شرجاوي,, بستشيرك في شي

[ذنـيـنـي]

السلام عليكم


انا حاط الـ Opel فيكترا في بالي,,

شو رايك فيها كـ سيارة من ناحية:>> بما انك من ملاك هذه السيارة

الثبات
القوة
العزم
الراحة
الاستخدام على المدى البعيد >> قطع الغيار و الصيانه و خدمة الوكيل

و في النهاية كم سعرها تقريبا ؟؟
لموديل الـ 3.2



السعر و المواصفات اقدر اييبهم من الوكالة ,,
بس انا ابغي راي حد مجرب السيارة

و الشكر لك مقدماً

[شرجاوي]

الا ال 3.2 حلوه و قويه و ثابته وااااااايد ... بس من الداخل مافيها خشب و الجلد لونه اسود بس .. الضمان اللي بيعطونك اياه سنيتن بدون تحديد الكيلو .. زيد 1500 درهم و بيخلونه 3 سنوات او 120 الف كيلو ...

المكيف ماشالله الصراحه ما شفت مثله .. بااااااااااارد و يطلع بروده بدونه هوا ( آخ قلبي ذكرتني بها )

عيوب ال 3.2 ما فيها قومه و مشايه عالخط ( اتييب 270 )

و المكينه تخلط .. يعني يبالها تبديل بعد ما تخلط .. سعر المكينه 35 الف فالوكاله

قطع الغيار شي قطع ارخص من الكامري و الاكورد و شي قطع اغلى بوااايد من قطع الكامري و الاكورد ... خدمة الوكيل جيده بس مرات يتأخرون فالصيانه ... تجييكاتها ( كل 5000 كيلو ب 85 درهم ) و تجييك ال 30 الف لعنوا خيري ( 2850 ) ..

السياره مريحه بالنسبه للسائق و الراكب اللي حذاله .. لان الموتر ضيق من ورا

و 2006 شكلها غير ( الويه بس )



و سعرها تقريبا 127 الف .. بس انا انصحك بال 2.2 .. ما تصرف بترووول موووول ... الفل مالها ( سوبر ب 63 درهم ) و الفل كان يكفي ل مشوارين للفجيره :puppyeyes: ( مرتين ساير و مرتين راد ) و سعر ال 2.2 تقريييبا 100 الف

[ذنـيـنـي]

افففففففففففففف 127 الف

وايد بصراحة,,

بالنسبة للسعر شي سيارات تعطيني اشياء اكثر مقابل السعر

ممكن اني اخذ الباثفايندر اليديد او برادو باب واحد


و انا بصراحة ميزانيتي في الفتره الحالية ما تسمحلي اني اخذ سيارة بـ اكثر من 100 الف
بصراحة شي موتر صدق داش خاطري و هو الجمس بيك اب كبينه و نص 2500 الي ويا مكينه 5.3

ياخي اسميه شييييييييييي و سعره وايد حلو,, 99,000

و على فكرة صرفيته وااااااااااايد حلوه,, الـ 150 تمشيك فوق الـ 600 كيلو

[لمّــاح]

مرحبا ..
ذنيني .. الجمس سييرا تراه فنان و سايقنه .. لكن الي سقته شويه غير ( عليه سوبر جارج و هدرز و زوايد ) .. مشيييييه ماعليه كلام !!
تفويلته 120 اضني واتمشيك 500 ( 500 كيلو مع الزوايد الي فوق .. تخيل !! ) انا بالنيسان افوّل تانكيين ب170 يمشيني الموتر بالكثيير 450 كيلو .. !

عندك حتى موتر يديد و حلو، دودج جارجر .. صرفيته حلوه و مشيه حلو و الوكالة محترمه (( الفطيم )) و الموتر سعره واايد ممتاز ..

عندك بعد الكدلك .. عندهم اسعار حلوة و ضمانهم حلو ..
اذا بتصبر لين الصيف بينزلون الجمس اليديد .. شوف كم سعره بيكون ..

[شرجاوي]

الدودج جارجر شكلها من برع حلو .. ومن الداخل مارك تو ...

