حرااااااام عليكــــــــــم

[خيال الروح]

’عنــدها عــزة نـفس‘

مـــــا اعتقد انه في شخص ما عنده عزة نفس ,,

:

[الذهــب]

هلالالالالالالالالا والله
شحالكم عساكم طيبين

اشكرك اخوي على نقلك لنا هذا الخبر

وانا قريت الخبر اليوم .. في الجريدة

في البداية علينا ان نطرح تساؤلات لهؤلاء الازواج ..

1/ سبب اختياره الزوجه الاجنبية وترك الزوجة المواطنه ؟

2/ ما يوجد في الاجنبية غير موجود في المواطنه ؟

3/ بما انك تزوجت مواطنه ورضيت بتكاليف الزواج .. فلماذا بعد ذلك اتجهت للاجنبية ؟

هذه بعض التساؤلات التي يجب ان نعرفنا من قبل الازواج

وابصراحه 60% نسبه كبيره جدا ... اذا كان 60% متزوجين من اجنبيات .. ولدينا نسبة كبيره في الطلاق

فكم نسبة المتزوجين من مواطنات ...1% ؟؟!!

بعض الاحيان لا نلوم الشاب اذا فكر الزواج من اجنبيات .. عندما يفكر بتكاليف العرس ..

ولكن 60% متزوجين من مواطنات ورضوا بتكاليف الزواج .. ثم يتزوجون من اجنبيات .. لماذا ؟

في السابق نقول ان المربيات هم الذين يدمرون ابناءنا .. والآن نأتي بأجنبية لكي تلد هذا الطفل وتعلمه من تقاليدها وسلوكياتها ..

الغريب من الامر .. ان شبابنا والحمدالله كلهم مثقفين ويدركون كل الامور التي حولهم .. ويعرفون اخطار والمشاكل التي سوف يقعون فيها اذا ما تزوج من اجنبية .. ولكن مع ذلك .. يتزوجون من اجنبيات

يعني بكل صراحه صدمه كبيره لما يرى المرء 60% من متزوجين من اجنبيات مطلقين زوجاتهم المواطنات !!

اعتقد سنجد 10% قد يحق لهم الزواج من اجنبيات .. يمكن بسبب معاملة زوجته له او امور زوجية

لكن 60% يعانون مشاكل من زوجاتهم المواطنات ويتزوجون من مطلقات ... لماذا .. شو السبب ؟؟
هذا ما يحيرني .. بكل صراحه

شكرا لك اخوي .. ويعطيك العافيه

O.o الحقوق محفوظه لـ الذهــــب o.O

[صدى جوفي]

[COLOR="Navy"]
ظـــاهــريــاً:
لـيـش المـواطنـة مب مستـعدة تقـدم تنازلات لريلهـا.. بكــل بســاطــة شــادة الـظـهر بأهـلـهـا .. عـنـدها راتـب وسـيـارة - ولهـا كيـانـهـا - وبالخــط الـعـريض ’عنــدها عــزة نـفس‘ يـعـنـي الطــلاق ما راح يسبب لهـا أزمــة سوى المسـمى - مطلقة -
القصـــد أنهـــا تكــــابر فماعندها استعداد تقدم تنازلات

أمـــا الــوافــدة غــير فهــي مــا تــغـربت عــن أهــلهــا ودارهــا الا لأنهــا محتــاجــة - مب كلهــن طبعاً- فــهــي تحــاول قــدر الامكــان تــكسب - مصــدر رزقــها - والا بينقــطع عنــها..

^
^
^
هـــذي مجــرد افــتــراضــات

حقــيــقــةً :
ســواء كانت مــواطنــة أو وافــدة ،، اللـــي معــدنهــا طيب وزوجــها مو مقــصر بهــا ما تفرط فيه

^
^
^
وهذا رأيي

[ولد الحكومة]

وعليكم السلام والرحمة الله وبركاااته

شووو السالفه موضوعي سوى زوبعه ويوووووله في المنتدى خخخخ

صباح الخير ... كيفكم وشو اخباركم

الصراحه مب عارف كيف اشكركم ، وماشاءالله على هالردود الحلوووة ... واشكرك كل واحد رد على الموضوع ...

1. لماذا يحق للرجل أن يتزوج من الأجنبية بينما تهدد المرأة المواطنة اذا تزوجت من أجنبي بسحب جنسيتها ويحرم على أبنائها التجنس بجنسيتها؟؟

2. لماذا لا يتم الزام المواطن بقوانين صارمة تردعه من الزواج من أجنبيه؟؟

شورايكم :nono:

[أمواج]

1. لماذا يحق للرجل أن يتزوج من الأجنبية بينما تهدد المرأة المواطنة اذا تزوجت من أجنبي بسحب جنسيتها ويحرم على أبنائها التجنس بجنسيتها؟؟
2. لماذا لا يتم الزام المواطن بقوانين صارمة تردعه من الزواج من أجنبيه؟؟

أنــا هاللي قاهرني في هالمـوضووع . . . إنه الريــال مايتحــاسب على زواجه من الوافدات . . .
بس المواطنه لما تتزوج وافد تنسحب عنها الجنسيــه . . وتنحـرم من أي معاونه من الشؤون الاجتماعيه في حالة الطلاق او موت الزوج . . . وغيــر هذا كــله الابنــاء بيحســون بالتفرقــه بينهم وبين الثانيــن . . . يكــفي إنه المواطنــة بتحــس نفســها غريـبه في بــلادها . . .
الصــراحه ماتنــلام لما تتزوج من وافـد . . يوم شبــابنا خــلوا البنــات للغرب واتجهـوا للزيجات الوافدات . . .
انا عن نفســي ما اعارض زواج الوافدات . . . بس لايحاسبوون البنات لما يتزوج الوافدين . . . وبلاش هالقوانين . . .

[ولد الحكومة]

وعليكم السلام ورحمة الله وبركاااته

المتفيزره عالعرقووب :
والله اختي انا اشوووف هالقرار على الاثنين ، يعني المواطن حرمته ما تنعطى جواز ولا جنسيه ... ام المواطنه فانهااا في حالة انهااا تزوج وافد وبدووون موافقة الديوان تسحب عنهااا الجنسيه والجواز وينقطع عنهااا كل شيء اما الابناء فانهم يحصلووون على الجواز بالتبعية. ( مع الام ). بس القرار قاسي على المواطنه اكثر .

شو الحل والله اعلم !!! :nono:

شكرا اختي عالمرور

ولد حكومتج :bow:

[لمّــاح]

اخــتــي المتفيزره ..:negab:

بس المواطنه لما تتزوج وافد تنسحب عنها الجنسيــه . . وتنحـرم من أي معاونه من الشؤون الاجتماعيه في حالة الطلاق او موت الزوج

و كذلك الأجنبـية الي بتاخذ مواطن، بينسحب عنها جوازها الأصلي و بتنقطع عنها كل المعونات و الخدمات الحكومية ( في بلادها ) بحكم انها تتبع زوجها الحين في الجواز .. و نحن في الدولة وايد متساهلين ويا المواطنة الي تاخذ وافد، الجواز يتم عندها على ما اضن و ينزللها معاش شهري من الشؤون و عيالها يدرسونهم في المدارس الحكومية و يتعالجون في المستشفيات الحكومية.. لو كنا في دولة ثانية مابنشوف هالشي، الله يرحمك يازايد !!

اوكي خلينا نشوف هالقانون من وجهة نضر ثانية، ليش مانعتبر ان القوانين الصارمة هاذي، على حد تعبيرج، اسلوب ضغط و تنبيه من الحكومة لأولياء الامور عشان تفهمهم و تقولهم يــا ناس يــا أولياء امور هالبنات، بنتكم هاذي محد بياخذها من برع البلاد و مالكم غير ولدكم الي هو ولد بلادكم، لاتضغطون على الولد بهالمصاريف الي مالها داعي، قللو من المهر و الطلبات الزايده ..والله اعرف عوايل، هم الي يخطبون الريال الزين لبنتهم و يساعدون الولد في مصاريف العرس .. أتمنى لو كل العوايل جذه جان ما اتجه تفكير الشباب للزواج من الاجنبيات ..
و بصراحه نحن مب ناقصين خلل في التركيبة السكانية، اتوقع اكبر غلط ان البنت تاخذ اجنبي لأنها بتتبع ريلها في الاسم و الجنسية و هالشي بتترتب عليه نتايج سلبية كثيره ( اكثر عن الريال ) و لاتنسين ان الحريم أساس و رمز الكرامة و الشرف، تخيلي البنت تاخذ وافد مثلا من بعض الدول المسلمة لكن FREE شويه ( مابا اذكر أسامي الدولة عشان محد يزعل ) الحرمة هاذي بتفقد حشمتها و هيبتها بيكون عادي عندهم الاختلاط في بلادهم، شي طبيعي اذا كانت عندهم عزيمه الحريم و الرياييل في نفس الميلس .. و الحرمة عادي اتصافح الريال .. :puppyeyes:
او خليني اضربلج مثال ثاني، مثل مابعض الشباب الله يهديهم ياخذون سيلانيات و هنديات تخيلي هالمواطنة تاخذلها سيلاني مثلا، تتوقعين اولا اهلها بيوافقون ؟؟ ثانيا تتوقعين انها بتقدر اتعيش في الهند ولا سرلانكا ؟؟ أكيد لأ :kkk:
و تخيلي تاخذ فلبيني او انجليزي .. نفس الكلام !! :nono:

يكــفي إنه المواطنــة بتحــس نفســها غريـبه في بــلادها

محد قالها تاخذ واحد من برع، مب هي صاحبة القرار ؟؟ خل تتحمل نتايج قراراتها ..

الصــراحه ماتنــلام لما تتزوج من وافـد . . يوم شبــابنا خــلوا البنــات للغرب واتجهـوا للزيجات الوافدات . . .

الصراحة ما الوم الشباب يوم خذو وافدات، الوافدات خصوصا اكثر حرصا على البيزات من المواطنة .. أستغرب من المواطنة كيف ترضى انها تبتدي حياتها الزوجيه مع زوج مديون و السبب هو ( اوامرها و شروطها الزايدة) و كأنها تعتبر الزواج لعبة و فشخرة و خقة ..
المهر حتى لو كان رخيص، لكن هناك أشيا تتبع المهر من زهبة و صالة افراح و و و .. ماعليه، هالأشيا كلها تهون، بس الشي الأكبر الي يأرق الواحد هو المسكن .. اذا عرس وين بيسكن الحرمة ؟؟
الاجارات اتزيد، اسعار البناء زادت في البداية 50% بسبب ارتفاع اسعار السميت، ومع زيادة اسعار الديزل رفعو الاسعار اكثر و اكثر .. انا عندي خلفية جيدة عن المقاولات، على سبيل المثال اذا بنيتو بيت قبل 4 سنين بجيمة 600,000 ، نفس البيت اذا بغيتو تبنونه اليوم ما ابالغ اذا قلتلكم سعره بيكون بين المليون و الامية الى المليون و الميتين ألف .. !
الاجارات اتزيد، و اسعار البنا ترتفع و رواتب الموضفين مثل ماهي عليه الا قبل فترة زادوها 25% ..

نفترض ان الولد قدر يرتب كل هالاشيا .. بيفكر في النقطة الثانية الي هي الطلاق .. في حالة عدم توافق الزوجين او مثلا صارت مشاكل تحتم عليهم الطلاق، بيسأل نفسه، هل بإمكاني اني اطلقها ولا ؟؟
الجواب نعم، اذا كان المؤخر معقول، لكن خسارة البيزات الي دفعتها عالعرس و النقاط الي فوق ..
الولد ايضا يفكر في الوافدة اذا صار شي و تحتم عليهم الطلاق، بيقدر يطلقها لأنه مابيكون مخسر فلوس وايد على العرس ..

اوكي خلونا ننسى الطلاق، نرجع للعرس، و نفترض اني وافقت على كل هالمصاريف بحكم اني اقدر ادفعهن كـــاش و بدون ديون مثلا .. انتهينا من سوالف البيزات، بندخل في سوالف الزواج و الحياة الاجتماعية .. الي أتوقعه اني باخذ حرمة بتسعدني طول حياتي، بتوقف في صفي و بتكون لي سند و ضهر .. مب وحده بتنكد عليه حياتي، دلوعة ابوها و امها من تستوي مشكلة شرت قشارها وسارت بيت ابوها، و من ارفض لها طلب قالت يا تسويلي اياه الحين أو اخبر ابويه و اخواني عليك .. ! :qor9anah:
معـــظم الشباب الي تزوجو في آخر كمن سنة انصدمو من حريمهم، مايعرفون يطبخون، ماعندهم اسلوب جيد في التعامل مع الريال لانها تستحي منه فهالحيا الزايد و المتكرر بيخلي الزوج ينفر من زوجته .. الكثير من المواطنات معروف عنهن حبهن للمضاهر و الشباب يدرون ان البنت تتودد لريلها يوم تحتاي بيزات و ماتتعدل و تتمكيج الا اذا كانت معزومه ولا عندها مناسبة .. !
ويا الايام، يتكون حاجز بين الريال و حرمته و توصل حياتهم لدرجة مايتصورها البعض و تكون كلها رسميات في رسميات..
لو كانت تستاهل، و لو هي ضحت عشانه و عطته من وقتها و اهتمامها، مستحيل يبدي شغله عليها و بيخليها من أولويات حياته .. فتنتهي حياتهم الزوجية بالــطلاق و أكبر دليل ان هالأمثلة الي كتبتها فوق واقعية، هي نسبة الطلاق الخيالية .. !
انا ما اعمم هالكلام على كل البنات، شي وايد بنات الله راضي عليهن، لكن دايما الفئة الشاذة هي الي تنتشر اخبارها و علومها عند الناس فيضن الجميع ان معظم أو كل البنات من نفس طينة هالفئة من البنات .. و أنا عن نفسي ماباخذ او وافدة، بنت بلادي أولى بي .. بس على الله انحصل ( نحن الشباب ) بنت زينه تعرف كل هالاشيا و تقدر الحياة الزوجية و تعتبر الزواج تضحية و علاقة مقدسة، ماتعتبرها مفتاح للحرية الزايفة و ماتعتبر الريال مادة تلعب فيه و تسلبه كل مايملك..

انا عن نفســي ما اعارض زواج الوافدات . . . بس لايحاسبوون البنات لما يتزوج الوافدين . . . وبلاش هالقوانين

نفترض تقدملج مصري، بتوافقين ؟؟
و بحكم القوانين، بينسحب جوازج و بيعطونج جواز مصر و بتتبعينه في الاسم .. و حطي في بالج ان المصرية حتى اذا خذها مواطن بيسحبون عنها جواز مصر بحكم انها تتبع ريلها الحين ..

----

السموحه، ادري ردي طويل لكن كلام في خاطري قلت بكتبه جدامكم ..

[لمّــاح]

اختي المتفيزره ..

بخصوص الدراسة، ركزي على الي قلته، انا ماقلت جامعات حكومية، قلت مدارس حكوميــة ..
تعالي دبي و تأكدي ...
المستشفيات، كـــانت تقدم لكن الحين لأ ..

فكيــف في هالدولــة تنحرم فيه الحرمــه من إنها تختــار شــريك حياتها بحريــة . . .؟!

محد قــال انها تنحرم، الحكومة ما اتخذت هالقرار منه و الدرب، اتخذته عشان يحافضون على بنات البلاد، بنات زايد الله يرحمه، و يدرون و يعرفون ان البنت راحتها ويا ولد بلادها مب ويا الغريب خصوصا اننا في دولة غنية و وايد ناس يحسدونا على النعمة الي عايشين فيها :)

بس ليش دايمــا تقــولون إنه الغــلط من الحرمــة مب من الريــال . . .؟!

مب منهم بس، من أهلها الي يطلبون طلبات مالها داعي و من الريال الي ساعات يسيئ اختياره او يكون تفكيره غلط و ينضر لكل البنات على انهن من الفئة الشاذة ..

عــاد اللي يسمــع الحين ماعدنــا إختــلاط في العزايــم . .

