<font color='#000000'><span style='color:red'>السلام عليكم ورحمة الله وبركاته</span>

<span style='color:darkblue'>مرحبا جميعا ... اشحالكم عساكم الا بخير

حبيت اكمل لكم موضوع يوميات محيله .... بس المره غير شوي

يعني ما بسألكم ... واللي يبي يسأل عن كلمة ما عرف شو معناها

ترى انا حاضره فاي مفرده صعبه عليكم ... وان شاء الله تستمتعون</span>

<span style='color:darkred'>غشابه هي المنطقة اللي يعيش فيها قوم محمد بن علي واللي هم .. حرمته محيله
واولاده سعيد و علي وبنته غبيشه ، وجيرانهم قوم سلطان بن سيف واللي هم حرمته مريوم
وولده سيف وبنته حمده ....
وهذي المنطقة توجد على أطراف مدينة العين ....
وهالمنطقه كلها رمال وعراقيب و سيوح .....</span>

<span style='color:darkblue'>وكان من زمااااااااااااااااااان ......
محمد بن علي عنده مزرعه اسمها ( النقاله ) ... وكانت هالأيام أيام جفاف والأمطار من فتره طويله ما نزلت
وكان محمد يالس ويا جاره سلطان وهم يسولفون .....

أبوسعيد : الله يرحمنا برحمته ... القيض هالسنه شديد
أبوسيف : هيه والله يا بوسعيد ... ان شاء الله تنزل أمطار الرحمة وتشرب الأرض ...
أبوسعيد : ان شاء الله ... يا سلام عاد يوم تنزل الأمطار وترتوي الأرض وتحيا مره ثانيه ...
شوف وانا اخوك كيف صارت الأرض محيله ... لا عشب ولا شي غاديه غبره ملحه
أبوسيف : الا على طاري الغبره ... شو اخبار النقاله ويا هالمحل
أبوسعيد : الله يعينا ... النخل والحمد لله عايش بس اذا ما نزل المطر ما اظن انه بيثمر زين هالسنه ..
أبوسيف : أن شاء الله بيثمر زين ... وأن شاء الله هالمزون اللي رتفعت تكون بشارة خير
أبوسعيد : أن شاء الله يا بوسيف .....
</span> <span style='color:indigo'>على غشابه ارتفعت مزون ... ياللي طلب الأمطار تييه .... يسند على ولم السليلي ...
يعل النقاله تازم بحور .... وتازم بالعذج الثجيلي .....</span>

<span style='color:darkblue'>أبوسيف : الله يسمع منك ... يالله اسمحلي وأنا أخوك بحدر صوب البيت
أبوسعيد : يا حيك .... سلم على الأهل
أبوسيف : يبلغ سلامك</span>

<span style='color:darkred'>كان اليوم دور غبيشه في الرعي ... ويوم شافت المزون ارتفعت قررت اترد البيت لا اييها المطر وهي ترعى ...
بس الظاهر أن الأمطار نزلت قبل ما توصل غبيشه البيت ... وقامت غبيشه واتذرت تحت سمره هي
وهوشها لين ما يخف المطر ... بس الظاهر أن المطر ما خف بالعكس يزيد ويزيد ... والظلام قرب ...
فقررت ترجع البيت تحت هالمطر ...</span>

<span style='color:darkblue'>فالليل كان المطر ديماني .... وكان الريايل متجمعين في بيت الشعر
مال محمد بن علي وكان هالريال ريال كريم معروف عند العرب بالشهامه والنخوه ....
وكانت خيمته هي دوم عامره بالناس وتسمع سوالف من كل صوب .......

أبوسعيد : يا مرحبا بالعرب ... ويا حيكم الله ..
ابوسالم : الله يحييك .... دام عزك
ابومحمد : ها بومصبح شو اخر علومك واخر سوالفك ....
ابو مصبح : والله يا عرب عندي سالفة ... خبرني واحد اياها وانا طارش الدمام ... من كم شهر
ابوسعيد : شو هالسالفه ....
ابومصبح : السالفه تقولكم .... انه اثنين من العرب رايحين على البعير وفي هالسيوح وهم ضاويين ...
شافوا عيوز غبره تلحقهم ... والاخوان ما عبروها ... ولا كنهم شافوها ... وكان تسرع ولحقتهم ...
وعاتبتهم لانهم ما وقفوا لها ... وبعدين خبرتهم انها بتسير وياهم ... ورحبوبها وسارت معاهم فهالليل ....
وبعد ما مشوا شوي .. طلبت منهم انهم يوقفو ..
وقالت : بسير ورا هالعرقوب وبرجع ... اتريوني
وتأخرت عليهم العيوز ... واستبطوها ...
وقال الاخو لخويه : ترا هالحرمه بطت ... بسير اشوفها شو سالفتها
وراح الاخو يشوف العيوز ...
بس الاخو تأخر عليه بعد ... وقرر انه يروح يطمن على اخوه .... ويوم راح

الله لا راواكم شو شاف ... شاف العيب وشاف شي يشيب له الراس

ابومحمد : شو شاف خبرنا ....</span>

والبقية طبعا يايه .... وان شاء الله عيبكم

والكلمات غير المعروفه <img src="http://oasis.bindubai.com/emoticons/suspect.gif" border="0" valign="absmiddle" alt=':sus:'> <img src="http://oasis.bindubai.com/emoticons/suspect.gif" border="0" valign="absmiddle" alt=':sus:'> جوابها عندنا

<span style='color:indigo'>تقبلوا تحياتي .....

أختكم ... رووح العين</span></font>