حرااااااام عليكــــــــــم

[خيال الروح]

’عنــدها عــزة نـفس‘

مـــــا اعتقد انه في شخص ما عنده عزة نفس ,,

:

[الذهــب]

هلالالالالالالالالا والله
شحالكم عساكم طيبين

اشكرك اخوي على نقلك لنا هذا الخبر

وانا قريت الخبر اليوم .. في الجريدة

في البداية علينا ان نطرح تساؤلات لهؤلاء الازواج ..

1/ سبب اختياره الزوجه الاجنبية وترك الزوجة المواطنه ؟

2/ ما يوجد في الاجنبية غير موجود في المواطنه ؟

3/ بما انك تزوجت مواطنه ورضيت بتكاليف الزواج .. فلماذا بعد ذلك اتجهت للاجنبية ؟

هذه بعض التساؤلات التي يجب ان نعرفنا من قبل الازواج

وابصراحه 60% نسبه كبيره جدا ... اذا كان 60% متزوجين من اجنبيات .. ولدينا نسبة كبيره في الطلاق

فكم نسبة المتزوجين من مواطنات ...1% ؟؟!!

بعض الاحيان لا نلوم الشاب اذا فكر الزواج من اجنبيات .. عندما يفكر بتكاليف العرس ..

ولكن 60% متزوجين من مواطنات ورضوا بتكاليف الزواج .. ثم يتزوجون من اجنبيات .. لماذا ؟

في السابق نقول ان المربيات هم الذين يدمرون ابناءنا .. والآن نأتي بأجنبية لكي تلد هذا الطفل وتعلمه من تقاليدها وسلوكياتها ..

الغريب من الامر .. ان شبابنا والحمدالله كلهم مثقفين ويدركون كل الامور التي حولهم .. ويعرفون اخطار والمشاكل التي سوف يقعون فيها اذا ما تزوج من اجنبية .. ولكن مع ذلك .. يتزوجون من اجنبيات

يعني بكل صراحه صدمه كبيره لما يرى المرء 60% من متزوجين من اجنبيات مطلقين زوجاتهم المواطنات !!

اعتقد سنجد 10% قد يحق لهم الزواج من اجنبيات .. يمكن بسبب معاملة زوجته له او امور زوجية

لكن 60% يعانون مشاكل من زوجاتهم المواطنات ويتزوجون من مطلقات ... لماذا .. شو السبب ؟؟
هذا ما يحيرني .. بكل صراحه

شكرا لك اخوي .. ويعطيك العافيه

O.o الحقوق محفوظه لـ الذهــــب o.O

[لبن مثلج]

السلام عليكم

اعصابكم ،،

فريق الصبايا وفريق الشباب

انا مع لماح ،، المواطنة في بعض الاحيان ماتعرف تكسب ريلها ( والحريم كيدهن عظيم) ليش ماتستغل هالنقطة واتخليه خاتم في صبعها مثل ماتسويبه الوافدة (مب كل الرياييل) الي شخصيتهم تعبانة وكلمة اتوديهم وكلمة اتيبهم :negab:

وانا مع المتفيزرة: ترا الرياييل من اتزيد بيزاتهم،، يتخبلون :m7tar: ،، على طول ساروا واتزجوا هالوافدة ،، والادهى والامر انهم يعززونها ويكرمونها ويدلعووووونها اخر دلع ، ويستخسرون في المواطنة كل شي (ويقولون ماتراعينا) :narr:

يعني الطرفين غلطانين ..

بس اللوم الاكبر على الرياييل لانه مايعيبهم شي :ice:

[صدى جوفي]

[COLOR="Navy"]
ظـــاهــريــاً:
لـيـش المـواطنـة مب مستـعدة تقـدم تنازلات لريلهـا.. بكــل بســاطــة شــادة الـظـهر بأهـلـهـا .. عـنـدها راتـب وسـيـارة - ولهـا كيـانـهـا - وبالخــط الـعـريض ’عنــدها عــزة نـفس‘ يـعـنـي الطــلاق ما راح يسبب لهـا أزمــة سوى المسـمى - مطلقة -
القصـــد أنهـــا تكــــابر فماعندها استعداد تقدم تنازلات

أمـــا الــوافــدة غــير فهــي مــا تــغـربت عــن أهــلهــا ودارهــا الا لأنهــا محتــاجــة - مب كلهــن طبعاً- فــهــي تحــاول قــدر الامكــان تــكسب - مصــدر رزقــها - والا بينقــطع عنــها..

