لحظه خلونا نتفاهم

[حلم الطفوله]

السلام عليكم

لحظه بنتفاهم ...على الأقل عطني مجال أتكلم وأشرح وجهة نظري على الأقل ..!:nono:
ليش تريد تسمع نفسك ووجهة نظرك بس ! يمكن إنته فاهم الموضوع بشكل خطأ

لا أصلا إنته محد يقدر يتفاهم وياك ...تريد تسمع نفسك ..عطني فرصه أتكلم :narr:
لالا ...شو بلاك ماخذني بشراع وميداف ! هد إشويه ...عطني مجال أنطق أعبر!

لحظة تفاهم !:sad4:
محتاجين لهاللحظه ... سواء مع نفسنا أوغيرنا ....محتاجين نتفاهم ونبدي وجهات نظرنا !

بس المشكله ..إنه بعض الناس ما يحبون يسمعون إلا وجهة نظرهم ...لأنهم واثقين بإنه آراءهم الصح

ومن عاشر المستحيلات إنهم يغيرون رايهم بشيء يخالف رايهم ...يجادلون حتى آخر رمق!

بس يا (بابا) (أقصد الشخص) رايك غلط ! :ma9dom:
خسئتي يا حلم ! كيف تتجرئين وتقولين إنه رايي غلط ! إنتي بكبرج غلط!

لحظه ...بفهمك الموضوع ...يمكن فهمت الموضوع بشكل ثاني !

لالا على آخر عمري بتين إنتي حلووووم وبتعلميني كيف أفهم ! هزلت واليهال بدو يتكلمون

صدق إنه أعضاء الواحات لسانهم طويل ويراددون

المشكله إنك بروحك ياهل بهالتصرفات( طبعا في خاطري)

إن زين كيف أصلا بتفهم دامك ما تعطيني المجال أفهمك وجهة نظري على الأقل !
اسكت واسمعني عالأقل

سيري لعبي بعيد ....على آخر زماني (فديتها هالإنسانه) إتين إنتي إلي ما طلعتي من البيضه تفهميني!

ناس متزمته ...متعصبه ...تشوف نفسها الصح دايما وبكل الأوقات ...
والمشكله إنها تتكلم بأمور تحتاج نقاش ...بس مستحيل تعطيك فرصه تتكلم ..لأنه كلامك غلط من الأساس

إن زين حاضرين وآسفين وبنسكت وبننطم بعد! بس لا تجرح بناس قالوا وجهة نظرهم بموضوع غيرك

دامك تشوف نفسك الصح دايما ...فهذا دليل على إنك الغلط دايما ! لانه ماشيء انسان كامل

وإلا هالشيء بتشكك فيه بعد وبتفتح وياي سين وجيم ومن انخلق الأول البيضه وإلا الديايه!:kkk:

حشا كليتني بقشوري ! ما استوت كلمه قلتها ...اللهم أسكنهم في مساكنهم واجعل كلامنا خفيف عليهم

لحظة تفاهم ...
محتاجينها وكل واحد فينا ييلس ويا نفسه كل ليله ويشوف يومه جدامه ...

يحاول قد ما يقدر يحسن أخلاقه .... علاقته بربه بالناس حواليه ... عشان يقدر يتفاهم مع نفسه

لحظة تفاهم ...
محتاجينها وااااايد ...بعلاقتنا مع الناس والأهل بشكل خاص ...بس تحتاج إشوي فهم واستماع

عط الثاني مجال يتكلم ...يعبر ... يشرح لك وجهة نظره ...بس لا تسفه برايه ولا تحط من قدره

ولا تجمع الكل بكلامك مع هالشخص إلي إنته بنفسك فتحت المجال وتناقشت وياه ..محد ضربك على إيدك

لحظة تفاهم ...محتاجينها ...بس في هالواحات إلي نحبها واااااايد ... مهما تجادلنا ....

الكل يعرف فيها ....إنه اختلاف الرأي لا يفسد للود قضيه ..

لحظة تفاهم .... صبروا شوي بتفاهم وياكم ... وكلي ثقه بتسمعوني ...

لأنه هالسنين إلي جمعتنا بهالأقسام والمواضيع والردود قربتنا من بعض وفهمنا بعض

لحظة تفاهم ! خلاص بدخل بالموضوع سيده بلا لف ولا دورانbrgll:

هل فعلا فيه ناس ما تتفاهم بالدنيا؟
هل إنته من الناس إلي تعطي لغيرك لحظة تفاهم؟
من أكثر شخص بحياتك يسمعك وتتفاهم وياه!
من أكثر شخص بالواحات تحس بإنه آراءه فادتك كثير بحياتك الواقعيه؟اختياري
شو رايكم بلحظة التفاهم ؟

رايكم يهمني أكيييد ....

[إسهر معي ليله]

عليكم السلام

هل فعلا فيه ناس ما تتفاهم بالدنيا؟

أكيد فيه
:::::
:::
:

هل إنته من الناس إلي تعطي لغيرك لحظة تفاهم؟

اشوف عمري اني اعطي لحظة تفاهم،، يعني اسمعهم واعترف انه اللي قالوه صح
ويمكن اكون انا فهمت الموضوع غلط فـ عطيت راي غلط،،، وبالتالي ننتهي علــى
راي واحد،، خصوصاً اذا الموضوع معروف فيه الراي الصح من الغلط
:::::
:::
:

من أكثر شخص بحياتك يسمعك وتتفاهم وياه!

ماعتقد فيه شخص يسمعني ويتفاهم لـ مجرد انه هذا كلامي،، يعني يمكن آرائنا
كلها على صواب.. فـ بالتالي احنا الإثنين بنكون متشابهين ومتفاهمين فالـــراي
:::::
:::
:

من أكثر شخص بالواحات تحس بإنه آراءه فادتك كثير بحياتك الواقعيه؟

مافي شخص معيّن.. بصراحه طول ما رايه صحيح أكيد بيفيدني
::::
:::
:

شو رايكم بلحظة التفاهم ؟

اكيد بتكون لحظة حلوه،، والتفاهم حلو،، خصوصاً في موضوع حلو لـ أنامل أحلى

// تسلم ايدج

[المزوحي]

لي عودة ...

[أمواج]

:mar7aba:
.
.
حــلم الطفــوله
مــوضووع حــلو . مع إني في البدايه مافهمــت شي لووول
أمزح معــاج
.
.
هل فعلا فيه ناس ما تتفاهم بالدنيا؟
يالله وايد في brgll: . .
.
.
هل إنته من الناس إلي تعطي لغيرك لحظة تفاهم؟
امممم . . . أتفــاهم ويا اللي يبــغي يتــافهم ويااي . . في نــاس تبــغي تتفـاهم عشـان تصلح الامــور . . أمـا في نــاس ماتســتاهل إنه تضيــع وقــتك عليهم لانه مابنيــتهم التفــاهم . .
.
.
من أكثر شخص بحياتك يسمعك وتتفاهم وياه!
قـِِـلـّّــه اللي يتـفاهمــون ويااي . .
مادري ليــش . . !
.
.
من أكثر شخص بالواحات تحس بإنه آراءه فادتك كثير بحياتك الواقعيه؟اختياري
أحــتفظ بالاجابـة لنفــسي . . .

:kcl:
.
.
شو رايكم بلحظة التفاهم ؟
طــعمه حــلو
:ice:
.
.
شــكرا على الطرح عزيــزتي حـلووووم
.
.