ذنيني خذلك جي ام سي بيك اب 3500 ( دبابه مب موتر ) ... و البرادو الكوبي تصرف اكثر من الجي ام سي ... و امسات شفت تاهو ف ليبرتي مال مدير المبيعات .. المكينه نفسها فورتك 5.3 بس شكل الموتر من الداخل و من برع ما علييييه كلاااااام ... اتريا الشفر احسن لك .. المواتر الامريكيه معروف عنها ما تصرف بترول شرا الالمانيه و اليابانيه


نصوور لو خبرتني كنت بييبلك دودج رام sst 5.9 و قوتها 480 حصان ... باعوها ب 33 الف

[لمّــاح]

شرجاوي ..
صح من برع شكلها حلو و من داخل بسيطة ( بس مب لدرجة انها قبيحة ) ..

اذا حبيت ياذنيني، تقدر تاخذلك مني كووبر .. موتر صغير و مايصرف و ينفع حق التخشيشات بس لازم تحاسب يوم بتسوقه وايد خديّ في الشارع !!
اذا حبيت تقدر تاخذلك نيسان رقم 2 موديل 2005 .. نظيف بيكون..

[شرجاوي]

لماح تبا تعذبه بالبترول .. يا ريال شو فتك .. والله بالوعه ... موتر ولد خالتي تم عندي اسبوع .. ذبحني البترول ... و الجارجر لما اتشوفها من برع ما تتوقع بتكون بهالشكل من الداخل ... لو ياخذ جراند شيروكي احسن

[لمّــاح]

شرجاوي .. من ناحية بترول اسأل مجرب :harhar1:
بس الموتر ماعليه كلام، مريح و ينفع في كل مكان و حق كل الاوقات ..

الجارجر صح كلامك الي يشوفها من برع يتوقع شي احسن من داخل ..

عموما هاي هي المواتر الي في بالي الحين اذا حصلت شي بخبركم :)

[شرجاوي]

الاستيشن اريح .. على الاقل ما فيه ونة الدفريشن شرا النيسان و الاستيشن شيك متحرك

[لمّــاح]

الاستيشن صح مريح خصوصا كراسيه اريح عن النيسان ..

بس انا النيسان يريحني اكثر عن الستيشن .. و ونة الدفريشن هاذي عاديه و السبب هو الي يسوق السيارة اكيد لاعننها لعان ..
مادري، اشوف النيسان شبابي اكثر عن الستيشن .. و من ناحية المشي النيسان يروح عن الستيشن 8 !!
و من ناحية السعر، الستيشن 8 فل اوبشن ويا شاشة تقريبا ب 208 .. النيسان فل اوبشن بدون شاشه 160-165 .. خلنا نزيد بحد أقصى 10000 جيمة الشاشة يعني 175 بالكثير !! يتم ارخص عن الستيشن ..

[شرجاوي]

عالعموم ذنيني .. تبا نصيحتي .. خذلك فكترا 2.2 والله ما عليها كلام .. ما تحصل سياره شراتها من مواصفات و سعر و اهم شي راحة البال ( خذ الموتر اللي يعيبك )

[شرجاوي]

من ناحية المشي .. بالاستيشن مال ابوي ( 6 سلندر ) اروح عن الفتكات 2006 و 2005 سواء كانوا جير عادي ولا توماتيك ( اروح عنهم فالخط )

[لمّــاح]

النيسان مقفول عال 195 و بعظهم 200 .. لكن مب كلهم اييبوون هالسرعة ..
اربيعي كان عنده واحد اييب 180 بزور و قوة .. !
اتكنسل، خذله بعد نيسان لكن من وكالة بوظبي .. مب مقفول و عادي يعق فوق ال 220 ..

بخصوص الفكترا .. السيارة زينه و ترا الناس اذواق لاتمشي على كلام فلان و علان لأنك انته الي بتسوق السيارة مب هم .. تقدر تسأل حد مجرب السيارة او انك تجربها بروحك و تستخير ..

[شرجاوي]

بس شوف الفرق .. 4.8 280hp و خمس غيارات ,,, الاستيشن 4.5 و على ما اعتقد 230 حصان و 4 غيارات .. الفرق واضح و النيسان اخف من الاستيشن ... قوة النيسان الحقيقيه 220 حصان ( القوه اللي تطلع من التاير مب المكينه )

[لمّــاح]

بعد صح ...

انا شخصيا احب النيسان، له مزته الخاصة في السواقة .. انته مجربنه اكيد، شو رايك فيه ..
؟؟