وزراة التربية والتعليم : يا ويلكم ويل

[ولد الشحوح]

اشكر ردودكم كلها بس صراحة قهر خاصة مدرسينا نحن اذا ثاني ثانوي وذلونا شو بيسوون فينا السنة الياية وهم يدرون ان النسبة مهمة لنا
انا ابا اسأل متى لحق الوزير يسوي دراسة وهو من فترة بسطية مستلم الموضوع ولا خذوه فغلوه ؟!؟

[الثعلب الرمادي]

السلام عليكم ...

هذا واحد من أبشع و أسوء الأنظمة و غلطة كبيرة يتطبق في الإمارات و السبب ضعف المناهج و ضعف مستوى المدرسين و قصر اليوم الدراسي و وجود عدد كبيرة من الإجازات خلال العام الدراسي و ما ننسى رمضان طبعا و اللي يقولي يقدر يدرس في رمضان و يخطف كل المواد و في نفس الوقت يتابع المسلسلات و البرامج الرمضانية فهذا فعلا رجل قوي.

إلي بينجحون من مثل هذا النظام الظالم هم الطلاب إللي عند أهلهم فلوس و فلوس للدروس الخصوصية و موارد مالية مالها نهاية و شغل واسطات من الآخر هذا الولد الحلو نجاحه مضمون 100% و طبعا الزلمات و الشباب العبقريين نجاحهم مضمون و باقي الطلاب ياكلون هوى.

شوف أخوي أنا كنت أدرس في القسم العلمي و مستواي العلمي متوسط هذا إذا ماكان ضعيف لكن ما استخدمت الدروس الخصوصية أبدا و تجاوزت نسبتي التسعين و كل هذا من شغلي الخاص لكن و مع هذا في أشياء في الرياضيات و الفيزياء و الكيمياء أنشرحت في بداية السنة لكن ما فهمتها إلا في آخر شهر قبل امتحانات الثانوية العامة لكن لو كان حظي نحس و تطبق هذا النظام الغبي في السنة اللي بمتحن فيها صدقني أكثر من 50% ما بطلع لأن مثل هذا النظام محتاج فلوس مالها نهاية و دروس خصوصية من القلب إلى القلب ... مب انته بس المنزعج حتى أخوي الصغير و هو الأول على العين في القسم العلمي متضايق من هذا الامتحان و السنة الياية عنده ثانوية عامة ... لكن أعتقد لو كان الطالب في القسم الأدبي ما أعتقد إنها مسألة خطيرة لهذي الدرجة ... ما أقول غير الله يعينك بس و أبد=أ ذاكر من الحين

[أكسجين]

السلام عليكم

هـ القرار هذا صدق واايد قهرني يوم سمعته , بصراحه هو له ايجابياته وسلبياته بعد !
يعني بيكون احسن ان الواحد يمتحن كل كورس بروحه , مب اللي درسته طول السنه اطلعه في اسبوع واحد بس ~ وبـ هـ الحاله اما اني اتفوق او انجح او ارسب !
النظام الجديم كان فيه نوع من الظلم لفئة من الطلاب , بس هـ النظام بيظلم الطلاب اكثر من قبل
لو يتطبق القرار انهم بس ياخذون مجموع درجات الامتحانات النهائية للفصلين بس وتكون هـ الامتحانات موحده لكل امارات الدوله بيكون واايد زين ,
بس ان النسبة تعتمد على كل اعمال الطالب من مشاريع وابحاث ومشاركه صفية خلال 3 سنوات او سنتين او سنة كاملة ، في نظري هذا ظلم !
.
.
لان مثل ما قلت اخوي ولد الشحوح ~ بتشتغل الواسطه والظلم والنفاق , يعني اذا الواحد صايره له مشكله ويّا مدرس ممكن المدرس يظلمه بـ الدرجات ,
وتصير لنا مثل هـ الامور وكنا نسكت عنها بس حالياً ما نقدر لان كل هـ الدرجات اللي نيمعها في صالحنا عشان تكون نسبتنا زينة
واذا طالب كان والله ابوه المدير فأبصم بـ العشر انه من الأوائل ان شاء الله
.
.
يعني هـ القرار مب مدروس عدل ~ وغلط انه يتطبق في دولتنا و في وااايد مدرسين يجاملون طالب على حساب طالب ثاني !
أتمنى صدق انهم يغيرون في هـ النظام , وبـ النسبة للي هم اخر سنة في الثانوية العامة السنة اليايه ~ ادخلو هـ الوصله و ابدوا رايكم علّ وعسى شي يتغير

| عفاريتوو |
بـ النسبة للتلاوة والتعبير العربي والانجليزي نفس الحالة عدنا ~ اعلى درجتين 18 و19 :no0: