:: أحبــــك ..عدد ما قالــوا العشاق كلمة أحبك ::

[حبوبه دبي]

مـاشالله عليــج



اسلــوبج بالســرد كشخــه

نتــرقب الجزء اليــاي ،،

متــابعيـــن

:daleel:

[بهجة الروح]

" الجزء الرابع"

ندى كانت رايحه المكتبه ويا شيخه والدريول مودنهن،، وما كانت تدري شو اللي ينتظرها من مصير اهناك...

يوسف اتصل بعيسى،،
عيسى: مرحبا الساع
يوسف: مرحبتين...اخويه البنيه اللي نباك تيب راسها بتسير المكتبه الحين
عيسى: انزين شو اسويلها
يوسف: اوووف....نبغيك تروح وتشوفها اهناك،،
عيسى : ياربي...الحين انا عند دوار الساعه...
يوسف: هاك الزين...هي بتروح مكتبه ورون...
عيسى: والله؟؟ قريبه عيل...بس كيف بعرفها...
يوسف: الدريول بييبهم وسيارتها رقمها ****
عيسى: خلاص انا الحين ببركن وبترياهم
يوسف: شوفها والباقي عليك..
عيسى : من عيوني الثنتين...بس هي ابروحها يايه؟؟؟...
يوسف: أظني أختها وياها...
عيسى: كيف بعرفها هي..؟؟
يوسف: هيه أكبر وما تظهر شعرها شرات شمه...وأختها صغيره..
عيسى: أوكيه ..أوكيه...

وببركن عيسى سيارته ويلست يتريا شويه وهو مطول على المسجل وحاط اغنيه عيضه أهمه...
وشويه وتوصل سيارة قوم ندى،، ويبركن الدريول عدال عيسى،،

عيسى شافهم،،
وشاف ندى وعرفها وشاف شيخه،،

ودخلن البنات المكتبه وشويه ونزل هو من السياره،،

نزل عيسى وتم يتمشى في المكتبه ويطالع ندى،،
وهو كان منبهر فيها ما كان متوقع انها بهالجمال،،
وتم وراها بس من بعيد يشوفها،، وعقب اتقرب منها وهي كانت صوب الملفات،،
وسلم عليها،،
عيسى ( بصوت واطي ) : السلام عليكم
ندى سمعته بس سوت عمرها ما تسمع شي،، وكانت زايغه،،
راح عنها ورد ورجع صوبها،،
عيسى ( بصوت واطي) : عبرونا انزين ،، صدوا صوبنا شوي،،

اهنيه ندى ماتت من الخوف،، ما صدت حتى صوبه ،،
حطت أغراضها عالكونتر وحاسبة وابسرعه سحبت شيخه وطلعوا،،

عيسى طلع وراهم،، ما كان يبغي يشتري شي،،
بس عيبته ندى،،
وركب سيارته الاستيشن،،
واتصل بيوسف،،
عيسى: هلاااا
يوسف: هاااه شو استوا...
عيسى: شو استوا؟؟ أنا رحت فيها؟؟
يوسف: شوووه؟؟
عيسى: البنيه وااااااايد حلووه...تاخذ العقل ،، ما توقعتها جيه،،
يوسف: انزين وشو سويت...
عيسى: ولا شي...ما قدرت اسوي شي
يوسف: وايد عليك
عيسى: يا خويه البنيه ما تعبر حد...
ييت صوبها وسلمت وما ردت عليه...وعقب رمستها جان تشرد
يوسف: هههههه
عيسى: شو اسوي الحين حبيتها من أول نظره
يوسف: ههههه...أنته كل ما تشوف وحده اتقول جيه..
عيسى: هيه صح وانت الصادق

في سيارة الدريول،،
ندى: قلبي يدق،،
شيخه: ليش شو سوا الريال...
ندى: اشدراني...أنتي اتشوفيني شكل وحده تبا حد يرقمها ؟؟ ولا وحده مال هالسوالف؟؟...
شيخه: لا حشى
ندى: يا عدالي وسلم...وطنشته،، وعقب رجع وقال عبرونا..اهنيه انا خفت عشان جيه قلتلج يالله بنروح
شيخه: مره ثانيه بنيب مطر ويانا...
ندى: هيه احسن



