عـــــرس الـــــواحـــــــــــات

[عنود الريف]

السلام عليكم ورحمة الله وبركاته.....

ملاحظة اولية .. اللي يقرا الموضوع يشغل مخيلته شوي ويتخيل انه صدق يشوف احداث العرس ويتخيل بعد انه كان في موقع الحدث .. واذا كان معرس فبعد تخيل انك صدق معرس وفي عرس جماعي وظاهر في التلفزيون وهذا الاهل مسجلينه لكbrgll: .. اما العضوات .. فتخيلوا انكم تشوفون العرس في التلفزيون..
بسم الله نبدأ...


اليوم تاريخ مهم في واحات بن دبي.. حيث يقام عرس جماعي لأعضاء الواحات .. على شرف الاب المعطاء بن دبي .. (( خلوني احول على العامية احسن ))
اليوم طبعا انا مراسلتكم عنود الريف من قناة سما الواحات..
بنقلكم حدث مهم ومميز لهاليوم ..
ان شاء الله اليوم بيحتفلون اعضاء بن دبي:atmasha: بعرسهم الجماعي حيث تلتقي الفرحة وينتقلون كلهم إلى عش الزوجية في يوم واحد ..
طبعا العرس الجماعي كما هو معروف ما يقتصر على العشا (( واللي قبل كان عيوش وذبايح وهريس .. بس الحين اتطوروا .. قاموا يحطون مقبلات من تبوله وحمص .. وعقب اونه الطبق الرئيسي.. اللي هو العيش بأنواعه .. واخيرا يختمون العشا بتحلية .. قبل يحلون يمكن بعصيدة.. الحين يحلون بأم علي وكارميل وغيره من الحلويات اليديدةbrgll: )) .. ولكن فيه احتفالات وأغاني وأهازيج طبعا بأنواعها المختلفة.. راعي العرس طبعا ما قصر لا في العشا ولا في تبني الفرق الغنائية..

طبعا كوني انا المراسلة الوحيده .. فانا بنقلكم كل فرقة بشو بتطربنا وبقولكم طبعا شو نوع هالفرقة وشو مميزاتها وإلى آخره...

خلنا نسير الصوب هذاك .. لاني اشوف ان الفرقة هذيج بدا الطرب عندها ..
وصلت .. هذي الله يسلمكم .. فرقة العيالة ...

مثل ما انتوا تشوفون الفرقة مكونة من صفين من الشباب يغنون ويرزفون .. والجماعة اللي في النص تعزف على الطبول .. طبعا هاي الفرقة معروفة من زمان واصيلة عند العرب .. وكانوا في الماضي يؤدون هاي الرقصات والعزف بعد فترة الحرب، لكنهم بدوا يستخدمونها بعد في الاعراس.. وأحيد انهم يسمون هاي الرقصة بالرقصة الشريفة ، لانها تمثل الشجاعة والفروسية والبطولة وغيرها من العادات الأصيلة.. اتشوفون هناك ،، لا مب صوب اليسار .. شوفوا صوب اليمين .. هيه هيه هذاك الريال.. يطولي بعماركم هذا رئيس الفرقة واتشوفون انه معلق في رقبته طبلة اسطوانية ويسمونها الكاسر ويدق عليها قو بحيث الصوت يكون عالي ويحمس الحضور.. تحمستوا انتوا؟؟ انا متحمسة..

خلال هذا البث .. خلونا نسوي مقابلات مع العرسان..
بما ان مسافر للجفا اقربهم لي فبنبدأ معاك ..
عنود: مرحبا اخويه مسافر للجفا ..
مسافر: مرحبا بج اختي ..
عنود: شو شعورك في هاللحظه والكل حواليك يحتفل معاك حفل زواجك؟
مسافر: سالتيني عن الشعور .. وشعوري في هاللحظه ما اعتقد اقدر اوصفه بكلمات بسيطه بس اقدر اقوولج ان مستانس وانا احتفل ويا باقي اخواني من واحات بن دبي .. والله يدوم هالفرحة علينا ..
عنود: آمين يا رب .. وانخليك تكمل فرحتك..

طبعا انتوا تشوفون ان الكل مبتهج وفرحان وشعور يمكن ما ينوصف.. ويييه انا اشوف قلوب دبي .. خلنا نغتنم هالفرصة قبل ما تفوتنا ومحد يسويلنا سالفة ..
عنود: ألف مبروووك اخويه قلوب.. ما شاء الله الفرحة باديه على محياك .. والله يديمها ان شاء الله
قلوب: الله يبارك فيج .. وتسلمين اختي وان شاء الله الكل يفرح وعقبال باقي اعضاء الواحات ..
عنود: سؤال واحد بس اخويه قلوب.. هل كنت متوقع ان العرس يكون جذي والا في خيبة امل ؟
قلوب: لا والله ... بالعكس العرس فاق التوقعات .. واللي حلى العرس زياده هي الفرحة اللي تشاركنا كلنا مع بعض في هاللحظه .. فمنو ما يتمنى هالعرس؟! عنود: صحيح اخويه .. وان شاء الله توصل هالفرحه للباقين في الواحات وعقبال الجميع.. تسلم اخويه

والحين نحن بننتقل للرقصة الشعبية الثانية .. واللي هي الرزفة .. ننتقل لها الصوب الثاني .. بخبركم شو الرزفة لين ما نوصل هناك ونسمع شو يغنون ..
الرزفة معروفة اكثر عند البدو من الحضر .. بحيث تتكون من شباب يكونون صفين متجابلين ويه بويه ..
ويوم يغنون .. الصف الأول يغني البيت الأول .. أما الصف الثاني فيكمل البيت الثاني.. وكل مرة يكون لهم دور يعني بالترتيب .. وصلنا لهم بس اول خلوني اكمل اللي عندي ... فمثل ما قلت لكم كل صف يردد البيت اللي عنده والصف الثاني يكمل .. وبهالطريقة لين ما تخلص الأبيات .. طبعا البيت ما يرددونه مرة وحده .. بالعكس يرددونه كم من مرة ..
ما ادري اذا انتوا تشوفون ويايه بس .. هذاك الصوب المجابل .. اشوف محب الشيخين والحاضر الغايب واقفين مع بعض يتابعون الرقصه ..
خلوني الحق عليهم .. :ttmasha:
عنود: الف مبرووك اخواني محب الشيخين والحاضر الغايب والله يهنيكم ان شاء الله ..
محب والحاضر: الله يبارك فيج وعقبالكم ..
عنود: اذا كانت لكم فرصة انكم تغيرون شي في العرس الجماعي.. فشو بتغيرون؟ هل بتنقصون شي او بتضيفون شي ؟
محب: والله انا ابغي ازيد شي واحد .. اللي هو ان يكون العرس الجماعي يكون لكل أعضاء الواحات .. وما يقتصر على كم عضو..
الحاضر: حتى لو كان ياهل ؟؟؟
محب: لا مب ان ياهل .. بس تكون عنده المقدرة يعني .. افهم يا ريال ...
الحاضر (يضحك): هيه صح انا فاهمنك اصلا .. صحيح نبا الكل يشاركنا ويحس بالفرحة اللي نحن عايشينها الحين .. والعرس ما عليها قصور في رايي ...
عنود: تسلمون والله يوفقكم ...
الفرقة بدت.. فخلونا نسمعهم ..

سالم سعيد باشكيلك في ظبي طاح لوطاني
شيبني شمسي ادخيلك طحت في الحب غرجاني

سالم سعيد باشكيلك في ظبي طاح لوطاني

شيبني شمسي ادخيلك طحت في الحب غرجاني

ومثل ما انتوا تشوفون ان الصفين مب بس يرددون لكنهم يرقصون على ايقاع الأبيات بحيث انهم يهزون راسهم والأيادي متشابكة ..

عنود: اخويه لماح .. لو سمحت
لماح: نعم ..
عنود: الف مبروك اخويه ... ونتمنى لك السعادة ان شاء الله ..
لماح: الله يبارك فيج .. الجميع ان شاء الله..
عنود: بما انك في عرس جماعي وانت واحد من العرسان .. فهل برايك ان العرس الجماعي احسن والا كنت تفضل يكون عرس خاص فيك بس.. ؟؟
لماح: لا والله .. بالعكس . العرس الجماعي مخفف علينا بعض الاعباء المالية .. ولكنه يزيد الفرحة بينا .. وخصوصا ان نحن اعضاء واحات بن دبي .. فاغلبنا يعرف الثاني .. فهالشي يزيدك وناسة ويوثق الصلات اللي بينا.. عنود: أكيد اخويه .. والله يدوم العلاقات الطيبة بين بعض.. تسلم اخويه واخليك تكمل فرحتك ..

يالله قدرت ازقر ( انادي) على لماح والا جان ما حصلته ..
خلونا ندور حد ثاني قبل ما تبدأ الفرقة الأخيرة ..
ما شاء الله من الزحمه مااروم اشوف حد ... كان المفروض اشل ويايه علم عليه شعار سما الواحات عشان شوي يسوولي سالفه ..
واخيرا لقيت الاسطوري..
عنود: الف مبروووك اخويه الاسطوري .. (( ولا 100 مرة قلتها اليوم))
الاسطوري: الله يبارك فيج وعقبال الباقين ان شاء الله ..
عنود: ان شاء الله .. اليوم طبعا يوم كبير بالنسبة لك .. منو كنت تتمنى يكون متواجد؟؟
الاسطوري: الحمدلله اليوم صحيح يوم كبير .. والحمدلله الكل متواجد ويشاركني فرحتي ..
عنود: الحمدلله .. والله يوفقك ..

عقب كم من لقاء ويا العرسان خلونا نسير صوب الليوا ..
الليوا معروف عنها انها رقصة شعبية تخص اهل البحر اكثر من اهل البر .. قبل كانوا اييبون الليوا قبل الرحلات البحرية لباقي المناطق سواء كانت الخليجية او الهند .. ويقولون ان الليوا يت من العمال الأفارقة نتيجة تعامل اهل الخليج مع أفريقيا .. وبدوا يييبونهم في الأعراس لان فيها ايقاعات تسر الناس الحاضرين والمعازيم .. مثل ما انتوا بتستانسون وانتوا تسمعونها الحين ..
الليوا مكونين الحين حلقة دائرية وهم حفيّ (( حفاة الأقدام يعني)) وفي النص تشوفون عازف المزمار او مثل ما انسميه الصرناي ... وحلقة الشباب تتجدم خطوتين وترجع خطوتين وهم يدورون عكس عقارب الساعه .. وبعد يستخدمون الطبل في هالرقصة .. ممكن هالحلقة تكبر وتوصل إلى 40 شاب او حتى اكثر.. ولعلمكم ان ليوا كلمة عربية مشتقينها من "لواء" وهو العلم مب الرتبة .. وفي كينيا الليوا معناها مبتكر الرقصة او دائرة الرقصة ..
وبهالطريقة بيكمل العرس مع الفرق والرقصات الشعبية .. لين ما يخلص العرس..
ولكن قبل ما نخلص خلونا نقابل اخر عرسانا ..
محد بقى من العرسان ما تكلم غير كلكلووش وذنيني.. وخلونا نسير لهم وانشوف شو رايهم ..
عنود: مبرووووووك كلكلوووش وذنيني .. كلكلووش و ذنيني : الله يبارك فيج
عنود: المايك لكم وقولوا اللي تبونه..
كلكلووش : انا ببدأ .. انا اليوم ابارك لاهلي ولباقي العرسان .. والحمدلله الفرحة ما كانت فرحة صغيرة .. بالعكس كانت اكبر من المتوقع .. واتمنى اللي ما عرس يعرس عرس جماعي حتى لو ويا عيال فريجه .. لان الفرحة غير . .. والحمدلله انا اليوم ما انتقل لعش الزوجية بروحي .. انا انتقل لها مع اقرب ربعي واقرب ناسي اللي هم اعضاء الواحات..

ذنيني: عطني المايك .. خلني انا اعبر بعد .. الحمدلله .. نعمة من الله .. اليوم نحتفل مع اقرب ناسنا واهل والكل فرحان والحمدلله .. نحن محتايين من الدولة تشجع هالاعراس .. والشباب المفروض ما يستحون او حتى يضايجون لانهم بيعرسون في عرس جماعي لان لها طعم غير ... ويرجع المايك لعنود ..

عنود: الله يدوم هالفرحة وان شاء الله تتغير نظرة الشباب للاعراس الجماعية ..

في ختام بثنا اليوم .. اتمنى الكل ذاق طعم الفرحة اللي الكل عايشنها هني معانا ... ونتمنى النظرة تتغير ونشوف اغلب الاعراس تكون جماعية ان شاء الله
ونلقاكم ان شاء الله في عرس جماعي قريب ,, وان كان نسائي ..

استودعكم الله والسلام عليكم ورحمة الله وبركاته..

ملاحظة: للعلم فقط بأن هذا الموضوع من قبل عضو وليس إداري
ملاحظة ثانية: شكر خاص للأخ مسافر للجفا على الدعاية الترتوووبيه في قناته العجيبة واشكره على تقديم البث في قناته ..