.. رســالة خاصـــة : ممــــكن أتعــرف عليـــــج ؟؟! ..

[حلم الطفوله]

[frame="7 80"]

هاي ثقافه فنيه ويا كثرها مجلات الحش بالفنانين

وهذا ريال له حياته وإنتي بعدج بنوته ما شافت من الدنيا غير محيطها

وهالسؤال إنتي أكثر وحده تقدرين إتجاوبين عليه

لأنه لقلوب محد يعرف شو يسكنها غير أصحابها

بس نصيحه أخويه لا أكثر أعيدها وأكررها عليج

الجرأه أحيانا تجرح صاحبها وتضره

والظاهر الإجابه على سؤالج إنه قلبج هالأيام محتاج لحد يفهمه

ولكن صدقيني مب أي انسان تتعرفين عليه صدفه

تطلبين منه التعرف عليه بيكون صادق وياج

يمكن حقيقه يمكن تجربه لكنها ممكن تفيدج بحياتج

[/frame]

[شوق القلوب]

[frame="7 80"]

انزين...

وجهيني.. دليني.. وين أسير..؟؟

ما ودي أغرق في أحلام الخيال.. مع أشخاص مشهورين...

ما ودي أتبع الضلال.. في علاقات مع شباب طايشين..

وما ودي أضيع في دوامة الغرام مع بنات مشبوهيـــن...

وين أسير..؟؟ على منو أفضي هالطاقه اللي داخلي...؟؟

لمنو أعيش هالمشاعر اللي تهز صدري..؟؟

..

التجأت لج.. وانا في أقصى يأسي.. ورديتيني.. بعد ما خاب أختياري..

[/frame]

[حلم الطفوله]

[frame="7 80"]دامج إنج وضعتي ببالج هالخيارات ...هذا اكبر خطأ

لا تحاولين تلومين حد بعدها لأنه بهالطريقه ما بتضرين غير نفسج

كل انسان يواجه بدنياه عقبات مطبات مشاكل توصله لليأس

لكن فيه ذرة عقل تخليه يميز الصح من الغلط

أوكيه ...بضحك ...بحاور ...بناقش ...ويمكن لحظات آخذ وأعطي

ولكن فيه حد يقولي استوب ولا تتمادين أكثر

فيه عقل يقولي الزياده في الشيء تغطيه وساعات تغرقه

فيه حد يمكن الثانين يفقدون احترامهم لي لو اتجاوزته

دايما حطي مبررات للأشياء علشان تعرفين حدودج

وحتى المشاعر ما فيه انسان خالي من الاحساس وما وده يحب أو ينحب

بس بعد فيه حدود وفيه حواجز تمنعنا من التمادي ويا ناس ما نعرفهم

تذكري الله تعالى بكل خطوه وأكيد بتعدين هالمرحله بالتدريج

أنا ما رديتج ؟ أنا حاولت أوجهج وأبعدج عن طريج مب طريجج

فيج عقل وفكري بكلامي ...ولج مشاعر بتأكد لج إنه إلي بيغي مصلحتج بينصحج وما بيضرج[/frame]

[شوق القلوب]

[frame="7 80"]

كلامج صح..

ومستحيل أعارضه... لكن خياراتي .. مب بايدي..!!

اذا انا عايشه في بيت خالي من المشاعر..! الكل لاهي.. الكل غايص في عالم مختلف... بكل بساطه.. بيتنا مجموعه شمسيه.. لكل منا مساره و دربه..! الكواكب اييها يوم تقترب.. تتصادم... الا نحن... المسارات متعاكسه اكثر من السالب و الموجب ..

ربيعاتي... مممم أقدر أقولج.. تفكيرهم أبسط من ذرات الغبار... وانا محتاجه حد يكبّر من تفكيري... من يخلطني بالتراب..!!

بنات عم أو خال.. ممم بعيدين عني.. وبعدين في أعمارهم و ما اتناسبني.. في الكبير وايد.. وفيه الصغاريه...!

وبعد هاكله... أتلوميني في طلبي...؟؟؟ [/frame]

[حلم الطفوله]

[frame="7 80"]أنا ما ألومج ...أنا أحاول أبين لج خطورة الطريج إلي إنتي سالكتنه

كل انسان يعتقد إنه خياراته مب بإيده وهذا الظاهر بينا كلنا ...
حتى أنا أحيانا أعتقد بهالاعتقاد ...يوم تتعقد عندي الأمور وما أقدر أوصل لنتيجه
سألتي نفسج هذا السؤال ؟؟

ليش أبغي اتعرف على وحده ؟ وإلى أي حد أبغيها تكون قريبه مني؟؟

وهل كل شيء فعلا ينقال للأصدقاء؟؟ وهل فعلا بحصل بحياتي هالصديقه المثاليه؟؟

من واقع خبرتي المحدوده بالحياة ...أقولج فيه صداقه مثاليه لكن بعد بحدود... لأنه مب كل شيء تحسين فيه ينقال للمقربين

ومن واقع خبرتي المحدوده بعد ...بتشوفين إنه لكل شخص منا خصوصياته ... يحاول إنه ما يتناقش فيها إلا بينه وبين نفسه

لأنه مب كل شيء اتحسين فيه ينقال للناس
في حياتنا محتاجين لأهل يحسسونا إنا عايشين ... ومحتاجين لأصدقاء يحسسونا إنا اجتماعيين ...ومحتاجين لأقارب يحسسونا إنا قريبين
مهما اتعاكسنا بمداراتنا وياهم بيظلون هم الاهل ونفسهم الأصدقاء
وبروحج ضربتي مثال المسارات بالكواكب ...وحياتنا وخياراتها مثل هالمدارات يا تصيب ويا تخيب ...بس الفرق إنا نحن نتعلم من خبرات غيرنا فناخذ حصانة من إنا نرمي بنفسنا بأخطاء طاحوا فيها غيرنا

لكبير بتتعلمين منه ولصغير بتتعلمين منه وبتعلمينه بخبراتج لما يكبر

هاي الدنيا والصبر فيها مفتاح الفرج[/frame]

[شوق القلوب]

[frame="7 80"]

كل ما اتردين علي... كل ما أتوهيني أكثر و أكثر..!
انا ما اطلب منج انج تكونين قريبه لحد جنوني..!! مثل ما قلتي.. كل شي بحدود... وانا ما طلبت تجاوز هالحدود..

انا محتاجه.. لج...
مثل ما كلمتيني اليوم..
مثل ما حاورتيني بعقلانيه.. بتوجه صحيح.. وبادراك لمدى حجم تصوراتي و خيالي..

القليل او معدومين.. من يعاملني بأسلوب يحسسنني اني كبيره.. و اني بديت أدخل الحياه الصعبه..

الكل.. ينظرلي اني ياهل و ما أفهم.. يعني جنهم هم من احتكر العقل و مساحاته..!!!!!

تدرين..
قبل لا اطرشلج...
حاولت أشغل نفسي بالقصص.. و القرايه.. وبمثل سني.. ماكان يجذبني غير قصص الرومانسيه و الحب.. فكنت ما اطيح في ايدي قصه... الا وانا عايشه أحداثها... من حب..و فراق.. و شوق.. و بعاد.. أتبكيني.. و اتعبني.. لدرجه انها وصلت لاحلامي..

كنت أعيش فيها دور البطوله.. دور الحزينه.. دور الشريره.. لبست كل الادوار.. في وقت اتحطمت عندي كل الادوار.. في حياتي الواقعيه..

لكن .. كنت من تنتهي القصه.. أرجع الى اللاشي..
فلا أحداث في حياتي.. غير روتين يومي قتل مشاعري.. من بعد ثوره في الاحاسيس.. عشتها مع قصتي..
:no0:

[/frame]

[أتمنى]

أحداث جميلة و فكرة أجمل

:)

حلم الطفولة & شوق القلوب

تسلم قلوبكم ..

وعوافي على الموضوع الجميل

تسجيل متابعه ..

[حلم الطفوله]

بومها ؟؟ مسلسلنا خليجي قح .... :ice:

شاكرين لك مرورك ...

[الحقيقة المرة]

.........

"قل خيراً أو اصمت"
:)
أتمنى ~

[قلوب دبي]

:sad4:
:kcl:
أحداث معاصره
تسرد قواميس في رحاب العاطفه الكامنه لدى الاشخاص
في بيئه تفتقد التميز بين الصواب و الخطأ ..
و تأثير المشاعر المنحرفه في الشخص السوي ليقع
في مسلك مليئ بالاشواك، قد يكون الهروب الى عالم الجنون افضل و أرحم ..

شكرا جزيلا على الطرح ..

قلوب دبي

[دانة حتا]

كــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــول
يالله الباااااااااااااجي

[حلم الطفوله]

[frame="7 80"]تدرين

المشكله إنج تحسين بفراغ كبير وبضياع أكبر بحياتج

وأكيد إنه الحياة والوسط إلي عايشتنه لهم الدور لكبير باحساسج هذا

مستحيل تكونين ياهل ؟؟ لأنه من يفكر بهالأسلوب أكيد كبير

كبير بعقله وفهمه وإدراكه لكل شيء حوله

يمكن نحن بنتم صغار بعيون أهالينا حتى لو كبرنا ؟؟صدقيني بنتم صغار

هالفكره إلي مستحيل يقتنعون فيها حتى لو حاولنا المستحيل وأقنعناهم بإنا كبرنا ؟؟ بعدنا يهال

ما أدري والله ؟حب زايد منهم أو يبون يكبرون نفسهم ويصغرونا

وأكيييد الأحداث من حولج من وسائل إعلام وقصص بنات بتخليج ادورين عن قصص حب رومانسيه ... يمكن بتكون بداية مراهقه اتعيشينها... وسكنت احساسج ...وبترافقج حتى بأحلامج ...

يمكن هو هروب من الواقع لحلم تقدرين تحققين فيه أحلامج على أرض الأحلام ؟؟ يمكن محاولة فاشلة للبحث عن حب خيالي ؟؟ يمكن فراغ تحاولين تملين فيه فراغج واحساسج بإنج كبرتي وبحاجه إنهم يفهمون إنج كبرتي ؟؟

بس أكيد روتين حياتج بحاجه للتغيير ... لكن التغيير لازم يكون بشيء إيجابي ...لأنج أكيد وبدون مجامله انسانه كبيره بتصرفاتج

تفكيرج بهالأشياء يدل على إنج فاهمه الصح وبتحاولين تعدين هالمرحله بإيمانج وثقتج بنفسج

دوري حولج أكيد بتحصلين حد قريب منج ...

وطبعا وجودي بهالفتره بحياتج بتكون مرحله وبتعدي

الله يسهل أمورج[/frame]

[المزوحي]

وأنا ممكن اتعرف عليج ؟؟

شو بيصير يوم ببوح لج باللي في خاطري ؟؟ أنا ما أطلب منج شي صعب ولا مستحيل ..
أطلب منج تسمعيني .. وعندي احساس إنج بترفضين هالخطوة .. عشان ما استمر بالبوح واتعلق بج ..
لكن ابعد من أولها أحسن عسب ما انجرح بعدين

شوق القلوب . حلم الطفولة .. الصراحة الرسالة الخاصة هاااي شي ..

[لبن مثلج]

احس انها مسرحية واقعية ... ونحن المتفرجين

[سفير الخيال]

شوق القلوب وحلم الطفوله


ما شاء الله عليكم :)


سرد جميل جدا


موفقين بإذن الله