أعضاء الواحات و كرة القدم !

[عفاريتووو]

السلام عليكم




كرة القدم من اكثر الرياضات اللي لها شعبية بين الناس
حتى بالواحات ,, اكثر اعضاء الواحات يمارسونها او حتى يتابعونها

خلنا نتعرف اكثر على اعضاء الواحات و هــ الرياضة

كيف يلعبونها ؟
وشو الذكريات اللي مرت عليهم بــ هــ الرياضة ؟
منو يشجعوون ؟
و كيف يشجعوووون ؟

..

بنبدا مع عضوة من اعضاء الواحات عنصرية :harhar1:



هزايم وكرة القدم :

لعبه كرة القدم نلعبها من كنا صغاار وبحكم عنديه أخو عشقه وموته السيطره و التحكم فكنت ألعب وانا عمري 6 سنواات ودوميه حليل حالي يا بخط الدفااع أو حاارس واسمينيه انصلخت الأخ يتحرى عمره كابتن مااجد وانا الضحيه وبعدها كبر المجال عيال خواليه و عيال الفريج ذييج على أياام قبل أما الحين العب بالصاله..صالة البيت مش صالة الملاعب لأن برع البيت ماشي :narr: فاطلع حرتيه بالأثاث وأعلبها مع أخوي الأصغر وولد إختيه و بناات خالي وخخخخخbrgll: إذ الوالد يريد يحرق بعد الغدى يلعب معاايه والمشكله هو لي يبدى ولو صار حاجه يفر على راسيه :nono: يعلني افدااه:kcl: ونحضر مباراياات إلي بالأنديه يعني شراات نادي السيداات بوظبي ودبي وaus , aud ,zu وطبعا مع بناات بوظبي

من ذكريات هزايم ويا كرة القدم :

خخخخخخ آخر مره لعبت بالحوي كنت مع أخوي الصغير وولد خالي و ربعهم كانوا تقريبا عمرهم عشر وأو تسع>>بعد اللعب حصلت هزبه محترمه من الحجيه<<المهم كنت انا وولد خالي و كم نفر من ربعهم بفريق و أخوي و بنت خالي و كم نفر بفريق الثاني المهم الأخ ولد خالي كانت يتخقق بساعته دايتوونه وكل مارفع يده كنت اصارخ حيووا صناعات بانكوك وانا بنت الخال حوارس فنصفق:harhar1: ووهم بالوسط الميدان يتضاربون مره وحده اشوفه خذ الكره من عندهم و:narr: يعني ياك الموت يا تاارك الصلاه الذكي نسى إنيه بفريقه وقاام يريد يشوووت قلت بقوف اصدها يعني كذى ولا كذى رااح يتحرطم على راسيه إلا شاات وتشوفينيه يدي انصلخت محمره و الكره هاهاها دخلت بالشبك إلا لحظاات الفريق الثاني يحبوون راسه و وشاالنهم الهوى وجان يستوعب ولد الحلال وطلع حرته فيني وبعد ماتحرطم قلت عااشت الصناعات البانكوكيه إلا اشوفه يجلني من مكانيه ويوقف هو حاارس ويصاارخ:هزاايم لاحد بيخسرنا غيرج دخلي عسااج تتجسحين زيااده ..ودعوته مستجابه صج دفنوني شقى أقويه الله ياخذ ابليسهم

الاندية والفرق اللي تشجعها هزايم :

بالإمارات لاحد يعني يعتمد حسب الفريقين لكنيه اشجع طبعا الحكم حيووه واايد يتعب هالأياام..اما بالموندياال برتغااال وايطاليا

هزايم و متابعة المبارايت :

مباريااات الدوري والكاس إلي عندنا اشووفها مع اخوي الصغير إذ كانت ايام االإسبووع وإذ كانت بالويك اند مع بناات خالي..وخخخخخ مباريات الدوري والكاس مافينا حمااس كل نتحرطم..أما المونياال وااي اخوي العود او مع اختيه لو هو مش موجود وتشجيعنا فنان يعني إيطاليه صج من الخااطر نتاابع أعلام>>ببلاش محصلينه من بيلاbrgll: لو كذى من رااح يتفيج يشتري..وأكيد الجلساا ماتحلا إلا بالحب و المكسراات و شاي وكرك وخرابيط شراات الشبووس و الديو والباجي الحاجات وكل ماوصلوا المباراه للبلاتياات كل مازااد الحمااس والبلع

شكرا لج هزايييم

..

