السلام عليكم ..

اخويه المقاتل انا عن الي قلته و كان المقصود من قول الرسول صلى الله عليه وسلم ... الصور التي تعلق على الجدران و تكون امام الجميع باينه ..

اما الصور المهانة ( مثلا على الوسائد، الزوالي ...الخ ) فما عليهن خلاف ..
فما بالك عيل بالصور الي تنحط في الالبوم و ماتكون أصلا باينه للعيان ؟؟

ياخويه هناك امر معروف ان بعض المشايخ كانو متشددين .. و كل واحد و اجتهاده صح ولا لأ ؟؟
على سبيل المثال احد المشايخ .. ماحيد اسمه هل هو ابن عثيمين او لأ مابا انسب الكلام له او لغيره لأني ما اذكر الاسم .. لكن احد المشايخ قال بأن الريال الي يسمح بإدخال التيلفزيون لبيته يعتبر من الرجال الي مايغارون على اهله و لا ينظر اليه الله يوم القيامه .. !!
اذا جذه .. عيل كلنا مانغار على هلنا و محد بيكلمه الله يوم القيامه ؟؟

كل شي في هالدنيا سلاح ذو حدين .. انا اقدر آخذ التيلفزيون و اشوف فيه برامج و قنوات زينه و اتابع الصلاة في الحرم .. غيري يحطه عشان يتابع نجوم الخليج ..

في النهاية انا مقتنع بالكلام الي سمعته من المشايخ عندنا في الامارات .. و اذا كان التيلفزيون حرام جان محد تصور و ابسط مثال في قناة يديده للقارئ العفيسي .. و عندك ايضا الحرم يصورون فيه و هناك كيمرات و كل شي .. القرضاوي و الكبيسي و السديس و الشيخ نبيل العوضي و احمد العوضي و عمرو خالد و غيرهم وايدييين يطلعون في التيلفزيون و الكل يشهد على صلاحهم .. ليش محد منهم حرم التصوير ؟؟
ياخويه لاتاخذ الشي من وجهة نضر وحده .. هناك ناس متشدده يحرمون كل شي .. طبعا الفتوى يت بإجتهاد منهم جزاهم الله خيراً لكن ايضا المشايخ الي حللو اجتهدو و هم الاغلبية العضمى .. !

هناك قاعدة او مقولة في الدين سمعتها من أحد الدكاترة في علم الشريعة .. قال لي مرة في الاسلام لازم يكون عندك مفتي تثق فيه و تمشي على كلامه ولازم يكون من اهل المدينه او الدولة الي انته فيها ..
الاسباب ؟؟

1- كثرة السؤال عند المشايخ بتخلي الانسان الجاهل في العلوم الدينية ( مثلنا ) يتلخبط في فهم الفتوى و الامور الدينية .. هذا يقوله حلال و الثاني يقول له حرام .. ف الواحد يتم على راي الشيخ الاول و مايبحث وايد .. بس بشرط الشيخ هذا يكون مشهود له بالصلاح ( يعني مب مطوع خربوط ) و يكون مفتي ..
2- لازم يكون من سكان الدولة الي انته عايش فيها لأن الاختلاف في العادات و التقاليد و اللغة أو حتى اللهجة يمكن يأثر و يسبب اختلاف كبير في الفتاوي ..

في النهاية انا هالفتاوي ما اقتنع فيها و بمشي على كلام المشايخ الي عندنا في الامارات .. اما الكلام الي ينكتب في هالمواقع مايقنعني ..

السموحه منك