" الجزء الواحد والعشرين"

وترد تدخل خوله غرفتهــا،، وتسمع موبايلها يرن،، راحت تشله،، وشافت رقم غريب واستغربت،، ( من هذا اللي يتصل يا ترا)...بعد لحظه قررت اتشله وتسمع بس، يمكن تكون وحده من صديقاتها متصله،،

وشلته خوله وسكتت،،
الجهه الثانيه كانت نفس الشي محد قال شي صخه،،
استغربت خوله،،شويه وتسمع حس واحد،، يقولها بكل هداوه،،
....: ألووو ...ألوووو...ألوووو
خوله ( حست انه صوت عبدالله فردت ابسرعه): ألووو
...: ألووووين....بلاج صاخه،،
خوله: لا كنت أتأكد بس،،
...: هييييييه...اشحالج؟؟
خوله: الحمدلله...ليش انته وين؟؟؟
....: أنا خاري..
( لا حظوا كل هذا وخوله تتحسب انه عبدالله اللي متصل تقريبا نفس الصوت)
......:أقولج...
خوله : خير؟
.....: الخير بويهج...شو مسوين عشا؟؟
خوله: والله ما أدري..توني يايه من بيت اربيعتي وما ادريبهم شو مسوين..
......: شوووه؟؟ من وين يايه حضرتج؟؟؟
خوله: من بيت اربيعتي...
....: لا والله واتردين واتقولينها مره ثانيه بعد..
خوله: أووووف..عبود هاي هب أول مره أروح فيها عند اربيعتي...
...: بعــــد؟؟؟ منو هذا عبوووود...؟؟
أنتي شو سالفتج اليوم؟؟
خوله ( خوله انصعقت قالت هذا مغلط وأنا بعد أخذ وأعطي وياه...اويه): ....
....: حمدووووه...بلاج صاخه...صبري ثواني وياي البيت وأنا أروايج..
( ويبند التلفون في ويهها)

خوله يلست وتمت اتفكر...وقالت في خاطرها: ياربي شو هالمشاكل اللي تي فوق راسي...أنا شو سويت الحين...
ان قلتله اني هب أخته ..أخاف يتعدا حدوده ويتم يتصل بعدين...وأخاف ان ما قلتله يروح ويهزب اخته،،،
انزين هو ليش ما يتأكد من الرقم...
أففففف هب عارفه شو اسوي،،،

وقررت بعد تفكير خوله،، انها اطرشله مسج وأتقوله أتأكد من الرقم..
وطرشتله خوله المسج،،
ثواني ورجع واتصل فيها،،،
شافت خوله الموبايل يرن وقالت في خاطرها : يا ربي من هالبلشه...ابتشلت فيه...خلني ارد عليه وانهي السالفه،،
وشلت خوله الموبايل...
خوله: ....( وتمت ساكته)
....: ألوووو...
خوله: نعم،،
... : اسمحيلي الشيخه،، كنت مغلط،، واسمحيلي عالرمسه اللي قلتلج اياها...
خوله: لا عادي...
...: ما كنت أدري وكنت ضارب الرقم بالغلط،، وحسج شرات حس أختي فما فرقت...
اسمحيلنا عاااااد...
خوله: عادي ..حصل خير...مع السلامه..
( وتبند خوله التلفون في ويهه)

وعدت هالليله وخوله في تفكير وسهر طويل،، وما خبرت أمل يوم شافتها،،، ونفس الشي كان خليفه ما رقد عدل،، كان خايف من ردة فعل خوله،،

اليـــــوم الثـــاني ،،،

العصر كانت أم حسن و وفا اربيعت أمل في بيت أم حمــد،،
يايين يخطبون،،، أمل حق علي،، وأميه عوشانه وأم حمد كانوا وياهم في الميلس،، ويسولفون مع بعض شويه وتدخل أمل،، وهي فاله شعرها،، وراده قصتها على ورا ومحطيه طوق على شعرها،،
يايتنهم بجمالها الطبيعي بدون مكياج ولا شي اللهم اللجلوس اللي كانت حاطتنه،،
وكانت مستحيه ومستانسه،، وويها منور ما شاء الله عليها

