:: الميدان ! ::

[الغاليه]

السلام عليكم اول شي ...

وتسلم اخويه غرشوب عطرح الموضوع ..

الميدان برنامج مسوي ضجة كبيرة بين البنات وبين الشباب .. الفرق فيه انه معظم البنات ( مع ) البرنامج ... ونسبة كبيرة من الشباب ( ضد ) البرنامج ...

انا مع الفكرة العامة للبرنامج اذا كان الهدف منها ( احياء التراث ) .. وضد تفعيل الفكره في ميدان اليولة بالشكل اللي انشوفه ...

البرنامج كانت له انتقادات واسعه ومازالت .. والبرنامج فنظري ماأدى النجاح المطلوب مب لكثرة الانتقادات .. لا ... ( لان كثرة الانتقادات العامة مب دليل على الفشل دائما ) .. انتقادات الاختصاصيين واهل الكفاءة والخبرة في هذا المجال هي اللي انتقاداتهم تؤخذ بعين الاعتبار ..

لكن الكثير من الانتقادات اللي وردت بخصوص البرنامج كانت لها جانب كبير من المنطقيه وعلى القائمين والمنظمين اعادة النظر فيها ..

اللي ابا اقوله انه برنامج الميدان اعتقد كان هدفه ( ربحي ) بشكل اكبر من انه ترشيد للقيم واحياء روح الاصاله والتراث في الشباب ..

والدليل على انه عملية التقييم والتصويت مقتصرة على جانب المشاهدين فقط والحكام مالهم يد في الموضوع.. و مثل مانحن ملاحظين انه الشاب الاحلى والاوسم هو المتوقع فوزه في اليولة من قبل لاتبتدي المسابقة من الاساس ..

تركيز المخرج عالبنات وتواجدهن في المكان بهالاشكال فيه تشويه كبير لسمعة وصورة البنت الاماراتيه وتراث الامارات .. وتشجيع للبنات انهن يسلكن هالمسلك دام انه الباب انتفتحهلن وبتأييد من برنامج وطني ! ..

يعني لو كان الهدف احياء التراث ماكان له داعي انهم يركزون عالبنات وهن فاصخات الحيا .. لانه الاساس في التراث حشمة البنت وادبها وانها ماتتواجد في ساحات الريايييل ..

اليوله والحركات اليديده كان لها مؤيدين ومعارضين .. لكن العله في الموضووع هو انه اليوله بالاساس القصد منها اظهار الرجوله والاصاله .. واللي شفناه من بعض المتسابقين اللي خانتهم بعض تصرفاتهم كانت حركات مفتقره لمعنى الرجوله و الهيبة والرزانه ..

البرنامج المفرووض اتكون اصداءه المرحبه من جانب الرجال كونه برنامج شبابي .. لكن اللي شفناه العكس واللي هو الترحيب من جانب البنات والرفض من جانب الشباب .. وهاي سلبيه كبيره في البرنامج ...

الميدان وفكرته في احياء فن اليوله يقدرون يستثمرون ايجابياته بشكل افضل واحسن من خلال سن القوانين اللي ترشد القيم الاصيله وتحث على روح الاصاله والرجوله بكل معانيها ..

وتبعد عنا خلق سلبيات جديده ونشرها والتشجيع عليها ( مثل اتصالات البنات بالمتسابقين والكلام اللي يستحي الواحد يسمعه ) !

شي اخير ابا اقوله .. انه نحن حتى لو ماعيبنا شي .. مايستوي ننعت الاشخاص بصفات تسيء لهم او تجرح مشاعرهم .. مثل ماتسمونهم نعاشات او رقاصين او من هالمسميات .. الواحد لازم يحترم اللي يخاطبه عشان يتقبل انتقاده ويستوعبه ويستجيب لتصحيح مواضع الخلل عنده ..

لكن الهجوم عالانسان ونقده بطريقة النسف وتصفيره و كأنه لاشيء .. في الغالب تثمر وتخلق اطراف متخالفه ومتضاده ومعاديه .. بمعنى اخر .. ماستفدنا شي من كل اللي قلناه !

[لمّــاح]

مرحبا ..

كلام الاخت غــالــيه صحيح 100% ..

لكن عندي مداخله، بخصوص هالفئة من البنات الي يضهرن في التيلفزيون، نفس كلامي الي قلته في ردي الســـابق:

بخصوص المصـورين و مخرج البرنامج، هاذيلا يقومون بشلغهم و عندهم مجموعة كيمرات حول المكان لازم يشغلونهم و يلتقطون لقطــات لبثها في القـناة فالواحد لازم مايعترض عليهم، لازم يعترض على البـنت الي رضت انها اتسير و تتصـور ..
تخيل هالـموقف، دشــيت مــطعم يـبيع خــمر و الويترس يــابلك مينيو البــار، بتعترض و بتشتكي عليــه ليش انه يابلك المنيو ؟؟
هو شو دراه انك ماتشرب، أكيد حط فباله دام انك ييت للمكان هذا بتــكون عــارف شـو يـبيــع ..
نفس الكلام ينطبق عليهم، شـو دراهم ان هالبنات لازم مايصورهم المصـور، خصوصا عقب الاغراءات الي تطلع منهم ؟؟

و للعلم، انا ما أيدت البـرنامج كــبــرنامج و الي انشوفه الحــين، أنا أيــدت البرنامج كفكرة و مظمون لكن كل الي استوا و كل الي انشوفه هو عــكس هدف البرنامج (( و الهدف هو إحياء التراث )) ..

[ريم العين]

ونعش ( راشد الخاصــوني)

حرااام عليج
شو سوابج راشد حليله
والله لو يدري انه المنتديات تحش فيه
مادري شو بيسوي

مب لدرجه انه نعاش

عالاقل احترمي الريال فغيابه

[الملهم]

السموووحة اسحب ردي ^__^

الغلط يمكن في طلوع البنات الى المكان ..
مع وجود بديل وهو التلفاز ..

شكرا لماح على تصحيحك لمفهومي ^__^

[غرشوب]

كـلـكـلـووش

عذر البرنامج لاستكماله و مواصلة عرضه هو احياء التراث !
والمشكلة انه يعطي انطباع خاطىء للاجانب عن تراثنا كونه يعرض على قناة فضائية والكل بإمكانه المشاهده.
اسئلتك اوجها لمن يؤيد برنامج الميدان . . يمكن عندهم الاجوبة السحرية الي تقنعنا انا وانت وبقية الي رافضين الميدان !

وشكرا ً على التواجد بوشهاب



حبوبة دبي
هذا واجبنا . .


الشحية

قصتج تنضاف الى قايمة سلبيات البرنامج الكثيرة !
كل الشكر على التواصل


دمعة شوق
يقولون العقل نعمة . .
كل الود


الغاليه

نحن بودنا انه البرنامج يكون هدفه احياء التراث و هالشي بيسعدنا وبيكون فخر لنا لكن مثل ما تفضلتي الي نشوفه غير و اعتقد بأنهم بعاد بشكل كبير عن الهدف الي نحن نباه و هو احياء التراث من خلال الاحداث الي نشوفها و الوقائع الي تحصل وماخذ الطابع الربحي على حساب دينا و تراثنا و عاداتنا !
ردج منطقي جدا ً وعيبني . .
كل الشكر على التفاعل الجميل

[غرشوب]

_العيون المحتاره_
تواجدكم بالنقاش في طرحنا يسعدنا . .


نبراس الليل
بانتظار رد الاخت الدلووووعه عليك
لا تحرمنا من رأيك عزيزي . .
كل التقدير


خيال الروح

حضوركم يشرفنا . .


اسهر معي ليله

اظن كثير منا يعرف سبب وجود أغلبية الشباب و البنات هناك مب لـ حبهم و عشقهم لفن اليوله التراثي لكن كما هو واضح لـ شي ثاني مثل ما تفضلت والاعمال دايما تكون بالنيات مثل ما يقولون . .
و ماعتقد ابو يرضى انه بنته تطلع وتكون جيه جدام العالم !
اليوم الميدان مايندرى شو بيينا باجر
وجودك وتفاعلك يشرفني
لا تحرمنا . .

[العجيبة]

السـلام عليكــم

انا بعـد بعـرض رايي ..

البـرنـامج كفكـرة جميـل جــدا ، خاصة وان الفكـرة يديدة ما انطرحـت قبـل ..
وتقـديم البـرنـامـج حـلو ومـرتـب ..

مـب مهم شـو هـدفهم من هالبـرنـامج ، فهـو في الظاهـر إحيـاء التراث
وفي الخفــاء سحـب فلوس خلق الله .. مب مهم !

المهم ، واللي طايـح عليه الاعتـراض ، هو ظهـور البنـات في البـرنـامج ..
في رايي المفـروض ما ننقـد على البـرنـامج نفسه أو اللي يشتغلـون عليه ..
البنـات بذاتهـن محـد جبـرهن تواجـدن في ذاك المكـان مع إغراءات خلتكم تشوفون البرنـامج بنظرة سلبية ..
رعـاة البـرنامج والقائمين عليه ما يقـدرون يطـردون حـد يوم ايي هنـاك ..
الا إذا كـان في شـرط يمنع حضـورهن من الأساس وهذا طبعـا من سابع المستحيلات ..


الاعتراض بعـد على اليـولة ..
لا تقـولون يولة الأوليين كـانت غيــر ، كـانت ملابسهم بعـد غيـر
أقـل شي خـام الملابس اللي يلبسـونه ، معقــووولة تلبسـون منه الحين ؟ أكيـد لا ..
نفس الشي أعتقـد ، طـوروا في اليولة شـوي وغيـروا أشياء فيهـا ..
وهالشي مب معناته انقـول إن اللي يســونه ما يسمونه " يـولة "
ع الأقل قـولوا " يولة خـربـانه " إذا تبـون !


المهـم المهــم ..

اللي مب عايبنـي في البـرنـامج
هو نـزعـة الجـاهليـة الواضحــة في البـرنـامج بشكـل فظيييـــع ..
في الدعاية مثلا ، يكتبـون اسم المتسابق بخـط صغييـر ، وقبيلته بخــط كبيـر وكـأنه عنـوان مهم
لدرجــة انـه أنـا مثلا كمتـابعـة من بعيـد لهالبـرنـامج ما أعـرف أساميهم ، أعـرف قبايلهم !


راعي البـرنـامج ، وايــد عنـده صـور شخصيـة :ice:


واللي يقـولون انه البـرنـامج لا يمـت للتـراث بصله
أقـولهم ، لاااا ، هم يالسيين في مكـان مسمينه " قلعـة الميــدان " واييـولون على تراب خخ


مشكـور أخـوي غرشـوب ع المـوضوع
بس ما يـا في وقته ، خلاص جـنـه اليـوم الحلقـة الأخييـرة
ولي فاتـك الفـوت ما ينفع الصـوت ..
يمـكـن يفيـد حق السـنـة اليـايـة اللي يـوعـدون فيهـا بتطـورات جـديدة
ويـاخـوفي يـلموهم كلهم في عـش صغيـرون ولا اييـبـون نعـاشـات وياهم بعـد ..


اسمحــوولي وايـد تكلمــت


العـجيـبــة
2006

[غرشوب]

العجيبة


وين فكرة يديده الله يهديج . . نفس فكرة نجوم الخليج
وبخصوص البنات كان بامكانهم وضع شرط ممنوع تواجد البنات و القايمين ع البرنامج تقولين ما يخصهم بعد عندهم الصلاحيه لمنع تصوير البنات لاغراء الشباب !
انا مب متابع للبرنامج فـ ماكنت ادري انه اليوم الحلقة الاخيرة وهذا ما يهم . . الاهم انه اوضح للناس واقع البرنامج بعيد اً عن التضليل

وكل الشكر على المشاركة العجيبة

[نبراس الليل]

الذي لم استطع فهمه

هل تقييم البرنامج على مبادئ الاسلام وقيمها

ام على العادات والتقاليد ..؟؟؟؟؟

كي اصب حبري على مجرى معلوم

[الغاليه]

اخويه لماح.. اسمحلي بالتعقيب على النقطه اللي اتقول فيها ان للمصور الأحقية في انه يصور

البنات ويركز عليهن دام انهن راضيات بهالشي من خلال تواجدهن في ساحة الميدان ..

تواجد البنات اهناك بالشكل اللي ظاهرات فيه خطأ .. وهالشي مفروغ منه ..

لكن مب من الحكمه والمنطق انه نجاري خطأ البنات بخطأ ثاني ... المصور المفروض مايركز عالبنات .. وخاصة بعد الانتقادات الشديده اللي عارضت هذا الشي .. والادارة التنظيمية لليوله ماعتقد انها مانتبهت .. ولو كان هدفها الاساسي احياء التراث والمحافظه على السمعة الطيبة .. كانت المفروض تمنع المصورين من التركيز على جهة الحريم ... لكن هم يتصرفون مثل اللي مستانس بالعذر ..

وشفنا هالشي مستمر في كل حلقات الميدان ...

البرنامج لو كان له هدف ورساله ساميه مثل مانسمع كل يوم.. المنظمين وكل طاقم العمل بيسعون لانجاح هذا الهدف وتوصيل هذي الرساله للمشاهدين ..

وكل فرد فيهم بيحاول يأدي عمله ويتقنه على احسن وجه بالشي اللي يخدم هذا الهدف ( ومن بينهم المصورين )! ... ..
اي رساله واي قيمه يوجهها برنامج ( تراثي ) من تصوير أماكن الحريم والتركيز عليهن؟!!

تقريبا في كل مجالات الحياة عندنا اماكن للحريم واماكن للريايييل .. واحيانا كثيره اتم احتفالات وتنقل عالهوا .. او تبث في التلفزيون في اي وقت .. المعرووف دايما ان اماكن الحريم لاتصور .. ! لان المرأه بالاساس يجب ان تكون مستوره .. ... فشي غريب من برنامج تراثي مخصص للرجال يقومون ويركزون فيه عالبنات !! ..

باختصار ... المخرج والمنظمين والمصورين غلطانين في اللي يسوونه لانهم يأيدون هالشي ومصرين يسوونه بغض النظر عن الحاضرات هل هن راضيات بهالشيء او لا..

[إسهر معي ليله]

السلام عليكم

أشكرك عـ الموضوع الغاوي،، يستاهل تسويله برنت وتقراه متى ما بغيت :daleel:

الصراحه ما قصرت أخوي،، والأعضاء ما قصروا،،

::
::

الميدان حتى على ايام قرية التراث ما كانوا اييونه الشباب الا عشان البنات اللي هناك
اي تراث هذا اللي ايولون فيه بـ سلاح بلاستيك؟؟،، اي تراث اللي جمهوره بنات؟؟

ترشيحات وخسارة فلوس وبنات طايحات حب في الـ يوييله،، ويويله صورهم موجوده
في كمبيوتر كل بنت،، هذا كله تراث؟؟ فيه أبو يرضى انه بنته تكون جيه؟؟

يوم انه شي دخل بيوتنا وخرب بناتنا ما نباه،، وما نبا التراث،، خلونا عـ التطور اللي
مب كافنا شره،، وبعد تبون تراث يزيدنا شر؟؟

بتقولون والله مب مجبورين تشوفون،، انا معاكم في هـ الشي بس تخيلوا معايه بنت
تسمع من ربيعاتها فـ الكلية فـ المدرسة،، يشدها الفضول تشوف وتسوي مثلهم.. !!

بـ النسبة للجوايز،، اذا كانوا حاطينها قبل فـ ما فيها شك،، لكن اذا كانت الجوايـــــز
من المسجات فـ هذا قمار!! ،، والله يبعدنا ويبعدكم عن الحرام

الموضوع حلو،، واتمنى الأعضاء يناقشون بهدوء وبدون ضرايب وتجريح

::
::
// الله يحفظكم

[سمو الامير]

للجميع باي عم الفرح اختتام البرنامج وفازوا الجميع بهدايا راعي الكرم والجود والذي كان مفاجأة الحفل الختامي وهو معروف نار على علم أنه صاحب المكرمات صاحب السمو الشيخ محمد بن راشد المكتوم حظه الله ورعاه بحق كان المفاجاة المدويه بحضوره الحفل وكذلك فجر مفاجأة كبرى لعام القادم برصد مبلغ سبعة ملايين درهم جوائز منها مليونان للصغار فشكرا لشيوخنا الكرام وأن شاء الله يكون فيه تقييم للبرنامج ومراعاة طلباتكم وتنقيح اليوله من بعض العيوب التي طرحتموها ويتم الحفاظعلى التراث بدون مزايدات ومبروك للخاصوني ولكل الفائزيين وتسلم فزاع راعي التراث وتسلمون جميع الاخوة والاخوات وطارح الموضوع والى القاء السنه اليايه .

[نبراس الليل]

لم أفهم "عسب السهر"

لم أقتنع فأقنعيني جزيتي خيرا

[الدلووووعة]

ياخويه الصحابه كانو يسهرون لقراة القران وعبادة الله
عسب جي يجحلون

وان شاءالله اذا الله راد بسأل المدرسة

[ولد الحكومة]

الميدان ... ياحميدان !!!

والله صدقت اخوي وانا معاك في كل جلمه قلتهاااا ، ويعطيك الف عافيه

من متى اصبح فن اليوله نعش و رقص.

احيد قبل تكون اليوله برشاش مب بقطعه خشب و الي احيده انه بدون اغاني ميحد حمد قمة الانحطاط و ادنى مستوى الاخلاق يوم يكون ضمن الميدان بنات يتفدن المشتركين و يهزن ع الوحده ونص


والاغرب انه أغلب المؤيدين لـ هذا البرنامج الهابط هم من الجنس الناعم "البنات" من ليس لهم علاقة او معرفة بـ فن اليوله :kkk: . .



:puppyeyes: ولد حكومتكم.