرهم يوم هم صغار..كان متعلقنهم واايد خصوصا عيال راشد .. ماكان الله رازقنه بأولاد هاذيج الايام ويشوف عيال راشد وشيخه بمثابة عياله ويحن عليهم وايد .. غمض عينه وخذ نفس على هاذيج الذكريات الحلوه ورد فتحها بسرعه وهو يشوف سلطان جدامه بنظرة تساؤل منو ها الشخص! جاوبه سيف من غير ما يسأله..
سيف: انا سيف بن مايد
سلطان اطالعه وقال بلا مبالاه: اهاا .. طليق خالتيه..
سيف سكت ولا رد عليه ..
سلطان: و انا اشوف شكلك مب غريب عليه
سيف: انا بعد اول ماشفتك حسيت بان شكلك مألوف.. اكيد انا شايفنك في الشغل ويا خالك ..
سلطان: يمكن .. لان انا اشتغل وياه
سيف: ماشاء الله .. اسمحلنا عيل ياسلطان وباجر ان شاء الله بتستلم ورقه التصليح وتراها علينا
سلطان: ماعليه ماتقصر
سيف: سلم على ابوك
سلطان: الله يسلمك .. يلا فمان الله..
سيف: الله يحفظك..

رد سيف عند حرمته اللي كانت يالسه فسيارتها .. فتحتله الدريشه ..
ناعمه: شو اتسوي ها الكثر ..
سيف: ماشي .. يلا ردي البيت بلحقج ..
ناعمه: اوكي
ركب سيف سيارته ولحق حرمته .. واول ماوصلوا البيت يلست ناعمه تتحرطم وتسب فسلطان .. سيف قال بيخبرها ها الشخص منو بيشوف ردت فعلها..
سيف: انتي عرفتي ها منو؟
ناعمه: وكيف بعرفه بعد !!
سيف: هذا ولد خالة البنات
ناعمه: بناتك
سيف: هي .. ولد اخت عليا ..
ناعمه: هييه .. انزييين الا طالع ملسون مثلهن
سيف: هههههه احين انتي صدق سالفه .. انتي اللي داعمه وتتحرطمين بعد
ناعمه: اصلا هذا قليل ادب مايحترم وتم يزاعج عليه
سيف: لاترمسين غير المره بالتلفون وانتي تسوقين
ناعمه: اوف بس لاه بروحي متغصصه من الدوام
سيف: محد ظربج على ايدج وقالج داومي انتي مب محتاجتنه
ناعمه: بس انته الثاني مب متفيجه لك

ودخلت غرفتها وسكرت الباب وراها .. اما سيف قام ونزل تحت .. اليوم بسبة ناعمه أخر الكل عن الغدى وهم يتريونهم .. دق لناعمه يقولها عن الغدى بس من غصتها مابغت تاكل شي .. ويلسوا الكل ع طاولة الاكل وخبرهم سيف بالحادث اللي استوى .. وبنات عليا استغربن الصدفه العجيبه هاي اللي خلت سلطان يطيح فلسان ناعمه وبتم طول اليوم تهذي بالسالفه هاي..

****

ع الساعه 10 فليل .. في سكن الطالبات في العين .. طلعت مي برع الجناح وفايدها اللاب توب ويلست في الصاله .. فتحت المسن بتشوف احلام شو تباها .. اول مادخللها المسن على طوول استقبلت رساله من احلام ..