[صدى جوفي]

وعـليكم الـسـلام

حلم الطفـولة .. يبتيها فالصميم وأتمـنى يؤخـذ الموضوع بعين الاعتبار

وعــن سؤالج .. شو رايكم بلحظة التفاهم ؟ أقــول نحتــاجهــا فعـلاً

مــوفقة في طرحــج
.
.
صدى

[حلم الطفوله]

السلام عليكم

اسهر معي ليله
ما شاء الله عليك من الواضح إنك انسان متفهم...باين ما إجاباتك على الأسئله:smartass:

ومشكور على المرور على الموضوع وتسلم على الرد أخوي

المزوحي
شرفت الموضوع وبانتظار عودتك ورايك بالموضوع ...واكيد بنتفاهم وياك


اموااااااااااااااج ( صدقيني متفيزره أحلى):kkk:

الحمد لله فهمتي الموضوع ودخلتي وياي عالخط...عشان أقدر أتفاهم وياج

تدرين حلو تفكيرج ....بتتفاهمين مع الناس إلي تعرفين إنهم ياخذون ويعطون بالكلام

وتريحين عمرج من الناس إلي ما يتفاهمون فتبتعدين عن التفاهم وياهم علشان ما يرتفع ضغطج

مشكوره على مرورج إختيييه :ice:

صدى جوفي
شاكره لج مرورج وبالفعل مثل ما قتلتي محتاجين للحظة التفاهم مع نفسنا وغيرنا أحيانا

[المزوحي]

كلنا معرضين بإن نفهم موضوع معين غلط .. والتفاهم أحسن شي .. وإن يت على ماس ماتتفاهم ..
صح بعض الناس ماتحب تتفاهم وتحب تقوول إني هي صح والبعض مايحب يعترف .. حتى لو فهمتيه ..
يسكت ثواني يراجع نفسه .. لكن فووق هاا كله مايحب يعترف ..

إن كان راي الطرف ثااني غلط .. يعتمد على تقبله كلامي يوم أقوله غلط ويعتمد كيف أنا أكلمه ...
عني أنا أحاول أشوووف شو الأمور اللي ماعيبتني في نفسي وأتفاهم وياها ..
وأحاول إنه لو ياني شخص يشتكي لو أعرفه إنه مب صادق أو غيره إني أتفاهم وياه وأفهمه ..

ومهما كان وجهة الطرف الثاني غلط وهو مندفع في كلامه .. بسكت .. وبسمعه للأخير ...
وعقب بفهمه وجهة نظري ..

أكثر شخص يسمعني ولد عمي ..

[راعي الزعـامه]

موضوع رائع واختيار موفق اختي حلم الطفولة للموضوع

هل فعلا فيه ناس ما تتفاهم بالدنيا؟

فيه ناس مستحيل تتفاهم وياهم .. واخص بالذكر اللي طبعها عصبي نوعا ما
يتمسكون بآرائهم و اذا عارضته عادي يقوم ويكفخك !!
كيف انحل مشكله هاي الاشخاص .. بكل بساطه لاتنقاشهم فشي ..

هل إنته من الناس إلي تعطي لغيرك لحظة تفاهم؟

انا ماحب أدخل في مناقشات طويلة
وأهم شي عندي أسمع راي الناس .. ولو عندي راي اخر بقوله
بس عادة أسكت وما أعطي رايي فكل وقت.. :unlock:

من أكثر شخص بحياتك يسمعك وتتفاهم وياه!

أصدقائي
مب الكل البعض اللي ارتاح لهم ..

شو رايكم بلحظة التفاهم ؟

هيه لحظه وكما ذكرتي وذكر بعض الاخوان مهمة جدا ..
والتفاهم شي جيد ..


تحياتي
:bow:
.
.

[منــاوي]

موضوع رائــع ..مشكوره اختي لـ طرحج الموضوع :)
.
.

هل فعلا فيه ناس ما تتفاهم بالدنيا؟

أكييييد وفي وااايد ناس جيه ..ما يحبون شي اسمه تفاهم
وبس غرضهم الوحيد فرض رايهم وبدون اي نقاش
وعادي ايكون هالشي مافي مصلحه ..بس يكوون عناد

هل إنته من الناس إلي تعطي لغيرك لحظة تفاهم؟

هيه عادة ...وأهم شي عندي اسمع راي الناس
وانا واااايد احب اقول رايي لو عندي ما احب اسكت ..