اليوم اللي بعده ،، عالساعه 10 ونص كانت شمه مخلصه من محاضرتها ،،
وكانت تتكلم ويا يوسف،،

شمه: اشحالك حبيبي؟؟؟
يوسف: الحمدلله ابخير دامج بخير...
شمه: انا بخير يوم اسمع حسك،،
يوسف: صعبه اختج ما بنقدر نيب راسها،،
شمه: أويه ،، عيل شو نسوي،،
أخاف تخبر عليه..
يوسف: خلها تخبر عليج...
شمه ( وهي مستغربه) : هااااااه؟؟؟
يوسف: ههههه...زغتي...
شمه: ليش تبغيها تخبر عليه عشان أروح فيها...
يوسف: برايه...انا بعد بروح فيها وياج...
شمه: هههه...تبا يذبحونك أهلي،،
يوسف: ابرايه..مب يبوني أتزوجج...أنا مستعد وجاهز
شمه: ههههه...
يوسف: عواس متخبل على أختج،،...
ما يعرف شو بيسوي...
شمه: وحليله...أظني راح فيها..
يوسف: أفاااا...حركات هو بعد...صبري لين ما أييب راسها،،
شوفي.... يوم هي بتكون عدالج طرشيلي مسج عسب عواس يبغي يطرشلها شي ...
شمه: أخاف عقب تخبر ابويه عليه...
يوسف: أويه...لا ما عليج انتي طرشيلي...
شمه: أوكيه...
انا الحين بصكر عنك لاني بروح اسوي البروجكت ويا البنات،،
يوسف: انزين برايج،، برمسج بعدين،،
شمه: باي
يوسف: باي



مرت الأيام ومايد ابد ما لاحت عن عينه صورة ندى،،، وكان يبغي ينتهز أي فرصه عشان يشوفها،،

في يوم من الأيام،،،

مايد كان طالع من بيتهم وطلع وراح عند مبارك أخوه في الشركه العصر،،

مايد ( وهو داخل مكتب أخوه) : السلام عليكم
مبارك: هلا هلا...وعليكم السلام...توه المكتب نور
مايد: منور بأهله،،،
مبارك: خير ابويه ما من شر،، اشوفك مسولنا زياره...
مايد: بس قلت من زمان ما ييت الشركه،، قلت أشوفكم وأظهر
مبارك: زين ييت والله يابك،،
مايد ( وهو مستانس) : خير...
مبارك: الخير بويهك...أبغيك تودي هالمناقصه حق عميه خله يوقع لي عليها وهاتها...
مايد: الحينه؟؟
مبارك: هيه الحين ودها وييبها...
مايد: ان شاء الله.. ما طلبت...
مبارك ( وهو مبتسم) : يالله توكل على الله...
مايد ( وهو مبتسم) : فمان الله...


وراح مايد لبيت عمه وكل همه انه يشوف ندى ويسلم عليها،،
يا ترى هل راح يشوف ندى ويملي ناظره من شوفتها ولا لا...؟؟؟


في بيت بوسعيد،،

ندى: ابويه فديت روحك،، أبغي حد يوديني بيت عميه ...عشان بذاكر ويا مريم..
بوسعيد: وليش ما تعرفين تذاكرين ابروحج..؟
ندى: أعرف ابويه بس هي بتشرحلي الدروس اللي كنت غايبه فيهن...
بوسعيد: هييييه...
ندى: وشويخ بتروح ويايه عشان من زمان ما شافت هدى،،
بوسعيد: انتوا عاطينهم خبر انكم بتونهم..
ندى: هيه ابويه...ومريم هي اللي لزمت عليه أييها...
بوسعيد: زين زين..توكلن على الله...
ندى ( وهي مبتسمه) : بس ابويه الدريول ساير بوظبي...
بوسعيد: هيييه صح...منو بيوديكن عيل..
ندى: فديتك يا بويه انته ما بتقصر،،
بوسعيد: وأرد اييبكم بعد...ارويلاتي يعورني يا اميه..
ندى: عيل نروح مشي..؟؟؟
بوسعيد: لا لا... بوديكم...