احلام: واخيرا دخلتي من متى اترياج
مي: فديتج كنت اتسبح وعقب يلست اتلبس واتكشخ وجيي .. فما قريت المسج الا قبل شويه
احلام: وحق منووو تتكشخين هااا
مي: حق ريلي .. حق منو بعد بتكشخ !!!
احلام: وياراسج .. عفنت من كثر ما اترياج
مي: فديتج والله .. يلا ماعليه .. انزين شو الموضوع المهم اللي تبيني فيه ع المسن وما يستوي تتصليلي وتخبريني به؟؟
احلام: هههههههههه تبين تعرفين
مي: يلا قولي
احلام: ماشي كنت بعطيج ها الصورتين واحتفظي فيهن
مي: اي صورتين
احلام: صورتين بتشوفينهن عقب شويه .. بس امانه ماتحذفيهن من عندج .. والله يوم طاحن فايدي ها الصور ماتعرفين كيف ارتبشت ..
مي: انزين طرشي يلا بنشوف
طرشت احلام الصورتين .. ويوم وصلن لمي فتحتهن .. ماعطت الصوره الاولى اهميه تذكر لانها ماعرفت منو ها الياهل .. بس يوم شافت الصوره الثانيه بهتت ..
وردت ترمس احلام ..
مي: من وييين لج ها الصور؟؟؟
احلام: الاولى تراها يوم هو ياهل
مي: حسيت ..
احلام: شرايج بها الانجاز
مي: صدق انج ..
احلام: شو صدق اني ..
مي: وايد متفيجه احلااموه .. تخيلي حد جكج شو بتسوين وشو بتقولين حزتها
احلام: ماشي بقولهم بيود صوره لخطيبته فيها شي
مي: حلاااامي شو ها الرمسه البايخه
احلام: جب انتي البايخه
مي: انا مادري ليش انتي معوره راسج بها السالفه .. كل يوم والثاني ناطلتلي اتيبيلي خبر عنه ..
احلام حزت فخاطرها ها الرمسه وماردت على مي ..
مي: حلامي وينج؟
احلام: شو تبين!
مي: والخييبه زعلت .. فديتج ما اقصد شي .. لاتزعلين مني
احلام: ما بزعل .. بس انتي مب ويه حد يسويلها خدمه انسانيه
مي: ههههههههههه فديت الانسانيه انا ..
احلام: جب يلا .. اصلا انتي ها الاسبوعين مول مب عايبتني شو يعني الجامعه غيرتج
مي: يالله مالحقت الجامعه تغير شي فيني .. احلام انا مثل ما انا لا الجامعه ولا غيرها بيغيروني عليج ..
احلام: اشك الصراحه
مي: افااا والله ماكان العشم بنت الخال..
احلام: ميوه صدق ارمس

مي صخت دقيقه .. بدى الموضوع جدي وحست انه لهجة بنت خالها بدت ترق اكثر من خلال الكتابه.. مي فشو قصرت ها الاسبوعين من سارت الجامعه ؟! ممكن خفت الاتصالات امبينهن .. لكن مب لدرجه انها تتغير عليها ..

مي: حلامي تعوذي من بليس.. انا مستحيل اتغير ع بنت خالي.. ليش شو تكون الجامعه عسب تغيرني .. ومنو يكونن البنات اللي فيها عسب يعوضني عنج؟! حلامي لاتحطين ها الافكار فراسج ..بتمين غير الناس عندي..

احلام وهي تقرى الرمسه حست بغصه فحلجها .. تولهت وايد على مي .. صح مي من شهرين انتقلت عنها لبيت ثاني .. لكن كانت تحس بتواجدها الدايم وياها اما الحين وهي فالعين تحس فعلا انها تفتقدها واايد .. وغيرت من العتب اللي كان وااضح فرمستها وجلبت الحوار امبينهن الى سوالف وتنكيت .. وفالاخير مي ترخصت من احلام لان ساره لزمت عليها تظهر وياها وتشوف الاجواء كيف بالسكن يوم الثلاثا .. قبل ما تبند مي اللاب .. نقلت الصور اللي عطتها ايايهن احلام من الملفات المتلقاه لفولدر خاص بمي .. تمت تتأمل الصوره وارتسمت بسمة رضا على ويها وهي تشوف صورة فارس حاليا وهو متغتر وباينه ملامحه عدل اللي كانت مي ناسيه تفاصيلها .. لكن بعدها ما ابدت اهتمام لها الموضوع .. مجرد كلام كبار ماوصلها شخصيا ولا رسميا ماتقدر تبني عليه آمال ..

ودت اللابتوب الحجره ونزلت عند ساره اللي كانت تترياها .. قالن بيسيرن عند بنات عمتهن فالسكن اللي حذالهم .. تمشن وهن يسولفن عن دواماتهن .. شافت مي مجموعه كبيره من البنات يمشن ساير راد .. طول الاسبوع ماكانت راضيه انها تنزل وتشوف المكان .. تكتفي باليلسه جدام المبنى .. والحينه تشوف ها الكم من البنات .. لفت ع ساره اللي كان عايبنها المنظر..

مي: ساروه شو ها الزحمه .. وين تبيبنا؟
ساره: يااسلاام شاارع
مي: شو شاارع؟
ساره: ميوه كم بنفهمج .. ها اللي مستوي الحين يسمونه شارع .. شوفي كيف يستهبلن البنات .. والله وناسه ..
مي: ها شارع الحب !!
ساره: هههههههه اي شارع حب يا الهبله
مي: شدراني انا .. يقولون فالجامعه هاي السوالف
ساره: وايد عيل يرمسون عن الجامعه وفيه الشي الغلط وفيه الصح
مي: ساروه كيف جي البنات ..شو ها الحركات..اخيه طفاسه..
ساره: بتشوفين الطفاسه وبتشوفين الهبل وبتشوفين كل شي صبري على عمرج .. والله يوم نكون شله شو نقطعهن هاذيل البنات ..
مي اطالعت ساره بنظرة كئيبه ..
ساره: شو بلاج؟
مي: احس يوم الواحد يكون غريب ما يخترش
ساره: كيف جي بعد
مي: يعني انا بعدني مول ماعرف حد .. وايد رسميه فتعامليه
ساره: ميوه بعدج الا اول اسبوع ها.. يوم بتندمجين ويا البنات وبتكونيلج ربع وشله بتخترشون وبتخرشون اللي وياكم ..
مي: ممم الله كريم ..
حطت ساره ايدها ع جتف ميوه تحثها ع المشي ..
ساره: يلا ميوه.. ماشي الا ها الطريق اللي يودي لمقام واحد .. يعني لازم ندخل الشارع
مي: ساروه شوفي هاذيل مخبل يمططن شعور البنات ..
ساره: ماعليج ..
مي: والله بتضارب وياهن اذ صكني
ساره: بل عليج .. صدق انج مستجده
مي: يلا عاد .. لا تطنزين
ساره: انزين طوفي طوفي .. محد بيقرب صوبج من الله اغلبهم ربعي ..

ومرن مي وساره امبين البنات .. ووصلن الصوب الثاني بالسلامه .. وساره اطالعت مي وضحكت .. اختها اول مره تشوف ها الاجواء لازم بتم خايفه وماتعرف تتعامل ويا ها الاوضاع .. قبضتها من ايدها وكملن دربهن لمبنى بنات عمتهن .. وهن فدربهن اتصلت ساره بأسما تتخبرها عن مكانها ونزلت هي واللي كانت وياها و لاقفن ساره ومي ..
مي ماااكاااانت تأمل أبدا انها تشوف ها الانسانه .. ولكن اليوم شافتها ويا بنت عمتها .. سلمت فاطمه على ساره .. ولفت صوب مي وسلمت عليها بحراره وتمت ماسكتنها من ايدها ..

فاطمه: يالله وين متخبيات انتن طول الاسبوع ..
ساره: هههه انا عني ما اظهر من المبنى ..
مي حاولت تخلص عمرها من مسكت ايد فاطمه .. فاطمه لاحظت ها الشي وبطلت ايدها .. اما مي دارت الصوب الثاني حذال اسما بنت عمتها ..
اسما: زين منكن عيل ظهرتن اليوم .. عنبووج ساروه اختج مستجده المفروض كل يوم تظهرين وياها ..
ساره: هي تظهر بروحها ويا بنات الجناح .. ماشالله تعرفت ع بنات الجناح وتأقلمت وياهن بسرعه ..
مي: انزين ما نظهر بس نيلس تحت المبنى ..
اسما: ماعليه المهم ارتحتي لبنات الجناح
مي: كلهن طيباات .. ووناسه اليلسه وياهن ..وبعدين اعرفهن من قبل ما ايي الجامعه ودوم ساروه تعطيني وحده منهن ارمسها..
مي ماقدرت انها تكمل كلامها من شافت نظرات فاطمه .. ماتعرف ليش ها الانسانه جي وياها .. ها ثاني لقاء وياها ونظراتها جي .. احمرن خدود مي وارتبكت .. ماعرفت تكمل الكلام وآثرت الصمت .. وردن هن الاربع فوق لانه ساره ومي متفقات ييلسن شوي عند لطيفه .. وبعد نص ساعه نزلن من عندها وسارن وين يمعة البنات ويلسن هن الاربع ع طرف يشوفن ربشة البنات ويعلقن ع الساير والراد .. ومي يالسه حذال اسما وبعيد عن فاطمه وكانت شوي مرتاحه لانها بعيد عن ها الانسانه ..


انطبـــاعكم؟!