^
^
^
هـــذي مجــرد افــتــراضــات

حقــيــقــةً :
ســواء كانت مــواطنــة أو وافــدة ،، اللـــي معــدنهــا طيب وزوجــها مو مقــصر بهــا ما تفرط فيه

^
^
^
وهذا رأيي

[لمّــاح]

عـدنــا . .

اختيه المتفيزره ..

بــروووحك قــلت قبــل يعني مب في وقتنــا الحــالي . . أهلينا قبــل ينتــازلوون عن أشيااء وايده عشان عيشتهم قــبل صعبــة . . . لكــن ماعتقد في أحد الحين مستعــده يتنــازل عن ربــع حقــه . .

اختيه حطي في بالج، مايمر على الانسان زمان الا و فيه مشاكله .. زمان لوّل كانت عندهم ضروفهم غير عن ضروفنا و مايستوي انقيس مشاكل قبل ويا مشاكلنا الحيـن ..
على سبـيل المثـال، بعض الحريم مايتنازلن عن حقهن في الكسب المعيشي (( الشغل )) ..
بعض الحريم، مايتنازلن عن حقهن في مسكن ملائم، بعض الرياييل اتمر عليهم ضروف يضطرون بسببها انهم يتركون بيتهم و يسكنون في شقة صغيره ..
نسبة كبيره من الحريم، مايتنازلن عن الكماليات و يضغطون على الريال بشكل فضيع بس عشان يشتريلهم هالكماليات و السبب هو خوفها من القيـل و القال و فلانه ريلها ماخذالها و اربيعتي دوم اتعايرني و للعلم هالفئة وايد كبيره !! و هي الفئة الي يخاف منها الشاب ..

أنــا ويــاك في هالشي . . . بس مب حــرام نسبــة العــوانس تزيــد عدنــا . . . صح كــل واحد يدور راحتــه . . بس مايفكــرون ببنــات بلاادهم . . . لمنــو بيخــلون بنات البــلاد . .؟! للغــرب يعني . . ؟!
والله هــذيل يوم إنه فيــهم هبــّه عالعــرس ياخذوون اللي عدنا ويفكــونا من هالمشــكله . .

بالمقابل أقولج، مـب حرام الولد يصرف كل هالبيزات على المواطنة و بالمقابل يحصل منها العناد و مايرتاح ... الخ ؟؟
بعض الاوقات، يتمنى الولد انه ياكل من ايد حرمته وبذمتج من بين كل كمن بنت بتحصلين بنت تعرف تطبخ ؟؟
و أقولج بعد، مب حرام الأهل يضغطون على الولد و يطلبون مهر غالي و من هالأشيا .. ؟

أنــا أستــغرب من شــي واحد بــس . . .
إنه الريــال يو يتزوج وافــده . . مايــلقى نفــس المعــاناة اللي تحصــلها المواطنـة لما تتزوج وافــد . .
أبغــي أعرف ليش التفــرقه . . .
شــاطرين بس يطبــقون قــوانينهم على الحريــم . . اما الريــايل لا . .

السـبب بسيط جدا، الحرمة تتبع الولد في الاسم و الاولاد يتبعون الابو في الاسم .. و ثانيا معروف ان البنت تنجر ورا عواطفها و سهل على الريال انه يلعب عليها، فتخيلي يفتحون المجال للوافدين بأنهم اذا خذو مواطنه بيحصلون الجواز و الجنسية .. تتوقعين في بنت بتسلم ؟؟ أكيد لأ !!

اختي صـدى جوفي ..

لـيـش المـواطنـة مب مستـعدة تقـدم تنازلات لريلهـا.. بكــل بســاطــة شــادة الـظـهر بأهـلـهـا .. عـنـدها راتـب وسـيـارة - ولهـا كيـانـهـا - وبالخــط الـعـريض ’عنــدها عــزة نـفس‘ يـعـنـي الطــلاق ما راح يسبب لهـا أزمــة سوى المسـمى - مطلقة -

الي بيجرب الطلاق، بيعرف معنى كلمة مـطلـقة !!
و لعلمج الاهل مابينفعون البنت، هي شاده ضهرها فيهم الحين لكن باجر محد بينفعها غير ريلها، و لعلمج رضا الله من رضا الزوج .. خلها تشد ضهرها في هلها، بينفعونها، غريبه هالانسانه الي تبدي رضا اهلها على رضا الله و الزوج .. !

[شمعة أمل]

مافيها شي غلط ااذا الواحد خذ وحده اجنبيه .. بطريقه ما احسن لانه عياله الحمدالله يكونون بخير ومايبتلون بامراض بسبب التلخبط في الجينات
وتحصلون انه يوم ياخذ اجنبيه تساعده وايد .. مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله .. بس اذا مواطنه ريلها يسوي تقريبا كل شي

وبعدين المواطنه ماتسوي شييييييي عشان تحل المشكله.. محد قالها لاتقبل واحد اجنبي اذا خطبها سواء كان خليجي ولا شامي ولا هندي ولا ايراني ولا امريكي ولا استرالي .. اهم شي دينه وبس>_<

[خيال الروح]

عياله الحمدالله يكونون بخير ومايبتلون بامراض بسبب التلخبط في الجينات

ليـش اذا خذا مواطنه بيبتلي بامراض وغيره ,,
الحـمدلله ما فيــنا شي ,, :nono:

مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله .. بس اذا مواطنه ريلها يسوي تقريبا كل شي

أغلب الريــايل الحـين ما يبون حريمهم يشتغلون,,
المــواطنـه تقدر تشتغل حـالها حال الاجـنبيه ( مـافيـها شي )

وبـعدين الريـاييل عـدنا ما يحـبون حريـمهم يخـالطون الريـاييل ,,
مـثل انـها تروح بروحـها عند محامي ( لانها مب تعوده تروح بروحها بدون محرم)
امــا الاجنبـيه بحـكم طبيـعه معيشتها مـتعوده على هالشـي ,,

:

بــس ليـش حاطين على المواطنــات بهالطريـقه ( صبوع ايدكم مب واحد )
كــانهن مب زينـات
والاجنبيــه هي الافـضل والاحســن

:nono:


:

[شمعة أمل]

ماقصدت انه نحن فينا امراض .. بس عادتاَ ياخذون عيال عم ولا حد يقربلهم من بعيد .. وهذا الى ييب الامراض!


ومب كل الريايل مايبون حريمهم يشتغلون.. الحينه وايدين يبون حريم مثقفين ويشتغلون عشان يساعدونهم في الفواتير لانه كل شي استوى غالي .. ولو لاحظتي وايدين يوم يعرسون يكملون شغلهم بس اول ما يربون ويبون عيال يوقفون شغل لكن يبون بشاكير؟ ليش انزين؟ يا تيبين بشكاره وتشتغلين ولا يا تيلسين في البيت بدون بشكاره



نحن ماعنا شي ضد المواطنات < يعني شو عنا شي ضد عمارنا


بس هالحقيقه بصراحه .. والزواج من اجنبيه less stressful

[صريح]

شمعة أمل

وتحصلون انه يوم ياخذ اجنبيه تساعده وايد .. مثلا تشتغل ولو ماتشتغل وتكون ربة بيت تهتم باشيا نفس تدفع الفواتير وجي واذا في اشيغال في البنوك والى عند المحاميين تسير عندهم وتحل المشكله

هالشـي نشوفه فالافـلام اكثر شي بس فالواقع مب دوم !

محد قالها لاتقبل واحد اجنبي اذا خطبها سواء كان خليجي ولا شامي ولا هندي ولا ايراني ولا امريكي ولا استرالي .. اهم شي دينه وبس>_<

ليــش ما تعرفين انه الحيـن لازم تاخذ اذن من الداخليه "و هل شي يطول" ولا ممكن يسحبون جوازها ..

بس هالحقيقه بصراحه .. والزواج من اجنبيه less stressful

السموحه بـس مـول ما يخصه !
تأكدي الــ stress مابي لانها مواطنه ... الــ stress بيي من تصرفــات و سلوك الحرمه سواء كانت مواطنه ولا اجنبيه

و السمـوحه

[تحفه]

هممم .. ليش التحسيف ؟! كلنا اوادم .. مواطنه هنديه اسبانيه المانيه سويسريه سرلنكيه ولا فلبينيه .. اذا كلنا ناس وعنا مبادئ .. ونستاهل نعيش عيشه حلوه!!