وفجأه يرن جرس البابـ،،

بوسعيد: انقفضن بروح أطالع من عند الباب وبسخن السياره...
ندى: ان شاء الله ابويه...

وراح بوسعيد يفتح الباب،،،

وراحت ندى تزقر شيخه ويتجهزن حق الطلعه،،

بوسعيد ( وهو يفتح الباب ) : هلا هلا بوسلطان...
مايد ( وهو مبتسم) : اهلين عميه...اشحالك..
بوسعيد: الحمدلله..يسرك الحال ،، يايبلي شي اشوفك،،
مايد: هيه هذي مناقصه مبارك يباك توقع عليها ...
بوسعيد: خير ان شاء الله...
تعال تعال ايلس ...
( وييلسون عالكراسي اللي فالحوي ...وقرا بوسعيد المناقصه و وقع عليها )
بوسعيد: وهذا التوقيع ...
مايد ( وهو مبتسم) : ما شاء الله تواقيع الشواب أحلى عن تواقيعنا...
بوسعيد: هههه...تشرب شي؟؟ جاي اقهوه ولا عصير؟؟
مايد: لا لا دام فضلك عميه...أنا هب غريب،،
بوسعيد: ابويه بتسوي فيه خير؟؟؟،،
مايد: خير عميه آمر،،
بوسعيد: بناتي يبن يسيرن عند خواتك،، والدريول محد فبوظبي،، وأنا رويلاتي يعورني...
مايد ( وهو مستانس ) : أنا بوديهم ولا تشيل هم،،
بوسعيد: أنته ودهن وفي الرده انا بييبهن...
مايد: لا تكلف على عمرك،، أنا بوديهن وبييبهن
بوسعيد: ترا هن شرات خواتك...هالله هالله فيهن
مايد: وأكثر عن خواتي بعد..
بوسعيد: فيك الخير يابويه...بقوم أزقرهن...

ودخل بوسعيد الصاله ولقى البنات جاهزات،،
بوسعيد : يالله بناتي...هذا مايد خاري بيوصلكن...
ندى ( وهي مستغربه وقلبها يدق من طرا ابوها مايد) : شووووه؟؟؟ منوه بيودينا؟؟
بوسعيد: بلاج بلاج زايغه؟؟ ولد عمج بيوصلكم في دربه...ما أروم أنا أسوق أريولي تعورني..
ندى: لا بويه استحي ..هب سايره،،
بوسعيد: وليش تستحين مايد هب غريب...يالله يالله الريال يترياكم،،
ندى: بس ابويه..
شيخه : يالله عادي خلنا نروح..
ندى ( وهي تتطالع شيخه) : شويخ؟؟
شيخه: صدق عادي ما بياكلنا هو
بوسعيد: يالله أنا بوصلكن لين الباب


مايد كان يترياهم عند باب البيت من داخل،،
وكان مستانس وقلبه يدق ،، وكان وده يشوف ندى،،،
وشويه ويشوف بوسعيد فاتح باب الصاله والبنات وراه،،

بوسعيد: ابويه هالله هالله فالبنات،،
مايد: ههههه...ان شاء الله...الا البيت هاذوه ما بوديهم صحم انا
بوسعيد ( وهو مبتسم) : مستحيات البنات