انا في حياتي مادشيت ميلس مختلط الا اذا كانو من الاهل من الدرجة الاولى !!
و اذا هالشي موجود، اكيد بيكون عند فئة قليلة من العوايل .. ما اتخيل واحد يعزم ربعه و يعرفهم على امه و خواته و اييلسهم ويا بعض في نفس الميلس .. !

و بعدني أشوفج مصرة على زواج المواطنة من أجنبي، و كنت اتمنى اني اعرف رايج اذا هالموقف صادفج أو خلينا انقول صادف أعز وحده ع قلبج، اربيعتج من سنين و اكثر من مجرد اربيعة و اخت، و تقدمولها ثنينه واحد مواطن عادي ( مب ملتزم ) و وافد عربي ملتزم و شاورتج توافق على منو، شو بيكون ردج ؟؟
و خلينا انغير السيناريو و نفترض ان الي تقدملها بس الوافد و اخلاقه جدا عالية و هي بعدها توها مكملة ال 20 سنة ( يعني مب كبيره او فايتنها قطار الزواج ) شو بيكون ردج عليها ؟؟

وأربعة أبناء لا أمانع أن يحمل أبنائي جنسية غير جنسيتي،

تراها ضلمت عيالها !!
تخيلي كيف بيجابلون عيال خالتهم، اذا مثلا قررو يسيرون العمرة في اجازة نهاية الاسبوع .. لازم يقدمون على ويزة و يتريونها لين ماتطلع .. هذا غير اذا اشترط الريال على حرمته انها تسكن وياه في بلاده .. !
---
اختيه سبيجة ..

ردج و رايج صح 100% عيبني وايد ..

.. تباك لشخصك..مب اسمك ولا مخباك...بتقولي ..وينها؟؟؟

موجودات، انا ماقلت كل البنات، قلت نسبة مب صغيره منهن تفكيرهن غلط و المشكلة ان هالفئة من البنات سمعتهن خربت على البنات الزينات !!
و في رايج شو هي الطريقة الانسب عشان الواحد يختار الزوجة الصح ( مب مثل ماقلتي يشوف الصورة و يسأل عن الشهادة ) و نفس الكلام للبنت بعد .. ؟

الحل يا جماعة الخير مب في حرمه اجنبية ..ولا ريال اجنبي ... الحل في راس كل شاب وابنيه ...حابين انهم يعيشون حياتهم براحه ... بس يبونها على الجاهز... الدنيا ما فيها شيء تحصله على الجاهز ..لازم تتعب ولازم تجرب ..عسب تلقى الأحسن ..وتعيش مرتاح .. إذا انته تنازلت اليوم ... هي اكيد بتتنازل باجر ..وبالعشرة كل شيء بيكون واضح بينكم ...عمره العناد والعصبيه ما بنت بيت وحياة مستقره..

عيــن العقل .. :)

شكرا على التعقيب الحلو هذا ..

[لبن مثلج]

السلام عليكم

اعصابكم ،،

فريق الصبايا وفريق الشباب

انا مع لماح ،، المواطنة في بعض الاحيان ماتعرف تكسب ريلها ( والحريم كيدهن عظيم) ليش ماتستغل هالنقطة واتخليه خاتم في صبعها مثل ماتسويبه الوافدة (مب كل الرياييل) الي شخصيتهم تعبانة وكلمة اتوديهم وكلمة اتيبهم :negab:

وانا مع المتفيزرة: ترا الرياييل من اتزيد بيزاتهم،، يتخبلون :m7tar: ،، على طول ساروا واتزجوا هالوافدة ،، والادهى والامر انهم يعززونها ويكرمونها ويدلعووووونها اخر دلع ، ويستخسرون في المواطنة كل شي (ويقولون ماتراعينا) :narr:

يعني الطرفين غلطانين ..

بس اللوم الاكبر على الرياييل لانه مايعيبهم شي :ice:

[لمّــاح]

عـدنــا . .

اختيه المتفيزره ..

بــروووحك قــلت قبــل يعني مب في وقتنــا الحــالي . . أهلينا قبــل ينتــازلوون عن أشيااء وايده عشان عيشتهم قــبل صعبــة . . . لكــن ماعتقد في أحد الحين مستعــده يتنــازل عن ربــع حقــه . .

اختيه حطي في بالج، مايمر على الانسان زمان الا و فيه مشاكله .. زمان لوّل كانت عندهم ضروفهم غير عن ضروفنا و مايستوي انقيس مشاكل قبل ويا مشاكلنا الحيـن ..
على سبـيل المثـال، بعض الحريم مايتنازلن عن حقهن في الكسب المعيشي (( الشغل )) ..
بعض الحريم، مايتنازلن عن حقهن في مسكن ملائم، بعض الرياييل اتمر عليهم ضروف يضطرون بسببها انهم يتركون بيتهم و يسكنون في شقة صغيره ..
نسبة كبيره من الحريم، مايتنازلن عن الكماليات و يضغطون على الريال بشكل فضيع بس عشان يشتريلهم هالكماليات و السبب هو خوفها من القيـل و القال و فلانه ريلها ماخذالها و اربيعتي دوم اتعايرني و للعلم هالفئة وايد كبيره !! و هي الفئة الي يخاف منها الشاب ..

أنــا ويــاك في هالشي . . . بس مب حــرام نسبــة العــوانس تزيــد عدنــا . . . صح كــل واحد يدور راحتــه . . بس مايفكــرون ببنــات بلاادهم . . . لمنــو بيخــلون بنات البــلاد . .؟! للغــرب يعني . . ؟!
والله هــذيل يوم إنه فيــهم هبــّه عالعــرس ياخذوون اللي عدنا ويفكــونا من هالمشــكله . .

بالمقابل أقولج، مـب حرام الولد يصرف كل هالبيزات على المواطنة و بالمقابل يحصل منها العناد و مايرتاح ... الخ ؟؟
بعض الاوقات، يتمنى الولد انه ياكل من ايد حرمته وبذمتج من بين كل كمن بنت بتحصلين بنت تعرف تطبخ ؟؟
و أقولج بعد، مب حرام الأهل يضغطون على الولد و يطلبون مهر غالي و من هالأشيا .. ؟

أنــا أستــغرب من شــي واحد بــس . . .
إنه الريــال يو يتزوج وافــده . . مايــلقى نفــس المعــاناة اللي تحصــلها المواطنـة لما تتزوج وافــد . .
أبغــي أعرف ليش التفــرقه . . .
شــاطرين بس يطبــقون قــوانينهم على الحريــم . . اما الريــايل لا . .

السـبب بسيط جدا، الحرمة تتبع الولد في الاسم و الاولاد يتبعون الابو في الاسم .. و ثانيا معروف ان البنت تنجر ورا عواطفها و سهل على الريال انه يلعب عليها، فتخيلي يفتحون المجال للوافدين بأنهم اذا خذو مواطنه بيحصلون الجواز و الجنسية .. تتوقعين في بنت بتسلم ؟؟ أكيد لأ !!

اختي صـدى جوفي ..

لـيـش المـواطنـة مب مستـعدة تقـدم تنازلات لريلهـا.. بكــل بســاطــة شــادة الـظـهر بأهـلـهـا .. عـنـدها راتـب وسـيـارة - ولهـا كيـانـهـا - وبالخــط الـعـريض ’عنــدها عــزة نـفس‘ يـعـنـي الطــلاق ما راح يسبب لهـا أزمــة سوى المسـمى - مطلقة -

الي بيجرب الطلاق، بيعرف معنى كلمة مـطلـقة !!
و لعلمج الاهل مابينفعون البنت، هي شاده ضهرها فيهم الحين لكن باجر محد بينفعها غير ريلها، و لعلمج رضا الله من رضا الزوج .. خلها تشد ضهرها في هلها، بينفعونها، غريبه هالانسانه الي تبدي رضا اهلها على رضا الله و الزوج .. !

[شمعة أمل]

مافيها شي غلط ااذا الواحد خذ وحده اجنبيه .. بطريقه ما احسن لانه عياله الحمدالله يكونون بخير ومايبتلون بامراض بسبب التلخبط في الجينات
وتحصلون انه يوم ياخذ اجنبيه تساعده وايد .. مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله .. بس اذا مواطنه ريلها يسوي تقريبا كل شي

وبعدين المواطنه ماتسوي شييييييي عشان تحل المشكله.. محد قالها لاتقبل واحد اجنبي اذا خطبها سواء كان خليجي ولا شامي ولا هندي ولا ايراني ولا امريكي ولا استرالي .. اهم شي دينه وبس>_<

[خيال الروح]

عياله الحمدالله يكونون بخير ومايبتلون بامراض بسبب التلخبط في الجينات

ليـش اذا خذا مواطنه بيبتلي بامراض وغيره ,,
الحـمدلله ما فيــنا شي ,, :nono:

مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله .. بس اذا مواطنه ريلها يسوي تقريبا كل شي

أغلب الريــايل الحـين ما يبون حريمهم يشتغلون,,
المــواطنـه تقدر تشتغل حـالها حال الاجـنبيه ( مـافيـها شي )

وبـعدين الريـاييل عـدنا ما يحـبون حريـمهم يخـالطون الريـاييل ,,
مـثل انـها تروح بروحـها عند محامي ( لانها مب تعوده تروح بروحها بدون محرم)
امــا الاجنبـيه بحـكم طبيـعه معيشتها مـتعوده على هالشـي ,,

:

بــس ليـش حاطين على المواطنــات بهالطريـقه ( صبوع ايدكم مب واحد )
كــانهن مب زينـات
والاجنبيــه هي الافـضل والاحســن

:nono:


:

[شمعة أمل]

ماقصدت انه نحن فينا امراض .. بس عادتاَ ياخذون عيال عم ولا حد يقربلهم من بعيد .. وهذا الى ييب الامراض!


ومب كل الريايل مايبون حريمهم يشتغلون.. الحينه وايدين يبون حريم مثقفين ويشتغلون عشان يساعدونهم في الفواتير لانه كل شي استوى غالي .. ولو لاحظتي وايدين يوم يعرسون يكملون شغلهم بس اول ما يربون ويبون عيال يوقفون شغل لكن يبون بشاكير؟ ليش انزين؟ يا تيبين بشكاره وتشتغلين ولا يا تيلسين في البيت بدون بشكاره



نحن ماعنا شي ضد المواطنات < يعني شو عنا شي ضد عمارنا


بس هالحقيقه بصراحه .. والزواج من اجنبيه less stressful

[صريح]

شمعة أمل

وتحصلون انه يوم ياخذ اجنبيه تساعده وايد .. مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله

هالشـي نشوفه فالافـلام اكثر شي بس فالواقع مب دوم !

محد قالها لاتقبل واحد اجنبي اذا خطبها سواء كان خليجي ولا شامي ولا هندي ولا ايراني ولا امريكي ولا استرالي .. اهم شي دينه وبس>_<

ليــش ما تعرفين انه الحيـن لازم تاخذ اذن من الداخليه "و هل شي يطول" ولا ممكن يسحبون جوازها ..

بس هالحقيقه بصراحه .. والزواج من اجنبيه less stressful

السموحه بـس مـول ما يخصه !
تأكدي الــ stress مابي لانها مواطنه ... الــ stress بيي من تصرفــات و سلوك الحرمه سواء كانت مواطنه ولا اجنبيه

و السمـوحه

[تحفه]

هممم .. ليش التحسيف ؟! كلنا اوادم .. مواطنه هنديه اسبانيه المانيه سويسريه سرلنكيه ولا فلبينيه .. اذا كلنا ناس وعنا مبادئ .. ونستاهل نعيش عيشه حلوه!!

لا تقيمون الناس بمبدأ والله هاي مواطنه يعني تستاهل وهاي وافده ماتستاهل .. فكرو بشخصهم عم نفسهم .. إذا كانو احسن من البنت الاماراتيه .. ليش لأ؟!


حمدلله عمري ما قلت هاذا مواطن وهاذا لأ .. وانا اشوف ان الأوليه للزينين حتا في امور الزواج


وعن مسئلة ان الرياييل خلصو .. مب مشكله .. باجر يوم بقرر اتزوج .. وماحصلنا مواطننين نتزوجهم لأنهم تزوجو اجنبيات بتززوج من برع .. ( ويهي استوى لوح )