السلام عليكم ورحمة الله وبركاته

إجازه سعيدة للأطفال ....
جاء الصيف مبكرا كعادته دائما بالنسبه للطلاب دون المعلمين والمعلمات

فالكراف مكتوب مكتوب مكتوب ...وكل يوم عليهم محسوب محسوب محسوب ..

والحق بالراحه الصيفية مسلوب مسلوب مسلوب ....شو الحكمه يداومون شهر بدون طلاب ما أدري؟

المهم .... الصيف قرب والسفر حان طاريه ....بس كل شيء بوقته حلو وحلات السفر بشهر 7و8 أكيد

بس شهر 6 والناس إلي ما بتسافر هالسنه لانه سوق الأسهم مهدود محموم مزجوم مزقود:ice: !

عندي حل ...فلا تسير منيه ومناك ....عندك الريموت كنترول ...اكيد بتشوف العجب العجاب وانته يالس ببيتك

وأكيد بتفتك من صدعة الراس وحنة ام لعيال وخبال الشياطين لصغار .... عط كل واحد ريموت كنترول وبتفتك

أم لعيال أولا : حطلها جويل بالصراحه أحلى وقنوات سما دبي ما بتقصر فيها من أسرارها ولها !

يالله حبايبي الحلوين .... يمدحونها قناة art3 يقولون والقول للقائل المعني بالقول ...

بدأ بدأ ...عموه الله يخليج خليه ....كله ولا الجاسوسات ...حشا بتطلع روحكم ! حتى الأولاد يتابعونه غريبه!:kkk:

إلا بتابعه وياهم ! وتبدأ الحلقه مع ثلاث جاسوسات امفلعات أنيقات وللموضه العصريه مواكبات

يساعدن البشريه ما شاء الله عليهن ...الله يبارك فيهن ...لا لحظه غيرت رايي ! الله يخسكن من طفسات

شو هالسيناريو وشو هالحوار المعرب! صديقي ورفيقي! وعدة التحول شنطه لكل انواع الميكب أب الماركاتي:ttmasha:

خيبه ! حزن! شو يعلمون عيالنا هاذيل! والأهل لاهين ساهين ...يظنون إنهم يطالعون رسوم !:shock:

الله يرحمج يا هايدي وكلير ...صدق كنتن محترمات ويا بيتر

والله يذكرج بالخير يا فلونه محد بينساج ... والطيب عند ذكره صدق أمج وأبوج ربوج باستراليا

وعدنان ولينا ...علاقتهم كانت علاقه أخويه بحته ... وعبسي أخوهم الفقير غير الطياطير ما ياكل

ولوسي وميمي وسبانك الأبلم ... وبومبو وبن بن.... والله كنا بنعيم ...

حتى توم وجيري كان غير بس عقب القطوه البيضا اختربوا !

لالا لا مستحيل أخليكم اتابعون هالأشياااااااااااااااء ...التجسس مب زين فلا اتابعون الجاسوسات!

بنغير المحطه ... بحط لكم فلم حلو على mbc2 حلو مال اليهال
الله شكله رهيييييييييييييييييب والكل مندمج وانا وياهم .... وبعدين ! الحلو ما يكملشي !

لو تشوفون ويوهم بس والاحتجاج المرسوم على ويوههم .... زين ما شفتوهم ..عادي يفلعوني

شو أسوي والله كنا انتابع أفلام بس كلها مقطوعه .... يعني بالإضافه للرقابه الذاتيه كنا واثقين برقابة ربنا !

وينج يا إعلانات السعوديه ؟ كل ويوه الحريم ممنوعه بالإعلان !
حتى إعلانات الحين حرجاااااااااااااااااااااا اااااات :mar7aba:


يالله يالله ما عليه بنغير المحطه بدورلكم شيء حلو ! شو هذا ليش ما يحطون خالتي قماشه وإلا محظوظه ومبروكه وإلا إلى أبي وأمي مع التحية ...وإلا على قولة أميه حبابه وقصة جودر ! الأخيره ما لحقت عليها

المهم ... عيزت وأنا ادور وأفرر هالقنوات بالريموت ...كله أغاني وبرامج الواقع الدماري

أخيرا حصلنا شيء نتابعه ...بابا لنجه ! الله يخليك ويبجيك للأمه العربية الإسلاميه بدونك كنت بضيع

على الأقل اليهال حصلوا حد يسولف وياهم عالهواء مباشره ...أسلوبه جذبهم ...فيه شيء يشوفونه عالأقل!

والحين ...شو بحط ؟ إلا أسمع واحد منهم يطالب ببرنامجه المفضل !

الحين الحين full house حطيه بنشوفه ! هاه شو إنته اتشوف هالمسلسل الأمريكي البحت!

قول بعد اتابع برنامج بوب ساجيت أكثر اللقطات المضحكه بمشيها ..بس فل هاوس ! يالله بالستر

صبر صبر بحط لك شيء أحلى ! وينك يا برنامج افتح يا سمسم ! ويالدبدوب الحبوب ويا أمنيات والمناهل؟

الله برنامج حلو ...شو رايكم بمدينة المعلومات ! واااايد حلو ...اهدافه حلوه
شوهذا أنا ليش ناسيه قناة الشارجه ! والله محد بيفيدهم غيرها بالإجازه ..ليش بدوا يشردون اليهال؟


وأطالع هالجهاز المتروس من قنوات النايل سات والعرب سات ! وإلي شكلهم بيسمونه دمار سات

كيف نقدر نعلم عيالنا الصح من الغلط ! هل بنقدر انتابعهم وهم يشوفون هالبرامج ؟

حتى الرسوم صار دمار بأفكاره الغريبه الغربيه العبيطه ! الله يرحمك يا زمن المبادئ والقيم !

سؤالي ؟ هالرموت كنترول كيف يتعاملون وياه اليهال؟ تابعوهم وخبروني