من أكثر شخص بحياتك يسمعك وتتفاهم وياه!

صديقاتي ..وأكيد اللي ارتاح لهم واحس انهم يفهموني ..

شو رايكم بلحظة التفاهم ؟

أكيــــد لحظه وايد مهمه ولا بد منها
لان التفاهم دايما يوصل لنتايج جيده ..
.
.

[لمّــاح]

الســلام علــيكم . .

موضوعج حلو .. ^_^

هل فعلا فيه ناس ما تتفاهم بالدنيا؟

اووه .. وايديـــــــــــن .. !

هل إنته من الناس إلي تعطي لغيرك لحظة تفاهم؟


أكـــيد .. انا من النوع الي اسمع وجهة نضر الشخص الآخر .. حتى لو كان على باطل لكني اسمعه عشان يعاملني بالمثل .. مثل ما انا عطيته فرصه و سمعته أكيد هو بيعطيني فرصة و بيسمعني فبهالطريقة بقدر أوصله رأيي بهداوة و احتمال كبير يقتنع ..
لكن هناك مجموعة من الناس الي مستحيل ينتهي النقاش وياهم لأنهم متعصبين لرايهم حتى لو كانو على باطل .. هالنوع من الناس ينرفزوني خصوصا اذا كان اسلوبهم زفت .. يالله شكثرهم هالناس بس تعلمت اني ما ارد عليهم و من يقولون شي اقولهم " انتو صح " و اكرموني بسكوتكم ( طبعا فخاطري اقول هالجملة ) :harhar1:
طبعا نختلف ويا ربعي في بعض الاوقات على شي و تكون مناقشة عادية .. و جد صارت خلافات لأن البعض يكون متعصب لرايه و مايتنازل يعترف بان رايه غلط ..


من أكثر شخص بحياتك يسمعك وتتفاهم وياه!

اممم .. ماعندي حد


من أكثر شخص بالواحات تحس بإنه آراءه فادتك كثير بحياتك الواقعيه؟اختياري

بعض الأعضاء رايهم و تفكيرهم يكون حلو .. البعض الآخر اسلوبهم يكون حلو فيخليني اقتنع ..
ماعندي حد معين .. لكن الي يحس ان اسلوبه حلو + تفكيره متوازن ( مب متشدد و مب متفتح ) + حالته النفسية متوازنه ( ماعنده اختلال او نقص في الشخصية ) فهذا اكيد هو الشخص الي بقتنع بآراءه :)

شو رايكم بلحظة التفاهم ؟

مهمة و حلوة :)

شكرا على هالموضوع الحلو ^_^

[حلم الطفوله]

السلام عليكم

المزوحي
الظاهر إنك مسيطر على الوضع تماما ...وعندك أسلوب معين بالتفاهم مع الناس في جميع الحالات

والاهم من كل هذا وذاك إنك تسكت وتسمع وتتفاهم ....يعني تعطي المجال لغيرك عشان تتفاهم وياه

شاكره رجوعك للمره الثانيه وتسلم على الرد والمرور

عاشق القلم

صدقك يا خوي فيه ناس ما تتقبل المناقشه والله يسوونها ويضربون ويكفخون إلي جدامهم:qor9anah: فأحسن شيء ما نصدع راسنا وياهم ولا نحاول نتناقش ويا ناس ما تتفاهم:kkk:

شاكره لك ردك الرائع ومرورك عالموضوع ...

