لــندن

[المزوحي]

السلام عليكم

طبعا الكثير منكم يحب يسافر .. البعض الفرصة تكون عنده والبعض لا .. لأسباب ..
حد مسافر العام مايقدر يسافر السنة وحد لظروف مثل حاليا بيتوظف .. بتزوج .. عنده سلفية بيت ..
سيارة أو أي أمر .. وفي منكم اللي يسافر كل سنة نفس البلاد .. وفي من الناس تسير كم من بلاد في نفس السنة .. وأنا حاب إنكم تخبروني شويه عن لــندن .. اللي سار وين الأماكن اللي زارها ؟؟
شو الاماكن المشهورة ... وماننسى وين نتبضع ؟؟؟

:ice:

[لمّــاح]

السلام عليكم ..

ييتنا عالعووق مررره، لندن ، كنا بنسيرلها بعد في اجازة الربيع لكن ما اترتبت السيرة !!

شوف، انا افضل انك تسكن مجابل الماربل آرج ( بوابة لحديقة الهايد بارك ) شي فندق الفندق حلو بعد و نظيف بس وايد عرب فيه
الفندق هذا مكانه وايد استراتيجي، على يمينه عندك الادجور روود، شارع العرب، كله مطاعم عربيه و شيش و ستاربكس و دبنهامز و واااايد محلات و السينما، كل الي اتشوفهم هناك عرب حتى اذا اتولهت على العيش بتحصله هناك، شوارما، فلافل ...الخ
على يسار الفندق عندك بيتزا هت، و شارع الاكسفوورد، بعد حلو و وايد محلات غير..

من نفس المكان ( مكان الفندق ) بإمكانك حتى انك اتسير لوايد اماكن مشي، مثل البوندز ستريت ( فيه وايد من هالمحلات الغاليه ).. و تقدر تمشي حتى الين هارودز في النايت برج ..

الاماكن الحلوه في لندن، عندك ساحة البرلمان، London eye ، متحف مدام توسو، و وايد اماكن ثانيه اذا حبيت اقدر اعدهن لك ..
تقدر تاخذ قطار و تطلع للأماكن الخارجية و السناتر الي برع مثل بلو ووتر ...الخ ..

[المزوحي]

تسلم عزيزي ... دايما نحن نسمع عن الهارودز و هايد بارك .. لكن اماكن فيها عرب بهالصورة أتملل
شاردين عنهم ... ورانا بعد ؟؟؟ تدري لأني مجرب وأنا ساير سويسرا كيف تصرفاتهم .. لابسين كنادير ومتعصمين على أساس إنه يعرفونهم عرب .. مسوين يوله في اللوبي ...

[لمّــاح]

هذا شويه، أذكر مره اولاد كانو يلعبون كره في ممرات الفندق و عن الكنادير هذا شـي طبيعي .. اذا مر يوم في لندن بدون ماتشوف شباب بكناديرهم و متعصمين يعني أكيد في شي غلط في لندن .. ! و دايما العرب يخصصولهم طوابق معينة في كل فندق عشان الازعاج .. هذا غير الطبيخ :nono:
بخصوص لندن، اخويه اذا تبا اتزور هالاماكن ( هارودز و الهايد بارك .. الخ ) لازم اتكون في الاماكن الي فيها العرب .. تقدر تيلس في وسط لندن مثلا 5 ايام و عقبها تطلع و تسكن في المناطق الخارجية ..
عندك برايتن حلوه، بسيطة .. و عندك margate و وايد اماكن غير .. هالاماكن مافيها عرب بس مشكلتها بعيده و مافيها وايد اماكن عشان تزورها ..
او اذا حبيت، اسكن في لندن لكن مكان بعيد عن الاماكن الي ذكرتها .. شي وايد فنادق لكن عشان توصل لهاردز و الهايد بارك و هالاماكن لازم تاخذلك تكسي .. أو انك تسكن في الصوب الثاني من الهايد بارك بعد هناك ماشي عرب وايد .. بس نفس المشكلة لازم تاخذ تكسي عشان تعبر الهايد بارك ، أو انك تمشي مال 25 دقيقة .. !

[المزوحي]

يبالنا نمشي يا لماح .. ونحن احتمال نستأجر شقة ..

[الـيـاه]

سلاام

بالنسـبة للفـنـادق
إذا تبـا تسـكـن فـي فــنـدق مـريـح وحلــو فـ انصـحـك رويــال جـارديــن وألا سلـفـرج
وشرات ما قال :: لماح :: انصـحـك انـك تسـكـن فـي فـنـدق قــريـب مـن الادجــوا رود
صـح كلــه عــرب بـس أامــن بوايــد مـن أمـاكــن ثانـيــه !!

وإذا شقـق أنصـحـك تسكـن فـي الشقـق اللـي يـكـون صاحـب هالبـنـايــه عـربــي
وشـي وايـد عـمايـر فـي الهـاي كنزكـتـون أصاحبـها الشـيـوخ اللـي هني أأمـن ومابتخـاف من شي

وبالنسبة للاماكـن اللـي تـبا تتسـوق منهـا عـندك شـارع أكسـفـورد كلـه محـلات
وبييـك جــداه شــارع ريجـنت بعـد
طبـعـا ً فــندق سلفـرج قـريـب مـن قــوم اكسـفــورد
وإذا يبـون الحـريـم :kcl: صـدق يبون يخـمون السـوق مـن مـكان واحـد ودهـم السلـفـرج وألا الـهارودز

وممكن تاخـذ قطـار تسـير بـرع لـندن منطـقـة اسمها بلاك بـول أو ملتون كـيزن تبـعد عـن لـندن ساعـه ويمـكـن أقـل بالقـطار وبعـد تـرومـون تسـون شوبيـج هناك بعـيد عـن زحمة الـعـرب


وهـيه نصيحه حـاول ما تطـلع متأخـر خاصـه ايـام الإجـازات
او انـك تـركـب الانـدر جراونـد فليل كله سكارا
وحاسـب مـن الدجـوا رود لانـه وايـد فيـه اكـراد يصرقــون
وإذا صادف سفـركم شهـر 8 فـي يـوم لـكـن ماذكـر التـاريـخ بالضبـط يـوم العـبـيد
كل العـبـيد يتيمعـون وجـي ويحتفـلـون
هاليـوم وايـد خطـير لانـه تـكــثر فيـه جـرايــم وصـرقــات :narr:
فـي الأماكـن اللي مـب معـروفه وايــد ..

ويـوم الأحـد أغلب الأماكن مسكـره سير (سبيك كورنـر) هـاي ساحه كل واحـد أيي ويحاول ينـشر ديانته
وشي وايد مسلمين هـناك بس صـدق ضحـك يوم ايـون يتضاربـــون
brgll: وفي واحــد هـناك معـروف كل أحــد يلبــس مـال كـاو بـوي
هـو مغـربـي مسلـم ويغـسل الأنجلـيز غـسال بـس صـدق ينطـبـون لانــه كلامــه يتـصـدق
ووايــد يضحـك عليـه سـوالـف ابـن الذيــن :harhar1:


ها بالمختـصر المـفــيد
إذا تـبا اسامـي زيــاده لأمـاكــن ممكـن تـزورهــا خـبـرنــا ؟


.
.
.

[قلوب دبي]

بسير اصلي و برد اكمل
ااااااااي فجي يعورني ..
جلعين ضرسي :(

[قلوب دبي]

مسا الخير يا خويه ..

ماشاء الله لماح و الياه ما قصروا شرحولك الوضع ..

حبيت اخبرك عن فندق كمبر لاند حلو و تابع لماريوت ما ادري مريديان والله ما اذكر لانه من مده و ها مكانه في اكسفورد و ع لفه اجورد رووود ..

شرات ما قالوا الهايد حلوه ع العصر و جريب المغرب ..

عندك الهاردز انصحك فيه الصراحه ما عليه كلام و جان تريد اشياء حق البودي عندهم ،، و هيه في الهاردز شيء عندهم مطعم ايطالي يااااااااااي ها كل ما اسير لندن لازم امر عليه شو اقولك الاربيكا اللي يسويها روووووعه و لذيذه ، كله زحمه عنده اوقف في الصف و اتريا دورك ..

و هي و شيء مطعم ايراني جريب من الكارتن ، ها بعد ما يحتاي امدحلك فيه ، الايرانيه يبدعون في طبخهم ..
اتخبر لماح عالمطاعم هاي بيخبرك هههههه ..
ان الله راد انا بسير ع شهر 8 هاي السنه و بيبلكم احلى صور و خاصه صور كليه سهانتيرز ..

ممم شو بعد لندن فيها الاماكن مال الحواطه سير صوب الاسبيك كورنر يوم الاحد و طالعهم و سير صوب هاللي يدور العود عين لندن ..

و طبعا على حسب الشله اللي معاك ..
شيء سوالف وايده في لندن ما تمل منها بس عني انا مااحب اتم فيها اكثر من اسبوعين غير يوم اروح المانيا او بلجيكا اتم فيها فوق الشهر ..

شو بعد ...

الكوفيهات و اليلسات ما بتمل كل مره سير مكان ..
الاكراد و العراقين اتحمل منهم ..

ممم وجي .. ^_^

[المزوحي]

الياه - قلوب دبي .. شكرا لكم على التواصل .. الواحد يسمع شي ويوم يسر شي ثاني ...
وعلى طاري السكن أغلب الظن إنه في شقة بنكون .. بس أنا اللي طعمته من هارودز " دونت "
ههههه يايبين لي بارسل ..

brgll:

[الـيـاه]

الاكراد و العراقين اتحمل منهم ..
^_^

هههههه نفس نصيحتي فوووق
شكله قولوبوه مصروق شراتي هناك .. انا صرقو بوكي وتلفوني من الشنطه كيف ما ادري

[قلوب دبي]

هيه صح احلى شيء البراتا في لندن
شيء مطعم باكستاني جنه ..
نسيت اسمه جنه ( مرحبا ) .. و مكانه بعد ما اذكر حوط و دور بتلقاه ..

اذكر صار لي موقف ويا ربعي ركبنا الباص مالهم وانا مالي خص في حالي يالس ويا واحد مادري شو اصله اسباني جنه المهم ، سألنا و قال النا وين المكان الفلاني اشوف اربيعي نطر و قاله انزل اهني و سير سيده بتوصل .. وقف الباص و نزل هذاك ويا حرمته قلت له شدراك في المكان و جان ايقولي طفربنا كل شويه واقف و ايطالع يمين و يسار ، ريحته و خليته ايروح اهناك خخخى( عاطنه المكان بالغلط ) ..

ياهووو شكلج اتحرطمتي ع كيف كيفج .. ههههه

[المزوحي]

بوزايد .. طيب وين قصدك مثلا .. بلاد أوربية .. شرق آسيا ؟؟

[لمّــاح]

قلوب دبي ..
انا خطفت على كل المطاعم تقريبا الي هاك الصوب، قوم الوادي الاخضر و فتوش و مروش و ربعهم
بس لندن نفسها ممله، مال اسبوع او اسبوع و شويه.. و هيه عندك في الهاردز بعد مال الجوكلت ( نسيت اسمه ) يسويي الجوكلت جدامك، عنده هالخلاطه العوده تخلط الجوكلت و اتسويه جدامك و يبيعولك اياه فرششششش، ماحيد شو اسمه يمكن ذا جوكلت بار ؟؟:kkk: ..
و شي محل بعد اسمه سايبر كاندي .. هالمحل يبيع كل انواع الحلويات لكن فليفرهم غير، مثلا كتكات بنكهات مختلفه، بيبسي بطعم الفانلا، ديو بطعم مادري شو ..الخ
واااايد وايد وايد انواع من الحلويات، اشيا ماتخطر عالبال ..
احس اذا راويتك الصور يمكن تاخذ فكرة احسن عن لندن و تتوضحلك بعض الاشيا..
عندك هاذي، صور هالمحل الي قلتلك عنه ..







و عندك هذا لوبي الفندق الي قلتلك عنه ..




و عن سوالف العرب يوم يكونون في نفس الفندق :puppyeyes: اذكر كنا فيه انا و اخويه .. و فليل جرس الانذار اشتغل و حاله و اتصلوبنا مال اللوبي قالولنا حريجه في الفندق انزلو .. نزلنا !! طلعنا من الغرفه و على طوووول سرنا المخرج مال الطواري نزلنا من عالدري و اذكر وايد تعبنا لأنه كان انجليزي مقعد فشليناه هو و الكرسي المتحرك ماله ليييين تحت !!
نزلنا، و تمينا مال ربع ساعه و الشرطه و المطافي كلهم برع و عقب قالو خلاص ردو غرفكم، ماشي حريجه، يوم اتخبرنا عن السالفه طلع واحد سعودي حجرته عدالنا كان يدوخ في الحمام :nono:

و هالصورة صورة محطة القطار الي فجروها، سرنا انشوفها ..



----

[قلوب دبي]

لماح
صدقك يا خويه ما تنفع انك اطول فيها ,,
مال فتره بسطه و سريعه ..



ها المطعم الايطالي اللي اخبركم عنه ..

ما تندمون يربوه ..
الاكل فريش يسويه
:ice:


الصراحه لذيذ ..


وها شارع اكسفورد



كانن عندي صور جنه انحذفن ..

مممممم

الهايد




الاسكوير

[دمعة شوق]

لا تـزيـد المـواجـع خـلنـي قـد نسـيـت

’’’

اممم بصراحه خوانيه ماقصروا عطوك اللي يعرفونه وأنا بعد بقولك اللي عنديه
جانك تبـا شي بعـيد عـن الـعـرب وزحمـتهـم وصدعـتـهم
سـير جيه برا لـنـدن عـنـدك مـثـلا ً :

سوانـزي
اممم حلوه وزينـه لـريـلاكـس
وتاخذ من لندن لين هناك أربع ساعات سواء بالسيارة أو بالقطار
بس اللي مب حلو فيهــا أن السـاعـه سـت المساء خلاص يبندون المحلات
هب شرات لندن .
’’’

لـفـربـول

اممم بصراااااااااااااااحه يوم رحتها خبلتبي وعيبتني ، وكلها جيه آثـار بس حلوه ،
أنصحك تروحها وتغير جـو .

’’’

مانشـتـسـر

اممم بصراحه مارحتـها بس اللي أعرفهم وراحولها يمدحونـهـا .

’’

امم اما في لندن اذا اشتقت لعيـشـة لـبلاد عليك بـ الأدجور رود
وتبا الحواطه وتتسوق عليك بـ أكسفورد
’’

بس ياخويه أنصـحك بنصيحه لوجهه الله
لا تطالع في ويوه السكرانيين
brgll:
خخخ اسميه استواليه موقفه عندهم ماانساه طول حياتيه

’’
على العموم ربيه يوفقك
وإذا احتيت أي شي مره مايردك ألا لسـانـك
:)
والسموحوو منك طويل العمـر