أم حسن: هلا هلا بالعروس...أشحالج اميه ( وهي تتوايه ويا أمل)
أمل : الحمدلله بخير عمووه..
أم حسن: فديتج أنا،،
وفا: هيه هيه..الحين التفدي والدلال كله حق أمل،، وأنا بتنسوني...
أم حسن: بتتفداج أم ريلج ان شاء الله...
أم حمد: عقبال ما نفرح فيج يا وفا،،
وفا: ان شاء الله...
أميه عوشانه: ايلسي ايلسي أمل عدال عمتج،،

وأمل كانت مستحيه هب أول مره تشوف فيها أم حسن،، لكن أول مره تقعد عدالها وهي كنتها،،

في اللحظه عبدالله وخليفه يهومون في الشوارع،،
عبدالله: بس لاعت جبدي من الحواطه،، نزلني البيت بحط راسي وبنخمد،،
خليفه: أفاااااااااااا....توه الناس،، حتى المغرب بعده ما أذن...
عبدالله: ياخويه أنا عيزان وأبغي انطب وأرقد من وقت
خليفه: زين زين،، الحين بوديك بس هب تي الساعه 8 واتقول بنظهر؟؟؟
عبدالله: هههههه...عاد على هوالك،،
خليفه: اللي بيظهر وياك عاد،،
عبدالله: ان شاء الله عميه،،

وفي هالحزه تتصل نهى بعبدالله،،
عبدالله: هذي نهى متصله،،
خليفه: يابويه ودر البنات ما بتحصل من وراهن إلا الذنوب،،
عبدالله: انزين أنا ما اتصل هن يتصلن،،
خليفه: رد رد...
ويرد عبدالله على نهى،،
عبدالله: مرحبا الساع بالعيون الوساع،،
نهى: ههه ...
عبدالله: فديت هالضحكه أنا،،
نهى: فديت روحك عبودي...
عبدالله: أفااا...جيه شايفتني بيبي في الحضانه تزقريني عبودي...
نهى: هههههه...يعني حرام أدلعك،،
عبدالله: لا هب حرام ولا شي،، ( وهو يصاصرها) بس بيني وبينج عادي،،
نهى: ليش حد عدالك،،
عبدالله: نعـــم
نهى: وليش حاط التلفون عالمايك،،
عبدالله: بس عشان أبغي صوتج يتردد في كل أحشائي،،
نهى: تسلم حبيبي..
عبدالله: اشحالج حبوبه؟؟
نهى: بخير ربي يخليك،،
عبدالله: رحتي المدرسه اليوم ؟؟
نهى: هي رحت واتضاربت ويا وحده،،
عبدالله: انتي اتضاربتي...
نهى: هيه..
عبدالله: بالبكووس..؟؟ ومط الشعر؟؟
نهى: عبدالله عن الطنازه،،
عبدالله: ههههههه...تراج اتقولين اتضاربتي...
نهى: هيه ..بس اتفاتنت وياها،، تلاحقني من مكان لين مكان،، أونه أحبج ومعجبه فيج،،
مالت عليها وحده دبه،،
عبدالله: أويه ...اتحملي على عمرج منها،،
نهى: اشتكيت عليها...وخبرت الأخصائيه،، وقالتلي بتتصرف وياها،،
عبدالله: زين زين سويتي...
حبيبي؟؟
نهى: هلاعمري،،
عبدالله: الحين أنا رايح البيت يوم بتفيج بتصل فيج..أوكي..
عبدالله: يالله باي،،