مناوي
أولا اسمج حلو وغريب ....بس يختلف عن منايه صح:ttmasha:

مثل ما قلتي التفاهم يوصل لنتايج جيده بس صدقيني مب مع كل الناس

فيه ناس تستمتعين بالتفاهم وياهم لانهم يفهمونج أشياء ما كنتي فاهمتنها فتستانسين إنج استفدتي منهم

وناس يتفلسفون عالفاضي ويحاولون يثبتون لج إنهم فاهمين كل شيء ...ويا ويلج ويا سواد ليلج لو ناقشتيهم وحاولتي تثبتيلهم إنهم غلط .... بيقولون إنج ما تفهمين أصلا ...فالسكوت عنهم أحسن

شاكره مرورج أختيه وتسلمين عالرد والمرور

[دموع قلم]

وعليـكم السـلام ورحمـة الله وبركـاته


طبعـي لا أحـب أن أسمـع رأي خاطيء ولا أفعـل شيء, وكـأنّ ثمـة مـدفـع يدفعنـي لأقنـع صـاحـب الـرأي
بالرأي الصحيـح, فـربما إقنـاعه برأيي يفيـده في حيـاته الحـاليـة أو المستقبليـة وأكـون فعـلت خيـرا له,
ولكـن إن كـان الشخـص متعصـب للرأي أو لا يتفـاهم أبدا, فـ أحـاول قدر الإمكـان أعـامله بالصمـــت,
وأبـدي رأيي ببسـاطة وباختصـار إن كان الأمر مهم جـدا..

ومـن المبـادئ الأساسيـة لسعـادة الحيـاة الزوجيـة هـو مبـدأ التفـاهم, لأن المشـاكل والخـلافـات تحـدث
في الحياة الزوجيـة دون محـالة, ولكـن إن كـان ثمـة تفـاهم بيـن الطرفيـن, ستقـلل الخـلافـات بينـهمـا..


الحمـدلله الـذي رزقنـي نعـم الأخوة التي تهتـم بأراء بعضهـا البعـض, ونعيـش معـا على مبـدأ التفـاهم دايمـا,
ومن الـواحـات هنـاك عـدد من الأعضـاء الـذين أستفـدت منـهم, وربمـا غيــرت بعــض أفكاري الخــاطـئـــة
واقتنعـت بـأفكـارهم الصحيحـة وآرائهـم المقنعـة..


أشكـركِ غاليتـي حلــم الطفــولة على العبـق الجميـل
وعسـى تـدوم تـلك المشـاركـات الرائعـة من أنـاملـك

:)

[سبيجة]

السلام عليكم


اختي الغالية..حلم الطفوله ...

موضوع أكثر من رائع ...ويستحق التمعن والتفكير..


الله كرمنا بنعمة العقل..وإلا لكان مصيرنا كال.........وانتوا بكرامه..:no0: لذا علينا أن نستخدم هذه النعمة برفع مستوى تفكرينا...والرقي للوصول لمرحلة التفاهم مع الآخرين ...فالإنسان لا يستطيع الإستغناء عن الناس ...لذا عليه التعايش مع اختلاف نوعياتهم كبشر...واختلاف تفكيرهم...

لذا فالشخص المتفهم ..تجد كل الناس يسعون للتقرب منه ...لإسلوبه المميز مع الجميع...وعلاقاته أغلبها تكون ناجحة ...بعكس الشخص الغير متفاهم ..المتزمت والمتمسك برأيه....

بالنسبة لتساؤلاتك...

هل فعلا فيه ناس ما تتفاهم بالدنيا؟

أكيد فيه ...وقد أكون أحدهم في بعض الأحيان.. بعطيج مثال... ممكن في شخص اعطيه اكثر من فرصه في موقف معين ,,,واقوله انه إذا سويت هالشيء ...بتكون النتيجه كذا.... ومع ذلك يسوي اللي راسه ...لما يرمسني في الموضوع نفسه ... ما بتفاهم وياه ... وما بعطيه مجال ....

اللي حبيت اوصله...في ظروف ممكن ننحط فيها..تخلينا ما نتفاهم ويا اشخاص معينين...

هل إنته من الناس إلي تعطي لغيرك لحظة تفاهم؟
أعطي بس بحدود..شخص ما في مجال انك تتفاهم وياه ,,,أو يكون متزمت وماشيء فايده من الكلام وياه ... ما بتفاهم وياه.... (ما ادري إذا معناته اني عصبيه أو لا...):narr:

من أكثر شخص بحياتك يسمعك وتتفاهم وياه!
أختي الكبيرة...احس وايد تفكيري جريب من تفكيرها...
والحمدلله عندي 3 صديقات مقربات ....ممكن اتفاهم واسمعهم ويسمعوني...