ننتقل لــ عضو من اعضاء الواحات



عاشق القلم و كرة القدم :

كرة القدم هي اكثر رياضة امارسها ويمكن اكثر رياضة منتشره ويمارسها الكل .. لانها ماتحتاح الا لكورة ومرميين يتحددون الله يكرمكم بنعل والا بحصى والا اي شي .. وانا عن نفسي احب امارس الرياضة هاي لانها ممتعه خاصة اذا كان عدد الاعبين مناسب والجو حلو ..

كل اسبوع العبها مرة .. وعادة يوم الاربعاء من كل اسبوع
في الصيف نلعب في وحدة من الصالات اللي في جميرا .. اما في الشتاء نلعب في اي حديقة متوفرة ..

و العبها ويا ربعي اكيد .. وربع ربعي .. واي حد ينضم ويانا .. ونلعب تقريبا 5 ساعات متواصله ..
نحن ما نختار مراكز محدده .. كل واحد وحسب رغبته .. لعب عشوائي يعني .. انا اتجه عادة للهجوم .. ولو تعبت ارد دفاع والا اوقف حارس


من ذكريات عاشق القلم :

الذكريات الطريفة كثيرة .. بس بقولكم وحده منها ..
مرة وانا تعبان رديت وقفت حارس .. وطبعا انا مب مركز مول من التعب .. فواحد من الدفاع ردلي الكورة وانا ياي بيودها جان تمر من بين ايديه و تحت ريولي و تدخل في الجول ..
وعاد ينطلق الضحك في كل انحاء الملعب :hist: وانا جيه :kcl:

الاصابات اللي تعرضلها عاشق :

مرة كنت منفرد بالحارس وانا طاير صوب المرمى والحارس طاير صوبي .. و شكله الاخ متحمس زياده عن اللزوم .. جان اشوفه نزل سلايت ببريله على ريولي بالقو .. وانا الله يسلمكم من كل شر طحت عالارض واتجبست ريولي اسبوع ..

وبعد مرة رفعولي كوره ووانا نقزت اوني بييبها هيت .. وبدال ماضرب الكورة ضربت راسي بالعارضة .. وبعيد الشر عنكم انجرحت يبهتي ويهي كل دم :no0:

الاندية والفرق اللي يشجعها عاشق القلم :

طبعا في الامارات انا اشجع نادي العين ،، اما في المونديال مثل ما الكل ملاحظ اني ايطالي .. واتمنى الكاس ايطالي هالسنه

اللاعبين المفضلين عند عاشق :

محليا .. سبيت خاطر ,, عالميا .. دل بييرو

عشاق القلم و التشجيع :

في الملعب : اذا مباراة نادي العين ايلس على اعصابي .. وما قر مكان واحد .. يعني كل شي اوقف واصارخ و فوقت الجول بهدله .. الغتره فوق اطير وانا اناقز وسوالف الله يبعدكم عنها :no0:


عند التلفزيون : دوم ايلس عادي .. بس لو مباراة توتر وخاصة مباريات المنتخب اللي يرفعون الضغط لازم في اشياء تنفر عالتلفزيون .. يعني افر مخدات ومكسرات .. ومرة من كثر الغيظ فريت تلفوني جان يتكنسل


اتقبل الخسارة .. بس اعصابي تكون متوتره فما اكلم حد وارقد عادة .. فالافضل محد يرمسني وقت الخسارة :unlock:

حمدالله عــ سلامتك ,, و شكراا لك

..