ويصكر عنها الخط ،، هب لانه بيروح البيت بس لان خط كان يايينه،،
عبدالله: في خط ثاني عندي..؟؟
خليفه: منوه متصل؟؟
عبدالله: ما أعرف رقم غريب...
( ويرد عبدالله عالرقم)
عبدالله: مرحبا،،
....: .....( محد رد )
عبدالله: ألوووو؟؟
....( بكل رقه وهداوه وصوت أنثوي هادي) : السلام عليكم
عبدالله ( وهو مستغرب): وعليكم السلام،،
من معاي؟؟
.... : أنت منوووه؟؟؟
عبدالله: أختيه أنتي اللي متصله؟؟ ومنو بغيتي؟؟
....: ابصراحه،، أنا شكلي مغلطه بالرقم،،
عبدالله: هييييه...
....: سوري،، مع السلامه،،
عبدالله: لحظه لحظه،،
....: خير..
عبدالله: شكلج هب مغلطه ولا شي،، يمكن داقه هالرقم بس واتعرفيني بس ما عرفتي كيف ترمسين...
...: شوووووه؟؟؟ لا يا خويه أنا مغلطه وآسفين عالإزعاج...
مع السلامه...( وتبند السماعه في ويهه)

عبدالله: خييييبه ...بندت التلفون فويهي..
خليفه: هههههه...تستاهل محد قالك...
منو أنت أصلا عسب تطلع اتعرفك،،، أونك عااااد..
عبدالله: هيه جيه ما تعرفني يمكن حد من اربيعاتها عاطتنها رقمي ولا شي...
خليفه: حركات انت بعد...



بعد المغرب،،،
أبو حمد كان يالس في الصاله وتدخل عليه أم حمد ( طبعا وفا وأمها روحوا قبل الصلاه)
أم حمد: السلام عليكم،،
أبوحمد: وعليكم السلام ( وهو صاد صوب أم حمد) هاااه بشري ؟؟ شو صار؟؟
أم حمد ( وهي مبتسمه): ما صار إلا الخير،، ناس طيبين وما عليهم كلام،، وقالوا اللي تبونه نحن حاضرين به..
أبوحمد: الله يوفق بنيتنا ان شاء الله..
أم حمد: آمييين...
أم حمد: والرياييل ان شاء الله يوم الخميس بيون يخطبونها منك رسمياً...
أبو حمد: خير ان شاء الله...
أم حمد: فديتها أمووولي بتروح عني...
أبوحمد: ومنو قال انها بتروح؟؟
أم حمد: ليش ناوي تسكنهم عندنا...؟؟
أبوحمد: لا بس بعدهم عن العرس،، يعني يملجون وفي الصيف اذا بغوا يعرسون يعرسون بكيفهم،،
أم حمد: عااد هالشور بايدهم،،

شويه ويدخل عبدالله عليهم،،
عبدالله: السلام عليكم،،
أبوحمد وأم حمد: وعليكم السلام،،
عبدالله: ما شاء الله...اشوفكم يالسين ارواحكم ومحد مغبر الجو عندكم،،
أبوحمد: هههه...هذووه ترا ... غبر الجو من دخلت،،
عبدالله: افاااا...( وهو مبتسم)
أم حمد: تعال ابويه فديتك اتقهوى...
أبوحمد: على شو يالسه تتفدين...واحد اشطوله واشعرضه حق شووو تتفدينه،
،،
عبدالله: هههه...ترا بعض الناس يغارون عليج ..
أم حمد: وافديته بوحمد...تراني هب مقصره لا في الليل ولا النهار دومني اتفداه...
أبوحمد: احم احم...
عبدالله: أخخ منكم انتوا يالشواب...
أبوحمد: شابت اعظامك ياللي ما تستحي...حد يقول عن أمه وأبوه شواب...
أم حمد: بوحمد...شو هالرمسه بعد...
عبدالله: هههه...أنا داخل عند اميه عوشانه،،

نكمل بقية الأحداث في الجزء الثاني والعشرين