من أكثر شخص بالواحات تحس بإنه آراءه فادتك كثير بحياتك الواقعيه؟اختياري

في وايد مواضيع وردود في الواحات تأثرت فيها.... بس ما اقدر اذكر الأسماء عسب ما اظلم حد ... :kcl:


السموحة

[طير الحب]

السلام عليكم

الصراحه موضوع حلو وجاء في وقته...لأني شوي صايره ما ابا اسمع إلا رأيي في موضوع ما...الصراحه انا إذا مقتنعه بشيء محد يقدر يقنعني بعكسه وأقدر ساعات أقنع الآخر بوجهة نظري بأسلوب بس في أوقات تفلت اعصابي وانا ما احب أوصل لهدرجة...فأعطي نفسي بريك وما أتناقش في الموضوع...وبصراحه في أشخاص يثيرون ضيفي في أسلوبهم بالنقاش...يعني يتضاربون وآخر شيء يفكرون بينهم وبين نفسهم ويكتشفون غلطهم...الواحد المفروض يفكر قبل لا يتكلم...



هل إنته من الناس إلي تعطي لغيرك لحظة تفاهم؟
نعم...بس بدون ما أكذب من يومين صايره ما اعطي وهذه لحظات نادرة.

من أكثر شخص بحياتك يسمعك وتتفاهم وياه!

زوجي الشخص الوحيد لأني ما احب حد يدري اني متضايقه ولأنه محد يفهمني كثره...وأختي الأصغر مني حسيت استوينا قراب واااايد من يوم ما تزوجت لدرجة أحس أنه وجودي ببيت اهلي شيء مميز...قالت لي جملة من كم يوم تمت بالبال وأسعدتني قالت لي (أنتي الي تلميني مع بعض) واااااايد فرحت....واليوم الماما بعد قالت جملة وايد أسعدتني الله يحفظهم لي.

من أكثر شخص بالواحات تحس بإنه آراءه فادتك كثير بحياتك الواقعيه؟
الصراحه الأخ الكريم عايش وهم انسان له بعد نظر.

شو رايكم بلحظة التفاهم ؟
أحلى شيء:kcl:

شكرا على المساحه الي منحتينا إياها حلم.

[حلم الطفوله]

السلام عليكم

لماح راعي سدرة الصبار:smartass:

وجهة نظرك صحيحه شكلك وايد تعاني ...لانه هالنوعيه من الناس مهما تحاول تتفاهم وياهم ما تقدر !

عدهم قناعه بإنه رايهم دومه الصح ...ومثل ما قلت نسكت عنهم او نقولهم من بدايتها إنتو صح عشان يستانسون وأكرمونا بسكوتكم ( طبعا بخاطرنا):sad4:


ومثل ما قلت لحظة التفاهم مهمه وحلوه مع ناس تقدر تتفاهم وياهم ويفيدونك وتفيدهم برايك ...

والواحات ما شاء الله فيها ناس تاخذ وتعطي ...تحترم وتناقش وتجذبك بأسلوبها الحلو الممتع مثلك وشرواك ....
شاكره مرورك أخوي

ابتسامة قلم
وعليكم السلام ورحمة الله وبركاته

مثل ما قلتي يا راعية المحبه مبدأ التفاهم مبدأ تقوم عليه علاقات كثيره ومن ضمنها الحياه الزوجيه

وحلو الانسان يتفاهم مع شخص ياخذ ويعطي وعنده أسلوب حلو ومقنع بالتفاهم ولكن الصمت والسكوت هو الحل الأمثل بالتعامل مع هالناس إلي ما تتفاهم

شاكره لمرورج إختيه واستانست من الخاطر لرجوعج للواحات وردج على موضوعي ..

الله يوفقج بحياتج ودراستج