ندى كان ويهها محمر ومستحيه،،

واتجدمهم مايد وركب السياره ،،
وفتحت ندى باب السياره وركبت
ندى : السلام عليكم
مايد ( وهو يطالعها من المنظره) : وعليكم السلام
و ركبت ندى ورا مايد وشيخه عدالها عالجهه الثانيه،،
مايد: اشحالكم؟؟؟
( اهنيه شيخه اطالعت ندى )
ندى ( وهي مستحيه وموخيه) : الحمدلله...
مايد: ندى وعرفناج واللي وياج منوه؟؟
ندى ( وقلبها يدق ابسرعه لانه نطق باسمها) : وياي شيخه
مايد: والنعم عاشت الأسامي...اشحالج شيخه؟؟
شيخه: الحمدلله ابخير
مايد: عيل شمه ما يت وياكم؟؟؟
ندى: ما تبا تي
مايد: ليش زعلانه ؟؟
ندى: لا...بس عندها امتحان
مايد: هيييه...الله يوفقها
( هالحزه ندى انقهرت انه سأل عن شمه مع انه ما شافها ولا شي)
مايد: انتي ويا مريم في الجامعه؟
ندى: هيه
مايد: شو تدرسين؟؟
ندى ( وهي محمره) : أدرس إدراة أعمال
مايد: زين ما شاء الله...بس لو درستي هندسة حاسوب هب أحسن
ندى: هو أحسن بس صعب شويه..
مايد: حلاة الصعب ...أنا درست هندسة حاسوب...
ندى: زين...

وفي هالوقت وصل مايد عند باب بيتهم،،
مايد: أوصلكم لين داخل ولا ما يحتاي
ندى: لا مافي داعي
مايد: اسمحولنا عااد عالمغثه،،
ندى: لا عادي...
مايد ( وهو مبتسم) : لو عادي ما شفت الويوه محمره

وتوها ندى بتفتح الباب...
مايد: لأ...لحظه
ونزل مايد من السياره وراح وفتحلها الباب،،
وراح صوب شيخه وفتحلها الباب بعد

اهنه ندى كانت مستحيه واااااااااااايد...
وعقب ما فتحلهم الباب ..وقف عند باب بيتهم ،، يترياهم يدخلون...
وهو واقف مرت ندى صوبه وهي خاطفه صوبه،، كان مايد يطالعها،،
مايد: ندى؟؟

ووقفت ندى مكانها وشافته،،
تم هو يطالعها وهي تتطالعه وعقب وخت،،
مايد: تامرين بشي...
ندى ( وهي مستحيه) : ما يامر عليك عدو...

وراحت داخل ابسرعه كانت ميته خوف مستحى،،

ودخلن البنات بيت عمهن،،
بينما مايد،، كان شارد الفكر والعقل والروح،،وكل شي فيه يحس بندى،،

كانت ماخذه عقله،،
حس بهالشعور وحس انه يبغيها تكون له الحبيبه والعشيقه والصديقه والأخت والأم والزوجه وكل شي،،
وركب سيارته وهو هايم بهواها،،

وهي نفس الشي،، كانت تحبه حب جنوني

دخلن البنات بيت عمهن وسلمن على أم مبارك والبنات،،
وراحت ندى عند مريم،، بينما شيخه راحت عند هدى،،

في هالحزه،،،
ياسر اتصل بمايد،،
ياسر: مرحبا..
مايد: مرحبتين...هلا والله...
ياسر: أهلين أنته وين؟؟
مايد: أنا اهنه،،
ياسر: انزين حجزت تذاكر حق السينما،،
مايد: حجزت تذاكر؟؟
ياسر: هيه..
مايد: انزين انا ما ابغي اسير,,
ياسر: ميووودي حبيبي عشان خاطري،،
مايد: اوكيه اوكيه...
بس بودي أوراق الشركه وبمر عليك..
ياسر: لا أنا بيي بسيارتي...
مايد: شوووه؟؟؟ ليش بسيارتك؟؟ بتمر عليه؟؟
ياسر: لا لا ..انته تعال بسيارتك وانا بسيارتي..
مايد: ليش شو عندك؟؟
ياسر: ماشي ماشي...بس اتلاقا وياك اهناك..يوم بتخلص اتصل بي
مايد ( وهو مستغرب) : ان شاء الله...


وصكر عنه مايد وكمل دربه للشركه...

يا ترى شو اللي مخطط له ياسر؟؟؟
وشو اللي راح يصير بعدين؟؟؟

[بهجة الروح]

" الجزء الخامس"

تقريبا بعد نص ساعه ندى كانت في غرفة مريم ويالسه أتذاكر وياها ،،
مريم ( وهي مبتسمه) : وعيل جيه قلتي ،، مايد وصلكم ، هههه
ندى ( وهي مستحيه ومبتسمه) : بلاج تضحكين؟؟
مريم: بس أضحك على ميود...
ندى: أظني هو أكبر عنج ،، ما يستوي تزقرينه ميوود..
مريم: ههههههه...أطالعوا انتوا منو يالسه أدافع عنه...هههه
ندى: بس عاااد...خلينا نذاكر،،
مريم ( وهي مبتسمه ) : ان شاء الله بنذاكر بس عقب ما أعرف اللغز اللي ورا مايد...
كل يوم والثاني مار عليكم
ندى: ما في أي لغز،،
مريم: انتي اللغز بحد ذاته،،
ندى ( وهي مسويه عمرها ما تعرف شي) : أنا ؟؟ وأنا شو يخصني؟؟
مريم ( وهي تتطالعها وتغمزلها بعينها) : وأنا شو يخصني؟؟؟ أونه عاااد أنا ما أعرف شي،،
لا أميه ...ما في شي يخفي عليه أنا ،،
ندى: مريم...بس عاااد..خلينا أنذاكر...
مريم: هههه..استحت أونها...
تحبينه؟؟
ندى: مريم؟؟؟؟
مريم: خلاص خلاص..فهمت...تعديت حدودي وايد..
ندى: لا هب جيه...بس ليش هالإحراج،،
مريم: هههههه...يعني صح اللي فبالي,,,
ندى ( وهي تتطالع مريم وتبتسم ) : هيه صح ..ارتحتي...
مريم: هههههه...الحين ارتحت،،
والحين بنذاكر...



في هاللحظه مايد وصل عند سينما الماسه ودخل يدور ياسر،،
شافه من بعيد مدخل بنتين صالة العرض،،
وقال في خاطره: هذا شو مسوي؟؟

ياسر دخل البنات وشاف مايد...
ياسر: هلا مايد...
مايد: أنته شو مسوي...
ياسر ( وهو يضحك ) : ما سويت شي،،
مايد: لا والله ...ومنوه هالبنات اللي دخليتهن؟؟
ياسر ( وهو مبتسم) : هذيلا اللي رقمتهن أمسات ،،
مايد : لا والله؟؟ وتباني أدخل وياك؟؟
ياسر: انزين ما فيها شي،،
مايد: لا انا بروح...
ياسر: ما يستوي عاد..أنا أبا ايلس ويا البنيه والثانيه بتم ابروحها عرض جيه...ما يستوي،،
مايد: لا والله وتباني أنا أسلي الثانيه...
ياسر: بوسلطان فديتك ،، لا تردني....
مايد: ما عندي مشكله،، بس هاي أول مره وآخر مره أسويها...فاهم،،
ياسر: انزين ..انزين...

ودشوا مايد وياسر
وطبعاً البنتين ما كانن يالسات عدال بعض،،
مهره كانت على جهة اليسار والكرسي اللي عدالها بييلس عليه ياسر،،
والثانيه خلود يالسه على جهة اليمين وعدالها بييلس مايد...

مايد وياسر وهو داشين صالة العرض،،
مايد: أنا بيلس ورا...
ياسر: ههه...وحليلها خلود منو بييلس عدالها..
مايد ( وهو يطالعه ومبتسم ) : وانا لازم أيلس عدالها ...
ياسر: هيه فيك الخير..
مايد: وين بشوف الخير دام انته اربيعي...
ياسر: هههه..ويا ويهك،،

وراح ياسر ويلس عدال مهره،،
أما مايد راح صوب خلود ،، وخلى كرسي بينه وبينها،،
وخلود ميته من الضحك،،
مايد: السلام عليكم،،
خلود ( وهي تتطالعه ومبتسمه) : وعليكم السلام،،

ويلس مايد عالكرسي،،
وحط ريل على ريل،،
وكان يرمس خلود وهو يشوف جدامه،، ويطالعها من طرف عينه...
خلود: احمممم
مايد: تتحنحنين...يعني ..عبرونا...
خلود: هههه...
مايد: اشحالج؟؟
خلود: تمام..وأنت اشحالك؟؟
مايد( وهو يطالع ساعته) : الحمدلله عايشين،،
أوووف شو ها يسور مدخلنا قبل العرض،،
خلود: عشان يسولف ويا مهره...
مايد: هييييه...مهره..أختج؟؟
خلود: هيه...

