:: ليــتنـــي عرفتــــك فــي بدايـــة حيــاتــي ::

[بهجة الروح]

thanx all

بس لازم اروح الدوام الحين

بحط جزء وبروح وبكمله العصر ان شاء الله

[بهجة الروح]

" الجزء الرابع عشر"

واتصلت البنت بالشرطه اللي كانوا على وشك الوصول،،
وعبدالله كان متصل يترياهم وهو واقف عند سيارته...وهي كانت واقفه بعد واتصلت حق اختها،،
البنت اسمها ميثا..
ميثا: السلام عليكم،،
فاطمه ( أخت ميثا): وعليكم السلام...
ميثا: فاطمه لا تزيغين...أنا سويت حادث عند دوار الكويتي..
فاطمه( وهي زايغه): والله؟؟؟ شو استوا..
ميثا: لا تخافين ما استوا شي بس ضربه خفيفه والشرطه اتصلت فيهم وبيون..
فاطمه: بييج انا الحين..
ميثا: لا لا تين ما في داعي...بتسوين زحمه...
فاطمه: انزين بس لا تنسين تاخذين ورقة التأمين...
ميثا: انزين..
فاطمه: والا اقولج..خليني ايي عشان اهزب اللي داعمنج...
ميثا: لا خليه يولي ابروحي اتحرطمت لين ما قال بس
فاطمه: قالج بس؟؟..
ميثا: يروم هو يقول شي..
فاطمه : اتحسب بعد..

عبدالله كان يسمعها وهي ترمس وكان يدري انها تقصده بالرمسه وكان منقهر من الخاطر،،، أول مره يشوف بنت حلوووه وقمر ولا تعطيه ويه...لا وبعد اتقول عنه " خلي يولي"...صدق صدق كان متغصص...

و وصلوا الشرطه بعد لحظات،، وخذوا المعلومات عن ميثا وعن عبدالله...وعطوا ميثا ورقة التأمين،،
وعبدالله انتبه لرقم ميثا اللي كان سهل وايد وحفظه وسيفه بعد في الموبايل...وابصراحه ما حب يفوتها...
وحفظ رقم سيارتها بعد...

وبعد ما راحوا الشرطه...
عبدالله: اسمحيلنا عاد اختيه..
ميثا: مسموح...

وركبت ميثا سيارتها وراحت،،
وركب عبدالله سيارته وراح لمشواره...

عقب المغرب في بيت أم حمد،،
خوله كانت مصليه المغرب ويالسه أتلف سيادتها،، ودخلت عليها أمل...
خوله: صليتي؟؟
أمل: هيه توني امخلصه..
خوله: زين..
أمل: باجر عندج امتحان.؟؟؟.
خوله: لا...ما عندي بس عندي essay لازم أسلمه...
أمل: هيييه...تبين أساعدج...
خوله: أممم...لا ما يحتاي..

....لحظة صمـــــــــت...

أمل: خوله؟؟؟
خوله: هلا...أدري في خاطرج شي تبين اتقولينه..
أمل ( وهي موخيه): هيييه..
خوله: من البارحه حاسه فيج..هب طبيعيه..
أمل: صح..
خوله: قولي...
أمل: ما أدري من وين أبدأ
خوله: أبدي من وين ما تحبين...

( خوله كانت يالسه على الكرسي اللي حذال الكمبيوتر...وأمل يالسه عالسرير)..
أمل: تعرفين...
خوله: شوه قولي
أمل: أخو وفا علي..
خوله ( وهي مستغربه): بلاه؟؟
أمل: هب قلتلج انه شافني...
خوله: هييه..
أمل: البارحه كان ضايفني عالمسن...
خوله: شوووووووووووه؟؟
أمل: مثل ما سمعتي...
خوله: اميه سويله بلوك ودليت...
أمل: خليني اكمل انزين..
خوله: كملي...
أمل: يوم ضافني البارحه كنت اتحسب انه وحده من البنات...بعدين صدمني وقالي انه واحد هب وحده وقالي...

( وتقريبا تعرفون السالفه كلها...)

خوله: وما رديتي على رسالته...
أمل: لا..
خوله: أكيد الحين هو يتريا الجواب منج أو الرد..
أمل: لا ما برد...
خوله: ما ادري..
أمل: ما ادري ما ادري...هب عارفه شو اسوي...
خوله: أنا بقولج...خلي الوقت يحل كل شي واهتمي بدراستج..


في هالفتره ،،

عبدالله كان ويا خليفه في ستار بكس ويطالعون اللي رايح واللي ياي ويعلقون عالسودا والشقرا والسمرا والدبه والمتينه والضعيفه،،
ما خلوا حد في حاله....
عبدالله ( وهو متساند عالكرسي وحاط ريل على ريل) : هههههه...بس خلوووف هلكت من الضحك...
خليفه: اندوك اندوك،، شوف هاي اللي تتمايل من ثقلها ،، اتقول ابقره...هههه..
عبدالله: هههه..اسكت اكي صدت واطالعك..
خليفه: شو يعني بتي اضاربني...خلها تي انا قدها وقدود...ههه..
عبدالله: اويه شوف منو ياي..
خليفه( ويصد وراه): هاي شو يايبنها الحين؟؟
عبدالله: ذبحها الشوق ويت تشوفك..
خليفه: اخيييه...

اللي كانت يايه صوبهم " مها " اللي تعرف خليفه،،
يت و وقف صوب خليفه و حاطه ايدها على خصرها،، وهي تهز اريولها،،

مها: لا والله...مستانس وشاق الحلج بعـد؟؟
خليفه: هلا بمها..اشحالج؟؟؟
مها ( وهي تزاعق) : لا تغير السالفه...بلاك من يومين اتصل ولا ترد عليه..
وأطرش مسجات ومب معبرني...
شو فيك انته خبرني شو فيك..
خليفه: قصري قصري حسج..
عبدالله: مها استهدي بالله ،،
مها: عبدالله ما يخصك السالفه بيني وبين هذا...
خليفه: شو هذا بعد؟؟ ليش أنا حمار ابوج اتشوفيني جدامج...( وهو واقف)
عبدالله: خليفه ايلس عنها..
مها: ارجوك ما تيب طاري ابوي على اللسانك...وثمن كلامك احسلك...
خليفه: اطاعوا انتوا يالسه تهددني...خير يا طير ما رديت عليج..افهميها..
مها: انا كنت احاتيك..وخايفه عليك اخر شي اشوفك اميلس اهنه وتضحك ولا هامنك شي..
خليفه: روحي روحي...
مها: شو بعد روحي ... شو قصدك...
خليفه: مثل ما بتفهمينها فهميها...
مها: لا والله...خلاص يعني شبعت مني...
عبدالله: مها استريحي..
مها: شو استريح انته بعد...اربيعك خلى فيها راحه،،
خليفه: أوووهوووو...انا اروح ابركلي...

( وما عبرها خليفه وروح على طول)

مها: شفت ..ما عبرني وروح..
عبدالله: يالله شو بتسوين..
مها: بس أنا ما كنت يايه حقه ..
عبدالله: عيل يايه حق الشووو؟؟
مها: يايه حقك،،...خذ..( وناولته رقم)
عبدالله: شوهاا؟؟
مها: هذا رقم وحده..امطفرتني من زمان...الا تبى ترمسك...عاااد ما أوصيك عليها،،
تستاهلك..
عبدالله: ههههههه..صدق انكن حركات...اونه يايه حق خليفه وتهزبينه
مها: هههههه...اصلاً خليفه عايفني وانا عفته بعد

وروحت مها وقام وراها عبدالله وراح،،

واتصل بخليفه وهو في الدرب،،
عبدالله: ألوووو
خليفه: هلا هلا عبدالله..
عبدالله: بلاك شبيت ضوو وقمت
خليفه: كنت بضارب وياها..وخاطري اصفعها عشان جيه روحت
عبدالله: هههه...حركات انته بعد
خليفه: شو اسوي قهرتني..
عبدالله: روحت انته الحين..
خليفه: هيه بسير ارقد ورايه دوام..
عبدالله: خلاص عيل انا بعد بروح البيت وبخمدها..بس ما ظني ارقد
خليفه: ليش..
عبدالله: اللي دعمت سيارتها؟؟
خليفه:بلاها؟؟
عبدالله: خذت عقلي..
خليفه: أنت كل ما تشوف وحده جيه اتقول..
عبدالله: لا لا بس هاي غير..وايد محترمه..صح انها عقت عليه رمسه وقالت حق اختها خليه يولي..
بس صدق دشت قلبي...قمر ما شاء الله عليها وجسم عليها هب على حد
خليفه: اتحلم اتحلم فيها...
عبدالله: الظاهر بحلمها اليوم..
خليفه: هب اتقول انك حفظت رقمها..
عبدالله: هيه حفظتها بس هب مسترجي اتصل فيها...
شكلها بنت ناس وأوادم..
خليفه: زين والبنات اللي تشوفهم هب بنات ناس بعد
عبدالله: لا بس هذي غير...
خليفه: زين زين...
عبدالله: خلاص عيل ابرايك..
خليفه: فمان الله..

في هالوقت أمل كانت يالسه عالنت وفاتحه مسنجرها،،، وكانت توها يايه بتصكره ولا تشوف،،

" تم تسجيل دخول"
ليتني عرفتك في بدايه
حياتي

يا ترى شو راح يصير بين أمل وعلي،،؟؟؟

بانتظار تطور الأحداث في الجزء الخامس عشر