جزء ( الخامس عشر)

مع احداث جديده




وبعد ما طلعت الريم من عند ساره وهي خايفه على حياة اخوها فهد وعلى حياة صديقتها ساره لانها تحس ان حياتهم ماراح تستقر بالذات لان حب فهد من طرف واحد..

وراحت الريم البيت وأول ما فتحت باب الصاله شافت فهد قاعد ينتظرها واول ماشافها فهد على طول راح عند الريم ووقف عندها...

فهد وهو واقف عند الريم ومتوتر: هالريم بشري .. شو ردت عليج ساره..
الريم تشوف اخوها وبحزن: ساره تقول أي يوم انت تختاره ..
فهد (وابتسامته العريضه على شفاته) : والله يعني وافقت ..
الريم : هي بس قالت ما تبى حفله ..
فهد : افا عليها فالها طيب .. أي شي هي تبى انا حاضر لها ..
الريم : وقالت الملجه اذا تبى نفس يوم العرس يكون افضل ..
فهد تغيرت ملامحه: افا غريبه ..أحلى الايام أيام الملجه .كيف ما تباها ..
الريم : فهد لا تستعبط يا اخويه.. تعرف ان ساره مغصوبه على الزواج .. يعني باختصار هي مب مهتمه في زواجها..
فهد تضايق: بس لازم تنسى خالد ..خلاص انا بكون زوجها ..
الريم راحت ويلست على الغنفه: يمكن تكون زوجها صح .. بس القلب يا اخويه بعده مب ملكك ..
فهد عصب: الريم شو فيج اليوم يايه تضايقيني ولا شو سالفتج .
الريم : يا اخويه انا خايفه عليك وعلى حياتك..
فهد : أنا اعرف كل شي .. وانا مقتنع بهالشي ..ومرتاح الاهم تكون ساره لي ..
الريم : وقلبها يا اخويه مب لك .. واهم شي بالزواج هو القلب والحب ..
فهد : ان شاء الله بخليها تحبني وتنسى خالد..
الريم : والله اني اتمنى هالشي ..
فهد : المهم عيل ان شاء الله عقب باجر يعني بعد يومين بنروح نخطبها..وباخذ مممممممممممممم ريل عمتي ..
الريم فاتحه عيونها : بس ريل عمتي مب في الامارات ..
فهد : ادري انه مب موجود بالامارات وانه مسافر برع ..بس بخلي ايي ويخطبلي ساره .. بس كم يوم وهو اكيد يوم بيعرف اني بخطب وراح يستانس ..
الريم : على خير ان شاء الله ..




وفي بيتكم خالة ساره .

نوره قاعده عالسرير وتفكر بفارس احلامها او بخطيبها .. ونتفكر بمستقبلها..
هند ماسكه جدول امتحاناتها للثانويه العامه..
هند منقهره : افففففف متى افتك من هالامتحانات ..
نوره صدت لهند : مب أهم شي تفتكين ..أهم شي تبيضين ويوهنا واتيبين نسبه حلوه.
هند : لا حبيبتي انا مب مثلج اهتم بالنسبه وخرابيطها ..اهم شي عندي النجاح..
نوره : بعد البنت الكسلانه ما تفكر الا بالنجاح..
هند : والله كسلانه ولا شاطره أهم شي عندي انجح..
نوره متضايقه ..
هند تشوف نوره : نوروووه ..شفيج متضايقه؟
نوره : ما باقي على ملجتي الا شهر بالضبط وانا للحينه ما جهزت شي
هند : انتي باقيلج شهر على ملجتج وانا شهر ونص على بلوتي يعني امتحاناتي
نوره : ماعرف اسوي حفله ولا بس كتب كتاب يعني بيناتنا ..
هند : والله على راحتج ..
نوره : احسن شي اسوي حفله صغيره بيناتنا يعني اهلي واهل المعرس وتكون الحفله في بيتنا شو رايج..
هند : هي احسن .. لان في حفلة خطوبتج العالم كله ياي .. خليه جذي حفله بسيطه احسن .. بس الحفله بتكون بيتنا ولا بيت اهل المعرس..
نوره : والله اكثر شي يسوون الحفله في بيت اهل العروس..
هند : عيل لازم تختارين باسرع وقت المصصم ..لانه ما شي وقت .
نوره : عشان جذي انا احاتي ..
هند : زين ما دام تقولين ان حفله بسيطه ليش ماتاخذين فستان جاهز وتفتكين مب احسن .
نوره : امممممممممممممممممممم .. والله فكره يبالي جي اسوي .. لاني لين الحين مب مختاره القماش ولا المصمم ..يبالي اختارلي فستان حلو وغريب وبسيط بنفس الوقت ..
هند تدلع: شفتي افكاري الذهبيه
نوره : يالله عليج الحين شو قلتي ..
هند : بعد ربج تراني ذكيه..
نوره : اقول استخدمي هالذكاء في امتحاناتج ..
هند : لا استخدم الذكاء بالاوقات اللي احبها ..
نوره : خلا اروح الحين عند امايه عشان اقولها خلا تجهز على ملجتي لانه ما بقالنا شي ما باقي الا شهر ان شاء الله ..

راحت نوره تتفق ويا امها عشان الملجه والحفله والبوفيه وكل شي ..



اما الريم اتصلت لساره وقالت لها انهم بيون بعد باجر ..

وساره راحت قالت لامها ..
ام ساره كانت في المطبخ..
ساره راحت عند امها وبحزن: امايه ..
الام : عيوني.
ساره: ان شاء الله بعد باجر بيي فهد عشان يخطبني ..
الام تفاجات : شوووووو
ساره : هي يا امي بيي يخطبني لانج تعرفين ان فهد مسوي هالمصايف عشان يتزوجني .. وهو بيي ويا ريل عمته والريم عشان يخطبوني ..
الام : وانتي موافقه يا بنتي ..
ساره والحزن بصوتها : غصبن عني يا امايه اوافق ما عندي خيار ثاني..
الام : زين وانتي تبين حفله لخطوبتج ولا ..
ساره : ما ابي حفله ولا شي ..
الام : ما يصير يا بنتي ..ماشاء الله على نوره شفتي مسويه حفله حلوه..
ساره والدمعه بعيونها: لان نوره ماخذه الشخص عن اقتناع مب غصبن عنها ..وانا قلت للريم ما ابي حفله ولا شي .. ما ابي شي..

راحت ساره من عند امها وهي متضايقه واااايد ..لان حياتها ادمرت بسبب فهد..

وراحت ام ساره اتصلت في اختها ( ام خالد ) عشان تقولها ان خطوبة بنتها بعد باجر وان ساره ما تبى حفله ..بس ام ساره طلبت من اختها وبناتها انهم ايون هاليوم عشان ما تحس ساره انها وحيده ....
ام خالد صكرت التلفون من عند ام ساره وكانت متضايقه وايد على خطوبة ساره .. لانها تحاتي صدمه خالد .. لان خالد للحينه مب مستوعب فقدان ساره..

نوره شافت امها متضايقه وراحت عندها..
نوره تشوف امها: خير يا امايه ليش متضايقه..
الام : بعد باجر يا بنتي خطوبة ساره ..
نوره: انصدمت : والله بهالسررعه.
الام : تعرفين فهد .. يباه ساره باسرع وقت .
نوره تتنهد: اااااااااااه .. الله يعينج يا ساره ..
الام تصد لنوره: قولي الله يعين اخوج ..
نوره : والله اخويه يعرف ان ساره راحت عنه ولازم يقتنع بهالشي..
الام : والله اني اخاف اخبره .
نوره : شوفي يا امايه محد يخبره اذا هو سالنا بنقوله واذا ما سال ما بنخبره..
الام :زين هو وينه الحينه.
نوره : شفته من شويه طالع ويوم سألته وين بيروح قالي بيروح عند ربيعه محمد..
الام : الله يوفقك يا خالد ويسعدك ..
وهني ادمعت ام خالد لانها متضايقه على ولدها لانها تعرف حب خالد لساره من طفولته..
راحت نوره تحصن امها وتواسيها: لا يا امي لا تصيحين فديتج دموعج غاليه ..
الام تمسح دموعها : احاتي على خالد ..والله أخاف يستخف ويتينن..
نوره : لا يا امي ..ما بيصير له الا الخير ..واهم شي انج تدعيله ترى دعاء الام مستجاب..
الام : والله اني ادعيله بكل سجود..
اما خالد فما يعرف عن خطوبة ساره وراح عند محمد .. لان خالد يحاول ينسى ساره بأي طريقه عشان جذي هو دايما يطلع بس مهما طلع وغير الجو والمكان ..حب ساره بعده في قلبه..

خالد ومحمد رايحيين المطعم عشان يتعشون..
محمد : شو رايك يا خالد نطلب اليوم وجبه بحريه ..
خالد : يا حبك يا محمد للأكلات البحريه..
محمد : والله ما شي احلى من الربيان وأم الربيان ..ممممممممم لذيذ..
خالد : خلاص على ذوقك اليوم بنطلب أكلات بحريه..
محمد يشوف ملامح خالد الحزينه.: خالد
خالد رفع راسه : هلا يا محمد..
محمد : بعدك زعلان ..
خالد : طبعا زعلان ..ليش اللي صار فيه شويه.. بس المهم غير السالفه ولا تكلمني عن ساره عشان ما أتضايق اوكي ..
محمد : خلاص على راحتك يالغالي ..
خالد : هي صح تذكرت ..مره قلت لي انك بتقولي سالفه عنك ..
محمد: أي سالفه..
خالد : انك تحب الريم بس ما تقدر تزوجها لان شي يمنعك من هالشي وللحينه ما خبرتني ..
محمد : والله زين اتذكرت سالفتي ..
خالد : السمحوحه يا محمد بس تعرف الظروف الصعبه اللي مرت عليه ..
محمد : لا يالغالي ..مسموح افا عليك ..
خالد : زين شو سالفتك وشو اللي يمنعك من الارتباط بالريم ..
محمد : اسمع سالفتي .. انا من صغري يقولون اني لبنت عمي ..وهي بعد من صغرها قايليلها انها بتكون زوجتي ..ونحن تربينا على هالشي .وانا طبعا ماعارضت على هالشي لان بنت عمي انسانه طيبه وخلوقه ومب انا اللي اقول هالشي ..كل العايله يمدحون فيها ..
خالد : زين وشو المشكله.
محمد: قبل ما تطلعلي الريم..ماكان شي أي مشكله ..لاني كنت موافق على هالشي .أو اصلا ما اقدر اقول هالشي لان راح تكون مشكله.. وأناماعارضت لانها انسانه محترمه وزينه بس...
وسكت محمد ..
خالد : وبس شو يا محمد ..كمل..
محمد : بس من أول ما طلعتلي الريم .والله يا خالد ما قدرت افكر الا فيها واحس اني اذا ما خذتها راح اتخبل واتينن..
خالد : يعني انت خاطب بنت عمك ..سويتو خطوبه .
محمد: لا لا بس كلام ..يعني كلام الاهل بس مب أكثر
خالد : ممممممممممممم ..والحين انت ما تبي بنت عمك ..تبى الريم صح .
محمد : هيه ..ما اقدر بدونها والله اني صرت ما احلم الا فيها والله حبيتها يا خالد حبيتها ..واذا عشت ويا بنت عمي راح أظلمها ..
خالد : وليش تظلمها؟
محمد : لان اذا تزوجتها تفكيري ماراح يكون لها وقلبي راح يكون متعلق في الريم ..
خالد : مممممممممممممممم شوف عندي الحل البسيط ..
محمد : والله ياريت تساعدني ..صدقني ماراح انسى جميلك..
خالد : بكل بساطه روح عند أمك وقولها اللي في قلبك وقولها انك حصلت على الانسانه اللي انت اخترتها ..مب اهلك اللي اختاروها ..لان القلب يوم يختار غير يوم الاهل يختارون ..
محمد فتح عيونه :شو تبى امي تذبحني
خالد: ليش امك عصبيه..
محمد : لا مب جذي ..بس تعرف اذا رفضت بنت عمي.. راح تصير مشكله كبيره بين العايله..
خالد : والله خلا تصير مشكله ولا انك تخسر الانسانه اللي حبيتها .
محمد : يعني من رايك اكلم الوالده
خالد : هي كلمها انت مب خسران ..وشوف الرد ..
محمد : اعرف ومتأكد انها بتعصب..
خالد : تعصب ولا متعصب اهم شي تفهمك وانت حاول تقنعها ..
محمد : على خير ان شا ء الله ..بكلم الوالده بأقرب وقت وان شاء الله تفهمني ..
خالد : ان شاء الله ..

ومحمد كان متردد يكلم امه لان يعرف ان امه مارح توافق انه ياخذ غير بنت عمه .. لان المشكله راح تكبر اذا رفض ..


************************

راحت ام ساره عند ساره بغرفتها وشافت ساره على الكرسي الهزاز وتفكيرها بآخر عالم..
ام ساره : ساره يا امي .
ساره : ماجاوبت لانها سرحانه..
ام ساره بصوت اعلى : سااااااااره ساره ..
ساره من صوت امها قامت من أحلامها: هلا
ام ساره: يا كثر ما تسرحين يا ساره.
ساره : ما بقتلي يا امايه خير الاحلام.(وصدت لامها) : خير يا امي شو بغيتي .
الام : كنت بقولج ان فهد بيي بعد باجر عشان يخطبج .
ساره : زين شو المشكله.
الام : تعرفين ان لازم يكون عندنا محرم وما يستوي اكون بروحي ..
ساره : هي والله راحت عن بالي هالشي..
الام : ماعندنا الا نقول لعمج ناصر
تغيرت ملامح ساره: شوووووووووو ناصر لا لا .
الام : ليش يا بنتي ..ترى ما عندج الا هالعم.
ساره : اصلا هذا ما يستحق يكون عمي .. ما همه غير نفسه وما يهتم غير في مصالحه واعماله وفلوسه..ويوم ابويه الله يرحمه توفى ..ماسال عنا ولا زارنا الا مره في العيد ..
الام : تعرفين ان هالشي مب منه ..من مرته ..مرته المتسلطه .
ساره : اعرف ان عمي على نياته ..وأعرف ان الغلطه من مرته المتحكمه اللي ما تفكر الا في كشختها ومركزها..بس بعد الريال لازم ما يكون سكان مرته وما تكون عنده شخصيه..
الام : المهم يا بنتي نحن نحتاجه ..ما يستوي فهد يدش بروحه بدون ريال ..
ساره بغضب: والله انا ما ابي اشوف هالعم اللي تخلى عنا ..بس شو اقول للضرورة أحكام ..
الام : زين روحي اتصلي فيه..
ساره : لا لا ما ابي ..ما ابي اكلمه ولا شي ..روحي انتي اتصلي فيه ..
الام : انا كيف اتصل فيه..
ساره: اتصلي في زوجته وخبريها المهم اني ما ابي اكلمه يا امايه.
الام : خلاص بتصرف انا ...

راحت الام عشان تتصل في زوجة ناصر يعني مرت عم ساره ..

بعد ما تفقت ام ساره ويا عم ساره اللي هو ناصر اتفق انه اييه واستانس على خطوبة بنت اخوه الوحيده..






***************************
وفي يوم الاربعاء يوم خطوبة ساره

بنات خالتها كانو موجودين بس للحينه خالد مايعرف ان اليوم خطوبة ساره..
وكان الموجودين ريل عمة فهد والريم وعم ساره اللي اسمه ناصر والكل وافق واتفق ناصر عم ساره على المهر وكل شي وحددو يوم الملجه اللي بتكون في شهراغسطيس(شهر 8) يعني عن قريب ساره اما العرس فخلو هالشي على العروسين واي يوم يبون ..

وبعد ما اتفقو على كل شي قرر ناصر عم ساره ان .ينادي ساره لان في الخطوبه لازم الخطيبه اتيي والخطيب يشوفها نظره شرعيه طبعا بشيلتها وعباتها يعني مغطيه شعرها وجسمها .. ..بس ساره عارضت هالشي وقالت ان فهد شايفنها اكثر من مره المهم انها رفضت بشده ..

وفهد ما قال شي لانه يعرف ان ساره معصبه لين الحينه على اللي سواه فهد فيها .. بس فهد سعادته كانت اكبر من أي شي .. لان ساره صارت خطيبته ..

والام طلعت من الميلس وباركت لساره وهي فرحانه وبنات خالتها نوره وهند وام خالد اللي عيونها تدمع لان ساره راحت عن ولدها ..الكل بارك لساره ..بس ساره ماكانت حتى تبتسم لانها كانت تحلم ان خطيبها وزوجها يكون خالد ومحد غيره بس شاءت القدر وغير احلام ساره وخالد.

وطبعا ما سوت ساره حفلة لخطوبتها لانها ما بغت هالشي.. بس بنات خالتها كانو موجودات والريم طبعا كانت فرحانه لان ربيعتها راح تكون مرت اخوها ..

نوره تسلم على ساره : مبروك يا ساره ..عسى الله يهنيج ..
ساره والدمعه بعيونها: أي سعاده اللي بشوفها مع فهد.
نوره : ساره اليوم يوم خطوبتج لا تفكرين في اللي يضايقج.
ساره : خالد يعرف ان اليوم يوم خطوبتي
نوره : لا الصراحه محد قاله ..
ساره : اكيد بيكرهني اكثر.
نوره : لا مستحيل يكرهج ..تعرفين خالد يوم يحب ما يكره حد ..
ساره تحاول انها ما تصيح في هاليوم عشان ما تضايق امها ..بس ما قدرت تخفي حزنها اللي الكل لاحظ هالشي..
يت ام خالد عند ساره وحضنتها : مبروك يا بنتي يا ساره ..الله يوفقج .
ساره يوم شافت خالتها اللي كانت بتكون عمتها يعني ام زوجها صاحت.
ام خالد : لا يا ساره لا تصيحين ليش هالدموع ..
ساره : اسمحيلي يا خالوه
ام خالد: افا عليج يا بنتي ..وانتي شو سويتي عشان اسمحلج.
راحت نوره تواسي ساره ..

لان ساره بالنسبه لها هاليوم عزه مب كانه خطوبتها..

وام خالد وبناتها ردو البيت واول ما وصلو شافو خالد في الصاله ..هني الكل توتر ..
خالد صد شاف امه وخواته..
خالد وهو يشوف امه: زين وصلتو..وين كنتو ؟؟
نوره بلعت ريجها .. ماتعرف شو تقول .
خالد شاف توتر الكل : خير شو فيكم ..؟
محد رد ..
خالد بعصبيه : شو فيكم ..اقولكم وين كنتو ..؟ليش ما ترمسون .
هند : اوووووووووووووه ..انا اللي بقول عشان نفتك من هالمصيبه ..نحن يا خالد كنا (تشوف خالد) كنا في خطوبة ساره ..
خالد اول ما سمع ان اليوم يوم خطوبة ساره حس كان احد طعن بقلبه وقف مكانه وماعرف شو يقول ..
الام راحت عند خالد يوم شافت الصدمه على ملامحه..
خالد ما قدر يستحمل على طول طلع برع البيت ..
ام خالد تناديه: خالد خالد يمه وين بتروح في هالوقت ..
خالد مارد على حد لانه كان مصدوم ..
صح ان خالد عرف ان ساره ما بتكون له ..بس كان عنده أمل انها تغير رايها وما توقع ان بيي هاليوم اللي راح تكون ساره لغيره..