يستاهلون الشكر... يستاهلون الضرب

[الجنيه]

السلام عليكم ورحمة الله وبركاته ...


سبحان الله في ناس وايد نغفل عنهم وأحيان كثيره نتناساهم ،،،

لكـــــــــــــــــــــــ ـــــــــــــــــــــــــ ـــــــــــــــــــن

لو فكرنا وأمعنا النظر أنشوف أنه لهم الفضل الكبير في العيشه الي عايشينها وحياتنا ....

اليوم الله يسلمكم وكعادتي يوم ابي ارقد زياده أخلي حد يوصلني الدوام وبينما أنا في طريقي للدوام وعيوني غرقانه نوم قعدت أتأمل الشارع أول مره أحس أني قاعده أدقق في الشارع أو بالأحرى أدقق بنظافه الشارع وقلت في خاطري الله يعطيهم العافيه صدق يستحقون كلمه شكر من أعماق القلب عرفتوهم منو ؟؟؟


عمال النظافه ( أو التنظيف )

صدق الواحد قلبه ينشرح من شوفة الشارع نظيف يلامع غير أنه يعطي البلاد مظهر حضاري شكل جميل ... بس آآآآآآآآآآآآآآآآخ منهم آآآآآآآآآآآآآآخ أكـــــــــــــرههم ...

يعني ما أتعيبهم البلاد نظيفه لازم يوسخون ويبينون للناس أشكثر هم قذرين وما يعرفون شو تعني النظافه .. عرفتوهم منو ؟؟؟!!!

هاييل الله يسلمكم الناس الي يحبون يشوهون جمال البلاد الناس الي ما يستحون ولا يحسون على دمهم يوم يفرفرون بقايا الفضلات والوسخ من مواترهم ...

أنقهرت من خاطري عند الاشاره وبينما أنا مستغرقه في التفكير والتدقيق بنظافه الشارع .,,, شفته وتمنيت لو أقدرأنزل من الموتر وأعطيه كـــــــــــف يصحيه للسلوك المشين الي سواه تخيلو حضرة جنابه أكل حلاوه وفر الجيس من الدريشه مب قهر ؟؟؟!!! وجان زين لو هو ياهل صغيرون ما بنقول شي مع أنه التصرف خاطىء بس بعد بنمشيها كونه صغير وما يفتهم لكن واحد شحط يوقف على زنده ......... الي ما يتسمى ,,

ياخي عيب ريال أشطولك وأشعرضك تتصرف مثل هالتصرف الخايس يعني كان بيطيح نصه لو خلى الجيس عنده وفره في اقرب حاويه قمامه ؟؟

والا هو من حملة شعــــــــــار
,,, ليش ما أوسخ ؟؟؟ وعمال النظافه شو خانتهم غير ينظفون من بعدنا ؟؟؟؟!!!!

حرام لو هم شغلتهم التنظيف هذا ما يعطينا الحق نتصرف بهالشكل ...


شو رايكم بكلامي ؟؟؟ هل أنا أبالغ والا فعلا عمال النظافه يستحقون الشكر وبعض الناس الضرب ؟؟؟

[قرموشة]

صدقج والله .. لا انتي ما تباالغين .. بالعكس كلامج صحح

.. في ناس ما تستحي على ويهها .. يحاولون انهم يخربون شكل الشارع بأي طريقة ..
ويستااااهلوووووون الضرب ونص ..

وعمال النظافه الله يعطيهم العافيه يستاهلون كل الشكر .. على هـ الشغل اللي يشتغلونه وهـ الكرف .. ولكن ما يحصلون من الناس غير انهم يوصخون الشوارع بقذارتهم .. الله يهديهم

وتسلم يمناج على الموضوع ..
كل الود .. قرمــ ـ ـ ـ ــــــــــوشة

[العجيبة]

أنا أؤيـــــد وبشدة ، عمال النظافة يستحقون التكريم والشكر ، وبعض الناس يبالهم ضرررب ..!

هالشي بالضبط مثل ما ينطبق في الشوارع ، ينطبق على المدارس ، في مدرستنا مثلا ، بنااات كبـار كل وحدة أطول عن الثانية ، وبيتيمعن في مكـان وبيشلن عمارهن عقب ما يخلصن أكل ، وما يكلفن عمارهن يودن الوصاخة في أقرب زباله !! شووو هاااا والله عييـب .. بس وين اللي يفتهمون ..

ونظمنـا تكريم للعاملات في المدرسة ، على أساس البنـات يعتبـرن ويلتفتن لهالفئة ، لكن الاحساس معدوم في الكثير منهن .. ساءت الأحوال اكثر ، وبعدها طرحت فكرة أسبوع النظافة في المدرسة كانت الردود تقووول لااااااا شوووو مدرسة ثانوية ، عيب نشهـّـر بأسبوع مثل هذا !! مستهينين بالنظافة !

والناس يوم يفـرون الزبالة من نوافذ سياييـرهم دليل على اهمالهم ، وما يدرون إنهم يعكسون في الشارع أو أي مكان عام واقعهم داخـل بيوتهم ، وبالتالي يدللون على عاداتهم السيئة !

والظاهر المخالفة مب نافعة ويا كثيـر من الناس ، والمخالفة هاي ما تنعطى الا لاصحاب السيارات
أتمنـى يسوون مخالفة للي يمشـون ويفرون الزبالة .. سمعت مرة إن في دولة تعاقب اللي يعقـون اللبـان ع الأرض !!

وبعض الجهات المختصة بعمال النظافة " الله يهديهم " ما نطلب منهم تكريم أو شكر هالعمـال
ولكن المفروض يعطوهم رواتبهم ومعاشاتهم ، وهالشي حقهم مب يذلوهم على فلوس هي من عرق جبينهم ! هم ويين عن قول الرسول صلى الله عليه وسلم " أعط الأجير أجره قبل أن يجف عرقه " ؟؟


موضوعـج مهم يا أختي ..

شكـرا على الطرح

[الجنيه]

قرموشه ...
يلا عيل شدي حيلج بنسوي حملة مكافحه الوسخين وبنخليهم ينظفون الشارع يوم كامل عقاب عشان يحسون بقدر وتعب الي يشتغلون وينظفون كل يوم ...


بوزايد ...

انت لو في منك أثنين جان خربت الدنيا ....
تشكر على المرور ...

[دانة حتا]

ما اقوول غير
صدقــــــــــــــــــــــ ـــــــــــتي

[حبوبه دبي]

أنــا ويــاج اختيــه فـي كل كلمــه قلتيــهــا

يستــاهلــون الشكـــر اكيـــد ،،

الــواحد اصلاً مــن يشــوفـهم يــرأف بحــالهم واللــي يظهــر منــا نعطيــه هذا اقــل شــي انســويه

اخ يــالقهـــرر !!

مــوقف قهـــربي

وانــا واقفـه فـ الزحمــه شفــت وااحد فتح البــاب وفــر غــرشة مــاي تحت المــوتر وروٌح

شــو فيهــا يعنـــي لــو خليــتهــا ليــن مــاتــوصل !!

تسلميـــن اختيــه ع المــوضــوع الحلــو



والسمــوحه

[ذنـيـنـي]

الصراحه اكثر ناس احتقرهم هم الي يعقون الوصخ في الشارع

الحمدلله انا متعلم حركه من ابويه الله يحفظه و تقريبا كلنا نسويها,, يعني انا و اخواني و عيال عمي و في نفس الوقت علمتها ربعي

و هي اني اعلق الكيس مال محطه البترول عند جير السيارة و احط فيه القراطيس و غراش الماي و الكلينكس او اي شي ابغي اعقه,, و قبل ما اوصل البيت ابطل دريشه سيارتي و اعق الكيس في الزباله - الله يعزكم - يعني حركه ولا اسهل للمحافظة على النظافه لكن وين بنيب احساس للي ما يحسون و بنفهم منو انه هالشيء غلط

و في ظاهرة ثانية ترفعلي الضغط و هي -الله يعزكم- ظاهرة البصق على الارض ,, شو بيكون موقفنا يوم نشوف واحد عند الاشارة مبطل بابه سيارته و -عز الله السامعين- يتفل في الشارع,,
والله اني اشمئز منهم الي يسوون جي,, يعني عنبوكم ما تعلمتوا في بيتكم انكم ما توصخون المكان الي عايشين فيه

تسلمين الجنية على الموضوع

[الجنيه]

دانة حتا

شاكره تواجدج عزيزتي


حبوبه دبي

تدرين يبالنا نظام اسبشل الي يفر وسخ في الشارع يرد عليه اتوماتيكاً يعني واحد فر مثلا غرشه ماي اول ما اتدق الشارع اترد من وين ما يت يعني ترجع في ويه الي فرها أضني وقتها بيتأدبون...


ذنـيـنـي

الله يخلي لكم الوالد ويطول بعمره ان شاء الله ... الصراحه حركه وايد حلوه أنا عندي من هالأجياس في موتري ما احب حد يوسخه ويوم اوصل البيت انزل الأجياس وأغيرها ما ياخذ مني اكثر من دقيقه..

أخييييييييييييييييييييييي يييييي الله يخسهم هاييل الي يبصقون في الشوارع لووووووووعه الله يلوع بجبودهم خصوصا أحم أحم الي ما يتسمون ...

هذا ان دل فهو يدل على انهم وسخين وقذرين حتى في بيوتهم مع انه في ناس يتصرفون بمبدأ مال عمك ما يهمك يعني البيت لازم يكون نظيف والي يوسخ يوقعون به اقسى انواع العقاب بس برع البيت حلال لانه في عمال نظافه هم الي مسؤلين عن التنظيف وهاي شغلتهم ,,,

الله المستعان

[ألم ترى]

بسم الله الرحمن الرحيم
يستاهلون الشكر والتقدير ولو اني واحد ن هاييل الناس

من هذا الموضوع وبعد ما اخجلتني سطوره سأقلع عن التوسيخ وما ارميه على تلك الشوارع النظيفة
شكرآ ع الطرح وبارك الله فيك وفي اناملك

ربي يحفظك

[تحفه]

ذكرتوني في ماما .. دايما كل ما تشوف هنود يتفلون على الشارع توقف سيارتهم وتهزبهم .. ومره الريال استلعن جان تتصل في الشرطه اتخبرهم عن رقم السياره .. والله انا وايد انقهر من الناس الي ما تهتم وتوصخ البلاد

[حلم الطفوله]

والله صدقتي إختيه الجنيه ...يبالهم طراق معتبر على ويههم:narr:

بخبرج عن سنغافوره ....كل سنغافوري أو أي زائر لبلادهم يعلمونه قواعد النظافة بحذافيرها
يعني ممنوع منعا باتا إنج تعقين حتى ولو لبانه على الأرض ...عدهم هوس مش طبيعي بالنظافه
وكرمتي حتى التفال ممنوع بشوارعهم ...
شو رايج يالجنية ...نسفر إلي يوصخون بلادنا سنغافوره يعلمونهم النظافه:kkk:

والله يعطي عمال النظافه الصحه والعافيه ....بدونهم لبلاد ما تسوى

موضوع ممتع عزيزتي ويناقش قضيه واقعيه ....اتمنى الكل يفهم إنه نظافة لبلاد واجهة حضاريه لساكنيها

[الجنيه]

محب الشيخين

أخوي الكريم مب عيب أنه نخطي بس العيب أنه نستمر فيه ,,,
أحييك على المبادره الطيبه ...
وان شاء الله تترك هالعاده لأنها تضرك وتضر بلدك ولاتنسى أنه سلوك الشخص يعكس شخصيته وأطباعه وكيف هو عايش ...
بس جد أتمنى تبعد عن هالتصرف الغير حضاري ..

موفق ان شاء الله ،،



ام خدود

الله يعطيها العافيه ماماتج زين أتسوي فيهم ,, واذا في منها أثنين بس تنظف البلاد ..


حلم الطفوله

حبوبه أخاف أنطرشهم سنغافوره يمكن يتعلمون النظافه بس الخوف أييبون طبايع وعلوم هل سنغافوره ترا نحن العرب معروفين دايماُ ناخذ الشي السلبي والي ما يناسبنا من الغرب ..

الله المستعان ...