صح كلامج يا قرموشه .. واايد من البنات مايبن المطوع .. او من شروطها مايكون مطوع ..

اعتقد هن يطرن الريال المتشدد اللي بدال مايسعدها بينكد عليها .. واكيد مب قصدهم الريال الملتزم صح بتعاليم ربه وبالتالي بيكون رجل مثالي لها في التعامل وحسن العشرة..

وبالنسبه لي ماعتبر كل مطوع هو الانسان المثالي .. وفي رايي انه مطاوعة هالزمن صاروا اشكال وانواع ... ومنهم وايد مطاوعة ( صورة ) وليس حقيقة .. يعني مجرد شكل خارجي وبعيدين عن اخلاق الاسلام في حسن التعامل مع الناس و في الصفات والأخلاق وحسن الهيئة و طرق النصيحة ...

يعني الواحد من يشوفهم ينفر تلقائيا منهم لانه يشوفهم عابسين دايما وتقاسيم ويوهم مكشرة وتحسهم معصبين من غير سبب .. وغير عن منظرهم الخارجي اللي قد يكون احيانا مش مرتب .. او ابعد للنفس من انها تتقبله .. لني لاحظت وايد منهم يحبون يربون ( كرشة ) مع لحية طويلة جدا .. وكندورة قصيره جدا .. وويه عابس ومكشر .. ( يوحي بالقسوة اكثر من انه يوحي بسماحة الاسلام وهدايته )

مااعمم بس في فئة غير بسيطه منهم جي .. ولحد يزعل مني .. انا اقول شعوري الداخلي اللي احس فيه يوم اجوفهم ..

ومثال لموقف استوالي ..

كنت نازله الحرم .. و بغيت شي من محل عدال الفندق .. وكان اللي يبيع فيه ريال ( اونه مطوع ) ..
حليلي حادره عالسريع .. ودشيت المحل وقلتله ابا ... بعدني ماكملت رمستيه جان ايقولي يافاجره يافاسقة كيف ادشين المحل روحج من غير محرم وهذي خلوة وانامابيع لحد في وضع حرام .... الخ .. وانا طبعا اتجمدت الكلمات فلساني وقلبي من خاطري يقوله محد غيرك فاسق جان جي يسهل عليك قذف الناس بهاي الألفاظ ..

ومانكر اني مانجرحت من كلماته .. وحتى لوكان في كلامه نسبة من الصحه وهو اني حدرت المحل من غير حد .. لكن انا حدرت لاقل من 5 دقايق مب اني يايه أعيش في المحل !! .. وبعدين لوبينصح لا ينصح بهاي الطريقه !!!

فها مثال لواحد من المطاوعة ( شكلا ) بس .. وللاسف يعطون نظره مب زينة عن الاسلام والمسلمين والمتدينين بشكل خاص ..

لاتقولونلي ماشي منهم .. شي منهم وايدين ..


لكن اكيد بيكون شي منهم ناس خلوقين بعد ..



فاعتقد من اهم الامور انه يكون هناك توافق فكري بين الطرفين اللي بيتزوجون ..

والرسول في الحديث .. يوم نصح باختيار المرأة قال للريال ( فاظفر بذات الدين تربت يداك )

لانه دايما دين المرأة يؤدي الى حسن خلقها في الغالب ..

لكن الرسول اللهم صل عليه يوم نصح باختيار الرجل قال ( من ترضون دينه وخلقه ) ..


لانه مب دائما الرجل المتدين يكون رجل خلوق .. !! ..

والله أعلم ..

واسمحولي عاد .. هاللي اشوفه من وجهة نظري الشخصية اللي قد تكون خاطئة او قد تكون مصيبة ..