لا تقيمون الناس بمبدأ والله هاي مواطنه يعني تستاهل وهاي وافده ماتستاهل .. فكرو بشخصهم عم نفسهم .. إذا كانو احسن من البنت الاماراتيه .. ليش لأ؟!


حمدلله عمري ما قلت هاذا مواطن وهاذا لأ .. وانا اشوف ان الأوليه للزينين حتا في امور الزواج


وعن مسئلة ان الرياييل خلصو .. مب مشكله .. باجر يوم بقرر اتزوج .. وماحصلنا مواطننين نتزوجهم لأنهم تزوجو اجنبيات بتززوج من برع .. ( ويهي استوى لوح )

[خيال الروح]

نحن ماعنا شي ضد المواطنات < يعني شو عنا شي ضد عمارنا

هــذا الشي باين من الرد ,,

:

[سبيجة]

السلام عليكم


النقاش ....وايد محلي الموضوع...وحمسني للرد.....



نبدأ...مصاريف العرس...وايد والمهر مبلغ فيه...والحرمه بطرانه ..وما بتشبع من المشاري واللبس والسوق....والسفر....والصرف...... .:daleel:


سؤال للشباب....؟؟ شو نوع موترك؟؟ وشو السياره اللي تباها؟؟؟ أكيد سعرها ما بيقل عن 100 ألف..رنج سبورت.... وإلا كايين.....وإلا كورفت ....لا اظني لامبرجيني أحلى.....


أقل شيء سيارتك بكم؟؟؟وإذا تبا سياره حلوه وما بتغيرها فترة ....لازم تدفع.... فما بالك في شريكة حياتك.... اللي بتشاركك همومك وأفراحك ...وباجر بتيب ك عيال وبتربيهم...تشوف خساره فيها؟؟؟ يمكن تظهر مب زينه أو طباعها غير عن اطباعك... مب مشكلتها ...مشكلتك انته ...انته اللي اخترتها وطلبتها من بيت ابوها ....كانت يالسه ومرتاحه... :smartass: حتى السياره اللي ماخذنها بالشيء الفلاني ...بتخترب في يوم ...بتخسر عليها...بتدخلها الوكاله ... يعني دفعت أو ما دفعت انته خسران ....بس ليش ما تشوف النواحي الايجابيه ...انك كاشخ فيها...انها سياره قويه ..تتحمل ...بس لازم فيها شيء ...(مب قصدي اشبه الحرمه بالسياره ...بس لأنه الشباب وايد يهتمون في هالموضوع ..ولا تحرجن يا بنات تراني آخذهم على قد عقلهم وعلى الأشياء اللي يحبونها)..


الاختيار في مسألة الزواج وايد مهم واساسي ...إذا اخترت وحده عسب جمالها وفلوسها ..فلا تتوقع انك ترتاح وياها .... وإذا كانت شريكة حياتك بنت ناس ...وصاحبة أخلاق عالية اكيد بتعيش مرتاح...

وعلى فكرة لكل اللي يقول انه ممكن يعتمد على الحرمه الاجنبيه ....اقوله ترى ما شاء الله عليها بنت البلاد ما تم مجال ما دخلته ...ولا عرفته ....حتى الطب الشرعي..!! وما في دائرة ما فيها بنات ...وأنا أعرف دائرة من الدوائر الحكومية في دبي ...كانت من اسوأ الدوائر ... بعد تقييم برنامج دبي للآداء الحكومي المتميز ,,, فتم تعيين مواطنات في هالدائرة من سنه تقريبا .... والحين هالدائرة حاصله على الآيزو,,,, وكانت خطوة إيجابية جداً....

والأجنبية ما تبا تشوف اهلها ..تزورهم يزورونها ..ما يباله خسر..؟!! ويزه ومصرف وسكن وتحويط..وبياض ويهه جدام الخلق ...brgll:

ولا تنسون ابتعاد الكثير من الأزواج عن اهاليهم بعد ارتباطهم بأجنبيات ...يعني يسببون تفكك أسري ..ومجتمعي...


واايد رمسه في خاطري ..بس النوم سلطان مثل ما يقولون....


أكيد للحديث بيقة ..


