خربوه

[قلوب دبي]

مساكم الله بالخير ..

ردينا من المعرض
و اخيرا سرناله ..:kkk:

المعرض ماشاء الله عليه من حيث التنظيم جدا ممتاز و الديكورات غاويه ..
الجهات المشاركه و العارضين اهناك الصراحه ، منهم اللي يحب الشغل و بالفعل
نشوف له دور في الترويج الجهة اللي يشتغل فيها ومن ناحيه المعلومات عنده كافيه
ووافيه في حين البعض الاخر محطايين بس شكل و زينه و الكلام ع كلا الجنسين ...
شي بنات ما شاء الله عليهن يعرفن يجاوبن و يعطنك المعلومات الوافيه و شيء من
الشباب نفس الشيء ما عليهم زود ما قصروا في الشرح ..
والا البعض الثاني ما ادري على اي اساس مرشحينهم و حاطينهن في المعرض للاسف
اييب هندي و احطه اخير من ايلس هالاشكال ..:narr:
نسأله يا خويه نريد نعرف الشاغر اللي عندكم ، قال ما اعرف انته عطنا cv و بنشوف
والا يوم استفسرت من احد الشركات اتوجهت للريال و قلت له كذا كذا و اريد اعرف كذا
قالي والله ما شيء بس ( بواسطه ) كل شيء ممكن ، قلت كيف و جي تميت استفسر ، قالي
لحظه ، و سار و زقر البنت و البنت اسمعها اتقوله قوله اي شيء اي شيء ، وجان ارد عليها
وقلت انا ما اريد اي شيء الصراحه يرفعون الضغط ، كل ما اسألها شيء قالت لي انزين
بعطيك انا البروشور و المعلومات فيه كل شيء و عطتني جيسه و مشيت ع اساس القى شيء
يلست في الكوفي و فتحت اريد اقرى الكتيت لا ظهر كتب و لا شيء قلم و قلاص و ما ادري شوه ..

مواقف وايده صارت ..

عيبوني مال دائره الصحه و مال سوق دبي المالي و دايره السياحه
( يستاهلون احلى كاس ):winn:
الموظفين اللي اهناك ما قصروا شرحولي و اسلوبهم كان جدا حلو ..:9afgah:

هذا المعرض بأختصار ..

طلعت و استنتجت شيء الصراحه اذا فكرت انتقل من مكان الى مكان ثاني
ما انتقل الا وانا داز الواسطه قبلي عشان اضمن المكان اللي بروحله
مب اطيح في متاهات و ما بخلص منها ..
عرفت انه المواطن اللي بلا ظهر متلعوز و اللي عنده النعمه يحمد ربه مليون مره
لانه غيره يتمنى انه يحصل وظيفه يترزق من وراها ..:no0:

يغمضوني اللي يدورون وظايف و يقهروني اللي يتكلمون بنفس خايسه ..
اما اصحاب الخفافيش و البشوت شفناهم و نفس الوقت شفنا المحتشمات ..
الله يستر ع بلادنا الصراحه ما اريد اتكلم وايد بخصوص العيوب اللي ريتها
لانه الشيء يضايج ..
و لقينا شباب ياي يدور شغل و رينا اللي ياي بس يتحوط لا اكثر ..


في النهايه

اللهم لك الحمد ..