:: ليــتنـــي عرفتــــك فــي بدايـــة حيــاتــي ::

[بهجة الروح]

ريم العين

قرمووشه

شمه

حلم الطفوله

شكــراً على توقعاتكم وردودكم بنشوف الحينه اذا صح ولا لا؟؟

[بهجة الروح]

" الجزء العاشر"

خوله كانت مصدومه ومرتبكه عشان جيه ما قدرت تتراجع وتدخل داخل،،
والي كان في السياره هو خليفه،، ما كان يدري انه بيشوف خوله،،
ومن أول ما طاحت عينه على عينها حس انها هيه اللي في باله،، وعرفها من ملامحها

خليفه: السلام عليكم،،
خوله ( وهي تبلع ريجها..): وعليكم السلام،،
خليفه: أختي عبدالله وين؟؟
خوله: عبدالله محد...منو نقوله..
خليفه ( وهو يطالعها ومبتسم) : قوليله خليفه،،
خوله: ان شاء الله..

ودخلت خوله وصكرت الباب...

أمل: ايه أنتي بلاج أموقفه وترمسين الريال؟؟؟ منو هذا بعد؟
خوله: ما أدري...ابروحي افتشلت...
أمل: مستعيله الا تبين تفجين الباب...
خوله: ههه..
أمل: لا ومستانسه بعد..
خوله: ما أدري حسيت بشي...
أمل: بشو حسيتي بعد؟؟
خوله( وهي مبتسمه): ما أدري
أمل: وابويييه أنا على هالمناكر...انزين منو هذا وشو يبغي
خوله: هذا اربيع عبدالله ..يقول اسمه خليفه..
أمل: لا والله ..وقالج بعد اسميه خليفه..
خوله: أمووول عااد عن العبط...قلتله منو انقوله ..قالي قوليله خليفه وبس...
أمل: أهاااا...يا ويلج من عبدالله جان درا انج رحتي عند الباب...
خوله: وأنا أشدراني ان اربيعه بيي...
أمل: انزين انزين...كيف شكله..
خوله: بعد تسألين كيف شكله؟؟...واحد عبيط شرات أخوج
أمل: ههههههه...أندوكم انتوا حد يرمس عن أخوه جيه...
خوله: ههههه
أمل: يعني أخويه هالحليو اللي يعق الطير من السما...عبيط؟؟
خوله ( وهي مبتسمه ): هيه...
أمل: هيييه..الحين فهمت ..يعني اربيعه حلو شرات أخويه العبيط..
خوله: هههههه
أمل: بس بس...وايد عطيتج ويه ترا...عيب اتسبين اخويه فديته....قابضتلي أخوج وأخوج هب جنه أخوج أنتي بعد
خوله: هههه...انزين ما سبيته أنا بس وصفته..
أمل: وايد عليج...قومي خلينا ندخل داخل،،


ودخلن البنات داخل...

خليفه،، كان مستانس وهب مصدق انه رمس خوله،، وكان يقول فخاطره: يا ربيي عليها،، محلى منطوقها،،
فديتها والله...يعلني افداها طول العمر...

وكان يتمشى بالسياره وهو معلي عالمسجل ومحطي أغنية عيضه ( ودي بكلمه يا حبيبي)

http://www.salmiya.net/songs/aidha/ram/aidha38.ram

واتصل بعبدالله...
خليفه: مرحبا الساع،،
عبدالله: مراحب،، يا اخويه ذليتنا من متى اترياك،،
خليفه:هههه.. ليش أنته وين؟؟
عبدالله: لا والله وتسألني أنا وين بعد؟؟؟
خليفه:ههههه
عبدالله: أنا في الكوفي..
خليفه: اهااا...وايد عليك...ما توضحلي من البدايه...
عبدالله: أوضح شوو...
خليفه: قلتلي الله يهديك مر علي...وما قلت وين أمر عليك...رحت بيتكم وقالولي محد..
عبدالله: هههه...وحليلك...
خليفه: اضحك يا بويه من حقك تضحك...
عبدالله: هيه عيل شو قالولك...
خليفه: يالله الحين ياينك..
عبدالله: أشوف داقنك الهوا...معلي المسجل..
خليفه: هيه شو اسوي ردت لي الروح..
عبدالله: زين زين...يالله اترياك عيل...
خليفه: يالله باي...



في هالوقت كانت شمسه في بيتهم ،، وكانت تفكر بنظرات عبدالله اللي بغت تسلبها روحها،،
شمسه: أمايه؟؟
أم محمد: هااه فديتج..
شمسه: أشوف قوم خالوه يلمحون لشي..
أم محمد: هيه وأنا بعد لاحظت،،
يا اميه خير وابركه جان بتحصلين واحد شرات عبدالله..ما عليه كلام..
وخالتج محد أحسن عنها،
شمسه ( وهي مستحيه): صح..
بس وايد كان يطالعني..
أم محمد: تدرين عاااد..حاط في باله انج بتكونين أم العيال..ان شاء الله..
( شمسه سكتت ونزلت راسها وهي مستحيه...)


في ستار بكس،،

خليفه توه واصل صوب عبدالله..
عبدالله: يا اخويه ما بغيت تي...تمشي على بيض أنت ولا شووو
خليفه: ههههه...بلاك؟؟ شي عندك ولا ما بتترياني هالكثر..
عبدالله: متوله عليك ..أحبك يا أخي ...
خليفه: ههههه...
عبدالله: أااااه يا خليفه آااااه...
خليفه: سلامتك من الآاااه...
عبدالله: ياليتك شفت اللي شفته...ياويل حالي أنا..
خليفه: خير شو شفت،،
عبدالله: شفت غزاله اسمها نهى..
خليفه: نهى اللي هاكي اليوم عطتك رقمها؟؟
عبدالله: هيه شفتها...
خليفه: وين شفتها يا حظي؟؟
عبدالله: تغديت وياها اليوم..
خليفه: قول والله؟؟
عبدالله: شو شايفني أجذب عليك أنا..
خليفه: لا.. بس وحالك أتواعد؟؟
عبدالله: هيه ...شوقالولج...أنا عبدالله..
خليفه: عبدالله ...وخير يا طير..شوفيك عن زد الناس..
عبدالله: أطاعوا انتوا الغيره شو تسوي..
خليفه: هههههه...لا يابويه..انا ما اغار ولا شي...
بس الله يهديك عن هالسوالف..
عبدالله: أوووه غريبه...
خليفه: ما غريب إلا الشيطان..
عبدالله: أنت خليفه ولا واحد ثاني...أشوف كلامك غير بالمره..
خليفه: ههههههه...لا يا حبيبي..أنا خلاص بودر هالسوالف...لاني أفكر أبني مستقبلي..
عبدالله: هههههه...بتخبلبي ...يا خلوووف..
كلامك غريب اليوم...
خليفه: أوهوووه رد عليه بغريب...يا بويه أنا من صدقي بودر سوالف المغازل...بس خلاص .. حرام نجذب على بنات الناس..
عبدالله: زين...الله يهديني شرات ما هداك...
( وهم يالسين كانت بنيه تمشي تروح وتي...وتتمشى شويه شويه)

خليفه: هذي بلاها...سايره راده...راسي عورني...
عبدالله: ههه...وحليلها تبى حد يعبرها...
خليفه ( وهو يرمس بصوت عالي): بنات آخر زمن لا حيا ولا مستحى...
عبدالله: ههههه..ايه فضحتنا...قم خذ أجرها وعطها رقمك..
خليفه: خلها تولي هي وطوايفها...ما عندي سالفه...
عبدالله: هههههه...وأخبار مهاوي...
خليفه: ما رمستها ولا برمسها...
عبدالله: قول والله؟؟

( مها هذي وحده من اللي يرمسهن خليفه وهي وايد ميته عليه وهو بعد يسايرها)

خليفه: هيه خلاص ..أفكر أقطع علاقتي فيها...اتصلت أكثر من مره وما رديت عليها..
عبدالله: اندوكم انتوا...هالكثر أثر فيك كلام هذيج البنيه...
خليفه: ما يخصك..
عبدالله: ههههههههه..

في هالوقت كانت أمل توها فاتحه النت،، وفتحت مسنجرها،،
لقت إضافه من أيميل غريب، وحاط لينــك،، ( ليتني عرفتــك في بداية حيــاتي)
استغربت من بيضيفها ..قالت يمكن حد من اربيعاتها،، واذا حد مغلط بتسويله بلوك ودليت،، وسوت له أكسبت...

ويلست تشتغل على البروجكت مالها...بعد لحظات،، وهي يالسه عالكمبيوتر...

" تم تسجيل دخول"
ليتني عرفتك في بداية حياتي.


يا ترى من تتوقعون صاحب هالايميل؟؟ أكيد اللي في بالكم؟؟

[بهجة الروح]

" الجزء الحادي عشر"


" تم تسجيل دخول"
ليتني عرفتك في بداية حياتي.

قالت أمل في خاطرها: خلني أشوف منو هااالي ضايفني؟؟

( ليتني عرفتك في بداية حياتي ) :
الســـــلام عليـــكم

HOW IS MY WORLD GOING TO BE SOON : ( أمل )
وعليكم السلام

( لحظة صمـــــــت )

HOW IS MY WORLD GOING TO BE SOON : ( أمل )
من معاي؟؟؟

( ليتني عرفتك في بداية حياتي ) :
ما أدري أقولج ولا لا

HOW IS MY WORLD GOING TO BE SOON : ( أمل )
؟؟؟؟

( ليتني عرفتك في بداية حياتي ) :
أنتي أمل صح؟؟؟

( أمل استغربت...وقالت منو هاي اللي قاعده اتسوي فيني هالمقلب السخيف)

HOW IS MY WORLD GOING TO BE SOON : ( أمل )
منو أنتي وعن العبط؟؟؟ مب متفيجه حق المقالب

( ليتني عرفتك في بداية حياتي ) :
والله ما أستعبط عليج ولا اسوي فيج مقلب


HOW IS MY WORLD GOING TO BE SOON : ( أمل )
منو أنتي؟؟؟ خلصيني...

( ليتني عرفتك في بداية حياتي ) :
أنا واحد هب وحده...وشارنج هب بايعنج

HOW IS MY WORLD GOING TO BE SOON : ( أمل )
نعـــــــــم!!!!!!

( أمل زاغت...قالت هذا منوه وكيف عرف اسمي)

( ليتني عرفتك في بداية حياتي ) :
أنا بفهمج السالفه...وما في داعي انج تتوترين ولا تعصبين...

HOW IS MY WORLD GOING TO BE SOON : ( أمل )
؟؟؟؟

( ليتني عرفتك في بداية حياتي ) :
أنا علي أخو وفا اربيعتج

( اندهشت أمل وتفتحت حلجها من الخوف،، وقلبها قام يدق ابسرعه...وتمت ساكته وما ردت عليه مده)

( ليتني عرفتك في بداية حياتي ) :
عسى ما ضايقتج بس؟؟
( ليتني عرفتك في بداية حياتي ) :
بلاج ما تردين؟؟؟


( ليتني عرفتك في بداية حياتي ) :
صدقيني والله هب قصدي شي...

( ليتني عرفتك في بداية حياتي ) :
أنا من شفتج هاكي البارحه وأنا عايش وهب عايش...ما أدري شو صار فيني...
صدقيني أنا من سنين عفت البنات وعفت سالفة العرس،، حتى لو تسألين وفا بتقولج...

( ليتني عرفتك في بداية حياتي ) :
.....

( ليتني عرفتك في بداية حياتي ) :
أدري بعدج مصدومه...أنا بطلع الحين ...بس هب في خاطري شي الحين...مع اني ودي أعرف أشياء وايد عنج عسب تكونين من نصيبي...

( ليتني عرفتك في بداية حياتي ) :
بس دخيلج لا تقولين حق وفا...لانها ما تعرف اني خذت ايميلج...

( ليتني عرفتك في بداية حياتي ) :
فمان الله...



هالوقت كله ،،، كانت أمل منصدمه وتقرا الرمسه بس،،...وقلبها بيطلع من مكانه وهو يدق...
كانت خايفه،، تقول حق وفا... ولا لا...ولا تقول حق خوله....
نست عمرها من كثر مب هي خايفه...نست البروجكت اللي كانت تشتغل عليه،،...وخلت الكمبيوتر والنت شغال وطلعت من الحجره...تتمشى وتيلس ويا قوم أمها...تيلس معاهم وترمس وهي أصلاً هب معاهم في عالم ثاني...


عالساعه 10 ونص،، أمل كانت منسدحه على سريرها وهي فاله شعرها ،، وكانت أمبنده الليت ومشغله ليت الأبجوره بس،، وكانت أونها أتذاكره وتقرا الكتاب،، بس هي كانت لاهيه بتفكيرها...

وتدخل عليها خوله،،

خوله: شو بترقدين من الحين؟:؟؟
أمل: هيه...
خوله: انزين بقولج..( وهي تلعب بصبوعها)
أمل: خير شو بتقولين.؟؟؟
خوله: تعرفين...يوم شفت اربيع عبدالله حسيت بشي...
أمل: هي قلتيلي..
خوله: بس ما قلتلج بشو حسيت...
أمل: يالله قوليلي...
خوله: بلاج...مالج نفس لشي...
أمل: ما شي خولوه راسي يعورني...يالله قولي...
خوله: يوم شفت اربيع عبدالله وقالي اسمه...
أمل: انزين...
خوله: يوم هو قالي اسمه كان مبتسم فحسيت بشي...
أمل: خولوه ترا بفرج بالكتاب قولي عااااد...
خوله: هههه...انزين انزين...
حسيت انه هو اللي طرشلي الورقه...
أمل: نعم؟؟؟
خوله: ما أدري هاللي حسيت به أنا ..
أمل: أشدخل اربيع عبود باللي طرشلج الورقه...
خوله: ما أدري...انا حسيت جيه...وبعدين صوته تقريباً نفس صوت هاكي يوم قالي تفضلي..
أمل: يمكن ...جايز...
خوله: أنتي شكلج مووول...منتهيه...مالج بارض ترمسين حتى...
أمل: صح...
خوله: ليش شو فيج...شي اخترب عليج وأنتي تسوين البروجكت..
أمل: لا لا...بس ابروحي ضايقه...
خوله: ضايقه من شوووه؟؟؟؟
أمل: بعدين بقولج راسي يعورني الحين...
خوله: اييب لج بندول؟؟
أمل: لا لا...برقد أنا الحين..
خوله: أوكي عيل...تصبحين على خير
أمل: وأنتي من هله...

( واتغطت أمل باللحاف و خوله راحت وصكرت الباب)


عبدالله كان توه راجع البيت وكان يرمس نهى عالتلفون وحاط الهدفونز وفي نفس الوقت كان يقفل باب الصاله ويبند الليتات،، خوله كانت طالعه من حجرة وفا،، ورايحه لين حجرتها..وسمعته يرمس في التلفون فوقفت عند الدري تتسمع...

عبدالله: ههههه...نهى تصدقين..
نهى: شوووه..
عبدالله: الله يعين أهلج عليج..
نهى: ليش...
عبدالله: ذبحتيني من الضحك...
نهى: ما عاش اللي يذبحك يا حبيبي..
عبدالله: فديت روحج أنا..وفديت قلبج..

خوله كانت تسمع رمسة عبدالله...وقالت في خاطرها: أويه...هذا أونه بيخطبوله شميس وهو يرمس البنات جذه...الله يعينج يا شميس....
وركضت تدخل حجرتها قبل ما يوصل عبدالله....


في هالوقت،،
علي كانت مسوي نفس حركة أمل،، كانت فاتح ليت الأبجوره ويقرا الجريده وهب ياينه نوم ،، من الحركه اللي سواها...
كان يفكر هل هو غلط يوم رمسها ولا لا...
وكان وايد متضايق ليش ان أمل ما ردت عليه...
وكان خايفه لا تعصب أمل وتخبر وفا أخته....


نش من على سريره وطلع علبة الجقاره من السده،،، وفتح الجامه مال البلكونه وتم يدخن برع،،،
وهو يفكر كيف يصلح غلطته،،،
عقب ما دخن صلب الجقاره،، رجع للحجره وفتح النت،،
فكر انه يطرشلها رسالة إعتذار ....

وكان كل ما يكتب جمله يرجع يمسحها،، كان متردد وايد،،

آخر شي كتب الرساله وطرشها حق أمل،،

وراح وانسدح على سريره وقراله كمن آيه ورقد،،


في صباح اليوم الثاني،،،

صباح السبت،، عالساعه 8 ونص،،

عبدالله في الدوام ووياه في القسم العنود وزلمات اثنينه عمرو وعبدالرحيم،،

ودخل عليهم الفراش يايبلهم التركش كوفي،،

عبدالله كان يالس يعدل أوراقه ويطلع الدباسه والخرامه والعده كله من السده ويطلع الختوم ،، ويفتح كمبيوتره ويحطه عالسيستم البنكي،،

والعنود عداله بعد ويالسه تمشي بعد الشيكات،،

عبدالله: العنود....قلمي الأزرق وين؟؟
العنود: دوره في السده أنا ما خذت شي،،
عبدالله: أدريبج انزين ما خذتي...بس أقول يمكن شفتيه ولا شي..
العنود: لا ما شفته،،

ويدخل عليهم عرض عبدالرحيم،،
عبدالرحيم: ومين هو ده اللي ما شفتيهوش..؟؟
عبدالله: هههههه...ما شافت عمرو..
العنود: لأ...
عمرو: أنا هوون..
عبدالله: هههههه..
العنود: شفتك...بس هو قصده القلم..
عبدالرحيم: الألم؟؟
العنود: هيييه...أففف...زين جيه خربطت السالفه..
عبدالله: هههههه...

بعد لحظات،، يلس عبدالله يشرب التركش كوفي ..وكان يقلب المسجات اللي عنده..
وفتح عالمسج اللي العنود كانت امطرشتله اياه يوم الخميس،،
" شـافـوك في عينـي وهــذا اعتــذاري وش حيلتي لا جيـت في عيني طيوف؟
طيــف عبرت وشال صوته قمـاري من رقتك سويت بالناس معروف"

عبدالله: العنود؟؟
العنود: نعم؟؟
عبدالله: اقريلي هالمسج
العنود: ليش انت ما تعرف تقرا..
عبدالله: لا أعرف ..بس ابغي اقريج اياه..خذي
( وايناولها تلفونه العنود خذت التلفون وشافت المسج وابتسمت وردت اتناوله الموبايل)
عبدالله: بلاج تضحكين؟؟
العنود ( وهي مبتسمه وتطبع عالكمبيوتر): ماشي..
عبدالله: انزين قريتيه..
العنود: هيه..
عبدالله: انزين ..شو معناته؟؟
العنود ( واتصد عليه واطالعه بنظره واترد اتكمل شغلها): مثل ما فهمت..
عبدالله: اتحبيني؟؟
( العنود ابتسمت وما ردت عليه)

عبدالرحيم: عبدالله عيب عليك هالحكي؟؟
عبدالله: انزين وأنا شو قلت الحين؟؟..ما قلت شي..
عبدالرحيم: لا لا..ما بيصير..
عبدالله: يا اخي كيفي مواطن ..وبسألها اللي ابغيه..
( العنود كانت ساكته ومبتسمه وتشتغل)
عبدالرحيم: مدام هي ساكته وما بتتكلم ...أنا ما يخصني..
عبدالله: ههههه...هي أصلاً تعودت عليه.وتدري اني اسولف..
صح العنود؟؟
العنود: صح...


عالساعه 11 إلا ربع كانت أمل طالعه من الإمتحان وسلمى تترياها في الهول،،
سلمى: هاااه.؟؟ بشري،،؟؟
أمل: الحمدلله...زين..
سلمى: بس شكلج ايقول انج بدعتي..
أمل: ههه...لا سلمى...بس انا ابروحي مضايقه اشوي..
سلمى: تعبانه ؟؟ فيج حمى ولا مزجمه؟؟
أمل: لا..خلينا ندخل اللاب
سلمى: يالله روحي احجزيلي وبيب اغراضي ..
أمل: انزين...
( واتروح أمل اللاب وتحجز مكان لها ولسلمى)

يلست أمل ،، وفتحت المسن ،، ما كان عندها حد أون لاين،، فصكرته على طول،، وفتحت ايميلها،،
اتفاجأة بوجود رساله من علي...

يا ترى شو كان مكتوب في الرساله؟؟؟

يتبع في الجزء الثاني عشر...

[بهجة الروح]

" الجـــــــزء الثاني عشــر"

أمل من شافت الرساله ،، على طولت فتحتها،، وتمت متسمره وهي تقراها،،،
يا ترى شو كان مكتوب في الرساله،،؟؟
وتيها فجأة سلمى،،
سلمى: زين يوم يلستي اهنيه أحسن عن جدام،،
( على طول أمل صكرت الويندو مال الرساله،، وما كملت قرايه،، كانت خايفه ان سلمى تشوفها،،)

سلمى: يالله خلينا نشتغل عالبروجكت،،
أمل: يالله انزين ،، ما عندي خلاف،،
سلمى: أوكيه،،

( ويلسن يشتغلن عالبروجكت،، وأمل كانت تنتظر الوقت ايطوف على أحر من الجمر بس عسب ترجع البيت وتقرا الرساله على راحتها،،،)


عالساعه 11 وربع،، في البنك،،
عبدالله كان دايماً يسوي حركات بس عسب يغايظ بالعنود،، هو ما كان يحبها ولا شي،، بس يبغيها تهتم فيه،،
وفي هالوقت وبينما هو منشغل في شغله،، اتصلت فيه حنان،،
حنان: مرحبا،،
عبدالله ( وهو يرد عليها بصوت عالي): هلا والله بالحبيب،،
هلا بالطش والرش وماي الورد في المرش،
( العنود كانت اطالع عبدالله بنظرات: وكانت اتقول بعد منوه هاي اللي يرمسها،، )
حنان: اهلين،، هالترحيب الحلوو كله حقي،،
عبدالله ( وهو يطالع العنود بنظرات): نعــــم،، حق الحلوين بس،،
حنان: هههه...شاكه انه حد عدالك وتبى تغيضه..
عبدالله: هههههههه...
حنان: شفت ..عرفت انا ولا ما بتيلس اترمسني بصوت عالي جنك ترمس مصر..
عبدالله: ههههه...اتصدقين ولهت عليج وايــد
حنان: وانا اكثر حبيبي...
عبدالله: خبريني..وطمنيني عن أحوالج؟؟ عساج إلا ابخير وسهاله؟؟
حنان: الحمدلله تمام...
عبدالله: وشو الدراسه وياج؟؟
حنان: زينه امشين الحال،،
عبدالله: حلو حلووو...حبوبه بخليج الحين مشغول شويه..
حنان: أوكيه...بس بشرط..
عبدالله: أشرطي وآمري وأدللي بعد...
حنان: تتصلي أول ما تفضى...
عبدالله: حاضر..من العين هاي قبل هاااي...
حنان: يالله عيل باي..
عبدالله: باي...


لا حظوا ان عبدالله كان بس يبا يغايض بالعنود،، والعنود كانت اطالعه بنظرات صدق كانت متغصصه

بعد دقايق ولحظات تتصل فيه نهى،،
وأول ما رن تلفون عبدالله،،، العنود كانت مندمجه فشغلها واول ما سمعت رنة التلفون قالت: أففففف
وصد عليها عبدالله...شافها مندمجه في شغلها...
وقال في خاطره: حرام طفرتها توه..

ويرد عبدالله على نهى،،،
عبدالله: مرااااحب،،
نهى: مرحبتين...عاش من سمع صوتك..
عبدالله: الله يخليج
نهى: تولهت عليك وايد وايد وايد..
عبدالله: ما مداج تتولهين عليه البارحه كنت وياج في المطعم..
( وصدت عليه العنود واطالعته بنظره وردت اتكمل شغلها...عبدالله شافها وما أعارها أي اهتمام)
نهى: ههههه..انا في كل دقيقة وثواني اتوله عليك..
عبدالله: تسلمين والله..ليش ما رحتي المدرسه؟؟
نهى: لا تهايزت،،، ابصراحه سهرتني البارحه وياك،،
عبدالله: عيل انا داومت...
نهى: أنت ريال..وأنا بنيه..
عبدالله: هيه زين..
نهى: شكلك مشغول؟؟
عبدالله: هيه وايد..
نهى: خلاص عيل بتصل فيك بعدين..
عبدالله: مع السلامه...

ورجع عبدالله يكمل شغله،، ويوم خلص من الأوراق اللي عنده عطاهم العنود عسب اتكملهم..
عبدالله ( وهو يحط الأوراق على مكتبها) : خذي دورج الحين،،
العنود: انزين..
عبدالله: بلاج ماطه بوزج شبرين..
العنود: ما بلايه شي...
عبدالله: اشوفج مضايقه،،
العنود: لا هب مضايقه ولا شي ،، عادي..


عالساعه 2 وربع،، في بيت أبو حمــد،،
خصوصاً في الصاله،، أبو حمد كان يالس وأم حمد وأميه عوشانه وياهم،،

أبوحمد: يالله عااااد..متى بتغرفين الغدا،، بطني يصاوي من اليوع؟؟
أم حمد: هيد انزين اشويه،، بين بناتك الحين،،
أميه عوشانه: بطن يا امج،، أمل قايله انها تخلص الساعه 2 الا ربع،،
أم حمد: تدرين اميه زحمة الطريق،،
أبوحمد: انزين غرفيلي قبلهن ،، أبا أحط راسي وارتاح قبل لا يستوي العصر،،
أم حمد: ان شاء الله.. ان شاء الله..

( واتقوم أم حمد وتدخل غرفة الطعام عسب تغرف حق ابو حمد،، ويلحقا أبو حمد،،)

وتمت اميه عوشانه تتريا البنات ايين،،
في هاللحظه،، دخلن البنــات،،
أمل: السلام عليكم،،
أميه عوشانه: وعليكم السلام،،
خوله: أففف..متنى من الحر...
أميه عوشانه: ليش هب مشغلين المكيف فالسياره؟؟
خوله: امشغلين بس حر ..موووت...
اميه عوشانه: الله يوفقكن ان شاء الله...
..
ويركبن البنات عالدري،،
اميه عوشانه: يالله انقفضن عشان نتغدا،،
أمل: أنا ما ابى غدا،، متغديه في الجامعه،،
خوله: أنا ببدل وبيي،،
اميه عوشانه: واشحقه تتغدين في الجامعه،، وهذا الغدا منو بياكله،، نسوي العيوش ونعقها في الزباله،،
أمل ( وهي مروحه): أميه إلا هو يوم واحد،،

أمل راحت ابسرعه حجرتها بدلت واتسبحت وصلت وعلى طول فتحت كمبيوترها،، تبى اتشوف الرساله،،
فتحت ايميلها،،
وفتحت الرساله،،
وقرتها أكثر من 5 مرات،،
يا ترى شو كان مكتوب في الرساله،،

خلوني اراويكم الرساله،،

===========================
الســـلام عليـــكم ورحمــة الله وبركـــاته...

أمل،،
بدخل وياج في صلب الموضوع على طول،،
شوفي الحين الوقت في الرساله ... انا لين الحين الساعه 2 هب قادر أرقد،، من الحركه اللي سويتها فيج،،
وهب عارف هل اللي أنا سويته صح ولا غلط،، وهب عارف بحالتج الحين،،
يمكن تقولين عني ما استحي ولا واحد من شباب هالأيام،،
فخلينا أختصر عليج هالطريق وأقطع تساؤلاتج هذي وأقولج من أنا ،،،

اللي قاعد يكتبلج هالرساله هو أنا ،، علي أخو اربيعتج وفا،،
" علي بـن عمــران"

انسان ما يخصه في حد ودايما في حاله ويمكن قالتج عن هالشي وفا،،
أنا كرهت نفسي بعد ما مريت بتجربة عصيبه ما بنساها طول عمري وهي السبب في حالتي هذي،،
كرهت البنات وكرهت الشباب وسوالف المغازل،، وأعتزلت الناس البطاليه وقعدت في البيت أجتهد في شغلي واسهر على طلبات ومشاكل أهلي،،

هذا أنا باختصار،،

يمكن يدور في بالج أني أللعب عليج ولا شي،،
فأنا اقولج لا،،
بنات عمي وايدات ودايماً عند وفايه وخواتي،، وبنات خوالي كذلك،، لكن ولا وحده منهن حركت شي فيني،،
من شفتج أمس،، انقلب كياني كله وحسيت بنفسي وبالنقص اللي انا عايش فيه،،
صح انها لحظه قصيره وخاطفه اللي شفتج فيها،، لكن والله،، ما أدري شو صار فيني،،

أمل،،

اذا اضايقتي مني ولا من رسالتي أحذفيني من اللسته اللي عندج،، ولا تترددين في هالشي،،
أنا أعرف أخلاقج عدل من أختي،، وما أعرف اذا كنتي مخطوبه ولا لا،،
وما ابغي اتسرع واخطبج وعقب انصدم وتتحطم حياتي للمره الثانيه،،
عسب جيه ضفتج عشان أعرف منج كل شي،،

مع مودتي واحترامي
علي
=====================

هذي كانت رسالة علي،،،

عالساعه 3 ونص دخلت خوله على أمل اللي كانت مندمجه وهي تقرا،،
دخلت خوله وأمل ما حست فيها،، وخوله شافت أمل مندمجه وهي تقرا،،
خوله: هااااه....شو تسوين؟؟
أمل( وهي زايغه): بسم الله زيغتيني...
خوله: شو تقرين؟؟
أمل ( وهي تصكر الويندو): ما شي ماشي،،
خوله: شو ما شي؟؟ شفت شي بالعربي أنا؟؟
أمل: ايميل واصلني.
خوله: زين،، أمووول؟؟
أمل: هلا...
خوله: بلاج مضايقه البارحه؟؟
أمل: ما بلايه شي...بس كان راسي يعورني...
خوله: هيييه...تدرين عقب ما طلعت عنج البارحه...
أمل : شو استوا؟؟
خوله: سمعت عبدالله وهو داخل يرمس ويا وحده وشقايل يتفداها،، جان أقول فخاطري الله يعين شميس،،
أمل: هههه...هب أول مره يتفدا...
خوله: هيه أدريبه...
أمل: على فكره حاسه انه يبا يلعب على شميس...
خوله: شووووووووه؟؟؟
أمل: صدق ..ما شفتيه كيف يطالعها...
خوله: شفت...بس هب لهالدرجه بيلعب على وحده من أهله..
أمل: أخويه وأنا اعرفه..ما يهمه حد المهم بنت...
خوله: هب زين ان بعض الظن إثم،،
أمل: انزين بتشوفين،،
خوله: بس بس ،، أنا بروح عنج الحين...وعن الأفكار السودا


يتبع في الجزء الثالث عشر....

[بهجة الروح]

" الجــزء الثالث عشــر"

أمل تمت اتفكر،، واتفكر واتفكر بس ما يا على بالها انها ترد على رسالة علي ولا يا على بالها تفكر بوضع علي كيف كان،،،
علي رجع من الدوام عالساعه 3 ونص،، رجع وفتح التلفزيون في الميلس ويلس يقرا الجريده،، ما كان له بارض يفتح النت،، كان حاس انه بينصدم ويمكن اطرش له أمل رساله تنهي قصة تعلقه فيها،،
كان يردد في باله ان حتى لو رفضته أمل بيصر على انها تكون له،، وحتى لو شو كانت الاسباب،،
كان يفكر وايد،،

بينما هو يالس يقرا الجريده دخلت عليه أمه،، أم حسن،،
أم حسن: هلا ابويه ثرك اهنيه..
علي: هلا الوالده،،
أم حسن: ما تبغي غدا،،
علي: شو مسوين اليوم؟؟
أم حسن: عيش وصالونة سمج.
علي: لا لا ما ابغي...
أم حسن: ما تباني اسويلك شي...
علي: لا اميه ابروحي ما اشتهي شي،،

وراحت أم حسن عنه...وكمل هو قعدته ويلس يقرا الجريده،،،

عالساعه 4 ونص العصر في بيت أم حمد،، بالذات في الصاله،،

أميه عوشانه صلت العصر ويلست تتريا عبدالله عسب تتخبره عن شميس وكيف شافها،، وأم حمد كانت قاعده واتشوف التلفزيون،،
أميه عوشانه: اتأخر عبدالله...
أم حمد: ابعده اميه..عن ايي...
اميه عوشانه: الحين بتستوي الساعه 5..
أم حمد: هيه ..بس هو من يخلص ايي...
اميه عوشانه: ابا اعرف شو رايه بشميس...
أم حمد: شفتيه البارحه ترا..مبسوط ويتضحك وعينه على شميس...
اميه عوشانه: هزرج دخلت خاطره؟؟...
أم حمد: وين بيلاقي شرات شميس...


ويدخل عبدالله عليهم وهو كاشخ بالغتره والعقال والنظارة العاكسه،، شكله رهيييب بالنظاره اللي يشوفه يقول شيخ وأمير من جماله وحلاته،، وكان محمر من الشمس،،
عبدالله: السلام عليكم،،
اميه عوشانه وأم حمد بصوت واحد: وعليكم السلام،،
عبدالله: اشحالكن؟؟
أم حمد: الحمدلله...
اميه عوشانه: تعال ..تعال..( وهي تأشر له ييلس عدالها)
عبدالله: ان شاء الله ( وهو يفصخ الغتره والعقال ويحطهم على طرف الغنفه)
عبدالله: هاااه..اميه آمري...
اميه عوشانه: ما يامر عليك عدو يالغالي،، بس بغيت اعرف رايك بشميس...
عبدالله: ههههه...حسيت انج بتسأليني عن شميس...
( واتقاطعهم أم حمد,,,)
أم حمد: ابويه احط لك الغدا...
عبدالله: هيه اميه غرفي...
أميه عوشانه: بشرني برايك...
عبدالله: زينه...
اميه عوشانه: شو زينه؟؟
عبدالله: قصدي أشوفها وحده زينه...بس...
اميه عوشانه: بس شوووه؟؟
عبدالله: هب جنها اصغيره عليه،،
اميه عوشانه: هاكي الزين..اصغيره عسب تربيها أنت..
عبدالله: اميه الله يهداج..ليش هي قطوه عسب اربيها..
اميه عوشانه: لا حووول..
عبدالله: ان شاء الله يستوي خير ...
اميه عوشانه: ترا هاي من أهلك وحلاة الثوب رقعته منه وفيه...
عبدالله: صحيح ..صحيح...
بس بعدني عالعرس...
اميه عوشانه ( وهي متضايقه) : قم اتغدا ..أمك تترياك...
عبدالله: ان شاء الله...

وراح عبدالله يتغدا،، ودخل على أمه وهي يالسه تترياه عالطاوله...
أم حمد: هااه؟؟ رمست أمك؟؟
عبدالله: هيه...يا أميه بعدني أنا عالعرس...
أم حمد: هههه..ما شاء الله عليك ريال...وين بعدك عالعرس...
عبدالله: لا اميه بعدني ما تهنيت بشبابي...
أم حمد: لا تتهنى ولا شي اتهنى ويا مرتك...عن اتلوف عليك على وحده من الفارطات...
واتقص عليك...
عبدالله: لا أميه ..لا تخافين عليه..ولدج سبع ما ينخاف عليه...أنا اللي أقص عليهن هب هن...
أم حمد: خلك من هالرمسه اللي ما منها فايده واتغدا أبرك لك..
عبدالله: صدقج أميه...

عالساعه 5 ونص أمل كانت راقده ودخل عليها عبدالله...
ووقف عدالها يوعيها،،
عبدالله: ايه أم الرقاد..قومي نشي...
أمل: اوووه...عبدالله خلني ارقد...
عبدالله: بسج من الرقاد...هب رقاد عليك..من ترقدين ما تنشين..
أمل: الله وأكبر عليك...طيرت النوم من عيني...
عبدالله: ههههه...وحليلي انا من رديت من الدوام ما رقدت...
أمل: أنت متعود ترقد من وقت أيام الدوام...بس أنا ورايه مذاكره ولازم أسهر أذاكر...
عبدالله: انزين وانا بعد ورايه دوام ليلي عالتلفون...
أمل: وايد عليك...أنزين شو تبغي موعني...
عبدالله: بس جيه ..أبا ارمس وياج...
أمل ( وهي مبتسمه) : خير شو عندك...
عبدالله: الخير بويهج..مستانسه...لا أميه محد يا يخطبج...ههههه
أمل ( وهي تفره بالمخده): ويا ويهك...
عبدالله: مستانسه فديتج...هههه...
أمل: من حقي...
عبدالله: اتصدقين أول واحد ايي يخطبج...بوافق عليه..عسب نفتك من الحشره...
أمل: أنا الحين حاشرتنك ويا ويهك..ولا أنت الي مخرب ارقادي...
عبدالله: هههه...
أمل: الله يعين اللي بتاخذك..
عبدالله: صح على طاري اللي بتاخذني...
أمل: هييه...وينها عشان تستر عليك..
عبدالله: هيه والله وينها اللي تستر عليه وتصرف عليه..
أمل: هههه...انزين بلاها اللي بتاخذك..
عبدالله: أموول فديتج فهميهم أنا ما أبغي شميس...
أمل: انزين أنت صاحب الشأن وأنت لازم أتقول رايك..
عبدالله: قلت بس حاس اللي هم يبونه بيسوونه وبيوهقوني أنا عقب...
أمل: لا قولهم من الحين ما أباها...
عبدالله: غريبـــه؟؟
أمل: وشو الغريب ان شاء الله..
عبدالله: غريبه ما قلتي ليش ما تبا شميس وهي من أهلنا ومن هالرمســه...
أمل: لانه من شكلك ايبين انك ما تباها...وبعدين أنا امفكره أخطبلك اربيعتي...
عبدالله ( وهو يرمسها بصيغه اطنازه) : لا والله...لعبة أنا عندكم...ألا هم يبون ايوزوني شميس وانتي تبيني حق اربيعتج..
أمل: هههههه...
عبدالله: ويا هالضحكه..أونه أباج عون طلعتي فرعون..
أمل: هههه..
عبدالله: لا أميه اللي بيدفع أكثر بوافق على عرضه...
أمل: ليش شوو مشروع...
عبدالله: هيه عيل الشو..
اللي بتدفع لي مهر أكثر بوافق عليها...
أمل: اندوكم أنتواا...
عبدالله: ههه..ويا ويهج...
يالله أنا طالع الحين..
أمل: وين بتروح...
عبدالله: أمواعد عندج مانع...
أمل: أمواعد منوه...
عبدالله: حبيبة القلب...بتين..
أمل: لا لا...الله يهديك بس...
عبدالله: لا تستانسين..هب امواعد ولا شي...بسير أخذ ديجيتال كاميرا وبتحوط وبرد...
أمل: زين زين...
عبدالله: يالله...

وايروح عبدالله...واتقوم أمل من على سريرها واتعدل اللحاف وتدخل الحمــام،،
عبدالله كان طالع من عند أمل ودخل غرفة خوله،،
دخل عليها على غفله وهي كانت عالكمبيوتر،،
عبدالله: الحمدلله والشكر،،
خوله ( وهي قافزه من الزيغه): بسم الله الرحمن الرحيم،،
عبدالله: وأنتي بلاج كل ما أدخل عليج اتزيغين...
خوله: هههه..ترا تدخل بدون احم ولا دستور...
عبدالله: الله يسلمج البيت بيتي وبدخل وين ما أبا وبسوي اللي اسويه..
خوله: لا والله...ترا حق حرق الأعصاب والمغايض ما شي أحسن عنك..
عبدالله: ههه...شو تسوين..مجابله هالكمبيوتر 24 ساعه...
خوله: شو بسوي بعد...ارمس اربيعاتي وأحل الواجب،،
عبدالله: اتحملي من اربيعاتج اللي عالمسن،،
خوله: ليش...ترا كلهن وياي في الكلاس...
عبدالله: بس اتحملي...
خوله: لا تخاف عليه...أنا تربيتك..
عبدالله: لا والله...اذا أنا مربنج شو بتطلعين...
خوله: هههه..صح لا انا هب تربيتك ولا شي...بس قصدي لا تخاف علي...
عبدالله: زين زين...عيل استأذن أنا..
خوله: ليش وين توه الناس؟؟
عبدالله: بسير اتحوط..يالله جاووو
خوله: باي


طلع عبدالله وسخن سياره وعلا عالمسجل،، وكان حاط عالخليجيه،،
واتصلت فيه نهى...
عبدالله: ألوووه...
نهى: هلا عبادي اشحالك...
عبدالله: أهلين وسهلين...بس أنا هب أصغر عيالج اتقوليلي عبادي..
نهى: ليش ما يعيبك؟؟
عبدالله: لا ما يعيبني...
نهى: سوري عيل...
عبدالله: لا عادي..
نهى: عيل انا أبغي أدلعك...بشو حاب أزقرك..
عبدالله: لا أدلعيني ولا شي..
نهى: بلاك أحس أنك زعلان؟؟
عبدالله: هب زعلان ولا شي..بس طفران..
نهى: طفران مني؟؟
عبدالله: لا يا اميه هب منج ولا شي...بس تدرين توني راد من الدوام ولا ارتحت..
نهى: سلامتك من التعب حبيبي...

وتم يرمس ويا نهى...وكان هب مركب الهدفونز،، يعني ماسك الموبايل بايده
وقريب من دوار الكويتي،، كان يبغي يلف بالدوار بس سياره جدامه،، سياره مرسيدس بودمعه،، لونها أسود،، يديده،، شافها اتجدمت شويه،، وعلى باله انها خطفت،، وداس عالبترول ابسرعه عسب ياخذ مكانها،،
وفي لحظه ما وعى إلا بسيارته اللي دعمت الموتر اللي جدامه،،،
عبدالله:أفاااا..
نهى: ليش شو فيه؟؟
عبدالله: بخليج بخليج الحين..


( ويصكر عبدالله عن نهى،، وينزل من سيارته يشوف السياره اللي جدامه وسيارته اذا استوى شي عليها،،
وتنزل البنت اللي في المرسيدس،،...
البنت: ياربييي على سيارتي...يا ابويه انته بلاك جذه... ما تشووووف...
عبدالله: ما انتبهت اختيه..والغلط مني هب منج...السمووحه،،
البنت ( وهي اطالع سيارتها من ورا) : ياهي غميضه على سيارتي....توني يابتنها من الوكاله...
عبدالله: انزين ما استوا شي إلا ضربه بسيطه...أنا سيارتي اللي تأثرت وايد...
البنت : حسبي الله ونعم الوكيل..
عبدالله: أختيه اتفضلي اركبي السياره هب زين جدام اللي رايح وراد واقفه في الشارع...
البنت: لا يا بويه هب راكبه السياره ولا شي...
تبا ايقولون اني خايفه ومنخشه في السياره...لا لا..

( عبدالله كان هب قادر ايقولها شي...لانها عندها اللسان ما يسكت وكانت وايد حلوووه مع انها هب حاطه شي اللهم بس متجحله..كان منبهر فيها وايد..وكان خايف عليها من عيون الناس...واللي رايح وراد...)


يا ترى شو راح يصير في الجزء الرابع عشر

[شوق القلوب]

السلام عليكم..

أحلى شي في هالقصه بهــوووجه.. انج اتخلين الواحد يتخيل الموقف عدل.. خاصه الاماكن اللي توصفينها.. كلللها انعرفها..

من الجمعيه لـ السوق الجديم لـ الجـــامعه.. ..

حبيـــــــــــــــــــت كل من في القصه..

متااابعيـــنج .. :bow: