:: أحبــــك ..عدد ما قالــوا العشاق كلمة أحبك ::

[حبوبه دبي]

وانــا بعد مــابقــراهــااا لــين مـاتنــزلينهـم انتــي



يالله نتــريــاج

[شوق الصحارى]

حتى انا اتريا...

[الاسطوري]

نحن فالانتظار وخلاص قررت أدفع الدرهمين
عشان ماتشلين فخاطرج
على حد

[بهجة الروح]

" الجزء الثامـــن "

شافت شمه موبايلها وعرفت ان الرقم رقم عيسى ...ترددت قبل ترد عليه ولا لا
وعقب ردت عليه...
شمه: ألوووو
عيسى: هلا شمه...
شمه: خير شو بغيت؟؟
عيسى: شمه أنا نفذت اللي أنتي ويوسف اتفقتوا عليه...
شمه: وياليتنا ما أتفقنا على شي...

( اهنيه ندى كانت تسمع شمه وهي ترمس)

عيسى: هيه ياليتكم...لانكم ورطتوني...
شمه: ما ورطت حد أنا...
عيسى: شمه أنا ما يخصني باللي بينج وبين يوسف،، أنا عرفت ندى وحبيتها وأعترفت لها اليوم
اني أحبها واني ولد مب بنيه مثل ما كانت تدري...
شمه: أوووف...
عيسى: لا تتأففين والله انتي مب حاسه بشي...
شمه: أنا أصلاً ما أصدقك،، اقرب الناس لي صدقته ووثقت فيه وخدعني...
تبغيني أصدقك أنت أكبر مغازلجي...روح لاااه...
عيسى: شمه...
شمه: أنته شو تبغي الحين؟؟
عيسى: ما أبغي شي والله...بس بغيت أخطب ندى...
شمه: حبيبي ندى مخطوبه لولد عمها
عيسى( انصعق عيسى يوم سمع هالخبر) :.......
( وما قدر يقول شي)
وصكرت شمه في ويهه....


عيسى كان همه يكون ويا ندى لانه تعلق فيها وايد...كان يفكر لو عنده شي عشان يخطبها انه يروح ويرمس ولد عمها ويقوله عن كل شي ويقوله انه يباها،، بس ياليت لو ندى كانت تبغيه....


وعدت ليالي العنا والعذاب والتعب على خيــــــــــر،،

واتجدد اللقـــاء يوم الأثنين...

يوم الأثنين العصر عالساعه تقريباً 6 إلا ربع ،، أبو سعيد اللي هو أبو شمه وندى كان رايح شيشة البترول اللي عالشارع عشان يصب بترول،،
وهو يبركن السياره عسب يفولها ،، شاف سيارة الدريول عند السوبرماركت،،
استغرب قال يمكن حد من البنات ،،
وقف سيارته ورمس الهندي عشان يصب فيها بترول ونزل وراح داخل السوبر ماركت،،
ويوم وصل انصدم من اللي شافه ،،
تعرفون شو شاف،،
شاف شمه يالسه ترمس وتضحك ويا واحد وهو ماسك ايدها ،،
اعتسف ابو سعيد يوم شاف هالموقف ،،
وما وعى الا انه راح عند شمه وقبضها من جتفها و قال: شمووووه؟؟؟
وصفعها كف على ويها..
والريال اللي كان وياها شرد وابو سعيد سحبها وركبها سيارته ...
بوسعيد: صدق انج ما تستحين...يلعن اليوم اللي يبتج فيه؟؟
لو لا خوفي من الله جان نحرتج وقطعتج اقطع وفريتج للجلاب...

وتم يتحرطم وشمه كانت اتصيح وخايف،،

في بيت بوسعيد،،
ندى كانت ويا امها في الحوي ،، وكانت امها تسقي الزرع واتشوف اللي زارعينه وندى كانت وياها
ام مطر: مطر طلع ويا ربعه؟؟
ندى: هيه من أذان العصر هو طالع..
بس الا حموود رقد عالغنفه وهو يشوف سبيس تون
أم مطر: هيه فديته بقوم أوعيه عن يسهرني فليل...

شويه ويسمعون زعيج بو سعيد ويشوفونه وهو داخل من باب الحوي وساحب شمه وياه من كشتها ،،
ام مطر( وهي حاطه ايدها على صدرها وقلبها يدق) : بسم الله بلاهم
ندى كانت تتطالع ابوها وشمه وهي خايفه ...

ام مطر( وهي تربع عند بوسعيد) : ليش شو مستوي ؟؟؟ وبلاها شمه اتصيح؟؟
بوسعيد: بلاها اتصيح؟؟ سأليها ،،
( وهو يتناول الحبل من عند الباب)
أم مطر: بوسعيد...صل عالنبي...
بوسعيد: خليني انتي بعد ...ولا والله لضربج وياها...
( وياخذ بوسعيد الحبل وتم يضرب ويضرب ويضرب في شمه وهي تصيح ..ندى ما اتحملت الموقف ويلست اتصيح ...بعدها بلحظات هدا بوسعيد ويلس عالدجه وهو يناهي...)
بوسعيد : أعوذ بالله من الشيطان الرجيم...حسبي الله ونعم الوكيل عليج يا شموووه...حسبي الله عليج
( ندى كانت عداله واتصيح )
بوسعيد: أبا أعرف انتي بعد شو يصيحج...خبريني...
( حزتها شمه كانت طايحه عالارض وهي اتصيح ...وشويه ويت عند ابوها وهي تصيح)
شمه ( وهي تصيح ويالسه عند اريول ابوها) : ابويه انا آسفه..
بوسعيد: خوزي عني ولا لرفسج بريولي...
ولا تقوليلي ابويه..
ما يشرفني اكون ابوج..
ام مطر: بو سعيد...هد أعصابك وكل شي ينحل بالتفاهم والبنت اشوفها نالت جزاها وأكثر...
بوسعيد ( وهو يطالع ام مطر) : ليش انتي تدرين شو هي مسويه؟؟؟
ام مطر: حشى عليه ما ادريبها...
بوسعيد: اونها مترخصه العصر بتروح عند اربيعتها،، حصلتها في شيشة البترول ويا واحد وقابض ايدها وتضحك وياه...
شمه ( وهي اتصيح ) : ابويه ما بكررها بس ترضى عليه..والله ما اعيدها ..اتوبه
بوسعيد: جب ولا كلمه ولا تقولين ابويه على اللسانج مره ثانيه...
قومي دخلي حجرتج ولا تخليني اشوفج...
شمه( وهي تصيح واتناشق) : ابويه ما بروح الا يوم بتسامحني...
بوسعيد: خوزي خوزي بنتج عني ولا والله لتشوف شي ما شافته...
أم مطر: شمه روحي غرفتج ...ندى روحي وياها...
بوسعيد: لااااا...ندى ما تروح وياها ومن اليوم تاخذين اغراضج من حجرتها وترقدين ويا خواتج...
شمه ( وهي اتصيح) : ابويه ابوس ريلك...
بوسعيد: لا حول ولا قوة الا بالله...
أم مطر: شمه شمه ...قومي دخلي وياي...

وخذت أم مطر شمه ودخلتها الحجره...
شمه كانت منهاره من كثر الضرب...وكانت اتصيح ...
حتى ياها هبوط وداخت ،،،
وعصورولها عصير ليمون ،،

وتمت هاليومين شمه تعبانه من كثر الضرب اللي ضربها ابوها ومن كثر التفكير،، كانت متحسفه على كل لحظه مرت بحياتها...وكانت ندمانه على كل شي ..كان همها الوحيد ان ابوها يرضى عليها..ما كانت تاكل شي الا بالغصب...
وأبوها كان يتجنب ايشوفها بأي حال من الأحوال،،
ما كان يداني يسمع باسمها ...وشمه ما راحت الكليةهاليومين وغابت يوم الثلاثاء والاربعاء...

الأربعاء فليل وقت صلاة العشا،،
صلى بوسعيد في المسيد وكان قلبه ناغزنه على بنته اللي من يومين ما طاح بطنها شي غير الشربـ،،
فصلى العشى ورجع البيت،،

ورجع البيت وعلى طول راح على غرفة شمه ،،
ولقى شمه اتصلي فرجع ويلس في الصاله ،،
يلس شويه وبعدين رجع ودخل غرفة شمه ،،
ودخل وانصدم من اللي شافه شاف شمه وهي لابسه اوقاية الصلاه وطايحه عالأرض،،
وركض صوبها ...
بوسعيد ( وهو يزاعج ) : شمه ...شمه...
( بس شمه ما ترد)
وتم بو سعيد يزاعج ويزقر ام مطر والبنات ،، وهو يتحسسها ،،
حس بنبض في عروقها،،
حس ان الروح ردت له ودمعت عينه...
حس في لحظه انه راح يخسر شمه....

وكلهم اتجمعوا عنده
،،
ام مطر: بسم الله بلاها بنتيه...
بوسعيد: اشوفها طايحه اللحقي عليه...

وشلوا شمه وودوها المستشفى،،،
وطلع عندها هبوط و فقر دم،،
ونوموها عندهم،،

في غرفة شمه في المستشفى،،
أم مطر كانت موجوده ،،
وأبو سعيد..وندى،،

أم مطر: انتوا روحوا الحين وأنا ببات وياها؟؟
بوسعيد: خير ان شاء الله...
ندى: ببات وياج اميه...
أم مطر: لا انتي روحي ..اخوانج في البيت..
ندى : ان شاء الله...

وباتت هالليله شمه في المستشفى على اساس باجر الصبح يظهرونها ،،
وتمت وياها أم مطر،،

في نفس هاليوم ،،

مايد كان يتمشى بسيارته عالبحر ،، وشاف سيارة اربيعه اللي من زمان ما شافه ...
وبركن وراها ،، عسب يروح يشوفه...

ونزل مايد من سيارته وراح صوب استيشن اربيعه ،،
ولقى اربيعه سرحان وهو يسمع المسجل ويدق عليه الجامه ،

تعرفون من هو اربيعه اللي ما شافه من زمان...
عيسى اللي حب ندى...

عيسى: هلااااا...بوسلطان...أنته وين من زمان..
مايد: انت اللي وينك ما تنشاف ...حتى ما قمت تتصل..

وينزل عيسى من سيارته ويوقف ويا مايد عالكورنيش...
عيسى : خبرني عن أحوالك وين دنياك وشو تسوي...
مايد: ماشي...اشتغل الحين عقب ما درسنا في الامريكيه...
وأنته شو بعدك في الجيش..
عيسى: لا لا .. من زمان أنا ظاهر من الجيش...
مايد: أفااا...ليش ...
عيسى: من زمان امودرنهم تقريبا يمكن من 98 ...
مايد: أوووف... يعني من دخلت انا الجامعه
عيسى: تقريبا...
مايد: وما اشتغلت مكان ثاني...؟؟
عيسى: امبلى اشتغلت بس كل ما اشتغل مكان اظهر عنهم ما ارتاح لين ما استويت بطالي ..
مايد: الله يهديك انته لو كملت الدراسه ويانا جان ابرك...
عيسى: شو اسوي هذا نصيبنا...

(و تم مايد يسولف وياه ويرمسون عن قبل وسوالفهم وشطانتهم ورجعوا الذكريات الأوليه..مايد قبل كان يتشاوف ويا عيسى بس من بعيد لين بعيد,,, مجرد سلام)

مايد: عواااس؟؟ أشوفك والله انك؟؟
عيسى ( وتنهيده من الخاطر) : آاااااااه...
مايد: أفاا...هاي الآه من وين طالعه وأكيد شي وراها..
عيسى : وراها حب سرمدي..
مايد: ههههه...بعدكم على سوالفكم...أنا ودرت هالسوالف,,
عيسى: مب سوالف يا مايد ..صدقني مب سوالف...
والله العظيم اني أحبها...وأحب أخلاقها...
بنت مؤدبه حشيمه وستير...بس صدمتها وانصدمت ابروحي بعدين..
مايد: اذا ما عندك مانع خبرني بكل شي..
عيسى: بخبرك...أنا أول شي ييت اني بلعب عليها لانه محد قدر يلعب بعقلها قلت انا اللي بييب راسها..
وبعدين حاولت وياها وما قدرت ..وشفتها وصرت كل يوم اشوفها وانا اوصل خواتي الكليه..
وعقب حصلت ايميلها وقمت ارمسها على اساس اني بنت مب ولد
مايد: والله.؟؟؟
عيسى: هيه والله...وأنا الي خربت على عمري من خوفي عليها اعترفت بحبي لها وعقب خبرتها اني ولد..
فحذفتني من ايميلها...
حاولت اكلمها بعدين بس عقب عرفت انها مخطوبه لولد عمها...
والله محتار مب عارف شو اسوي...
مايد: انساها يا عيسى ولا تعور قلبك...صدقني لا تتضايق..
عيسى: مايد يمكن انته مب حاس باللي انا حاس فيه ...أنا أحبها وأبغيها...
بموت ان شفتها مع واحد غيري
مايد: عيسى هب كل شي نبغيه نحصله..
عيسى: أدري..
مايد: ودر عنك هالكآبه...ولا تشيل هم
عيسى: الله يعين...

عيسى فضفض عن اللي بخاطر لمايد وما كان يدري ان مايد هو اللي خاطب ندى وهو ولد عمها
شوفوا الصدف شقايل؟؟

وعدت هالليله على خير ،،


ندى كانت راقده على سريرها وهي تدعي لشمه وتدعي لحبيب قلبها مايد

اليوم اللي بعده ،، اللي هو يوم الخميس يوم زفاف موزه بنت عم ندى...

ندى وأبوها وشيخه ...
كانوا في المستشفى عند شمه وأمها ،،
شمه أول ما شافت ابوها استانست وايد ونشت من سريرها ولوت عليه وباسته،،
شمه : ابويه خلاص انا خذت درس وتبت واللي تبغيني اسويه بسويه بس عشان ترضى عليه...
بوسعيد: الله يهديج يا بنتي...
أم مطر: بوسعيد...نحن زاهبين
بوسعيد: الدكتور عطاكم أذن الخروج...
أم مطر: هيه عطانا...
بوسعيد: شمه تحسين انج بخير..
شمه: هيه ابويه,, أنا بخير يوم شفتك..
بوسعيد: يالله عيل أللبسي عباتج...


وطلعوا شمه من المستشفى ،،

[بهجة الروح]

" الجزء التاسع والأخير"


عالساعه 1 ونص الظهر في بيت بومبارك،،
مايد: ايه مويز انتي متى بتسيرين الفندق؟؟
موزه: شويه وبنروح...
مايد: يالله زهبي شنطتج..
موزه: شنطتي زاهبه...
مايد: مستعيله اشوفج...مستعيله على عبود
موزه: لو سمحت اسمه عبدالله هب عبود
مايد: ههه..عن تاكلينا...
موزه: مريوم وين؟؟
مايد: شو تبيبا؟؟
موزه: ترا بتروح وياي؟؟
مايد: ومنوه بعد ؟؟( يقول في خاطره يمكن ندى بتروح وياهم)
موزه: هدى ...
مايد: هييييه...
موزه: لا يا حبيبي محد من اللي فبالك بيي...
مايد: ههههه...
موزه: ما أدري بنات خالوه أي صالون بيروحون...
مايد: منوه؟؟
موزه: قوم فواغي بعد منوه
مايد: ما أدريبهم

في نفس اللحظه في بيت بوسعيد،،
بوسعيد: بتسيرون عرس موزه
أم مطر: هيه يالغالي ما يستوي ما نسير..
بوسعيد: زين خذوا شمه وياكم ..ظهروها خلوها تغير جو..
( شمه كانت يالسه عدالهم)
شمه: لا يا بويه ما فيه شده اروح وياهم
بوسعيد: عشان خاطري انزين...
شمه ( وهي تتطالع ابوها ومبتسمه) : عشان خاطرك بسوي أي شي...
بوسعيد: تبوني اوديكم الصالون بوديكم...
شمه( وهي تتطالع ندى) : ما في داعي ابوي..
ندى: لا انا ابا اروح الصالون ..عالاقل بلفلف شعري
بوسعيد: متى تبون اتسيرون...
ندى: من الحين ابويه ..عن تستوي زحمه عقب،،
بوسعيد: زين انقفضن وبوديكن
ندى: ان شاء الله

وراحن البنات الصالون وبوسعيد وداهن ،،

عالساعه 7 موزه كانت في الفندق ويا خواتها ومال الصالون وياهن ...
ويالسين يعدلون العروس...
موزه: مريووم...خايفه...
مريم: انتي الحين لا ترمسين خليها تحط لج المكياج..
موزه: قلبي يدق...
مريم: لازم من لهفة الشوق..
موزه: سيري لاااه...
مريم: هالكثر عبود مسوي فيج...الله يعينج...
موزه ( وهي مبتسمه ) : لا تقولين عبود..
مريم: ههههه...
أونه فواغي بتي اشوفها ما يت...
موزه: بعده وقت..
مريم: هيه بس هي بتيني اهنيه..
موزه: أيوه...وبنات عمي ما بيون..
مريم: ندوي عالساعه 6 اتصلت فيها وكانت في الصالون...

في الجهه الثانيه ،،
في بيت أهل عيسى،،
عيسى كان يالس في الصاله ويا ابوه ،، ودار في باله فكرة السفر والدراسه برع ...عاساس ينسى حبه أو بالأحرى يتناساه...
عيسى: ابويه؟؟
ابو يوسف: خير يا عيسى...
عيسى: أبغي أكمل دراستي برع...
ابويوسف ( وهو مستغرب) : شووووه.؟؟
عيسى: أفكر اني أدرس برع...
ابويوسف: وليش تدرس برع ...اشكثر الجامعات اهنه..
عيسى: لا يا بويه..ما ابغي اهنيه...
ابو يوسف: على راحتك...بس؟؟
عيسى: بدون بس ابويه ابغي اتغرب وانسى همومي اللي اهنيه
ابويوسف: همومك؟؟ أي هموم يا بويه...أنا أبوك وبحل لك أي مشكله انت خبرني بس..
عيسى: ما في داعي يا بويه...
ابو يوسف: اللي يريحك...أنا بشوفلك حد عسب يظهر لك بعثه ...
عيسى ( وهو مبتسم ) : الله يخليك لي يا بويه...


فكر عيسى يتغرب ويبتعد عن بلاده عشان يرجع وهو ناسي كل همومه،،
بس يا ترا هل الغربه قادره انها تنسي وهل هو بالفعل راح يتحمل البعد ويدرس برع؟؟

عالساعه 8 ،، اتصل مريم بندى،،
مريم: ندوي انتي وينج من الصبح اترياج؟؟
ندى: شو اسوي تأخرنا في الصالون،، الحين رايحين البيت وبناخذ قوم اميه وبنيكم..
مريم: انزين اول ما توصلين الفندق دقيلي...
ندى: ان شاء الله....

وبندت مريم عند ندى،،
موزه: مريوووم...
مريم: هاااه؟؟
موزه: حد يدق الباب روحي شوفي منوه؟
مريم: انزين...

وراح مريم تفتح الباب والا بنات خالها يايات...
مريم: هلا هلا...اشحالكم
فواغي: أهلين مريومه ،، الحمدلله

ويلست تتوايه ويا بنات خالها فواغي ونوره وغريسه،،
فواغي: وينها وينها العروس ،، ( وهي تتمشى في الجناح رايحه صوب غرفة موزه)
مريم: هيه يعدلونها في الحجره ،،

ودخلتهن مريم على موزه،،
ويلسن يسولفن وياهن ،،

في الجهه الثانيـــه ،،

مايد كان في بيتهم ويتريا امه وخواته يخلصن عشان يوديهم الفندق
مايد: ما خلصتوا..
أم مبارك: وانته بلاك مستعيل،، بعدني ما أدخنت ولا شي،،
مايد: يا اميه تراكم بتشلون المدخن والعود...
أم مبارك: هيه حق الناس ولا تباني ادخن جدام الناس...
مايد: يالله انزين خلصوا ( وهو يالس يعدل سفرته)

شويه وركبوا في السياره وراحوا،،

عالساعه 8 ونص وصلتوا قوم ندى الفنـــدق ،،
ودخلوا القاعه ،،
وكانت القاعه في أحلى ما يكون ،،، الكوشه غاويه ولا حد سوا شراتها قبل والكراسي والطاولات عليهن شراشف ذهبيه...كل شي كان مسواي على تصميم ملكي...

ويلسوا قوم ندى عالطاوله اللي صوب الكوشه بعد ما سلموا على أهل المعرس ،، لانهم أهل موزه بعدهم ما وصلوا...
وشويه ويدخلون أم مبارك وهدى والخدامات ...
شمه: أكم قوم خالوه وصلوا
أم مطر: هيه اشوفهم...
ندى: قوموا نسلم عليهم...

وراحوا يسلمون عليهم...
وبعد ما سلموا عليهم...
اتصلت ندى بمريم،،،
ندى: ألووو
مريم: هلا توه الناس,,,
يايه من وقت..
ندى: انزين صح ...محد فيها القاعه..
مريم: ويا ويهج انا اترياج من العصر..
المهم طلعيلي فوق...
ندى: انزين ما اندل...
مريم: أوكي اوكي...انتي روحي عند أخر الممر..وأنا بيي اهناك لاني ما ابغي اروح القاعه من الحين..
لا تخافين الطريج كل مأمن ماشي رياييل...
ندى: أوكي عيل...أشوفج

وراحت ندى تمشي صوب الممر..

ومريم كانت بتطلع من الغرفه ،، وتوها فاتحه الباب ولا تشوف مايد في ويهها وزاغت،،
مريم : بسم الله..
مايد: بلاج أنتي ؟؟
مريم: زيغتني اتحسبتك ريال
مايد: لا والله ...عيل انا شو هب ريال..
مريم: ههههه...لا قصدي حد غيرك...على بالي ريال ما اعرفه..
مايد: ويا ويهج...( وهو يدز الباب وبيدخل الغرفه)
مريم: وين وين رايح؟؟
مايد: بروح أشوف اختي...
مريم: بنات خالوه اهناك...
مايد : هوووووووود..
مريم: هههه...اطاعوا انتوا...

ومن الصوب الثاني...
فواغي ردت عليه ( هو دوم وياها سوالف وماخذ عليها وايد)
فواغي : هداا...
مايد: بدخل ..خوزي عني...
مريم: بس ايلس اهنه ..عشان مال الصالون اهناك..
مايد: انزين...

ويلس مايد عالغنفات ،،
ويت فواغي ويلست مجابلتنه ،،
وتم مايد ايسولف ويهرب وياها،،

مايد: ما شاء الله مستويه عروس..
فواغي( وهي مستحيه) : من ذوقك عيوني

في هذي الأثناء مريم كانت نازله عند ندى وشاله وياها بطاقه الباب مال الجناح،

وقفت عند الممر يوم شافت ندى يايه تمشى،،،

مريم: ألالالاه...مستويه قمر غناتي
ندى ( وهي مبتسمه ويايه من بعيد) : والله هب انا..أنتي اللي محلوه..
مريم: شورايج بتسريحتي؟؟
ندى: رووعه وحتى مكياجج وايد حلووو
مريم: انتي بعد..لايق عليج الشعر الملفلف
ندى: من ذوقج...
مريم: يالله نروح فوق...زين يوم يايبه عباتج وياج..
ندى: تدريبي خوافه..اخاف اشوف حد..
مريم: هيه لانه مايد فوق...
ندى: اويه عيل ما بروح...
مريم: لا والله منزلتني من فوق واتقولين ما بروح...
الحين مايد بيطلع..
ندى: اوكيه...

في هاللحظه مايد كان يالس عدال فواغي وفواغي دوم تعق الشيله يوم تيلس وياه عادي عندها،،
لا حيا ولا مستحى،، اونها عاد ماخذه عليه،، المهم ،،
كانوا يالسين عالغنفه اللي مجابله الباب،،

فواغي: ميودي حبيبي...صكرلي الاسويره..
مايد: وانا اشعرفني اصكرلج...
فواغي: ما يخصني عاااد...
مايد: يا ربيي..خواتج اهناك..
فواغي: انزين بس هب عداليه..يالله عاااد صكرها
مايد: أوكيه...

( وفي هاللحظه تفتح مريم الباب بالبطاقه وتدخل هي وندى،، وتشوف ندى ما لم يكن بالحسبان ،،
شافت مايد وهو ماسك ايد فواغي وفواغي يالسه تضحك ومايد مبتسم )

ندى انصدمت من اللي شافته هاللي يحبها يسوي جيه في غيابها...
وكانت الغيره ما كله قلبها ،،

مايد من شاف ندى هد ايد فواغي ووقف،،

مريم: ما شاء الله شو تسوون؟؟؟
مايد ( وهو منحرج ) : ماشي
فواغي ( وهي تضحك) : يالس يلبسني الشبكه ...
مريم ( وهي منقهره على كلام فواغي) : لا والله...
مايد ( وهو معصب) : شو أللبسج الشبكه أنتي بعد...أنتي شرات أختي...
فواغي: أنا شرات أختك؟؟
مايد: هيه ..رابيه وياي وأسراري وسوالفي كلها عندج...يعني أختي..
فواغي: بس أنته هب شرات أخويه...
مايد: أنا طالع تامرون بشي...
( وهو معصب ومسوي عمره ما يشوف ندى )
ندى على طول دخلت غرفة موزه ولا عبرتهم كانت معصبه ومقهوره...

ندى( وهي مبتسمه) : اشحالج العروس...؟؟
موزه: الحمدلله تمام...
( موزه كانت تتصور)
ندى: يالله عااد اتفنني بالحركات...
موزه: أفااا عليج...هب بس بتفنن ببدع،،
ندى: ههه..يالله عيل نشوفج تحت،،

( وتدخل عليهم مريم)
مريم: وين تحت،،
ندى: بنزل تحت،، عند قوم اميه..
مريم: توه الناس...
ندى: بس كفايه شفت العروس...
مريم: أباج اتمين ويايه...
ندى: نزلي تحت بسج مندسه فوق
مريم: هههه...خلاص مويز بنزل ويا ندى تحت وبنات خالوه في الصاله ترا..
موزه: أوكي برايكن


واتعدل ابسرعه مريم جدام المنظره اللي صوب الباب...
وطلعت ويا ندى،،،
مريم: شو ناس وايد تحت؟؟
ندى: اممم...يوم كنا اهناك ...هب وايد..

وهن يتمشن ...
حصلوا مايد صوب اللفت بالعماله واقف يرمس اونه،،
من شافهم بند التلفون...

ندى من شافته ارتبكت ووخت...
مايد: وين سايرين؟؟
مريم: بننزل تحت عند قوم اميه
( ندى كان قلبها يدق)
مايد: انزين انتي نزلي وخليلي ندى
ندى( وهي قلبها يدق ومستغربه ) : شوووه؟؟
مريم: بلاك انته..
مايد ( وهو مبتسم) : أبغي ارمس ويا ندى...عندج مانع...
ندى ( وبكل جرأة وبعد اللي شافته) : أنا عندي مانع...روح أرمس مع اللي كنت وياها توه...
مايد ( وهو منصدم ) : هااه؟؟

ومشن مريم وندى...

وندى ماشيه ما وعت إلا بالايد اللي تقبضها من ايدها وتسحبها...
مايد: ممكن تعيدين اللي قلتيه...
مريم: مايد هد البنيه...
مايد ( وهو يهد ايد ندى) : أبغي أعرف شو قالت...
ندى ( ندى كانت خايفه وقلبها يدق وغبنتها فحلجها ..ندى وايد حساسه وعلى أقل شي تتأثر) : اللي سمعته ( وهي تتطالع مايد )
مايد ( وهو مستغرب انه يشوف الدموع في عيونها) : ندى؟؟ شو فيج؟؟
ندى ( اهنيه ندى ما قدرت اتقول شي وتركت المجال لدموعها تعبر وانهملت ادموعها لا إرادياً) :.....
مريم ( وهي مستغربه من ردة فعل ندى) : ندى شو فيج؟؟؟
( صوب اللفت عالجهه الثانيه في غنفات )
مريم: تعالي تعالي نيلس...
مايد...لو سمحت لو تخلينا ابروحنا احسن...
ندى: ما ابغي ايلس خلينا ننزل تحت...
مايد: ما بتنزلين تحت...
ندى( وهي تتطالع مايد) : ليش؟؟
مريم: تعالي يلسي..

ويلسوا عالغنفات،،
مايد: ندى ليش صحتي؟؟
ندى( وهي تبلع ريجها وتمسح دموعها) : ماشي...
مريم: زين جيه خربتي مكياجج...
مايد ( وهو يطالع مريم) : وانتي هب هامنج الا المكياج..
مريم: يا ربي ...مايد لو تكرمنا بسكوتك أفضل...
مايد: لا هب ساكت...
ندى أنتي صحتي عشان قبضتج من ايدج؟؟
بس أنا ما ضربتج....
تعرفين أنتي شو سويتي...أنتي جرحتيني بكلامج...
ندى( وهي تتطالعه) : أنا ما يبت شي من عندي...
مايد: أنتي شفتيني كنت ماسك ايد فواغي لاني كنت أللبسها الأسويره..
ندى ( وهي موخيه) : وليش محد غيرك بالغرفه يلبسها؟؟
مايد: هي أللحت عليه ...وتدرين عادي عندها حتى تعق الشيله وأنا يالس...
ندى: عيب اصلا...
مايد: بس هي عادي عندها ...لانها تعودت عليه...
ندى:....
مايد: ندى فواغي ما تشكل لي أي أهميه في حياتي...
ندى: بس هي تحبك..( وهي موخيه)
مايد: أعتبرها شرات أختيه هيه...لكن شرات حبيبتي لا...أصلا ما تسوا ظفر حبيبتي...
ندى( وهي مستحيه وساكته):...
مريم: بروح اتصل حق اميه وبيي... ( بالعماله تتحجج عشان تخليهم ابروحهم)
مايد : انزين...
ندى...أنتي بنت عمي...وأنا أولى فيج من أي حد...
ندى أنتي ما تدرين بغلاتج عندي...
وأنا ما تبرضت حق هلي اليوم ولا ييت عند موزه الحين الا عشان أشوفج...
قلبي كان حاس اني بشوفج ..عشان جيه ييت...
ندى ( وهي مبتسمه) : شكراً
مايد: هاي شكراً وين أصرفها انا..
( ندى وخت وهي مستحيه)
مايد: ندى أنتي قبل يمكن كنتي تسمعين باسمي بس ما شفتيني...
لكن ما لاحظتي من اول مره شفتج فيها اني اغتنم أي فرصه عسب اشوفج...
هذا كله عشان شوو ...عشان اتسلى مثلاً...
ندى أنا ما عندي شي ثاني أقولج إياه الا اني أحبج...
ندى( وهي محمره وساكته) : .....
مايد: لا تسكتين؟؟ قولي لي أي شي...؟؟ بردي افادي بكلمه...
ندى ( وهي محمره ومبتسمه) : شو أقول؟؟
مايد: قوليلي كلمه من أربع أحرف..
ندى : ماشي...
مايد: ههههه...ما اتمصخر والله ...خاطري أتأكد من حبج لي...
ترا ما تفصلنا عن بعض الا شعره...
قوليها ومن باجر تحصليني عند أبوج...
والله باجر لسويها وأيي عند عمي وأطلبج...
أنتي بس قوليها...
ندى ( وهي مبتسمه ومستحيه ) : ما يستوي...
مايد: ترا في الحب ما في شي اسمه ما يستوي...
وعن المذله؟؟
ندى ( وهي مبتسمه) : أحبك..
مايد ( وهو يزاعج ) : اللـــــــــــه....محلاها من شفاتج...والله أنا أموت فيج...

وتيهم مريم...
مريم: مايد حشرت المكان..
مايد: ما يخصج...انا مستانس الحين...
خلاص من الحين ندى خطيبتي..
مريم: والله ...ما شاء الله خطبتها الحين...
مايد: تأكدت من حبها لي وهذا يكفيني...
ندى( وهي مستحيه) :...
مريم: يالله ندوي ننزل تحت ...
ندى: يالله..
...
مايد: بتروحين؟؟
ندى: هيه..
مايد: أبا أشوفج قبل ما تروحين البيت...
ندى: ما بقدر...
مايد: أنزين...بقولج شي...
ندى: تفضل؟؟
مايد( وهو يصاصرها) : أحبج...
ندى ( وهي مستحيه) : وانا بعد...

ونزلوا تحت البنــــــــات،،

وأهم شي صار...

توثق هالحب بالقبول...وتأكد مايد من حب ندى له...
وتأكدت ندى من حب مايد لها....

أتمنى ان القصه عيبتكم...

[عفاريتووو]

واييييييد حلوة القصة ,, تسلمين بهوووجة

[شوق الصحارى]

تسلمين بهووووجه على القصة الحلووووووووووووووووووووه ـ ...

[عاشقة الريم]

السلام عليكم ورحمة الله وبركاته

الصراحة أنا قريت القصة اليوم كاملة

واااااااااااااااااااااااا اااااااااااااااااايد عجبتني

مشكورة بهوجة على القصة الرائعة

[قمرهم كلهم]

القصـه وايـد حلـوه و شـدتني وايد ..
وشـوقتيني أعرف النهايه ..
بس عندي شوية مـلاحظـات أتمنى انج تتقبلينهـا ..

شافت شمه موبايلها وعرفت ان الرقم رقم عيسى ...ترددت قبل ترد عليه ولا لا
وعقب ردت عليه...
شمه: ألوووو
عيسى: هلا شمه...
شمه: خير شو بغيت؟؟
عيسى: شمه أنا نفذت اللي أنتي ويوسف اتفقتوا عليه...
شمه: وياليتنا ما أتفقنا على شي...

( اهنيه ندى كانت تسمع شمه وهي ترمس)

انزين .. اهنه ذكرتي هالنقطـه بس ماكملتيهـا ..
يعنـي اهني تخليـن اللي يقرى يتـوقع ان مثلا ندى بتعرف أو شي مثير راح يصير
هممم ماعرف كيف اشرح لج الي اقصده ..
بـس كنتي ممكن تستغلين هالنقطه لصـالحج وتخلينها تجذب القاري أكثر ..
بأكثر من طريقه .. يعني ممكن ندى بتعرف شو صار بينها وبين يوسف
أو بتعرف سالفة تآمرهم عليها وبتزعل صح بس بتسامحها لان شمه وعت من غفلتها
.. الخ
فهمتي علي ؟ ولا ماعرف أشرح :kkk: brgll:

.
.

بالنسبـه للنهايه
انتي صح بينتي ان شمه هدت يوسف وتعرفت ع غيره وعقب جكها ابوها وتغيرت خلاااص ..
.
[QUOTE][فكر عيسى يتغرب ويبتعد عن بلاده عشان يرجع وهو ناسي كل همومه،،
بس يا ترا هل الغربه قادره انها تنسي وهل هو بالفعل راح يتحمل البعد ويدرس برع؟؟/QUOTE]
.
وبينتي ان عيسى اغترب عسب ينسى .. بس هممم عطيتي تسـاؤلااات فـ البدايه
مثل : هل بيقدر ينسى .. هل بيصبر على الغربه .. ؟ ..
صح ممكن تخلينهـا مفتـووحه .. بس بنفس الوقت انتي بينتي ان مايد ربيع عيسى
ونفس الشي .. ما كملتي هالنقطـه .. يعني بيعرف ولا لأ .. بتقولين خليتيها مفتوحه للقاري ..
بـس ذكر هالنقطه أو عدمـ ذكرها .. ما يأثر فـ كان من الممكن تتعمقين فيها حبتين أزيَـد ..:kkk:
يعني احس أكثر شي حكرتي النهايه بين مايد وندى ..
هممم يمكن أقـدر أقول انج ماعطيتي كل شخصيه حقهـا بـ قدر ماعطيتيه حق الثانيه ؟


.
.
.

هـا رايي ويمكن لـج نظرج فـ القصه وانا مافهمتـه ..
وعقب ماتردين علي .. توضح لي الصوره اكثر..
انتي كتبتي القصـه وانتي أدرى بتفاصيلهـا ..
أتمنى اني ماكون ثجلــت عليج بـ ملاحظـاتي ..وانج تكونين تقبلتيهـا..

فـ النهايه .. القصه وااايـد غاويه ..
ونتـريا اللي عقبها .. شدي الهمه :smartass:
.
.
* أنـا مش راعية النـك :kcl: بس داخله بـ نكها وهي تعرف :kcl: *

[الاسطوري]

السلام عليكم ..

بصراحه التكملة حلوه بس في أشياء أتوقع صعب انها تصير فالواقع مثل
ان مايد يرمس ندى فموضوع الحب قبل حتى ما تكون بينهم
علاقة رسميه وعندي لج اقتراح ،، شو
رايج تبدين قصه يديده
من هالقصه
يعني عندج البطلين هم مايد وندى تبدينها من بداية الخطوبة والمشاكل
اللي تواجههم مثل ماتواجه اي اثنين في بداية حياتهم من
اختلاف في الأراء وغيره وعقب الملجه بعد
كيف بيكونون وبعد الزواج
وجيه ،، انا
احس انه عندج قدرة على الكتابة وربط الأحداث بشكل حلو ومتناسق
وأتمنى لو تمشين وتتعمقين أكثر في هالشي دام عندج
وقت واتوقع القصه تلاقي إقبال كبير من
الجمهور ولج الراي الأول
والأخير

مشكوره على هالمجهود
الطيب ونتريا
يديدج


الاســـطـــوري
أخوكم

[دمعة شوق]

الله الله شو هالقصه الغاويه
تسلميين فديتج على هالقصه الغاويه
’’
وعنديه كمن اقتراح لج وللقصه
وأتمنى تتقبليهن بصدر رحـب ..

اممم ماتعمقتي في التفاصيل أكـثـر
وبعد أوافق على رأي مزيونة العـرب

’’’

وسمحيليه الغاليه جانيه ثجلت عليج
وماعليج زوود خويتي
:kcl:
شـكــرا ً على القصه الحلـوة
السموحـه

[حبوبه دبي]

حلــوووه القصــــــه



يالله نتــرقــب كــل يديــد منــج

[جنون امرأة]

واااايد حلوة القصة ..


و هالله هالله باليديد

ترانا نتريا ..

[بهجة الروح]

عفاريتووو

تسلمين اختي وذوقج الاحلى

شوق الصحارى

تسلمين وانتي الاحلى

عاشقه الريم

تسلمين وهذا كله من ذوقج الحلووو


قمرهم كلهم

ثانكس اختي عالرد الحلوو والملاحظات الاحلى

بالنسبه للملاحظه الاولى

ما بغيت اتعمق اكثر وما بغيت شمه تعرف شو اللي كان يصير من وراها
لانه يصير مرات ناس تستويلهم اشياء بس هم ما يعرفون عنها شي ولما يتقدم بهم العمر حد يخبرهم
ويقولهم ترا جيه استوا وجيه حصل لك

هالي بغيت ابرزه ، ما ادري جان فهمتي قصدي ولا لا

بالنسبه لعيسى حبيت اخلي القارىء هو اللي يتوقع وهو اللي يقرر شوه راح يصير

وتسلمين عالملاحظات اللي سرتني

واذا فيه اي ملاحظات ثانيه ان شاء الله ولا يهمج راح ارد عليها


الاسطوري

ثانكس اخويه عالرد والتواصل معايه ،، ووينه بوزايد شكله زعل الريال

المهم فكرتك حلوه ان شاء الله بفكر اسويها بعدين لاني حالياً على ويه سفر

هالقصه انا ما تعمقت فيها وايد بالتفاصيل لكن في قصص عطيتها حقها يمكن لانه هذي من اوائل القصص اللي كتبتهن


دمعة شوق

تسلمين عالرد الحلوووه
وصح انا ما تعمقت اكثر فالتفاصيل

وان شاء الله راح تقرون قصص انا متعمقه فيهن اكثر

وثانكس


حبوبه دبي

تسلمين الغاليه عالمتابعه
وذوقج الاحلى


جنون امرأة

ثانكس الغاليه وهـــذا من ذوقج

[شمه]

شو خلصـــت؟!!!

انا ما قريت انه مكتوب الجزء الاخيـــر.. و من متى اتريا التكمله الا توني انتبهـــت,,,

بسرعه خلصـــت..!!!!!!



بهوجـــــــــــــــــــــ ه نبى قصــه ثانيـــه..