لي عودة ان شالله مع عضوات و اعضاء ثانيين
و اتمنى انكم استمعتوا بالموضوع

[عفاريتووو]

دمعة شوق وكرة القدم :

ألعبها إذا كان الجـو يسـاعد ووين ألعبها اممم مرات العبها في الحوش
ولا في العـزبـه مرات ، واذا ضاقت الحيل نلعب في الصاله بالدس
brgll:
ألعب ويأ خوانيه الصغاريه أو خويه اللي اكبر عنيه بشويه
واكثـر شي في الهجـوم أيبـلهـم أجواال بالهـبـل ولا اكون الحراس
:waa:

من ذكريات دمعة شوق :

وذكرياتيه يطوليه بعمـرج مره كنا نلعب في الصاله وكان الغدا

والكوره عند خويه فـ قتله باص قصدي ممرها صوبيه ومااتي على
ويه اختيه العووده وغدا ويها حمرررر خخخ والشرده يادمعوه
:hist:

النادي و المنتخب اللي تشجعه دمع شوق :

أكيــد الـعيــن (الزعيــم ) // منتخبيـه في المنوديـال كان البرازيـل

افضل اللاعبين عند دمعة :

نادي العيـن سبيت خاطر و الوهيبي ووليد سـالم حارس العين

و ابوبكر سانجو قبل يوم كان ويأ الزعيـم

دمعة و التشجيع :

حالتيه حاله تلقين الحب منشوور في كل مكان ومنسدحه اطالع

واذا يابوا جوول انقز واصارخ واصـفـق صدقيني لاشعوري
:hist:

و في حالة الخسارة :
اخوز من عند الشعب لا احط حرتيه فيهم

دمعووووه تسلمين على مشاركتج في الموضوع
..



محب الشيخين من لاعبي كرة اليد بس بعد يتابع كرة القدم

النادي و المنتخب اللي يشجعه محب الشيخين :

اشجع نادي الامارات والعين والمنتخبات فأشجع البرازيل و فرنسا

اللاعبين المفضلين عند محب الشيخين :

اكثر لعيبة منتخب فرنسا !

محب الشيخين و متابعة المباريات :

هنه المصيبه عاد !
احب اطالع المباريات بروحي عشان ادقدق اي شيء حذالي ومحد يضحك علي

في حالة الخسارة :

عادي واحطي مليون عذر لهم !

شكراا لك اخوي ,, ولنا وقفة جريبة ان شالله مع كرة اليد



..

شرجاوي و كرة القدم :

لعبتها ل مرات قليله ما تتعدى العشر ...

النادي و المنتخب المفضل عند شرجاوي:

فريقي الاماراتي طبعا الشارقه .. و المونديالي المانيا

اللاعب المفضل :

لاعبي المفضل كلوزه

شرجاوي و التشجيع :

اشجع فريقي بعصبيه سواء على التلفزيون او فالملعب

شكرا لك اخوي على مشاركتك معانا
..

بعدنا مستمرين ان شالله مع اعضاء اخرين

[تنينه]

مــجهود تـشكرين عـليه الصراحه أختي عـفرت

لا عدمناج


تنينه

[هزاايم]

خخخخخخخخخخ لاحظتووا شي :hist:
سؤال المسااببقه من اكثر عضو يهثرب...:kkk: مافيها تفكير>>ربي اغفر لي ياارب و للجميع
سلمتي يالشيخه على المجهوود الطيب ولاهنتي وانتظر إلي بالي بااالج بس تغايضين بيه بالصورbrgll:
عسااج أزود من الموااضيع الطيبه

[راعي الزعـامه]

وانا ثاني اكثر عضو يهذرب
شو انسوي وايد مواقف اتمر علينا في الكورة
مشكوره عفاريتتوو على الموضوع وعالجهد المبذول ،،
تسلمين ،، :)

[تنينه]

صــدق أكـثر عـضوه هذربت هزايم:puppyeyes: وعقب عاشق القلم لوووول :hist:

طـلعت عـيناوي يــا حييك ,, بــس حلووه سوالفكم brgll:

[عفاريتووو]

بنت الدلع و كرة القدم :

نادر ما العبها واذا لعبتها في البيت طبعا
ويا اخواني
او احيانا ويا الصغاريه ، الدفاع و الهجوم :kkk:
اي مكان يحطوني فيه العب :harhar1:
عادة نكون شويه مب واايدين
حدنا 6

من ذكريات بنت الدلع :

اكثر المواقف الي تستويلي
ان يوم يشوتون الكره اخاف منها واحط ايدي على ويهي :kcl:
اذا كانت قويه يعني اخاف تصيبني
واكثر شي يستويلي ان يوم يشوتون الكره بالغلط اتي في راسي وانا يحليلي ميخصني

الفرق اللي تشجعها بنت الدلع :

مممم مب دايما متابعه للمباريات
يعني اكثر الاوقات اشجع العين
وفي المونديال على حسب اخواني :puppyeyes:
بس المهم اني ما اشجع البرازيل

اللاعبين المفضلين عند بنت الدلع :

:kcl: مب حافظه اسامي اللاعبين الصراحه
وايد علي حافظه اشكالهم

بنت الدلع والتشجيع :

اشجع بكل رقه وهدووء
ويوم ايبون قول اصفق

و في حالة الخسارة :

:nono: اقول انهم مايعرفون يلعبون :harhar1:
لالا عادي اخذها بروح رياضيه
اليوم بيخسر وباجر بيفوز

..



قايد الريم و كرة القدم :

من يوم كنت صغير امارس اللعبة . :kcl:
بدايتي بالفريج ومن عقب في النادي بس ما تميت وايد في النادي لاني من اشتغلت في بوظبي تركت النادي .. العبها ويا ربعي طبعاً . العب في الدفاع ووظيفتي مساك.

من ذكريات قايد الريم :

امممم ما اذكر بس اتعرفين يوم كنا نلعب في الفريج ضرايب طووول المبارة ..

الفرق اللي يشجعها قايد الريم :

اشجع نادي الوصل محلياً ، وعالمياً منتخب البرازيييل .

من اللاعبين المفضلين محليا عند قايد الريم :

اممم لاعيبة المنتخب كلهم.

قايد الريم ومتابعة المباريات :

اتابع المباريات في النادي ... صراااخ وضاريب وسب وكل شيء.

حالة قايد الريم عند الخسارة :

اكيييييييييييد حزييييييين :no0:

قايد الريم ,, شكراا اخوي على مشاركتك معانا في الموضوع
..

لي عودة ان شالله مع اعضاء ثانيين

[ألم ترى]

بسم الله الرحمن الرحيم ..

شكرآ اختي ع المقابله ..

بحفظ الله ورعايته ..

[هزاايم]

صــدق أكـثر عـضوه هذربت هزايم:puppyeyes: وعقب عاشق القلم لوووول :hist:

نستااهل
من صدقه أخوي عندنا ذكريااات مع الكره شو انصلخ ببلاش لازم الأجيال اليايه تتذكرنيه وبطولاتي و حليل حالي كيف اضحي بنفسي

عفاريتوو الشيخه ننتظر البقيه الباقيه

[العجيبة]

ما شاء الله ، لعيييبــة النـاس اهنـي ..

موضوع حلووو ومرتـب .. عيبنـي لقاء عاشـق القلم ، وايـد متأثر الأخ وحالته مستعصية !

مشكـورة اختي عفاريتـو ع جهـودج الرائعة .. نبـا نشـوف لقاء " عفاريتو وكرة القدم "

[ولد الحكومة]

وعليكم السلام ورحمة الله وبركااااته
موضوع وااايد حلوووو وفي قمة الروعة ، الصراحه جهد تشكرين عليه واااااايد اختي المبدعة فوفو ( هذا اسم الدلع طبعاً brgll: ) .


يعطيج العافيه وبانتظار المزيد من المواضيع الحلوة.


فمان الله

[عفاريتووو]

تنينة و كرة القدم :

الــكـره هالـشي المنتفخ المملؤ بالهـواء ,, مـنذ وجودي و ظهوري على الكـره الأرضيه وأنـا
أجوفه فـي البيت ,, دووم بـين أقدام أخواني يلعبون فـيه ,, أتذكــر يوم كــنت صــغيره كــنت ألعب
كـره ساعات ويا أخواني في الحـوي ,, كــنا ننقسم فريقين وكـل فريق مـتكون من لاعبين واحد في
حـراسة المرمـى والثاني هجوم لووووول صدق قاصين على عمارنا خ خ خ ,, ومــا كــنت أرضى
أنا ألا بالهـجوم ,, كــنت أحاول أقلد كابتن مـاجد بـس ما فلحت ولا قدرت أقلده في شي غـير أني
الكابتن ههه ومـركزي شراته في الهجوم بـس أنا بـدون لعيبه أقودهم ألا هـو الحارس المسكين
لوول:puppyeyes: ,, وأنــا عـاد كان يخلوني في الهـجوم بـعد لأني أصلا أكبرهم لوول يعني كلمتي هي اللي
تمشي هييه كيكيكيكيكي:negab: ,, أحــيد ساعات بــعد خـالي كــان يلعب معانا استهبال يـشل الكـره مـنا بكل
سهوله ويمـر حذالنا بـكل برااد ونحن 4 عـليه ما نقدر أنشل الكـره هههه دووم كان يقولي ويتحداني
أني أشل الكره مـنه بس ما جت شليتها هيهيهيي ,, << هاللعـب والرمسـه يوم كــنت صـف ثالث ألين
سادس او اول اعدادي تقريبا ,, وعقب عــاد العيال عااد كبرت:ma9dom: وصاارت ركلاتهم للكره اقوى وانا
عاد ما فيني اتكسر ولا شياته ,, هم بروحهم عقب اصلا كبر راسهم وما قاموا يسوون لي سالفه
,, عـلى أيام الأعداديه والثانويه يوم كانت أبلة الرياضه اتلعبنا كـره مــرات كــنت ألعب لأني
أغلب كلاسات الرياضه ما كنت أحضرها لوول ,,

النادي اللي تشجعه تنينة :

يـوم كـنت صف سادس أو اول أعداادي أعتقد حــبيت نادي العـين:kcl: ,, مـع أنه مـحد في البـيت يشجع
العين الكل حـاط على هالنادي ,, بــس أنا خـالفت العايله والتقاليد المتعارفه لووولbrgll: ,, حـبيت نـادي
العين صدق من خاطري وصرت أتابع مبارياتهم أول بأول واتـضايج وأعصب اذا خـسروا وصدق
استانس اذا فـازوه

تنينة و متابعة المبارايات :

دووم يـوم المباريات كلنا نتيمع في الصاله وأنجوف مع بعض ويا أخواني بـعد أحـلى حـماس لووول
غـير يـمعه الأولاد ,, ودووم أي فـريق يلـعب مـع العين هـم ضـد العـين :nono: ,,
عـاد هـم يحطون وأنا أدافع ,, أحــيد مـره أمي قالت لي تنينه هـديتي نادي عيمان وكل نوادي الشارجه
ودبي وشجعتي العين هههههه ,, قـلت لها أمي السالفه مب سالفة مدينه أو بعد مسـافه بس هالنادي
أحبه ومتميز أشجعه :cop: ,,

تنينية و التشجيع :

عــلى أيــأم المــدرسه صــدق كــنا أنحــس بــطعم الدوري والمباريات ,, كلاسنا كـان نصه وصلاويه
والنص الثاني عيناويه ودوم عـاد حـط وتقطيع لوول كشخه بس سوالف يعني مب ضراابه ,, عـاد
يوم مباريات النـهائي والعين أتفوز لازم البيت أعـزمه :6a: ويوم أسير المدرسه اليوم الثااني
لاازم بعد أكون موديه شي بمناسبة الـفوز لووول:hade: ,, يوم مباريات العـين عـاد لازم أنكون
لابسين شي بنفسجي ,, الشيله ولا أي شي كيكيكيكيي:negab: ,, غـير الشعارات على الطاولات وسالفه
لووول << طلعت الفضاايح ,, أحيـد مره أبلة الفيزياء يالسين أنقولها مس اليوم المبارا ه النهائيه
تابعيها كانت بين العين والوحده ,, جان تسألنا مـنو اقوى فريق عندكم ,, عـاد سمعوا الصراخ كل وحده
بصوب العين الوحده الوصل لووول:waa: قالت خلاص خلااص ما أبى أعرف brgll: ,, يـوم كانت العيـن
اتفوز صدق كـنا اليوم الثاني ضحك ومسيرات كيكيكي ,, ألحين في الجامعه مـا شي كل هالحركات
والخبال << كبروا البنات عقلوا لوول ,, حاليــاً ألحين في المونديال أشجع منخب أيطاليا ,, أتـابع
مباريات المنتخب في البيت مـع أخواني بـس لاازم يوم مباريات أيطاليا بنت خالتي أتي أتجوفه معاي ,
, اثنيناتنا أنشجع أيطاليا عـاد يوم الصراخ والزعاج مع بعض لوول حـتى يوم نتحرطم ولا شي مـع
بعض:sad4: معاي نفس الخـط لووول ,, دووم يوم أيطاليا أتييب قوول لازم أمي أتنش من الرقاد على
صراخي لووول ,, أحصل محاضره عقب اتسير ترقد لوول ,, حليلها آخر مره نشت متروعه شو في شو
أستوى عاد ع الساعه 1 ,, أخواني ما شي فريق بنتج ياب قوول لوولbrgll: ,, اتقول اجوفها
لاابسه هالقميص الأزرق قلت اليوم مباراتهم عيل يؤيؤيؤيؤ حرجات ^^ ,,

المــباريات صـدق لـها طعم ثااني وطقوس حلوه لووول ^^" ,,

تنينة brgll: ,, تسلمين على مشاركتج ويانا في الموضوع

..

مب معقوولة نرمس عن كرة القدم و ما نيب طاري كلكلوش :harhar1:

كلكلوش و كرة القدم :

حاليا قطعت عن الكوره و السبب الانشغال و المشاغل ..بس كنت العبها العصر و اوقات فليل .. على حسب ..
كنت العب في النادي لين ما اتعورت و طلعت .. بعدين رديت للفريج ..
مممم اي حد يبى يلعب وياي .. العب وياه ..

كنت العب في الوسط .. و لازال مركزي المحبوب ..

من الذكريات الطريفة اللي مرت كلكلوش :

هممممم .. من الذكريات الحلوه ان مره كنا سايرين نلعب مع الوصل .. و نفس الوقت كنا ناسين لبسنا

:harhar1: .. فـ انحسبت 2 / 0 لصالح الوصل :nono:

الفرق و المنتخب العالمي اللي يشجعهم كلكلوش :

الشعب و الشارجه ..
و فريقي المفضل عالميا اي سي ميلان .. و برشلونه ..
و في المونديال البرازيل لكنها طلعت ^_^

اللاعبين المفضلين عند كلكلوش :

محليا .. العنبري .. إسماعيل مطر ..

عالميا ..شفشنكو .. كريستيان رونالدو .. رونالدينهو .. زيدان

كلكلوش و التشجيع :

الله لا يراويج . اسألو نصووور عني brgll: .. ما يتم صوووت ..

حالة كلكلوش في حالة الخسارة :

على حسب .. هل الخساره منا .. هل ادى فريقنا ! .. هل خسارتنا مستحقه . خسرنا بأخطاء تحكيميه !
لكل خساره موقف .. لكن اكيد اتقبل الخساره مثل ما اتقبل الفوز ..

كلكلوش شكراا اخوي على مشاركتك ويانا

..

مستمرين ان شالله

[المزيوونه]

تسلميين اختيه ع الجهد المبذول .. الصراحه عجيب ..وفكرته حلوه ..

موفجه ..

[كـلـكـلـووش]

صـدق ليـن قالو احذر لسان البنت :harhar1:

ما شاللله شكثر يرمسن :nono: > قلت ماشالله تراني :harhar1:

عفاريتووو .. الفكره حلوه و مبتكره .. و ابدعتي فيها .. و تصاميمج زادت الموضوع ترتيب ..

الموضوع كلو على بعضو ( اوقيييق )

تسلمين على هالمجهود ^_^

[تنينه]

هممممم .. من الذكريات الحلوه ان مره كنا سايرين نلعب مع الوصل .. و نفس الوقت كنا ناسين لبسنا

.. فـ انحسبت 2 / 0 لصالح الوصل

اســــمــيني مـت من الضحــك يـوم قريت هالرمسه

صـدق ليـن قالو احذر لسان البنت

ما شاللله شكثر يرمسن > قلت ماشالله تراني

مــا أدري لـيش شكـيت في عمري المــهم قلت ما شااء الله ^^"

عــفرت تسلمين ع المـجهود الطــيب :qor9anah: لا عـدمناج الغاليه