الســـلام عليـــكم ورحمـــة الله وبركاته ،،

هذي قصه ثانيـــه أعرضها عليـــكم ان شاء الله تنال اعجابــكم جميعاً ،،

لا تنسون تعليقاتـــكم وردودكم بليــز


:: ليتـــني عرفتــــك في بدايــــة حيـــاتي ::

" الجــزء الأول"

في بيت أم حمــد،، كانت أم حمــد في المطبخ أتعلم البشكاره اليديده الطباخ،،
وأمها ( أم أم حمد) يالسه فالصاله عدال التلفون واطالع التلفزيون وحاطه عالمسلسل البدوي،، ومندمجه العيووز،، ويرن تلفون البيت،،
أميه عوشانه : حسبي الله عالعدو،، بعد امنوه الحين متصل،،
وشلت التلفون وهي تفاتن،،
أميه عوشانه: ألوووو...
عبدالله: ألوووو..هلا اميه اشحالج؟؟؟
أميه عوشانه: خلصني اشبغيت...
عبدالله: بسم الله..بلاج أميه...
أميه عوشانه: وأتسمي على شووو...جيه شايفني ينيه جدامك؟؟
عبدالله: حشى ما قلت جيه..هههه
أميه عوشانه: أفففف
عبدالله: وحليلي أنا تتأففين مني ...
أميه عوشانه: حلك حلول...الحين بتقول شو تبغي ولا أصك التلفون فويهك..
عبدالله: خيييبه خييبه...
أميه عوشانه: خيبه تخيبك...( وطااااااااااااااااخ بندت التلفون فويهه)

تم عبدالله يضحك وايقول بلاها العيوز محتشره....بحاول وياها مره ثانيه بغازلها بشوفها تلين ولا لا...

وأميه عوشانه ردت اتابع المسلسل البدوي...وهي متأثره ومندمجه ...ويرن مره ثانيه التلفون...
أميه عوشانه: حسبي الله ونعم الوكيل..ع الشيطان
وتشل السماعه...
أميه عوشانه: عبوووود...أذيتني تراك...
عبدالله: فديتج اميه ما عاش اللي يأذيج..
أميه عوشانه: شو تبغي؟؟ ( قالتها بصوت معتدل)
عبدالله: هيه جيه رمسي بكل رقه،، هب شرات توه ماخذتني بمشراع وميداف..
أميه عوشانه: عبوووود أنت الحين بتقول شو تبغي ولا اصك التلفون بويهك...
عبدالله: لا لا...أميه وين؟؟؟
أميه عوشانه: فمخبايه...بعد أمك وين؟؟؟ شو تبغيبها؟ فالمطبخ هي ويا البشكاره..
عبدالله : هييييه...و شو تسوي؟؟؟
أميه عوشانه: منكرك بالنعت...بعد شو بتسوي أمك ويا البشكاره...
عبدالله( وهو يضحك ) : بلاج اميه شابه ضوو اليوم...
أميه عوشانه: بس بس...( وطاااااخ بندت التلفون فويهه للمره الثانيه)

عبدالله: بلاها اميه اليوم ..أكيد مندمجه فمسلسل ولا شي وأنا قطعت حبل أفكارها...

وأميه عوشانه يالسه تتطالع المسلسل...ويرن التلفون للمره الثالثه وتشله ابسرعه...
أميه عوشانه: غصص الله عالحرمه اللي بتاخذك...أذيتني تراك...

وطلع اللي متصل أبو عبدالله " أبو حمد"
أبو حمد: حد يدعي على بنته...
أميه عوشانه( وهي مستحيه ومتلومه ومرتبكه) : يا هي فشيله...أسمحلي فديت راسك...هذا عبود مأذني من الصبح..
أبو حمد: ههههههه...عيل أم العيال وينها...
أميه عوشانه: في المطبخ ويا البشكاره..
أبو حمد: خلاص يوم بتي خليها تتصل بي...
أميه عوشانه : ان شاء الله...
أبو حمد: فمان الله..
أميه عوشانه: الله يحفظك..

في هاللحظه عبدالله كان طالع من الدوام من وقت لانه يوم الخميس،، فبغى يترخص عنهم قبل ما يخلص الدوام،، وهو يداوم في بنك من البنوك المنتشره في الدوله،،

كان طالع ع الساعه 11 ونص..وفكر يمر على اربيعه خليفه ويروح وياه ستاربكس،، ويتغدون برع وعقب يرد البيت يخمدها لين المغرب ،، عشان ايمع راحه حق طلعت فليل،،

وقام واتصل بخليفه،،
عبدالله: ألوووو...
خليفه: هلا عبدالله...
عبدالله: اشحالك خلووووف...
خليفه: الحمدلله لاباس يسرك الحال،،
عبدالله: وعلومك؟؟
خليفه: الحمدلله علومي زينه،،
عبدالله: أنت وين؟؟؟
خليفه: أنا الله يسلمك أتمشى عالبحر،، وأنت ليش هب مداوم اليوم؟؟
عبدالله: لا...ترخصت عنهم...
خليفه: ليش ما من شر؟؟؟
عبدالله: أرررف ولاعت جبدي من ريحة الهنود...الي كل شويه ويايين يسحبون ويدخلون افلوس التكاسي..
خليفه: اهاااا..وحليلك..
عبدالله: انزين...خلنا نروح الكوفي...
خليفه: انزين انت اسبقني وأنا بيي وراك...
عبدالله: أنزين عيل...أترياك فصحاري...
خليفه: أوكي...
عبدالله: يالله أجلب ويهك..
خليفه: ما عليه انزين...

ويصكر عنه عبدالله ويسبقه للكوفي...

في بيت أم حمد...
أميه عوشانه كانت تتطالع المسلسل الي توه خلص...ودخلت عليها أم حمد اللي كانت ويا البشكاره في المطبخ،،
أم حمد: محد اتصل بي ولا شي...
أميه عوشانه: امبلى بوعيالج اتصل وعبووود أذاني من كثر ما يتصل...
أم حمد: وااابويييه...أخاف ألا وليدي شي بلااااه...
( وتيلس عالغنفه اللي حذال التلفون وتتصل بعبدالله...)

أم حمد: السلام عليكم...
عبدالله: هلا بالطش والرش وماي الورد بالمرش..هلا بأمي وبعد طوايفي...
أم حمد: الحمدلله بردت افادي...
عبدالله: ليش أبويه ما يغازلج..
أم حمد: عيب عيب...شو هالرمسه بعد
عبدالله: هههههه...
أم حمد: أتروعت يابوك قالتلي اميه انك متصل أكثر من مره...
عبدالله: هههههه...لا انا بخير...بس بغيت أسمع حسج..
أم حمد: فديت روحك يا بويه..
عبدالله: فديتج أنا...أميه انا ترا ترخصت من الدوام وبتغدا برع ...لا تحاتيني ان تأخرت...
أم حمد: ان شاء الله...بس فديتك اتحمل على عمرك ...
عبدالله: حاااااضر...من هالعين قبل هالعين...
أم حمد: فديت عيونك أنا..

أميه عوشانه تدخل عليهم عرض...: بسج لااااه...إلا فديتك وفديتك...بيبطر عليج الولد...
عبدالله: ههههههه...
أم حمد: أولدي انزين حرام اتفداه....
أمييه عوشانه: أتفديه يوم هو محد...عن يبطر علييج...ما ينعطى ويه هالسبال...
عبدالله: ههههههه...معصبه عليه اميييه عشان أذيتها..
أم حمد: هههه...كيفك عااااد ..راضها يوم بتي...
عبدالله: ان شاء الله...
يالله فمان الله..
أم حمد: مع السلامه...

وصكرت عنه أمه...
أميييه عوشانه: البنات بعدهن عن اييين؟؟ ...
أم حمد: هيه...أمل بتخلص الساعه وحده و خوله الساعه 12...
بيمر عليهن الدريول وبييبهن من الجامعه...
أميه عوشانه: زين زين...أنا عيل بسير اتوضا...
أم حمد ( وهي يالسه تتصل ببوحمد) : انزين...

وراحت أميه عوشانه تتوضا وأم حمد يالسه تتصل ببوحمد...

عائله بوحمد تتكون من حمد ولدهم العود ( متزوج وساكن في بيت ويا زوجته)...وعبدالله ( عمره 22 سنه)..أمل عمرها ( 19سنه ثاني سنه في الجامعه)...وخوله أصغر وحده ( 18سنه في أول سنه جامعيه)

عبدالله وصل صحاري...وبركن سيارته الكومارو ( عنابيه) في الموقف...وفصخ غترته والعقال اللي كان لابسنها حق الدوام..ولبس الكاب ونزل من السياره....

عبدالله... عنده شخصيه قويه وحبوبه...وسيم وله جاذبيه فريده من نوعها...
نزل وحط الهدفونز في أذنه واتصل ب حنان ( وحده من معجباته ..وهيه متعرفه عليه عن طريق المسن..وحنان تدرس ويا أخته أمل في الجامعه وتعرف ان أمل أخته بس أمل ما كانت تدري بشي...)..

عبدالله: مرحبا الساع...
حنان: مرحبتين...اشحالج؟؟؟
عبدالله: أفاااا...اشحالج ...جيه قالولك أنا اربيعتج...
أنا عبدالله..يا أميه عبدالله...عرفتي...
حنان: هههههه...
عبدالله: فديت أنا هالضحكه...
حنان: ...( واستحت حنان وسكتت)
عبدالله: بلاج ما ترمسين ساكته...
حنان: ما شي يالسين في الهول...
عبدالله: ما شفتي أمل اليوم..
حنان : أمبلى..
عبدالله: ومتى بتخلصين...؟؟
حنان: أمممم...بخلص عالساعه 2؟؟
عبدالله: واشحقه اليوم مخلينكم أداومون؟؟ حرام عليهم..
حنان : شو نسوي...يعوضون أونه...
عبدالله: انزين عيل حبوووبه...بتصل فيج بعدين
حنان: أوكي ..باي..

حنان كانت يالسه عدال أمل واربيعتها سلمى...
بس هي ما تعرفهم واااايد...بس رازه بويهها صوب أمل واربيعتها اللي كانن يحلن الواجب،،
أمل: أقول سلمى....
سلمى: هاااااه؟؟
أمل : خلينا انروح حق الدكتور يشرحلنا بعض النقاط ,,,
سلمى: أمممم...أوكي..بس هب اليوم..
أمل : عيل متى؟؟؟
سلمى: أمووووله متفيجه أنتي...أصلا أنا مالي بارض أيي...وبعد تبيني أروح عند الدكتور...مابا..
هب رايحه...
أمل: انزين شو يعني الخميس ولا يوم ثاني ..ترانى بنروح بنروح...
سلمى: مالي بارض أشوفه...
أمل ( وهي تصاصر سلمى): أقول حق حنان تروح وياي؟؟؟
سلمى: قولي....
أمل: حنان؟؟؟
حنان ( وهي مندمجه في موبايلها ويا المسجات): هلا..
أمل: شو تسوين...؟؟
حنان: ما أسوي شي...يالسه أللعب بالتلفون..
أمل: أممم...انزين بتروحين وياي عند دكتور ال accounting
حنان: انزين...
( حنان ما صدقت انها تتقرب من أمل أكثر...بس عشان خاطر عبدالله...كانت تبغي تتقرب من أمل بأي طريقه)
أمل: يالله عيل...خلينا انروح...

وراحت حنان ويا أمل عند الدكتور عسب يشرح حق أمل بعض الأشياء...

في صحاري...عبدالله...كان يالس ع طاوله من الطاولات وكان مجابل بنات حلوات...وهن كانن يطالعنه ويضحكن...