خلود ( وهي تضحك) : ليش يالس جيه وترمسني؟؟ مب عايبتنك؟؟
مايد: وانا اشلي تعيبيني ولا لا...
خلود: أفااا...
تدري..انا ما كنت أبغي أيي ويا مهره...بس يوم عرفت أنك بتي أتشجعت..وقلت بيي اشوفك،،
مايد: تدرين؟؟
خلود: هلا...
مايد: أنا لو كنت أدري انكم اهنيه ..جان ما ييت...
خلود: ههه..بسألك ،، أنت ليش جيه خقاق وايد...صدق وايد تقهر
مايد ( وهو مبتسم) : كلهم يقولون عني خقاق بس أنا هب خقاق ولا شي،،
خلود: منو كلهم؟؟؟
مايد ( يبغي يقهرها) : كل البنات..
خلود: أنته تعرف حد...
مايد: وااااايد...
خلود: ههههه...ما ظني..
مايد: لا تظنين ...عادي..المهم اني مرتاح..
خلود: انزين صد اشويه صوبي...ولا حرام أشوف ويهك كامل،، مخلني أشوف نص،،
مايد ( وهو صاد صوبها) : لا هب حرام
خلود: هيه جيه...

...لحظه صمت...
خلود: تصدق...أنت أجمل أنسان شفته في هالوجود...
مايد: تسلمين ..كلج ذوووق...
خلود: أحس اني ما لي حظ وياك،،
مايد: هههه...ليش شو تبين فيني...
خلود: أبغيك كلك...كلك على بعضك حلووو...
مايد: أوكي ما عندي خلاف...بس هاتيلي المهر والسياره واشتريلي فله...
خلود: ههههه

وشويه وبدا العرض،،
وقبل ما يخلص الفلم ،،
خلود سحبت تلفون مايد،،
مايد: شو تسوين؟؟
خلود: بشوف الفضايح...
ودقت على تلفونها رنه وعطته التلفون...
مايد: تسرقين رقمي؟؟
خلود: ههه...لا بس أحفظ رقمك في موبايلي...

وعقب خلص الفلم ،، وكل واحد منهم راح في طريجه،،

عالساعه 11 ونص فليل ،،
ندى كانت منسدحه على سريرها وهي فاله الشعر،،
قرتلها كم آيه قرآن وأدعت ببعض الأدعيه...وعقب تمت أتفكر بمايد وتدعيله بالخير،،
ورقدت وهي تفكر باللي سلبها العقل والروح،،


اليوم اللي بعده عالساعه 2 ونص الظهر،،

عيسى كان رايح أييب خواته من الجامعه ومن جهه ثانيه رايح يشوف البنات،،
وكان واصل قبل الوقت بربع ساعه وموقف عالطرف،،
وهو يشوف البنات،،
شاف سيارة قوم ندى،، يت ووقفت جدامه،، فز قلبه وحسن انه ندى راح تمر جدامه الحين،،
شويه ويدخلن خواته السياره،،
آمنه: السلام عليكم
عيسى: وعليكم السلام

وركبت أخته السياره وهو سارح يتريا ندى تمر صوبه...شويه وتنزل ندى من عالدري وتخطف جدامه وتركب سيارتهم ،،
وهو يطالعها وقلبه يدق ابسرعه،،

آمنه: أيه عواااس...بلاك سرحان في البنيه...
عيسى: ما شاء الله عليها...
آمنه: هيه ما شاء الله وايد حلووه...قمر
عيسى: عسل..
آمنه: بس عاااد خلنا نروح،،

وحرك عيسى السياره وجدامه سيارة قوم ندى،،
قوم ندى كانوا رايحين في نفس الدرب،،فما كان من عيسى الا انه يتبع سيارتهم،،

عيسى: تعرفين هالبنيه...
آمنه: ما أعرفها عدل،،
بس أظني أسمها ندى،،
خلوقه ما شاء الله عليها وهاديه ومؤدبه،،
عيسى: ما شاء الله عليها،،
آمنه: بلاك سرحان فيها،،
جنه اول مره تشوف في حياتك ابنيه...
عيسى: لا مب جيه...صح اني شفت وايدات،، بس أحس انها غير...
آمنه: مب بس انته ...اللي فالجامعه ...
عيسى( وهو مستغرب) : منو اللي فالجامعه؟؟
آمنه: البنات قصدي...تعيبهم ندى
عيسى: هييييه...


وفكر عيسى بطريقه يوصل فيها لندى،، ماشي غير عن طريق الإيميل....
لانه ان اتصل فيها ما بترد ،، وان طرشلها مسج يمكن تخبر أبوها عليه،،
فماشي غير انه ايييب ايميلها ،،


اليوم الثاني،،،

شمه كانت تسولف ويا يوسف،،،
شمه: اشحالك يوسف؟؟
يوسف: غريبه ما قلتيلي اشحالك حبيبي؟؟
شمه: بس مضايقه شوي،،
يوسف: أفاا ما من شر،، شوفيج حبيبي،،
شمه: ما فيني شي،، بس هب حاله اللي أنا وانت فيها،،
يوسف: ما فهمت،،
شمه: لين متى بنتم نتكلم بالدس واحنا خايفين
يوسف: لين ما ربج يفرجها،،
شمه: وأنت هب ناوي تخطبني...

يوسف: هيه ناوي،، بس صبري لين ما أضبط أموري،،
شمه: ومتى بضبط أمورك،،
أنت تحبني وأنا أحبك،، فليش التأخير،، الحين لو حد يتقدملي ..شو بسوي...
يوسف: شمه حبيبتي...اللي الله كاتبنه بيصير..ومحد بياخذ غير نصيبه في هالدنيا وجان لي وياج نصيب باخذج..لا تحاتين...
شمه: أوووف...مليت أنا،،
يوسف: شمامي ..تتأففين مني..وأنا حبيبج...
شمه: لا أنا أتأفف من نفسي ومن الوقت...
متى يمر الوقت وأشوف عمري وياك في مكان واحد،،
يوسف: لا تحاتين حبيبي كل شي بوقته حلووو...

( لاحظوا ان يوسف كان يهديها ويصبرها ،، لانه اصلا هب مفكر ياخذها...مجرد يسلي نفسه بهالحب)

يوسف: شميم حبيبي...عواس يبغي ايميل أختج...
شمه: ايميلها ليش؟؟
يوسف: ايقول لوازم المهمه...
شمه: هههه...
يوسف: فديت هالضحكه...عسى الله لا يحرمني منها،،
شمه: بس هي ما تدخل المسن وايد..
يوسف: هب مشكله...انتي يوم بتشوفينها داخله النت..عطيني خبر وبخليه يدش...
شمه: أوكيك...( وعطته ايميل ندى)


عالساعه 5 ونص العصر،،،

ندى خذت اللاب توب من الحجره وراحت حجره شيخه وفطيم،،
ويلست اهناك وفتحت النت اهناك،،
في هاللحظه شمه حست ان ندى راح تفتح النت،، فطرشت حق يوسف مسج انها راح تدخل،،

وندى من فتره ما فتحت مسنجرها،،
ويوم فتحت المسن لقت إضافه،،
( أحبك حب ما له حدود أنت حياتي والغلا كله وأنت منبعي وذاتي )
استغربت ندى يوم شافت الإضافه،،
سوت اكسبت،، وقالت بشوف من ضايفني...
بعد 5 دقايق تقريباً،،

تم تسجيل دخول
" أحبك حب ما له حدود أنت حياتي
والغلا كله وأنت منبعي وذاتي"

قالت في خاطرها: خلني اشوف منوه هاي؟؟؟

انتظروني فالجزء السادس

[حلم الطفوله]

متابعين متابعين متابعين

بهوجه مشكوره عالجزئين ...إنتي كريمه ونحن نستاهل:ttmasha: