:: ليــتنـــي عرفتــــك فــي بدايـــة حيــاتــي ::

[بهجة الروح]

ثانكـــــــــــس للمتابعين

[بهجة الروح]

" الجــزء السابــع"

خلصن البنات المشترا وركبن السياره،، وبينما هم في السياره،، دار بينهم هالحوار،
أمل: خوالي ما أطالعتي الورقه مالج ولا لا...
خوله: أوووه صح نسيتها أنا في الشنطه،،
( وظهرت خوله الورقه من شنطتها وفتحتها.ويلست تقراها..وهي مستغربه ومندهشه وفاتحه حلجها)
أمل: بلاج شوفيها الورقه..؟؟
خوله: ( خوله تمت ساكته)
أمل: قولي بلاج ...هاتي الورقه لاااه ( وتسحب الورقه عن خوله..وخوله تمت متسمره في مكانها)

( وقرت أمل اللي مكتوب في الورقه)
أمل: اويه...
الدريول: ( وهو يطالعهن من المنظره): شو في ماماه؟؟
أمل: ما شي ما شي...ودنا البيت،،

ووصلوا البيت بعد ما كانوا ساكتين في السياره،،
خوله دخلت البيت على طول ودشت حجرتها...
بينما أمل كانت شاله الورقه وخشتها في شنطتها وراحت تودي حق يدتها اللزق،،

خوله كانت في الحجره وهي سرحانه وفيها صياح وتفكر،، ودخلت عليها أمل،،
أمل: خولووه بلاج مصدومه؟؟
خوله: ( بصوت واطي) ما شي،،
أمل: شووو ماشي،، أنتي اصلا شو قايله حق الريال ..
خوله: قلتلج ما شي،،
أمل: أنا بروح أبدل ويوم برد اتخبريني السالفه كلها،،

تدرون من كان مطرش هالورقه،، اللي مطرشنها خليفه،، استغل الهندي وقاله يودي الورقه حق البنات،،
وخليفه من شاف خوله ما قدر يمسك نفسه عسب جيه طرش الورقه،،

وكان كاتب فيها،، ( وخطه كان مبهدل على وجه السرعه)
===============
الســـلام عليـــكم

اشحالج الغاليه؟؟
أنا ما أبغي أغثج شرات ما غثيتيني البارحه...والله أني أتمنالج كل خير
صدق اني انجرحت البارحه وحالتي ما يعلم بها إلا ربج..
بس مع هذا أوعدج ما أخطي مره ثانيه ولا أسوي الحركه اللي سويتها فيج البارحه
في حد غيرج

أكيد الحين بتقولين انا ليش مطرش الرساله،،
أنتي بنت ناس وعرب وأنا أعرفكم زين،، عشان جيه فرحني أشوف وحده من معارفنا شراتج،
صدقيني بسوي اللي أقدر عليه عسب أوصلج،،

فمان الله
==============

هذه هي الرساله الي كان خليفه كاتبنها،،


خليفه كان في هالوقت مصدوم...ومتندم انه طرش الرساله،، وكانت أدور في باله تساؤلات:
أنا أشحقه طرشتلها الورقه؟؟ ياليتني ما طرشت؟؟ أخافها الحين تخبر عبود؟؟
ولا أخاف اختها تنازعها ؟؟
الله يستر والله أني ما برضا انه شي يستوي بج؟

وكان مضايق وايد،، حتى كان خايف يتصل بعبدالله،،


أمل دخلت على خوله اللي كانت منسدحه على سريرها واطالع السقف واتفكر،،
أمل: خولووه عاااد بس؟؟ شاله الدنيا على راسج..بسبة هالرساله..
خوله: أمووول...هب عارفه شو اسوي؟؟
أمل: شو بتسوين بعد؟؟ أنتي ما تعرفينه ولا هو يعرفج ..والرساله قطعيها وعقيها فالزباله..
خوله: أعقها فالزباله؟؟؟
أمل: ليش هب هاينه عليج؟؟
خوله: لا هب جيه...أنا أفكر في الرمسه اللي كاتبنها...
أمل: شو فيها الرمسه...لا قال انه بيفضحج ولا كتبلج رقمه...اللهم فضفض عن خاطره..
خوله: لا والله...ليش أنا منو عسب يفضفضلي...
أمل: يا اميه يمكن دشيتي خاطره...وبالعكس كان مستانس منج وهو يكتب الرساله...
وشكله يبغيج...
خوله: يبغيني؟؟؟
أمل: هيه ..يبغيج...ما شفتي شو كاتب..
خوله: ما انتبهت...بس خفت وانتي سحبتي الورقه..
أمل: كاتب الله يسلمج..انه بيسوي اللي يقدر عليه عسب يوصلج..
خوله: أويه يمكن يخبر عليه...
أمل: يخبر عليج؟؟ ليش أنتي شو مسويه؟؟
خوله: ما سويت شي..يمكن يقولهم اني هزبته..
أمل: هههههه..صدق انج حركات...محد يخبر على عمره هالايام...ويالله ودري عنج هالتفكير..وذاكريلج كمن كلمه..ولا تنسين انه قوم شميس بيون العصر...
خوله: هيه صح...
أمل: ولا تفكرين وايد...انسي الرساله..
خوله: انزين...بس الرساله وين؟؟
أمل: عندي وبطرها
خوله: لااااا
أمل: ليش ؟؟ تبين حد يشوفها عندج ويسولج سالفه؟؟
خوله: لا بس بخشها عندي محد بيشوفها..
أمل: ما أدري..أخاف عبدالله يشوفها ولا شي..
خوله: لا تخافين بخشها في مكان محد يدله..
أمل: على كيفج..أنا ما يخصني...


في هالوقت عبدالله كان توه ناش من النوم وتوه طالع من حجرته..وفتح حجره خوله...
عبدالله: صباح الخير..
خوله وأمل بصوت واحد: صباح النور..
عبدالله: شو تسوون مجتمعين أشوفكم؟؟
أمل: ما شي...يالسين نرمس عن الواجب والامتحان..
عبدالله: هيه زين زين...
( أمل وهي تطالع عبدالله ومبتسمه): غريبه ناش من وقت مع انك راقد الفجر..
عبدالله: ما غريب الا الشيطان...وأنتي شو مسهرنج لين الفجر...
أمل: ما كنت سهرانه ..كنت ناشه بصلي الفجر..
عبدالله: هييييه... و وين سرتي البارحه؟؟
أمل: سرت عند وفايه اربيعتي...
عبدالله: وليش ما تخبريني؟؟
أمل: وليش أخبرك؟؟
عبدالله: قصدي تستأذنين..
خوله: هههه
أمل: وليش أستأذن ...ليش ريلي ولا أميه وأبويه محد عسب أستأذنك...
عبدالله: أففف..ما فيه على حشرتج من صباح الله...هي كلمه وحده يوم بتسيرين مكان خبريني ..
خوله: غريبه...ليش من متى هي تخبرك قبل ما تسير مكان..
عبدالله: جب أنتي سكتي...هاي أختي وأنا وهي نتفاهم..
خوله: لا والله ..ليش أنا بنت البطه السودا؟؟
عبدالله: أفففف..( ويطلع ويصك الباب وراه)

خوله: ههههه...بلاه عبدالله..
أمل: ما أدري...يسولف وحليله..
خوله: حركات أرعا عليه...
أمل: المهم انه ضحكج...
يالله أنا بروح ..ويلسي ذاكري ان شاء الله...

عبدالله نزل الصاله ولقى أمه عوشانه ميلسه عالغنفه...ووخى عليها وباسها...
أميه عوشانه: فديتك يا بويه...
عبدالله: فديتج أنا يالغاليه...
أميه عوشانه: هيه زين نباك كل جمعه جيه ناش من وقت حق الصلاه هب انطرش خواتك ايوعنك...
عبدالله: ما ياني نوم ونشيت...
اميه عوشانه: ما تبى ريوق..؟؟
عبدالله: لا بس أبغي كوب حليب،،
اميه عوشانه ( وهي تزاعج تزقر الخدامه ): ويتيي ويتيي...
ويتي: هااه ماما؟؟
أميه عوشانه: صبي كوب حليب حق بابا عبدالله...
ويتي: ان شاء الله...
أميه عوشانه: ابويه خالتك فاطمه وبناتها بيون العصر...
عبدالله: زين...
أميه عوشانه: هيه زين...نباك أتشوف شميس..
عبدالله ( وهو مبتسم): من زمان شايفنها وأعرف شكلها...
أميه عوشانه: من زمان...لكن الحين شميس غير...تعق الطير من السما واتقول حق القمر قم انا بيلس مكانك..
عبدالله: هههههههه...
اميه عوشانه: وشو اللي يضحك الحين؟؟
عبدالله: ما شي...بس عقب ما اشوفها..شو تبوني أسوي...
اميه عوشانه: شو بعد اتسوي...صدق انك ما تستحي..
عبدالله: هههه..أميه انا هب قصدي مثل ما انتي فاهمه...قصدي وشو المطلوب مني...
اميه عوشانه: ما شي...بس نباك تخطبها...
عبدالله: أنا أخطب شميس؟؟
أميه عوشانه: وليش أنت شو ملاك نازل من السما؟؟
عبدالله: لا حشا أنا ما قلت جيه...
أميه عوشانه: عيل خلاص اسكت..اللي نقوله نحن يمشي عليك...والعصر نباك في البيت عسب تسلم على خالتك..
عبدالله ( وهو يفتح الجريده): ان شاء الله...



>>>> يتبع

[بهجة الروح]

" الجــزء الثامــن"

عالساعه 1 ونص الظهر عقب ما طلع عبدالله من المسيد،، اتصل بنهى،،
عبدالله: مرحبااا،،
نهى: مراحب،، يا هلا
عبدالله: اشحالج الغاليه؟؟
نهى: من سمعت صوتك استويت ابخير..
عبدالله: وانا بعد من سمعت حسج ردتلي الروح
نهى: تسلملي والله..
عبدالله: شو عالموعد؟؟ ولا هونتي؟؟
نهى: لا لا ما هونت ولا شي...بس كنت اتريا الاشاره الخضرا منك،،
عبدالله: اهااا..زين زين...انا عيل الحين ساير،،
نهى: خلاص عيل،، لحظات وأكون عندك...

كانوا متفقين يروحون مطعم وييلسون في غرفه من الغرفه الصغيره الموجوده حق العوايل في المطعم،، بس شو اسم المطعم و وين مكانه ما بقول،، لانه هب مهم،،

عالساعه 2 الظهر
عبدالله يالس ويتريا نهى ويطالع الساعه بين فتره وفتره ،، ويرن تلفونه،،ونهى متصله،،
عبدالله: هلا ...أنتي وين؟؟
نهى: ههه..الحين يايه...
عبدالله: انزين انتي وين الحين...
نهى: شوي شوي علي...هالكثر أنا مهمه...
عبدالله: يالله ما أروم اصبر...
نهى: انا الحين في المطعم ..أنت وين يالس؟؟
عبدالله: أنا في الطابق الثاني ..على ايدج اليمين ..أخر طاوله..
نهى: اوكي يايه الحين...

كان عبدالله متلهف ويتريا نهى ابسرعه...أول مره يواعد بنت وفي هالسرعه بعد...
وكان مرتبك وقلبه يدق،،،

وتدخل نهى وهي متغشيه،، استغرب عبدالله يوم شافها،،
نهى( وهي متغشيه): عبدالله؟؟؟
عبدالله: عونج..
نهى: بس بغيت أتأكد...( وتشلح الغشوه عن ويهها)
عبدالله: ما شاء الله شوهالجمال كله،،( وهو مندمج ويطالعها من راسها لين اريولها)
نهى: الجمال ماخذينه منكم..( وتيلس نهى مقابل عبدالله)

( نهى كانت متعدله ومتزينه وريحة العود والبخور تفوح منها،، وكانت حاطه ميك أب وروج وردي فاتح وحاطه أي شدو أزرق وطالعه حلوه جنها عروس ومنزله قصتها على طرف ويهها مثل قوس الهلال...وشعرها لونه كستنائي،،، كانت تاخذ العقل ...هب من جمالها ..بس شكلها يجذب ويلفت الأنظار..وعبدالله كان منبهر فيها)

نهى ( وهي مستحيه ): بلاك جيه أطالعني..؟؟
عبدالله ( ويحط ايده تحت خذه وهو متكي عالطاوله): هب مصدق اللي أشوفه،،،
أأااه...أنا فحلم ولا فعلم،،
نهى ( وهي محمر ويهاا): بس عاااد..لا تبحلق فيني جيه..ولا ترا بروح...
عبدالله: لا لا ..لا تروحين...

وايقاطعهم الجرسون،،
الجرسون: أهلا وسهلا فيكم
عبدالله: أهلين
الجرسون: ايه حابين تطلبوا؟؟
عبدالله: شو حابه تطلبين؟؟
نهى: أي شي...

وطلب عبدالله غدا حقه وحق نهى،،،

ورجع عبدالله يتأمل نهى ويطالعها وهو ساكت،،
نهى ( قالتها بكل دلع): عبداللـــه
عبدالله: روح عبدالله ..أدللي وآمري ..شو تبغين..
نهى: ما شي بس لا اطالعني جيه،،أحس ويهي تقطع..
عبدالله: سلامة ويهج...بلاه...
نهى: عبدالله..وايد استحي يوم تشوفني جيه..
عبدالله: أوكي خلاص بنزل راسي ..وما بشوفج..أدري اني ما استاهل هالجمال كله،،
نهى: لا مب جيه...بس استحي،،
عبدالله: سولفي انزين ..عشان ألتهي شوي..( وهو يطالعها وعينه في عينها)
نهى: شورايك فيني؟؟؟
عبدالله: ابصراحه قمر..ما كنتي جيه اول ما شفتج،،
نهى: هذا من ذوقك
عبدالله: تسمحين لي بشي..
نهى: تفضل؟؟
عبدالله: ما أدري اذا ترضين ولا لا؟؟
نهى: ليش شو بخاطرك؟؟
عبدالله: ودي ألمس نعومة ايدج،،
نهى ( وهي مستحيه ومنزله راسها): بس،،
عبدالله: تستحين؟؟
نهى: وايد..
عبدالله: اشوف ويهج غدا طماطاه
نهى: لا تحرجني عاااااد...والله ما اتحمل
عبدالله: ههههههه....تعجبيني...
نهى ( وهي اطالعه ومبتسمه): وانت تعجبني أكثر...
عبدالله: اتصدقين؟؟
نهى: شوووه؟؟
عبدالله: على هالمستحى اللي فيج،، أشوفج وايد جريئه؟؟
نهى: كيف،، ما فهمت؟؟
عبدالله: يعني الحين انتي تستحين وين يتج الجرأة أنج تتعرفين علي..
نهى: شوف يا عبدالله..
عبدالله: الله...فديت اسمي يوم تنطقينه..
نهى ( وهي مبتسمه): تسلم..
عبدالله: ..كملي..
نهى: أنا اللي يدور في بالي واللي خاطري اسويه اسويه...حتى لو كلفني حياتي...
اذا بغيت الشي بالطيب بالغصب آخذه...
عبدالله( وهو مبتسم): قويه الصراحه...تعجبيني...
نهى: أنا جيه من يوم كنت ياهل..
عبدالله: دلوعه لازم بتكونين جيه...
نهى: ههههه..حرام عليك..
عبدالله: فديت هالضحكه..
نهى: بس عاااد..
عبدالله: انزين..تسمحين لي أمسك ايدج،،
نهى ( وهي مستحيه ومبتسمه): أوكيه...( واتحط ايدها عالطاوله)
( ويحط عبدالله ايده على ايدها ويتلمس النعومه اللي فيها..شويه وتسحب نهى ايدها)
عبدالله: افاااا ..ليش؟؟؟
نهى: بس استحي...( وهي تعدل شيلتها)

ويدخل عليهم الجرسون ويحط الغدا،، والعصير..وعقب ما طلع الجرسون،،
عبدالله: يالله سمي،،
نهى: ....
عبدالله: بلاج ساكته؟؟ ما عيبج الغدا؟؟
نهى: لا...
عبدالله: عيل؟؟
نهى: : استحي آكل..
عبدالله: ههههههه
نهى: صدق استحي آكل وأنت اطالعني..
عبدالله: شو تبين أصد عنج مناك..
نهى: لا ..بس لا أطالعني وأنا آكل...
عبدالله: ههههه...شورايج أأكلج..
نهى: لاااااااااااااا
عبدالله: يالله يالله عند الدلع وكلي...


ويلسوا يتغدون وقضوا هاليلسه وكلهم مستانسين،،...عالساعه 3 وربع طلعوا،،
نهى روحت قبل وعقب طلع عبدالله،،
عاساس محد يحس فيهم،،

في بيت وفا عالساعه 3 ونص كانت وفا يالسه عالنت اتكلم أمل عالمسن،،،
HOW IS MY WORLD GOING TO BE SOON : (أمل)
اشحالج وفايه..

غلاك بدنيتي جنــــــه :( وفا)
الحمدلله ابخير،،
اشحالج أنتي..

HOW IS MY WORLD GOING TO BE SOON : (أمل)
تمام
شو ما عليج أمتحانات الاسبوع الياي،

غلاك بدنيتي جنــــــه :( وفا)
امبلى

HOW IS MY WORLD GOING TO BE SOON : (أمل)
عيل ليش يالسه عالنت، ما تبين امتياز
غلاك بدنيتي جنــــــه :( وفا)
هيه ابا

وكانت وفايه ترمس ويا أمل،، وفجــأة دخل عليها أخوها علي...
علي: وفا شو تسوين؟؟
وفا: ما اسوي شي...يالسه ارمس أمل عالمسن

من قالت وفا أمل،، فز قلب علي...وبدت تتسارع نبضاته،،
علي: أمل اللي كانت البارحه عندج؟؟
وفايه: هيه...

لحظة صمت بينما وفا كانت مندمجه،،
علي: وفا أميه تزقرج تحت...
وفا: أميه؟؟؟
علي: هيه روحي شوفيها
وفا: أوكي لحظه،،


ودخلت على أمل عسب اتخبرها انها بتسير وبترد

غلاك بدنيتي جنــــــه :( وفا)
أمل...أنا بروح أطالع أمي وبرد..

HOW IS MY WORLD GOING TO BE SOON : (أمل)
أوكيه

غلاك بدنيتي جنــــــه :( وفا)
ويت،،

ونزلت وفا عند أمها تشوفها شوتبغي...أصلا أمها ما كانت زاقرتنها ولا شي بس هالخطه من علي اللي كان يبغي يعرف ايميل أمل،،

فتحت علي ابسرعه المسن وشاف بس شخص واحد أون لاين واللي هي أمل،، قرا الايميل وحفظه وروح حجرته على طول قبل ما توصل وفا،،

وفا نزلت عند أمها،،
وفا: هاااه..أميه..شوبلاج؟؟
أم وفا: ما بلايه شي...زين يوم ييتي بوقتج..
وفا: خير اميه...
أم وفا: ما خذه اقطع من السوق وأباج تختاريلج وحده منهن..
وفا: هااااه...بس عشان جيه تبيني..
أم وفا: هيه ..تدرين خواتج اصغار وانتي العوده ولازم أول وحده اراويج كل شي قبلهن
وفا: زين...

ويلست وفا عند امها وعقب راحت عند أمل،،

علي حفظ الايميل ودخل غرفته وكتب الايميل على ورقه قبل ما ينساه،، ويغيب عن باله
وكتبه،، بس ما فكر انه يضيفها ولا حتى دخل النت،، هو كان محتار يرمسها عالمسن ولا لا وما كان عارف شو حقيقة شعوره ناحيتها بالضبط،،
حس انه يبغيها بس كيف ما يدري...


انتظـــــرونـــــــي باجر

[العجيبة]

هههه عيبتنـي هالجمله

ابصراحه قلقت عليك..ويلست أحاتيك

قلقت أونه خخخخخخ :hist:



شكـرا لج أختي ، بانتظار التكملة

[حبوبه دبي]

حلـــووه القصـــه



يالله نتــريــاا البــاجـــي :daleel:

[دمعة شوق]

:harhar1:
أنـا قـريتـها كـامـلة
:harhar1:
’’

بهـجووه

بصراحه قصتج واااااايد حلوه
تسلمييييين فديتج
وماتقصرين

شـكــــــــــــــــــــــ ـــــــــــرا ً
شـكــــــــــــــــرا ً
شكــــــرا ً

[بهجة الروح]

ثانكس لكل اللي ردوا

[بهجة الروح]

" الجــزء التــاسع"


عالساعه 5 كانوا قوم خالة عبدالله عندهم في البيت وتوهم واصين ،،
وقربتبهم أم حمد ويلستهم في الصاله،،

خالة عبدالله اسمها أم محمد وكانت يايه وياها شمسه وعليا أخت شمسه العوده،،
شمسه في نفس سن خوله وعليا أكبر عنهن ب 7 سنوات،،
أميه عوشانه: هلا هلا بنتيه ...
أم محمد ( وهي توخي على أميه عوشانه وتبوسها): اهلين اميه اشحالج؟؟
أميه عوشانه: يسرج الحال لاباس...اشحالكم انتوا؟؟
أم محمد: الحمدلله ...
أم حمد: اشحالج أختيه ..عنبوه من زمان ما خطفتوا صوبنا..
أم محمد: شو نسوي بعد ..مشاغل الدنيا والبنات ما يفضن...
أم حمد: هلا عليا اشحالج..
عليا: الحمدلله ابخير خالوه..
أم حمد: وهلا والله بشميس توه نور بيتنا من شافج..
شمسه ( وهي مستحيه ومبتسمه): البيت منور بأهله خالوه...
أميه عوشانه: هلا بالغاليه شمسه،،
شمسه: اشحالج اميه...
عليا: ما شاء الله..اشوف المديح والدلال بس الا حق شمسه ...
أم حمد: لا أميه فديت روحج..عاد انتي تدرين شميس لها غلا ثاني...
عليا: هيه هيه فهمت الحين( وهي تضحك واطالع شمسه)
( شمسه كانت مستحيه وهب عارفه شو بتقول)
أم محمد: عيل البنات وين؟؟؟
أم حمد: الحين بزقرهن...

( وراحت أم حمد تزقر البنات ...ونزلن خوله وأمل..وسلموا عليهم ..باقي بس دور عبدالله يوصل)

أميه عوشانه وهي تصاصر أمل: إلا أخوج وين؟؟
أمل: ما أدريبه ..
أميه عوشانه: ليش هو من ظهر حق الصلاه ما رد؟؟
أمل: ما أدري اميه...
أميه عوشانه: وانتي كله ما تدرين..اتصليبه وقوليله ايي قوم خالته اهنه..
أمل: ان شاء الله...

وتتصل أمل بعبدالله اللي كان راقد في غرفته بس محد حسبه انه في البيت...
أمل: ألوووو
عبدالله ( وصوته مخترب من الرقاد): هلا
أمل: عبدالله انت وين...
عبدالله: وين بكون بعد...راقد..
أمل: والله؟؟؟
عبدالله: أففف...أنتي شو تبين..
أمل: قوم خالوه عندنا...تعال سلم عليهم...
عبدالله: صدق انكم غصه..( ويبند التلفون في ويهها)
( استغربت أمل من حركته واتفاجأت بعد...أول مره يسوي جيه...)

أميه عوشانه: شوقالج؟؟؟
أمل: هو أصلا في البيت وراقد بعد...
أميه عوشانه: قلتيله ان قوم خالته اهنه...
أمل: هيه..وبند التلفون في ويهي..
أميه عوشانه : يعني الحين بينزل...
أمل: لا..
أميه عوشانه: شو لا بعد؟؟
أمل: قالي صدق انكم غصه وبند التلفون في ويهي..
أميه عوشانه: صدق هيس...عطيني التلفون ارمسه ما تعرفين انتي...

واتصلت أمل على عبدالله وناولت اميه عوشانه التلفون...
عبدالله ( وهو أرفان من حاله): ألوو
أميه عوشانه: بسالك بالله ..بلاك ما تنزل..
عبدالله ( وهو مبطل عيونه ومنتبه): هاااه اميه بلاج...
اميه عوشانه: ما بلايه شي...قم بسك من الرقاد شميس تترياك تحت...

( شمسه من سمعت كلام اميه عوشانه دق قلبها وحست السالفه فيها ان...وتمت مستحيه...ومحمره.. )

عبدالله: ان شاء الله..ان شاء الله اميه الحين ياي..
أميه عوشانه: لا تبطي دهديه..
عبدالله: ان شاء الله...

في هالوقت خوله كانت مندمجه فالسوالف ويا شمسه،،،

خوله: وخبريني شو مسويه في الدراسه؟؟
شمسه: الحمدلله امشين...
خوله: أنتي لو مسجله في جامعتها هب احسلج ...مسجله في جامعة عيمان
شمسه: شو اسوي ..جامعة عيمان أقرب لي...
خوله: بس ما أدري الدكاتره اللي عندكم ما يمدحونهم...
شمسه: ما أدري ..أحسن انهم عاديين...المهم نتخرج...

شمسه بنت حلوه وسمرا شويه شرات البدوان،،، قسماتها وملامحها ناعمه ولابسه تنوره ورديه وقميص باللون الوردي الغامج،، وطبعا العباه مفتوحه ...ومنزله خصايل من قصتها ومب متحجبه بالوقايه ...القصه طالعه،، وحاطه روج وردي وهي
بنت مزيونه ومدللـه

بعد لحظات ينزل عبدالله اللي كان متكشخ ومتعصم لانه كان ناوي يسلم عليهم ويظهر،،

من شافته شمسه نازل فز قلبها وحست بالخوف وويها احمر،،
عبدالله: الســلام عليكم،،
أم محمد: وعليكم السلام والرحمه...عاش من شافك
عبدالله: فديتج خالوه..اسمحيلنا مشاغل الدنيا...
أم محمد: مسموح يالغالي مسموح...
عبدالله: اشحالج عليا..
عليا : الحمدلله بخير
عبدالله: اشحالج شميس؟؟
شمسه ( وهي مرتبكه ومستحيه): الحمدلله...

عبدالله كان يطالع شمسه وهو مبتسم،، بس ما كان حاس باللي فقلب شمسه،،

شمسه كانت اطالع عبدالله وترد اتنزل راسها وفخاطرها كانت اتقول: يا ربيي شقايل يخبل هالريال،،
يا ليت لو يكون هالانسان صدق من نصيبي...

عبدالله كان يشوفها بس ما كان حاس بشي...جنه يشوف بنت من البنات اللي يشوفهن دوم،،
وكان يبغي يرضي يدته وامه بس،،

ويلس عبدالله يتقهوى وياهم،،

أم محمد: شو دوامك عبدالله؟؟ ان شاء الله زين؟؟
عبدالله: هيه الحمدلله مرتاحين...
أميه عوشانه: وين مرتاحين وانت ما ترد الا الساعه 5 ولا 4 ونص..
أم محمد: افااا...ليش هالكثر تتأخر..
عبدالله: شو نسوي ايينا الشغل على آخر الدوام واللي عندنا هب شي يعتمدون عليه في كل شي..
وبنيه عندنا حرام نخليها تتأخر...فآخذ شغلها وأخليها تروح...

من سمعت شمسه هالرمسه قالت في خاطرها: بعد هالبنيه منوتتطلع ؟؟ مهتم فيها هالكثر؟؟؟

أميه عوشانه: وأنت اشلك في البنيه؟؟ خلها تخدم ابروحها...عيل تاخذ معاش على الشوو هي..
عبدالله: يا اميه فديت روحج هاي بنت وحرام تتأخر ويانا في القسم..وكلنا رياييل ..ما يصير يا اميه...
أم محمد: انزين ما دورتلك على شغل ثاني؟؟
عبدالله: مرتاح اهنيه..اهنه اسوي اللي ابغيه ومحد يقولي شي..
أم محمد: المهم راحتك يا عبدالله...

وتموا يسولفون وبين عبدالله وشمسه نظرات...

شمسه كانت اتشوف عبدالله بنظرات إعجاب وحب واحساس..أما عبدالله كان يشوف شمسه بنظرات إعجاب ومغازل وبس...

يلس عبدالله وياهم فتره وعقب أستأذن وطلع....

عالساعه 7 المغرب كان عبدالله يالس ابروحه في ستار بكس يتريا خليفه ...
في هالفتره دارت على باله حنان...اللي ما اتصلت فيه...واتصل فيها على طول..

عبدالله: مرحبا..
حنان: مرحبتين ( قالتها بدون نفس)
عبدالله: اشحالج
حنان: بخير..
عبدالله: بلاج؟؟ زعلانه مني؟؟
حنان: ما ادري عنك؟؟
عبدالله: افاااا كله عاد ولا حبيبة قلبي..
حنان: أونه..
عبدالله: شو أونه بعد؟؟ أقص عليج أنا يعني؟؟
حنان: لا بس حركاتك اتقول جيه..
عبدالله: حبيبة قلبي اشلونج؟؟
حنان: لوني أسود...وضايجه من الخاطر..
عبدالله: افااا ليش ؟؟ شو فيج؟؟
حنان: تغيب عني هالكثر ولا تسأل ولا تكلف خاطرك تتصل..
عبدالله: حنان حبيبتي انتي... صدقيني كنت مشغول ويا الأهل...
حنان : والخميس متعود تسهر وياي عالتلفون؟؟
عبدالله: هالخميس ما تدرين شو استوا..
حنان: شو استوا؟؟
عبدالله: خليفه اربيعي تعب عليه ويلست وياه..
حنان: والله؟؟
عبدالله: حتى ما يلست ويا الربع
( الرمسه ترا كلها خريط)
حنان: ليش شوفيه؟؟
عبدالله: تعب علينا و وديته المستشفى ويلست وياه لين الفجر،، وصلت البيت مدوخ..من التعب
حنان: انا آسفه..
عبدالله: ليش تتأسفين..؟؟
حنان: ظلمتك..
عبدالله: أنتي أظلميني وأذبحيني حتى ..أنا راضي..
حنان: فديتك..
عبدالله: فديت روحج أنتي..كم حنان أنا عندي في هالدنيا..

في هالوقت،، خالة عبدالله وبناتها كانوا مروحين والبنات وأم حمد راحوا يوصلونهم لين عند باب الحوي...
أم حمد: عاااد لا تقطعونا..
أم محمد: ان شاء الله ياختي ما بنقطعكم...
خوله: لا تخافين اميه ...شمسه بين فتره وفتره بتينا البيت..
شمسه تتطالع أم حمد وهي مبتسمه...
أم حمد: هيه فديتها ..أنا ودي أتم عندي ولا تفارجني..
خوله: يا عيني انا عالتفدي..هههه

وسلموا عليهم وظهروا وصكروا باب الحوي،، أم حمد راحت داخل..
وخوله وأمل تمن يتمشن في الحوي،،
بعد دقيقه من مغادرة خالتهم سمعوا هرن عند الباب،،

أمل: منوه هذا اللي يهرن؟؟
خوله: أكيد قوم خالوه..بروح اشوف..
أمل: ايه أنتي... وين رايحه...
خوله: بروح أشوفهم يمكن ناسين شي...

وراحت خوله اتشوف منو عند الباب...وكانت لابسه شيلتها البيضا مالت البيت...
وفتحت الباب وانصدمت بهالنيسان الابيض المخفي،،
وعلى طول اللي في النيسان فتح الجامه،،

من تتوقعون صاحب النيسان؟؟ وشو راح يصير بعدين؟؟؟

[ريم العين]

عرفته صاحب النيسان خليفه وكان ياي ياخذ عبدالله هههههههه توقعاتي

^_^ نزلي الجزء اللي وراه احين ابا اقرا

[شمه]

اممم هيه يمكن خليفــه


القصه مش معقده و وايد بسيطــه.. عيبتني ..

[قرموشة]

هيه صح يمكــن خــليفه ..

وتنريا التكمــله

[حلم الطفوله]

السلام عليكم

إختيه بهجة الروح :kkk:

ليش اليوم مستويه بخيله وحاطتلنا جزء واااحد نتسلى فيه ؟؟

الكرم من طبع الأصيل ..... انتي كريمه ونحن نستاهل

[بهجة الروح]

ريم العين

قرمووشه

شمه

حلم الطفوله

شكــراً على توقعاتكم وردودكم بنشوف الحينه اذا صح ولا لا؟؟

[بهجة الروح]

" الجزء العاشر"

خوله كانت مصدومه ومرتبكه عشان جيه ما قدرت تتراجع وتدخل داخل،،
والي كان في السياره هو خليفه،، ما كان يدري انه بيشوف خوله،،
ومن أول ما طاحت عينه على عينها حس انها هيه اللي في باله،، وعرفها من ملامحها

خليفه: السلام عليكم،،
خوله ( وهي تبلع ريجها..): وعليكم السلام،،
خليفه: أختي عبدالله وين؟؟
خوله: عبدالله محد...منو نقوله..
خليفه ( وهو يطالعها ومبتسم) : قوليله خليفه،،
خوله: ان شاء الله..

ودخلت خوله وصكرت الباب...

أمل: ايه أنتي بلاج أموقفه وترمسين الريال؟؟؟ منو هذا بعد؟
خوله: ما أدري...ابروحي افتشلت...
أمل: مستعيله الا تبين تفجين الباب...
خوله: ههه..
أمل: لا ومستانسه بعد..
خوله: ما أدري حسيت بشي...
أمل: بشو حسيتي بعد؟؟
خوله( وهي مبتسمه): ما أدري
أمل: وابويييه أنا على هالمناكر...انزين منو هذا وشو يبغي
خوله: هذا اربيع عبدالله ..يقول اسمه خليفه..
أمل: لا والله ..وقالج بعد اسميه خليفه..
خوله: أمووول عااد عن العبط...قلتله منو انقوله ..قالي قوليله خليفه وبس...
أمل: أهاااا...يا ويلج من عبدالله جان درا انج رحتي عند الباب...
خوله: وأنا أشدراني ان اربيعه بيي...
أمل: انزين انزين...كيف شكله..
خوله: بعد تسألين كيف شكله؟؟...واحد عبيط شرات أخوج
أمل: ههههههه...أندوكم انتوا حد يرمس عن أخوه جيه...
خوله: ههههه
أمل: يعني أخويه هالحليو اللي يعق الطير من السما...عبيط؟؟
خوله ( وهي مبتسمه ): هيه...
أمل: هيييه..الحين فهمت ..يعني اربيعه حلو شرات أخويه العبيط..
خوله: هههههه
أمل: بس بس...وايد عطيتج ويه ترا...عيب اتسبين اخويه فديته....قابضتلي أخوج وأخوج هب جنه أخوج أنتي بعد
خوله: هههه...انزين ما سبيته أنا بس وصفته..
أمل: وايد عليج...قومي خلينا ندخل داخل،،


ودخلن البنات داخل...

خليفه،، كان مستانس وهب مصدق انه رمس خوله،، وكان يقول فخاطره: يا ربيي عليها،، محلى منطوقها،،
فديتها والله...يعلني افداها طول العمر...

وكان يتمشى بالسياره وهو معلي عالمسجل ومحطي أغنية عيضه ( ودي بكلمه يا حبيبي)

http://www.salmiya.net/songs/aidha/ram/aidha38.ram

واتصل بعبدالله...
خليفه: مرحبا الساع،،
عبدالله: مراحب،، يا اخويه ذليتنا من متى اترياك،،
خليفه:هههه.. ليش أنته وين؟؟
عبدالله: لا والله وتسألني أنا وين بعد؟؟؟
خليفه:ههههه
عبدالله: أنا في الكوفي..
خليفه: اهااا...وايد عليك...ما توضحلي من البدايه...
عبدالله: أوضح شوو...
خليفه: قلتلي الله يهديك مر علي...وما قلت وين أمر عليك...رحت بيتكم وقالولي محد..
عبدالله: هههه...وحليلك...
خليفه: اضحك يا بويه من حقك تضحك...
عبدالله: هيه عيل شو قالولك...
خليفه: يالله الحين ياينك..
عبدالله: أشوف داقنك الهوا...معلي المسجل..
خليفه: هيه شو اسوي ردت لي الروح..
عبدالله: زين زين...يالله اترياك عيل...
خليفه: يالله باي...



في هالوقت كانت شمسه في بيتهم ،، وكانت تفكر بنظرات عبدالله اللي بغت تسلبها روحها،،
شمسه: أمايه؟؟
أم محمد: هااه فديتج..
شمسه: أشوف قوم خالوه يلمحون لشي..
أم محمد: هيه وأنا بعد لاحظت،،
يا اميه خير وابركه جان بتحصلين واحد شرات عبدالله..ما عليه كلام..
وخالتج محد أحسن عنها،
شمسه ( وهي مستحيه): صح..
بس وايد كان يطالعني..
أم محمد: تدرين عاااد..حاط في باله انج بتكونين أم العيال..ان شاء الله..
( شمسه سكتت ونزلت راسها وهي مستحيه...)


في ستار بكس،،

خليفه توه واصل صوب عبدالله..
عبدالله: يا اخويه ما بغيت تي...تمشي على بيض أنت ولا شووو
خليفه: ههههه...بلاك؟؟ شي عندك ولا ما بتترياني هالكثر..
عبدالله: متوله عليك ..أحبك يا أخي ...
خليفه: ههههه...
عبدالله: أااااه يا خليفه آااااه...
خليفه: سلامتك من الآاااه...
عبدالله: ياليتك شفت اللي شفته...ياويل حالي أنا..
خليفه: خير شو شفت،،
عبدالله: شفت غزاله اسمها نهى..
خليفه: نهى اللي هاكي اليوم عطتك رقمها؟؟
عبدالله: هيه شفتها...
خليفه: وين شفتها يا حظي؟؟
عبدالله: تغديت وياها اليوم..
خليفه: قول والله؟؟
عبدالله: شو شايفني أجذب عليك أنا..
خليفه: لا.. بس وحالك أتواعد؟؟
عبدالله: هيه ...شوقالولج...أنا عبدالله..
خليفه: عبدالله ...وخير يا طير..شوفيك عن زد الناس..
عبدالله: أطاعوا انتوا الغيره شو تسوي..
خليفه: هههههه...لا يابويه..انا ما اغار ولا شي...
بس الله يهديك عن هالسوالف..
عبدالله: أوووه غريبه...
خليفه: ما غريب إلا الشيطان..
عبدالله: أنت خليفه ولا واحد ثاني...أشوف كلامك غير بالمره..
خليفه: ههههههه...لا يا حبيبي..أنا خلاص بودر هالسوالف...لاني أفكر أبني مستقبلي..
عبدالله: هههههه...بتخبلبي ...يا خلوووف..
كلامك غريب اليوم...
خليفه: أوهوووه رد عليه بغريب...يا بويه أنا من صدقي بودر سوالف المغازل...بس خلاص .. حرام نجذب على بنات الناس..
عبدالله: زين...الله يهديني شرات ما هداك...
( وهم يالسين كانت بنيه تمشي تروح وتي...وتتمشى شويه شويه)

خليفه: هذي بلاها...سايره راده...راسي عورني...
عبدالله: ههه...وحليلها تبى حد يعبرها...
خليفه ( وهو يرمس بصوت عالي): بنات آخر زمن لا حيا ولا مستحى...
عبدالله: ههههه..ايه فضحتنا...قم خذ أجرها وعطها رقمك..
خليفه: خلها تولي هي وطوايفها...ما عندي سالفه...
عبدالله: هههههه...وأخبار مهاوي...
خليفه: ما رمستها ولا برمسها...
عبدالله: قول والله؟؟

( مها هذي وحده من اللي يرمسهن خليفه وهي وايد ميته عليه وهو بعد يسايرها)

خليفه: هيه خلاص ..أفكر أقطع علاقتي فيها...اتصلت أكثر من مره وما رديت عليها..
عبدالله: اندوكم انتوا...هالكثر أثر فيك كلام هذيج البنيه...
خليفه: ما يخصك..
عبدالله: ههههههههه..

في هالوقت كانت أمل توها فاتحه النت،، وفتحت مسنجرها،،
لقت إضافه من أيميل غريب، وحاط لينــك،، ( ليتني عرفتــك في بداية حيــاتي)
استغربت من بيضيفها ..قالت يمكن حد من اربيعاتها،، واذا حد مغلط بتسويله بلوك ودليت،، وسوت له أكسبت...

ويلست تشتغل على البروجكت مالها...بعد لحظات،، وهي يالسه عالكمبيوتر...

" تم تسجيل دخول"
ليتني عرفتك في بداية حياتي.


يا ترى من تتوقعون صاحب هالايميل؟؟ أكيد اللي في بالكم؟؟

[بهجة الروح]

" الجزء الحادي عشر"


" تم تسجيل دخول"
ليتني عرفتك في بداية حياتي.

قالت أمل في خاطرها: خلني أشوف منو هااالي ضايفني؟؟

( ليتني عرفتك في بداية حياتي ) :
الســـــلام عليـــكم

HOW IS MY WORLD GOING TO BE SOON : ( أمل )
وعليكم السلام

( لحظة صمـــــــت )

HOW IS MY WORLD GOING TO BE SOON : ( أمل )
من معاي؟؟؟

( ليتني عرفتك في بداية حياتي ) :
ما أدري أقولج ولا لا

HOW IS MY WORLD GOING TO BE SOON : ( أمل )
؟؟؟؟

( ليتني عرفتك في بداية حياتي ) :
أنتي أمل صح؟؟؟

( أمل استغربت...وقالت منو هاي اللي قاعده اتسوي فيني هالمقلب السخيف)

HOW IS MY WORLD GOING TO BE SOON : ( أمل )
منو أنتي وعن العبط؟؟؟ مب متفيجه حق المقالب

( ليتني عرفتك في بداية حياتي ) :
والله ما أستعبط عليج ولا اسوي فيج مقلب


HOW IS MY WORLD GOING TO BE SOON : ( أمل )
منو أنتي؟؟؟ خلصيني...

( ليتني عرفتك في بداية حياتي ) :
أنا واحد هب وحده...وشارنج هب بايعنج

HOW IS MY WORLD GOING TO BE SOON : ( أمل )
نعـــــــــم!!!!!!

( أمل زاغت...قالت هذا منوه وكيف عرف اسمي)

( ليتني عرفتك في بداية حياتي ) :
أنا بفهمج السالفه...وما في داعي انج تتوترين ولا تعصبين...

HOW IS MY WORLD GOING TO BE SOON : ( أمل )
؟؟؟؟

( ليتني عرفتك في بداية حياتي ) :
أنا علي أخو وفا اربيعتج

( اندهشت أمل وتفتحت حلجها من الخوف،، وقلبها قام يدق ابسرعه...وتمت ساكته وما ردت عليه مده)

( ليتني عرفتك في بداية حياتي ) :
عسى ما ضايقتج بس؟؟
( ليتني عرفتك في بداية حياتي ) :
بلاج ما تردين؟؟؟


( ليتني عرفتك في بداية حياتي ) :
صدقيني والله هب قصدي شي...

( ليتني عرفتك في بداية حياتي ) :
أنا من شفتج هاكي البارحه وأنا عايش وهب عايش...ما أدري شو صار فيني...
صدقيني أنا من سنين عفت البنات وعفت سالفة العرس،، حتى لو تسألين وفا بتقولج...

( ليتني عرفتك في بداية حياتي ) :
.....

( ليتني عرفتك في بداية حياتي ) :
أدري بعدج مصدومه...أنا بطلع الحين ...بس هب في خاطري شي الحين...مع اني ودي أعرف أشياء وايد عنج عسب تكونين من نصيبي...

( ليتني عرفتك في بداية حياتي ) :
بس دخيلج لا تقولين حق وفا...لانها ما تعرف اني خذت ايميلج...

( ليتني عرفتك في بداية حياتي ) :
فمان الله...



هالوقت كله ،،، كانت أمل منصدمه وتقرا الرمسه بس،،...وقلبها بيطلع من مكانه وهو يدق...
كانت خايفه،، تقول حق وفا... ولا لا...ولا تقول حق خوله....
نست عمرها من كثر مب هي خايفه...نست البروجكت اللي كانت تشتغل عليه،،...وخلت الكمبيوتر والنت شغال وطلعت من الحجره...تتمشى وتيلس ويا قوم أمها...تيلس معاهم وترمس وهي أصلاً هب معاهم في عالم ثاني...


عالساعه 10 ونص،، أمل كانت منسدحه على سريرها وهي فاله شعرها ،، وكانت أمبنده الليت ومشغله ليت الأبجوره بس،، وكانت أونها أتذاكره وتقرا الكتاب،، بس هي كانت لاهيه بتفكيرها...

وتدخل عليها خوله،،

خوله: شو بترقدين من الحين؟:؟؟
أمل: هيه...
خوله: انزين بقولج..( وهي تلعب بصبوعها)
أمل: خير شو بتقولين.؟؟؟
خوله: تعرفين...يوم شفت اربيع عبدالله حسيت بشي...
أمل: هي قلتيلي..
خوله: بس ما قلتلج بشو حسيت...
أمل: يالله قوليلي...
خوله: بلاج...مالج نفس لشي...
أمل: ما شي خولوه راسي يعورني...يالله قولي...
خوله: يوم شفت اربيع عبدالله وقالي اسمه...
أمل: انزين...
خوله: يوم هو قالي اسمه كان مبتسم فحسيت بشي...
أمل: خولوه ترا بفرج بالكتاب قولي عااااد...
خوله: هههه...انزين انزين...
حسيت انه هو اللي طرشلي الورقه...
أمل: نعم؟؟؟
خوله: ما أدري هاللي حسيت به أنا ..
أمل: أشدخل اربيع عبود باللي طرشلج الورقه...
خوله: ما أدري...انا حسيت جيه...وبعدين صوته تقريباً نفس صوت هاكي يوم قالي تفضلي..
أمل: يمكن ...جايز...
خوله: أنتي شكلج مووول...منتهيه...مالج بارض ترمسين حتى...
أمل: صح...
خوله: ليش شو فيج...شي اخترب عليج وأنتي تسوين البروجكت..
أمل: لا لا...بس ابروحي ضايقه...
خوله: ضايقه من شوووه؟؟؟؟
أمل: بعدين بقولج راسي يعورني الحين...
خوله: اييب لج بندول؟؟
أمل: لا لا...برقد أنا الحين..
خوله: أوكي عيل...تصبحين على خير
أمل: وأنتي من هله...

( واتغطت أمل باللحاف و خوله راحت وصكرت الباب)


عبدالله كان توه راجع البيت وكان يرمس نهى عالتلفون وحاط الهدفونز وفي نفس الوقت كان يقفل باب الصاله ويبند الليتات،، خوله كانت طالعه من حجرة وفا،، ورايحه لين حجرتها..وسمعته يرمس في التلفون فوقفت عند الدري تتسمع...

عبدالله: ههههه...نهى تصدقين..
نهى: شوووه..
عبدالله: الله يعين أهلج عليج..
نهى: ليش...
عبدالله: ذبحتيني من الضحك...
نهى: ما عاش اللي يذبحك يا حبيبي..
عبدالله: فديت روحج أنا..وفديت قلبج..

خوله كانت تسمع رمسة عبدالله...وقالت في خاطرها: أويه...هذا أونه بيخطبوله شميس وهو يرمس البنات جذه...الله يعينج يا شميس....
وركضت تدخل حجرتها قبل ما يوصل عبدالله....


في هالوقت،،
علي كانت مسوي نفس حركة أمل،، كانت فاتح ليت الأبجوره ويقرا الجريده وهب ياينه نوم ،، من الحركه اللي سواها...
كان يفكر هل هو غلط يوم رمسها ولا لا...
وكان وايد متضايق ليش ان أمل ما ردت عليه...
وكان خايفه لا تعصب أمل وتخبر وفا أخته....


نش من على سريره وطلع علبة الجقاره من السده،،، وفتح الجامه مال البلكونه وتم يدخن برع،،،
وهو يفكر كيف يصلح غلطته،،،
عقب ما دخن صلب الجقاره،، رجع للحجره وفتح النت،،
فكر انه يطرشلها رسالة إعتذار ....

وكان كل ما يكتب جمله يرجع يمسحها،، كان متردد وايد،،

آخر شي كتب الرساله وطرشها حق أمل،،

وراح وانسدح على سريره وقراله كمن آيه ورقد،،


في صباح اليوم الثاني،،،

صباح السبت،، عالساعه 8 ونص،،

عبدالله في الدوام ووياه في القسم العنود وزلمات اثنينه عمرو وعبدالرحيم،،

ودخل عليهم الفراش يايبلهم التركش كوفي،،

عبدالله كان يالس يعدل أوراقه ويطلع الدباسه والخرامه والعده كله من السده ويطلع الختوم ،، ويفتح كمبيوتره ويحطه عالسيستم البنكي،،

والعنود عداله بعد ويالسه تمشي بعد الشيكات،،

عبدالله: العنود....قلمي الأزرق وين؟؟
العنود: دوره في السده أنا ما خذت شي،،
عبدالله: أدريبج انزين ما خذتي...بس أقول يمكن شفتيه ولا شي..
العنود: لا ما شفته،،

ويدخل عليهم عرض عبدالرحيم،،
عبدالرحيم: ومين هو ده اللي ما شفتيهوش..؟؟
عبدالله: هههههه...ما شافت عمرو..
العنود: لأ...
عمرو: أنا هوون..
عبدالله: هههههه..
العنود: شفتك...بس هو قصده القلم..
عبدالرحيم: الألم؟؟
العنود: هيييه...أففف...زين جيه خربطت السالفه..
عبدالله: هههههه...

بعد لحظات،، يلس عبدالله يشرب التركش كوفي ..وكان يقلب المسجات اللي عنده..
وفتح عالمسج اللي العنود كانت امطرشتله اياه يوم الخميس،،
" شـافـوك في عينـي وهــذا اعتــذاري وش حيلتي لا جيـت في عيني طيوف؟
طيــف عبرت وشال صوته قمـاري من رقتك سويت بالناس معروف"

عبدالله: العنود؟؟
العنود: نعم؟؟
عبدالله: اقريلي هالمسج
العنود: ليش انت ما تعرف تقرا..
عبدالله: لا أعرف ..بس ابغي اقريج اياه..خذي
( وايناولها تلفونه العنود خذت التلفون وشافت المسج وابتسمت وردت اتناوله الموبايل)
عبدالله: بلاج تضحكين؟؟
العنود ( وهي مبتسمه وتطبع عالكمبيوتر): ماشي..
عبدالله: انزين قريتيه..
العنود: هيه..
عبدالله: انزين ..شو معناته؟؟
العنود ( واتصد عليه واطالعه بنظره واترد اتكمل شغلها): مثل ما فهمت..
عبدالله: اتحبيني؟؟
( العنود ابتسمت وما ردت عليه)

عبدالرحيم: عبدالله عيب عليك هالحكي؟؟
عبدالله: انزين وأنا شو قلت الحين؟؟..ما قلت شي..
عبدالرحيم: لا لا..ما بيصير..
عبدالله: يا اخي كيفي مواطن ..وبسألها اللي ابغيه..
( العنود كانت ساكته ومبتسمه وتشتغل)
عبدالرحيم: مدام هي ساكته وما بتتكلم ...أنا ما يخصني..
عبدالله: ههههه...هي أصلاً تعودت عليه.وتدري اني اسولف..
صح العنود؟؟
العنود: صح...


عالساعه 11 إلا ربع كانت أمل طالعه من الإمتحان وسلمى تترياها في الهول،،
سلمى: هاااه.؟؟ بشري،،؟؟
أمل: الحمدلله...زين..
سلمى: بس شكلج ايقول انج بدعتي..
أمل: ههه...لا سلمى...بس انا ابروحي مضايقه اشوي..
سلمى: تعبانه ؟؟ فيج حمى ولا مزجمه؟؟
أمل: لا..خلينا ندخل اللاب
سلمى: يالله روحي احجزيلي وبيب اغراضي ..
أمل: انزين...
( واتروح أمل اللاب وتحجز مكان لها ولسلمى)

يلست أمل ،، وفتحت المسن ،، ما كان عندها حد أون لاين،، فصكرته على طول،، وفتحت ايميلها،،
اتفاجأة بوجود رساله من علي...

يا ترى شو كان مكتوب في الرساله؟؟؟

يتبع في الجزء الثاني عشر...