السلام عليكم ورحمة الله وبركاته
بيباي عرب.....والله حاله!
الناس تشتري صخول تيوس .... حتى الصراصير يشترونها بتايلند ...عادي بيع وشراء
بس؟ يشترون انسان ! البقاء لله ولا حول ولا قوة إلا بالله .... زمن العبيد عاد من جديد
يعني بيني وبين الكره علاقه مش ولا بد ! بس لما تجذبني مباراه بالصدفه ...أناقز من الاندماج
ولما أسأل مية سؤال بالدقيقه عادي ... يجاوبوني يطنشوني يشوتوني على حسب الأجواء :ice:
بس؟ لما أشوف لاعب ما له خص باللعيبه ...لا لون ولا شعر ولا عيون سود ووساع !:puppyeyes:
وأسأل ويقولولي مشترينه ؟ لازم بقول ...لا حول ولا قوة إلا بالله!
والله حالة يا عرب!
الوالد داخل البيت امعصب .... وأكيد السكوت بمثل هالحالة من النباهه مب من ادب السكوت
يعني اتقي شر الحليم إذا غضب ...وإلي يدق الباب بهالحاله بالذات إييه الجواب إلي ما يسر
بس الفضول ...ويا ويلي على داء الفضول ... الله يجيركم منه !
وجان ينفجر... مب حاله هاي ! حتى الصلاه ما فيها خشوع ...واحترام المسجد صار مفقود
الركعه الأولى ... العيون السود وإش لون أملها ! :puppyeyes:
السجده الأولى... يا طبطب يا دلع يا تقول تغيرت عليك !
الركعه الثانيه ... ريمكس من جميع المصلين ... مطربين الوطن العربي والغربي
والله حاله ! لا حول ولا قوة إلا بالله ...اللهم ثبتنا على الدين
والله حاله ! بيباي عرب
يقولكم قبل الحريم كانن يسيرن محو الأميه .... أيام سكتو وبداية تعليم الكبار:ttmasha:
الدرس الأول كان حصة لغة عربية .... والجملة الأولى بالمقرر كانت
دخل حسن !:smartass:
كل الحريم بالصف اتغشن واتلحفن بعبيهن متلومات !:qor9anah:
عنبوج يا أبله ليلى شغا ادخلين علينا ريال ! خلي حسن يطلع برع ما يستوي جيه
يحليلهم والله .... الحياء شعبة من شعب الإيمان
الحين ...يدخل حسن ووراه راشد ويسبقهم سامي ووائل
والبنات : مرحبااااااااا الساع ملايين ولا يسدن !:mar7aba:
لا حول ولا قوة إلا بالله!
بيباي عرب !
تيلفون البيت صار ماله لا طعم ولا لون ولا نفع عام ! :terms:
الموبايلات غزت قلوب المواطنين والبطاقات صارت هواجس اليهال المفعوصين
الرسايل انقرضت .... والطوابع استقلت بذاتها بعد ما خف الإقبال على تداولها وسوق أسهمها وصل للحضيض
والبشاكير عيال العز صار الموبايل عدهم من ضروريات العمل للاطمئنان على الأهل
الشغاله ترتب الصاله وهيه ترمس ريلها...عادي حريه شخصيه...ليش ما لها رب!
لدريول بيوصلني مكان وهو طول الوقت يهذرب بصوت عالي لا حيا ولا مستحى ولا احترام
بنت وولد 10 سنين لازم بإيده موبايل وبرقم يسكت حتى الأخرس !
لا حول ولا قوة إلا بالله
والله حاله! لا حول ولا قوة إلا بالله
دام الإجازه بدت ....قلت بفرفر على القنوات الخليجيه
مسلسل يديد بالراي مكتوب عليه حصريا ....قلت أخيرا بشوف شيء يديد
المهم ما فهمت شيء من قصة المسلسل ....لأنه إلي شدني شكل الممثلات:nono:
هاي خشمها منتفخ من جهه وجفنها مشدود من جهه ! والله كإنها طالعه من ضرابه
والثانيه ...مستحيل تكون هيه نفسها الممثله الأوليه ....والله بوزها وارم ! امعبينها بوتكس
وهاللبس ! أكيييد مب لبسنا نحن العربيات الخليجيات المسلمات ... امحق موضه ما تليق علينا:narr:
والله حراااام ...يدورون الحلاه ويغيرون بأشكالهن ....لوين بنوصل يا عرب
صدقهم يوم قالو ...من راقب الناس مات هما ....
لا حول ولا قوة إلا بالله!
بيباي عرب ........ مواقف تعتبر نقطه من بحر المواقف الكثيره التي تصادفنا في حياتنا ...
مواقف تجعلنا نفكر .... هل نحن بالفعل عرب ؟
لأنه العروبه بالذات مب إرث يتورث ...هيه قيم وعادات وتقاليد ولغة لازم تكون متأصله بكل واحد فينا
ما بنترك ماضينا ....ولازم نتعلم من حاضرنا الزين من الشين ...
عشان تظل عروبتنا هي مستقبلنا إلي بنفتخر فيه جدام عيالنا...
آراءكم تهمني ...فشاركوني فيها ...
رد مع اقتباس
!!
مواقع النشر (المفضلة)