الجزء الثامــن والعشــرون

*********************
(الأحد) 24 ابريل 2005
*********************

الساعه 11 الظحى كانت ام سيف يالسه في الصاله ويا ربيعتها ام خالد ووحده من حريم ييرانها بعد .. وطبعا كعادة الحريم سوالفهن ماتخلص.. قطع على ام خالد سالفتها صوت التيلفون وهو يرن ..

ام خالد: هاي اكيد مريوم بنتج
ام سيف: مادري يا ختي.. مساعه مرمستنها .. خل نشوف منو ..
رفعت ام سيف السماعه ..
ام سيف: السلام عليكم
الريال: وعليكم السلام .. هذا منزل جاسم سيف
ام سيف: هيه نعم بلاه جاسم
الريال: انا الاخصائي الاجتماعي .. بس حبيت اسال اذا اطلعتوا على شهاده جاسم للتقويم الثاني ؟
ام سيف: والله مادري هو ياب شهاده لكن من زمان يايبنها
الريال: لا هاي نحن عاطينه اياها اول امس ورجعها هو البارحه
ام سيف: ماشفناها
الريال: عليها توقيع ابوه
ام سيف: يمكن عيل ابوه شافها .. بنتاكد وبنرد عليكم خبر
الريال: مشكوره الوالده .. فمان الله
ام سيف: فمان الكريم
سكرت ام سيف التلفون وهي مستغربه من ها الاتصال.. ليش يعني الاخصائي داق يتأكد ..
ام خالد: ها ام سيف عسى ما شر
ام سيف: لا لا ماشر .. ها استاذ جاسم يتخبر عنه
ام خالد: هيه حليلك يا جسوم ..

وتمت ام سيف ويا الحريم اللي وياها لين ما ترخصن عنها وروحن .. و ع طول سارت تتصل فسيف ولدها تبا تعرف شو سالفة الشهاده هاذي..
سألت سيف اذا وقع على شهادة جاسم اللي يايبنها ها اليومين لكنه نفى ها الشي .. وزاد استغرابها .. رجعت اتصلت ف ريم يمكن جاسم يابلها طاري الشهاده..

ريم: ماقالي انه عطوه الشهاده حتى
ام سيف: جان مب راسب وداسنها عنا .. ابوه يقول ماوقعها و الاخصائي يقول موقعه من الابو ..
ريم: بسم الله لاتقولين جيه امايه شو يرسبه تراني ادرسه واميه ادرسه شو بيرسبه بعد ..
ام سيف: ماعليج هو بيي من المدرسه وانا بتصرف وياه ..
ريم: انزين امايه طمنيني
ام سيف: ان شاء الله .. يالله برايج مع السلامه
ريم: مع السلامه ..
عقب مامرت ساعه ونص .. وصل جاسم من مدرسته هو واخوه مايد ..
فر جاسم الكتب على الارض وطاح ع الغنفه ..
جاسم: ميوود فرلي دبة الماي هاذيج
مايد: ها اندوك القفها..
جاسم: يالله اسميني عطشان ..
ام سيف: قوموا يالله سيري اتسبحوا
جاسم: تعباااااااان ماروم انش

ام سيف كانت مفكره في طريقه تعرف منها اذا كان جاسم هو نفسه اللي موقع شهادته بدون مايراويها حد والا لا.. كانت فايدها ورقه وقلم .. وورقة ايصال عليها توقيع سيف ولدها .. ويلست حذال جاسم ..

ام سيف: مايد ابويه تعال شويه
مايد: ان شاء الله
ام سيف: ابويه تروم تقلد ها التوقيع فها الورقه..
مايد: ممم .. توقيع ابويه؟
ام سيف: هيه..
مايد: ليش ..؟
ام سيف: عندي ورقه وابا ابوك يوقعها لكنه تأخر وايد
مايد: هيه ..هاتي بجرب ..

خذ مايد الورقه الفاضيه من ايد يدته وخذ الورقه اللي عليها توقيع ابوه وحطاهم ع الطاوله وهو يحاول يقلد التوقيع.. نقز جاسم من مكانه وتم يطالع مايد اللي مول ماقدر يضبط التوقيع وينعرف انه مقلد ..

جاسم: انته شدراك ابوي.. هات هات انا بجرب
مايد: امايه طلبت مني انا ..
جاسم: امايه ها ما يعرف انا بوقعلج والله بيعيبج
ام سيف: والله..
جاسم: هيي
ام سيف: عطه ميود خله يراوني ..
خذ جاسم الورقه عن مايد ويلس حذال يدته وهي تراقبه..
جاسم: هاا شوووفي نفسه بالضبط ما يفرقون امبينهم..
ام سيف عقب ماتاكدت انه توقيع جاسم نفس توقيع ابوه قبضته من اذنه
ام سيف: مسود الويه يا جسوم ..عيل انته اللي موقع على شهادتك بروحك ورادنها المدرسه من غير ما تراويها حد هنه ..
جاسم وهو يستغبي: لا ماوقعت
ام سيف: جذاب اليوم المدرسه اتصلوا وقالوا ابوه موقع الشهاده وابوك يقول انا ماشفت لا شهاده ولا وقعت على شي .. واحين ظهرت انته موقعنها بروحك ياللي ماتخيل على ويهك .. جيه شو فيها الشهاده داسنها عنا
جاسم وبلا مبالاه: هي وقعتها انا .. مابا تيلسون تنازعوني
ام سيف: راسب؟
جاسم: لا بس درجاتي نازله وايد ع الحفه
ام سيف: كم يايب
جاسم: 57 في الانجليزي ناجح بس وايد نازل والعربي بعد نازل ..
ام سيف: وشحقه نازل جيه ؟ ماجنه محطيلك مدرس انجليزي يرطن من صوب وريم ترطن وياك من صوب ونعوم قامت بعد تفازعك في واجبات الانجليزي وامك ماقصرت وياك ..
جاسم: انزين شو اسوي انا ماقدر اكثر عن جيه
ام سيف: عنبووه فالانجلييزي والعربي طايح .. شو من لغه عندك عيل انته
مايد: رطين هندي ها خخخ
جاسم: جب انته..
ام سيف: ها كله من اللعب والرباده لكن خبرك عند ريموه
نش جاسم عن يدته وصعد فوق وهو يتحرطم
جاسم: اوووه كلكم فتانين الواحد من يسوي شي.. البيت كله يعرفه
لاقفته ناعمه وهي نازله من الدري
ناعمه: بلاك جسوم
جاسم: اسكتي عني انتي بعد بروحج اكبر وشايه
وروح عنها
ناعمه: وشايه في عينك يا الطفس
ام سيف: خليه خليه ماعليج منه ها مسود الويه
ناعمه: بلاه
ام سيف: موقع في الشهاده مكان ابوه لانه نازله درجاته
ناعمه: راسب؟
مايد: لا مارسب بس علامته نازله
ناعمه: برايه انزين يوم مارسب المهم ينجح
ام سيف: لا مب المهم بس ينجح .. ييلسون يعلمونه ويدرسونه وخلاف ينجح ع الحفه.. ياكل عيشه الطفس


طبعا مانتهت السالفه عند هالحد ام سيف اتصلت تخبر سيف اللي ابدى تسامحه من تصرف ولده وانه كان خايف .. اما ريم كانت رده فعلها غير .. عصبت من حركه اخوها هذي لكن هذا جاسم متعودين ع شطانته ونشاطه المفرط .. وهي لو انها عرست بس بعد ما قصرت وياه كل ما سنحت لها الفرصه يت ودرسته .. صح الاهتمام اختلف عن قبل .. لان قبل كان الوحيد اللي تهتم فيه .. اما الحين شاركه فيها نايف اللي خذا الوقت الأكبر من حياة ريم .. شي طبيعي دام ريلها .. لكن ريم بدت تفكر بأسلوب ثاني تتبعه ويا جاسم دام هاي علاماته عشان ما يفكر انه ريم روحت عنهم وما بتسأل عنه خلاص ..


****

قبل صلاه العصر طلع عمار من الفله وهو يتلفت يمين شمال .. تأكد من خلو المكان وكمل دربه وهو يرمس بالتلفون ..

عمار: لا لا ماعليك .. اصبر انته شوي وانا بمر عليكم .. يالله باي

سكر عمار تلفونه وتوجه للكراج .. ولقى سياره البيت مفتوحه كعادتها مثل مايخليها الدريول دايما وسويجها داخلها ..
ركبها وطلع من البيت قبل ماحد يشوفه .. مر على 3 من ربعه وساروا المسيد يصلون .. وعقب طلعوا يحوطون ..
وظمن حواطتهم وقفوا عند مطعم يطلبولهم سندويشات ولسوء حظ عمار طافت دورية شرطه حذالهم .. وانصاد عمار وهو يحاول انه يتهرب من نظرات صاحب الدوريه عساس ما ايي يكلمه ..
وقف الشرطي يرمس عمار ..

الشرطي: ها شباب .. مبسوطين اشوفكم ..
عمار وهو متلعثم: ماشي نطلبلنا اكل ..
الشرطي: انزين يا الزعيم .. وين الليسن!
عمار: ماعندي ..
الشرطي:لازم ما عندك يبين عليك بعدك ..
عمار: انزين بنرد الحين..
الشرطي: وين بترد..عطني ملكيه السياره ؟
عمار: مادريبها وين
الشرطي: لازم ينحجز الموتر
عمار: لا مابتحجزه مب عاطنك اياه
الشرطي: شو اسمك انته ؟
عمار: عمار خلفان الـ,,,,,,,,
الشرطي سكت وكانه تذكر الاسم..
الشرطي: نايف اخوك ؟
عمار: هيه
الشرطي: اها ..

اهنه ماعرف الشرطي شو بيسوي بها الموضوع .. ولكن تقديرا لمعرفته بنايف حاول انه يحل الموضوع بدون تدخل الاداره ..

الشرطي: قوم انزين بسير وياك البيت وانا بسوق الموتر والدوريه بتلحقنا
عمار: اوكي بس اول وصل ربعي
الشرطي: يتشرط بعد قوم انزل
نزل عمار وساق الشرطي مكانه ووصلوا باقي ربعه واتوجهوا للبيت ..
الشرطي: ازقرلي الوالد
عمار: مب موجود ماشوف موتره
الشرطي: انزين الوالده
عمار: اوكي اتفضل الميلس حياك الله
الشرطي: لا مشكور بس ازقرلي الوالده
دخل عمار الصاله حصل امه يالسه في الصاله تطالع التلفزيون..
عمار: اميه
مريم: انته وين سرت ؟ هالكثر ساير بتصلي العصر مارديت لين احين .. اكيد سرت تلعب كوره والا واقف ويا فروخ الفريج .. انا اتصلت حق امي اتحراك سرت عند عيال سيف قالت ماشافوك
عمار: شوي شوي بسم الله بلاج .. تقول حافظه الرمسه عشان من ادخل تسمع.. تعالي برع حد يباج
مريم: منو يباني ؟
عمار: شرطي
مريم: وابويه .. شرطي .. عوذ بالله شو مسوي
عمار: مب مسوي شي تعالي انتي
دخلت مريم لبست عباتها وظهرت للشرطي
مريم: السلام عليكم
الشرطي: وعليكم السلام ..
مريم: خير ابويه شو مسوي عمار ؟
الشرطي: خير ان شاء الله لكن خالتي هو طالع يسوق بدون ليسن والحمدلله انا هالمره شفته وانا اعرف نايف وقلت مابسويله مشاكل لكن لو حد ثاني شافه مابيخليه في حاله يمكن يحجزون عنه الموتر
مريم: خذه احجزه هووو فكنا منه
الشرطي: لا مايحتاي خالتي لكن لاتعطونه السياره بدون ليسن
مريم: محد عطاه يابويه ..
الشرطي: حصل خير خالتي .. اسمحيلنا ع الازعاج
مريم: مشكوور ابويه مشكوور ماقصرت
الشرطي: العفو ..سلموا على نايف قولوله عبدالله مصبح
مريم: والنعم ..الله يسلمك ماقصرت ماقصرت
روح الشرطي ورجعت مريم تتحرطم ع ولدها اللي كان يالس في الصاله ياكل موز
مريم: مسود الويه انته منو عطاك المفتاح
عمار: بروحي خذته .. وبعدين شو يعني كل الشباب يسوقون بليا لياسن هاييل شرطه الدوريات بروحهم يحبون يتفلسفون من قله المونه مايعرفون شو يسون
مريم: ماعليه الطفس خبرك عند ابوك
عمار: اوهو بتكبرين السالفه ع الفاظي
مريم: تستاهل عيل انا اقولك سير صل وانته تظهر تهوم لا مذاكره ولا عباده
عمار: والله صليت
مريم: والمذاكره ؟
عمار: احين انزين بذاكر شو استوى عاد
مريم: قوم ذاكر استاد تهايت واخر السنه تبى مدرسين عشان تنجح بالدز
عمار: انزين انزين .. جنه محد يدرس عندها الا انا
مريم: كلهم خلصوا وارفعوا الراس الا انته مغصصبي جنك بتحظر ما جستير
عمار: لا اله الا الله ساير اذاكر بس مب تخبرين ابويه ولا نايف
مريم: ان عدت سالفتك هاي والا غصصتبي في المذاكره بخبرهم
عمار: يودت علينا عاد احين
مريم: هي نعم بيود عليك .. يالله انهي
عمار: انزين


روح عمار فوق يراجع دروسه وتمت مريم مكانها معصبه منه لكنها ماتقدر تخبر حد .. ولدها ومايهون عليها يعرف عنه ابوه ويظربه او ينازعه ..

****

كانت مي يالسه في صاله الجناح تحل اسايمنت وفاتحه المسن وتسولف ويا ربعها الموجودين .. يتها منى شاله في ايدها كوبين حليب .. ويلست حذالها وناولتها كوبها ..

منى: ساروه وينها عيل ؟
مي: في الغرفه اظن ترمس ريلها ..
منى: اونج يعني مفظتلهم الجوو انتي ؟
مي: اوني .. ههه اخاف باجر انخطب ولو بغيت ارمس ريلي تستنذل ساروه عليه
منى: يعني مب لوجه الله
مي: ههههه
منى: ميوه بسألج سؤال محيرني!
مي: بلاج؟
منى: اشوفج ها الايام متعاطفه ويا فاطمه يعني؟! شو مستوي تسولفين وياها عادي وامشيه امورج
مي: ههههه الله يخس بليسج عبالي سالفه عندج
منى:وليش هاي مب سالفه .. من متى ابا اسألج ومالقى الوقت..
مي: شوفي الله يسلمج لاتفسرين تصرفي شي ثاني.. انا يوم طاحت علينا ساره حسيت بفاطمه صدق صدق تبا تكون ويانا وما تتخلى عنا .. ماعرف احسها بدت تعدل اسلوبها شوي .. يعني مب شرات قبل وايد تزن وتحن .. فهمت اني مهما صار مستحيل اني احبها كحب بنت وغيره وتحكم او اني اكون لها كلوز بمصطلح بنات ها الأيام.. بحبها مثل ربيعتي وبكون وياها قريبه وبحاتيها وبداريها حالها حال اي وحده من ربيعاتي ..
منى وهي تبتسم لمي: أحس تفكيرج وايد يعيبني.. ليش ماعرفتج من قبل عشان تقنعيني بها الفكره..
مي: ليش يعني!
منى: انتي قبل ماتين السكن شو كانت فكرتج للبنت الي تحب بنت؟
مي: ههههههه انا ايام مدارس يوم اشوف جي المعجبات والي يحبن وحالتهن حاله كنت اضحك عليهن .. احس انها مشاعر مزيفه او مثل ما تقولين عندهن نقص
منى: ليش !!
مي: يعني قبل جي كنت اشوف .. وانقهر من البنت الي تحب وتخلص لوحده ليش ريلها ونحن ماندري .. استغفر الله
منى: هههههه الله ياخذ بليسج يا ميوه.. بس تعرفين لا تجمعين ع الكل!
مي: صح انزين .. ترا قبل ما ايي الجامعه كان تفكيري كله جي بما انه في حب بين بنتين فهو مب اوكي .. لكن تعرفين السكن وايد غيرلي وجهات نظر .. يعني فكرتيه القبليه ساعات اشوفها بين البنات .. لكن في بنات عرفتهن محبتهن لربيعتهن شي ثاني بالعكس واشجع على ها الشي..
منى: كيف يعني
مي: منوه يعني انتي تشوفين ها الكلوز فريند الي حتى امره ماترومين ترمسين وحده منهن من كثر الغيره الصراحه هب حب هذا .. مصاخه .. لكن عرفت بنات صح كلوز فريند وربع وايد ويا بعض لكن هاذيل حبهن لبعض صادق مب بس شوفونا نحن كلوز نحب بعض .. يعني احس قلوبهن ع بعض يدارن بعض مايهونن ع بعض وغيرتهن فحدود هذيل هن صدق الربع القوو .. لكن الي تتحكم فربيعتها وسوي ولا تسوين لبسي ها لاتلبسين ها وتهد عليها الدنيا اذ وحده تعرفت عليها وساعات نشوف عليهن حركات يعني انا مووول ما ابلع الي جي ..

منى اطالعت مي وضحكت ..

منى: تعرفين من جي ياخذون فكره غلط عن سكنا .. سوالف كلوز وسوالف بويات..
مي: هي انزين والقهر انهم يجمعون ع الكل..
منى: ترا بس محط انظارهم سكنا نحن لانه اكبر سكن تقريبا .. ما يشوفون السكنات الثانيه ولا الجامعات الثانيه..
مي: هي والله..

سكتت منى وهي ترفع كوب الحليب وتشرب .. وشكلها سرحان فشي .. وشوي ..

منى: تعرفين ميوه!
مي: شووو؟
منى: ماعرف شو بتكون ردة فعلج مني او من أي صنف من البنات فبالج بس بقولج..
مي: قولي انزين
منى: تعرفين اني كنت ويا وحده وايد قو !!..
مي ابتسمت: هيه سمعت .. وعقب انهيتوا العلاقه؟
منى: هيه .. تعرفين انا صدق حبيتها وكانت أقرب انسانه لي.. لكن مول ماقدرت اللي عطيتها اياه
مي: ياما كنت ابا اعرف اللي استوى بينج وبينها بس ماتجرأ أسألج.. كمليلي شو صار
منى وهي تبتسم: ماشي ميوه .. تميت وياها كورس كامل قامت تتنازع ويايه ع أتفه الأمور .. ميوه أنا انسانه ولي مشاعري مابقولج ماكنت أغار عليها لكن مول ما أتحكم فيها ولا اقولها سوي هذا ولا تسوين هذا وغيرتي عليها ماتكون الا يوم تهملني
مي: انزين
منى: ماشي استوى بينا تتش وقمت كل مره احاول اني اخذ بخاطرها مع اني ما غلطت لذاك الزود بس بينت غيرتي عليها.. وزاد العتب وزاد اللوم .. قصرت ويايه وايد وانا كنت ادوس على ذاتي يا مي واحاول اجبر بخاطري بس عشان ما اخسرها ولو العشره ماتهون..
مي: اخيه وهي شو سوت
منى: كانت قاسيه وقويه.. والله ياميوه انا عمري عمري ماعزيت وحده واهتميت فيها كثر هاي.. كنت بريئه والله.. تعرفين كان يبين عليها انها خلاص مب متقبله مني أي شي لكني كنت احاول واحاول اني ما اخسرها وابين الها مهما صار اللي بينا اكبر عن جي ونحن ربع وايد ويا بعض المفروض مب أي شي بسيط يفرق بينا لكنها ماعرف كيف جي مره وحده تغير كل شي حلو عرفته فيها .. تغير اسلوبها وصارت جافه كنت اسيرلها وايلس وياها واقول ماعليه تحملي هاي ربيعتج لكنها مول ماتسويلي سالفه ما تضحك وياي سوالف بسيطه بس جنه شي يمنعها .. ويوم قلتلها انتي مليتي مني كارهتني تمت تحتشر عليه اونه انتي ليش جي تقولين.

مي تمت تطالع منى اللي كانت موخيه وهي تحاول انها تكمل كلامها..
حست منى بالضعف وغلبتها الغبنه لكنها تمالكت نفسها ..
وواصلت رمستها..
منى: اذكر مره يلست اقولها انتي ليش جي تعاملني .. قالتلي انتي تدرين باللي تسوينه وانا ماعندي أي شي اقوله لج.. قلتلها اوكي غلطت مب المفروض انج اطوفينها ها السالفه وتراعين كل اللي امبينا.. قالتلي ياما طوفتلج امور
مي: يالله عليها وتحاسبج..
منى: ماعرف يا ميوه وايد امور استوت وماذكر كل شي.. بس كانت صدق قاسيه وماتبا تسمع مني أي شي .. حتى قلتلها انتي ليش تحسسيني اني فارضه عمري عليج ليش تحسسيني انج ماعدتي متقبله مني شي قالتلي انا ماقلت جي ولا بينت ها الشي قلتلها اللي تسوينه شو عيل!
مي: انزيين
منى: كانت سخيفه ما قدرت مني والله .. وماشي قمت أبعد عنها وأرد اقول ولو بتم ربيعتي وبتم أسأل عنها .. فالأخير قالتلي خلينا نكون ربع عاديين
مي: احس صعبه
منى: واايد .. غير ميوه يوم انج تميزين وحده عن الباجيات وتكون لج البست فريند.. وفالأخير تقولج والله عامليني عادي.. كيف اعاملها عادي وانا كنت أكن الها مشاعر غير عن العاديات ..
مي: صدق انها هبله .. خسرت اللي صدق مشترنها
منى: كيفها .. المهم انا يوم اشوفها أسلم عليها واروح ماقدر اني اجامل نفسي وانافقها هيه.. ماقدر اتعامل وياها ..
مي: منوه
منى: هلا!
مي: بعدج تكنين الها ها المشاعر؟
منى: همم انا غبيه ادري هي..بس والله اني واايد افتقدها وافتقد ايامها واحس اني ابا اكون وياها نفس قبل لكن مستحيل اقولها ها الرمسه لانها ع قولتها ماتبانا كلوز تبانا ربع عاديين..
مي: يعني كنتوا كلوز
منى: الكل يقولنا كلوز وقصينا على عمارنا وصدقنا ههه ..
مي: اف شو اكره ها الكلمه.. قولي ربيعه قو..سبشل ..بيست فرند..
منى: بناتنا ماعندهن غير كلمة كلوز
مي: سخيفات..
منى:بس تعرفين هي بروحها الحين تشوف كيف انا ما سويلها سالفه واحس كبريائها ما يخليها تصارحني بشي.. لكن نظرة عيونها تبين .. تهربها الدايم يبين .. بس كيفها انا ماقصرت فشي وأسأل عنها من فتره لفتره..
مي: يحيج.. تسوين اللي عليج يعني .. والله ها البنات مشاكل ما يقدرن أي شي يتسوالهن .. من جي انا ماحب اتعلق فوحده مب كل انسان يصدق شعوره وياج الا يوم بتمرين ويااه فمواقف وايده تبين فيها نواياه وبتحسين انه صدق يعزج ويميزج ..
منى: هي والله..
مي: بس احسج من خاطرج حبيتيها
منى: صح حبيتها لكن مب الحب الي انتي ما تدانينه هههه .. كنت احبها واعزها كربيعه مقربه وايد وما اتحمل فيوم انها تبعد عني وتهتم لشخص غيري.. او اني ما اكون اعنيلها شي ..
مي: همم فاهمتنج ..
منى: لكنها ما قدرت أي شي .. خليتها في حال سبيلها وماظنها لقت الربيعه الي بداريها كثري..
مي: هي الخسرانه..
منى: ههه والله يا ميوه جلبتي المواجع
مي: لاتقولين مواجع.. اللي مايباج لاتصيحين تبينه..
منى: هههه الله كريم ..

قطعت على مي ومنى سالفتهم رنة تيلفون مي..
مي: وين ظاهره الشمس اليوم خالي محمد مفتكر يسال عني .. السلام عليكم ورحمه الله وبركاته
محمد: وعليكم السلام .. حشى كلتينا
مي: نسيتنا تراك ماقمت تسال عنا .. من غاب عن عيني سلى عن بالي
محمد: اسال امج واحلام عنج دوم
مي: مايكفي لازم تسالني انا شخصيا يمكن في اشيا هم مايعرفونها انته بتعرفها
محمد: ان شاء الله عمتيه .. اشحالكم
مي: الحمدلله
محمد: اختج اشحالها ؟
مي: زينه الحمدلله
محمد: انتي عندها ؟
مي: هي في الغرفه.. وانا في الصاله ليش؟
محمد : اتصلتبها توه ماردت عليه
مي: اهاا يعني لهاا الاتصال مب حقي ..
محمد: هههه افا عليج .. بنتصلج يبوج لا تحطين فخاطرج.. بس ابا ساروه فسالفه
مي: هي داخل .. احيدها ترمس مروان
محمد: انزين قوليلها تتصلبي احين
مي: ان شاء الله ..
محمد: يالله فمان الله
مي: فمان الكريم .. ماعرف بلاه خالي يبى ساروه
منى: سيري خبريها انزين
نشت مي وسارت صوب غرفتهم لقت ساره ترمس بالتلفون
مي: ساروه .. ساروه
ساره: شو ؟
مي: خالي محمد اتصلبي يباج
ساره: متى اتصلبج ؟
مي: توه
ساره: اوكي .. ها مروان .. خالي محمد داقلي يباني
طلعت مي عنهم وكملت ساره رمسه ويا مروان
مروان: ضاري يدقلج ؟
ساره: مب وايد الا جان في شي
مروان: عيل اكيد يبى يرمسج عن السالفه .. ترا هو اتصلبي بعد بس انا مارديت
ساره: ليش ؟
مروان: اكيد ابويه مطرشنه يسال اذا سويت التحاليل والا لا ..و امايه اتصلتبي ولارديت عليها بعد .. بس رديت ع سلطان ..
ساره: لاتحاتي مروان كل خير ان شاء الله
مروان: وين ماحاتي .. انا شو بيرقدني لين باجر
ساره: مروان اتعوذ من ابليس وكل شي ربك بيسره
ساد الصمت مره ثانيه بينهم .. كلن له افكاره اللي مايشارك بها الطرف الثاني ..
ساره: مروان خالي محمد متصل ع الخط الثاني ..برد عليه وبرجع اتصل بك
مروان : اوكي
سكر عنها مروان وردت على خالها اللي كان متصل ..
ساره: الوه
محمد: السلام عليج
ساره: وعليكم السلام هلا خالي
محمد: اشحالج اميه ؟
ساره: الحمدلله انته اشحالك ؟
محمد: الحمدلله بخير.. اتصلبج ماتردين عيل!
ساره: اسمحلي
محمد: مروان شحاله ؟
ساره: الحمدلله ..
محمد: سار سوى التحاليل ؟
ساره: خالي راشد مطرشنك تسال
محمد: لا محد مطرشني انا بروحي اسال
ساره: ليش ؟
محمد: ابا اطمئن عليكم
ساره: يعني مب خالي مطرشنك ؟
محمد: ساروه شو هالرمسه بعد مطرشنك ومب مطرشنك ..
ساره: تحريت هو يبى يعرف لانه مروان مارمس ابوه
محمد: ومروان شحقه مب طايع يرد على حد .. لا ابوه و لا انا ومايندرى جان حد بعد دقله ومارد عليه
ساره: خالي شو تباه يقولكم يعني انا لو تبى الصدق اتمنى التحليل ها مايستوي لكن اعرف مابتسكتون عنا ولو مب اني سالت حد عن علاج للمرض وحسيت انه فيه علاج صعب ع الاقل احسن من ماشي جان ما تميت اطمنه يسير يسوي التحاليل..
محمد: وشو العلاج اللي خبروج عنه ؟
ساره: لو طلع مروان لا قدر الله حامل الجين .. ايوز نتزوج عادي لكن نسوي فحص للجنين اذا ماكان فيه المرض نخليه واذا
محمد: واذا فيه تعقونه ؟
ساره: هيه
كان محمد ناوي يجادل ساره على هالحل لكن حكمته في وزن الامور خلته يتريث وياخذها على قد تفكيرها في ايجاد أي شكل من اشكال الحلول عشان تتشجع شوي..
محمد: اوكي مب مشكله .. مروان سوى التحليل والا ؟
ساره: سوى
محمد: والنتيجه؟
ساره: باجر
محمد: قل لن يصيبنا الا ماكتب الله لنا .. صلي وادعي ربج وكلنا ندعيلكم امايه لاتمين مظيجه بعمرج
ساره: ان شاء الله
محمد: رمسي امج ان اتصلت لاتطنشينها عشان خاطر خالج محمد
ساره: ان شاء الله خالي
محمد: يالله تحملي من عمرج .. مع السلامه
ساره: مع السلامه

سكرت ساره التلفون عن خالها وهي تحس بحرقه في قلبها قبل عينها .. الخوف مستوطن فيها ولاتقدر تشاطره حد حتى مروان نفسه لانه اللي في مروان نفسه اللي فيها .. انفاسهم الصامته خلال التلفون هي بس اللي تشارك الثانيه نفس الخوف والترقب .. اجلت اتصالها لمروان وسارت تتوضأ عشان تصلي وتقرا قران عسى الله يجعل من بعد عسر يسرا ..

****
بعد صلاة العشا .. كانت عليا يالسه فغرفتها وتجلب دفتر تحضيرها .. فكرها منشغل بالسالفه وما تقدر انها تركز .. كانت واعده اتدرس احلام قواعد نحو بعد العشا.. تذكرت وسارت لين غرفة احلام .. دقت عليهم الباب ودخلت ..

احلام: هلا عموه
عليا: ها حبيبتي .. تبيني اشرحلج
احلام: لا برايه عموه ذاكرته توني
عليا: انتي قلتيلي امس انج مب فاهمه
احلام: شكلج تعبانه .. ماروم اعبل عليج ..
عليا: لا عادي فديتج .. هاتي كتبج وتعالي حجرتيه ..

شلت احلام كتابها وسارت غرفه عمتها .. حطت الكتاب وفتحت على واحد من الدروس اللي مب فاهمتنها..
اطالعت عليا الدرس .. وبدت تعطي احلام اساسيات ف الشرح .. فتحت وياها كتاب التطبيقات يشوفن تمارين ..
طلعتلها فقره اطلع منها اعراب الكلمات اللي تحتها خط . الجواب كان موجود فالكتاب بس عليا بغت احلام بروحها تجاوب ..
تمت احلام تفكر وكل شوي تسأل عليا .. اللي اتم متردده فالجواب .. قامت تقولها اشيا غلط وترد عليا تراجع الجواب وتصحح المعلومه ..
حست أحلام انه عمتها مش على بعضها .. فيها شي بس مب عارفه شوهو ..
شكل عليا كان مول مب مركز .. احلام تمت ساكته وحاولت تحل صح وتقارن اجابتها بالاجابات اللي عندها ..

احلام: خلاص عموه فهمته الدرس
عليا وهي متلومه من احلام: فديتج شكلي مضيعه اناا اليوم
احلام: لا عادي فهمته .. تبين اييبلج شي شكلج تعبان.
عليا: لا فديتج .. سيري انتي ذاكري .. وعقب ما نتعشى يمكن بالي يرتاح شويه..واذا بغيتي شي تعالي
احلام: ان شاء الله .. لا انا برد حجرتيه عندي قصيده ما خلصت مذاكرتها
عليا: زين شدي حيلج ..

طلعت احلام من حجرة عمتها اللي تمت يالسه وهي محطيه ايدها ع راسها وتفكر باللي صاير .. مب قادره صدق انها تركز في شي لين ما تتطمن على مروان وساره ..
بعد ماطلعت احلام من عند عمتها .. اتصلت حق مي تسولف وياها ..

احلام: اف تعبت من الدراسه
مي: بعدج فأول الدرب انتي ..
احلام: عندي باجر امتحان نحو وقصيده والله تعبت انا بقميه فالنحو
مي: جان خليتي اميه تشرحلج
احلام: فديتها ماقصرت بس حسيتها تعبانه شويه ومابغيت اثجل عليها
مي: ويه شو فيها؟؟
احلام: ماعرف .. احسها مب ع بعضها
مي: فديتهاا .. بدقلها خلاف اطمن عليها
احلام: يبالج..
مي: وعلومكم بعد
احلام: والله الحمدلله تماام.علومج انتي؟
مي: عايشين فها الدنيا ..
احلام: شحال العرساان؟!
مي: ههه روميو وجولييت..بأنعم حال .. دومهم الا يرضعون التلفون .. منو يقول ساروه جيه بتغدي .. صدق الريل يغير كل شي
احلام: هههههه حليلها .. الحين اظن خفت خراشتها فالسكن
مي: هي تقول البنات مال اول ..
احلام: اليديد حبه شديد
مي: هي والله هههههه
احلام: عقبااااالج يا ميووه ..
مي: ويه .. لا بعدني فديتج مابا املج وانا فالجامعه
احلام: شو لايكون بتخلفين ساروه فحركاتها للبنات
مي: هههه لا فديتج ارتاحي انا ستريت .. ارابع بس ..
احلام: عيل لازم جانب رومانسي
مي: عاد احلام ورومانسيتها الزايده
احلام: خخخ فديتني.. يقولج ضفت فارس عندي ع المسن .. واسولف وياه يبالي اسحب الرمسه منه
مي: انا لله .. رديتي ع ها السالفه.. شتبيبه الريال
احلام: برايه ابا اعرف اذ هو محطنج فباله ولا . يمكن يعني يتخبرني عنج شي مني مناك ..
مي: والله انج يا احلام حاله .. يويلج ان طريتيني عنده عن يصدق عمره اني مطرشتنج حقه
احلام: لا لا ماعليج ..
مي: هذا دح مب مال ها السوالف الله يعينها اللي بتاخذه
احلام: يعني انتي خخخ
مي: مب شرط انا .. لاني لين احين مب متخيله ها الشي .. ولا فبالي .. وماحس انه حرك فيني شي ..
احلام: انتي وايد تكابرين.. عيل ليش تستحين منه وماتتعاملين وياه
مي: لانه هو اللي مايتعامل ويانا ويستحي.. والواحد على هو مايعاملج
احلام: لاااحوول
مي: ههههههههههه فديتج يا احلام .. لازم يحطونج انتي في ها المنظمات مال الامم المتحده ..رعاية الشؤون الاجتماعيه والعاطفيه ..
احلام: يا السخيفه
مي: تعرفين
احلام: شوو!
مي: من كثر ما تحنين على ها الفارس فالأخير انتي اللي بتشبصين فيه
احلام: هههههههه لاوالله
مي: هي صدق
احلام: تستهبلين .. من الله خاطبينكم حق بعض خلاص
مي: عادي عادي احلام كل شي جايز خخخ
احلام: سيري لاه.. انا يالسه اعالج موضوعها وهي تجلبه عليه..
مي: ههههههه المشكله تعالجينها ويا وحده مب فبالها شي .. وتدري انه الطرف الثاني اكيد مب فباله شي..
احلام: وشدراج انتي
مي: احساسي يقول ها الشي..
احلام: لاوالله
مي: احلام حبيبتي انتي صغيره ومب فاهمه عدل .. يوم الشخصين يحبون بعض يكون بينهم تواصل حسي لو ماصارحوا بعض.. أقل شي يكونون حاسين ببعض
احلام: وفلسفة منو هاي!
مي: هيهي افلاطون زمانكم .. مي بنت سيف
احلام: هي انا اقول بعد ..
مي: هيه..
احلام: ميوووه تذكرت شي
مي: ها بلاج؟
احلام: ابا كيمرتج الديجيتال ضروووري..
مي وجنه حد صب عليها ماي بارد: ها
احلام: بلاج
مي: الكيمرا .. هي
احلام: هيه اباها عندنا رحله الاسبوع الياي وابا اخذلي كيمرا اصور

مي وهي تبلع ريجها.. ماصدقت انها تتناسى الموضوع وتشله من بالها ردت احلام فتحت لها المواجع.. الحين كيف بتخبر احلام.. الموضوع محد درابه ولا خبرت حد والاكيد انه احلام بتضايج انها ماخبرتها من قبل ولا خلتها من الناس اللي عرفوا

احلام: ها وينج
مي: وياج.. احلام فديتج ماروم اعطيج اياها
احلام: ليش؟!
مي: هممم احلام الله يخليج هب تطرين السالفه فالبيت مافيني
احلام: شو استوى انزييين زيغتيني
مي: احلام الكيمرا انسرقت عني يوم يبتها السكن
احلام: انسرقت!!
مي: هي وفيها صوري مال الملجه والله اني احاتي السالفه وايد
احلام: بل
مي: لا يزل لساانج جدام خواتي ولا اميه محد يدري ترا
احلام: وجي ما خبرتيني من قبل
مي: ماعرف انا بروحي كنت متضيجه ما بغيت افتح السالفه
احلام: انزين لو منج بحلف بنات الجناح
مي: شو نحلفهم استحي بيقولون شاكه فيهم
احلام: لا تبرئة من الشك
مي: ما سويتها ولا بسويها ها الحركه واصلا محد يدري فالجناح انه مسروقه عني كيمرا.. مروان سوالنا تحيوره اونه وما ردت الكيمرا
احلام: مروان يدري بعد
مي: هي
احلام: وها التحيوره مب بدعه!
مي: انا مادري مروان تكفل بالسالفه.. بس قالي يسونها الحريم عندنا
احلام: وكل شي يسونه صح يعني .. يمكن حرام
مي: احلام هي مب حصر عشان تقولين حرام .. وعن سالفة بدعه انا مادري والله بس تراها ايات قرآنيه مكتوبه فورقه وتحطينها محل الكيمرا شو صار!
احلام: مادري والله ..
مي: مادري جان طلعوا فتوى عليها ولا لا .. بس الحاجه تبرر الوسيله وانا صدق كنت ابا اسوي اي شي عشان ارد صوري .. والله قهر
احلام: الله يعينج .. ماعليه ان شاء الله ها السارقه تكون فيها ذرة ضمير باجيه وتمسح صورج
مي: وين بتيبها ها الذره وهي اتجرأت تسرق.. حسابها عند ربها
احلام: والله ساااالفه عيل !

وتمت احلام تستعبط ع مي وع كيمرتها اللي كانت فحايتها .. ويوم شافت انه مي بدت تسرح شوي قامت اتطمنها وتقولها تنسى السالفه وتدعي من ربها بالستر.. وبعد ساعه من السوالف ترخصت احلام من مي عسب تسير تكمل مذاكرتها .. ومي ردت غرفتها ويلست ويا ساره اختها تسولف..

***********************
(الاثنين) 25 ابريل 2005
***********************

الصبح عقب ماترخص مروان من دوامه طلع اييب نتايج تحاليله اللي سواها بالأمس.. اتصل بساره اللي كانت يالسه في حجرتها من بعد ليل طويل حاربها فيه النوم .. ردت على مروان وهي تحس بوهن..

مروان: الوه
ساره: صباح الخير
مروان: صباح النور اشحالج ساره؟
ساره: الحمدلله مروان انته اشحالك؟
مروان: الله كريم
ساره: مروان تعوذ من بليس بلاك انته جيه متشائم .. مابيصير الا كل خير ان شاء الله .. انته وين ساير ؟
مروان: ساير المختبر اييب نتيجة التحاليل..
ساره سكتت ماتروم وايد اتم تتصنع لمروان لكن لازم تغير مزاجه شوي
ساره: مروان انا مابتخلى عنك
سكت مروان حس بشي في قلبه .. اتهند
مروان: ساره بقولج شي في خاطري ماروم اخليه اكثر ويمكن عقب النتايج ماقدر اقوله ..
ساره سكتت كانها تترياه يكمل
مروان: ساره انا احبج فوق ماتتصورين .. احبج من خاطريه.. بصدق حبيتج وتمنيت اشوف بذره حبنا في عيالنا اللي مادري اذا بشوفهم والا لا .. ساره انتي ماتتعادلين
عندي بذهب الدنيا كلها .. حلمت باليوم اللي يجمعني فيج اللي تكونين لي .. اللي اتخلص فيه من صدودج بحجه او بدون .. اه ياساره امنيتيه في الحياه احين اني اكمل وياج هالدرب للاخر لكن وين تتحقق وكل شي يعتمد على ورقه باخذها من المستشفى

ساره كانت دموعها تتخاطر .. اول مره تحس باندفاع احاسيسها بها الصوره تجاه حد .. كانوا دوم يقولون انها ماتحس وبارده ومايهزها شي .. كانت عكسه الا انه محد قدر يثبت هالشي الا مروان ..

مروان حاول يتمالك نفسه: يالله انا وصلت المختبر ..
ساره: اتصل فيني اول ماتطلع اوكي بترياك
مروان: امسحي دموعج ساره .. انا ماسواها
ساره حاولت تتمالك نفسها لانها كانت تحس انها بتنفجر من الصياح
مروان: مع السلامه

سكرت ساره التلفون بدون ماترد عليه .. وبدت تصيح لين انتبهت مي اللي كانت راقده ونشت على صوت صياح ساره.. مي فتحت عيونها تبى تستوعب شو اللي صاير .. فزت من فراشها على طول وسارت لاختها اللي كانت ضامه ريولها لجسمها وحاظنتنهن وتصيح ..

مي: ساروه شو فيج شو مستوبج انتي من يومين مب على حالج
ساره تصيح مب رايمه ترد ع مي
مي تحاول ترفع ويه اختها من ركبها: قولي بلاج شو مستوي؟
ساره بصوت متقطع : ميوه .. مروان
مي: شو فيه مروان شوياااه؟؟
ساره حاولت تمسح دموعها ومي ساعدتها ويابت لها كلينكس و ماي
مي: ساروه فهميني شو مستوي بينكم لاتخوفيني اكثر
ساره: ميوه في تحاليلي اللي سويتها يوم الخميس طلعت حامله جين ثلاسيميا
مي وهي معقده حياتها مستغربه: من وين ياج ؟
ساره سكتت .. اما مي تمت على استغرابها .. كيف وصللها جين المرض..
مي: ماكانت امبينه عليج اعراضه
ساره: الحين بينت
مي: لاحوول ولا قوه.. انزين ومروان شو بلاه ؟
ساره: خالي قاله لازم يسوي الفحص لانه لو مروان فيه
مارامت ساره تكمل لكن مي فهمت اللي تقصده ساره .. حضنت اختها وهي منصدمه من هالخبر .. مسكينه ساره من يومين تدري وكاتمه في خاطرها .. تمت مي تمسح على شعرها وساره تصيح بس هالمره بهدوء
مي: مروان سوى التحليل ؟
ساره: الحين ساير اييب النتايج
مي: عشان جي انتي خايفه.. لاتخافين ان شاء الله خير ..
حاولت مي انها تهدي ساره لكن ساره كان الخوف مسيطر عليها .. حطت في بالها احتمالات وايد .. ورتبت عليها النتايج اللي ممكن تصير .. وكل احتمال ونتيجه يزيدون خوفها وتوترها ..

****

كان سلطان يالس فحجرته ع الكمبيوتر .. فتح موقع الامارات للاوراق الماليه وتم يتابع المؤشرات ويحسبها فباله وبعد ما خلص .. سكر ليتات الغرفه ونزل تحت .. كان فباله رمسه لأمه .. ونزل يشوفها ..
شاف امه يالسه بروحها عند التلفزيون واتابع برنامج ديني ..

سلطان: ها ام خلوف.. اشوفج بروحج
شيخه: اتريا ابوك ايي .. وخوانك عشان نغرف الغدى
سلطان: جي وين هم؟
شيخه: اكيد العزبه
سلطان وهو ييلس حذال امه: اها .. امايه دعواتج ..
شيخه: ها ابويه شو هناك؟
سلطان: باجر بسير ابيع شي من الاسهم .. شفتهم مرتفعات ..
شيخه: انزين خلهم ياوليدي لين عقب
سلطان: لا ماعليج .. دارس الموضوع زين .. بينزلن عقب .. ببيع منهم جزء وبخلي جزء لعقب..
شيخه: الله يوفقك يا وليدي ..
سلطان: الا اماايه بتخبرج
شيخه: ها ابويه .
سلطان: اشوفج ما رديتي ترمسيني عن بنت الحلال!
شيخه وهي تتطالع ولدها: أي بنت حلال؟
سلطان: ما قلتي بتخطبيلي .. ماشوفج اخترتي حد
تمت شيخه ساكته عنه .. وسلطان يطالعها مستغرب شوفيها ..
سلطان: بلاج امايه؟
شيخه: شوف يا سلطان .. انا دورت فبنات العايله .. محد تناسبك .. الا وحده .. وها الوحده محيره ..
سلطان: يوم انها محيره ليش حاطه أمل فيها ؟
شيخه: يا وليدي انته وهي تتناسبون أكثر ..
سلطان: انزين منو هيه؟
شيخه: مي .. بنت خالتك عليا ..
سلطان رفع حايب وهو يطالع امه باستغراب..
شيخه: شوف سلطان .. انا من البدايه كنت اباك لمي .. لكن خالك راشد رمس جدامي وانا مارمت اقول شي .. وقلت ماعليه سلطان بياخذ ع بغيته .. ويوم يتني ترمسني انك تبا وحده من الاهل ردت فبالي مي .. بس ..
سلطان وهو يطالع امه: بس شوو
شيخه: ماعرف اذ بعده خالك يباها لفارس ولا
سلطان: وفارس يعرف انها مخطوبه له
شيخه: ماظنتي .. هم ما طروا ها الشي للعيال بعدهم صغار على الخطبه .. بس راشد حيرها لولده .. جان دروا بعد مادريبهم
سلطان: انزين يمكن فارس مايباها
شيخه: الله يهديك يا سلطان منوا الخديه اللي مايبا مي
ابتسم سلطان على رمسة امه .. شكلها وايد متعلقه فمي .. وتباها له ..
يمكن مب بس هي تباها له .. يمكن تفكيره بدى ها الفتره يوديه لها .. لكنه يمنعه من ها الشي ..
شيخه: بخطبها لك لكنه مايوز خطبه ع خطبه ..
سلطان: يالله النصيب يوم بيي محد بيرده
شيخه: شوف سلطان.. دام خالك رامس عنها .. سر انته اخطبها من عنده يمكن الظروف تغيرت الحين .. يمكن يوم يشوفك مصر عليها يجدمك ..
سلطان: مممم ماعليه يصير خير .. الا خليفه مافكرتي ترمسينه عن العرس
شيخه: يوم يبا العرس بروحه يي وبيقول شرات انته ما سويت
سلطان: ههههههه حليله ..
شيخه: تعرف يا سلطان ..مي وايد تصلحلك .. وانا مربتنها وجان الله كتبلك نصيب وياها فرحتيه بتكون عن فرحتين ..

سلطان قرب من امه وحبها ع راسها وهو يبتسملها .. شوي دخلوا خليفه وابوه .. واتصلت شيخه فمنصور تقوله ايي يتغدى .. والتمت عايلتهم الصغيره ع سفرة الأكل واتغدوا رباعه .. سلطان أثرت فيه رمسة امه وايد .. وكل شوي تتراواله صورة مي .. بنت خلوقه ومتربيه ..علم وجمال .. شو يبى أكثر .. دعى من ربه انه الله ايسرله امره فها الموضوع ..

****
مروان كان طايح في غرفته .. رغم انه المكيف يشتغل الا انه يحس بحر شديد .. كان يحس انه جدار غرفته بيتطبق عليه .. مايعرف شو يسوي ..اللي صار له ها كله شو اساسه.. اتعوذ من الشيطان لكن مابيده شي يسويه ..
احاسيسه متضاربه ومب عارف يلقاله مينا يرسي عليه .. الخبر قوي وشديد عليه .. مايقدر يصارح به حد .. غمض عينه اللي كانت اتدمع..
كان واقف عند مكتب الاستقبال وهو يعطيهم البطاقه اللي عطوه اياها بالامس ..

الموظف: تفضل انتظر
يلس ينتظر وهو يحس الثواني ماتمر عليه بسهوله .. الثواني صارت ساعات والدقايق ايام ..دخل عند الدكتور عقب ماناداه .. يلس ع الكرسي يترقب لكلام الدكتور ..
الدكتور: مروان انته جيت امبارح مشان تحليل الثلاسيميا
مروان: هيه
الدكتور: الحمدلله يا مروان
مروان ابتسم
كمل الدكتور كلامه: انته مش مريض ولكنك حامل لجين المرض
مروان كانت اثار الصدمه باينه على ويهه
تم ساكت وانفاسه تتسارع
غطى ويهه بايده وسمح لدموعه تعبر عن اللي في خاطره شوي..
تذكر ساره .. اللي مارد عليها خبر .. اتلفت يدور تلفونه اللي كان غالقنه ..فتحه وعلى طول لقى المسجات تنهل عليه .. وأغلبها من ساره .. لكن مامداه يقراهن كلهن لانها على طول اتصلت ..
رد عليها مروان بصوت يحاول يتمالك فيه نفسه: الوه
ساره: مروان وينك انته ليش مسكر تلفونك
مروان: شوي تعبان ..
ساره: سلامات !
مروان: الله يسلمج
ساره: شو يعورك؟
مروان: راسي شوي
ساره: خذ مسكن
مروان: ماعليه
ساره: مروان شو كانت النتيجه ؟
مروان وهو يحاول يستمد القوه عشان ينطق بها الكلام ..
مروان: طلع ..
ساره: شووو طلع مرواان؟!
مروان بصوت مبحوح: طلع فيني الجين ياساره
ساره: مروان عن الجذب ادريبك تبى تسويلي مقلب لو فيك جان من مساعه متصل تقولي..مب غالق تيلفونك طول اليوم ..
مروان مارام يتمالك نفسه لكنه تم ساكت
ساره: مروان قول عاد لاتغصصبي
مروان: ساره قلت لج الجين فيني
ساره: قول والله
مروان وهو يقاوم: والله يا ساره والله فيني ..
ساره سكتت كانت واقفه وهي ترمسه تطلع لها ثياب من الكبت .. اما مي كانت يالسه وياها في الغرفه تشتغل ع اللابتوب..
ساره ماقدرت اتم واقفه يلست ع كرسي كان حذال الكبت..اما مي كانت عينها معلقه على ساره وتصرفاتها ..
ساره: ليييييييش .. ليش جي يستوي فينا ليش
مي فهمت الموضوع .. ساره ماتمالكت نفسها ابدا .. بدت تصيح بشكل هستيري وهي تردد
ساره: حرام والله اللي يالس يستوي ..حرااااام .. ليش كل هذا ياربي ليش .. مروان انا اباااااك مابتخلى عنك ..

كانت هالكلمات وقعها مب خفيف على مروان.. تخلى عن صموده وتخلى عن كل شي كان يمكن يطلعه بصوره رجوليه جدام ساره .. بدى هو الثاني يصيح ..
ساره فرت التلفون وغطت ويها بايدها ..
اما مي اللي كانت تتطالع انفعالات ساره وطت اللابتوب من ع ريولها و ركضت لاختها وحظنتها وساره بعدها تصيح بصوت خلى البنات اللي برع الغرفه يسمعنها ويتراكضن صوب الحجره..
مي: اسكتي ساروه لاتسوين جيه
ساره: ميووووووه خلاص مروان طلع فيه الجين تعرفين شو يعني طلع فيه ..
ااااه ياميوه ليتني اموت ولا اسمع هالشي
مي: ساروه بس بس

كانت مي تحاول تمسك اختها اللي كانت مغطيه ايدها بويها وتصيح .. مي مرتبكه اول مره تشوف ساره جيه ..
في هالوقت دخلن بنات الجناح منى ووياها ثنتين .. وكم وحده تمن واقفات عند باب الحجره يشوفن شو صاير وهن زايغات ..

منى: بلاكم شو بلاها ساروه؟
مي: تعالي تعالي يوديها برقدها ع السرير
منى: شو مستوي؟
مي صرخت ع منى بدون ماتحس: تعالي اقووولج عقب بخبرج

حاولوا يمسكون ساره لين وصلوها للسرير .. ورجعت مي تطالع التلفون لقت مروان سكر .. غمضوها هم الاثنينه قلبها تم معورنها عليهم .. كيف يصير جي لاثنين مناهم كان اليوم اللي بيجمعهم رباعه .. ردت يلست حذال ساره اللي دموعها مول ما وقفن في النزول .. طلعت منى البنات من الحجره اللي تمن يتساءلن شو صاير ومنى بروحها ماتعرف تفاصيل الحدث الا اشيا بسيطه قالتلها اياها مي ..



**********************
(الثلاثا) 26 ابريل 2005
**********************

الصبح الساعه 10 انتبهت مي من نومها .. صدت ع سرير ساره اختها ولقتها طايحه ع ظهرها .. حاولت تركز فيها اذا راقده والا .. بس كانت ساره ساكنه وما تصدر اي صوت ..

مي: ساره .. ساره
التفتت ساره وكان يبين من ويها انها كانت واعيه مب راقده ..
ساره: شوو؟
مي: انتي مب راقده ؟
ساره: لا ..واعيه
مي: ليش ماداومتي مب دوامج 8 ؟
ساره: مابا اداوم
مي: ساروه من الله غايبه في هالمواد من قبل عن اييج حرمان!
ساره: ميوه قلت لج مالي خاطر لشي خليني

التفتت ساره عن مي وغطت ويها بلحافها .. وقت بسيط بس اللي رقدته من امس .. تحس بالضيج مسبب لها تعب في ساير جسمها .. وماتقدر على أي حركه غير انها تتجلب ع سريرها .. كل ما بغت عينها تغضي تنش وهي خايفه وتتلفت يمينها وشمالها وترد توطي راسها .. ها حالها طول الليل .. وكل ما تتذكر كلام مروان تحس بقلبها ينزع من صدرها .. تحس مثل بجرح ففوادها وجنه ملح مصبوب عليه يحرقها ويلسعها .. دموعها تنزل من غير ما تحس فيهم .. حتى لو هي غفلت فنومها صوت مروان يتردد فذهنها الصاحي اللي يفكر ..
لو اي شخص شافها وهي بها الحال بيعرف الحب الحقيقي شو يسوي .. الحب الطاهر اللي عطته مروان من بعد ما صار حلها وحلالها.. مب سهل اللي قاعد يصير .. ومب هين أبدا مجرد تمر فكرة على البال عن فراق الأحباب..
نشت مي من على سريرها وعيونها تناظر ساره اللي لافه بويها الصوب الثاني ..
وقفت مي بالقرب من ساره.. بس ماقدرت انها تكسر جوها هذا ..
طلعت اغراضها وسارت الحمام تتغسل .. ويوم خلصت سوت حليب وصمون وجبن لها ولاختها .. تقربت منها ويلست ع طرف الشبريه..

مي: ساره
ساره: هممم
مي: قومي كلي شي انتي مب ماكله من البارحه..
ساره: مابا
مي: عشان خاطريه ساروه قومي انا بتريق وياج
ساره: مابا ميوه مابا شي مب يوعانه ما شتهي الاكل مول..
مي: ماعليه انزين عشان ترومين تشلين عمرج شوي انتي بروحج عندج فقر دم وتعبانه.. كلي شويه بس..
ساره نزلت اللحاف عن ويها اللي كان مصفر من الارهاق والصياح ..
مي: شوفي ساروه سويت لج حليب وصمون جبن .. حرام عليج انا من ييت الجامعه حتى يوم ايوع ماسوي لعمري واحين سويتلي وسويت لج ..بتكسرين بخاطريه يعني ؟
ساره سكتت
مي: بتاكلين وانتي ع السرير؟

هزت ساره راسها الايجاب وربعت مي يابت صحن البلاستيك اللي فيه الصمون وشلت كوب الحليب بايدها .. ويلست ع السرير مجابله اختها وناولتها الصحن والحليب ..وهي خذت صمونتها بعد وتمت تاكل وياها ..

ساره: اميه مارمستج ؟
مي: امبلى اتصلت بس فليل الساعه 2
ساره : شو قالت ؟
مي: ماشي بس تسال عنج
ساره: خبرتيها صح
مي: هيه
ساره: شو قالت ؟
مي: ماشي بس سالت عنج .. مارمستي مروان انتي ؟
ساره: امبلى الفجر رمسته

مي سكتت ماعرفت شو بتقول حق اختها ماتبى تفتح الموضوع اكثر عشان تقدر ساره تكمل ريوقها .. كانت تشوف ساره اللي كانت ماسكه السندويشه وتتاملها كانها اول مره تشوف خبز في حياتها .. وتبلع اللقمه بكل صعوبه وكأنها تتجرع سم
ماقدرت تكمل السندويجه كلها ووطتها فالصحن ..

مي: ليييش؟؟
ساره: بس مي كلت لقمتين واحس بلوعه فضيعه مب قادره ابلع شي ..
مي: مب زين علييج ساروه
ساره: والله ميوه ..يوم نفسيتي تتعب ما قدر اكل شي.. بحاول اشرب الحليب
بعد ما شربت ساره الحليب .. وطت الكوب وردت تتسلقى ومي مازالت يالسه مجابلتنها ..
مي: شو بتسون احين ؟
ساره رفعت جتوفها كانها تقول ماعرف
مي: هممم.. انزين امس على شو اتفقتوا انتي ومروان ؟
ساره: انتم ويا بعض
مي: وقوم امايه بيرضون ؟
ساره: مايخصني فيهم .. انا مابودر مروان
مي: وهو شو رايه ؟
ساره: من رايي
مي: وشو بيكون حل هالموضوع ؟
ساره: انا خبرت خالي محمد امس .. اني سالت عن الموضوع وقالوا ممكن نتزوج بس في كل مره احمل فيها نفحص ع الجنين وهو في البطن ان كان فيه المرض يسقطونه
مي: كم بتوبلين تعقين عيالج .. وبعدين هالشي حرام
ساره: لا عادي
مي: منو افتى انه عادي
ساره: اوكي خلاص مانبى عيال ..
مي: عيل ليش معرسين ؟
ساره: مب لازم اللي يعرسون اييبون عيال .. صح هم زينه الحياه .. بس لو لازم نيبهم جان الله ماخلى بعض الناس عقيمين .. ها معناه انه مب واجب نيبهم
مي: ساروه تعوذي من ابليس

وطت ساره راسها ودموعها رجعت تروي مجاري الدمع اللي من البارحه وهي تنهمر على خدها وماكان لها نصيب طويل من الجفاف..
اما مي مابيدها شي تسويه لاختها .. اللي بتقوله شي واللي بيقولونه اهلها شي ثاني فالاخير مابيكون في فايده من أي شي بتقوله ..
طنشت هي الثانيه محاظراتها وقررت تيلس ويا ساره لين تيها اسما بنت عمتها تيلس وياها او لطيفه .. خوفا من انه يغمى عليها او تتعب ومحد عندها ..

****
العصر وبعد الحاح مبارك ربيع فارس .. وافق فارس انه يطلع ويا ه يتمشون ع البحيره ..منها يغير جو بعد ما تلقى خبر مروان الي نكد فيه ومنها يمر على مكتبه يدورله كتاب يساعده فالبروجيكت ماله..
في طريقهم للبحيره كان مبارك يرمس في التلفون وفارس يسوق ..

مبارك: قلت لج من قبل انا كيف .. بحاول .. بس ماظمن انا خبرج تراني .. اوكي برمسج عقب يالله باي ..
سكر مبارك عن البنت اللي يرمسها وصد حق فارس وهو يبتسم
مبارك: شعليك ناس يسالون عنك
فارس صد صوب ربيعه ورجع يركز في الشارع جدامه
فارس: منوو
مبارك: اخت ربيعتي تبى تتعرف عليك .. تحيد اللي شفناهم في صحارى ذاك اليوم يوم نسير انا وانته نتعشى ..
فارس: انته شفتهم .. انا مانتبهت لحد
مبارك: المهم شافتك وعيبتها .. ها اتوكل واعطيها الرقم ؟
فارس: وين تبى انته ؟ لاتعطيها ولا شي .. منو قالك ابا ارمسها ..
مبارك: يقولك رمس اللي تباك ولا ترمس اللي تباها
فارس: تحيدني مب راعي هالسوالف .. فاضيلهم انا ؟
مبارك: فروس يعني بتقولي انته عمرك مارمست بنت فالتلفون؟
فارس: والله عمري مارمست بنت فالتلفون
مبارك: معقوله
فارس: ليش تتحرى كل الناس فاضيه تلعب ع بنات خلق الله
مبارك: مب لعبه انا ماجذب عليهن اللي ترمسني تعرف ارمس غيرها وهي نفس الشي احين البنات هن اللي يلعبن ع الشاب هب هو اللي يلعب عليهن
فارس: وشحقه هاللعبه كلها والصدعه ..
مبارك: تعودت لكن انته ماعرف كيف غير عن الشباب
فارس: انته تعودت ترمس بنات .. وعندكم الرجوله تثبتونها بعدد البنات اللي تعرفونها انته وغيرك .. اما انا الرجوله عندي يوم ارفع راس ابويه وابني مستقبلي صح .. باجر بيقولون فلان مهندس وحصل تقدير امتياز مابيقولون فلان عرف 20 والا 30 بنت ..

مبارك حاس بوزه ماعرف كيف يرد ع فارس .. كلن له اطباعه وتفكيره اللي ينفرد به عن غيره هو بالنسباله مايقدر يعيش مثل فارس همه كتبه ودراسته بس .. رجع رن تلفونه ورد يرمس فيه لين وصلوا البحيره
.. لف فارس ع مبارك وشافه لاهي بالتلفون .. شل هو بعد تيلفونه ودق ع رقم اخوه..
تم يرن لين ما قطع .. ورد مره ثانيه يتصل .. بعد ما يرد عليه ..
عق فارس التلفون ع ينب وهو متغصص .. لف عليه مبارك اللي استغرب من حركة فارس هذي وسكر على طول عباله انه متغصص منه ..

مبارك: سوري والله
فارس وهو يشوفه: ليش.؟
مبارك: التهيت عنك فالتلفون ..
فارس: ههه عادي متعود ..
مبارك: ما تقصد.. عيل بلاك متغصص
فارس: لا عادي
مبارك: امبلا شكلك يبين
فارس: هممم
مبارك: ارمس بلاك
فارس: مروان مغصصبي
مبارك: ليش بلاه؟!
فارس: ادقله ما يرد عليه.. والله انه يستهبل.. ما يرمس حد موول
مبارك: ليش شو مستوي متزاعل ويا حد شي ؟؟
فارس: لا
مبارك باستغراب: عيل شو مستوي
فارس والكلام ينساب منه من غير ما يفكر فيه او حتى يمهل عمره انه يفكر هل ممكن يطلع اللي فخاطره او يسكت عن الموضوع كونه عائلي ..
فارس: مروان بينفصل عن حرمته
مبارك: لييييش!! توهم مالجين
فارس: ربك رايد
مبارك: خبرني شو مستوي
فارس: طلع فيهم هو وحرمته جين الثلاسيميا.. مالهم حل غير الطلاق..
مبارك: لاحول ولا قوه .. وليش من قبل ما كنتوا تعرفون؟
فارس: لا .. ماكنا متوقعين ..
مبارك: وفحص الزواج ما طلع ها الشي؟! عنبوه عقب ما ملجوا اكتشفو
فارس: فحص الزواج بس عن الامراض المعديه والوراثيه ومافيه فحص للثلاسيميا..
مبارك: اونه
فارس: هي ..
مبارك: يالله تعينهم .. وخلاص يعني بيطلق؟
فارس: ترا اللي مغصصبي انه مروان موقفه وايد سلبي .. اندقله مول ما يرد علينا.. انزين رد بس بنطمن عليك ما بنقولك شي .. يقهر
مبارك: عاد مخلنكم تحاتونه
فارس: والله ها خبله ما يفكر بعقله.. يخلي قلبه يمشيه.. اخاف عليه يسوق وهو مسهي ويصير شي لا سمح الله .. اخاف يتعب ومحد عنده .. شو من الرياييل هذا .. ياهل هب ريال ..

مبارك وهو يطالع فارس اللي يبين عليه الانفعال .. اللي يسمعه يرمس يقول هو الاخو الكبير مب مروان .. بس ما ينلام من خوفه على اخوه .. وهو يدري انه مروان عاش حياته همه ها الساره .. بعكسه هو اللي ما فكر فها الجانب العاطفي فحياته أبدا .. يحكم على الأمور بعقله من غير ما يلجأ للمشاعر من جي تبين قوته.. لكن مروان أي قوه بيستمدها من ورا ها الحب اللي صار على وشك الانهيار!

فارس: همم
مبارك: هد عمرك انته واخوك ان شاء الله ماعليه باس ..
فارس: شو بنقول يا خوك.. ربي يفرج كربته ان شاء الله
مبارك: ان شاء الله .. عاد سر انته سو بعد ها الفحص اطمن على وضعك قبل ما تخطوا اي خطوه
فارس: ان شاء الله بسوي بس يوم بفكر اخطو ها الخطوه
مبارك: يعني تبا تقنعني انه محد فبالك
فارس: ههههه ليش انته مصر يعني تعرف؟
مبارك: احسكم ما تياوزون الا الاهل اكيد حد فبالك
فارس: عقب سالفة مروان تباني افكر فالاهل .. لا ابويه
مبارك: ترا عشان جي اقولك من الحين سو الفحص واطمن..
فارس: يصير خير .. تأكد اني ما بمشي فدرب الهوى الا لما اتأكد من انه كل شي سليم وفي السليم
مبارك: هههههه يعني نغزه هاي
فارس: ههه كيفك افهم اللي بتفهمه.. يلا انزل انته خلنا نتمشا ..
ونزلوا ثنينهم من السياره وتموا يتمشون وهم يشاركون بعض مختلف المواضيع .. ويلس فارس يتذمر من دكتوره اللي ملعوزنه ها الكورس ومبارك يضحك عليه وعلى مواقفه ويا ها الدكتور..

****
بعد صلاه العشا يلست ريم تحت ويا عمار ونوره تتريا نايف وعمها يردون عشان يتعشون .. وكانت في خاطرها ضايجه .. امها خبرتها عن اختها ومب عارفه تخبر زوجها او انه الموضوع لازم يكون مكتوم لين ينقضي فيه حل ..
تمت الافكار تروح وترد فبالها تحاول انها تلقى حل يرضي الطرفين لكن كل ما تتوصل لحل يكون هو الطلاق انسب حل .. حست بغبنه فحلجها بس ما قدرت انها تنزل دموعها فها الوقت ولا قدرت انها ترفع السماعه ترمس اختها لانها تدري ما بتقدر تواسيها فشي وهي بعيد عنها..
انتبهت ريم لساعتها وحاولت انها تتناسى الموضوع اللي شاغلنها ..
وتذكرت انها قبل ما ايي نايف تبا تعدل الفراش فوق عقب ما نشت من النوم المغرب.. لمحت الشغاله داخله تحط العشا ع الطاوله .. ورمستها بكل لطف ..

ريم: شيريل عقب ماتحطين العشا سيري رتبي شوي فراشي فوق

الشغاله اطالعت ريم وروحت عنها وكان يبين من نظراتها انه مب عايبنها اللي تقوله ريم ...
سكتت عنها .. ويلست تجلب في قنوات التلفزيون .. وسمعت صوت الشغاله تتحرطم على عمار اللي كان ساير المطبخ .. وعقب سمعت رضه باب المطبخ وعمار ياي صوب الصاله ..

ريم: عمار بلاها الشغاله ؟
عمار: خل تزول
ريم: متضايجه يوم اني قلت لها عدلي الفراش ؟
عمار: خايسه هاي تتحرطم اونه ليش نايف ماييب لج شغاله وهي عندها شغل وايد
ريم: انا كنت مفكره اييب لي شغاله بس عموه ماطاعت وقالت انه انا ماعندي شغل عشان اييب لي شغاله واكود الخدم في البيت.. خلها برايها بروحي بسير اعدل الفراش ...

صعدت ريم تعدل فراش الغرفه .. ودخنتها رغم انها تحس بصداع فراسها..ماتدري هذا هو الصداع القبلي او تحس فيه لانها تضايقت.. في هالوقت وصل نايف .. ودخل قسمهم وشاف ريم فالصاله تحوط وفاديها المدخن ..

نايف: السلام عليكم
ريم: هلا وعليكم السلام ..
نايف وهو يستنشق الجو: يا سلاام
ابتسمتله ريم ..
نايف: شحالج غناتي
ريم: الحمدلله ..
نايف: تعشيتي؟
ريم: لا بعدنا نترياكم..
نايف: زين عيل ببدل ثيابي انا وبننزل رباعه

بدل نايف ثيابه في حين كانت ريم تعدل بعض الاشيا في الغرفه وتطلع ثيابها حق دوام باجر .. ويوم خلص نايف تبديل نزلوا هو وحرمته .. وع الدري سمعوا صوت خلفان ينازع حد .. كمل نايف دربه يبا يعرف شو السالفه .. اما ريم تراجعت لغرفتها .. شوي ورجع نايف فوق عند ريم اللي كانت يالسه تكوي عباتها ..

نايف: ريمان .. ليش ماخبرتيني انه الشغاله ماطاعت ترتب الفراش وتحرطمت ؟
ريم: وليش اخبرك ..
نايف: شو ليش تخبريني لازم تخبريني عشان اتصرف وياها
ريم: ابوك توه معصب عليها؟
نايف: هي انا بروحي زغت نزلت اركض.. انزين ليش ماخبرتيني؟
ريم: ناايف السالفه ماترزى عشان ارمس عنها وعادي انا كل شي اسويه بروحي وهي نادر جان بتدخل تنظف وانا بعد افازعها .. وانا حاليا هب محتاجه شغاله يوم بحمل وبيكون عندي بيبي هاييج الساعه بحتاج شغاله وانته مابتقصر بتيبلي..
نايف: بس هاي غصبن عنها تخدمج مب من زود الشغل عندها
ريم: نايف انا مابا اخسر اهلك اللي هم اهلي عشان شغاله .. ولا ابا اقولك شي لين انته تسمع منهم شرا ماقالولك احين ..
سكت نايف .. ريم حكيمه في تصرفاتها وتحاول تحافظ على علاقتها مع زوجها بدون ماتخلي مجال للامور التافهه تخرب عليها ..
نايف: ابويه ادبها الخايسه .. عمار خبره وكنت بزيدها لكن ابويه كفى .. قومي ننزل نتعشى
ريم ابتسمت له: ان شاء الله

نزلت ريم تحت ويا نايف وهي تتحاشى تفتح الموضوع لانها مثل ماقالت انها ماتبى تخسر اهله او يظايجون منها على أتفه الأمور وماتباهم يظنون ولو فيوم انها دخلت البيت وتملكت ع كل شي او في شي من نظامهم القبلاني تغير عليهم .. مهما كان هي غريبه في هالبيت والشور مب شورها حتى لو هم ماحسسوها بها الشي ..وهالموضوع بكامله مايهمها جدام اللي كان في خاطرها من هم شالتنه على موضوع ساره ..

****
طلع مروان لاقرب صيدليه ياخذله بندول عقب ماخلص اللي كان عنده ويحاول يخفف به صداعه اللي ملازمنه من يومين ..
في هالوقت رن تلفونه اللي ماسكت من الاتصالات اللي كانت توصله ومايرد عليها.. لكن هالاسم اللي طالع الحين اول مره يكون من ضمن الاتصالات اللي يته خلال هاليومين ..
فكر يرد عليه والا لا .. وقبل مايقرر كان المتصل سكر ..
خلى تلفونه في السياره ونزل الصيدليه ياخذ اللي يباه .. ورجع يجيك على تلفونه ولقى مكالمتين ومسج ..
"انا في العين ياينك .. رد عليه"
ورجع التلفون يرن مره ثانيه .. وهالمره رد عليه مروان

مروان: الووه
سلطان: انته وينك اتصلبك ماترد
مروان: موجود كنت نازل الصيدليه
سلطان: خير ؟
مروان: اخذ بندول راسي يعورني .. انته في العين صدق؟
سلطان: هيه عيل جذب!
مروان: اها ..

وصف مروان المكان الي هو فيه لسلطان ودلاه ع الدرب لين وصل عنده.. نزل سلطان من سيارته وسلموا على بعض ..

سلطان: بركن موترك وتعال اركب ويايه
مروان: وين بتسير ؟
سلطان: تعال انته بحوط وياك وببات عندك اليوم
مروان: حياك الله ..
وقف مروان موتره وركب ويا سلطان ..
سلطان: وين عندكم مطعم سندويجاته فنانه
مروان: انا ماشتهي جان انته تبى بدليك
سلطان: مب ع كيفك انا ياينك وبتاكل ويايه
مروان: صدق سلطان ماشتهي
سلطان: دلني انته عقب بتفاهم وياك ..
مروا خذوا سندويجات ووقفوا فوق جبل حفيت ..
سلطان: ماشي بحر في العين قلت اوديك اليبل
مروان: انا اصلا احب ايلس اهنه
سلطان: انزين بتقولي احين ليش معاند وماترد على خالي؟
مروان: سلطان شو تباني اقوله انزين ..انته قولي
سلطان: رد عليه اسمعه شو بيقولك
مروان: ابويه مايعرف يتفاهم وانا اصلا مابا اتفاهم لانه اللي انا اباه هو مايباه
سلطان: وانته شو دراك باللي هو يباه
مروان: اعرف ..
سلطان: انته في بالك حل ثاني ؟
مروان: انته بعد وياهم نفس التفكير ؟
سلطان: انا لا وياهم ولا وياك .. لانه انا رايي مابيزيد ولا بينقص في الموضوع
مروان: سلطان انا مابا افارقها
سلطان: وهي كيف موقفها
مروان: نفس موقفي واشد .. ع كثر جمودها ماتوقعت بتكون جيه رده فعلها ماتوقعتها تكون اخس عني

سلطان تنهد شو يقدر يقول حق ولد خاله .. هو قبل ماييه حط نفسه بمكانه .. صحيح هو ماجرب يحب يوم من خاطره لكن بغض النظر عن الحب لو هو كان يتمنى وحده ويوم صارت في حوزته يفقدها .. حس بها الشي صعب على الرغم من انه ماعايشه بالواقع .. فكيف بموقف مروان ..لكن هو ياي وناوي انه يهدي مروان عشان يقدر يرجع وياه باجر ويمكن في بيته يكون له تفكير من نوع ثاني او ع الاقل يهدى بدل ماهو مأزم نفسه ومأزمنهم في البيت بتطنشيه لهم وعدم رده عليهم..

سلطان: وانته بتم حابس نفسك اهنه وماترد عليهم ؟
مروان: هيه لين يسكتون عني وييأسون مني
سلطان: ارجع انته باجر ويايه واهناك محد بيروم يجبرك ع شي ماتباه
مروان: مابا ارجع
سلطان: مروان هذي حرمتك وانته مسؤول عنها ومحد له الحق شرعا يحكمك تسوي شي وترا أي شي بالاكراه باطل شرعا فليش انته خايف
مروان: انا مب خايف بس انا مابا اسمع كلام زياده في الموضوع اخاف كثر الدق يفج اللحام .. خلوني اعيش وياها ع الاقل فتره اشبع منها
سلطان: اللي يحب شخص لو يعيش وياه العمر كله مايشبع منه .. لاتقص على عمرك وتزيد امورك تعقيد .. كون اقوى من جيه وواجه مصيرك وياها وحددوه باللي تحسونه يرضى ربكم قبل غيركم


مروان سكت .. وجود سلطان وياه ساعده لانه ماكان له حد يشكيله .. الوحيده اللي يرمسها كانت ساره وكيف يشكيلها من موضوع هي الاساس فيه ..
رجعوا السكن متاخر من عقب مايلس مروان يفضفض لولد عمته ويرمس براحه عن كل مايخالج خاطره .. ويطلع مافي قلبه ..وقدر سلطان يقنعه يرجع وياه باجر والعالم الله شو يخفي له باجر ..


** تنويه **

نحيطكم علما بأن أحداث القصه جرت في سنة 2004-2005 وأنه حتى مايو 2006 لم يتظمن فحص ما قبل الزواج الفحص عن مرض الثلاسيميا واقتصر على الأمراض المعدية والوراثية وقد تم التأكد بشكل آلي من مركز الطب الوقائي في كلا من رأس الخيمة و أبوظبي .. وبشكل فعلي من خلال الاطلاع على حالة زواج حديثة لأحد الأقارب وكان من خلال المعلومات التي حصلنا عليها أن فحص ما قبل الزواج سيتضمن فحص الثلاسيميا ابتداءا من سبتمبر 2006 وهذا والله أعلم ..

كما ننوه ان كل ما ورد فالقصه ماكان الا من بعد تحري دقيق للمعلومات وصحتها من الجهات المعنيه ولم تكن مجرد روايه بقدر ما هي انعكاس للواقع..

وشكـراً