اي بنك فوايدة اقل

[المزوحي]

السلام عليكم

تعرفوون هم القرض .. مش القراض .. المهم ربيعي متلته .. ويبغي قرض .. تمويل .. وسار طبعا بنك دبي الاسلامي .. وطلعت الفوايد كبيره حتى لو رد المبلغ قبل فترة السداد ..
قال بشوف بنك غيره .. وسأل كذا بنك .. الصراحة ما كنت اتوقع إنه بيسير بنك المشرق ..
أحس بيتبهدل .. في النهاية كلها سلف .. لكن شو من البنوك اللي تهون ؟؟

[الحساس]

والله ماعندي علوم بس نصيحه..

اي بنك اسمه .. البنك الفلاني الاسلامي .. ماانصحك تروح له لان فوايده (((( الي هو يسميها مادري شو هب فايده طبعا) ااكثر عن البنكر الربوي بوايد هب بشوي!!!!!!!!! وهالنصيحه عطاني اياها شخص متخصص في السلفيات!!!

الي احيده ان السلفيات يكون عليها نسبة ارباح هي 3.5 % بالسنه .. فكل ماقل الرقم كان احسن...

شوف بنك راس الخيمه وبنك الاتحاد الوظني لان سمعت انه عندهم اوفرات وحوافز ..

بالتوفيق

[ولد الحكومة]

وعليكم السلام
اخوي المزوجي ،،
كل البنوك مثل البعض ، يعني لا تقووول في بنك فوايده اقل ولا الثاني أكثر ؟؟؟ الكل طبعاً يبا يستفيد والضحية المواطن المسكين .. ....

والسموووحه شيخي

[نجمة دبي]

وعليكم السلام والرحمه ..


يقولون مصرف ابوظبي الاسلامي اوكي .. وبنك رأس الخيمه بعد وايد اوكي ..

بسأل وبتكون لي عوده ..



نجــــــــ دبي ــــــــمة

[ولد الحكومة]

مرحبا أختي نجمة دبي ،،،

عندي مداخله صغيرة ؟؟؟

أختي فوائد مصرف بوظبي الاسلامي مثل بنك دبي الاسلامي وما في فرق ؟؟؟ انا بروحي ساير مصرف بوظبي الاسلامي وبنك دبي الاسلامي ...... :sadwalk:

[نجمة دبي]

هلا اخويه ولد الحكومه ..

صح ان ماعندي فكره عن البنوك .. بس هذا اللي سمعته .. والكل مستغرب من ارتفاع الفوايد في البنوك الاسلاميه ..

وشو عن بنك رأس الخيمه .. يقولون اوكيه ..



نجـــــــ دبي ـــــــمة

[المزوحي]

سمعوا .. ربيعي عنده حساب في بنك دبي الاسلامي وعلى أساسها يبغي ياخذ قرض لكن الفوايد بتطلع وااايد عليه .. فقال بسأل كذا بنك .. وفعلا اتصل براك بنك وأبوظبي التجاري .. لكن استغربت يوم ياي اليوم يبغي ياخذ عند بنك المشرق ( المشنق ) قلت له نصيحتي لا تاخذ من عندهم ..

[نجمة دبي]

بنك المشرق معروف ان سمعته مب اوكي ..

الله يعينه الريال ..



نجـــــــ دبي ــــــــمة

[المزوحي]

مادري إن بنك بوظبي الوطني اووكي ؟

[ولد الحكومة]

هلا اخويه ولد الحكومه ..

صح ان ماعندي فكره عن البنوك .. بس هذا اللي سمعته .. والكل مستغرب من ارتفاع الفوايد في البنوك الاسلاميه ..

وشو عن بنك رأس الخيمه .. يقولون اوكيه ..



نجـــــــ دبي ـــــــمة

الله ما أدري يا اختي نجمة دبي وما عندي أي فكرة عن بنك رأس الخيمه :no0:

[ذنـيـنـي]

بنك المشرق قبل القرض يزين عروضه بالكلام الحلو

انا دارس الكورس الي طاف ماده كاااااملة عن القروض,, و كنا بس نحسب السلفيات و القروض البنكيه

بنك المشرق يتخدم طريقة الفوائد المركبة و هالنوع من الفوايد واااااااااايد معقد و كل مرة يزيد المبلغ عليك,, اعرف واحد من ربع اخويه ماخذ قرض من بنك المشرق من 5 سنين,, الين يومك و هو يدفع قيمة القرض, لأنهم يحسبون عليه فوائد مركبه مع انه القرض ما كان بمبلغ وايد كبير


البنك الاسلامي على الاقل فايدته ثابته و ما بتتغير

و انصحك تشوف مصرف ابوظبي الاسلامي لأنه شروطه ابسط و فوايده اقل

عندنا الوالد كان يبغي تمويل من البنك عسب يسوي بناية
يوم سرنا عند دبي الاسلامي ما طاعوا يسوونها على اقل من 7 سنين و بس الفوايد الي طالبينها تقريبا 600 الف درهم

مصرف ابوظبي الاسلامي وافق على خمس سنوات و الفوايد اقل " تقريبا 350 الف" و شروطهم مش معقده مثل دبي الاسلامي

[لمّــاح]

الـسلام عليكم ..

اولا بخصوص البنوك الاسلامية ماتعطي قروض شخصية ( يعني كاش ) ، هم يشترولك الشي و يبيعونه عليك بسعر اغلى، و في خدمات يديدة ( على شكل القروض الشخصية ) ملخصها في انك تشتري حديد عن طريق البنك ( نفس سالفة السيارة ) و يكون البنك منسق ويا شركة ثانية تشتري الحديد .. طبعا هذا كله في نفس الوقت، تشتري الحديد بفلوس البنك و تبيعه وتاخذ الكاش و تبتدي تسدد ..

ثــانيا، انا اشتغلت و عندي خبرة في البنوك الاسلامية و البنوك التجارية و دارس و عندي بحث كامل عنهم و الفرق كبـير و الي يقولك ماشي فرق بين البنوك الاسلامية و البنوك الربوية أبدن مايعرف شي في امور البنوك .. بالمختصر المفيد تقدر تسأله عن سبب تحول الكثير من البنوك للتعاملات الإسلامية، طبعا السبب الاول هو كثرة الزباين الي يفضلون التعاملات الإسلامية و السبب الثاني و الي هو أهم ان البنوك الإسلامية بإمكانها انها تتاجر بالفلوس، بمعنى آخر، البنوك الاسلامية ماتبيع الفلوس بسعر أغلى انما تشتري الشي و تبيعه و هذا معناته ان في حالة اذا الزبون خسر بيزاته بإمكان البنك ان يرجع لو جزء من الفلوس كونه ماعطاه كاش، لأنه باعله شي ملموس .. اما البنوك الربوية تعطيك الفلوس بمقابل انك تردلها المبلغ هذا مع الفوايد و مب مسموحلها انها تتاجر بالفلوس ..
و ايضا هناك رقابة شرعية في إدارة البنك تتكون من أفضل المشايخ في امور الاقتصاد و عندهم اجتماعات دورية لحل المشاكل و الاجابة على الأسئلة ..

نرجع للنقطة الي ذكرتها و ذكرها اخويه الـحساس بخصوص الفوايد الغالية الي تفرضها البنوك الاسلامية .. أولا في نظري الأرباح هاذي لو تحسبها على المدى البعيد بتكون نفس فوايد البنوك الثانية ( إذا مب أقل ) ... قول ليش ؟؟
مادري اذا سمعت عن الفوايد التراكمية و غيرها من انواع الفوايد، ياطويل العمر هاذي الفوايد تتغير بين فترة و الثانية .. ساعات ينزل سعر الفايده و في بعض الاوقات يرتفع سعر الفايده و الارتفاع و النزول له اسباب كثيييييييييره منها سياسة البنك و منها سياسة الدولة و البنك المركزي و أنا اذا خيروني بين البنك الاسلامي و البنك الربوي ( بغض النضر عن الحلال و الحرام ) بختار الاسلامي لأن ارباحه ثابته و نحن اقتصادنا في الامارات يعاني من تضخم و inflation ( ارتفاع الاسعار و نزول قيمة الدرهم ) و البنك المركزي بيده حل واحد عشان يحل المشكلة هاذي و الحل هو انه يرفع فوايد البنوك ( و شوفة عينك كل يوم و الثاني في الجريدة اعلان ان البنك الفلاني رفع قيمة الفايدة عنده ربع بالامية أو نص ..الخ ) و طبعا البنك الإسلامي يعطيك نسبة ربح شويه اعلى عن باجي البنوك و هذا لسبب واحد، لان النسبة هاذي بتكون ثابته على طول ( لأنه النسبة لو كانت متحركة و تتغير بيدش في الحرام ) ف عشان يضمن عمره في حالة ارتفاع الفوايد يكون هو جد رفع النسبة أصلا ربع أو نص بالامية ( و انا في نظري اشوف هالشي من حق البنك لأنه بيعطيك نسبة ثابته و بتكون في السليم، و ثانيا انا شخصيا مستعد ادفع أكثر ولا اني ادخل في الربا ) ..

هاذي مجرد توضيحات لا اكثر و بخصوص البنوك الاسلامية أنا احبذ لو ياخذ من عندهم، كونهم حلال و أأمن ..
عندك بنك دبي الاسلامي، مصرف الامارات الاسلامي، بنك الشارجة الاسلامي، بنك ابوظبي الاسلامي، بنك الخليج الأول ..ألخ

اتمنالك التوفيق ..

[خيال الحب]

بنك المشرق = بنك المشنق..

هااللقب الي ساري عليه..

نصيحه مني محد ياخذ من عنده شــي..


وهذا الي اقدر افيدك فيه..

ماعندي اي خبره بالبنوك..

ياحليلنا بعدنا ماشتغلنا خخخ

[ألم ترى]

بسم الله الرحمن الرحيم ..

قليله حرام ! ..

اعتقد بأن الأخ لماح افادك وافادني بعد وكنت اتمنى بأني افيدك ..

شكرآ عزيزي بو جاسم والله ايسر امورك يالمزوحي ..