تصبحون على خير...



السموحه

[سبيجة]

نسيت اذكر شيء وايد مهم...

عمرها المواطنه ما بتتساوى ويا الأجنبيه...

تختلف عاداتنا وتقاليدنا ....إذا كنا في بلاد وحده بس من امارات مختلفه تختلف بعض الأطباع فما بالكم في دوله ثانيه ...!!

أمس اقول حق وحده من إمارة ثانيه غير عن إمارتي عندنا عزيمة في البيت ..مناسبتها نثور بنت اختي ..!! تمت منصدمه ...شو تقولين؟؟ شو يعني ؟؟!! وهي بنت عرب وناس... ما تعرف ولا عمرها حضرت أو شافت نثور ياهل!! فما بالكم في الأجنبيه ...إلا جان ولدنا متعود يحتفل براس السنه ...والكريسمس ..!!


السموحه

[لمّــاح]

الاخت سـبيجة ..

كلامج ماعليه غــبار، و انا عن عمري صح اني تكلمت عن الزواج من الاجنبيات لكن هذا مايعني اني أشجع هذا الزواج، أنا اذا فكرت، اكيد بفكر ارتبط بوحدة مواطنه ..

المشكلة هي في الاشيا الي ذكرتيها فــوق:

فما بالك في شريكة حياتك.... اللي بتشاركك همومك وأفراحك ...وباجر بتيب ك عيال وبتربيهم...تشوف خساره فيها؟؟؟ يمكن تظهر مب زينه أو طباعها غير عن اطباعك... مب مشكلتها ...مشكلتك انته ...انته اللي اخترتها وطلبتها من بيت ابوها ....كانت يالسه ومرتاحه

أذا البنت بهالمواصفات بالاضافة الى انها مستعدة تتنازل عن الكماليات في اوقات الضرورة، و بتحافظ على ريلها و مستعدة تضحي عشانه .. هنيه اوقف و اقولج لكل حادث حديث ..

بس الي نشوفه عكس الرمسه الي انقالت !!

الريال مثل مكينة البيزات، متى مابغت فلوس سارت عنده و خذت بيزات .. حق شو ؟؟ سوالف حريم، ثياب على نعله على مكياج ... الخ (( هالفئة من البنات الي يبذرن فلوسهن وايد شي منهن !! ))

و انتي قلتي، البنت هاذي بتشاركك همومك، صح كلامج !! لكن تخيلي اذا البنت هاذي كانت هم من همومج، منو بيشاركج همومج الحين ؟؟

البنت بعد اتحس ان عندها شخصية و ضهر قوي (( ابوها )) و أي كلمة تطلع أو تصرف يبدر من ريلها مايعيبها ، شلت قشارها و سارت بيت ابوها .. في هالحالة الولد الود وده يطلقها لكن غميضه البيزات الي صرفها عالبنت .. و في نفس الوقت يفكر في حل ثاني عشان يرد اعتباره كريال، مابيروم، لأن ابو البنت بيدخل في المشكلة .. ف عشان يقهرها بتطلع منه تصرفات غلط، و بصراحه محد بيلومه اذا عرس عليها أو هجرها أو تصرف وياها أي تصرف ثاني عشان يسيئ لها ..
هالمواقف لاتقولين انها نادرة الوجود، بالعكس تستوي بشكل يومي !!
يمكن يكون ردكم، مافي بيت مايخلو من المشاكل .. صح هالكلام 100% صح ..
لكن ارد و اقولكم، مب بهالاسلوب الهمجي بتنحل المشـاكل .. هناك اساليب كثيره عشان انحل هالمشاكل، بس المشكلة الاساسية في البنات لأنهن اتعلمو يشلون قشارهم و يردون بيت ابوهم ع بالهم الريال بينكس و بيضعف جدام ابوها .. أكبر غلط ان البنت اتهين أو اتقلل من جيمة ريلها ، و المفروض تحترمة و اتضحي و تتنازل عشانه ..

[لبن مثلج]

الريال مثل مكينة البيزات، متى مابغت فلوس سارت عنده و خذت بيزات ..

حلوه هاي عيبتني :ice:

سؤال::: امنو امعرس من الاعضاء الي مشاركين في الموضوع ،، لانهم هم اصحاب الخبرة والراي :kkk: